1. NAFARROAKO FORU KOMUNITATEA
1.7. BESTELAKOAK
130E/2026 EBAZPENA, apirilaren 15ekoa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez partez onartzen baita Monteagudoko udal mugartean landare-kontserbak prestatzen dituen instalazio baten ingurumen baimen bateratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Horticola D’Aucy SA da.
Espediente mota | Ingurumen baimen bateratuaren baldintzak aldatzea |
Espedientearen kodea | 0001-0061-2026-000009 | Hasiera eguna | 2026-01-30 |
Kudeaketa unitatea | Ekonomia Zirkularraren eta Berrikuntzaren Zerbitzua |
Telefonoa | 848426254-848427587 | Helbide elektronikoa | autprema@navarra.es |
Sailkapena | Legeria | Jarduera |
17/2020 Foru Legea, abenduaren 16koa | 3. eranskina / 13.2 taldea |
1/2016 Legegintzako Errege Dekretua, abenduaren 16koa | Sartu gabeko zentroa |
2010/75/EB Zuzentaraua, azaroaren 24koa | Sartu gabeko zentroa |
21/2013 Legea, abenduaren 9koa | Sartu gabeko zentroa |
Instalazioa | BARAZKI KONTSERBEN FABRIKAZIOA |
Titularra | HORTICOLA D’AUCY SAU |
Ingurumen identifikaziorako zenbakia | 3117301585 |
Tokia | Los Fueros etorbidea 41, 4. poligonoko 232. lurzatia, Monteagudo |
Koordenatuak | UTM-ETRS89, 30N eremua, X: 608.594,000 eta Y: 4.646.581,000 |
Udalerria | MONTEAGUDO |
Proiektua | Sortutako hondakin berri batzuk sartzea, 150101, 150103 eta 150107 EHZ kodeak dituztenak; eta 020399 EHZ hondakinerako baimendutako eragiketak zabaltzea. |
Egun jardunean den instalazio horrek ingurumen baimen bateratua du, Ingurumenean Eragina duten Jarduerak arautzen dituen abenduaren 16ko 17/2020 Foru Legearen hirugarren xedapen iragankorra aplikatuta eman baitzitzaion; izan ere, jarduera hori sarturik dago aipatutako foru lege horren 1. eranskineko 13.2 taldean.
2026ko urtarrilaren 30ean, titularrak bere ingurumen baimen bateratuan dauden baldintzak aldatzeko eskatu zuen, zehazki:
a) III. eranskinean, sortzen dituen hondakinen zerrendan, hiru hondakin berri sartzeko, 150101, 150103 eta 150107 EHZ kodeak dituztenak; paperezko eta kartoizko ontziei, zurezko ontziei eta beirazko ontziei dagozkie.
b) Baimenduta duen 020399 EHZ hondakinerako, eskatzen du R13ra zabaltzeko baimenduta dituen kudeaketako azken eragiketak.
Ekonomia Zirkularraren eta Berrikuntzaren Zerbitzuak, aldaketa horiek aztertu ondoren, ondorioztatu du onargarriak direla a) puntuko aldaketak, instalazioaren funtzionamendu egokia ahalbidetuko dutelako, ingurumenari dagokionez. Aldiz, ezin da onartu b) puntuan eskatzen duen aldaketa, R13 motako eragiketa bat kudeaketako azken eragiketa gisa sartzekoa, R13 eragiketa delako "hondakinak biltegiratzea, R1etik R12ra zerrendatutako edozein eragiketaren zain". Bestetik, R12 eragiketei dagokie "hondakinak trukatzea, R1etik R11ra zerrendatutako edozein eragiketa egiteko haiekin; hor sartuak daude balorizazioaren aurreko eragiketak, aldez aurreko tratamendua barne, R1etik R11ra zerrendatutako edozein eragiketa baino lehenagokoak"; beraz, inoiz ere ez dira balorizazioko azken eragiketak.
Ingurumenean Eragina duten Jarduerak arautzen dituen abenduaren 16ko 17/2020 Foru Legearen 28. artikuluan xedatutakoa aplikatuz, bidezkoa da ingurumen baimen bateratua aldatzea.
Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Partez onartzea Monteagudoko udal mugartean landare-kontserbak prestatzen dituen instalazio baten ingurumen baimen bateratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Horticola D’Aucy SAU da.
Bigarrena.–Suteen aurkako segurtasunari dagokionez (abenduaren 3ko 2267/2004 Errege Dekretua), instalazioan biltegiratutako hondakinen kopuruak ez du handituko ingurumen baimen bateratua emateko espedientearen dokumentazio teknikoan kalkulatutako arrisku intrintsekoaren maila.
Hirugarrena.–Ebazpen hau argitaratzea Nafarroako Aldizkari Ofizialean.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren aurka, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Laugarrena.–Ebazpen hau igortzea, behar diren ondorioak izan ditzan, Horticola D’Aucy SAUri, Monteagudoko Udalari eta Babes Zibileko eta Larrialdietako Zerbitzuari.
Iruñean, 2026ko apirilaren 15ean.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.
Oharra: Ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/ConsultasAAU.html#/ConsultaAutorizacionesAmbientalesUnificadas.
Iragarkiaren kodea: F2605717
