Iragarkia

86. ALDIZKARIA - 2026ko maiatzaren 5a

1. NAFARROAKO FORU KOMUNITATEA

1.7. BESTELAKOAK

38E/2026 FORU AGINDUA, apirilaren 9koa, Lurralde Kohesiorako kontseilariak emana, behin-behinean onesten duena "Tafalla eta Erriberri artean (Nafarroa) zaldain bat eta txirrindularientzako bide baten tartea eraikitzeko trazaduraren proiektua".

Behin-behinean onesteko aurkeztu da "Tafalla eta Erriberri artean (Nafarroa) zaldain bat eta txirrindularientzako bide baten tartea eraikitzeko trazaduraren proiektua".

Proiektu hau Tafalla eta Erriberri arteko lotura baten zatia da. Lotura horren bitartez, bi herrien arteko mugikortasun jasangarria sustatu nahi da, bizikletaz zein oinez modu seguruan mugitzeko aukera emanez, errepidea maila berean gurutzatu gabe. Gainera, San Gregorio ermitarako sarbide segurua bermatuko da.

Jarduketaren tartea N-121 errepidearen inguruan hasten da, 37+200 KPtik gertu, Barranquiel industrialdearen hegoaldean. Puntu horretan, errepidea zeharkatzen du oinezkoentzako zaldain baten bidez. Hortik, mendi hegalaren erditik doa bidea eta AP-15 autobidearen gaur egungo taularen azpitik igarotzen da, 49+500 KPtik gertu. Ondoren, trazadurak Zidakos ibaiaren eskuinaldean dagoen finkaren plataforma bilatzen du, ibaian beherako norabidean, eta finka inguratzen du Geróngo bidearekin lotu arte, Corral de Garro kortatik hurbil. Proiektatu den zaldaina bao bakarrekoa da, gutxi gorabehera 31,60 m-ko argi horizontala du estribuen artean, eta 5,59 m baino gehiagoko galiboa utziko du galtzadaren ardatzaren gainean.

N-121 errepidearen gainean galibo nahikoa izateko, egungo bidearen trazadura aldatu beharko da, bai eskuinaldean, bai ezkerraldean (San Gregorio ermitarako sarbidea). Bide horietarako proiektatu diren trazadurak oraingoen antzekoak dira.

Proiektatutako zaldainaren zeharkako ebakidurak, barnealdea neurtuta, 3,00 m zabal eta 2,59 m altu du. Bideek orain dutenaren antzeko zabalera dute, guztira 5 m-koa, bazterbideak eta bermak barne.

Zeharkako ebakidura 1,30 m-ko zabalerako bi erreik osatzen dute, eta 0,45 m-ko bermak dituzte alde banatan.

Zorua osatzeko, trazaduran, zabor-legar artifiziala (30 cm) eta hormigoizko zoladura (20 cm) paratuko dira, eta bideetan, zabor-legar artifiziala (25 cm) eta beroan egindako nahastura bituminosoa (9 cm). Zaldainaren taula hormigoi armatuzkoa izanen da.

Proiektuak beharrezko drainatzea eta argiteria dauka, eta ukitutako zerbitzu guztiak lehengoratuko dira.

Proiektua jendaurrean jartzeko idatzi den dokumentuak jasotzen ditu Nafarroako Errepideei buruzko martxoaren 23ko 5/2007 Foru Legeak eskatzen dituen agiriak.

Ondorioz, bat etorriz Proiektu eta Obren Zerbitzuak txostenean jaso eta proposatu duenarekin, eta Lurralde Kohesiorako Departamentuaren egitura organikoa ezartzen duen azaroaren 15eko 249/2023 Foru Dekretuarekin (azaroaren 5eko 127/2025 Foru Dekretuak aldatua),

AGINTZEN DUT:

1. Behin-behinean onestea "Tafalla eta Erriberri artean (Nafarroa) zaldain bat eta txirrindularientzako bide baten tartea eraikitzeko trazaduraren proiektua".

2. Hasiera ematea proiektuak ukitutako ondasun eta eskubideen desjabetze espedienteari. Ondasun eta eskubide horien zerrenda eranskinean jaso da.

3. Proiektua jendaurrean jartzea hilabetez, bai proiektuaren eduki teknikoari dagokionez, bai lurrak okupatu beharrari dagokionez, desjabetzearen ondorioetarako. Epe horretan, egokitzat jotzen diren ohar edo alegazioak egiten ahalko dira, idatziz. Interesdunek eskura izanen dute proiektua Lurralde Kohesiorako Departamentuko Herri-lanen eta Azpiegituren Zuzendaritza Nagusiaren web-orrian eta Tafallako udaletxean.

4. Foru agindu hau argitaratzea Nafarroako Aldizkari Ofizialean eta Lurralde Kohesiorako Departamentuaren web-orrian, eta dagokion iragarkia igortzea Foru Komunitatean hedapen handiena duten egunkarietako bitara.

5. Foru agindu hau Tafallako Udalari jakinaraztea, iragarki-taulan argitara dezaten premiatuz, eta Herri-lanen eta Azpiegituren Zuzendaritza Nagusira eta Proiektu eta Obren Zerbitzura igortzea.

Iruñean, 2026ko apirilaren 9an.–Lurralde Kohesiorako kontseilaria, Óscar Chivite Cornago.

ERANSKINA

UKITUTAKO ONDASUN ETA ESKUBIDEEN BANAKAKO ZERRENDA ZEHATZA

Instalazio osagarriek ukitutako lurzatiak

UKITUTAKO ZERBITZUAK

Ukitutako ondasun eta eskubideen banakako zerrenda zehatza

Iragarkiaren kodea: F2605472