Iragarkia
61. ALDIZKARIA - 2026ko martxoaren 26a
2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
ULTZAMA ALDEKO OINARRIZKO GIZARTE ZERBITZUEN MANKOMUNITATEA
Oposizio-lehiaketa, bete dadin administrari-ofizialaren plaza bat, eta osa dadin ordezkapenetarako izangaien zerrenda bat
Mankomunitateko buruak, 2026ko otsailaren 16an emandako 7/26 Ebazpenaren bidez, deialdi baten oinarriak onetsi zituen, oposizio-lehiaketa bidez bete dadin administrari-ofizialaren plaza bat, lan-araubide finkoan, mankomunitate honen zerbitzuan aritzeko.
OINARRIAK
1.–Arau orokorrak.
1.1. Deialdi honen xedea da betetzea administrari-ofizial izateko lanpostu bat –lan-araubide finkokoa eta C mailakoa–, oposizio-lehiaketa bidez, lanaldi osoan jarduteko Ultzama aldeko Oinarrizko Gizarte Zerbitzuen Mankomunitatearen zerbitzuan; plazak 6BIS zenbakia du plantilla organikoan, 2026. urterako onetsitako lan publikoaren eskaintzaren arabera. Deialdia eginen da araudi honi jarraikiz: Nafarroako Administrazio Publikoen zerbitzuko Langileen Estatutuaren testu Bategina (abuztuaren 30eko 251/1993 Legegintzako Foru Dekretuak onetsia), hura garatu eta betetzeko erregelamendua, aplikatzekoak diren gainerako arauak, eta deialdiaren oinarriak.
1.2. Bete beharreko eginkizunak deialdiko kategoriari eta mailari dagozkionak izanen dira, eta aldatu egiten dira eskuratutako lanpostuaren arabera. Besteak beste, jarraian aipatuko dira bete beharreko eginkizunak, aipamen hutsez eta bestelakoak baztertu gabe. Dena den, noiznahi aldatzen ahal dira zerbitzuaren beharren arabera. Hona hemen:
–Jendearentzako arreta (aurrez aurrekoa, telefono bidezkoa edo telematikoa), Mankomunitateko administrazio-zerbitzuei laguntzea eta administrazio-lan orokorrak.
–Hitzorduak kudeatzea eta programetan eta Mankomunitatearen administrazioan eta antolaketan laguntzea.
–Mankomunitatearen kontabilitatea eramatea, betiere Nafarroako eta Estatuko toki-entitateen araudiaren arabera.
–Edozein erakunde publiko edo pribaturen dirulaguntzak eta bestelako laguntzak lortzeko dokumentazioa prestatzea.
–Komunikazioak eta dokumentuak sailkatu, erregistratu eta artxibatzea. Mankomunitatearen Erregistro Orokorra eramatea, dela aurrez aurrekoa, dela telematikoa. Sarrerak eta irteerak kudeatzea.
–Informazio estatistikoa erregistratzea, memoriak, ordenagailuak eta programa informatikoak erabiltzea. Dokumentazioa komunikatzea eta artxibatzea.
–Idazkaritza arloko eginkizun eta eskumenak betetzea eta horietan laguntzea (komunikatuak, kide anitzeko organoetarako deialdiak, erabakiak eta abar).
–Kudeatzea Mankomunitateko buruaren ebazpenak, bai eta Mankomunitateko Ordezkarien Batzarraren eta gainerako kide anitzeko organoen, osoko bilkuraren eta beste edozein administrazio-organoren erabakiak.
–Langileen Arloko administrazio-lanak: nominak, aurrerakinak, baimenak eta abar.
–Fakturak kontrolatzea eta udal zergen bilketaz arduratzea (ordainagiriak, helbideratutako ordainketak).
–Mankomunitateak likidatu beharreko zerga, tasa edo prezio publiko ororen erroldak eta/edo ordainagiriak sortzea eta kudeatzea.
–Nominen interfazea - Kontabilitatea.
–Izapide huts diren eginbide eta ofizioak idaztea, Mankomunitateko administrazio zerbitzuen arduradunak adierazten dizkion jarraibideen arabera.
–Bere ardurapeko espedienteen kudeaketaz, jarraipenaz eta kontrolaz arduratzea.
–Horrela erabakiz gero agindu ahal zaizkion lan arloetan, datuak lortzen eta eransten laguntzea txosten, proposamen, espediente eta era guztietako lanetan.
–Eta, oro har, egitea arestian deskribatutakoen antzeko zeregin guztiak, bai eta zerbitzua dela-eta agintzen zaion beste edozein eginkizun edo zeregin ere, lanpostuarekin loturik, haren mailaren eta kategoriaren barnean.
1.3. Lanpostuak C mailako lansariak izanen ditu, uztailaren 4ko 158/1984 Foru Dekretuaren bidez onetsitako Ordainsariei buruzko Behin-behineko Erregelamenduan eta gainerako xedapen osagarrietan erabakitakoaren arabera; bertzetik, Mankomunitateak une bakoitzean ezarri eta plantilla organikoan jasotzen dituen osagarriak izanen dituzte.
1.4. Lanaldia zerbitzuaren beharretara egokituko da, eta administrazioko organo eskudunek noiznahi aldatzen ahalko dute.
1.5. Izangaia, hautaprobak gainditu eta deialdi honetako lanpostuan aritzeko izendatu ondotik, Ultzama aldeko Oinarrizko Gizarte Zerbitzuen Mankomunitatean sartuko da, eta Gizarte Segurantzaren Araubide Orokorrean afiliatu eta alta emanen zaio, araubide horretan ezarritako babesean.
1.6. Halaber, aldi baterako kontratatuak izateko zerrenda bat osatzea du xede deialdi honek, hautatze prozesuan lanpostua eskuratzen ez duten izangaiekin, deialdiaren 9. oinarrian ezarritakoari jarraikiz.
2.–Baldintzak.
2.1. Oposizio-lehiaketa honetan onartuak izateko, izangaiek baldintza hauek bete beharko dituzte eskabideak aurkezteko epea bukatzen den egunean:
2.1.1. Izangai guztiek bete beharrekoak:
a) Espainiako nazionalitatea izatea, edo Europar Batasuneko beste edozein estatutakoa. Orobat, espainiarren eta Europar Batasuneko bertze estatuetako herritarren ezkontideek hartzen ahal dute parte, zuzenbidez bananduta ez badaude; halaber, haien ondorengoek eta ezkontidearenek, zuzenbidez bananduta ez badaude, 21 urtetik beherakoak badira edo, adin horretatik gorakoak izaki, haien kontura biziz gero. Orobat aplikatuko zaie, Europar Batasunak sinatu eta Espainiak berretsitako nazioarteko itunen arabera, langileen zirkulazio librea onartzen duten herrialdeetako biztanleei.
b) Hamasei urte beteak izatea eta ez gainditzea erretiroa nahitaez hartzeko gehieneko adina.
c) Eskaerak aurkezteko epea bukatzen den egunean, edukitzea Goi-mailako Batxilergo titulua, Lanbide Heziketako bigarren mailakoa edo horien baliokide bat, edo edukitzeko moduan egotea (titulu hori eskuratzeko eskubideak ordaindu izanaren gordekina).
Atzerrian lorturiko titulua izanez gero, aipatu epea betetzen den egunean, haren homologazioa frogatzen duen agiriaren jabe izatea.
Izangaiek alegatzen badute badituztela eskatutako kategorian aritzea ahalbidetzen dieten ikasketa baliokideak, aipatu beharko dute baliokidetasun hori onartzen duen lege edo erregelamenduzko xedapena, edo, bertzela, aurkeztu beharko dute Hezkuntza Ministerioak emandako ziurtagiria.
d) Behar den gaitasun fisiko eta psikikoa izatea bete beharreko eginkizunetan aritzeko.
e) Desgaitua edo gabetua ez egotea eginkizun publikoetan jarduteko, eta ez egotea administrazio publikoren baten zerbitzutik kendua.
Espainiako nazionalitatea ez duten izangaiek zinpeko aitorpena edo hitzemate bat aurkeztu beharko dute, adierazteko ez dutela diziplina-zehapenik edo kondena penalik, galarazten dienik beren estatuko funtzio publikoan sartzea.
e) Euskara jakitea. Frogatzeko, aurkeztu beharko da C-1 titulua, gaur egun Nafarroako Hizkuntza Eskola Ofizialean eta NAPIn indarrean den baremoarekin bat, edo maila horretako bertze tituluren bat (EGA edo bertze batzuk...), ofizialki baliokidetzat aitortutakoa.
Maila hori frogatzen ahalko da, orobat, berariazko proba bat gaindituta, izangaiak behar adinako hizkuntza maila baduela zehaztekoa. NAPIko Euskara eta Hizkuntza Komunitarioen Atalak edo Euskarabidea-Euskararen Nafar Institutuak eginen du proba hori. Betiere, proba hori eginen da oposizio-lehiaketako gainerako probak egin baino lehen. Baldintza hau betetzen ez dutenek (edo aipatutako tituluak ez aurkezteagatik, edo euskara jakiteari buruzko proba ez gainditzeagatik), ezin izanen dira aurkeztu, ez eta parte hartu ere, oposizio-lehiaketako gainerako probetan.
2.2. Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoen kasuan, itunaren frogagiria aurkeztu beharko da.
2.3. Gainditu eta plaza eskuratzen duten izangaiek deialdi honen 7. oinarrian ezarritako epean eta moduan frogatu beharko dituzte aipatu beharkizun guztiak, salbu deialdiaren 3. oinarrian xedatua. Bete beharko dituzte eskabideak aurkezteko epearen azken egunean eta hautapen-prozesu osoan, harik eta izendatuak izan eta lanpostuaz jabetzen diren arte.
3.–Eskabideak.
3.1. Deialdian parte hartzeko eskabidea aurkezteko 20 egun naturaleko epea egonen da, deialdi hau Nafarroako Aldizkari Ofizialean argitaratzen den egunaren biharamunetik zenbatzen hasita, eta modu telematikoan aurkeztu behar da nahitaez mankomunitate honen egoitza elektronikoaren erregistroaren bidez (https://ugzm.sedipualba.es/default.aspx).
Eskabideak aurkezteko epea luzaezina da.
Administrazio Publikoen Administrazio Prozedura Erkideari buruzko urriaren 1eko 39/2015 Legearen 14. artikuluko 3. apartatuan xedatutakoarekin bat: "Administrazioek ezartzen ahalko dute nahitaezkoa dela bitarteko elektronikoen bidez jartzea harremanetan, bai prozedura batzuetarako, bai eta, beren gaitasun ekonomiko edo teknikoagatik, dedikazio profesionalagatik edo egiaztaturiko bertze arrazoiren batengatik, behar diren bitarteko elektronikoez baliatzeko aukera duten pertsona fisikoen zenbait kolektiborendako ere".
Halaber, 2025erako Nafarroako Aurrekontu Orokorrei buruzko abenduaren 26ko 19/2024 Foru Legearen 27. artikuluan (Nafarroako Administrazio Publikoek deitutako hautapen prozesuei buruzko xedapenak), hau ematen da aditzera: "Nafarroako administrazio publikoei ahalmena ematen zaie Administrazioan sartzeko edo bertako lanpostuak betetzeko hautapen-prozesuen deialdietako eskabideak eta gainerako dokumentazioa bitarteko elektronikoen bidez aurkez daitezela eskatzeko".
3.2. Eskabideak deialdi honetan (I. eranskina) argitaratutako ereduaren arabera egin behar dira eta haietan izangaiek adierazi behar dute baldintza guzti-guztiak betetzen dituztela eskabideak aurkezteko epearen azken egunean.
Behar bezala betetako eskabideari dokumentazio hau gehituko zaio:
a) Nortasun agiri nazionalaren kopia, edo izangaiaren nazionalitatea eta nortasuna frogatzen dituen beste agiri baliokideren batena.
b) Deialdiko 2. oinarriko 2.1.1 apartatuko c) epigrafean eskatzen diren tituluetako baten kopia, edo titulua lortzeko eskubideak ordaindu dituela frogatzen duen gordekinarena, edo, bidezkoa denean, eskaerak aurkezteko epea bukatu aurretik titulua eskuratzeko moduan zegoela frogatzen duen ziurtagiria.
c) Deialdi honen 2. oinarriko 2.1.1 apartatuko e) epigrafean eskatutako tituluen kopia. C-1 titulua, gaur egun Nafarroako Hizkuntza Eskola Ofizialean eta NAPIn indarrean den baremoarekin bat, edo maila horretako beste tituluren bat (EGA edo beste batzuk), ofizialki baliokidetzat aitortutakoa.
Halakorik izan ezean, eskabidean bertan adierazi beharko da izangaia prest dagoela proba espezifikoak egiteko, eskakizun horren arabera hizkuntza-maila nahikoa duen edo hartan gai den zehazteko. NAPIko Euskara eta Hizkuntza Komunitarioen Atalak eginen ditu proba horiek.
d) Alegatutako merezimenduak frogatzen dituzten ziurtagiriak, lehiaketaldian baloratzeko, 6. oinarrian ezarritako baremoari jarraikiz.
Dokumentazio hori aurkezten ez bada eskabideetarako ezartzen diren epean eta moduan, ez dira baloratuko merezimenduak.
e) Desgaitasun aitortua duten izangaiek, ariketak egin ahal izateko denbora edo baliabideetan egokitzapenik behar badute, zilegi izanen dute horiek eskabidean eskatzea eta, hartarako, aparteko orri batean adierazi beharko dute nolako desgaitasuna duten eta zer egokitzapen eskatzen duten. Horrekin batera, legeen arabera desgaitasuna dutela frogatzeko agiria ere aurkeztu beharko dute, organo eskudunak emana.
Aski izanen da dokumentazioaren kopia arruntak aurkeztea, baina aurkeztutako datuak edo agiriak ez-zuzenak edo faltsuak badira, behar diren erantzukizun penal, zibil edo administratiboak eskatuko dira.
3.3. Aipatutako agiri horiek aurkezten ez dituztenak ez dira onartuko deialdian, eta ordura arteko jarduketa guztiak baliorik gabe geldituko dira, deusetan galarazi gabe legokiekeen erantzukizuna parte hartzeko eskabidea faltsutzeagatik.
3.4. Gainerako betebeharren egiaztagiriak prozesua gainditzen duten izangaiek aurkeztu beharko dituzte, deialdi honen 7. oinarrian ezartzen den epean eta moduan.
4.–Onartuen eta baztertuen zerrenda.
4.1. Eskabideak aurkezteko epea burututakoan, Mankomunitateko buruak ebazpena emanen du onartu eta baztertuen behin-behineko zerrenda onesteko, eta Nafarroako Aldizkari Ofizialean eta Mankomunitateko iragarki-taulan eta webgunean argitaratzeko aginduko du.
Izangai bazterturik ez bada, onartuen behin betiko zerrenda zuzenean onetsiko da.
4.2. Izangai baztertuek hamar egun balioduneko epea izanen dute, behin-behineko zerrenda Nafarroako Aldizkari Ofizialean argitaratzen denetik, erreklamazioak aurkezteko eta, akatsik egin badute, haiek zuzentzeko. Erreklamazioak nahitaez aurkeztu beharko dira telematikoki, egoitza elektronikoaren bidez.
4.3. Erreklamazioetarako epea bukatutakoan eta haiei erantzun ondoren, Mankomunitateko buruak ebazpena emanen du onartu eta baztertuen behin betiko zerrenda onesteko, eta Nafarroako Aldizkari Ofizialean, bai eta Mankomunitatearen iragarki-taulan eta web -orrian argitaratzeko aginduko du, probak zein toki, egun eta ordutan hasiko diren adierazita.
4.4. Onartuen zerrendan agertzea ez da aski ebazpen honen bitartez abiatzen den prozeduran eskatutako baldintzak betetzen direla onartzeko. Hautapen-prozesua gainditu ondoren, izangaiek aurkeztu beharreko dokumentazioa aztertzen denean, egiaztatzen baldin bada ez dutela baldintzaren bat betetzen, interesdunek galduko dituzte prozedura honetan parte hartzeagatik dituzten eskubide guztiak, galarazi gabe faltsukeria dela-eta dagozkien erantzukizun penal, zibil edo administratiboak.
4.5. Izangai onartu eta baztertuen zerrendak argitaratzearekin, egintzat joko da interesdunei egin beharreko jakinarazpena, urriaren 1eko 39/2015 Legearen 45.b) artikuluan ezarritako ondorioetarako (Administrazio Publikoen Administrazio Prozedura Erkideari buruzko Legea).
5.–Kalifikazio-epaimahaia.
5.1. Mankomunitateko buruak izendatuko du kalifikazio-epaimahaia, ebazpen bidez, deialdi hau onetsi ondoren eta onartutako eta baztertutako izangaien behin betiko zerrenda onetsi aurretik. Kide-kopuru bakoitiak osatuko du, gutxienez hiru kidek, eta ordezko kide-kopuru bera izendatu beharko da. Izendapen hori Mankomunitatearen iragarki-taulan eta webgunean argitaratuko da.
5.2. Epaimahaia hautaprobak baino lehen eratu beharko da, buruak deialdia eginda eta, eratu eta jardun ahal izateko, kideen gehiengo osoak bederen agertu beharko du.
5.3. Kalifikazio-epaimahaiak gehiengoz erabakiko ditu deialdiaren oinarriak ulertu eta aplikatzeko moduaz sortzen diren auzi guztiak.
5.4. Kalifikazio-epaimahaiak aholkulari adituen laguntza jasotzen ahalko du proba batzuetan nahiz guztietan. Aholkulari horiek beren espezialitate teknikoetan baizik ez dira ariko, eta haietan bakarrik emanen diote laguntza epaimahaiari.
5.5. Kalifikazio-epaimahaiko kideek parte hartzeari uko egin beharko diote, eta organo dei egileari horren berri eman, baldin eta Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan abstentziorako aipatzen diren egoeretako batean badaude.
5.6. Izangaiek kalifikazio-epaimahaiko kideak errekusatzen ahalko dituzte Sektore Publikoaren Araubide Juridikoari buruzko urriaren 2ko 40/2015 Legean ezarritako moduan eta baldintzetan.
6.–Oposizio-lehiaketaren nondik norakoak.
6.1. Euskararen jakite-maila neurtzeko proba.
Ahozkoa eta idatzizkoa izanen da. Izangaiek bi proba egin beharko dituzte, eta bien gaineko kalifikazioa izanen da "gai" edo "ez gai". Baztertu eginen dira "gai" kalifikazioa lortzen ez duten izangaiak. Jakite maila izanen da C1 maila, EGA edo parekoa.
Probak eginen direla behar bezala iragarriko da izangai onartu eta baztertuen behin-behineko zerrenda onartzen duen ebazpenean.
6.2. Oposizio-lehiaketak aldi hauek izanen ditu:
a) Merezimenduen balorazioko fasean, hots, lehiaketaldian, izangaiek alegatu dituzten merezimenduen balorazioa eginen da.
b) Oposizioaldian, proba bat edo gehiago eginen dira, lanpostuaren eginkizunak zuzen eta egoki betetzeko beharrezkoak diren ezagutzei eta gaitasunei buruz.
Deialdi honen faseak hurrenkera honetan eginen dira: oposizioaldia lehenik eta, hura bukatutakoan, lehiaketaldia.
6.3. Oposizioaldia.
6.3.1. Proba bakoitzerako deialdi bakarra eginen da. Izangaiek nortasun agiri nazionala, pasaportea edo gidabaimena aldean dutela agertu beharko dute eta, eskatzen bazaie, erakutsi egin beharko dute, bertzela kanporatu eta baztertuko baitira, salbu eta zuzenbidean onarturiko bertze moduren batean nor diren egiaztatzen badute egintza horretan berean. Probetan oharretatik kopiatzeak nahiz bertze edozein iruzur egiteak berehalako kanporatzea ekarriko du, jarduketa penalak deusetan galarazi gabe, hala behar bada.
Era berean, prozesutik baztertuko dira iragarritako egunetan, orduetan eta tokietan agertzen ez diren izangaiak eta aipatu diren agirien bidez beren burua identifikatzen ez dutenak.
Hautaprobak egiteko, desgaitasuna duten izangaiek hala eskatuz gero, denborak eta baliabideak ahal bezala moldatuko dira, haien eskabidean adierazi dutenaren arabera.
Gai guztiak eskatuko dira deialdi hau Nafarroako Aldizkari Ofizialean argitaratzen den egunean indarrean den araudiaren arabera.
Proba egiteko ez da inolako testurik edo dokumentaziorik erabiltzen ahalko, ez eta gailu elektronikorik edo bestelako materialik ere, bolaluma urdina edo beltza izan ezik.
6.3.2. Oposizioak bi proba izanen ditu:
a) Lehen proba.
Idatziz erantzun beharrekoa, epaimahaiak hasi aurretik erabakiko duen denboran. Aukeran zenbait erantzun dituzten galderak izanen dira, test modukoak, deialdi honetako II. eranskineko gai-zerrendari buruzkoak. Erantzunetatik bat bakarra izanen da zuzena. Proba hasi baino lehen, zehaztuko dira proba baloratzeko irizpidea eta erantzun okerren penalizazioa, zenbait erantzun-aukera dituzten galderetarako. Zuriz uzten diren erantzunek ez dute ez punturik emanen ez kenduko. Gehienez ere 60 puntu emanen dira proba horretan. Bazterturik geldituko dira gutxienez 30 puntu lortzen ez dituzten izangaiak.
b) Bigarren proba.
Kasu praktiko bat edo gehiago ebatzi beharko dira, II. eranskinean adierazitako gairen bati buruz. Proba bakoitza hasi baino lehen, epaimahaiak ezarriko du ariketak egiteko denbora.
Gehienez ere 20 puntu emanen dira proba horretan. Bazterturik geldituko dira gutxienez 10 puntu lortzen ez dituzten izangaiak.
6.3.3. Oposizioaldiko ariketa guztiak baztertzaileak izanen dira. Bazterturik geldituko dira, bada, ariketa bakoitzari dagokion gutxieneko puntuazioa bederen eskuratzen ez dutenak.
Proba egiteko ez da inolako testurik edo dokumentaziorik erabiltzen ahalko, ez eta gailu elektronikorik edo bestelako materialik ere, bolaluma urdina edo beltza izan ezik.
Gutun-azal itxien sistema erabiliko da. Ariketa bakoitza zuzendutakoan, epaimahaiak argitara emanen ditu, Mankomunitatearen webgunean, kalifikazioen zerrenda eta plikak jendaurrean irekitzeko eguna eta ordua.
Proba bakoitzaren kalifikazioa bukatu ondoren, epaimahaiak argitara emanen ditu izangaiek eskuratutako puntuazioak, Udalaren webgunean, eta bost egun balioduneko epea emanen da interesdunek alegazioak aurkez ditzaten, beren eskubideen alde komeni zaienaren arabera. Alegazioak telematikoki baino ezin izanen dira aurkeztu.
6.4. Lehiaketaldia.
6.4.1. Izangaiek aurkeztutako merezimenduak baloratuko ditu kalifikazio-epaimahaiak, ondotik heldu den baremoaren arabera baloratu ere. Merezimendu guztiak agiri bidez frogatu behar dituzte izangaiek, oposizio-lehiaketan parte hartzeko eskabidea aurkeztean. Horrela egin ezean, ez dira kontuan hartuko.
6.4.2. Izangaiek alegatu dituzten merezimenduak honako baremo honen arabera kalifikatuko eta puntuatuko dira:
a) Laneko esperientzia (12 puntu gehienez).
–Nafarroako edozein toki erakundean, Gizarte Zerbitzuen Alorrari atxikirik, edo Nafarroako oinarrizko gizarte zerbitzuen mankomunitate batean administrari laguntzailearen edo administrari ofizialaren lanpostuan aritzeagatik, urte bakoitzeko: 3 puntu.
–Edozein administrazio publikotan, aurreko atalean aipatuetan izan ezik, administrari laguntzailearen edo administrari ofizialaren lanpostuan aritzeagatik, urte bakoitzeko: 2 puntu.
Zer administrazio publikotan aritu den, harexek emanen du ziurtagiria bertan egindako zerbitzuak frogatzeko. Honako hauek agertu behar dute, gutxienez: pertsonaren izen-deiturak, NAN/AIZ zenbakia, administrari laguntzailea edo ofiziala izan den, maila, lanaldia, atxikipen esparrua eta epea.
Lan edo administrazio araubidean, langile finko edo behin-behineko gisa egindako zerbitzuak hartuko dira kontuan, baita bitarteko gisa edo lanpostuaren jabe izaki egindakoak ere. Baina atal batean baino gehiagotan sartutako zerbitzuak denbora berean eginak badira, puntuaziorik handiena dutenak bakarrik baloratuko dira.
Egiaztatutako esperientzia urte kopuru osokoa ez bada, proportzioan dagokiona aterako da. Lanaldi partzialean egindako zerbitzuak berdin baloratuko dira, lanaldia edozein izanik ere.
b) Prestakuntza osagarria (8 puntu gehienez):
–Nafarroako toki entitateen kontabilitate, aurrekontu eta udal kontuen alorreko 4 eta 20 ordu bitarteko ikastaro bakoitzeko: 1 puntu.
–Nafarroako toki entitateen kontabilitate, aurrekontu eta udal kontuen arloko 21 eta 40 ordu arteko ikastaro bakoitzeko: 2 puntu.
–Nafarroako toki entitateen kontabilitate, aurrekontu eta udal kontuen arloko 40 ordutik gorako ikastaro bakoitzeko: 2,50 puntu.
4 ordutik beheiti irauten duten ikastaroengatik ez da punturik emanen.
–Lanpostuarekin eta haren eginkizunekin lotutako edukia duen ikastaro bakoitzeko, 8 eta 20 ordu bitarteko iraupena badu: 0,50 puntu.
–Lanpostuarekin eta haren eginkizunekin lotutako edukia duen ikastaro bakoitzeko, 21 eta 40 ordu bitarteko iraupena badu: 1 puntu.
–Lanpostuarekin eta haren eginkizunekin lotutako edukia duen ikastaro bakoitzeko, 40 ordutik goitiko iraupena badu: 1,50 puntu.
8 ordutik beheiti irauten duten ikastaroengatik ez da punturik emanen.
Ikastaroetara joan izana frogatzeko, tituluaren kopia edo irakaskuntza-erakundeak emandako ziurtagiria aurkeztu beharko da.
Kalifikazio-epaimahaiak noiznahi eska ditzake izangaiek alegatutako merezimenduen gaineko azalpen eta datu osagarriak.
Kalifikazio-epaimahaiaren ustez izangai bakoitzak aurreko ataletako bakoitzean dituen merezimenduak baloratuko dira, eta ez dira inoiz kontuan hartuko alegatu gabeko merezimenduak edo agiri bidez frogatu ez direnak.
6.4.3. Lehiaketaldia burututakoan, kalifikazio-epaimahaiak argitara emanen du Mankomunitatearen webgunean, izangaiek fase horretan lortutako behin-behineko puntuazioen zerrenda.
Behin-behineko puntuazioak argitaratuta, izangaiek bost egun balioduneko epea izanen dute, horiek argitaratu eta biharamunetik zenbatzen hasita, alegazioak aurkezteko. Horretarako, eskabide telematikoa erabili beharko dute.
6.4.4. Alegazioak ebatzi ondoren, horrelakorik baldin badago, kalifikazio-epaimahaiak jendaurrean jarriko du, Mankomunitatearen webgunean, izangaiek lehiaketaldiko atal bakoitzean lortutako behin betiko kalifikazioen zerrenda.
7.–Probak gainditu dituzten izangaien zerrenda, izendapen proposamena eta agirien aurkezpena.
7.1. Probak bukatuta, epaimahaiak Mankomunitatearen webgunean argitaratuko du gainditu dituztenen zerrenda, puntuazio handienetik txikienera ordenatua, eta horretarako, izangai bakoitzaren lehiaketaldiko eta oposizioaldiko puntuazioak batuko ditu.
Bi izangairen edo gehiagoren artean berdinketa gertatuz gero, bigarren proban puntuazio handiena dutenen alde erabakiko da, eta berdinketak jarraitzen badu, deialdiaren 6. oinarriko lehen probako puntuazioetara joko da, eta merezimenduetara, ordena horretan. Berdinketak badirau, zozketa publikoa eginen da.
7.2. Epaimahaiak Mankomunitatearen webgunean probak gainditu dituztenen zerrenda argitaratu ondoren, lortutako azken puntuazioaren hurrenkeran, izangaiek lehiaketaldian eta oposizioaldian lortutako puntuazioak batuz, Mankomunitateko buruari igorriko dio, espediente osoarekin batera, izangaia izendatzeko proposamena. Proposamenean egonen da, hain zuzen, puntuazio handiena izateagatik. Proposamen hori Mankomunitatearen webgunean eta Nafarroako Aldizkari Ofizialean argitaratuko da.
7.3. Izangaiak 10 egun balioduneko epea izanen du, izendapen/kontratazio proposamena Nafarroako Aldizkari Ofizialean argitaratzen denetik aitzina, deialdian eskatutako baldintzak eta beharkizunak betetzen dituela frogatzen duten agiriak Mankomunitatearen Erregistro Orokorrean aurkezteko, hau da:
a) Nortasun agiri nazionalaren kopia, edo izangaiaren nazionalitatea eta nortasuna frogatzen dituen beste agiri baliokideren batena.
b) 2. oinarrian eskatzen den tituluaren kopia autentikoa, edo hura lortzeko eskubideak ordaindu izanaren gordekinarena edo, hala bada, eskabideak aurkezteko epean titulua eskuratzeko moduan egonen dela frogatzen duen ziurtagiria.
c) Osasun ziurtagiri ofiziala, interesdunak karguan aritzea eragotziko liokeen eritasun edo akats fisikorik ez duela frogatzeko, eskumena duen erakunderen bateko medikuren batek emana.
Desgaitasunen bat alegatu duten izangaiek, gainera, aurkeztu beharko dute desgaitasuna deialdiko lanpostuarekin bateragarria dela dioen frogagiria, balorazio eta orientazio talde eskudunek emana.
d) Zinpeko deklarazioa, adierazten duena ez dagoela eginkizun publikoak betetzeko ezgaiturik edo gabeturik, eta ez dela kendua izan inongo administrazio publikoren zerbitzutik.
Izangaiek Espainiako nazionalitatea ez badute, agiri bat aurkeztu beharko dute, adierazteko ez dutela zehapenik edo zigor penalik, eragozten dienik sartzea beren estatuko funtzio publikoan.
e) Zina edo hitzematea, adierazten duena Nafarroako Foru Araubidea errespetatuko duela, Konstituzioari eta legeei men eginen diela, eta karguari dagozkion eginkizunak zuzen beteko dituela.
f) Nafarroako administrazio publikoetako langile finko diren izangaiek, aurrekoaz gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria, hots, sarrerari, antzinatasunari, mailari, egoera administratiboari eta abarrei buruzkoa, eta Mankomunitateak eskatzen dien gainerako dokumentazioa.
7.4. Aipatu epearen barrenean, eta aski arrazoituriko ezinbertzeko kasuak izan ezik, arestiko agiriak aurkezten ez dituena ezin izanen da izendatu, eta, beraz, egintza guztiak deuseztaturik geldituko dira; betiere, deialdian parte hartzeko eskabidean faltsukeria egiteagatik legokiokeen erantzun beharra galarazi gabe.
7.5. Aurreko apartatuan jasotako kasuan, 7.1 apartatuan aipatzen den gainditutakoen zerrendan ondo-ondotik heldu den izangaiarekin beteko da baja, eta harekin ere aurreko apartatuetan adierazitako prozedura bera erabiliko da.
8.–Izendapena eta plazaz jabetzea.
8.1. Hautapen prozesua bukatu eta aurreko oinarrian aipatu dokumentuak aurkeztuta direla, Mankomunitateko buruak ebazpen bidez izendatuko du Mankomunitatearen zerbitzuko administrari-ofizial, lan-araubide finkoan bete dezan 6BIS zenbakia duen lanpostua. Ebazpen hori Nafarroako Aldizkari Ofizialean eta Mankomunitatearen webgunean argitaratuko da.
8.2. Izendapen hau Nafarroako Aldizkari Ofizialean argitaratzeak jakinarazpenaren ondorio berberak izanen ditu, hala ezartzen baitu 45. artikuluan Administrazio Publikoen Administrazio Prozedura Erkideari buruzko urriaren 1eko 39/2015 Legeak.
8.3. Izendatzen den izangaiak izendapenaren ebazpenean zehazten den egunean jabetu beharko du lanpostuaz. Ezinbesteko kasuak salbu, epea bukatuta jabetza hartzen ez badu, funtzionarioen araubidean Mankomunitatearen zerbitzuko administrari-ofizial izateko eskubideak galduko ditu. Kasu horretan, aurreko oinarrian ezarritakoari jarraituko zaio.
8.4. Izangaietatik inork ez badu gainditzen oposizio-lehiaketa, organo eskudunak ebazpen bat emanen du adierazteko oposizio-lehiaketa hutsik gelditu dela. Ebazpen hori Nafarroako Aldizkari Ofizialean eta Mankomunitatearen webgunean argitaratuko da.
9.–Ultzama aldeko Gizarte Zerbitzuen Mankomunitaterako eta hura osatzen duten udaletarako (Ultzama, Basaburua, Anue, Odieta, Atez eta Lantz) aldi baterako kontrataziorako izangaien zerrendak.
9.1. Nafarroako Administrazio Publikoetan sartzeko Erregelamendua onesten duen ekainaren 5eko 113/1985 Foru Dekretuaren 42.2 artikuluan ezarritakoari jarraituz, honako zerrenda hauek eginen dira, eta Mankomunitatea bera eta hura osatzen duten udalak haietaz baliatuko dira aldi baterako langileak kontratatzeko ordezkapenetan edo zerbitzuaren beharrak daudenean. Hauek dira zerrendak:
a) Probak gainditu arren plaza lortu ez duten izangaien zerrenda: deialdi honetako hautaproba guztiak gainditu, baina azken puntuazioaren arabera lanposturik eskuratzen ez duten izangaiek osatua.
b) Aurreko apartatuan sartu ez baina deialdiaren bigarren proba gainditu duten izangaien zerrenda. Zerrenda honek a) apartatukoaren ordez eta haren mende funtzionatuko du.
c) Aurreko apartatuan sartu ez baina deialdiaren lehen proba gainditu duten izangaien zerrenda. Zerrenda honek a) eta b) apartatuetakoen ordez eta haien mende mende funtzionatuko du.
Berdinketarik dagoenean nor nagusitzen den erabakitzeko, deialdi honetan ezarritako irizpideak hartuko dira kontuan, eta jarraitzen badu, zozketa bidez.
Mankomunitateko buruaren ebazpen baten bidez, aldi baterako kontratazioetarako zerrendak onetsiko dira, eta Mankomunitatearen webgunean argitaratuko dira.
Kontrataziorako deitzen den izangaiak frogatu beharko du, kontratua sinatzeko unean, betetzen dituela deialdian eskatzen diren baldintzak, horiek frogatzen duten agiriak aurkeztuz.
Mankomunitateak ezarrita ditu, interesdunendako eskuragarri, ordezkapenetarako zerrendak kudeatzeko irizpideak, zeinak aldatzen ahalko baitira buruak emandako ebazpen bidez.
Zerrenda horiek 2029ko abenduaren 31 arte izanen dute indarra, eta Mankomunitatearen burutzak ebazpen bidez luzatzen ahalko du horien indarraldia.
Zerrenda horiek indarra hartuz gero, lehendik aplikatzen diren guztiak balio gabe geldituko dira.
10.–Jarduketen publikotasuna.
Deusetan galarazi gabe Nafarroako Aldizkari Ofizialaren bidez ofizialki argitaratu beharreko izapideak, Mankomunitatearen webgunean eta beste honetan (https://ugzm.sedipualba.es/) argitaratuko dira proben deialdiei eta kalifikazioei buruz epaimahaiak ematen dituen ebazpenen informazioa eta haren jarduketaren gaineko informazioa, oinarri hauetan webgunean argitaratzekoak direla ezarritako erreferentzia guztiak, baita interesdunentzat jakingarri den guztia ere.
11.–Datuen babesa.
Tratamenduaren arduraduna: Ultzamako Oinarrizko Gizarte Zerbitzuen Mankomunitatea.
Datuak babesteko ordezkaria: dbd@gzultamaldea.org.
Helburua: langileak hautatzea eta deialdi honetako lanpostua betetzea.
Oinarri juridikoa: Datuen Babeserako Erregelamendu Orokorraren 6.1.c) artikulua. Tratamendua beharrezkoa da, tratamenduaren arduradunari aplikagarria zaion lege-betebeharra betetzeko: 251/1993 Legegintzako Foru Dekretua, abuztuaren 30ekoa, onesten duena Nafarroako Administrazio Publikoen zerbitzuko Langileen Estatutuaren testu bategina.
Datuak gordeko diren denbora: datuak aipatutako helburua betetzeko behar den denboran gordeko dira, eta biltegiraturik edukiko dira harik eta Mankomunitateak haien tratamenduaren ondoriozko erantzukizuna izateari utzi arte. Era berean, bete beharko dira apirilaren 4ko 12/2007 Foru Legean ezarritako kontserbazio arauak (Artxiboei eta Dokumentuei buruzko Foru Legea).
Datuen hartzaileak: datuak epaileei eta auzitegiei laga dakizkieke, indarreko legeria betez, eta argitaratuko dira bat etorriz deialdian eta maiatzaren 17ko 5/2018 Foru Legean ezarritakoarekin (Gardentasunari, informazio publikoa eskuratzeko bideari eta gobernu onari buruzko Legea).
Deialdiaren 9. oinarrian adierazten den bezala, aldi baterako kontrataziorako zerrenda erabili ahal izanen dute Mankomunitateak berak, bai eta hura hura osatzen duten udalek ere. Mankomunitateak kudeatuko du zerrenda, eta udalen batek eskatuz gero, zerrendan dagokion pertsonari eskainiko zaio lanpostu hutsa, 9. oinarriko irizpidearen arabera. Beraz, Mankomunitatea osatzen duten udalak datuen hartzaile izan daitezke; haiek jardungo dute tratamenduaren arduradun gisa, Mankomunitateak ordezkapenen edo zerbitzu-beharren kasuan aldi baterako langileak kontratatzeko ematen dizkien datu pertsonalei dagokienez.
Eskubideak: interesdunek datuak eskuratzeko, zuzentzeko, ezabatzeko, aurka egiteko, mugatzeko eta eramateko eskubideak balia ditzakete, Mankomunitatearen egoitzara joz (San Pedro kalea 8Bis, 31797 Larraintzar, Nafarroa), egoitza elektronikoaren bidez, edo mezu bat bidaliz datuak babesteko ordezkariaren helbidera: dbd@gzultamaldea.org.
Halaber, interesdunek erreklamazioa aurkezten ahal dute Datuak Babesteko Espainiako Bulegoan; horretarako, idazki bat bidali behar dute haren helbidera (Jorge Juan kalea 6, 28001 Madril) edo egoitza elektroniko honetara: www.agpd.es. Halaber, aurretiazko erreklamazioa jar diezaiokete datuak babesteko ordezkariari, helbide honetara idatzita: dbd@gzultamaldea.org.
12.–Errekurtsoak.
Deialdi honen, deialdiaren oinarrien eta aplikatzeko egintzen aurka, honako errekurtso hauetako bat aurkezten ahalko da, hautara:
a) Berraztertzeko errekurtsoa, egintza egin duen organoari zuzendua, hilabeteko epean, jakinarazi edo argitaratu eta biharamunetik hasita.
b) Administrazioarekiko auzi-errekurtsoa, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, errekurtsoaren xedeko egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurtsoaren xedeko egintza edo erabakia argitaratu edo jakinarazten denetik hasita.
Oposizio-lehiaketaren kalifikazio-epaimahaiaren egintzen aurka gora jotzeko errekurtsoa aurkez daiteke, deialdia egin duen udal organoari zuzendua, hilabeteko epean, errekurtsoaren xedeko egintza edo erabakia jakinarazten edo argitaratzen denetik hasita.
Larraintzarren (Ultzama), 2026ko otsailaren 16an.–Mankomunitateko burua, Jesus M.ª Larretxea Lazkano.
I. ERANSKINA.–HAUTAPEN PROZESUAN ONARTUA IZATEKO ESKABIDEA
II. ERANSKINA.–GAI-ZERRENDA
1. multzoa.
1.–Ultzama aldeko Gizarte Zerbitzuen Mankomunitatearen Estatutuak (1991eko 120. Nafarroako Aldizkari Ofiziala, irailaren 25ekoa).
2.–Mankomunitate honetako etxez etxeko laguntza zerbitzuaren prezio publikoak erregulatzen dituen araudia. ETXEZ ETXEKO LAGUNTZA ZERBITZUA ARAUTZEN DUEN ORDENANTZA (2026ko otsailaren 1ean indarrean dagoena).
3.–15/2006 Foru Legea, abenduaren 14koa, Gizarte Zerbitzuei buruzkoa. 48/2020 Foru Dekretua, uztailaren 15ekoa, arautzen dituena oinarrizko gizarte-zerbitzuen oinarrizko programak eta finantzaketa sistema.
4.–15/2016 Foru Legea, azaroaren 11koa, gizarteratzeko eta errenta bermaturako eskubideak arautzen dituena.
5.–17/2019 Foru Legea, apirilaren 4koa, Emakumeen eta Gizonen arteko Berdintasunari buruzkoa.
6.–3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa: I.tik V. titulura bitartean, biak barne.
2. multzoa.
7.–39/2015 Legea, urriaren 1ekoa, Administrazio Publikoen Administrazio Prozedura Erkideari buruzkoa.
8.–40/2015 Legea, urriaren 1ekoa, Sektore Publikoaren Araubide Juridikoari buruzkoa. Atariko titulua: xedapen orokorrak, jarduteko printzipioak eta sektore publikoaren funtzionamendua. III. titulua. Administrazioen arteko harremanak. I. kapitulua: Administrazioen arteko harremanen printzipio orokorrak. II. kapitulua: Elkarlan-eginbeharra. IV. kapitulua: Administrazioen arteko harreman elektronikoak.
9.–6/1990 Foru Legea, uztailaren 2koa, Nafarroako Toki Administrazioari buruzkoa: I. titulua, III. titulua, VI. titulua, VII. titulua, VIII. titulua eta IX. titulua.
10.–2/1995 Foru Legea, martxoaren 10ekoa, Nafarroako Toki Ogasunei buruzkoa. Tasa eta prezio publikoen aipamen berezia. Aurrekontua eta gastu publikoa.
11.–270/1998 Foru Dekretua, irailaren 21ekoa, zeinaren bidez garatzen baita Nafarroako Toki Ogasunei buruzko martxoaren 10eko 2/1995 Foru Legea, aurrekontuen eta gastu publikoaren alorretan.
12.–251/1993 Legegintzako Foru Dekretua, abuztuaren 30ekoa, Nafarroako Administrazio Publikoen zerbitzuko Langileen Estatutuaren Testu Bategina onesten duena.
13.–11/2005 Foru Legea, azaroaren 9koa, Dirulaguntzei buruzkoa: xedapen orokorrak eta emateko eta kontrolatzeko prozedura.
3. multzoa.
14.–Windows 10i buruzko oinarrizko kontzeptuak. Mahaigaina eta haren elementuak; atazen administratzailea; fitxategien arakatzailea; kontrol-panela; gailuak eta inprimagailuak; "hasi" botoia; ataza-barra; "exekutatu" komandoa; laguntza; sarean lan egitea; erabiltzaile-kontuak.
15.–Word 2021 testu-prozesadorea: lan eremua; eragiketak dokumentuekin; testuarekin lan egitea; formatua; orrialdearen diseinua; taulak; irudiak; estiloak; estekak txertatzea; goiburuak eta orri-oinak lantzea; edukien aurkibidea; ilustrazioak lantzea; korrespondentzia konbinatzea; eremuekin lan egitea; inprimaketaren konfigurazioa.
16.–Excel 2021 kalkulu-orria: lan eremua; eragiketak liburu eta orriekin; formatuak; eragiketak gelatxoekin eta gelatxo multzoekin; formulak; oinarrizko funtzioak eta funtzio aurreratuak; grafikoak; datuekin lan egitea Excel-en; txantiloiak erabili eta sortzea; taula dinamikoak; inprimaketaren konfigurazioa.
Oharra: zein egunetan argitaratzen den deialdia Nafarroako Aldizkari Ofizialean, egun horretan indarrean den legeriaren arabera eskatuko dira gai guztiak.
Iragarkiaren kodea: L2603786
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50