1. NAFARROAKO FORU KOMUNITATEA
1.7. BESTELAKOAK
41/2026 EBAZPENA, martxoaren 2koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, administrazio baimena eta proiektuaren onespena ematen dituena gaur egun PGLz hornitzen diren instalazioak gas naturalera aldatzeko eta GLP-177-31 kodeko planta desegiteko, 0,15 bar-eko gehieneko operazio-presioarekin, Sunbillako udal mugartean. Espedientearen kodea: GN-414 Sunbilla.
Nedgia Navarra SAren eta Gas Natural Redes GLP SAren artean izenpetutako akordioan oinarrituta, eta bat etorriz Hidrokarburoen Sektoreari buruzko urriaren 7ko 34/1998 Legearen 46 bis artikuluan ezarritakoarekin, Nedgia Navarra SAk eskatu du Sunbillan dauden PGL instalazio batzuen titulartasuna eskualdatzeko. Instalazio horiek erreferentzia honekin daude erregistratuta: GLP-2667 espedientea.
Bestetik, Gas naturala garraiatzeko, banatzeko, merkaturatzeko eta haren hornidura egiteko jarduerak eta instalazioak baimentzeko prozedurak arautzen dituen abenduaren 27ko 1434/2002 Errege Dekretuan xedatutakoaren arabera, Nedgia Navarra SAk administrazio baimena eta proiektuaren onespena emateko eskatu du, jarduketa hauetarako:
1. Hustea, geldotzea eta desegitea PGLa biltegiratzeko dagoen zentroa (GLP-2667 espedientea, GLP-177-31 depositu kodea, 50074348 poligonoa).
2. PGL gasaren (propanoa) ezaugarriak aldatzea, gas naturalera.
Gas naturalera aldatzea Sunbillako zenbait kaletan PGLa banatzeko dagoen sarea, eta dauden instalazio hartzaileei eutsi eta gailuak egokitu eta eraldatzea (sarearen 857 metro eta 16 hornidura puntu).
3. Banaketa sarea handitzea.
Gas naturala banatzeko sarea eraikitzea, 150 mbar-eko gehieneko operazio-presioarekin, Sunbillako udalerrian adierazitako urbanizazioa hornituko duten polietilenozko adarretarako eta eroanbideetarako, baita beharrezko linea-balbulak ere.
Hidrokarburoen Sektoreari buruzko urriaren 7ko 34/1998 Legearen 73. artikuluan eta Gas naturala garraiatzeko, banatzeko, merkaturatzeko eta haren hornidura egiteko jarduerak eta instalazioak baimentzeko prozedurak arautzen dituen abenduaren 27ko 1434/2002 Errege Dekretuaren 78. artikuluan xedatutakoa betez, proiektua jendaurrean jarri zen, hogei egun balioduneko epean, iragarkia argitaratuz 2025eko 254. Nafarroako Aldizkari Ofizialean, abenduaren 23koan, eta 2025eko abenduaren 24ko Diario de Navarra eta Diario de Noticias egunkarietan; dokumentazioa Nafarroako Gobernu Irekiaren web-fitxan argitaratu zen. Informazioaren berri eman zitzaion, halaber, Sunbillako Udalari, jendaurrean jar zezan iraupen bereko epean.
Ez zen alegaziorik jaso.
Bat etorriz abenduaren 27ko 1434/2002 Errege Dekretuaren 80. eta 84. artikuluetan ezarritakoarekin, proiektuaren separatak bidali zitzaizkien Sunbillako Udalari, Telefónica de España SAUri eta i-DE Redes Eléctricas Inteligentes SAUri.
Telefónica de España SAUk, 2026ko urtarrilaren 8an jasotako txosten batean, adierazi du ez duela eragozpenik proiektua gauzatzeko, baldin eta indarrean dagoen araudia betetzen bada.
Orain arte ez da erantzunik jaso Sunbillako Udalaren aldetik, ezta i-DE Redes Eléctricas Inteligentes SAUren aldetik ere.
Gas naturaleko oraingo sarea PGLkoarekin lotuko duen banaketa sarea Kale Nagusiko 50 zenbakian dago. Desegin nahi den GLP-177-31 kodeko planta 310000000001366241IJ lurzatian dago (Bidasoa ibaiaren eta N-121-A errepidea eta Kale Nagusia elkartzen diren biribilgunearen arteko inguruan). Bi jarduketak hiri-lurzoruan kokatuak daude, 1995eko urriko Sunbillako Udal Planaren arabera.
Ez PGL planta (bi aireko depositu, guztira 23,8 m³-ko edukierakoak), ez eta eraikitzekoa den banaketa sare berria ere, ez daude sartuta ingurumen baimen bateratua edo ingurumen ukipenen ebaluazioa behar duten proiektuen artean, abenduaren 16ko 17/2020 Foru Legean xedatutakoaren arabera.
Ikusirik aurkeztutako dokumentazioa, eta kontuan hartuta Hidrokarburoen Sektoreari buruzko urriaren 7ko 34/1998 Legean xedatutakoa, bidezkoa da eskatutakoa onartzea.
Azaldutakoarekin bat etorriz, eta Enpresen Sustapenerako eta Azpiegituretako zuzendari nagusiaren uztailaren 30eko 29/2025 Ebazpenaren bidez eskuordetu zaizkidan eskumenak baliatuz (2025eko 155. Nafarroako Aldizkari Ofiziala, abuztuaren 5ekoa), honako hau,
EBAZTEN DUT:
1. Nedgia Navarra SAri baimena ematea lehen aipatutako instalazioen titulartasuna eskualdatzeko (Gas Natural Redes GLP SA da jabea).
2. Nedgia Navarra SAri administrazio baimena ematea gaur egun PGLz hornitzen diren instalazioak gas naturalera aldatzeko eta GLP-177-31 kodeko planta desegiteko, 0,15 bar-eko gehieneko operazio-presioarekin, Sunbillako udal mugartean.
3. Onestea instalazio hori egiteko proiektua, Alejandra Risco Barba industria ingeniari teknikoak sinatua, eta hogeita hamasei hilabete ematea obrak burutzeko.
4. Baimen hau eman arren, aplikagarriak diren beste xedapen batzuen arabera beharrezkoak diren emakidak eta baimenak lortu beharko dira.
5. Indarreko araudian ezarritakoa beteko dute PGLa biltegiratzeko instalazioaren itxierak, dauden instalazioen eraldaketak eta, orobat, instalazio berriek eta horien muntaketak.
6. Bi hilabeteko epean, eta betiere instalazioen exekuzioa hasi baino lehen, aurkeztutako aurrekontuaren ehuneko bi adinako bermea jarri beharko du Nedgia Navarra SAk. Berme hori Nafarroako Gobernuko Industriako eta Enpresen Trantsizio Ekologiko eta Digitalerako Departamentuan jarri beharko da, eta instalazioak zerbitzuan jartzeko akta egin ondoren itzuliko da.
7. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzuari eta Gobernu Irekiaren eta Herritarrentzako Arretaren Zerbitzuari, behar diren ondorioak izan ditzan.
8. Ebazpen hau Nafarroako Aldizkari Ofizialean argitaratzea, orok jakin dezan.
9. Ebazpen hau jakinaraztea Nedgia Navarra SAri, Gas Natural Redes GLP SAri, i-DE Redes Eléctricas Inteligentes SAUri eta Telefónica de España SAUri, eta ohartaraztea ebazpenak ez duela administrazio bidea amaitzen eta haren kontra gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Hartan espediente zenbakia adierazi beharko da.
10. Ebazpen hau Sunbillako Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal duela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, deusetan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2026ko martxoaren 2an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.
Iragarkiaren kodea: F2603324
