Iragarkia

73. ALDIZKARIA - 2026ko apirilaren 16a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

21C/2026 EBAZPENA, otsailaren 5ekoa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Magotteaux Navarra SA enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Magotteaux Navarra SA enpresak aurkeztutako hitzarmen kolektiboa (kode zenbakia: 31004852012004), erregistro honetan sartu baitzen 2025eko abenduaren 22an, 2025eko urriaren 24an enpresaren eta sindikatuen ordezkaritzek sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuari dagokionez,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Magotteaux Navarra SA enpresak aurkeztutako hitzarmen kolektiboa (kode zenbakia: 31004852012004).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko otsailaren 5ean.–Ekonomia Sozialeko eta Laneko zuzendari nagusia, Iñaki Mendióroz Casallo.

MAGOTTEAUX NAVARRA SA ENPRESAREN IV. HITZARMEN KOLEKTIBOA

01. artikulua. Aplikazio eremua.

Hitzarmen honen edukiak indarraldi guztirako lotzen ditu, alde batetik, MAGOTTEAUX NAVARRA SA enpresa, eta, bestetik, enpresako plantilla osatzen duten langileak, zuzendaritza kenduta.

Hitzarmen honen sinatzaileek bere egiten dute oso-osorik emakumeen eta gizonen arteko tratu berdintasunaren printzipioa, bereizkeria mota guztiak gaitzesten dituzte, eta aukera berdintasunez lan egiteko eskubidea aitortzen dute. Hori guztia, jarraikiz Emakumeen eta Gizonen Berdintasun Eraginkorrerako martxoaren 22ko 3/2007 Lege Organikoari.

02. artikulua. Indarraldia.

Hitzarmen honen indarraldia sinatzen denean hasiko da, eta 2027ko abenduaren 31n agortuko, baina ondorio ekonomikoek atzera eginen dute, 2025eko urtarrilaren 1era arte. Hemen itundutako indarralditik salbuetsita daude alderdiek beste indarraldi bat ezarri dieten artikuluak.

Indarra duen Langileen Estatutuaren 86. artikuluan xedatutakoarekin bat, hitzarmena jakinarazitzat jotzen da sinatzen den egunetik beretik.

Bi alderdiek hitzarmenean biltzen diren erabaki guztiak errespetatuko dituzte, eta indarra izanen dute hurrengo hitzarmena sinatu bitarte. Negoziazio berri baten gai ez diren erabaki guztiek indarrean jarraituko dute, eta hurrengo hitzarmenean jasoko dira guztiak.

03. artikulua. Laneko egutegia, lanaldia eta ordutegia.

Hitzarmenaren indarraldian, urteko kopurua 1.688 ordukoa izanen da (211 egun). Ordu horietan sartzen da ogitartekorako ordu laurdena, lanaldi jarraitukoentzat. (Zortzi lanordu jarraian).

Enpresak ahal duen guztia eginen du familia-kontziliazioa errazteko, langileen arteko txanda aldaketei dagokienez, baldin egin badaitezke, antolamendu-arrazoiak kontuan hartuta. Aldaketa horietan, ez da ordainduko txanda aldaketaren prima.

Lan ordutegia lanpostuan hasten da, eta bertan bukatzen, eta hurrengo txandakoa agertzen ez bada, lanpostutik lekutu aurretik nork bere arduradunari jakinarazi beharko dio.

Hitzarmen honen 4. eranskinean lan-egutegi bat dago, zuzeneko laneskuko langileek, arduradunek eta departamentu hauetako koordinatzaileek lanorduak nola egin behar dituzten azaltzen duena: produkzioa, mantentze-lanak, bidalketak, ereduak, azken kontrola eta laborategia.

Behin-behineko langile bakoitzari bere egutegia emanen zaio kontratua sinatzen duenean, jarraikiz hitzarmenean indarra duen ordu kopuruaren zati proportzionalari.

Oporretatik lanera itzulitakoan, lan txandei dagokienez, langilea hasiko da oporren aurretik egindako azken txandaren hurrengoan.

Zuzeneko laneskuko langileen lanaldi zatituko ordutegia, orain arte bezala, lanaldi jarraitukoa izanen da ostiraletan, salbu produkzioko, laborategiko, bidalketetako eta mantentze-lanetako lanpostuetan. Ordutegi hau izanen dute: astelehenetik ostiralera ateratzeko ordua 15 minutu atzeratuko da, eta ostiraletan lanaldi jarraitua eginen da, 08:00etatik 15:00etara.

Gaueko txanda igandeko 22:00etan hasiko da, jaiegunaren zati proportzionala kobratu gabe, ukitutako langile guzti-guztiek idatziz onartu ondoren.

–Zeharkako laneskua (bulegoak).

• Departamentu bakoitzeko zeharkako langileen lana berezia denez, artikulu honetan ordutegiari eta egutegiari buruz ezarritakoa ez zaie zeharkako langileei aplikatuko. Departamentu bakoitzeko zeharkako langileentzat departamentu bakoitzean egindako lanaren ezaugarriei egokituko zaien lan egutegia prestatuko da. (Egutegia emanen da):
  • Finantzen/ITren Departamentua.
  • Erosketen Departamentua.
  • Ingurumenaren, Osasunaren eta Segurtasunaren Departamentua.
  • Giza Baliabideen Departamentua.
  • Produkzio Ataleko buruak.
  • Produkzioaren planifikazioaren arduraduna.
  • Mantentze-lanen planifikazioaren arduraduna.
  • Instalazio berrien arduraduna. Proiektuak kudeatzeko bulegoa.
  • Departamentu teknikoa, eredukoak izan ezik.

Malgutasunerako 4 egun ezartzen dira urtean, aldez aurretik enpresa batzordeari ahalik eta goizen jakinarazi beharrekoak (gutxienez 72 ordu), honelakoetan:

a. Produkzioa %25 edo hortik gora igo edo jaisten denean, atzematen den uneko t/eguneko mailari dagokionez, 3 asteko epean edo hortik beherako epe batean.

b. Instalazioa gelditzen denean matxura batengatik edo ezinbesteko beste arrazoiengatik. (Sutea, uholdea, elektrizitatearen etenaldiak, zibersegurtasun erasoak...):

i. Enpresak malgutasuneko 4 egun horiek egutegitik soberan dauden egunekin aldatzen ahalko ditu. Egun horiek zenbatzerakoan, adostutako 4 egunak eta egun bakoitzeko kobratu beharreko 8 ordu estren konpentsazioa hartuko dira kontuan.

II. Enpresak urte osoan eta hurrengo urteko lehenbiziko lauhilekoan egiten ahalko du aldaketa.

Produkzio beharrak daudenean eta boluntario nahikorik ez dagoenean, enpresa batzordeak langileei modu positiboan jakinaraziko die lan egiteko beharra, langile nahikoak egon daitezen sustatzeko.

Hitzarmenaren indarraldian (2025-2027) taldeak egindako inbertsioak urtean 2 milioi eurokoak edo handiagoak badira, edo 6 milioi eurokoak hitzarmen honen indarraldian, eta lehen deskribatutako malgutasun-neurriak agortu badira, enpresak eta batzordeak adostutako egunetan lan egiteko prest egonen dira langileak, betiere a eta b puntuen eta inbertsioen baldintzak betetzen badira.

Beste neurri batzuk hartu behar badira horietaz gainera, zuzendaritzak eta batzordeak hitzartuko dituzte. Neurri horien artean honako hauek hartuko dira kontuan: azpikontratak eta kanpoko tailerrak murriztea eta ezereztea, bai eta une horretako behin-behineko kontratuak ere.

04. artikulua. Oporrak.

Langile guztiek 30 opor egun natural izanen dituzte urtean, hartu behar dituztenak urte bakoitzari dagokion eranskineko egutegian adierazitako egunetan. Horietako 4 lanegun hartu beharko dira langile bakoitzaren bizileku edo erroldako leku den herriko festetan. Egun horiek oraintxetik finkatuko dira, lana antolatze aldera.

Arau horiek mantentze-lanetakoei ere aplikatuko zaizkie, salbu enpresak izendatu dituen 2 mekanikariri eta argiketari bati. Bidalketen atalekoek beren egutegiaren osagai estandar gisa izanen dituzte oporretako entrega bereziak eta inbentarioa. Lan horietarako 2 egun hartuko dira oporretan eta 4 egun azaroko eta abenduko lehenbiziko asteko itxialdian. Ordu gehiagoren beharra izanez gero, aparteko orduak izanen dira (aparteko ordu bat = 1,75 ordu arrunt). Beti errespetatuko da urtean gehienez aparteko 50 ordu egiteko konpromisoa.

Herriko festak eta oporrak egun beretan gertatzen zaizkien langileek 4 lanegun horiek hartuko dituzte oporraldiaren ondo-ondoren, edo oporren aurre-aurreko egunetan.

Jaietako egunak hartzeko erroldako herria hautatzen duten langileek justifikatu egin beharko dute, PFEZaren ondorioetarako urte hasieran betetzen den inprimakian (PFEZa, pertsona fisikoen errentaren gaineko zerga).

Enpresan 25 urteko antzinatasuna bete duten edo betetzen duten langile guztiek opor-egun bat gehiago izanen dute. Egun hori urte osoan hartzen ahalko da, langileak egokitzat jotzen duenean. Opor egun hori lizentzia ordaindu gisa kobratuko da.

Enpresako zuzendaritzak justifikatutako beharrezko kasuetan, horrek eraginen lieke bizarrak kentzen eta tratamendu termikoetan dihardutenei, eta enpresak hilabete lehenago abisatuko lieke.

Langileen Estatutuaren 38. artikuluan xedatua galarazi gabe, langile batek baja hartzen duenean oporraldietan aldi baterako ezintasuna dela-eta, falta zaizkion opor egunak alta medikoa jaso ondoren hartuko ditu ahal dela.

Opor egunak egutegian aurreikusitako alditik kanpora hartu ahal izateko, oporraldian lan egin duten langileentzat edo aldi baterako ezintasunean egon direnentzat, denbora horretako lanegunak zenbatuko dira. Hori dela-eta, urtero zehaztuko dira egun horiek, eta urteko lanaldiari egokituko zaizkio.

Norberaren egutegia.

Urteko banakako egutegiaren 3 egun ezartzen dira; 2026tik aurrera, urteko 4 egun izanen dira. Egun horiek araudi honi jarraikiz hartuko dira:

Nahitaezkoa da banakako egutegiaren egunak bi hilabete lehenago eskatzea. Eskaera hori edukiz gero, aldaketak egiteko aukera egonen da, hitzarmenean ezarritako arauetan oinarrituta. Eskatu ez badira, ez dira hartuko.

Egun hori eskatuta edukiz gero eta langileen prestasunean txanda aldatzen bada, egun horren ordez langileak eskatzen duen beste egun bat hartzen ahalko da.

Banakako egutegiaren egun kopurua 4 egunera handituko da, eta 2026an hasiko da egun horiek aplikatzen.

Urtero, norberaren egutegiko beste egun bat ezartzen da 58 urtetik gorakoentzat; 58 urte bete ondotik hartuko da.

–Funtzionamendu arauak.

• Egun eskaeran aldaketak egiteko, gutxienez ere 15 egun aurretik eskatu beharko da.
• Hartzeko dauden egun guztiak azaroaren 30a baino lehen hartuko dira.
• Gehieneko baimen kopuru hau ezarri da lan egindako egun bakoitzeko: 3 galdaketa atalean, 3 akabera lanen atalean, eta 2 fabrikako gainerakoan.
• Eskaerak arduradunen bidez eginen dira.
• Eskaerak egin diren hurrenkeraren arabera onetsiko dira.
• Eskaerak astebeteko epean itzuliko dira onarpenaren sinadurarekin. Eskaerak erantzunik jasotzen ez badu, baimena onartutzat joko da.
• Astero emanen da egun bakoitzerako egindako eskaeren berri.
• San Pedro (ekainaren 29a) eta San Adrian (ekainaren 16a) egunetan ez da mugatuko baimen kopurua Altsasuko eta Etxarri Aranazko bizilagunentzat, hurrenez hurren.
• Baimenak puntualki mugatzen ahalko dira, instalazioa gelditzea ekartzen badu eta, betiere, batzordearekin adosten bada mugaketa hori.
• Norberaren egutegiaren egunak agortu dituzten langileek egindako eskaerak onetsiko dira, baldin eta enpresak bideragarri ikusten badu ematea, eta, gainera, errekuperatzeko edo deskontatzeko baldintzarekin, produkzio beharren arabera.

Tratamendu termikoen, bizarrak kentzearen, azken ekintzen eta bidalketen atalean, egun horiek ez dira hartzen ahalko udako oporrak hasi aurreko astean, baldin enpresako zuzendaritzak hilabete aurretik hala eskatzen badu. Zenbait eskaerak traba egin badezakete fabrikaren antolamenduan, bi aldeak ados jarriko dira gutxieneko presentziaren portzentajeak zehazteko atal bakoitzean. Eskaerak egiten diren hurrenkera berean ebatziko dira.

05. artikulua. Ordaindutako lizentziak.

Hitzarmen honi atxikitako langile guztiek dute eskubidea lizentzia ordaindua izateko, eranskinen tauletan ezarritako soldata kobratuta, ondoren adierazten diren kasuetan eta denboran, behar bezala eta aski justifikatu ondotik.

Hitzarmen honetan ezarritako baimen ordainduak indarra duen legeriaren arabera aplikatuko dira. Eskubide horiei eragiten dien arau aldaketa oro araudi berriak ezartzen duen moduan txertatu eta aplikatuko da.

1. Langilearen beraren ezkontza: 20 egun natural jarraian, gertaera eragilea egun horietan bada. Lizentzia hori oporrekin batzen ahal da, parean tokatuz gero. Familia Liburua edo egoki den ziurtagiria aurkeztuz justifikatuko da lizentzia hori.

2. Egun bat, baldin ezkontzen badira anai-arrebak, gurasoak, seme-alabak, odoleko lehengusuak, odoleko ilobak, aita-amaginarrebak, koinatu-koinatak (anai-arreben ezkontideak eta ezkontideen anai-arrebak) eta odoleko osaba-izebak. Lizentzia hau justifikatzeko, aurkeztuko da elizkizunen buru den apaizak edo epaileak emandako agiria.

3. Semea edo alaba jaiotzeagatik eta adingabea zaintzeagatik.

Arlo honetan indarrean dagoen legerian xedatutakoari jarraituko zaio:

Jaiotzak, zeinak erditzea eta adingabea zaintzea barne hartzen baititu, ama biologikoaren eta ama biologikoa ez den gurasoaren lan-kontratua etenen du hemeretzi astez.

Gurasobakartasun kasuetan, guraso bakarra izanez gero, etenaldia hogeita hamabi astekoa izanen da.

Erditze goiztiarretan edo edozein arrazoirengatik jaioberriak ospitalean egon behar badu erditzearen ondoren, ama biologikoak edo beste gurasoak eskaturik, ospitalean alta hartzen denetik aurrera zenbatzen ahalko da etenaldia. Zenbaketa horretatik salbuesten dira erditu ondoko sei asteak: epe horretan ama biologikoaren kontratua eten egin beharko da nahitaez.

Garaia baino lehen pisu gutxiegirekin jaiotzen diren haurren kasuan eta, baldintza klinikoren bat dela medio, jaioberriak ospitalean egon behar badu zazpi egun baino gehiago erditzearen ondoren, etenaldia ospitaleratzeak dirauen adina egun luzatuko da, gehienez ere hamahiru aste gehiagora arte, erregelamenduz garatzen den baldintzak betez.

Haurra hiltzen bada, etenaldia ez da murriztuko, salbu eta nahitaez hartu beharreko sei asteko atsedenaren ondoren, langileak lanpostura itzultzea eskatzen badu.

Gurasoetako bat hiltzen bada, beste gurasoak zilegi izanen du baimena hartzea, osorik edo lizentziatik geratzen den zatia.

Adingabeak zaintzeko guraso bakoitzaren kontratu-etetea honela banatzen da:

a) Erditzearen ondorengo sei aste jarraitu nahitaezkoak izanen dira, eta lanaldi osoan hartu beharko dira.

b) Hamaika aste, hogeita bi guraso bakarra izanez gero, langileak nahi izanez gero banatzen ahalko dira, asteka, metatuta edo etenik gabe, erditzearen ondorengo nahitaezko etenaldia burutzen denetik semeak edo alabak hamabi hilabete bete arte. Hala ere, ama biologikoak erditzea aurreikusten den eguna baino lau aste lehenagotik eteten ahalko du.

c) Bi aste, edo lau, guraso bakarra denean, adingabea zaintzeko. Aste horiek langileak nahi izanez gero asteka banatzen ahalko dira, denak batera edo etenaldiekin, harik eta semeak edo alabak zortzi urte bete arte.

Eskubide hori indibiduala da langileentzat, eta ezin zaio erabilera beste gurasoari transferitu.

b) eta c) letretan aurreikusitako etenaldiak lanaldi osoan edo lanaldi partzialean hartzen ahalko dira, aldez aurretik enpresa eta langilea ados jarrita, eta erregelamendu bidez ezarritakoaren arabera. Langileak, gutxienez hamabost egun lehenago, enpresari jakinaraziko dio eskubide honetaz baliatuko dela, kasua bada, hitzarmen kolektiboetan ezarritako baldintzetan. Eskubide hori baliatzen duten bi gurasoek enpresa bererako lan egiten badute, enpresaren zuzendaritzak eskubidea biek batera baliatzeko aukera mugatzen ahal du, arrazoi funtsatuak eta objektiboak badaude, idatziz behar bezala arrazoituta.

Atal honetan xedatutakoaren ondorioetarako, ama biologikoa terminoak haurdun dauden transak ere barne hartzen ditu.

Adopzioaren, adoptatzeko zaintzaren edo harreraren kasuan, Langileen Estatutuaren 45.1.d) artikuluarekin bat, etenaldiak hemeretzi aste iraunen du adoptatzaile, zaintzaile edo harrera-egile bakoitzarentzat.

Guraso bakarraren kasuan, adoptatzaile, adopzio-helburuko zaintzaile edo harrera-egile bakarra dagoelako, etenaldia hogeita hamabi astekoa izanen da.

Haurra zenduz gero, etenaldia ez da murriztuko, salbu eta nahitaez hartu beharreko sei asteko atsedenaldiaren ondoren lanean berriz hasteko eskatzen bada.

Adoptatzaile, adoptatzeko zaintza-egile edo harrera-egileetako bat hiltzen bada, beste pertsonak zilegi izanen du baimena hartzea, osorik edo lizentziatik geratzen den zatia.

Adingabeak zaintzeko adoptatzaile, zaintza-egile edo harrera-egile bakoitzaren kontratuaren etenaldia honela banatzen da:

a) Sei aste, nahitaez, lanaldi osoz eta etenik gabe hartu beharko dira adopzioa eratzen duen epailearen ebazpenaren ondoren, edo adopziorako zaintza edo harrera baiesten duen erabaki administratiboaren ondoren.

b) Hamaika aste, edo hogeita bi, gurasobakartasunaren kasuan. Aste horiek, langileak nahi izanez gero, asteka banatzen ahalko dira, metatuta edo etenaldiekin, eta adopzioa eratzen duen ebazpen judizialaren edo adopzio-helburuko zaintzaren edo harreraren erabaki administratiboaren ondorengo hamabi hilabeteen barruan baliatu beharko dira.

c) Bi aste, edo lau, guraso bakarra denean, adingabea zaintzeko. Aste horiek langileak nahi izanez gero asteka banatzen ahalko dira, denak batera edo etenaldiekin, harik eta adingabeak zortzi urte bete arte.

Ez da zilegi langile berak etenaldi bat baino gehiago hartzea adingabe beragatik.

Nazioarteko adopzio kasuetan, gurasoek adopzioan hartuko duten haurraren jatorrizko herrialdera joan beharra dutenean, atal honetan kasu bakoitzerako aurreikusitako etenaldia lau aste lehenagotik ere hasten ahalko da, adopzioa eratzen duen ebazpenaren aurretik.

Eskubide hori indibiduala da langileentzat, eta ezin zaio transferitu beste adoptatzaileari, adoptatu aurreko zaintzaileari edo harrera egiten duenari.

b) eta c) letretan aurreikusitako etenaldiak lanaldi osoan edo lanaldi partzialean hartzen ahalko dira, aldez aurretik enpresa eta langilea ados jarrita, eta erregelamendu bidez ezarritakoaren arabera. Langileak, gutxienez hamabost egun lehenago, enpresari jakinaraziko dio eskubide honetaz baliatuko dela, kasua bada, hitzarmen kolektiboetan ezarritako baldintzetan. Eskubide hori baliatzen duten bi adoptatzaile, zaintzaile edo harrera-egileek enpresa bererako lan egiten badute, enpresaren zuzendaritzak aldi berean baliatzeko aukera mugatzen ahal du, arrazoi funtsatuak eta objektiboak badaude, idatziz behar bezala arrazoituta.

6. Jaiotzaren, adopzioaren, adoptatzeko zaintzaren edo harreraren kasuan semeak nahiz alabak desgaitasunen bat badu, 4. eta 5. apartatuetan aipatzen den kontratu etenaldiak bi aste gehiago iraunen du (bat guraso bakoitzarentzat). Jaiotze, adopzio, adoptatzeko zaintza edo harrera anizkoitzetan berdin jokatuko da seme nahiz alaba bakoitzeko, bigarrenetik hasita. Guraso bakarra badago, bi guraso dituzten familientzat apartatu honetan xedatutako luzapen osoak baliatzen ahalko ditu.

4. Honako hauen heriotza:

Ezkontidearen, izatezko bikotekidearen eta seme-alaben heriotza: 7 lanegun, lehenengo lanegunetik hasita. Ez da lizentzia honen frogagiririk behar.

Gurasoen, anai-arreben, aitaginarreba-amaginarreben, ezkonanai-arreben (anai-arreben ezkontideak eta ezkontideen anai-arrebak) heriotzagatik: 3 lanegun. Lizentzia horietarako ez da frogagiririk behar.

Aitona-amonen, biloben, ezkon aitona-amonen heriotzagatik: 2 lanegun.

Odoleko osaba-izebak eta haien ezkontideak, suhi-errainak, odoleko lehengusuak eta odoleko ilobak: egun natural bat; har daiteke heriotzaren egunean edo hiletaren egunean, edo ehorzketaren edo errausketaren egunean. Lizentzia horren frogagiria eskela izanen da edo bestelako idatzizko frogagiri bat.

(*) Heriotza jaiegun batean gertatzen bada, lizentzia heriotzaren egun berean hasiko da, baldin eguerdiko 12ak baino lehen gertatzen bada, eta hurrengo egunean, baldin eguerdiko 12ak eta gaueko 12ak bitartean gertatzen bada.

5. a) Eritasun larri egiaztatuagatik:

gurasoak, anai-arrebak, aita-amaginarrebak, ezkonanai-arrebak (anai-arreben ezkontideak eta ezkontideen anai-arrebak), suhi-errainak, aitona-amonak eta bilobak: 5 egun, jarraian edo tartekatuta, eri diren bitartean. Gurasoen eta aitagin-amaginarreben kasuan, horrelako lizentziarik ez da hartzen ahalko eritasun beragatik, aurreko lizentziako azken egunetik 60 eguneko epea bete baino lehen. Anai-arreben eta ezkon anai-arreben kasuan, 6 hilabete. Aitona-amonen, biloben eta suhi-errainen kasuan, urtebete.

Ospitalizazioetan, frogagiriak agertu behar du gaixoa zer egunetan ospitaleratu den. Kasu horretan, lizentzia egunak ez badira hartzen gertaera eragilearen egunetik aurrera, aurreabisua egin beharko da lizentzia hartu nahi den eguna baino 24 ordu lehenago.

Ezkontidearen eritasun larria (erditzea izan ezik) eta seme-alaben eritasun larria: 5 lanegun; jarraian edo tartekatuta har daitezke, eritasunak dirauen bitartean. Lizentzia hori ez da berriz hartzen ahalko eritasun beragatik, aurreko lizentziaren azken egunetik 30 eguneko epea bete baino lehen.

b) Ezkontidea, izatezko bikotekidea, semea-alabak eta gurasoak klinikara eraman behar izatea, 24 ordu baino gutxiagorako: egun natural bat. Lizentzia horren frogagiria izanen da ospitalizazioaren edo larrialdien partea.

c) Langilearen, ezkontidearen, izatezko bikotekidearen, seme-alaben eta gurasoen kirurgia anbulatorioa: egun natural bat.

d) Ospitalizazioagatik edo ospitalizazio gabeko ebakuntzagatik:

ezkontidea, izatezko bikotekidea, gurasoak, anai-arrebak, aita-amaginarrebak, ezkonanai-arrebak (anai-arreben ezkontideak eta ezkontideen anai-arrebak), suhi-errainak, aitona-amonak eta bilobak, baldin etxeko atsedena beharrezkoa bada: bost egun natural; jarraian hartu beharko dira, gertaera eragiletik hasita. Etxean atseden hartu beharra medikuaren txostenaren bidez frogatuko da.

d) Langileari egindako endoskopia-probetarako, lanegun bat:

–Gertaera eragilearen egunean gehi aurrekoa, baldin gaueko txandan ari bada.

–Lizentzia hori bertaratze agiriarekin justifikatuko da.

Atal honetan aipatutako lizentziak agortu ondotik, eguneroko lanari hasiera emanik, langileari abisatzen badiote eri larria eraman dutela eta, ondorioz, lana eten beharra izanez gero, eskubidea izanen du lanetik kanpora emandako ordu horiek lizentzia ordaindu gisa kobratzeko. Era horretako lizentziaren frogagirian edo eskaeran agerraraziko dira eriaren izena eta bi deiturak.

Eritasun baten larritasuna frogatuko da eria 24 ordurako baino gehiagorako ospitaleratzen bada edo txosten medikoak horrela dela adierazten badu.

Eritasun larrien kasuan edo 24 ordutik gorako ospitalizazioan, kontsideratuko da ezen gertaera eragilea gertatu dela ospitalizazioaren edo larritasunari buruzko txostena egiten den egunean berean edo biharamunean, frogagiriak dioenaren arabera.

2., 4. eta 5. apartatuetan egun bat gehiago emanen da, baldin Urdiaingo lantegitik gertaera izaten den lekura 200 kilometro baino gehiago badago, eta beste egun bat gehiago (guztira bi egun) baldin Urdiaingo lantegitik gertaera lekura 400 kilometro baino gehiago badago. Beste egun horiek lizentziaren aurrekoak edo ondokoak izan daitezke, eta egun naturalak edo lanegunekoak izanen dira, segun zer baimenek sortzen dituen.

Distantzia dela-eta, lizentzia luzatzeko eskubidea izanen da baldin lantokitik 200 kilometrora baino gehiagora ospitaleratzen bada, edo baldin eta lizentzia hartzen den denboran, hots, gertaera eragilearen ondorengo bi egun natural horietan, lantokitik 200 kilometrora baino gehiagora dagoen erietxe batera eraman beharra badago. Era berean, lizentzia luzatzeko aukera izanen da, baldin eritasun larria gertatzen bada lantokitik 200 kilometrora baino urrutiago dagoen toki batean.

6. Ohiko bizilekua aldatzeko: lanegun bat. Lizentzia hau udal erroldaren frogagiriarekin justifikatuko da, bertan agertuta zer egunetan egin den etxe-aldaira.

7. Eginbehar publiko bat betetzeko behar-beharrezkoa den denbora. Eginbehar publikotzat joko dira:

Eginbehar saihetsezin bat betetzeko, langilea erakunde publiko batera joan beharra eskatzen duen egoera oro, baldin eta horretarako ordutegia langilearen lanorduetan egokitzen bada. (Adibidez: hitzordua auzitegietarako, epaitegietarako edo hauteskundeetarako...).

Ez da eginbehar publiko saihestezin gisa hartuko nortasun agiri nazionala berritzea, nahiz eta lanaldi zatituko langileek eskubidea izanen duten NANa berritzeko lizentziarako, behar-beharrezkoa den denboraz.

8. Odol-emaileek odola emateko behar-beharrezkoa duten denbora. Odola eman izanaren ziurtagiri batekin justifikatuko da.

9. Egun natural bat, hortz piezak kendu edo ezartzegatik. Egun horretan edo biharamunean har daiteke. Lizentzia honetarako frogagiria medikuak emandako agiria izanen da, non agertuko baita kontsultara joan izana.

–Gizarte Segurantzako mediku espezialistarengana edo enpresako langileen mutualitatera joateko: behar-beharrezkoa den denbora. Frogagiri gisa, langileak aurkeztu beharko du familiako medikuak emandako bolantearen kopia bat, eta zer espezialistarengana bidali duen, haren ziurtagiria. Familiako medikuaren bolanterik ez da beharrezkoa izanen baldin asistentzia eman bada anbulatorioan edo dagokion zentro ofizialean. Azken finean, espezialistaren ziurtagiria aski izanen da baldin eta familiako medikuak igorri duela agerrarazten bada. Espezialistarako lehenbiziko bolanteak hurrengo bisitaldiak egiteko ere balioko du, baldin Gizarte Segurantzako espezialistak bere ziurtagirian adierazten badu beste bisitaldi batzuk egin beharko direla eta haietarako data. Gauza bera eginen da espezialistarengana enpresako medikuak igortzen duenean.

–Familiako medikuarengana joateko, urtean 16 ordu gehienez. Frogatuko da osasun etxean emandako agiriaren bidez.

10. Behar-beharrezkoa den denbora, haurdun dauden langileei erditu aurreko azterketa medikoak egiteko eta erditzea prestatzeko tekniketan trebatzeko, lanorduetan egin behar badira. Txanda aldatzea baimenduko zaie, txanda aldatzeko prima ordaindu gabe, hala eskatzen duten langileei, ezkontidea edo izatezko bikotekidea laguntzeko kasuan kasuko jaio aurreko azterketetara. Baimen hau justifikatuko da aldez aurretik aurkeztuz hitzordua eta ondotik joan izanaren frogagiria.

11. Norabait laguntzea.

–Ezkontidea edo izatezko bikotekidea edo seme-alabaren bat larrialdietako zerbitzuetara joaten denean, bera laguntzeko: behar-beharrezkoa den denbora. Larrialdietako zerbitzuak emandako bertaratze-frogagiria aurkeztu beharko du langileak.

• 24 ordu urtean, gehienez, laguntzeko tratamendu onkologikoa hartzen ari den ezkontideari edo izatezko bikotekideari, gurasoei edo seme-alabei. Justifikatuko da kasuan kasuko zitazio medikoarekin eta laguntzaile gisa joan izanaren frogagiriarekin.
• 25. ordutik aurrera, langileak ordaindu gabeko lizentzia lortzeko eskubidea izanen du; kasu horretan, enpresak gutxieneko oinarrien kotizazioa ordainduko du. Metalaren hitzarmenean jasotako gutxieneko oinarriak, dagokion ordainsari-taldea.

–14 urtetik beherako seme edo alaba bat joaten denean Osasun Zerbitzu Publikoko pediatrarengana eta mediku espezialistarengana, bera laguntzeko: behar-beharrezkoa den denbora. Langileak aurkeztu beharko du bisitako medikuak emandako bertaratze frogagiria.

–Osasun Zerbitzu Publikoaren probetara aitarekin edo amarekin joateagatik, behar-beharrezkoa den denboran (urtean 16 ordu gehienez). Medikuaren frogagiria entregatu beharko da.

–12 ordu urtean, gehienez, laguntzeko ezkontideari, izatezko bikotekideari, gurasoei edo seme-alabei, Osasun Zerbitzu Publikoan sedazioa edo anestesia eskatzen duten proba diagnostikoetara. Kasuan kasuko medikuaren txostenarekin justifikatuko da; bertan zehaztuta egonen da sedazioa edo anestesia behar direla.

12. Ezinbesteko kasuetan:

Indarrean dagoen legeriaren arabera, langileak eskubidea izanen du ezinbesteak eraginik lanera ez agertzeko, baldin eta ahaideekin edo bizikideekin zerikusia duten premiazko familia-arrazoiengatik sortzen bada halabehar hori, langilea berehala bertaratzea eskatzen duen gaixotasun edo istripuren bat gertatuz gero. Langileek eskubidea izanen dute apartatu honetan azaltzen diren arrazoiengatik lanean ari ez diren orduen ordaina jasotzeko, hain zuzen ere lau egun urtean guztira. Halakoetan, lanera ez joateko arrazoia frogatu beharko dute.

13. Norberaren aferetarako poltsa bat ezartzen da, ORDAINDU GABEKO 16 ordukoa, zeinak itzuli edo deskontatuko baitira, langilearen hautura. Halaber, txanda aldaketak erraztuko dira.

Lizentziarako eskaeran, halaber, aurreko inguruabarrak adieraziko dira, eta horren berri emanen zaio enpresari ahalik eta lasterren.

Lizentzia ordainduaren arrazoia baldin bada erditzea, eritasuna edo heriotza eta, gainera, langileak, kasua presakoa delako, hasitako lanaldia eten beharra baldin badu, irizpide honi jarraituko zaio:

a) Etenaldia gertatzen bada langileak bere lanaldiko erdia iragan baino lehen, egun hori oso-osorik kontatu eta ordainduko da lizentzia ordaindu gisa, eta gainera lanordu arrunt gisa kobratuko dira egun horretan lan egindako orduak. (Ordu gainjarriak).

b) Etenaldia gertatzen bada langileak bere lanaldiko erdia iragan ondotik, egun hori ez zaio lizentzia ordaindu gisa kontatuko eta langileak, dagokion lizentzia ordaindua ondorengo egunetan hartzeaz gainera, lanaldi arrunta eten beharraren ondorioz lan egin ez dituen orduen zenbateko osoa kobratuko du.

c) Gainjartzen diren orduen balioa eranskinetako tauletan adierazten da.

5. artikulu honetako apartuetan guztietan (salbu 1. eta 2. apartatuetan) eta lizentzia ordainduen ondorioetarako, ezkontide baten harreman eta bizikidetasun bera duen pertsona oro joko da langilearen ezkontidetzat, ahaidetasun maila berekoa, eta, horren ondorioz, egokituko zaio lizentzia ordaindu mota bera eta zenbateko bera.

Izatezko bikote izaera aitortzeko, aurretik aurkeztu beharko dira legez onartutako agiriak: izatezko bikoteen kasuan kasuko udal erregistroaren inskripzioaren ziurtagiria, edo notarioaren agiri bat, aitortzen duena ezkontza harremana.

Enpresak eskubide hori aitorturik, langileak galduko du ezkontide ohiagatik edo izatezko bikote ohiagatik eta haren ahaideengatik izan zitzakeen lizentziak izateko eskubidea. Bizikide duen pertsonarengatiko lehen lizentzia hartu ahal izateko gutxienez hilabete iragan beharko du, enpresak egoera berria espresuki aitortu ondotik.

06. artikulua. Kontratazioa eta Enpresa uztea.

Zuzeneko laneskua kontratatuko da honako soldata taula hauen arabera:

–B peoia, Beharginak.

–Mantentze-lanetako ikastuna.

–Eredugintzako ikastuna.

Hurrengo kategoriara pasatzeko, lanpostu bakoitzean 1. eranskinean ezarritako baldintzak bete beharko dira.

Sei hilabeteko aldi hori kontatzeko, langileak enpresan izandako kontratuak batuko dira, betiere kontratu horien artean bi urte baino gehiago iragan ez badira.

Errelebo kontratuaren alde jokatuko da eta bultzatuko, plantilla modu ez traumatikoan berritzeko bide den aldetik.

Lanerako gaitasuna eta kalitatea aitortzen zaienean, artikulu honetan aipatutako langileek lehentasuna izanen dute aurreko paragrafoetan aipatu bezala sortzen diren lanpostuak betetzeko kontratu mugagabez edo errelebo kontratu bidez.

Aldi baterako laneko enpresak erabiltzeak ez du errendimendu egokia sortzen, beraz, bide horretatik ahalik eta langile gutxien kontratatzea proposatzen da. Premiazkoa izanez gero, kontratu horiek enpresa batzordearekin adostuta eginen dira.

Enpresak konpromisoa hartzen du behin-behineko langileen %10eko muga ez gainditzeko (portzentaje hori kalkulatzeko, absentismoaren portzentajea kenduko zaio benetako behin-behinekotasunaren portzentajeari), salbu eta eskariaren salbuespenezko igoeretan; betiere, aldi horiek ez dira izanen 3 astetik gorakoak.

Orobat, enpresak konpromisoa hartzen du baja iraunkorrak ordezteko mugagabeko kontratazioekin, baldin eta lan kargak horretarako bide ematen badu.

Probaldia.

Enpresan lanean hasten den langile orok probaldia egin beharko du, eta horrela agerraraziko da idatziz. Probaldi hori ez da inola ere luzatuko eskala hauetan ezarritakoa baino gehiago:

–B peoiak: 30 egun.

–A peoiak: 15 egun.

–B ofiziala: 15 egun.

–Mantentze-lanetako eta eredugintzako ikastunak: 30 egun.

Enpresa uztea.

Zuzeneko eskulaneko edozein langilek bere borondatez uzten ahalko du enpresaren zerbitzua, probaldia bukatu ondoren, 15 egun lehenago.

07. artikulua. Maila igoerak eta sustapena enpresan.

Enpresak bere plantillan bete beharreko edozein lanpostutarako (galarazi gabe enpresak edozein ikasketa titulu eskatzeko duen ahalmena), titulazio hori duten bertako langileak aurkezten ahal dira zuzendaritzak beharrezkotzat jotzen dituen azterketa edo gaitasun probetara, enpresatik kanpoko beste pertsonekin batera eta baldintza berberetan.

Lanpostu huts hori mantentze-lanetako atalean suertatzen bada, lanpostua barne-igoeraren bidez betetzen ahal da.

Azterketa edo gaitasun proben emaitzetan berdinketarik izanez gero, enpresan diharduten langileak lehenetsiko dira, kanpokoen gainetik.

Kontratazio berrien bidezko lanpostuak bete behar direnean, baldin horrek eraginik izan badezake enpresako langileengan, artikulu honetan ezarritakoaren arabera, zuzendaritzak horren berri emanen dio enpresa batzordeari, gero langile guztiei jakinaraz diezaien. Hutsune bat bete behar dela jakitean eginen da jakinarazpena.

Enpresako langileekin bakarrik beteko diren lanpostuetarako, lehiaketaren kalifikazio-epaimahaia hauek osatuko dute:

a) Hiru mahaikide, enpresako zuzendaritzak izendatuak.

b) Bi mahaikide, enpresa batzordeak izendatuak, langileen artetik.

Artikulu honetan aurreikusi ez den orotan indarra duten legeei jarraituko zaie.

08. artikulua. Txandaz eta atalez aldatzea.

Bi prima ezarri dira: ATALEZ ALDATZEAGATIKO prima bat, orduko 1,85 eurotan ordainduko dena. Hila burutu ondoren ordainduko da. TXANDA ALDAKETAK aparteko ordu baten balioa izanen du (1. eranskinean jasota).

Atal aldaketak kalkulatzeko, atal hauek hartuko dira kontuan:

1.–Mantentze-lanak.

2.–Produkzioa. Moldaketa-Galdaketa/koilarak.

3.–Produkzioa. Akaberak.

4.–Bidalketak.

5.–Ereduak/azken kontrola/laborategia.

Araudia.

1. Bi hilean behin, gutxienez, langileen antolamendu ofiziala argitaratuko da. Bertan, langile bakoitzari ohiko txanda eta atala esleituko zaizkio, eta urtean 30 langile aldatzen ahalko dira txandaz. Urte horretan langileen xedapen ofizialaren barruan txanda aldatzen zaionari 2 txanda aldaketa ordainduko zaizkio.

2. Nolanahi ere, aparteko aldaketak egin daitezke langileen banaketa ofizialean bi hilabete egin baino lehenago, Batzordeari jakinarazi ondoan, ezinbesteko kasuetan (sutea, uholdeak, matxura larria...), edo lan karga modu nabarmenean aldatzearen ondorioz, produkzio planean doikuntza garrantzitsuak egin behar direnean.

3. Enpresak atalez aldatzen ahalko du behargina, produkzio arrazoiengatik edo lanposturako egokitasunagatik. Aldaketa bakoitzeko, eta egoera horrek dirauen artean, langileari atal aldaketaren prima ordainduko zaio. Lanpostu aldaketa iraunkortzat jotzeko, 3 hilabetez gutxienez, denbora osoaren %60 gutxienez postu horretan aritu beharko da.

4. Txanda bat aldatzen den bakoitzean, ordainduko da txanda aldatzeko eta norberaren txandara itzultzeko prima, baldin eta aste berean bada eta ez bada enpresa batzordearen ordu kredituarengatik.

5. Atalez eta txandaz aldatzen bada, bi primak ordainduko zaizkio.

6. Zerrenda bat eginen da, eta bertan adieraziko da langile bakoitzak zenbat lanpostutarako prestakuntza duen.

7. Baldin atal aldaketa egiten bada behin lanaldia hasitakoan, lanpostu berrian emandako orduengatik ordainduko da prima.

8. Ez da atal aldaketaren primarik ordainduko langilea lanpostuan prestakuntzan ari den aldian.

9. Ez dira atal aldaketatzat hartuko matxuren ondorioz edo instalazioaren geldialdi programatuen ondorioz egiten direnak.

10. Ez dira atal aldaketatzat hartuko laborategiko laguntzaileek egiten dituztenak analista gisa zerbitzuan ari direnean, sustapeneko lanpostua delako.

11. Arduradunaren ordez aritzen denari ez zaio atal aldaketarik ordainduko, ezta koordinatzailearen ordez ari denari ere, ordezkoaren prima ordainduko zaiolako.

12. Txatarra sailkatzeko lanpostura aldatzen den langileak lehengo lan txanda berean jarraituko du; ez du nahitaez lan hori ordutegi jakin batean egin beharko.

13. Ondoko kasuetan ez da ordainduko ez atal aldaketaren primarik ez txanda aldaketaren primarik:

–Atal aldaketa borondatezkoa denean.

–Txanda aldaketa borondatezkoa denean.

–Atal aldaketa medikuak agindutakoa denean.

–Lanpostuarekiko bateraezintasuna dagoenean.

Balio horiek urtero eguneratuko dira hitzarmenean adostutakoari jarraituz.

09. artikulua. Ordainsariak.

Ordainsariak eranskinean jaso dira eta soldaten igoerak Nafarroako industria siderometalurgikoaren hitzarmen kolektiboan ezarritakoaren araberakoak izanen dira: 2025ean %2, eta 2026an %2, 2027an %2.

Hilean behin ordainduko dira produkzioaren osagarri presentzialak (kontzeptu finkoan); gauekoak, joan-etorriak, txanda aldaketak, atal aldaketak edo bizarrak kentzeagatiko osagarriak izan ezik, horiek hilabetea burutu ondoren ordainduko baitira.

1.–Mantentze-lanak/koordinatzaileak = 1,8.

2.–Produkzioa/Bidalketak = 2,65.

3.–Bizar esekiak = 3.

4.–Laborategia/Eredugintza/Entseguen kontrola = 1,6.

5.–Koordinatzailearen ordezkoa = 4,27.

6.–Arduradunaren ordezkoa = 5.

(*) Eredugintzarako oinarrizko soldata duen laborategiko taula.

Ordainketako unean enpresan alta emanak dauden langileei pagatuko zaizkie hitzarmena doitzearen ondoriozko atzerapenak.

ERANSKINAK

Bi alderdiek erabaki dute soldaten taulak urtean zehar eguneratuko direla. Pizgarriak adostu ahala, aplikatuko dira, dagokien idazketa berriekin, itxaron gabe hitzarmen osoaren testu berria idatzi arte.

10. artikulua. Nominen ordainketa.

Gaur egun egiten den bezala ordainduko da, oinarrizko soldata gehi hileko produkzioaren osagarri presentzialak, lanpostu bakoitzerako; bizarrak kentzeagatiko osagarrietan eta txanda aldaketetan, atal aldaketetan eta joan-etorrietan izan diren aldaketak izan ezik. Kasu horietan hilabetea bukatutakoan ordainduko dira.

Hitzarmen hau sinatu eta hurrengo nominatik aurrera aplikatuko da xedatutakoa.

1. eta 2. egun naturalen artean ordainduko da, salbu jaieguna edo asteburua badira.

Nominei buruzko erreklamazioak enpresa batzordearen bidez egin daitezke, hain zuzen ere batzordeak horretarako propio izendatutako pertsonaren bidez, zeinak denak bilduko baititu batera aurkezteko. Alde horiek, aztertu eta gero, erreklamazioa egin eta hurrengo nominan ordainduko dira.

11. artikulua. Ordainsarien kontzeptuak.

a) Enpresako hileko soldata.

b) Produkzioaren osagarri presentziala. Lanpostu bakoitzari dagozkion zenbatekoak:

–Produkzioko eta bidalketetako langileak = Produkzioaren osagarri presentziala 2.65 euro = 381,60 euro.

–Bizarrak kentzen dituzten langileak= Produkzioaren osagarri presentziala 3 euro = 432 euro.

–Mantentze-lanetako ofizialak/koordinatzaileak = Produkzioaren osagarri presentziala 1,8 euro = 259.2 euro.

–Eredugile eta laborategiko langileak eta azken kontrola = Produkzioaren osagarri presentziala 1,6 euro = 230,40 euro.

c) Antzinatasuna - Horren hileko zenbatekoa, hirurteko bakoitzeko, eranskinetan dago zehaztua. Lantegiko hirurtekoaren prezioa enplegatuenarekin parekatzen da, hirurtekoen kopurua mugatu gabe.

d) Lizentzia ordaindua - Horrelakotzat hartuko dira kontzeptu horrengatik lan egiten ez diren orduak soilik.

e) Aparteko pagak - Aparteko bi paga izanen dira; horien zenbateko finkoa eranskinetan zehaztuta dago. Bata ekainaren 30ean ordainduko da, eta bestea abenduaren 22an.

f) Gaueko txandaren eskumenak: gaueko txandan arduradunik ez badago, kasuan kasuko mantentze-lanetako ofizialak beteko ditu haren eginkizun batzuk. Eranskinetan dago ezarrita orduko balioa.

g) Urruntasun plusa - Ikus hitzarmen honen 12. artikulua.

h) Gaueko lanaren prezioa 1,65 euro/orduko da.

Hitzarmen hau sinatu eta hurrengo nominatik aurrera, puntualtasun primaren eta opor primaren zenbatekoa (batez besteko produkzioaren osagarri presentzialeko 200 ordu azken 3 hilabeteetan) aparteko bi ordainsarietan ordainduko da eta, ondorioz, ez da abuztuan ordainduko.

12. artikulua. Urruntasun plusa.

Urruntasun plusaren zenbatekoa urtero berrikusiko da, hitzarmen honi lotutako langileen soldata berrikusten den proportzio berean. Zenbatekoa 6. eranskinean azaltzen da, eta kilometroak izanen dira joaneko bidaia bati eta itzulerako beste bati dagozkien guztiak.

Plus hori kobratzeko eskubidea ematen duen bizilekutik edo herritik beste batera aldatu diren langileek kobratuko dute euren bizileku berrirako ezarritako zenbatekoa, betiere 45 kilometrotik gorako tarterik ez badago joanaren eta etorriaren artean.

Urtero, enpresaren kontura bidaiatzen duten langileei ordaintzen zaien kilometrajea ezartzen denean, enpresa batzordeari haren kopia emanen zaio.

Plus hori bakarrik jasoko da etxetik enpresarako joan-etorriak egiten direnean.

Urtero, enpresaren kontura bidaiatzen duten langileei ordaintzen zaien kilometrajea ezartzen denean, enpresa batzordeari haren kopia emanen zaio.

13. artikulua. Aparteko orduak.

Aparteko orduen batezbestekoa gehienez baldin bada 40 orduko eta pertsonako, zenbateko orokorrean, 50 ordu baino gehiago egin daitezke, puntualki, baldin lan-kargak hala eskatzen badu postu zehatzetarako, 80 ordu izanik gehienekoa. Egoera horren berri emanen zaio batzordeari 24 ordu lehenago.

Kobratzeko modalitatea:

Egunean ordu bat baino gutxiago diren egindako aparteko ordu guztiak pagatuko dira. Aparteko ordutzat hartzeko, arduradunak baimendu beharko ditu, giza-baliabideak jakinaren gainean egonik.

Ordu horiek kobratzeko modua elkarrekin adostuko dute langileak eta haren arduradunak. Nolanahi ere, aitortzen da, orokorrean, aparteko orduak egitea ez dela komeni eta ahalik eta gutxien egitea gomendatzen da.

A) Lan egindako ordu horien truke, %75 gehituz, atseden denbora hartzea.

B) Lan egindako orduen truke atseden denbora hartzea eta horien balioaren %75 kobratzea.

C) Aparteko orduen balioa oso-osoan kobratzea (orduaren balioa + %75)

–A eta B aukeretan, denbora libre hori hartzeko urtebeteko epea izanen da, egiten direnetik aurrera, 24 ordu lehenago abisatuta, betiere.

–A puntuan aipatzen diren ordu gehigarrien kasuan, lizentzia ordainduen osagarria ordainduko da.

–Aparteko orduak gehienez izanen dira egunean bi ordu (lanaldi arruntaren gainetik), hilean 16 ordu eta urtean 50 ordu.

Salbuespena:

Tratamendu termikoen, azken eragiketen, bizar-kentzearen eta bidalketen ataletan, "eguna egunaren truke" sistemaren bidez arautuko dira udako oporretako lehenbiziko egunetako aparteko orduak, eskaerei erantzuteko premien barnean, enpresak hilabete lehenago abisatuta.

Aparteko orduak zatidura honen arabera baloratuko dira, langileentzat eta ofizialentzat:

Ateratzen den zatidurari %75 erantsiko zaio, gehi lana zer postutan egiten den, han sortzen diren plusak.

Ordu horien balioen emaitza eranskinean ageri da.

14. artikulua. Erientzako prestazioak hobetzea.

Gizarte Segurantzak ematen dituen prestazioak hobetze aldera, horien "osagarri bat" sortu da, aplikatuko dena ikusiz eritasun bajek eragindako absentismoaren indizea, eskala honen arabera:

Kontingentzia arruntengatiko baja medikoaren kasuan:

–Bajak Lehenbiziko 3 egunetan:

• Lehenbiziko baja bada eta absentismoa %5,5 baino txikiagoa bada, eguneko kotizazio-oinarriaren %50 osatuko da.
  • Bigarren baja bat bada, ez da osatzen.

4. egunetik 60. egunera, kotizazio-oinarriaren %80raino konpentsatuko da absentismo orokorra %5,5 baino txikiagoa bada.

Bajaren 61. egunetik aurrera, Gizarte Segurantzak ezarritakoak izanen dira ordainketak.

Hileko produkzioaren osagarri presentziala presentzia orduen arabera bakarrik jasoko da; kontingentzia arrunten kasuan, falta izan diren egunen zati proportzionala deskontatuko da.

Lan batzorde bat eratuko da, eta aztertuko ditu absentismoaren afera eta kasu horietan jartzen diren osagarriak, bien arteko oreka lortzeko.

Artikulu hau akordioa sinatzen denetik aurrera aplikatuko da.

15. artikulua. Lan-osasuna.

Jarraituko zaio Laneko Arriskuen Prebentzioari buruzko Legeak xedatutakoari.

16. artikulua. Enpresa batzordea.

Enpresa batzordeko kideek 32 ordu har ditzakete hilean, ordainduak, euren ordezkaritza lanetan erabiltzeko. Ordu horiek sindikatu bakoitzak metatzen ahal ditu, 4 hilabetean, delegatu sindikalenak barne, eta batzordeko kide bakoitzak ordu horietatik behar dituenak erabiltzen ahal ditu.

Sindikatu bakoitzak enpresa batzordean dituen kideen eta delegatu sindikalen lizentzia orduak metatzen ahal dira, enpresaren antolaketa oztopatu gabe eta behar den denboraz jakinarazita, betiere.

Produktibitatea hobetzeko asmoz, zuzeneko laneskuko langileek astean erabiliko dituzten ordu sindikalen kopurua 56ra mugatuko da.

Nola laga ordu sindikalak enpresa batzordeko kideen eta delegatu sindikalen artean.

LAB.–Hitzartu da 128 ordu bitarte izan ditzakeela batzordeko kide bakoitzak lauhilekoan, eta ordezkari sindikalak, berriz, 80 ordu lauhilekoan, bere ordezkaritzaren eginkizunak betetzeko.

ELA-STV.–Hitzartu da 128 ordu bitarte izan ditzakeela Batzordeko kide bakoitzak lauhilekoan, eta ordezkari sindikalak, berriz, 80 ordu lauhilekoan, bere ordezkaritzaren eginkizunak betetzeko.

Enpresari behar den denboraz jakinaraziko zaio, bere antolaketa egin ahal izateko.

17. artikulua. Atal Sindikalak.

Hitzarmen honetan enpresako atal sindikalak onartzen dira.

Atal sindikala eratutzat jo ahal izateko, enpresari jakinarazi beharko zaio eratu dela. Bete beharreko baldintza bakarra da gutxienez enpresako plantillaren %15aren afiliazioa frogatzea.

Atal sindikalak delegatu sindikal bat izenda dezake, eta enpresak halakotzat aitortuko du, eta delegatu horrek eskubidea izanen du hilean, gehienez ere, 20 ordu hartzeko, ordainduak, lizentzia ordaindu gisa, bere jarduera sindikalerako. Horretarako, delegatuak gutxienez 24 ordu lehenago abisatuko du eta bere sindikatuaren frogagiria aurkeztuko.

Delegatuak parte hartzen ahal du enpresa batzordearen eta segurtasun eta higiene batzordearen bileretan, hitza eta botoa dituela. Enpresa batzordeari ematen zaion informazio bera emanen zaio delegatuari ere.

Afiliazioko gutxieneko portzentajea frogatzen duten enpresako atal sindikalek, euren afiliatu guztientzat urtean 5 egun izanen dituzte, gehienez, ordaindu gabeko lizentzia gisa, prestakuntza sindikaleko ikastaroetan eta antzeko jardueretan parte hartzeko. Egun horiek zenbatu eginen dira egutegiaren ondorioetarako. Lizentzia egun horiek hartu ahal izateko, sindikatuak 48 ordu lehenago jakinaraziko dio nahitaez enpresari.

18. artikulua. Eskubide sindikalak.

Sindikatuei negoziatzeko ahalmena aitortzen zaie. Probintziako hitzarmenak edo maila handiagoko legeren batek zer neurritan aitortzen duen 250 langileko enpresentzat, neurri berean aitortzen zaie.

Enpresan atal sindikala duten sindikatuek euren kuotak enpresaren bidez kobratzen ahal dituzte, langileen adostasun espresuarekin, sindikatuaren delegatuak aldez aurretik eta idatziz eskatuta.

Enpresak entzun, baloratu eta erantzuna emanen die sindikatuek egiten dituzten proposamenei.

19. artikulua. Zehapenak.

Honako diziplina araubide hau ezartzen da:

–Printzipio ordenatzaileak:

Honako arau hauen bidez laneko giro egokia mantendu nahi da, elkarbizitza ona izateko, eta eusteko enpresaren ordenamendu teknikoari eta antolaketari, baita langileen eta enpresaren eskubide eta interesak bermatzeko eta defendatzeko ere.

Enpresak eta batzordeak hitzartu dute harremanetan jartzea, gertatzen bada zehatzeko moduko edozein jarrera edo egintza, eta batera lan egitea halakoak onbideratzeko.

–Irizpide orokorrak:

1. Enpresak zilegi du langileen egiteak edo ez-egiteak zehatzea, laneko arau-hauste gisa, laneko arauak urratzean edo betebeharrak betetzen ez direnean, hurrengo artikuluetan ezarritako falten mailaketaren arabera betiere.

2. Faltengatik zehapena jartzeko, idatziz komunikatuko zaio langileari, adierazita gertaera eragilearen data eta zehapena.

3. Enpresak langileen ordezkariei jakinaraziko dizkie izapidetutako zehapen-komunikazio guztiak.

4. Zehapena ezarririk, hura irmoa denetik gehienez 60 egun natural iragan arte luzatzen ahal da bete gabe. (Zehapena irmoa ez denean hura aurkaratu dutelako, irmo bihurtzen den unetik aurrera hasten da epea kontatzen: adiskidetze-ekitaldiaren edo epailearen epaiaren egunetik aurrera).

Aurkaratzen ez bada, epea 90 egun naturalekoa izanen da, zehapena ezartzen den egunetik hasita. (Aurkaratzen ez denean, zehapenarena da hasierako eguna).

5. Faltak honela sailkatuko dira: arinak, astunak eta oso astunak.

6. Langileak ezarri zaion zehapena aurkaratzen ahalko du jurisdikzio eskudunean, zehapena jarri eta hurrengo 20 egun balioduneko epean, indarrean dagoen legerian ezarritakoari jarraikiz.

7. Jazarpen eta agintekeriaren kasuetan, zehapena ezarri baino lehen, beteko da Nafarroako Metaleko Hitzarmenaren 61. artikuluan zehaztutako jarduteko prozedura.

–Falta arinak:

Honako hauek joko dira falta arintzat:

a) Puntualtasun-falta lanera sartzean edo lanetik irtetean, hiru aldiz gehienez hilabetean, bidezko arrazoirik izan gabe. Salbuesten dira onetsitako ordu aldaketak.

b) Bidezko arrazoirik izan gabe lanera ez agertzea, hilabetean egun batez.

c) Lanera joanen ez dela ez jakinaraztea, aurretiaz edo, bidezkoa denean, hurrengo 24 orduen barrenean, halakorik egiteko ezintasuna egiaztatzen denean izan ezik.

d) Zerbitzua edo lanpostua bertan behera uztea. Halakotzat joko da plantaren eremutik kanpo egotea laburki aldez aurreko baimenik gabe edo bidezko arrazoirik gabe.

e) Norberaren ardurapean dauden ekipamenduak eta lan materiala zaindu edo mantentzeko akats arinak, nahita egiten direnean.

f) Enpresaren bezeroak edo hornitzaileak adeitasunez eta arretaz ez hartzea.

g) Lankide, bezero edo hornitzaileekin eztabaida desegokia izatea lanaldi barrenean.

h) Bizilekuz edo helbidez aldatu izanaren berri ez ematea enpresari, horrek lankideei edo enpresari kalterik edo arazorik ekartzen badie.

i) Langilearen familiaren edo norberaren datuetan izandako aldaketak, Gizarte Segurantzan edo Zerga Administrazioan ondorioak izan ditzaketenak, ez jakinaraztea behar den garaian, enpresari kalterik sortu gabe.

j) Beren ohiko eginkizunetan organigramaz edo hierarkiaz nagusi direnek emandako preskripzio, agindu edo manuei jaramonik ez egitea, horrek pertsonei edo gauzei kalte edo arriskurik ekarri gabe.

k) Ohiko lanaldiaren barnean egiten diren prestakuntza ikastaro teoriko edo praktikoetara ez joatea, bidezko arrazoirik izan gabe.

l) Ez betetzea lantokian erretzeko berariazko debekua, salbu horretarako egokitutako eremuetan.

m) Laneko Arriskuei Aurrea Hartzeari buruzko Legearen 29. artikuluan ezarritako eginbeharrak ez betetzea, arriskuren bat ekartzen badio bere buruari, lankideei edo beste batzuei, arriskua arina izanda ere.

–Falta astunak:

Falta astunak honako hauek dira:

a) Puntualtasun falta lanera sartzean edo lanetik irtetean, hiru aldiz baino gehiagotan hilabetean, bidezko arrazoirik izan gabe.

b) Bidezko arrazoirik izan gabe lanera ez agertzea bi egunez segidan edo lau egun tartekatutan, hilabetean. Aski da lanera behin huts egitea, horrek lankide baten txandari eragiten badio, edo enpresari kalte handi samarra sortzen badio.

c) Zerga kontuetan edo Gizarte Segurantzan eragina izan dezaketen datuak maltzurkeriaz faltsutzea edo ez aipatzea.

d) Enpresak langileen eskura utzitako baliabide informatikoak (posta elektronikoa, internet, intranet, eta abar) lan prestazioaren edukiaz bestelako helburuekin erabiltzea, horretan emandako denboraren ondorioz lanpostuari dagozkion eginkizunetan utzikeria egiten bada edo haiek bertan behera uzten badira. Enpresek baliabide informatiko horiek erabiltzeko protokoloa ezarriko dute, langileen ordezkariekin negoziatuz.

e) Bidezko arrazoirik gabe zerbitzutik edo lanpostutik alde egitea, nahiz eta denbora laburrean izan, betiere horren ondorioz enpresari eta/edo plantillari kalteren bat sortzen bazaio.

f) Norberaren garbitasun eta txukuntasun eza, lankideengan arrazoizko arrangura sorrarazten duenean eta enpresak aurrez ohartarazi badio.

g) Beste langile baten lekua hartzea edo beste batek norberaren lekua har dezala uztea, laneko sarrerako edo irteerako erregistroak eta kontrolak aldatuz.

h) Organigramaz edo hierarkiaz nagusi direnek lan arloko eginkizunak erabiliz emandako jarraibideak ez betetzea. Salbuetsita daude norbaiten bizitza edo osasunarentzat arriskutsuak diren kasuak, eta agintekeriaren ondoriozkoak.

i) Zabarkeriaz edo zuhurtziarik gabe aritzea lanean, zerbitzuaren kaltetan, baina, horren ondorioz, enpresarentzako kalte larririk sortu gabe eta pertsonek istripua jasateko arriskurik izan gabe.

j) Enpresaren baimenik gabe, lan partikularrak egitea lanorduetan, eta norberarentzat edo beste batentzat erabiltzea enpresako tresnak, erremintak, makinak edo ibilgailuak, lanorduetatik kanpo bada ere.

k) Falta arinak (puntualtasun falta kenduta) egitea behin eta berriz, mota desberdinetakoak izanik ere, hiru hilabetean, langileari zehapena jarri bazaio.

l) Ahoz zein egitez iraintzea, eta pertsonen intimitatea edo duintasuna ez errespetatzea, arrazoi hauetako batengatik: sexua, sexu joera edo sexu identitatea, jaiotza, arraza jatorria edo jatorri etnikoa, erlijioa, sinesteak edo iritziak, adina, desgaitasuna, eritasuna, hizkuntza edo bestelako inguruabar pertsonalak zein sozialak.

m) Mozkortuta egotea edo drogen eraginpean egotea, nahiz eta une jakin batean izan, baldin eta lanean ondorio negatiboak baditu edo norberaren eta gainerako pertsonen segurtasuna eta osasuna babesteko arriskutsua bada.

n) Laneko Arriskuen Prebentzioari buruzko Legearen 29. artikuluko eginbeharrak ez betetzea, langileen segurtasun eta osasunerako kalte eta arrisku larriak sortzen badira.

–Falta oso astunak:

Falta oso astunak honako hauek dira:

a) Justifikatu gabeko puntualtasun falta lanera sartzean edo lanetik irtetean, hamar aldiz baino gehiagotan sei hilabetean, edo hogei aldiz baino gehiagotan urtebetean.

b) Lanera hiru egun jarraian edo gehiagoan huts egitea justifikatu gabe, edo bost egun tartekatutan hilabetean.

c) Agindutako kudeaketan iruzurra, leialtasun eza edo konfiantza abusua egitea eta beste lankideei, enpresari edo edozein pertsonari ebastea edo lapurtzea enpresaren lokaletan edo, lanean ari dela, beste edozein lekutan.

d) Gaixotasun edo istripuaren itxurak egitea. Adierazitako edozein arrazoi dela-eta langilea bajan egonik, bere kontura zein besteren kontura edozein lanetan aritzea lan arloko arau haustetzat hartuko da. Halaber, falta oso astuntzat joko da istripuaren edo eritasunaren ondoriozko baja luzatzeko egiten den trikimailu oro.

e) Zerbitzutik, lanpostutik edo pertsonen edo ekipoen gaineko aginte edo ardurako postutik alde egitea bidezko arrazoirik gabe, denbora laburrerako bada ere, baldin eta horrela enpresari edo lankideei kalte handi samarra ekartzen bazaie, segurtasuna arriskuan jartzen bada edo istripuren bat eragiten bada.

f) Enpresari lehia desleiala egitea zenbait jardueraren bidez.

g) Ohiko edo itundutako errendimendua luzaroan eta nahita gutxitzea.

h) Lantokian liskarrean aritzea, hitzezko eta egitezko tratu txarrak ematea eta errespetu edo begirune falta agertzea enpresarekin lotura duen edozein pertsonari.

i) Enpresako sekretuak, nahitaez isilpean gorde beharrekoak, haustea edo bortxatzea, edo enpresaren isilpeko eskutitzen edo agirien sekretua haustea, behar bezala ohartarazita, enpresaz kanpoko pertsonei nahiz erakundeei jakinarazteagatik enpresarentzat kalte larriak sor badaitezke.

j) Lanean zabarkeriaz edo zuhurtziarik gabe aritzeagatik istripu larria sortzea, horren ondorioz enpresarentzako kalte larria sortuz edo pertsonen istripua eraginez.

k) Falta astun baten ondoren, bi hilabeteren barnean beste bat egitea, desberdinak izanik ere, zehapena jasota.

l) Laneko edozein gaitan organigramaz edo hierarkiaz nagusi direnek, lan arloko eginkizunak erabiliz, emandako jarraibideak ez betetzea, horrek enpresari edo lankideei oso kalte larria eragiten badie, salbu eta norbaiten bizitza edo osasunarentzako arriskurik sortzen bada edo agintekeriaren ondorioz bada.

m) Honako egoera hau hartzen da sexu jazarpentzat: sexu kutsuko edozein jokabide hitzezko, ez hitzezko edo fisiko, pertsona baten duintasunari erasotzeko asmoz egiten dena edo ondorio hori dakarrena haren gogoaren kontra, eta, batez ere, inguru beldur eragile, etsaitasunezko, iraingarri, umiliagarri edo laidogarria sortzen duena. Sexu jazarpena pairatu duen pertsonari bere lanpostuan segituko duela segurtatuko zaio. Baldin jokabide edo portaera hori hierarkia-egoeraz baliatuz gauzatzen bada, inguruabar astungarria izanen da.

n) Jazarpen morala (mobbing), hau da, abusuzko jokabidea edo bortizkeria psikologikoa luzez erabiltzea beste pertsona baten aurka lantokian, errepikatutako portaeren, egintzen, aginduen edo hitzen bidez adierazten dena, pertsona horren izena belzteko, pertsona gutxietsi edo isolatzeko edo haren gaitasuna, lanbidean hobekuntza izatea nahiz lanpostuko iraunkortasuna deuseztatzeko, haren duintasunean edo osotasun fisikoan gero eta kalte handiagoa eta etengabea sortuz, zuzenean nahiz zeharka. Inguruabar astungarria da jazarleak aginte hierarkikoren bat izatea jazarriaren gainean enpresaren egituran.

o) Arrazan edo etnian, sexuan, erlijioan edo sinesmenetan, desgaitasun batean, adinean edo orientazio sexualean oinarrituriko jazarpena. Ulertuko da jazarpena dagoela bereizkeria arrazoi horietako batean oinarrituta izaten den portaera orotan, helburua edo ondorioa izanik pertsona baten duintasunaren aurka egitea, eta sortzea giro larderiatsu, areriotsu, degradatzaile, laidogarri, baztertzaile edo iraingarria.

p) Ez betetzea Laneko Arriskuen Prebentzioari buruzko Legearen 29. artikuluan ezarritako eginbeharrak, betiere horren ondorioz lan istripu larria jasaten badu langileak berak, lankide batek edo beste norbaitek.

q) Aginte-abusua, hau da, legezko manuak nabarmen eta nahita urratuz eta menpeko bati kalte nabarmena eginez zuzendariek, buruek edo erdi mailako agintariek burutzen dituzten ekintzak.

–Zehapenak:

Ondoren azaltzen dira aipatutako faltengatik langileei ezartzen ahal zaizkien gehieneko zehapenak:

a. Falta arinengatik:

• Idatzizko kargu hartzea.

b. Falta astunengatik:

• Idatzizko kargu hartzea.
• Enplegu eta soldatarik gabe uztea bi egun naturaletik hamabostera bitarte.

c. Falta oso astunengatik:

• Idatzizko kargu hartzea.
• Enplegua eta soldata etetea hamasei egun naturaletik hogeita hamarrera bitarte.
• Kaleratzea.

–Preskripzioa:

Faltek epe hauetan preskribatuko dute, mailaren arabera:

• Falta arinak: hamar egun.
• Falta astunak: hogei egun.
• Falta oso astunak: hirurogei egun.

Aipatutako falten preskripzio epea enpresak gertaeren berri izaten duenean hasiko da kontatzen, eta, betiere, gertatu eta handik sei hilabeteren buruan.

Enplegu eta soldataren bi egun baino gehiagoko etenaldia dakarren edozein diziplina neurritan, zehapena jarri baino 48 ordu lehenago langilearen atal sindikalari jakinarazi beharko zaio, edo enpresa batzordeari, baldin inon afiliatua ez badago edo langile horren sindikatuak atal sindikal aitortua ez badu.

20. artikulua. Batzarrak.

Langileek urtean 11 ordu izanen dituzte, gehienez, batzarrak egiteko, 24 ordu aurretik jakinarazita, betiere. Batzarretan ematen den denborari dagokion soldataren arabera ordainduko dira ordu horiek.

Enpresa batzordeak enpresako zuzendaritzari jakinaraziko dio batzarrak zenbat iraunen duen, gutxi gorabehera.

Batzarrak dirauen bitartean, segurtasun talde gisa, euren postuan geldituko dira galdaketako labezain bat eta tratamenduko beste bat. Mantentze-lanetakoak deitutako batzarretara joanen dira. Goian aipatutako horiei batzarrean emandako informazio guztien berri emanen zaie, eta bozketarik izanez gero haietan parte hartuko dute.

Txanda zatituko langileak ordu erdi lehenago aterako dira batzarra arratsaldeko ordu bietako txanda aldaketako orduan egiten denean.

21. artikulua. Eszedentziak.

Artikulu honi dagokionez, indarra duen legeriak ezarritakoari jarraituko zaio, galarazi gabe egiten diren proposamen bereziak aztertzea.

22. artikulua. Ordezko legeak.

Hitzarmen honen artikuluetan jaso ez den orotan, jarraituko zaio egungo eta etorkizuneko aplikazio orokorreko legeria indardunean xedatzen denari.

23. artikulua. Lanbide-prestakuntza.

Artikulu honen bidez ezartzen da espezialista, ofizial eta enplegatu guztiek parte har dezaketela ikastaro batzuetan, hain zuzen ere gure enpresan aurki ezarriko diren teknologia eta produkzio berrietan gaitzeko, hobetzeko eta egokitzeko eginen diren ikastaroetan.

Hezkuntza eta Zientzia Ministerioak onartutako zentro ofizialetan antolatzen diren ikastaroetan inskribatutako langileek, betiere Hezkuntzari buruzko Lege Orokorrak onetsitako titulu akademiko bat lortzeko inskribatutakoek, edo funtzionario publikoen kidegoetan sartzeko oposizioetan parte hartzen dutenek edo zentro ofizial batek ezagutza profesionalak eguneratzeko edo hobetzeko ematen dituen ikastaroetara joaten direnek honako eskubide hauek izanen dituzte:

a) Behar diren baimenak izateko, azterketetako egunetan haiek egitera joateko behar den denbora hartzeko, agiri bidez frogatu ondoren, euren lan eskubideak inola ere murriztu gabe. Azterketak egitera aurkezteko eta horretarako soilik, urteko oporrak zatitzea ere eskatzen ahal dute, kaltetu gabe enpresako lanaren antolamendua, eta langileen ordezkariei jakinarazita.

b) Arestian aipatu ikastaroetan parte hartzen badute eta enpresak lan txanda batzuk ezarriak baditu, eskolako eginbeharrak betetzeko erosoen zaien txandan lan egiteko, gaueko txandak sobera kargatu gabe ahal den neurrian.

c) Ikastaro horien bukaeran ziurtagiria edo titulua ematen bada, kontuan hartuko da enpresa barneko maila igoeretan.

d) Aurreko a) paragrafoan jasotako prestakuntza lizentzia edo baimenak direla kausa, langileari ez zaizkio inola ere eskubideak murriztuko, ez eta edonolako kontzepturengatik kobratzen dituen ordainsariak ere.

e) Aurreko apartatuetan ezarritako eskubideak izateko, enpresako langileen plantilla osoaren gehieneko portzentajea %10ekoa izanen da.

f) Sustatuko da langileek prestakuntza jasotzea eta eginkizun askotarako balio izatea. Prestakuntza plan bat ezarriko da, eta bertan batez beste gutxienez 10 orduko prestakuntza izanen da produkzioko langile bakoitzeko, urteko, eta, batez beste, 20 orduko prestakuntza enplegatu bakoitzeko, urteko.

Baldin prestakuntza ez bada lanaldia adinakoa, enplegatua lanera itzuliko da, edo beste egun batean berreskuratuko du.

Ikastaroan parte hartzeagatik langileak ezinezkoa badu lan egitea, lan kontratuaren ondorioak eten eginen zaizkio, baina bermatuz ikastaroaren bukaeran lana izanen duela. Horrelakoetan, eta ikastaroak hiru hilabete baino gehiago irauten badu, enpresak langilearen baja ematen ahal du Gizarte Segurantzan.

Erdi mailako kargudunei eta ofizialei dagokienez, enpresa batzordeak eta zuzendaritzak adostuko dute horietan parte hartu nahi dutenetatik aurten zein joanen den gaitasun nahiz hobekuntza ikastaro batera. Adostasuna erraztearren, bi alderdiek elkarri emanen diote aipatutako ikastaroen gainean duten informazioa. Enpresa ahaleginduko da erdi mailako kargudunek eta ofizialek ezagut ditzaten euren intereseko arloan gerta daitezkeen aurrerapen teknologikoak. Horretarako enpresa batzordearekin ados jarriko da.

24. artikulua. Euskara.

Hitzarmen hau bi hizkuntzatan idatziko da, euskaraz eta gaztelaniaz, eta horrela eginen da hurrengo hitzarmenetan ere. Aurrekoa galarazi gabe, hitzarmenari buruzko interpretazioak gaztelaniazko bertsioaren gainean eginen dira.

Dokumentazio hau gaztelaniaz eta euskaraz idatziko da: MAGNA TVren edizioa eta kartelak (honako hauei dagozkienak: atalak, komunak, materiala, tresnak, hondakinak eta dokumentazio-euskarriak). Indarreko araudiaren menpeko errotulazioak horretatik kanpo geldituko dira. Hala egiten ez bada akats batengatik, ordeztu beharko dira, artikulu honetara egokitzeko.

25. artikulua. Erretiroa.

Enplegatuak eta zuzeneko eskulaneko lanbide taldeetako langileak, erretiro partziala hartzeko legez ezarritako baldintzak betetzen badituzte, jarraikiz Gizarte Segurantzaren Lege Orokorraren 215.2 artikuluari, horretarako adinera iritsitakoan enpresari erretiroa eskatzen ahalko diote, eta enpresak xedatuko du bidezko dena, bere produkzio eta antolamendu beharren arabera.

26. artikulua. Aukerako osasun laguntza.

Artikulu honetan ezartzen denez, istripu edo lanbide eritasunaren kasuan langileak mediku espezialista aukeratzen ahal du, Mutualitate Ofizialekoa ez den bat, baldin Mutualitateak bere baimena eman eta gastua ordaintzen badu.

Aldaketa hori egitea Mutualitateak onartzen ez badu, enpresa batzordeak eta zuzendaritzak mutualitatea aldatzea negoziatuko dute.

27. artikulua. Kultura, kirol edo gizarte arloko prestakuntzarako laguntza ekonomikoak emateko funtsa.

Zuzendaritzak bere laguntza eskainiko du hitzarmen honen indarraldian kirol edo kultura arloan antola daitezkeen jardueretarako. Enpresa batzordeak urtean zehar egiten diren proposamenak aurkeztuko dizkio enpresako zuzendaritzari; kasuz kasu erabakiko da enpresak zer laguntza emanen duen, enpresa batzordearen eta zuzendaritzaren artean adostuta.

28. artikulua. Balorazioa eta produkzioaren kontrola.

Artikulu honetan ezartzen denez, enpresako kontrolatzaile ofizialak baloratu eta kontrolatuko ditu fabrikako ataletako produkzio denborak, kontrolatu beharreko lan horietan diharduten langileekin, galarazi gabe enpresak duen ahalmena ateratzen diren denborak beste langile batekin kontrastatzeko. Neurketa horiek ezin baditu enpresako kontrolatzaile ofizialak egin, zuzendaritzak beste kontrolatzaile bat aurkeztuko du, kontrol lan horiek egiten dakiena. Neurketa baten emaitzaren gainean bi alderdiak ados jartzen ez badira, enpresak izendatutako kontrolatzaileak edo kontrolatzaile neutral batek atalean diharduen beste langile bati eginen dio kontrola.

29. artikulua. Maileguetarako abala.

Maileguetarako gaur egungo abalen zenbatekoak 9.000 eurotan ezarri dira. Abal horiek dira honako hauek erosteko: etxebizitza, autoa (arrisku orotako asegurua sinatzea nahitaezkoa izanen da), altzariak edo etxeko gauzak. Ezin da beste abalik eskatu aurrekoa kitatzen ez den bitartean.

Abal horrek indarrean segituko du onuraduna enpresako plantillan alta emana dagoen artean.

30. artikulua. Bizi eta istripu aseguruaren poliza.

Hitzarmen honen bidez enpresak istripu aseguruaren poliza bat kontratatuko du bere kargura, ondoren adierazten diren kontzeptuengatik eta ondoren zehazten diren zenbatekoekin. Horiek 2014tik aurrera igoko dira, nominako gainerako kontzeptuak igotzen diren modu eta zenbateko berean:

Bi kasuetan, konputuaren data ebazpenaren dataren arabera finkatuko da, eta aldez aurretik lan kontratua desegin beharko da.

31. artikulua. Istripu aseguruaren erregelamendua.

01.–Aseguru honek lanerako joan-etorrian gertatutako istripua estaltzen du, langileak fabrikatik etxera egin ohi duen ibilbidean. Beraz, ''in itinere'' motako istripua beharko du izan, jarraikiz gai horretaz araudiak eta jurisprudentziak diotenari.

03.–Aseguru honek ibilgailuaren kalteak eta hondamenak baino ez ditu estaliko, eta ez, ordea, kalte pertsonalak, ibilgailua ezin erabiltzeak dakarzkion kalteak ezta istripuaren ondoriozko beste edozein ere.

04.–Aseguru honek indarra izan dezan, beharrezkoa da estaltzen dituen kalte materialak beste aseguru batek ez estaltzea, dela ibilgailuaren beraren aseguruak dela beste ibilgailu baten edo beste pertsona batenak.

05.–Ezbeharra gertatzen denean, ibilgailuaren erabiltzaileak enpresako zuzendaritzari horren berri eman behar dio astebeteko epean, luzeenera jota, idatziz eta zehaztasun guztiak aipatuz; adibidez, istripua nola izan den, istripuaren inguruabarrak, konpontzera nora eramanen duen (tailerra edo garajea), eta zer kalte izan dituen. Epe horretan jakinarazten ez bada, ezbeharra izan duen ibilgailuaren erabiltzaileak edo jabeak galduko du kalte-ordaina kobratzeko eskubidea.

06.–Enpresak zilegi du istripuari buruzko informazio gehiago eskatzea, hala iruditzen bazaio, adibidez atestatuaren kopia eskatuz, agintari eskudunen batek esku hartu zuen ala ez, edo istripua nola gertatu zen argitzeko balio dezakeen beste edozein zehaztapen.

07.–Enpresak, halaber, gai horretako aditu bat izenda dezake ibilgailuak izan dituen kalteak ebaluatzeko.

08.–Ibilgailuak izandako kalteak ez dira ordainduko istripua izan bada gidariaren zuhurtziagabetasun nabariagatik, erregelamendu honen 7. apartatuan aipatutako baliabideekin egiaztatuta.

09.–Istripua hirugarren baten erruz gertatuz gero, aseguru honek ez ditu kalte horiek ere estaliko. Baldin horren ondorioz eginbide penalen instrukzioak egiten badira, horietan ebatzitakoari lotuko zaio, erantzukizunari dagokionez.

10.–Istripu bat gertatzen denean, aseguru honek estaltzen badu, enpresak ibilgailuaren konponketa ordainduko du, kaltetuak behar diren fakturak aurkeztu eta gehienez ere astebeteko epean.

11.–Aseguru honek gidaria enpresako langilea denean bakarrik balioko du.

12.–Aseguru honetan jasotako arriskuak estaltzeko, enpresak aseguru poliza bat kontratatzen ahal du.

13.–Erregelamendu honetan egiten den edozein aldaketa nahiz hobekuntza enpresa batzordeari jakinaraziko zaio.

14.–Erregelamendu honetan biltzen diren eskubideak aitortzen zaizkie enpresa batzordeko eta lan osasuneko kideei, enpresak deitutako bileretara egiten dituzten joan-etorrietarako, bai eta enpresako zerbitzu medikoetara joaten diren langileei ere, horiek ere aldez aurretik deituta. Enpresak igorri balu bezala joko da langileak bezperan laneko istripua izan, istripuaren partea bete eta zerbitzu medikoetara joan beharra duenean.

15.–Enpresak, batere frankiziarik gabe, langilearen ibilgailuak izandako kalte materialen gastu guztiak ordainduko ditu.

32. artikulua. Pentsio funtsa.

Funts horrek urtean %1,50eko dotazioa izanen du langile finkoentzat, 2. eranskinean azaldu oinarrien gainean kalkulaturik, gehi urte bakoitzean ituntzen diren igoerak. 2009. urteko urtarriletik, pentsio planerako ekarpenari dagokion zenbatekoa nominan ordainduko zaie enpresako langile guztiei.

Behin-behineko langileek dotazio horiek langile finko egindakoan izanen dituzte.

33. artikulua. Arropa garbiketa.

Enpresak nahitaezkotzat jotzen du suaren kontrako arropa janztea plantako lanpostu guztietan eta plantako bulego lanpostuetan (azken kasu horretan, 2020an hasiko da nahitaezkoa izaten). Norbera babesteko ekipamendutzat hartzen da arropa hori, eta, hortaz, nahitaezkoa da janztea. Enpresak bere gain hartzen du behar adina arropa emateko betebeharra.

Horretaz gain, arropa garbitzeko zerbitzua ere ezartzen da, nahitaezkoa izanen dena MAGOTTEAUX NAVARRA SAko langile guztientzat; enpresak langileen eginkizunetarako ematen duen arropa da bertan garbitu beharrekoa.

34. artikulua. Kalitatearen eta segurtasunaren sustapena.

Kalitatea: pizgarrien programa bat ezarriko da, Urdiaingo lantegiko langileek kalitatea hobetzeko egiten dituzten iradokizunetarako.

Segurtasuna: enpresak berresten du laneko segurtasun arloan sor daitezkeen eskaera guztiei diruz erantzuteko beharra, lehentasunezko ekintzen programa baten barnean.

35. artikulua. Hitzarmena betetzea.

Enpresa batzordea eta zuzendaritza elkarrekin bilduko dira hilabetean bitan, hitzarmenaren jarraipena egiteko.

01. ERANSKINA.–2025eko SOLDATEN TAULAK, PRODUKTIBITATEAREN PRIMA ETA LAN-EGUTEGIA (ZL)

2025. urteko soldata taulak

2025eko PRODUKZIOAREN OSAGARRI PRESENTZIALA ETA BESTE BATZUK (ZL)

02. ERANSKINA.–GUZTIENTZAKO PRIMA ALDAKORRA (2025)

Oro har, guztientzako primaren helburua da langile guztiak modu berezian saritzea urteko Ustiapen Planaren arabera eguneratutako helburuak lortzeagatik, baita helburu horien hobekuntza bultzatzea ere.

PRODUKTIBITATEAREN PRIMA, 1.800 eurokoa gehienez, eta portzentaje hauekin aurkeztutako taula berriaren arabera banatua:

Aplikatu EBITDAren emaitza aurrekontuarekiko salmenta zifraren %gisa, aurreko taulako emaitzari biderkatzaile gisa.

Formula = EBITDA Aurrekontua / Salmentak Aurrekontua = Aurrekontuaren %

Formula = Benetako EBITDA / Benetako Salmentak = Benetako %

Biderkatzailea = benetako % / aurrekontuaren %

–Absentismo mailan ez dira kontuan hartuko prestakuntza orduak, ordu sindikalak eta aitatasun/amatasun baimenak.

–Paga horrek aurreko urteko emaitzak hartuko ditu erreferentziatzat, urtarrilean ordainduko da eta ez da finkagarria izanen.

–Ordainketa egiten den unean enpresan alta emanda dauden langileei ordainduko zaie. Lanean egondako egunak hartuko dira kontuan.

03. ERANSKINA.–2025eko LAN-EGUTEGIA (ZL)

Oharra:

Langile bakoitzaren bizileku edo erroldako leku den herriko jaiak. Jaietako egunak hartzeko erroldako herria hautatzen duten langileek justifikatu egin beharko dute, PFEZaren ondorioetarako urte hasieran betetzen den inprimakian (PFEZa, pertsona fisikoen errentaren gaineko zerga).

Egun horietan aldaketarik egiteko, hilabete lehenago eskatuko da, baimendu dadin, bidezko bada.

04. ERANSKINA.–2025eko URRUNTASUN PLUSA

Joana eta etorria kontuan hartuta, 45 kilometrotik gora dauden herri guztien kasuan, 45 kilometrokoa ordainduko da gehienez.

05. ERANSKINA.–KLAUSULA GEHIGARRIAK

Lehen klausula gehigarria.–Lan baldintzak ez aplikatzea.

Zuzendaritzak eta enpresa batzordeak sinatutako enpresa-eremuko hitzarmena denez, bera ez aplikatzeko mekanismoak, aipatzen direnak Langileen Estatutuaren 82.3 artikuluan, espresuki baztertzen dituzte alderdiek haren indarraldian, galarazi gabe 86. artikuluan jasotakoa. Langileen Estatutua.

Bigarren klausula gehigarria.–Batzorde parekidea.

Batzorde parekidea eratzen da, hitzarmenaren sinatzaileek osaturik. Langileen aldetik, ordezkari bana izanen dute atal sindikalek, eta, enpresaren aldetik, berriz, langileen aldeak dituen adina ordezkari.

Batzordearen bi alderdietako edozeinek hura biltzeko eskaturik, hamabost eguneko epean bilduko da, beranduenez.

Batzordeak eskumen hauek izanen ditu:

Hitzarmen kolektibo honen arauak interpretatzea. Hitzarmen honen konpromisoak garatzea.

Batzorde parekidea bilduko da ordezkaritzetako edozeinek biltzeko eskatzen duen bakoitzean, emandako eskumenak erabiliz eskatu ere.

Batzorde parekidean dagoen sindikatuen ordezkaritzak aholkulari baten laguntza izaten ahal du, baita enpresaren ordezkaritzak ere. Aholkulariak hitza izanen du, baina botorik ez.

Edozein batzordekidek ordezko bat izaten ahalko du, baldin batzordeari aurretik abisatzen badio.

Batzorde parekidearen erabakiek indarra izan dezaten, aho batez berretsi behar dira, eta 10 eguneko epean hartu, deialdia egin den egunetik hasita.

Batzorde parekidean sortzen diren desadostasunak konponduko dira jarraikiz araututako bitartekotza-prozedurei.

Hirugarren xedapen gehigarria.–Lan auzitegia.

Bi alderdiek espresuki erabaki dute, desadostasunak konpontzeko, beti jarriko direla Nafarroako Lan Auzitegiko lanbide arteko akordioaren adiskidetze eta bitartekaritza prozesuen menpe. Arbitraje prozedura aplikatuko da, bakar-bakarrik, baldin haren menpe jartzeko bi aldeen arteko akordioa badago.

Iragarkiaren kodea: F2601950