Iragarkia

8. ALDIZKARIA - 2026ko urtarrilaren 13a

1. NAFARROAKO FORU KOMUNITATEA

1.7. BESTELAKOAK

1481E/2025 EBAZPENA, abenduaren 11koa, Ingurumeneko zuzendari nagusiak emana, zeinaren bidez ingurumen-inpaktuaren adierazpena formulatzen baita "Aleta 19" (5450-CE), "Amura 19" (5453-CE), "Cabo de San Vicente 1" (5463-CE), "Elcano 21" (5468-CE) eta "La Niña 9" (5473-CE) eguzki instalazio fotovoltaikoen eta haien transformazio eta ebakuazio azpiegituren proiektuaren gainean; instalazio horiek Enigma Green Power 11, 21, 22, 23 y 25 SLUk sustatu ditu, Allo eta Leringo udal-mugarteetan daude eta bakoitzak 4,54 MW-eko potentzia instalatua du.

Sustatzaileak ingurumen-ebaluazioa ingurumen-inpaktuaren ebaluazio arrunt moduan izapidetzea eskatu du.

1.–Ingurumen-inpaktuaren ebaluazioa izapidetzea.

Ingurumen-ebaluazioari buruzko abenduaren 9ko 21/2013 Legearen 36. artikulua aplikatuz, Industria Antolamenduaren, Azpiegitura Energetikoen eta Meatzeen Zerbitzuak, organo eskudun gisa, jendaurrean jarri zituen, 30 egunez, "Aleta 19" (5450-CE), "Amura 19" (5453-CE), "Cabo de San Vicente 1" (5463-CE), "Elcano 21" (5468-CE) eta "La Niña 9" (5473-CE) eguzki instalazio fotovoltaikoen eta haien transformazio eta ebakuazio azpiegituren proiektuak eta haien ingurumen-inpaktuaren azterketa. Instalazio horiek lurzoruan jarriko dira, eta bakoitzak 4,54 MW-eko potentzia instalatua du; Allo eta Leringo udal-mugarteetan egonen dira instalazioak eta transformazio eta ebakuazio azpiegiturak. Jendaurrean jartzeko, iragarkia argitaratu zen 2025eko ekainaren 17ko Nafarroako Aldizkari Ofizialean (120. zk.).

Ingurumen-ebaluazioari buruzko abenduaren 9ko 21/2013 Legearen 37. artikulua aplikatuz, eragindako administrazio publikoei eta interesdunei proiektuez eta haien ebakuazio azpiegituraz kontsulta egiteko izapidea hasi zuen organo eskudunak.

Jendaurrean jartzeko eta eragindako administrazio publikoei eta interesdunei kontsulta egiteko fasean hamar erantzun jaso ziren. Ekarpenak egin dituzten pertsona eta erakundeen zerrenda eta haien laburpena ebazpen honetako I. eranskinean bildu dira.

Industria Antolamenduaren, Azpiegitura Energetikoen eta Meatzeen Zerbitzuak sustatzaileari igorri zizkion jasotako alegazioak eta txostenak, eta jakinarazi zion, legedi sektorialak eskatzen duen dokumentazioarekin batera, ingurumen-inpaktuaren ebaluazio arruntaren eskaera aurkeztu behar zela.

Sustatzaileak, jasotako alegazioak eta txostenak ikusita, aldaketa txiki batzuk egin zituen proiektuetan, ingurumen ondorio nabarmen berririk gabekoak; izan ere, batik bat, berriro diseinatu da ibaia gurutzatzen duen lurpeko ebakuazioa, eta "AC 5: Allo-Arellano-Arroitz-Deikaztelu-32. fazeria-Lerin" estepako abifauna kontserbatzeko eremu kritikoaren barruan proiektatutako bi eremu txiki kendu dira (eremu horietako bat materialak biltzekoa baino ez zen).

Sustatzaileak, 2025eko abuztuaren 29an, ingurumen-inpaktuaren ebaluazio arrunta hasteko eskaera aurkeztu zion Industriako eta Enpresen Trantsizio Ekologiko eta Digitalerako Departamentuari, Ingurumen-ebaluazioari buruzko abenduaren 9ko 21/2013 Legearen 39. artikuluan xedatutakoari jarraikiz.

Organo eskudunak dokumentazioa osorik zegoela egiaztatu ondotik, 2025eko irailaren 16an, Biodibertsitatearen eta Arrantza Kudeaketaren Zerbitzura (Ingurumen Ebaluazioaren Atala) bidali zuen dokumentazio guztia, espedientearen azterketa teknikoa eta ingurumen-inpaktuaren adierazpena egiteari ekin ziezaion.

Ebaluazio honek ez ditu honako hauek barne hartzen: instalazio eta gailu elektrikoen segurtasuna, laneko segurtasuna eta osasuna, hirigintza, lurraldearen antolamendua, bide segurtasuna eta araudi erregulatzailea zein berariazko instrumentuak dituztelako ingurumen-ebaluazioaren irismenetik kanpo gelditzen diren gainerako eremuak.

2.–Proiektuen laburpena.

Aleta 19, Amura 19, Cabo de San Vicente 1, Elcano 21 eta La Niña 9 izeneko bost eguzki instalazio fotovoltaiko proiektatu dira, bakoitza 4,54 MW-ekoa (guztira, 22,7 MW), Allo herriko hego-ekialdean, Lerin eta Oteitza udalerriekiko mugan.

Proiektatutako eguzki instalazio bakoitzak 625 W-eko puntako potentzia duten 9.100 modulu fotovoltaiko izanen ditu, taulan erakusten den bezala. Bakoitzak 4,54 MW-eko potentzia instalatua izanen du, eta 5,68 MW-eko puntako potentzia, eta bi inbertsore egonen dira instalazioko. Eguzki instalazio bakoitzak 7 eta 10 ha arteko azalera hartuko du.

Moduluen egitura jarraitzaileen motakoa izanen da, ipar-hego ardatzaren orientazioarekin, eguzki izpiak jasotzea eta eguzkiari jarraitzea optimizatzeko. Egitura horien profilak zuzenean lurrean ainguratuko dira, edo, kasu batzuetan, aldez aurretik zulatuta.

Irudia. Proiektatutako eguzki instalazioak eta ebakuazioa.

Instalazio bakoitzak hesi perimetral zinegetiko bat izanen du, 200-17-30 neurrikoa, 2 m-ko altuerakoa, eta baoen zabalera 30 cm-koa izanen da. Sarea altzairu galvanizatuzko hodi-zutoinen gainean finkatuko da. Zutoin horiek 3,5 m-an behin jarriko dira, zuzeneko ezarpen edo hormigoizko dadoen bidez. Instalazio bakoitzean 6x2 metroko metalezko ate bat instalatuko da. Proiektuek landare pantailak erabiltzeko aukera ematen dute, inpaktu bisuala murrizteko.

Jarraitzaileen eta hesi perimetralaren arteko gutxieneko distantzia 10 metrokoa izanen da, eta jarraitzaileen eta bideen artekoa ere, 10 metrokoa. Parke fotovoltaiko bakoitzak estazio meteorologiko bat izanen du, beharrezkoak diren datuak eskuratzeko: tenperatura, irradiazioa...

Ebakuazioari dagokionez, instalazio fotovoltaikoetan sortutako energia 30 kV-eko erdi-tentsioko lurpeko sarearen bidez ebakuatuko da instalazio bakoitzeko potentzia estazioetatik eguzki instalazio guztiek partekatuko duten ebakitze zentroraino. Ebakitze zentroa 5. poligonoko 1138. lurzatian proiektatu da, eta 9,50 x 2,38 x 2,60 metroko neurriak izanen ditu.

Ebakitze zentro horretatik, energia lurpetik garraiatuko da, 30 kV-eko eta 4,02 kilometroko linearekin, Leringo 9. poligonoko 17. lurzatiko "Andelo" 66/30 kV azpiestazio jasotzaileraino.

Kableatua zangen hondoan lurperatuko da hareazko ohe baten gainean, 0,8 metroko gutxieneko sakonerarekin.

Ebakuazio lineak Ega ibaia zeharkatuko du, gertaera aipagarri gisa, eta zulaketa gidatuaren bidez eginen da hori. Era berean, aurkeztutako proiektuak ezarritakoaren arabera, lineak, Ega zeharkatu ondotik, eta "Andelo" 66/30 kV azpiestazio jasotzailera iritsi aitzin, lehendik ebaluatuta dagoen eta ingurumen-inpaktuaren adierazpena indarrean duen beste proiektu bateko eguzki instalazioen ebakuazio lineekin partekatuko du zanga; "Azafea 4", "Astrolabio 3", "Bitacora 6", "Cabo de Buena Esperanza 5" eta "Cabo de Hornos 4" eguzki instalazioek osatzen dute proiektu hori. Hori alda liteke Ingurumeneko zuzendari nagusiaren urriaren 6ko 1164E/2025 Ebazpenaren bidez proiektu horietarako emandako ingurumen-inpaktuaren adierazpenaren ondotik (2025eko urriaren 23ko Nafarroako Aldizkari Ofizialean, 212. zk., argitaratu zen ebazpen hori). Ebazpen horretan "Cabo de Buena Esperanza 5" eta "Cabo de Hornos 4" eguzki instalazioen aurkako txostena eman zen.

Sustatzaileak eguzki instalazioen eta "Andelo" 66/30 kV azpiestaziorainoko ebakuazio linearen aurreproiektua baino ez du aurkeztu. Horregatik, ingurumen-inpaktuaren ebaluazio honek eguzki instalazioak eta "Andelo" 66/30 kV azpiestaziorainoko ebakuazio azpiegitura barne hartzen ditu.

"Andelo" 66/30 kV azpiestazio jasotzailetik Estellerria 66 kV TAErainoko (I-DE Redes Eléctricas Inteligentes SAUrena da) ebakuazio azpiegituraren gainerakoak ingurumen-ebaluazioa du, baita aldeko ingurumen-inpaktuaren adierazpena ere, Ingurumeneko zuzendari nagusiaren urriaren 6ko 1164E/2025 Ebazpenak emandakoa (2025eko urriaren 23ko Nafarroako Aldizkari Ofizialean, 212. zk., argitaratu zen ebazpen hori).

Lehen aipatutako ingurumen-inpaktuaren adierazpenean, "Andelo" 66/30kV TAE jasotzailetik 66 kV-eko aireko eta lurpeko linea bat aterako zela diseinatu zen proiektuan ("Iturtumendia" 66/30kV TAEra iritsi arte). Linea horrek lurpekoa izan behar zuela ezarri zen Ingurumeneko zuzendari nagusiaren urriaren 6ko 1164E/2025 Ebazpenaren arabera (2025eko urriaren 23ko Nafarroako Aldizkari Ofizialean, 212. zk., argitaratu zen ebazpen hori).

Azkenik, "Iturtumendia" 66/30 kV TAEtik 66 kV-eko lurpeko linea bat aterako da Estellerria 66 kV TAEraino (I-DE Redes Eléctricas Inteligentes SAUrena da), eguzki instalazioak konektatzeko.

Proiektatutako bost parke fotovoltaikoetarako sarbidea "Estella/Lizarra–Cárcar" NA-122 Foru Komunitatearen errepide autonomikotik eginen da, 15 eta 18 KP-etan. Aurreikusitakoaren arabera, 4 metroko zabalerako barne bide berriak sortuko dira, hautatutako eta trinkotutako lurzoruzko oinarrizko geruza, gutxienez 20 cm-koa, eta gainazaleko geruza, gutxienez 10 cm-koa, izanen dituztenak.

Egin beharreko lanak honako hauek izanen dira: aurretiazko lanak, topografia, obra zibila, ekipoen hornidura eta muntaketa mekaniko eta elektrikoak. Lehenengo fasean, eraikuntza osagarriak garatuko dira, jasotze topografikoa eginen da, lurra prestatuko da eta lur mugimenduak eginen dira, eremuko sastrakak eta landare geruza kentzeko.

Instalazioek bulegoak izanen dituen kontrol eraikin bat izanen dute, bai eta ordezko piezak biltegiratzeko eraikin bat ere.

3.–Ingurumen-inpaktuaren azterketaren deskribapena eta analisi teknikoa.

a) Alternatiben azterketa.

Ingurumen-inpaktuaren azterketak (aurrerantzean, IIA), alternatiben azterketaren barruan, balizko jarduketa eremuaren lehen azterketa bat egiten du azpiestazioaren kokagunean oinarrituta eta legeriaren, eraikitzeko erraztasunaren, ingurumen baldintzatzaileen eta abarren faktore zehatzak kontuan hartuta; 0 aukera baztertzen da (ez gauzatzea), eta instalazio fotovoltaikoak kokatzeko hiru aukera definitzen ditu. Instalazioen alternatiben barruan, Villatuertako kokaleku bat aztertzen du; beste bat, Oteitza eta Larragako udal-mugarteetan, eta azkena, Allokoan.

0 aukera baztertuta, sustatzaileak aurkeztutako ingurumen-inpaktuaren azterketak (IIA) baldintzatzaile batzuk planteatzen ditu premisa gisa; hainbat parametro baloratzen dira (sarbideak, maldak, hidrologia, higadura, landaredia, fauna...), eta 3. aukera globala aukeratzen da behin betiko (Allokoa), 2. alternatibarekiko alde txikiarekin (Larraga eta Oteitzako udal mugarteetakoa). Hala ere, 2. alternatiba "AC 1: Aberin-Larraga-Morentin-Oteitza-Villatuerta" estepako abifauna kontserbatzeko eremu kritikoan dago, eta, beraz, planteatutako aukeren artean, zalantzarik gabe, 3.a da onena, hautatutakoa.

Ebakuazio linearako alternatibak sarearekiko konexioraino (Estellerria TAE) erabat ebakuatzeko aztertzen dira. Hala ere, ingurumen-inpaktuaren ebaluazio honek "Andelo" 66/30 kV azpiestaziorainoko ebakuazio azpiegitura baino ez du barne hartzen, ebazpen honen 2. puntuan zehaztu den bezala. Nolanahi ere, azpiegitura hori lurpekoa izatea planteatu da, eta horregatik aukeratu da, afekzioak saihesteko eta minimizatzeko.

b) Proiektuen inpaktu nagusien analisia.

Sustatzaileak egindako IIAk zenbait inpaktu detektatu, identifikatu eta baloratzen ditu, eraikuntza, erabilera eta eraispen faseetan inpaktuak eragin ditzaketen proiektuko ekintzak eta inpaktu horiek nozitu ditzaketen inguruneko faktoreak identifikatu ondotik. Ekintzak eta inguruneko faktoreak gurutzatuta, aztertutako faktoreen gaineko proiektuaren inpaktu negatibo nabarmenak katalogatzen dira bateragarri, moderatu, larri edo kritiko gisa.

Laburbilduz, sustatzaileak hautemandako eragin nagusiak izanen dira obra zibila gauzatzeak eta lurzoruaren okupazio fisikoak, obra fasean zein eguzki instalazioen funtzionamenduan, lurzoru, fauna eta landarediaren faktoreetan eragindakoak. Faktore horien gaineko inpaktu gehienak bateragarri gisa deskribatzen dira, eta moderatutzat jotzen da fauna habitaten galera.

–Lurzorua. Eguzki instalazioek lurzoruan izan ditzaketen inpaktuei dagokienez, nabarmentzekoa da lehorreko laboreetarako lur azalera handien gainean diseinatu eta eginen direla eguzki parkeak. Lur eremu horietan, lursailen orografia eta morfologia ia zelaiak dira, eta horregatik aurreikustekoa da eraikuntza fasean lur mugimendua minimoa izanen dela eta eraginak minimizatuko direla. Ingurumen organoaren irizpidea betetzen da, zeinaren arabera ardatz horizontaleko jarraitzaileen gaineko modulu fotovoltaikoak %5eko edo gutxiagoko maldetan bakarrik ezarri behar diren.

Sustatzaileak, zenbait alegaziori erantzuteko, zer lur mugimendu egin behar diren aurkeztu du azterketan. Gehienak bideak sortzeko edo egokitzeko eginen dira, lursailak lauak direlako eta egiturak tinkatu behar direlako.

Horregatik, lurzoruaren gaineko inpaktu nagusia eraikuntza fasean aurreikusi da, eta bateragarritzat jotzen da.

–Hidrologia. Eguzki instalazioak eraikitzeko eremua Ega ibaiaren arro hidrografikoan dago, Ega ibaitik 100 bat metrora gertuen dagoen tokian, eta 15 metro inguruko kota diferentzia batez. Sustatzaileak uste du distantzia horrekin ez dagoela eraginik hidrologian. Era berean, eraikuntza fasean, lur mugimenduek izaten ahal dituzten eraginak nabarmentzen dira, hots, lur arrasteak, baina intentsitate eta magnitude txikiko inpaktua denez, tokikoa, aldi baterakoa eta itzulgarria, bateragarritzat jotzen da IIAn.

Aipagarria da ebakuazio lineak Ega ibaia zulaketa gidatuaren bidez zeharkatuko duela. Era berean, instalazio fotovoltaikoen drainatzeen diseinuak kontuan hartu beharko du jariatze uren ondoriozko kalteak areagotzen ahal direla hurbileko nekazaritza edo landa ingurunean, lurra "iragazgaiztu" egin daitekeelako, prezipitazio handiko uneetan, modulu fotovoltaikoak egoteagatik.

–Ondare historikoa eta kulturala. IIAk ondare arkeologikoari buruzko 5. eranskina du. Instalazio bakoitzerako eta ebakuazio linearako Ondare Historikoaren Zerbitzuari egindako txosten eskaerak besterik ez daude eranskin horretan; kontsulta horren erantzunaren zain, inpaktua bateragarritzat jotzen du, ulertzen baita aztarnategi arkeologikorik ez dagoela eta jarduketek ez dutela inola ere kalterik eragiten ahal inongo aztarnategitan. Dena dela, jarraipen arkeologikorako plan bat ezartzen du, ezer aurkituko balitz ere, eta obrak hasi aitzin adostu beharko da plan hori.

–Europar Batasunaren intereseko habitatak, flora eta landaredia. Proiektuak floran eta landaredian izanen dituen inpaktuei dagokienez, landareen eremuan zuzenean eragindako landarediaren azterketa bat egiten du IIAk, eta bertan egon daitekeen floraren zerrenda bat aurkezten da eranskin batean; aztergai den eremuan (ezarpen eremua baino askoz ere gune handiagoa du laukiak) Microcnemum coralloides, Astragalus glaux, Senecio auricula eta Narcissus minor subespezieak nabarmentzen dira. Ingurumen organoak eskura duen informazioa eta ezarpen eremu zehatza (lehorreko soroak) kontuan hartuta, baztertu egin behar da, printzipioz, espezie horien gaineko afekziorik. Hala ere, IIAk jarduketa eremu osoan prospekzio bat egiteko beharra jasotzen du, espezie horiek dituzten eremuak detektatzeko eta, kasu horretan, neurri egokiak hartzeko.

Eguzki instalazioen %100 lehorreko laborantza lurretan daude; beraz, inpaktua urria izanen da, eta, beraz, bateragarria. Baldintzetan, halaber, instalazioen inguruko landaredi naturala babesteko neurriak daude, baita hobetzekoak ere.

–Fauna. Faunari dagokionez, sustatzaileak aurkeztutako IIAk 10x10 km-ko laukietarako ornodunen atlasen eta Lehorreko Espezieen Espainiako Inbentarioaren berrikuspen bibliografikoa egiten du. Horri gehitu behar zaizkio Nafarroako Gobernuko Landa Garapeneko eta Ingurumeneko Departamentuak emandako datuak, baita abifaunaren azterketa ere. Azterketa hori urtebetekoa izan gabe eman da, baina hilabeterik kritikoenak kontuan hartu ditu.

Sustatzaileak egindako azterketatik ondoriozta daitekeenez, estepako abifauna da kalteak nozitzeko aukera handiena duen taldea, lurzorua zuzenean okupatzearen eta haren ondorioen eraginez. Proiektua osatzen duten eguzki parkeak Nafarroako estepako abifauna kontserbatzeko eremuetatik hurbil daude, bereziki "AC 5: Allo-Arellano-Arroitz-Deikaztelu-32. fazeria-Lerin" eremutik gertu, zenbait alegaziotan islatzen den bezala. Eguzki parkeak zuinkatu eginen dira kontserbazio figura horren barruko ezein azalerari ez erasateko eta beharrezkoak ez diren eraginak saihesteko.

Ingurumen-inpaktuaren azterketaren 4. eranskinean, "Abifaunari buruzko urteko azterlana" izenekoan, eremuko abifaunari buruzko azterketa bat jasotzen da, ezaugarri bereziak dituztelako xede espezietzat hartzen diren espezieetan arreta berezia jartzen duena. Azterlan hori 2024ko urriko bigarren hamabostalditik 2025eko uztailera bitartean egin zen.

Sustatzaileak aurkeztutako IIAk eta abifaunari buruzko azterlanak ondorioztatu dute ez direla estepako hegazti espezie gehienak detektatu; mirotz zuriaren eta mirotz urdinaren bizi-eremu bat bada, ordea, baina espezie horien erabilerak bateragarriak dira eguzki instalazioen ezarpenarekin.

Abifaunari buruzko azterlana, eskuragarri dagoen informazioa eta aztergai den eremuak estepako abifaunari buruzko lehen azterketetatik izandako bilakaera behin aztertuta, ingurumen organoak uste du eguzki instalazioaren ezarpenak, hartutako neurriak eta baldintzetan ezarritakoak behin gauzatuta, inpaktu bateragarria duela.

–Naturagune babestuak eta Natura 2000 Sareko eremu babestuak. Nafarroako naturaguneei buruzko ekainaren 17ko 9/1996 Foru Legearen arabera babestutako eremuen inbentario bat egiten du IIAk eta baztertu egiten du inolako afekziorik izatea, ez baitago, espazio horretan, gaur egungo legediaren araberako babes mailarik duen eremurik. "Leringo pinudiak" izeneko eremu naturala dago gertuen, 8 km-tik gorako distantziara. Era berean, "Estellerriko Erriberako igeltsuak" KBEa 4 km-ra baino gehiagora dagoela aipatzen du; ez du alderdi horri buruzko arriskuen baloraziorik egiten, ulertzen baita, distantzia dela-eta, ez dela afekziorik izanen.

–Ondorio sinergikoak eta metagarriak. Proposatutako proiektuak eraikuntza, funtzionamendu eta eraispen faseetan izan ditzakeen sinergia edo metatze inpaktuak aztertzen ditu sustatzaileak. Sustatzaileak garrantzi handiagoko deritze eraikuntza fasean faunaren gainean izanen diren inpaktuei, baita ustiapen fasean nekazaritza eta abeltzaintza baliabideen gainean gertatuko direnei ere, moderatutzat jotzen baititu; hala ere, faktore gehienak ez-nabarmentzat edo bateragarritzat hartzen ditu. Ondorio gisa, IIAk bateragarritzat jotzen du inpaktu global metagarria edo sinergikoa.

–Ez da aztertzen proiektuak istripu larriei edo hondamendiei begira duen kalteberatasuna. IIAk aztertzen du proiektua zenbatean den kaltebera hainbat arriskuren aurrean (arrisku geologikoa, fenomeno meteorologiko kaltegarriak, arrisku sismikoa, uholde arriskua, akuiferoen kutsadura, sute arriskua eta kutsadura atmosferikoa) eta arrisku horiek katalogatzen ditu. Gehienak arrisku baxu edo oso baxu gisa katalogatzen ditu, baina eremuak maila ertaineko bi arrisku ditu: akuiferoen kutsadura (ur masak gertu daudelako) eta suteak.

Instalazioan gerta daitezkeen olio isuriak biltzeaz beste neurririk ez da proposatzen, ordea, beharrik ez dagoelako, eta sute arriskua ere murriztu egiten da, arrisku ertaineko eremu batean egon arren, txikia delako eguzki instalazioak halakorik sortzeko aukera.

IIAk, azkenik, zehazten du ez dela aurreikusi proiektua hondamendi natural garrantzitsuen eta istripu larrien aurrean kaltebera izatearen ondoriozko eraginik, eta balizko kalteberatasunik ez dagoela ondorioztatzen du.

–Prebentzioko, zuzentzeko eta konpentsatzeko neurriak. IIAn prebentzioko, zuzentzeko eta konpentsatzeko neurrien atal bat dago, baita konpentsatzeko neurrien eranskin espezifiko bat ere. Atal horretan ez da agertzen florari buruzko eranskinean ezarritako betebeharra, hau da, jarduketa eremu osoan aldez aurreko prospekzio bat egin beharra, babes araubideren baten mendeko florarik ote dagoen detektatzeko, eta hori egin beharko da. Honako hauek nabarmentzen dira: instalazioaren lanek kaltetu behar ez duten landaredia balizatzeko betebeharra; hesi-sare zinegetikoa jartzea, beheko aldean tartea utzita, faunaren iragazkortasuna hobetzeko; eta lurzorua babesteko hainbat neurri, horiek baitira afekzio gehien duten faktoreak.

Konpentsatzeko neurri nabarmenena estepako abifauna kontserbatzeko egokiak diren lurrak okupatzeagatiko neurria da. Horretarako, lugorriak kudeatzeko sistema bat ezarriko da, gutxienez 37,5 hektareatan, azalera hori proportzionala baita instalazioek hartzen duten eremuarekin. Lugorriak kudeatzeko sistema hori Alloko Udalaren herri-lurretan ezarriko da. Ingurumen organoak uste du neurri horiek ez direla lur horiek erabili ahal izatearen mende egon beharko; aitzitik, lurzatien titulartasuna edozein dela ere ezarri beharko dira.

–Ingurumena zaintzeko plana (IZP).

Ingurumena zaintzeko programa bat aurkeztu du sustatzaileak, hainbat fasetan antolatua: aldez aurreko fasea, eraikuntza fasea eta ustiapen fasea. Faserik garrantzitsuena eraikuntza fasea da, non ezartzen baitira aldatu daitekeen alderdi bakoitzerako egin beharreko kontrolak eta kontrol bakoitzerako ikuskapen aldizkakotasuna ere ezartzen baita; adibidez, lehorreko faunaren eta abifaunaren kasuan, astean behin eginen dira kontrol horiek ugalketa garaian (martxotik uztailera) eta hamabostean behin, obraren gainerako zatian.

Ingurumen koordinatzaileak kontrolen erregistro bat eginen du astero, eta, horren ondorioz, aldian-aldian bilerak eginen dira Ingurumen Koordinazioaren eta Obra Zuzendaritzaren artean. Oro har, hilero txostenak eginen dira, eta azken txosten bat emanen zaio Administrazioari, proiektuaren garapenaren deskribapena, argazki erreportaje bat eta jarduketen plano zehatzak jasoko dituena.

Ingurumen organoak balizko eraginak eta horien jarraipena behin aztertuta, aldizkakotasunari buruzko baldintza berriak ezarri dira dokumentu honetan, baita Administrazioari informazioa emateari buruzkoak ere.

–Lehengoratzeko plana.

Bost eguzki instalazioen eraikuntzak eta ezarpenak eragindako eremuak lehengoratzeko plan bat ezarri du sustatzaileak, non obraren benetako eraginaren mendeko gainazalen aurreikuspena zehazten den. Lanak hasi aitzin eta obrak iraun bitartean prebentzioko jarduketetan egin beharrekoak xehatzen ditu, baita obra burutu ondotik lehengoratze fasean egin beharrekoak ere. Jarduketa guztien helburua da obrek eragindako lurrak lehengoratzea; horretarako, zenbait jarduketa eginen dira, hala nola ereitea eta landatzea, eta horien aurrekontua zehaztuko da. Ereiteen atala da garestiena, lan handieneko unitateak biltzen baititu; izan ere, bideetan eta eraikin osagarrietako zapatetan izan ezik, eguzki instalazioaren eremu guztietan ereitea aurreikusi da. Aurreikusitako azalera 22,36 hektareakoa da. Erabili beharreko espezieak berrikusi behar dira, ingurune horretara egokitutakoak erabiltzeko.

–Ebakuazio linea.

Ebakuazio linea lurpekoa izenen denez eta Ega ibaia zulaketa gidatuaren bidez zeharkatuko duenez, inpaktua bateragarritzat jotzen da proiektuaren fase guztietan.

–Proiektuaren balorazio orokorra.

Inpaktu guztiak eta horien garrantzia aztertu ondotik, sustatzaileak bateragarritzat jotzen du proiektuaren inpaktu globala.

4.–Proposamena.

Ingurumen Zuzendaritza Nagusiko Biodibertsitatearen eta Arrantza Kudeaketaren Zerbitzuak ondorioztatu du ezen behar bezala egin dela ingurumen-inpaktuaren ebaluazio prozedura. Inpaktuei buruzko azterketan azaldutakoa ikusita, "Aleta 19" (5450-CE), "Amura 19" (5453-CE), "Cabo de San Vicente 1" (5463-CE), "Elcano 21" (5468-CE) eta "La Niña 9" (5473-CE) eguzki instalazio fotovoltaikoen eta "Andelo" 66/30 kV azpiestaziorainoko ebakuazio azpiegituraren aldeko ingurumen-inpaktuaren adierazpena egitea proposatzen da. Nolanahi ere, ingurumen-inpaktuaren azterketan ezarritako neurriak eta ebazpen honetako baldintzetan jasotakoak bete beharko dira.

Adierazitakoarekin bat, eta honako hauek ematen dizkidaten eskudantziak erabiliz: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko Lehendakariaren abuztuaren 17ko 10/2023 Foru Dekretua eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretua,

EBAZTEN DUT:

1. Enigma Green Power 11, 21, 22, 23 y 25 SLUk Allo eta Leringo udal-mugarteetan sustatutako "Aleta 19" (5450-CE), "Amura 19" (5453-CE), "Cabo de San Vicente 1" (5463-CE), "Elcano 21" (5468-CE) eta "La Niña 9" (5473-CE) eguzki instalazio fotovoltaikoen eta "Andelo" 66/30 kV azpiestaziorainoko ebakuazio azpiegituraren aldeko ingurumen-inpaktuaren adierazpena egiten da.

2. Aurkeztutako dokumentazio teknikoko baldintzei jarraikiz eginen da jarduera, eta, gainera, baldintza hauek bete beharko dira:

i) Proiektuaren baldintza orokorrak:

1. Sustatzaileak ingurumen-inpaktuaren azterketan eta haren eranskinetan jasotako eta jendaurreko informazioaren izapideen ondotik onartutako prebentzioko, zuzentzeko eta konpentsatzeko neurri guztiak bete beharko ditu, edo espedienteari emandako informazio osagarrian jasotakoak, baldin eta ebazpen honetan ezarritakoaren aurkakoak ez badira, baita ingurumen-inpaktuaren adierazpen honetan zehaztutako baldintza eta neurri gehigarriak ere.

2. Ebaluazio honen xede ez denez, gogorarazi behar da "Andelo" 66/30kV TAE jasotzailetik abiatutako ebakuazio linea lurperatu beharko dela, gaur egungo bideen trazari jarraitzeko ahalegina eginda, Ingurumeneko zuzendari nagusiaren urriaren 6ko 1164E/2025 Ebazpenean agertzen den bezala (2025eko urriaren 23ko Nafarroako Aldizkari Ofizialean, 212. zk., argitaratu zen ebazpen hori).

3. Oro har, ebazpen honetan eskatutako neurri guztiak sustatzaileak eraikuntza baimena eskatzeko organo eskudunean aurkeztu beharreko exekuzio proiektuan sartuko dira. Ingurumen organoak proiektu horri buruzko txostena egin beharko du, hari eragiten dioten ebazpenetan ezarritako baldintza guztiak betetzen direla egiaztatzeko.

4. Era berean, lanak bukatutakoan eta funtzionatzen hasi aitzin, ingurumen organoari egiaztatu beharko zaio ebazpen honetan ustiapen aldirako zehaztutako neurri aringarriak eta ingurumen jarraipeneko neurriak programatu eta abiarazi direla.

5. Obrak hasi baino astebete lehenago, gutxienez, abisua eman beharko zaio Ingurumen Jarraipenaren Bulegoari (seguimiento.ambiental@navarra.es).

6. Basozainak-Ingurumena Zaintzeko Taldeari inguruabarren bat (obra hasiera eta abar) ohartarazi behar bazaio, hori Lizarra Hegoaldeko Koordinazio Unitateari mezu elektroniko bat bidalita eginen da (948556031 edo 608062639, gmaestellasur@navarra.es).

ii) Inpakturik garrantzitsuenak prebenitzeko, zuzentzeko eta konpentsatzeko neurriei buruzko baldintzak.

7. Proiektuan ageri den bezala, ebakuazio linea osorik lurperatuko da "Andelo" 66/30 kV TAE jasotzaileraino, eta gaur egungo bideen trazari jarraitzeko ahalegina eginen da, eta, hori bideragarria ez bada, landaredi naturalari eragitea saihestuko da; nolanahi ere, Ega ibaia zulaketa gidatuaren bidez zeharkatuko da.

8. Ega ibaia zeharkatzeko zulaketa gidatua egiten denean bisoi europarrari afekziorik ez eragiteko, ebakuazio linearen obrak irailaren 1etik martxoaren 30era bitartean eginen dira, espezie horren ugalketa aldi kritikotik kanpo. Salbuespen gisa, eta teknikari eskudunak egindako justifikazio txosten bat entregatu ondotik, lanak egiten ahalko dira, jarduketa horiek eta balizko afekzioak zehatz-mehatz zehaztuta, eta espezie babestuetan eskumena duen unitatearen berariazko baimena izan beharko da.

9. Ebakuazio linearen trazadura aldatzea eta egin beharreko linea metroen kopurua murriztea baloratuko da, "Cabo de Hornos 4" eta "Cabo Buena Esperanza 5" eguzki instalazioekin partekatzen zituen eta ingurumen-inpaktuaren aurkako adierazpena duten eremuak birplanteatuta (Ingurumeneko zuzendari nagusiaren urriaren 6ko 1164E/2025 Ebazpena). Nolanahi ere, diseinuan landaredi naturalean edo intereseko habitatetan afekzioak eragitea saihestuko da.

10. Lanak hasi aitzin, zehaztu eginen dira lan eremuak, makinak pasatzeko eremuak eta materialak biltzekoak. Landaredi naturalean ahalik eta afekziorik txikiena eraginen da, lan eremua ahalik eta txikiena izanen da eta ukitu ezin diren eremuak balizatu eginen dira. Landaredi naturaleko eremuetan ez da inolako material bilketarik edo isuririk eginen, eta makinak ez dira eremu horietan kokatuko. Lurzatien arteko banalerroak eta bertan dagoen landaredia mantentzea lehenetsiko da, eta gaur egungo harri metak errespetatuko dira, faunarentzat intereseko lekuak direlako gehienbat nekazaritzarako den ingurune batean. Neurri hori lurpeko linea elektrikoaren trazadurak eta zangek ukitutako azaleretan ere aplikatzen ahalko da.

11. "La niña 9" eta "Elcano 21" instalazioen hesiak 5. poligonoko 1192. lurzatiko mendebaldeko ezpondatik eta landaretzatik 5 metrora jarriko dira gutxienez. Era berean, gainerako instalazioek ez dute inolako eraginik izanen 5. poligonoko 1121. eta 1208. lurzatietako eta 1268. lurzatiko b azpilurzatiko landaredian.

12. Instalazioen ondoko eremuetan dauden zuhaitzei ez zaie inolako erasanik eginen.

13. Lurraren topografia albait gehien errespetatuko da, eta profil naturalak birmoldatzeagatik lurzoruaren eta landarediaren gainean inpaktuak eragitea saihestuko da. Lurra berdintzeko lanek ez dute sortuko 2 metro baino gehiagoko lur erauzketarik edo ezpondarik. Ezpondarik sortzen bada, etzanak izanen dira, 3H/2V baino gutxiagoko maldarekin; haien goialdeak biribilak izanen dira, eta lubeta ezponden gainean, gutxienez, landare lurrezko 30 cm-ko geruza jarriko da. Lurra kendu edo hondeatu aitzin, instalazio osagarrien obrek eragindako azalera guztietatik landare lurra kenduko da, gutxienez 30 cm-ko sakonerako profil batean (okupazio iraunkorreko edo aldi baterako azalerak). Material hori horretarako hautatutako espazioetan metatuko da, 2 m-tik beherako altuera duten kabailoiak osatuta.

14. Lur mugimenduetako soberakinak ahal bezainbeste aprobetxatzeko ahalegina eginen da, obran bertan erabilita. Hondeaketak eta zangaren gauzapena bukatutakoan sobera dauden lurrak nekazaritzako lurzatietan zabaltzen ahalko dira, baina ez hurbileko etzeetan edo landaredi naturalean. Lur soberakinik egotekotan, hondakinen kudeatzaile baimendu batek kudeatuko ditu, eta lehentasunezko helburua izanen da inguruko espazio narriatuak lehengoratzea. Lehengoratzeko lanetan erabiliko ez diren lurrak zabortegi baimendu batera lekutuko dira.

15. Lur mugimenduak euri garaian egiten badira eta euriak sedimentuak eramaten baditu ibilgu naturaletara, drainatze osagarriak eginen dira, jariatze urak solidoei eusteko sistemetarantz bideratzeko; urak eremuko drainatze sare naturalean isuri aurretik kokatutako puntuetan ezarriko dira sistema horiek.

16. Modulu edo jarraitzaile fotovoltaikoen euste elementuak lurrean zuzenean tinkatuko dira, pilote edo hormigoizko zapataren erabilera saihesteko edo hori ahalik eta txikiena izan dadin.

17. Proiektatu beharreko drainatzeei dagokienez, diseinuak bermatu beharko du dinamika hidrologikoa ez dela nabarmen aldatuko, eta eremuko jariatze ura isurbide naturaleko puntuetara bideratuko dela, erosio eremu berriak sortzea saihestu, drainatze sare naturaletara solidoak arrastatzea saihestu eta jariatze uren ondorioz alboko nekazaritzako lurzatietan kalteak sorraraztea ekidinda.

18. Zangetan erreka eta sakanak zeharkatzeko lanak udan eginen dira, eta saihestuko da materialak, hormigoia edo solidoak ur ibilgura eramatea.

19. Hesi perimetralak ahalik eta gehien egokituko dira eguzki instalazioen formara, eta lursailak ixten dituzten uharteak, isatsak eta mingainak saihestuko dira, ez badute gero energia instalaziorik edo erabilera eratorri justifikaturik izan behar.

20. "Elcano 21" eta "Aleta 19" eguzki instalazioen arteko hesia 8 metroko tartearekin proiektatu da. 20 metroko distantzia libre utzita bananduko da. "Cabo de San Vicente 1" eta "Amura 19" instalazioak bereizteko hesien kasuan, 10 metroko espazioa libre utziko da gaur egungo pistaren ertzetatik instalatu beharreko hesiraino. Distantzia horiek, tarte bakar batean, hortik gorako beste distantzia batzuen truke aldatzea baloratzen ahalko da, azpiegitura osagarriak eraiki behar badira, hala nola ebakitze zentroa.

21. –Hesi perimetrala zutoinen bidez bakarrik tinkatuko da lurrean, fauna txikiari azpitik igarotzen uzteko, eta horretarako, beheko aldean tarte bat utzi beharko da lurzorura, 20 cm-koa. Tamaina txikiko faunarentzat iragazkortasuna hobetzeko diseinatuko da hesia, eta ez du elementu zorrotz edo ebakitzailerik izanen.

22. Hesi perimetrala seinalez markatzeko neurriak hartuko dira, hegaztiek talka egitea saihesteko, lehentasunez plakak jarrita, metalikoak hobe, 15x30 edo 20x20 cm-koak, zuriak edo kontraste handikoak, batetik bestera 2 metroko tarte horizontala utziz eta bi ilaratan jarrita, itxituraren altuera desberdinetan eta modu alternoan kokatuta.

23. Proiektuen prebentzio eta zuzenketa neurrien artean, obrek eragindako eremu guztietan landare lurrezko geruza mantentzeaz gain, eta bereziki, jarraitzaileen artean, lurra harrotu eta ereintzarako prestatuko da, eta ereintza edo hidroereintza eginen da.

24. Plakak ezartzeko eremuan dagoen landaredia kontrolatzeko eta mantentzeko ohiko metodo gisa, abeltzaintza estentsiboa erabiliko da, eta behar berezia izanez gero, sasiak makineriaz garbitzea baimenduko da. Herbizidak erabiltzea espresuki debekatua dago.

25. Landaketak azarotik otsailera bitartean eginen dira, obrak burutu ondotik, eta mantentze ureztatzea eta zainketak eginen dira, proiektuen bizitza osoan egoera egokian egonen direla bermatzeko. Gainera, babestu eginen dira, artzaintzan eta basa faunan afekziorik izatea saihesteko (hodi babesleak eta zurkaitzak jartzea).

26. Proiektuaren kokapena bat datorrenez zenbait espezieren (miru gorria eta mirotz urdina eta zuria, esaterako) habitat egokiekin eta, batez ere, habiak egiteko eremuetatik gertu daudenez, lanak hasi aitzin habiak miatuko dira, betiere obrak martxoaren hasieratik uztailaren erdialdera bitartean egiten badira. Ega ibaia zeharkatzeko gunean dagoen eta zulaketa gidatuko lanen eragina nozitzen ahal duen abifauna ugaltzailearen gainean eginen da prospekzio hori. Horri guztiari buruzko txostena emanen zaio, teknikari eskudunak idatzia, Ingurumen Jarraipenaren Bulegoari, non balizko eragina baloratuko den.

27. Kable edo drainatze zangak estali aitzinetik, ikuskapena eginen da, ustekabean barrura erori den fauna alerik ez dagoela egiaztatzeko.

28. Lanak hasi aitzin, prospekzio bat eginen da jarduketa eremu osoan, babes araubidean katalogatutako edo zerrendatutako espezierik ote dagoen antzemateko, eta beharrezkoa bada edo halakorik badago, espezie horiek babesteko neurri egokiak hartzeko.

29. Lanak egin bitartean Nafarroako landare eta animalia mehatxatuen katalogoetan edo Espainiako espezie mehatxatuen katalogoan jasotako espezieren bat dagoela detektatzen bada, lanek kaltetzen ahal dutena, berehala jakinaraziko zaio Biodibertsitatearen eta Arrantza Kudeaketaren Zerbitzuari, eta hark xedatzen duena bete beharko da.

30. Lagomorfo, karraskari eta bestelako animalien kontrola beharrezkoa bada, behar diren baimenak aldez aurretik lortuta egin beharko da, eta bitarteko mekaniko eta biologikoak erabiliko dira, guztiz debekaturik dagoelako pestizida, intsektizida, errodentizida eta bestelako pozoiak erabiltzea.

31. Panelak garbitzeko ezarriko den sistemak ez du erabiliko gai kimiko kutsagarri edo arriskugarririk.

32. Suteen prebentzioari dagokionez, obrak egiten ari diren urtean, eta ondorengo funtzionamendu urteetan, baso suteak prebenitzeko lurzoru urbanizaezinean sua nola erabili arautzen duen Foru Aginduan xedatutakoa bete beharko da, baita Larrialdi, Prebentzio eta Babes Zibileko Zerbitzuak zehazten dituen baldintzak ere.

33. Erabilerari lotutako eraikinak (transformazio zentroak, ebakitze zentroa eta abar) ingurunearekiko harmonia errespetatuz diseinatuko dira, eremuko eraikin motekin bat eginik eta kolore ez-nabarmenak erabilita, ingurunean integratzea errazteko.

34. Instalazioetan argiak planteatzen badira (eguzki instalazioak eta azpiestazioak barne), argiztapena ezinbestekoa denera mugatuko da. Bestalde, kanpoko argiztapena beharrezkoa den lanorduetan edo lanetan erabiliko da, eta gainerakoan itzalita egon beharko da.

35. Lanak bukatutakoan, behin-behineko instalazioak desmuntatu eta kenduko dira, eta lanen hondarrak garbituko dira okupatu den eremu osoan. Lanek eragindako gainazal guztiak, aldi batez eragindakoak barne, harrotu eginen dira eta, behar izanez gero, landare lurraren geruza batez estaliko dira, zeina lehenago kendu eta behar bezala pilatuko baita. Lanak bukatzen direnetik sei hilabete igaro baino lehenago, eragindako gainazal guztietan inguruko espezie autoktonoen belar hazien nahasketa bat ereinen da, laborantzara bideratu beharreko eremuetan izan ezik.

36. Lineen lurpeko eroanbideak lehendik dauden bideen trazari jarraitzen dion zatietan, bide horiek lehengoratu egin beharko dira obraren hondarrean, haien funtzionaltasuna erabat berrezartzeko.

37. Eraikuntza proiektua baimendu aitzin, paisaiaren arloan eskumena duen unitatearen aldeko txostena eduki beharko da.

38. Proiektua baimendu aitzin, sustatzaileak Erregistroaren, Ondasun Higigarrien eta Arkeologiaren Atalaren aldeko txostena eskuratu beharko du, Nafarroako kultur ondareari buruzko 14/2005 Foru Legearen 32. artikuluan xedatutakoari jarraikiz.

39. Estepako abifaunari laguntzeko neurri osagarri gisa, parkearen bizitza baliagarri osoan, nekazaritza eta ingurumen arloko neurriak ezarriko dira, azkenean baimentzen den eguzki instalazioaren azalera bereko eremu batean, eguzki parkearen inguruko estepa esparruetan. Azalera hori lehorreko zereal alorretako lurzatietan banatuko da, estepako hegaztientzako habitat egokia dutenetan, eta, haiek hautatzeko eta kudeatzeko, Ingurumen Ebaluazioaren Atalari aholkua eskatzen ahalko zaio. Zerbitzu horri aukeratutako lurzatien zerrenda aurkeztu beharko zaio, onets dezan.

40. Lurzati horiek erabiltzeko eskubidearen erabilgarritasuna egiaztatu egin beharko da, bai eta lursailen jabeekin edo nekazariekin hitzartutako akordioak ere. Lurzati horien kudeaketa Jarraipen eta Zaintza Planean zehaztu beharko da, zeina lanei ekin aurretik aurkeztu beharko baita; aukerak izan daitezke, besteak beste, lugorri uztea eta 2-3 urtetik behin kontrolatzea landarediaren garapena, azaro-otsail arteko azaleko lur-lantze bat eginez, edo laboreen kudeaketarako beste hainbat eredu, betiere fitosanitarioen erabilera baztertuta.

41. Ez dira erabiltzen ahalko energia berriztagarrietarako beste proiektu batzuengatiko konpentsazio neurri gisa ezarritako nekazaritza eta ingurumen arloko neurriak dituzten lurzatiak.

42. Kiropteroen gainean izan daitezkeen ondorioen jarraipen egokia egiteko, lanak hasi aitzin, kiropteroek instalazioa jarri baino lehen duten jarduerari buruzko azterketa bat eginen da Secemuk egindako gidan oinarrituta: Propuesta de directrices para la evaluación y prevención del impacto de plantas solares fotovoltaicas sobre los quirópteros, 2023. urtekoa.

https://secemu.org/wp-content/uploads/2023/05/Propuesta_SECEMU_directrices_fotovoltaicas.pdf

iii) Ingurumena zaintzeko plana.

43. Planaren behin betiko bertsioa Biodibertsitatearen eta Arrantza Kudeaketaren Zerbitzuarekin adostu beharko da, eta ezartzen diren eskakizunak beteko dira. Ingurumen-inpaktuaren azterketan proposatu den ingurumena zaintzako programa beteko da, honako ezaugarri hauek gehituta:

a. Kiropteroen jardueraren jarraipena eginen da, 42. puntuan aipatutako jarraibideetan eta dokumentazioan oinarrituta.

b. Era berean, lehen bi urteetan, ingurumen organoarekin adostutako bisita planarekin bat (ingurumena zaintzeko planean jasoko da hori), hesi perimetralarekin edo modulu fotovoltaikoekin talka egitearen ondorioz hildako hegaztien edo kiropteroen gorpuzkiak bilatuko dira. Nafarroako edo Espainiako espezie mehatxatuen katalogoetako espezierik aurkituz gero, edo faunaren ezohiko heriotza tasa bat antzematen bada, berehala jakinaraziko zaio Ingurumen Ebaluazio Estrategikoaren eta Ingurumen Jarraipenaren Bulegoari (seguimiento.ambiental@navarra.es). Hirugarren ustiapen urtea hasten denetik aurrera, lortutako datuen arabera eta Landa Garapeneko eta Ingurumeneko Departamentuaren baimena jaso ondotik, ahalegina murrizten ahalko da.

c. Instalazioen arteko korridoreak erabiltzen dituen faunaren jarraipena eginen da, eta jarraipen txostenetan eta Zaintza Planean sartuko da, korridore horien funtzionamendua eta inguruko beste eremu batzuena edo balizko fauna-pasabideena alderatzeko.

44. Plan horretan, gutxienez eraikuntza fasean zehar, hileko txostenak bidaliko zaizkio ingurumen organoari, eta ez soilik obra hondarreko txostena.

iv) Lehengoratzeko eta eraisteko plana.

45. Obra hasi aitzin, sustatzaileak lehengoratze planaren proiektu xehatua eta aurrekontuduna aurkeztu beharko dio ingurumen organoari, eta Biodibertsitatearen eta Arrantza Kudeaketaren Zerbitzuak ontzat eman beharko du. Inguruko landaredi serieko espezie autoktonoak erabiliko dira landareztatzeko. Zurezko eta basogintzako landareen haziak ingurukoak izanen dira, Ekoizpeneko Baso Materiala Identifikatzeko eta Erabiltzeko Eskualdeetako arauen arabera. Lanak bukatu eta 6 hilabete igaro baino lehen bukatu beharko dira landareztatze lanak. Landaketak landaketa garaiaren, klima baldintzen eta abarren mende daudenez, obrak burutu eta hurrengo landaketa garaian eginen dira. Landaketen jarraipena egin beharko da, eta bideragarriak direla ziurtatu, eguzki instalazioaren bizitza baliagarri osoan.

46. Proiektuaren bizitza baliagarria bukatuta, instalazio guztiak deseginen dira, eta okupatutako lurrak jatorrizko egoerara lehengoratuko dira. Uzte eta eraispen faseak lehengoratze proiektu espezifiko bat izan behar du; sustatzaileak aurkeztuko du, eta ingurumen arloko organo eskudunen txostena izan beharko du.

3. Ingurumen-ebaluazioari buruzko abenduaren 9ko 21/2013 Legearen 41.4 artikuluan ezarritakoari jarraikiz, ingurumen-inpaktuaren adierazpenaren aurka ez da errekurtsorik jartzen ahalko, deusetan galarazi gabe administrazio bidean eta proiektua baimentzen duen egintzaren aurka bidezkoak direnak.

4. Ebazpen hau Nafarroako Aldizkari Ofizialean argitaratzea, Ingurumen-ebaluazioari buruzko abenduaren 9ko 21/2013 Legearen 41.3 artikuluan ezarritakoari jarraikiz.

5. Ebazpen hau jakinaraztea Industria Antolamenduaren, Azpiegitura Energetikoen eta Meatzeen Zerbitzuari, Lurralde eta Paisaia Zerbitzuari, Erregistroaren, Ondasun Higigarrien eta Arkeologiaren Atalari, Basozainak-Ingurumena Babesteko Taldeari (Lizarra Hegoaldeko barrutia) eta sustatzaileari, behar diren ondorioak izan ditzan.

Iruñean, 2025eko abenduaren 11n.–Ingurumeneko zuzendari nagusia, Ana Bretaña de la Torre.

I. ERANSKINA.–JENDAURREAN JARTZEKO ETA ERAGINDAKO ADMINISTRAZIO PUBLIKOEI ETA INTERESDUNEI KONTSULTAK EGITEKO IZAPIDEAREN EMAITZA

Jendaurrean jarri ziren, 30 egunez, "Aleta 19" (5450-CE), "Amura 19" (5453-CE), "Cabo de San Vicente 1" (5463-CE), "Elcano 21" (5468-CE) eta "La Niña 9" (5473-CE) eguzki instalazio fotovoltaikoen eta haien transformazio eta ebakuazio azpiegituren proiektuak eta haien ingurumen-inpaktuaren azterketa. Instalazio horietako bakoitzak 4,54 MW-eko potentzia instalatua du, eta lurzoruan jarriko dira; Allo eta Leringo udal-mugarteetan egonen dira instalazioak eta transformazio eta ebakuazio azpiegiturak. Jendaurrean jartzeko, iragarkia argitaratu zen 2025eko ekainaren 17ko Nafarroako Aldizkari Ofizialean (120. zk.).

Era berean, eragindako administrazio publikoei eta interesdunei kontsultak egiteko izapidea egin zen, Ingurumen-ebaluazioari buruzko abenduaren 9ko 21/2013 Legearen 37 artikuluan jasotakoa.

Izapide horren ondotik honako erantzun hauek jaso dira:

Aguas de Navarra SAk alegazioa aurkeztu du kontuan har dezaten eta proiektuaren separata espezifikoa bidal diezaioten, proiektuaren eremu geografikoagatik eta bere jarduketa eremuen eragin esparrua delako. Bide osagarri batekin eta lurpeko altzairuzko hodi batekin gurutzatzeak eragindako afekzioa egiaztatu da.

Erriberako Ecologistas en Acción eta Zangozako Ecologistas en Acciónek antzeko alegazioak aurkeztu zituzten. Alegazio horiek, Sustrai Erakuntza Fundazioaren alegazioarekin batera, lurralde alderdiei, Nafarroako energia egoerari, hartu beharreko neurriei eta abarri buruzko zati bat dute; horiek ez dira proiektuaren ebaluazioaren xede zehatza.

Bigarrenik, bi elkarteek eta fundazioak gaur egungo proiektuari buruzko alegazio zehatzak aurkeztu dituzte, ingurumen organoak ingurumen ebaluazioaren fasean kontuan hartu dituenak, batez ere habitatari eta estepako hegaztien gaineko balizko eraginei buruzkoak, eta dagozkion neurriak hartu dira, eskatutakoaren arabera.

Ingurumen Ebaluazioaren Atalak txostena eman du kontsulten izapidearen haritik, zenbait aldaketak balizko afekzioak minimizatu eta prebenitzen dituztela iritzita, eta aldaketa horiek ingurumen-ebaluazioaren ondorengo eskaera aurkezteko beharrezkoak direla jakinarazi du.

Ondare Arkitektonikoaren Atalak txostena eman du eta jakinarazi du ez dagoela afekziorik bere eskumenen esparruan.

Herri-lurren Atalak txostena eman du, abelbideei buruzkoa, eta jakinarazi du aurreikusitako sarbideek eta "Andelo 66/30 kV"-rainoko ebakuazio azpiegiturak ez diotela eragiten inolako abelbideri.

Leringo Udalak txostena eman du, ebakuazio linearako aurreikusitako jarduketen hirigintza bateragarritasunari buruzkoa.

I-DE Redes Inteligentes SAUk jakinarazi du, dokumentazioa aztertu ondotik, ez duela txostenik emanen.

Trantsizio Ekologikorako eta Erronka Demografikorako Ministerioak jakinarazi du, bere eskumenen esparruan, ez duela jasotako dokumentazioari buruzko iruzkinik.

Iragarkiaren kodea: F2516462