1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
7/2026 FORU LEGEA, maiatzaren 8koa, zeinak xede baitu Ablitasko Udalaren herri-lurretako 59.873,41 metro karraturen desafektazioa onura publikoko deklaratzea eta onestea.
NAFARROAKO FORU KOMUNITATEKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako:
FORU LEGEA, ZEINAK XEDE BAITU ABLITASKO UDALAREN HERRI-LURRETAKO 59.873,41 METRO KARRATUREN DESAFEKTAZIOA ONURA PUBLIKOKO DEKLARATZEA ETA ONESTEA.
ZIOEN AZALPENA
Ablitasko Udalak eskatu du herri-lurretako 59.873,41 metro karraturen desafektazioa onura publikoko deklaratzea eta onestea. Hain zuzen, herri-lurretako 1302 eta 1303 lurzatiak eta 894 metro karratu bide dira, Ablitasko Udalaren herri-ondasun gisa afektatuak daudenak.
Lurzati horiek desafektatuz eta ondoren trukea eginez lortu nahi den helburua da Ablitasko Ureztatzaileen Elkartea Lodosako ubideko urak erregulatzeko putzua, ponpaketa-estazioa eta transformazio-zentroa dauden lursailen jabe bihurtzea, eta, halaber, 801,9 kWp-eko autokontsumo elektrikoko eguzki-instalazio fotovoltaiko baten proiektua aurrera eramatea.
Nafarroako Toki Administrazioari buruzko uztailaren 2ko 6/1990 Foru Legearen 140. artikuluaren 5. apartatuan xedaturikoaren arabera, Ablitasko Udalak eskatzen duen desafektazioa foru-lege bidez onetsi behar da, eremuak lurzati txikiaren definizioaren mugak gainditzen dituelako.
1. artikulua. Onura publikoaren deklarazioa.
Onura publikoko deklaratzen da eta onesten da Ablitasko Udalaren herri-lurretako 59.873,41 metro karraturen desafektazioa. Hain zuzen, herri-lurretako 1302 eta 1303 lurzatiak osorik eta 894 metro karratu bide dira, Ablitasko Udalaren herri-ondasun gisa afektatuak daudenak; Ablitasko katastroko 10. poligonoan daude guztiak. Lur horiek herri-ondasun gisa mantenduko dira foru-lege honen 2. artikuluan adierazitako moduan trukea egin bitartean.
2. artikulua. Zuzenean trukatzeko baimena.
Baimena ematen zaio Ablitasko Udalari aurreko artikuluan deskribatutako lurren trukea egiteko Ablitasko Ureztatzaileen Elkartearen jabetzakoak diren 124.438,67 metro karraturekin (1. poligonoko 2514 lurzatia, 5. poligonoko 1706 eta 1814 lurzatiak, 7. poligonoko 884 eta 890 lurzatiak eta 8. poligonoko 598 eta 602 lurzatiak, osorik), Ablitasko Ureztatzaileen Elkarteak Lodosako ubidearen urak erregulatzeko putzua, ponpaketa-estazioa eta transformazio-zentroa dauden lurren jabetza eskuratu ahal izateko eta, halaber, 801,9 kWp-eko autokontsumo elektrikoko eguzki-instalazio fotovoltaiko baten proiektua aurrera eramateko, betiere honako baldintza hauek betetzen badira:
a) Trukea egiteko itunean klausula batek xedatu dezala lurrak herri-ondarera itzuliko direla baldin eta desafektazioa bultzatu zuten xedeak edo desafektazioaren baldintzak desagertzen badira edo betetzen ez badira.
b) Itzultze-klausula hori ager dadila trukeak formalizatzeko agiri publikoetan eta horiek Jabetza Erregistroan inskribatu daitezela.
c) Ablitasko Udalak 2024ko maiatzaren 15ean onetsitako baldintza-agirian jasotako estipulazioak bete daitezela, Ablitasko 10. poligonoko 1302 eta 1393 lurzatiei eta 894 metro karratu bideri dagozkien 59.873,41 metro karratu herri-lurretatik desafektatu ahal izateko.
Azken xedapenetako lehena.–Aplikazio eta garapenerako xedapenak.
Nafarroako Gobernuari ahalmena ematen zaio foru-lege hau aplikatu eta garatzeko behar diren xedapen guztiak eman ditzan.
Azken xedapenetako bigarrena.–Indarra hartzea.
Foru-lege honek Nafarroako Aldizkari Ofizialean argitaratu eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2026ko maiatzaren 8an.–Nafarroako Foru Komunitateko lehendakaria, María Chivite Navascués.
Iragarkiaren kodea: F2606867
