1. NAFARROAKO FORU KOMUNITATEA
1.7. BESTELAKOAK
881/2026 EBAZPENA, 2026ko apirilaren 28koa, Nafarroako Unibertsitate Publikoko errektorearena, zeinaren bidez aldatzen baita Nafarroako Unibertsitate Publikoko Graduko Ikasketa Ofizialetan onartua izateko Araudia –Gobernu Kontseiluak onetsi zuen 2025eko ekainaren 17an hartutako erabaki baten bidez (2025eko 129. NAOa, ekainaren 30ekoa)–.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agindua ematen dut Gobernu Kontseiluak 2026ko apirilaren 28an hartutako erabaki bat argitaratzeko. Erabaki horren bidez, Nafarroako Unibertsitate Publikoko Graduko Ikasketa Ofizialetan onartua izateko Araudia aldatzen da –Gobernu Kontseiluak onetsi zuen 2025eko ekainaren 17an hartutako erabaki baten bidez (2025eko 129. NAOa, ekainaren 30ekoa)–.
"ERABAKIA, NAFARROAKO UNIBERTSITATE PUBLIKOKO GRADUKO IKASKETA OFIZIALETAN ONARTUA IZATEKO ARAUDIA ALDATZEN DUENA –araudia Gobernu Kontseiluak onetsi zuen 2025eko ekainaren 17an hartutako erabaki baten bidez (2025eko 129. NAOa, ekainaren 30ekoa)–.
Gobernu Kontseiluaren 2025eko ekainaren 17ko erabakiaren bidez (2025eko ekainaren 30eko 129. Nafarroako Aldizkari Ofizialean argitaratua), Nafarroako Unibertsitate Publikoko Graduko Ikasketa Ofizialetan onartua izateko Araudia onetsi zen.
Arau hauetan ezarritakoaren arabera onetsi zen araudi hori: Hezkuntzari buruzko 2006ko maiatzaren 3ko 2/2006 Lege Organikoa, Hezkuntzaren Kalitatea Hobetzeko 2013ko abenduaren 9ko 8/2013 Lege Organikoak emandako idazketarekin; Unibertsitate Sistemari buruzko 2023ko martxoaren 22ko 2/2023 Lege Organikoa; eta 2024ko ekainaren 11ko 534/2024 Errege Dekretua, zeinaren bidez arautzen baitira graduko ikasketa unibertsitario ofizialetara sartzeko baldintzak, sartzeko probaren oinarrizko ezaugarriak eta onartua izateko prozedurari buruzko oinarrizko araudia.
Araudia onetsi ostean, beharrezkotzat jotzen da lehentasun ordena ezartzea desgaitasuna duten ikasleentzat gordetako ikaspostu kupoan, desgaitasun maila handiagoa duten ikasleak leheneste aldera. Halaber, beharrezkotzat jotzen da onartua izateko notaren kalkuluari eta ikaspostuen lehentasun ordenari buruzko zenbait hobekuntza txertatzea ikasketaz eta/edo unibertsitatez aldatzeagatik onartua izateko prozeduran.
Ikasleen Gaietarako, Unibertsitateko Bizitzako eta Konpromiso Sozialeko errektoreordeak proposaturik, hau da Nafarroako Unibertsitate Publikoko Gobernu Kontseiluak 2026ko apirilaren 28an egindako bileran hartu duen,
ERABAKIA:
Lehenbizikoa.–Onestea Nafarroako Unibertsitate Publikoko Graduko Ikasketa Ofizialetan onartua izateko Araudia eranskinean ezarritako moduan alda dadila. Gobernu Kontseiluak 2025eko ekainaren 17an hartutako erabaki baten bidez onetsi zen araudia (2025eko ekainaren 30eko 129. Nafarroako Aldizkari Ofizialean argitaratua).
Bigarrena.–Araudi hori 2026-2027 ikasturtetik aurrera aplikatuko zaie Nafarroako Unibertsitate Publikoan onartua izateko prozedurei.
Hirugarrena.–Erabaki honen berri ematea Ikasleen Gaietarako, Unibertsitateko Bizitzako eta Konpromiso Sozialeko Errektoreordetzari, Irakaskuntzako Errektoreordetzari, fakultate, eskola eta sailetako zuzendaritzei eta dekanotzei, Irakaskuntza Zerbitzuari eta Sarbidearen, Beken eta Tituluen Atalari.
Laugarrena.–Erabaki hau Nafarroako Aldizkari Ofizialean argitaratzeko agindua ematea.
Bosgarrena.–Erabaki honen aurka zilegi da administrazioarekiko auzi-errekurtsoa jartzea Iruñeko Auzialdiko Auzitegiko maila bereko atalari zuzendua, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Unibertsitate Sistemari buruzko 2023ko martxoaren 22ko 2/2023 Lege Organikoaren 38.4 artikuluan eta Nafarroako Unibertsitate Publikoaren Estatutuetako 144.1 artikuluan xedatutakoarekin bat etorriz".
Iruñean, 2026ko apirilaren 28an.–Errektorea, Ramón Gonzalo García.
ERANSKINA.–NAFARROAKO UNIBERTSITATE PUBLIKOKO GRADUKO IKASKETA OFIZIALETAN ONARTUA IZATEKO ARAUDIAREN ALDAKETA
Lehenbizikoa.–5. artikuluari 7. apartatua erantsi zaio, eta honela geldituko da:
7. Desgaitasuna duten pertsonentzat gordetako kupoan hau izanen da lehentasun ordena:
a) Lehenik, %33ko desgaitasun maila edo hori baino handiagoa dutela egiaztatzen duten ikasleak, 2022ko urriaren 18ko 888/2022 Errege Dekretuan ezarritakoaren arabera (zeinak desgaitasun maila aitortu, deklaratu eta kalifikatzeko prozedura ezartzen duen), edo desgaitasuna egiaztatzeko unean indarrean dagoen araudi baliokidean ezarritakoaren arabera.
b) Bigarrenik, desgaitasun arrazoi pertsonalei lotutako hezkuntza premia berezi iraunkorrak dituzten ikasleak, baldin eta ordura arteko eskolatzean laguntza eta baliabideak behar izan badituzte hezkuntzako erabateko inklusiorako.
Bigarrena.–13. artikuluaren 4. apartatua aldatu da, eta honela geldituko da:
4. Eskatzaile bakoitzaren ikasketetan onartua izateko nota araudi honen 4. artikuluan ezarritakoaren arabera kalkulatuko da. Onartua izatea eskatzen den ikasturtean Nafarroako Unibertsitate Publikoan indarrean diren ponderazio parametroak aplikatuko dira kalkulua egiteko.
USPa (edo proba baliokidea) deialdi arruntean gainditu zuten ikasleen notak zehazten badu artikulu honen 3. apartatuan aipatutako atalase-nota, ikasketetan onartua izateko nota kalkulatzeko ez da kontuan hartuko ikasleek zer kalifikazio atera zituzten jatorrizko graduko ikasketetan hasi ziren urteko deialdi berezian, baldin eta deialdi horretara aurkeztu baziren.
Hirugarrena.–15. artikuluaren 1. apartatua aldatu da, eta honela geldituko da:
1. Aurkeztutako eskaerak ordenatzeko, lehentasun irizpide hauek erabiliko dira esleipenean:
a) Espainian lanbide jarduera arautuak egiteko gaitzen duten graduko ikasketa ofizialetarako, lehentasuna izanen dute Espainian lanbide arautu bera egiteko gaitzen duten ikasketetatik datozen ikasleen eskaerek, eta, gero, izen bera duten titulazioetatik edo jakintza-adar berarekin loturik dauden titulazioetatik datozen ikasleenek.
b) Graduko gainerako ikasketa ofizialetarako, izen bera duten edo jakintza-adar berari lotuta dauden titulazioetatik datozen ikasleen eskaerek izanen dute lehentasuna.
Iragarkiaren kodea: F2606303
