Iragarkia

62. ALDIZKARIA - 2026ko martxoaren 27a

1. NAFARROAKO FORU KOMUNITATEA

1.7. BESTELAKOAK

81E/2026 EBAZPENA, otsailaren 25ekoa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez baimentzen baita Galarko udal mugartean dagoen hondakin geldoen hondakindegi baten aldaketa funtsezkoa. Instalazioaren titularra Recuperación Ambiental SL da.

Egun abian den instalazio horrek ingurumen baimen bateratua du, Ingurumenean Eragina duten Jarduerak arautzen dituen abenduaren 16ko 17/2020 Foru Legearen hirugarren xedapen iragankorra aplikatuta eman baitzitzaion; izan ere, jarduera hori sarturik dago aipatutako foru lege horren 1. eranskineko 5.1 taldean.

2022-04-07an, titularrak bere instalazioaren 1. isurketa-ontzia ixteko proiektua jakinarazi zuen. Proiektua honetan datza: lursaila profilatzea, landare-lurrezko geruza batekin estaltzea eta eremua nekazaritza-lurzati bihurtzea, horien jatorrizko kokapenaren, sarbideen eta eremu naturalizatuen arabera, barne harturik gainazaleko jariatze-urak biltzeko eta ibilgura bideratzeko sare bat. Ekonomia Zirkularraren eta Berrikuntzaren Zerbitzu honen ustez, aldaketa hori funtsezkoa da, Ingurumenean Eragina duten Jarduerak arautzen dituen abenduaren 16ko 17/2020 Foru Legearen 26. artikuluan ezarritako irizpideen arabera.

Beraz, eta halaxe xedatu delako Ingurumenean Eragina duten Jarduerak arautzen dituen abenduaren 16ko 17/2020 Foru Legearen 26.5 artikuluan, aldaketa funtsezko hori ezin da gauzatu ingurumen baimen bateratua aldatzen ez den bitartean.

Espedientea tramitatu da bat etorriz Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 29. artikuluan ezarritako prozedurarekin (erregelamendu hori martxoaren 30eko 26/2002 Foru Dekretuaren bidez onetsi zen).

Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 16. artikuluan xedatutakoari jarraikiz, proiektua jendaurrean jarri zen hogei egunez, eta ez zen inolako alegaziorik aurkeztu.

Era berean, ebazpen proposamena instalazioaren titularrari entzunaldia emateko izapidean egon da hamabost egunez. Ebazpen honen eranskinean jaso dira titularrak aurkeztu dituen alegazioen zerrenda eta haiei emandako erantzunak.

Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,

EBAZTEN DUT:

Lehena.–Baimena ematea Galarko udal mugartean dagoen hondakin geldoen hondakindegi batean aldaketa funtsezko bat egiteko, itxiera partzialaren proiektua gauzatu ahal izateko (1. ontzia ixtea). Horrenbestez, instalazioak eta hango jarduerak ebazpen honen eranskinean jasotako baldintzak bete beharko dituzte. Instalazioaren titularra Recuperación Ambiental SL da.

Bigarrena.–Instalazioaren titularrak zigilatze-proiektua gauzatzeko erantzukizunpeko adierazpen bat aurkeztu beharko du. Adierazpen hori Ingurumenean Eragina duten Jarduerak arautzen dituen abenduaren 16ko 17/2020 Foru Legearen 23. artikuluan adierazitako erantzukizunpeko adierazpentzat hartuko da.

Erantzukizunpeko adierazpen hori aurkezteak berekin ekarriko du ebazpen honen eranskinetan adierazitako itxi ondorengo aldia hastea. Aldi horretan, titularrak eranskinetan ezarritako funtzionamendu baldintzak bete beharko ditu.

Hirugarrena.–Zigilatzearen gaineko erantzukizunpeko adierazpenarekin batera, titularrak honako agiri hauek aurkeztu beharko ditu:

–Kontrol jarduketak gauzatzeari buruzko txostena, eta proiektua behar bezala gauzatu dela egiaztatzen duen ziurtagiria, kontrola egiten duen erakundeak emana, bat etorriz "1. isurketa-ontzia ixteko baldintzak" izeneko eranskinaren 3. apartatuan ("Instalazioak gauzatu izanaren ziurtagiria") adierazitakoarekin.

Laugarrena.–Ebazpen honetan jasotako baldintzak betetzen ez badira, ingurumen arloko diziplina-neurriak hartuko dira, hain zuzen, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean biltzen direnak, ezertan galarazi gabe legeria sektorialean ezarritakoa, aurrerantzean ere aplikatu beharko baita.

Bosgarrena.–Ebazpen hau Nafarroako Aldizkari Ofizialean argitaratzea.

Seigarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

Zazpigarrena.–Ebazpen hau igortzea Recuperacion Ambiental SLri, Lurralde eta Paisaia Zerbitzuko Lurraldearen Antolamenduko Atalari, Biodibertsitatearen Zerbitzuko Ingurumen Eraginaren Atalari eta Galarko Udalari, behar diren ondorioak izan ditzan.

Iruñean, 2026ko otsailaren 25ean.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: Ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/ConsultasAAU.html#/ConsultaAutorizacionesAmbientalesUnificadas.

Iragarkiaren kodea: F2603252