58. ALDIZKARIA - 2026ko martxoaren 23a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

26C/2026 EBAZPENA, otsailaren 11koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Kirol Martiket 2015 SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusirik Kirol Martiket 2015 SL enpresak aurkeztu duen hitzarmen kolektiboaren testua (kode zenbakia: 31101192012017), zeina erregistro honetan sartu baitzen 2025eko irailaren 3an, eta enpresaren ordezkariek eta sindikatuen ordezkariek 2025eko ekainaren 16an izenpetu baitzuten.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan xedatutakoa kontuan hartuta,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Kirol Martiket 2015 SL enpresak aurkeztutako hitzarmen kolektiboa (kode-zenbakia: 31101192012017).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko otsailaren 11an.–Ekonomia Sozialeko eta Laneko zuzendari nagusia, Iñaki Mendióroz Casallo.

KIROL MARTIKET 2015 SL ENPRESAREN HITZARMEN KOLEKTIBOA

ATARIKO KAPITULUA

1. artikulua. Alderdien zehaztapena.

Hitzarmen hau itundu dutenak honako hauek dira: enpresaren aldetik, Kirol Martiket 2015 SL sozietate publikoa, bere lehendakaria ordezkari duela; eta langileen aldetik, ELA eta LAB sindikatuen ordezkariak, enpresa batzordeko ordezkariak.

LEHEN KAPITULUA.–XEDAPEN OROKORRAK

2. artikulua. Eremu funtzionala eta langile eremua.

Kirol Martiket 2015 SL enpresari eta bere langile guztiei aplikatuko zaie hitzarmen hau, orain enpresan dihardutenei nahiz etorkizunean kontratatzen ahal direnei, alde batera utzita lan-harremana aldi baterako kontratuaren bidez edo kontratu mugagabearen bidez egiten den.

3. artikulua. Lurralde eremua.

Hitzarmen honen aplikazio eremua enpresa da; beraz, Kirol Martiket 2015 SL enpresaren lantokietan aplikatuko da.

4. artikulua. Hitzarmenaren indarraldia eta salaketa.

Hitzarmen kolektibo honek 2023ko urtarrilaren 1ean hartuko du indarra, eta 2027ko abenduaren 31 arte iraunen du.

Langileen Estatutuaren 86.3 artikuluan ezarritakoaren ondorioetarako, berariaz adostu da ezen, hitzarmena salatu eta itundutako iraunaldia amaitu ondoren, hitzarmenak indarrean jarraituko duela epemugarik gabe, harik eta bi alderdiek lurralde eremu bera eta eremu funtzional bera izanen dituen ordezko hitzarmen bat sinatzen duten arte.

Langileen Estatutuaren testu bateginaren 86.2 artikuluan ezarritakoaren ondorioetarako, hitzarmen hau salatutzat jotzen da sinatzen den egunetik beretik.

5. artikulua. Osotasunari lotzea.

Hemen itundutako baldintzek multzo organiko eta zatiezina osatzen dute, eta, aplikazio praktikoari dagokionez, osotasunean hartuko dira.

Kasu horretan, hitzarmen honen hobekuntzek multzo bat osatzen dute, edozein modutan ere lehendik daudenekin konpentsatzekoa, baina konparazioa urteko guztirakoari begira eginen da, errendimendu normalean eta asistentzia osoa izanik.

Etorkizunean ezar daitezkeen xedapenei dagokienez, aldaketa ekonomikorik badakarte, eragina izanen dute baldin eta, osotara kontuan harturik eta urte osoan neurturik, hitzarmen honetan ezarritakoak gainditzen badituzte.

6. artikulua. Konpentsazioa.

Hitzarmen honetan itundutako baldintzak, denak batera hartuta, indarra hartu aurretik zeuden guztiekin konpentsatzen ahal dira, edozein dela ere haien izaera edo jatorria.

7. artikulua. Berme pertsonalak.

Langileren batek, urte osoko kopurua harturik eta orokorrean neurturik, hitzarmen honetan ezarritakoak baino baldintza hobeak izanez gero, errespetatu eginen zaizkio.

Hitzarmenean ituntzen diren soldaten gainetik enpresan dauden baldintza ekonomikoak. Ezin izanen dira konpentsatu edo xurgatu, eta hitzarmenean itundutako gainerako kontzeptu ekonomikoen portzentaje berdinetan eguneratuko dira. Halaber, ezin izanen dira kendu lan baldintzen funtsezko aldaketen bidez.

8. artikulua. Probaldia.

Langileak enpresan lanean hastean proba gisan arituko direla ulertuko da idatziz horrela agertzen bada lan-kontratuan. Probaldia ez da, inondik ere, ondoko denbora baino luzeagoa izanen:

  • 6 hilabete, hitzarmen honen 11. artikuluan finkatutako langileen sailkapenean 1. lanbide taldean daudenentzat.
  • 2 hilabete, 2. lanbide taldeko langileentzat.
  • Hilabete bat, 3., 4. eta 5. lanbide taldeetako langileentzat.
  • 15 egun natural, 6. lanbide taldeko langileentzat.

Probaldian, bi aldeetako edozeinek lan-kontratua bertan behera uzten ahal du aurreabisurik eman gabe eta kalte-ordaina izateko eskubiderik izan gabe.

Probaldia bukatutakoan, lan-kontratuan atzera egin ez bada, kontratuak dagozkion ondorio guztiak sortuko ditu.

9. artikulua. Batzorde paritarioa.

Hitzarmen honetako batzorde paritarioa eratzen da, hitzarmenaren aplikazioa interpretatzeko eta zaintzeko haren edukiaren gainean sor daitezkeen desadostasunetan, baita Langileen Estatutuaren 85.3 c) artikuluan jasotako auzietan ere.

Bi aldeek espresuki adostu dutenez, zalantzarik edo desadostasunik sortuz gero, txostena eskatuko zaio batzorde paritarioari, jurisdikzio eskudunari edozein erreklamazio egin aurretik.

Batzordea sei kidek osatuko dute, horietako hiru enpresako ordezkariek hautatuak eta beste hiruak hitzarmena sinatzen duten langileen ordezkariek hautatuak. Batzuek eta besteek aholkularien laguntza izan dezakete, hizpidea dutela baina botorik gabe.

Batzorde horrek aldeetako edozeinek eskatuta eginen du bilera, desadostasunak izaten direnean (banakakoak edo taldekakoak) hitzarmen honen nahiz Langileen Estatutuaren 85.3 c) artikuluan araututako gainerako gaien interpretazioaren edo betetzearen gainean. Gutxienez astebete lehenago eginen da biltzeko abisua, eta arazoak konpontzeko gehienez ere bi aste izanen du.

Aztertzen diren gaiak bi aldeek onetsi beharko dituzte eta, ados jarriz gero, hitzarmenaren testuan sartuko dira.

BIGARREN KAPITULUA.–LANGILEEN SAILKAPENA

10. artikulua. Maila funtzionalak.

Hitzarmen honen aplikazio eremuan biltzen diren langileak sei maila funtzionaletan sailkatuko dira, «1. taldea», «2. taldea», «3. taldea», «4. taldea», «5. taldea» eta «6. taldea», bakoitzaren oinarrizko zereginen eta eginkizunen arabera eratuak, bai eta horietan jarduteko eskatutako prestakuntzaren edo espezializazioaren arabera ere.

–1. taldea:

  • Irizpide orokorrak: eginkizun konplexuak eta heterogeneoak burutzea, maila handieneko gaitasun profesionala eskatzen dutenak.
  • Lankide talde batek egiten dituen lanak integratu, koordinatu eta gainbegiratzeko diren eginkizunak.
  • Prestakuntza: eskatzen den prestakuntza unibertsitateko goi edo erdi mailako titulazioa da, edo erdi mailako titulazioa, edo esperientzia frogatua.
  • Parekatzea: talde honetan sartzen dira lanpostu hauei dagozkien jarduera guztiak: instalazioko zuzendariak, kudeatzailea, proiektuko arduraduna.

–2. taldea:

  • Irizpide orokorrak: zeregin heterogeneoak integratzeko, koordinatzeko eta gainbegiratzeko lanak, hala nola lankide talde baten lana antolatzeko ardura.
  • Multzo horretan sartzen dira, halaber, lan konplexuak eta aldi berean homogeneoak, aginte erantzukizunik izan gabe ere berariazko prestakuntza handia eskatzen dutenak.
  • Prestakuntza: erdi mailako prestakuntza akademikoa edo lanpostuari dagokion titulazio berariazkoa, praktikaldi batez edo antzeko lanetan izandako esperientziaz osatua.
  • Parekatzea: talde honetan sartzen dira lanpostu hauei dagozkien jarduera guztiak: kirol koordinatzailea, fisioterapeuta, OLT-EUD, departamentuko arduradunak.

–3. taldea:

  • Irizpide orokorrak: diseinuan, programazioan, prestakuntzan eta exekuzioan autonomia handia eskatzen duten eginkizunak, eska dezaketenak eduki homogeneoko zereginak, lankide talde txiki batek eginak, integratu, koordinatu eta gainbegiratzea.
  • Prestakuntza: eskatzen den oinarrizko prestakuntza egiten diren lanei dagokien titulazio berariazkoa izanen da, edo bigarren mailako Lanbide Heziketaren parekoa (LH II). Horren ordezkoa izan daiteke gutxienez urtebeteko esperientzia izatea enpresan edo sektoreko beste enpresa batzuetan ezaugarri bereko lanetan.
  • Parekatzea: talde honetan sartzen dira kirol jardueretako teknikariari (monitoreari) dagozkion jarduera guztiak, espezialitate guztietan.

–4. taldea:

  • Irizpide orokorrak: lankide talde txiki batek egiten dituen zeregin homogeneoak integratzeko, koordinatzeko eta gainbegiratzeko diren eginkizunak, edo aginte erantzukizunik izan gabe ere, exekuzioan autonomia handia eskatzen dutenak.
  • Prestakuntza: eskatzen den oinarrizko prestakuntza bigarren mailako Lanbide Heziketaren parekoa (LH II) izanen da, edo egiten diren lanei dagokien titulazio berariazkoa. Horren ordezkoa izan daiteke gutxienez urtebeteko esperientzia izatea enpresan edo sektoreko beste enpresa batzuetan ezaugarri bereko lanetan.
  • Parekatzea: talde honetan sartzen dira lanpostu hauei dagozkien jarduera guztiak: aretoko teknikaria, masajistak, lehen mailako administrari-ofiziala, zenbait lanbidetako lehen mailako ofiziala eta soroslea.

–5. taldea:

  • Irizpide orokorrak: eduki homogeneoko zereginak, autonomiaz eta jarraibide zehatzei lotuz betetzekoak.
  • Prestakuntza: eskatzen den oinarrizko prestakuntza lehen mailako lanbide heziketaren parekoa (LH I) izanen da, edo egiten diren lanei dagokien titulazio berariazkoa. Hori ordezka daiteke enpresa berean edo sektoreko beste enpresa batzuetan ezaugarri bereko lanetan gutxienez sei hilabetez izandako esperientziarekin.
  • Parekatzea: talde honetan sartzen dira lanpostu hauei dagozkien jarduera guztiak: administrari laguntzailea, zerbitzu orokorretako langilea, monitorearen laguntzailea.
  • "Zerbitzu orokorretako langilea" deitzen zaio 5. eta 6. taldeetako eginkizunetan diharduen balio anitzeko langileari.

–6. taldea:

  • Irizpide orokorrak: lan metodo zehatz, jakin eta aurrez ezarritakoari jarraikiz egiten diren lanak, lanbide ezagupen oinarrizkoak eta egokitze aldi labur bat eskatzen dituztenak.
  • Prestakuntza: eskatzen den prestakuntza eskola graduatuaren parekoa da, eginkizun horietan izandako esperientziarekin ordezka daitekeena.
  • Parekatzea: talde honetan sartzen dira lanpostu hauei dagozkien jarduera guztiak: etxezaina, atezaina, zerbitzaria, peoia eta garbiketako peoia.

11. artikulua. Balioaniztasuna.

Sektorean ematen diren zerbitzuen izaeragatik, denbora partzialean eta asko murriztutako lanaldietan ematen diren zerbitzu asko daudenez, eta horrek, besteak beste, sektorea profesionalizatzea zailtzen duenez, bi aldeen iritziz funtsezkoa da sektoreko langileen balioaniztasuna espresuki arautzea, mugigarritasun funtzionalaren mugak eta balioaniztasuna erregulatzekoak oztopo bihur ez daitezen sinatutako denbora partzialeko kontratuetan lanaldia luzatzeko eta hasieratik lanaldi luzeagoa kontratatzeko aukera izan dadin.

Aurreko horretan oinarrituz, erabaki da ezen, kontratu partzialetan lanaldi gehiago kontratatu ahal izateko edo ondoren luzatzeko, betiere ondotik adierazten diren kasuen mugen barnean, zilegi izanen dela enpresaren eta langilearen artean ituntzea lanbide talde bati baino gehiagori dagozkien eginkizunak egitea, aldeek espresuki adosten eta idatziz jasotzen badute hasierako lan-kontratuan edo hasierako kontratu horretako lanaldia luzatzen duen kontratu berrituan.

Zehazki, balioaniztasun kasu hauek ezarri dira:

a) Kirol jardueretako teknikaria (3. taldea) eta kirol koordinatzailea (2. taldea).

b) 3. eta 4. taldeak.

c) Kirol jardueretako teknikaria (3. taldea) eta zerbitzu orokorretako langilea (5. taldea).

d) Soroslea (4. taldea) eta zerbitzu orokorretako langilea (5. taldea).

Artikulu honetan aipatutako kasuetan eta mugen barnean, eta ikusirik bi aldeek balioaniztasun sistema honek ahalbidetzen duen kontratazioan edo lanaldien luzapenean duten interesa, berariaz itundu da ezen, kasu bakoitzean lehentasunezkoak jotzen ahal diren eginkizunak gorabehera, kasu bakoitzean ordainduko den ordainsaria izanen dela lanbide talde bakoitzarentzat ezarritakoa, talde bakoitzeko eginkizunetan emandako denboraren arabera.

Koordinatzaile lanpostuaren balioaniztasunari dagokionez, barne hartuko ditu harrerako langilearen, soroslearen eta aretoko edo jardueren monitorearen eginkizunak, premia larriko egoera berezietan konponbidea edo zerbitzua eman behar denean, edo harreran laguntza behar denean, jardueretan izena emateko aldia delako edo kirol koordinatzailearen zuzeneko eginkizun berezkoen ondoriozko beste inguruabar batzuengatik.

Artikulu honetan aipatutako inguruabarrak gertatzen ez direnean, legeria orokorrean balioaniztasunaren eta mugigarritasun funtzionalaren kasuetarako xedatutakoa aplikatuko da.

HIRUGARREN KAPITULUA.–BALDINTZA EKONOMIKOAK

12. artikulua. Soldatak.

2023. eta 2024. urteetarako, hitzarmen kolektibo honen eraginpeko langileek hitzarmenaren I. eranskineko soldata taulan lanbide talde bakoitzarentzat ezarritako ordainsariak jasoko dituzte, kasu bakoitzean lanpostuaren egokitzapenagatik dagokion osagarriaz gainera (II. eranskinean jasoa dago). Ordainsari horiek lanaldi osoko zerbitzu emateari dagozkio.

Orain arteko ordainsariak, urtean osotara zenbatuak, hitzarmen honen testuan ezarritakoak baino handiagoak badira, langilearen aldeko diferentzia "ad personam" osagarri gisa erantsiko da, "osagarri pertsonala" izenpean.

Orientazio gisa, aipatu I. eranskinean lanbide talde bakoitzarentzat ezarri da benetan lan egindako ordu bakoitzaren prezio gordina, zeinean sartzen baita asteko atsedenaren ordainsariaren, aparteko pagen, oporren eta jaiegunen zati proportzionala.

Orduaren prezio horretan ez da sartzen hitzarmenaren 16. artikuluan ezarritako gaueko lanaren plusa, ez eta benetan lan egindako jaieguneko edo igandeko lanaren plusak ere, 17. eta 18. artikuluetan ezarritakoak.

13. artikulua. Ordainsariak.

2023. urterako, 1. eranskinean finkatutako soldata tauletan ezarritakoak izanen dira ordainsariak, lanpostuaren egokitzapena dela-eta kasuan-kasuan legokiokeen osagarria gaineraturik. Ordainsari horiek dira 2022ko soldatak %3,5 handitzearen emaitza, eta 2023ko urtarrilaren 1etik aurrera izanen dituzte ondorioak.

2024. urterako, 1. eranskinean finkatutako soldata tauletan ezarritakoak izanen dira ordainsariak, lanpostuaren egokitzapena dela-eta kasuan-kasuan legokiokeen osagarria gaineraturik. Ordainsari horiek dira 2023ko soldatak %2,5 handitzearen emaitza, eta 2024ko urtarrilaren 1etik aurrera izanen dituzte ondorioak.

2025erako eta hitzarmenaren indarraldiko urte bakoitzerako, langile publikoentzat finkatutako portzentaje berean handituko dira soldatak.

14. artikulua. Aparteko haborokinak.

Langile guztiek urtean aparteko hiru paga izanen dituzte: ekaineko paga, abenduko paga eta martxoko paga. Horien zenbatekoa hitzarmenaren 1. eranskineko soldata taulan ordainsari maila bakoitzerako ezarrita dagoena izanen da, lanpostuaren egokitzapena dela-eta kasuan-kasuan legokiokeen osagarria gaineraturik.

Aparteko paga horietarako araubide hau ezarri da:

1. Ekaineko eta abenduko aparteko pagak:

Aparteko paga horiek urteko ekainean eta abenduan kobratuko dira, eta hilez hil proportzioan banatzen eta ordaintzen ahal dira bakoitzaren soldata agirian, lan-kontratuaren iraupena urtebetetik beherakoa baldin bada.

Bi paga horiek sei hilabetetik behin sortuko dira. Ordainketa, kontaketa edo likidaziorako hainbanaketa egiteko, hasiera edo bukaera ezartzeko, urtarrilaren 1etik ekainaren 30era bitarteko tartea hartuko da lehen kasuan eta uztailaren 1etik abenduaren 31 bitartekoa bigarrenean.

Ekaineko aparteko paga, hainbanatzen ez den kasuetan, urteko ekainaren 20a baino lehen ordainduko da.

Abenduko aparteko paga, hainbanatzen ez den kasuetan, urteko abenduaren 20a baino lehen ordainduko da.

2. Martxoko aparteko paga:

Aparteko paga hori sortu eta hurrengo urteko martxoan kobratuko da, eta hilez hil proportzioan banatzen eta ordaintzen ahal da bakoitzaren soldata agirian, lan-kontratuaren iraupena urtebetetik beherakoa baldin bada.

Paga hori urte oso bakoitzeko sortuko da. Zenbaketa edo likidaziorako hainbanaketa egiteko, hasiera edo bukaera ezartzeko, ekainekoa hartuko da, urtarrilaren 1etik abenduaren 31ra bitarte.

Ordainketa sortzapenaren urtean indarrean dauden taulen arabera eginen da, eta erantsitako soldata tauletan ezarri da zenbatekoa, hitzarmen honen 13. artikuluan ezarritako irizpideekin bat.

Martxoko aparteko paga, sortu eta hurrengo urteko martxoko nominarekin batera ordainduko da, azaldu diren baldintzen arabera.

15. artikulua. Gaueko lanaren plusa.

22:00etatik 06:00ak bitarte egiten dena da gaueko lana.

Lana gauez egiten duten langileek soldata osagarri bat jasoko dute gaueko orduetan benetan lan egindako ordu bakoitzeko. Osagarriari "gaueko lanaren plusa" deitzen zaio, eta gaueko orduetako zerbitzualdiaren arabera ordainduko da. 2023. eta 2024. urteetan, plus horren zenbatekoa hitzarmen honen 1. eranskineko soldata taulan ordainsari maila bakoitzerako finkatutakoa izanen da.

Gaueko lanaren plusa benetan lan egindako orduengatik baizik ez denez kobratzen, oporretako ordainsarietatik kanpora gelditzen da espresuki.

16. artikulua. Jaiegunetako plusa.

Artikulu honetan ezarritakoaren ondorioetarako, jaiegun izanen dira urtero ezarritako 14 jaiegun ofizialak; horiexek besterik ez.

Zerbitzua 14 jaiegun ofizial horietakoren batean ematen duten langileek jaiegunetako plusa kobratuko dute, kategoria guztietan berdina izanen dena. 2023. eta 2024. urteetan, plus horren zenbateko gordina hitzarmen honen 1. eranskinean jasotako soldata tauletan finkatutakoa izanen da.

Jaiegunetako plusa 14 jaiegun ofizial horietan benetan lan egindako orduengatik baizik ez denez kobratzen, oporretako ordainsarietatik kanpora gelditzen da espresuki.

17. artikulua. Igandeetako plusa.

Zerbitzua igandeetan ematen duten langileek igandeko plusa kobratuko dute, kategoria guztietan berdina izanen dena, igandeetan benetan lan egindako ordu bakoitzeko. 2023. eta 2024. urteetan, plus horren zenbateko gordina hitzarmen honen 1. eranskinean jasotako soldata tauletan finkatutakoa izanen da.

Igandeko lanaren plusa benetan lan egindako orduengatik baizik ez denez kobratzen, oporretako ordainsarietatik kanpora gelditzen da espresuki.

18. artikulua. Lanerako aldi baterako ezintasunaren eta haurdunaldiko arriskuaren osagarria.

A) Laneko istripuaren edo gaixotasun profesionalaren ondoriozko aldi baterako ezintasuna:

Enpresak lan-istripuaren edo gaixotasun profesionalaren ondoriozko aldi baterako ezintasunaren prestazioak osatuko ditu hil horretan langilea bajan egon ez balitz legokiokeen soldata gordinaren %100era arte, gaueko lanaren, jaiegun edo igandeetako lanaren osagarriak alde batera utzita.

B) Gaixotasun arruntaren edo lanetik kanpoko istripuaren ondoriozko aldi baterako ezintasuna:

Orobat, enpresak gaixotasun arrutaren edo lanetik kanpoko istripuaren ondoriozko aldi baterako ezintasunaren prestazioak osatuko ditu hil horretan langilea bajan egon ez balitz legokiokeen soldata gordinaren %100era arte, gaueko lanaren, jaiegun edo igandeetako lanaren osagarriak alde batera utzita.

Osagarri hori urtero berrikusiko du hitzarmenaren jarraipen mahaiak, eta bidezko diren erabakien gaineko oharrak hartuko dira.

C) Haurdunaldiko arriskua:

Gizarte Segurantzako Institutu Nazionalak emakumezko langile bat haurdunaldiko arriskuan dagoela aitortzen duen kasuetan, enpresak hil horretan langilea bajan egon ez balitz legokiokeen soldata gordinaren %100era arte osatuko ditu prestazioak, gaueko lanaren, jaieguneko lanaren edo igandeko lanaren osagarriak alde batera utzita.

19. artikulua. Kilometrajea.

Langileak bidaia egin behar badu bere lana betetzeko, 0,21 euro jasoko du kilometroko. Balio horrek hitzarmen honen 13. artikuluan itundutako igoera berak izanen ditu.

20. artikulua. Laneko arropa.

Oro har, beren eginkizunak betetzeko laneko arropak behar dituzten langileei bi uniforme emanen zaizkie urtean, neguko eta udako bana, eta behar den aldiro berria emanen zaie.

Lanpostu jakin bakoitzerako egokia den ebaluatu ondoren emanen zaie, non eta ez dien laneko arriskuen prebentzioaren eta segurtasunaren arloko gomendioei kontra egiten.

Soroslearen uniformea honela dago osatua: kamiseta, galtza motzak, txankletak eta kapela.

Igeriketako monitorearen uniformea honela dago osatua: kamiseta, bainujantzia eta txankletak.

Noizbehinka erabiltzen den laneko arropa berritzeko, kontuan hartuko da nola dagoen.

Kirol jardueretako teknikarien kasuan (monitoreak), ikusirik uniformeak jarduerak bezain ugariak direla, goian aipatu uniforme horien ordez 60 euro gordineko gastu ordejarria ordainduko da urtean, 0,17 euro gordin eguneko, alegia, enpresan alta izandako eguneko, benetako lanaldia edozein dela ere.

LAUGARREN KAPITULUA.–LANALDIA, ATSEDENALDIAK, BAIMENAK, ESZEDENTZIAK ETA OPORRAK

21. artikulua. Lanaldia.

2025eko urtarrilaren 1etik aurrera, ezarritako urteko lanaldia, lanaldi osoan, benetako 1.606 lanordukoa da. 2026. urterako, lanaldia benetako 1.599 lanordukoa izanen da, eta, 2027. urterako, 1.592 lanordukoa.

Kirol jardueretako teknikariek (monitoreak) egiten dituzten jardueren baldintzak ikusirik, batez ere beren lan fisiko handia, urteko lanaldi espezifiko bat ezarri da talde horretako langileentzat: benetako 1.518 lanordu 2025. urtean, 1.511 lanordu 2026. urtean, eta 1.504 lanordu 2027. urtean.

Monitoreek ematen duten eskola ordu bakoitzeko, 15 minutu (%25) benetako laneko irakastordutzat zenbatuko dira, prestatzeko denbora izan dezaten. Orain arte 3. taldeko kirol monitoreentzat hitzarmenaren soldata tauletan ageri zen orduko prezioa %25 handituko da, eskolak prestatzeko denbora aintzat hartua izan dadin. Horixe izanen da kontratatzen den edozein monitoreri ordaindu beharko zaion gutxieneko prezioa, eta hitzarmenean eta nominan adieraziko da hitzarmeneko orduko prezioa baino handiagoa duten kontzeptuen banakapena. Zenbateko horri gehituko zaio oporraldian sortutako zati proportzionala, lan egindako ordu bakoitzeko. Kasuren batean, gaur egun, orduko prezio handiagoa ordaintzen bada, aurrez negoziatutako prezio horri eutsiko zaio.

Aretoko teknikaria: benetako 1.539 lanordu 2025. urtean, 1.532 lanordu 2026. urtean, eta 1.525 lanordu 2027. urtean.

Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

6 ordutik gorako eguneroko lanaldi jarraituan, 15 minutuko atsedenaldia ezarri da, benetan lan egindako denboratzat hartuko dena.

Atsedenaldiok hartzeko txandak enpresaren arduradunen eta langileen artean adostuko dira, zerbitzuaren beharrak kontuan hartuta.

Dena dela, langile bakoitzak norberak aukeratutako 3 egun hartzen ahalko ditu urte naturalean, norberaren aferetarako. Egun horiek ez dira errekuperatuko. Lan harremana hasten den urtean, proportzioan sortuko dira 3 egun horiek, lan denboraren arabera edo kontratuaren iraupenaren arabera.

Egun horietan hirugarrena langileak eskaturiko egunean hartzen ahalko da, enpresarekin adostuta, baldin eta zerbitzua ez bada eman gabe geratzen, opor egunak hartzeko irizpide berberei jarraikiz.

Egun hori langile batek baino gehiagok eskatuz gero, lehentasuna eskaera aurkezteko ordenaren arabera zehaztuko da, eta, batera aurkeztuz gero, lanpostuko antzinatasunaren arabera.

Lanaldi partzialeko kontratuetan kontratazioaren portzentajea kalkulatzen laguntzeko, asteko lanaldi bat ezartzen da lanaldi osoaren erreferentziarako, formula honekin:

–Lanaldi arrunta:

  • 2025. urtean: 1.606 ordu: astean 35,18 ordu.
  • 2026. urtean: 1.599 ordu: 35,03 ordu.
  • 2027. urtean: 1.592 ordu: 35 ordu.

–Kirol jardueretako teknikarien lanaldia (monitoreak):

  • 2025. urtean: 1.518 ordu: astean 33,25 ordu.
  • 2026. urtean: 1.511 ordu: astean 33,09 ordu.
  • 2027. urtean: 1.504 ordu: astean 32,94 ordu.

–Aretoko teknikarien lanaldia:

• 2025. urtean: 1.539 ordu: astean 33,71 ordu.

• 2026. urtean: 1.532 ordu: astean 33,55 ordu.

• 2027. urtea: 1.525 ordu: astean 33,40 ordu.

22. artikulua. Lan-egutegia.

Urte bakoitzeko urtarrilaren 15 baino lehen eginen da. Jardueretako langileen kasuan, kanpainen araberako egutegiak eginen dira. Egutegietan lanegunak, atseden-egunak eta lanorduak ezarriko dira gutxienez.

Urteko lanaldia gehienez ere egun baliodun hauetan banatuko da: 2025. urtean, 235 egun baliodun; 2026. urtean, 232 egun baliodun, eta 2027. urtean, 230 egun baliodun, edo hitzarmeneko atsedenaldien araubidea aplikatzearen ondorioz dagokiona.

23. artikulua. Lanaldi irregularra.

Langileen Estatutuaren 34.2 artikuluan araututakoarekin bat, aldeek adostu dute lanaldiaren %0 banatuko dela modu irregularrean.

24. artikulua. Asteko atsedenaldia.

Asteko atsedena egun eta erdikoa izanen da, etenik gabekoa, eta gehienez hamalau eguneko tartean metatzen ahalko da; halakoetan, hiru eguneko atsedenaldia hartzen ahalko da hamalau eguneko tarte bakoitzean.

25. artikulua. Oporrak.

2025. urtean, 24 lanegunekoa izanen da urteko oporraldi ordaindua; 2026. urtean, 26 lanegunekoa, eta 2027. urtean, 27 lanegunekoa.

Langileak enpresarekin adostuta aukeratuko ditu bere opor guztiak. Adostasunik ez badago, alderdi bakoitzak erdia aukeratuko du.

Enpresak oporraldi jakin bat finkatzen badu, eta berariaz eskola kanpainarako kontratatu diren langileak salbu, ekainetik irailera bitarteko hilabeteetan izanen da, biak barne.

Enpresak oporrak aldi horietatik kanpo ezartzen ahalko ditu, baina kasu horretan langileek beste bi egun hartzen ahalko dituzte konpentsazio gisa, baldin eta opor-egun guztiak erreferentzia aldi horretatik kanpo ezartzen badira.

Erreferentzia aldi horretatik kanpo zortzi egun baino gutxiago ezartzen badira, konpentsazioa opor egun batekoa izanen da.

Konpentsazioko egun horiek oporrak benetan hartuz gero gehituko lirateke eta ez, ordea, oporren likidazioa egitea egokitzen denean.

Bajaren bat gertatzen bada oporraldian egonik, langileak eskubidea izanen du beste oporraldi bat ezar dakion aldi baterako ezintasuna bukatu ondoren.

26. artikulua. Aparteko orduak.

Egiten den aparteko ordu bakoitzeko ordu eta erdiko konpentsazioa izanen da, atsedenaldiekin konpentsatu nahiz dirutan konpentsatu. Horrek eragina dauka erantzukizuneko lanpostuetan ere, ezertan galarazi gabe lanerako prest egon beharra saritzeko izan daitezkeen berariazko plusak.

Aparteko orduak urteko 14 jaiegun ofizialetako batean eginez gero, aparteko ordu bakoitzeko bi orduko konpentsazioa izanen da.

Konpentsazioaldia 4 hilabetekoa izanen da, aparteko orduak egiten direnetik.

Aparteko orduak borondatezkoak dira.

Halabeharrez egindako ordu gehigarriei dagokienez, hots, langileren bat ustekabean ez etortzeagatik edo instalazioaren premiazko beharragatik lan egin behar denean, lanera joan beharra egunean bertan jakinarazten bada, lan egindako ordu bakoitza 1,5 ordurekin konpentsatuko da.

27. artikulua. Lizentzia ordainduak.

Langileak, aurretik abisatuta eta ondotik justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio:

A) Langilearen ezkontzagatik: 18 egun natural.

B) Semearen edo alabaren jaiotzagatik eta hura zaintzeko: bi gurasoek 16 asteko baimena izanen dute; horietako 6, erditzearen ostekoak, nahitaez hartu beharko dira, jarraian, eta lanaldi osoan.

C) Ondoko hauen heriotzagatik:

–Ezkontidea eta seme-alabak: 6 lanegun.

–Gurasoak, aita-amaginarrebak, aitona-amonak eta anai-arrebak: 3 lanegun.

–Bigarren mailako gainerako odol edo ezkontza bidezko ahaideak: 2 lanegun.

D) Ezkontideak, izatezko bikotekideak edo odol edo ezkontza bidezko bigarren mailara arteko ahaideek (izatezko bikotekidearen odol bidezko ahaideak barne) edo langilearekin etxe berean bizi den eta haren zaintza behar duen beste edozein pertsonak istripu edo eritasun larria baldin badu, ospitaleratu behar badute edo etxean atseden hartzea eskatzen duen ospitaleratzerik gabeko ebakuntza kirurgikoa baldin badu: bost lanegun.

Ospitaleratzeak dirauen bitartean har daiteke lizentzia.

Herri batetik bestera joan behar izanez gero, eta bien artean 200 kilometroko tartea edo handiagoa bada, C) eta D) ataletan adierazitako baimenak honela luzatzen ahalko dira:

–Lanegun bat gehiago, 200 km-tik 400era arteko distantzia baldin bada.

–Bi lanegun gehiago, 400 km-tik gorako distantzia baldin bada.

E) Ohiko bizilekutik aldatzeagatik (ezkontzaren eguna ez dena): lanegun bat.

F) Gurasoen, seme-alaben edo anai-arreben ezkontzagatik: egun natural bat.

G) Nahitaezko eginbehar publiko eta pertsonal bat betetzeko: behar-beharrezkoa den denbora.

F) Hezkuntza eta Zientzia Ministerioak edo Nafarroako Gobernuak ofizialki onartutako titulu akademiko edo profesional bat ateratzeko azterketak egitera joateko: behar-beharrezkoa den denbora. Joan-etorrietan ematen den denbora ez da baimen ordaindutzat hartuko, baldin eta joan-etorri hori Nafarroako Foru Komunitatearen mugetatik kanpo egiten bada. Joan-etorria muga horien barnean egiten bada, joan-etorri hori baimen ordaindutzat hartuko da.

I) Langileek baimen ordaindua hartzeko eskubidea izanen dute medikuarenera joateko eta ezkontidea edo odol bidezko lehen mailara arteko ahaideak medikuaren kontsultetara laguntzeko. Baimen horrek ez du urtean ordu-mugarik.

J) Langileak eskubidea izanen du ezinbesteak eraginik lanera joan gabe gelditzeko, baldin eta ahaideekin edo bizikideekin zerikusia duten premiazko familia-arrazoiengatik sortzen bada halabehar hori edo berehala bertaratzea eskatzen duen gaixotasun edo istripuren bat gertatzen bada. Langileek eskubidea izanen dute atal honetan jasotako arrazoiengatik hartzen dituzten absentzia-orduak, urtean lau egunen baliokideak bitarte, ordainduak izan daitezen, hitzarmen kolektiboan ezarritakoaren arabera edo, halakorik ezean, enpresaren eta langileen legezko ordezkarien arteko akordioaren arabera, eta, hala badagokio, langileek absentziaren arrazoia frogatu beharko dute.

A) eta F) ataletan aipatutako kasuetan, baimen egunak gertaera eragilea sortu den unetik beretik hasiko dira kontatzen.

27 bis artikulua. Baimen ordaindugabea.

Urtero, baimen ordaindugabe bat eskatzeko eskubidea izanen da. Baimen horrek hilabetekoa izan beharko du gutxienez, eta lau hilabetekoa gehienez ere, eta enpresak harengatik kotizatuko du Gizarte Segurantzan. Departamentu bereko bi langilek ezin izanen dute aldi berean halako baimena eduki.

28. artikulua. Borondatezko eszedentzia.

Enpresan gutxienez urtebeteko antzinatasuna duten langileek eskubidea izanen dute borondatezko eszedentzia hartzeko, 4 hilabetekoa gutxienez eta 2 urtekoa gehienez, lanpostua gordeta baina antzinatasuna kontatzeko eskubiderik gabe, betiere.

Eszedentzian dagoen langileak ezin izanen du eszedentzian dagoen bitartean sektore bereko edo antzeko beste enpresetan lan egitea, adibidez gimnasioetan edo kirol klubetan.

Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.

Gainera, eta hitzarmenaren indarraldi osoan behin soilik, langileek gutxienez bi hilabete eta gehienez lau urte iraunen duen borondatezko eszedentzia bakarra hartzen ahalko dute, bi urtez lanpostua gordeta.

28 bis artikulua. Zaintzagatiko eszedentzia.

Langileek eskubidea dute hiru urtera arteko eszedentzia hartzeko, seme edo alaba bakoitza zaintzeko, norberak izandakoa edo adoptatua izan, edo harrerakoa, bai modu iraunkorrean bai adoptatu aurreko fasean, behin-behineko egoeran badaude ere. Hiru urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.

Eszedentziarako eskubidea izanen dute, halaber, adinagatik edo istripu, eritasun edo desgaitasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat –odol nahiz ezkontza bidezko bigarren gradura artekoa– zaindu behar duten langileek. Gehienez ere bi urteko eszedentzia izanen da, negoziazio kolektiboan epea luzatu ezean.

Apartatu honetan ezartzen den eszedentzia langile bakoitzaren eskubidea da, gizonezkoa izan nahiz emakumezkoa izan, eta zatika ere hartzen ahalko da. Hala ere, baldin subjektu eragile bera zaintzeko eskubidea badute enpresa bereko bi langilek edo gehiagok, enpresaburuak mugatzen ahal du aldi berean erabiltzea eskubide hori, baldin enpresaren funtzionamenduarekin lotutako bidezko arrazoirik bada.

Beste subjektu eragile batek beste eszedentzialdi bat izateko eskubidea sortzen duenean, hura hastearekin bukatuko da ordura artekoa, halakorik izanez gero.

Artikulu honen arabera eszedentzian ematen duen aldia antzinatasunerako zenbatuko zaio langileari, eta lanbide prestakuntzako ikastaroetara joateko eskubidea izanen du; enpresaburuak jakinaraziko dio ikastarootan parte hartzeko aukera, batez ere langilea lanera itzultzen denean.

Lehenbiziko urtean lanpostua gordetzeko eskubidea izanen du. Epe hori bukatuta, gordeko zaion lanpostua lanbide talde berekoa edo kategoria baliokide batekoa izanen da. Aurrekoa hala izanik ere, langilea ofizialki aitortutako familia ugari bateko kidea baldin bada, lanpostua 15 hilabetez gordeko zaio, gehienez ere, kategoria orokorreko familia ugaria denean, eta 18 hilabetez, gehienez, kategoria berezikoa denean.

29. artikulua. Adingabe bat zaintzeko lanaldiaren murrizketa.

Legezko zaintza dela-eta langileren batek bere kargu baldin badu adingaberen bat edo desgaitasun fisiko, psikiko edo sentsorialen bat duen eta ordaindutako lanik egiten ez duen pertsona bat, eskubidea izanen du lanaldia murrizteko, zortziren bat gutxienez eta erdia gehienez ere, lansaria ere hein berean murriztuta. Lanaldia murrizteko eskubideak haurrak 12 urte bete bitarte iraunen du, eta semeak edo alabak adin hori betetzen duen urteko ikasturtea amaitu arte (ekaina) luzatzen ahalko da.

29. artikulua. Lanaldia borondatez murriztea.

Langileek eskubidea izanen dute beren lanaldi arrunta murrizteko eskatzeko. Murrizketa lanaldiaren zortziren batekoa izanen da gutxienez, eta erdikoa gehienez ere.

Ezinbesteko kasuetan izan ezik, langileak hamabost egun lehenago jakinaraziko dio enpresaburuari noiz hasiko duen lanaldi murriztua, eta noiz bukatuko. Langileak zehaztuko du lanaldi murrizketaren ondoriozko ordutegia.

Lanaldi arruntera bueltatzeko, orobat, aurreabisua eman beharko zaio entitateko zuzendariari, lanaldi arruntera itzuli baino hamabost egun lehenago.

Departamentu bereko bi langilek ezin izanen dute aldi berean halako baimena eduki.

30. artikulua. Haurrari esnea emateko baimena.

Emakumezko langileek eskubidea baldin badute Langileen Estatutuaren 37.4 artikuluan ezarrita dagoen baimena hartzeko, haurrari esnea emateko, aukera izanen dute baimen hori estatutuan ezarri bezala hartzeko ala 21 egun naturaleko baimen ordaindu batekin ordezteko. Azken kasu horretan amatasun baimenaren ondoren hartuko litzateke.

Aukera hori izateko, amatasun baimena bukatu baino hamabost egun lehenago eskatu beharko da gutxienez.

BOSGARREN KAPITULUA.–KONTRATAZIOAK ETA KARGU-UZTEAK

31. artikulua. Praktikaldiko kontratuak.

Praktiketako kontratuaren modalitatean kontrataturiko langileek lehenbiziko urtean hitzarmen kolektibo honetan lanpostu berean edo baliokidean ari den langilearentzat finkatutako ordainsariaren %90 jasoko dute.

32. artikulua. Aldizkako kontratu finkoak.

Langileen Estatutuaren 16. artikuluan ezarritakoarekin bat, aldizkako langile finko bihurtuko dira egun jakin batzuetan errepikatzen ez diren lanak egiteko kontratatzen diren langileak, aldi baterako lanetan aritzeko hirugarren denboraldirako deitzen zaien unean.

33. artikulua. Behin-behineko kontratuak.

Langileen Estatutuaren 15.1 artikuluan ezarritakoaren arabera, espresuki erabaki da Langileen Estatutuaren 15.1 artikuluan berean araututako produkzio gorabeherengatik, lana metatzeagatik edo eskaera gehiegi izateagatik egiten diren behin-behineko kontratuek gehienez ere 9 hilabete iraunen dutela 12 hilabeteko epean, kontratu mota hori egiteko arrazoia gertatzen denetik hasita.

34. artikulua. Lanpostu uzteak eta aurreabisuak.

Langileek lanpostua beren borondatez uzteko erabakiaren berri emanen diote enpresari, idatziz eta gutxienez 15 egun aurretik.

Aurrez abisatzen ez bada, enpresak ahalmena izanen du azken likidazioan kentzeko aurreabisuko epea betetzeko faltan izan diren egunen kopurua.

Era berean, enpresak kontratuaren amaiera idatziz eta gutxienez 15 egun lehenago jakinaraziko dio langileari, salbu eta langilearekin bitarteko kontratua itundua duenean eta ez dagoenean jakiterik ordezkatzearen arrazoia noiz bukatuko den, bai eta diziplinako kaleratze kasuetan ere.

35. artikulua. Lanpostu hutsak betetzea.

Lanaldi partzialeko kontratua duten langile finko edo aldizkako finkoek, behar den lanbide trebakuntza izanez gero, eskubidea izanen dute lanpostu hutsak betetzeko, lanorduak behin betiko handituz. Horretarako, prozedura honi jarraituko zaio:

Plantillako langileei behar adinako aurrerapenarekin emanen zaie lanpostu hutsaren berri, interesa dutenek eskatzaile gisa izena eman ahal izateko.

Jakinarazpen horretan honako hauek ezarriko dira: betebeharrak, zer baloratuko den eta lanpostuaren baldintzak (ordutegia, soldata…). Langileen delegatuek, aurrez, txosten bat egin beharko dute, betebeharrei eta puntuazioari buruz, prozesua ahal bezain objektiboa dela bermatzeko.

Izangaiak eskatu diren betebeharren arabera baloratuko dira. Izangai batzuen artean berdinketarik badago, irizpide hauek hartuko dira kontutan, hurrenkera honetan:

1. Antzinatasun handiagoa enpresan.

2. Adin handiagoa.

3. Kontratatutako lanaldiaren portzentaje txikiagoa.

Lanpostu hutsa aldi baterako beteko bada, prozedura honi jarraituko zaio:

Aldi baterako lanpostu hutsak bete nahi dituztenek enpresako zuzendaritzari jakinaraziko diote. Langile horiek biltzen dituen zerrenda bat eginen da, bertan jasorik deitzeko ordena eta pertsona bakoitzak betetzen ahal dituen lanpostuak.

Deitzeko ordena ezartzeko, lehentasuna emanen zaio kontratatutako lanaldiaren portzentaje txikienari. Deiak ezarri den hurrenkeran eginen dira.

Lanpostu hutsa aldi baterako betetzea borondatez onartuko da. Norbaitek ez badu onartzen, zerrendako azken postura iraganen da.

Norbaitek lehen dei ordena ezarri ondotik sartu nahi badu ordezkapenen zerrendan, zilegi izanen du, eta azkeneko postuan kokatuko da.

Delegatuek txosten bat eginen dute hasierako zerrenda ordenatu baino lehen, objektiboa dela bermatze aldera.

Ezein langilek ez du gaindituko lanaldiaren %100 lanpostu hutsen bat betetzeko.

36. artikulua. Enplegua bermatzeko neurriak eta lan-baldintzen aplikazioa.

Atarrabiako Udalak konpromisoa hartu du egungo kudeaketa eredua mantentzeko Kirol Martiket 2015 SL enpresa publikoaren bidez, legegintzaldi hau bukatu arte gutxienez.

Atarrabiako Udalak erabakitzen badu berriz enpresa pribatu baten bidezko kudeaketa ezartzea, baldintza agirian xedatuko du emakidadunak nahitaez subrogatu beharko dituela Kirol Martiket 2015 enpresan zerbitzu ematen ari diren eta 3 hilabeteko edo gehiagoko antzinatasuna duten langileak, Langileen Estatutuaren 44. artikuluan ezarritako bermeak errespetatuz.

Halaber, Kirol Martiket 2015en hitzarmen kolektiboaren testu osoa sartuko du agirian, nahitaez eta lehentasunez bete behar den hitzarmen gisa.

SEIGARREN KAPITULUA.–BESTE BATZUK

37. artikulua. Nominen ordainketa.

Hileko nomina hura sortu eta hurrengo hileko lehen bost egun baliodunen barnean ordainduko da.

38. artikulua. Prestakuntza.

Enpresak konpromisoa hartzen du urtero bere langileentzako prestakuntza plan bat egiteko.

Enpresak aurrez behar den denboraz iragarriko ditu eginen diren prestakuntza ikastaroak, langile guztiek parte hartzeko aukera izan dezaten. Prestakuntzak lotura zuzena badu lanpostu jakin batzuekin, lehentasuna izanen dute lanpostu horietako langileek. Beren lanpostuarekin lotuta egon gabe ere ikastaroa egin nahi duten langileak badaude, enpresako gerentziak prestakuntzaren beharrari eta kostuari buruzko txosten bat eginen du, oniritzia eman ala ez erabakitzeko enpresa batzordearekin batera.

Legez beharrezkoa den prestakuntzaren kostua enpresak ordainduko du. Prestakuntza horretan emandako denboraren %50 benetan lanean emandako denboratzat joko da.

39. artikulua. Lan osasuna.

Hitzarmen hau sinatzean batzorde bat eratuko da, eta bertan proposatu eta zehaztuko dira lan osasunaren arloan egin beharreko balizko jarduketak.

40. artikulua. Ordu sindikalak metatzea.

Langileen Estatutuaren 68.e) artikuluan ezarritakoaren arabera, enpresa batzordeetako kideek edo langileen delegatuek hilean daukaten ordu kreditua langileen ordezkari bakar batek edo batzuek metatzen ahal dute.

41. artikulua. Hitzarmenean ezarritakoa ez aplikatzeko klausula.

Enpresak ezin izanen dio inola ere heldu bere aldetik hitzarmen hau ez aplikatzeko aukerari Langileen Estatutuaren 82.3 artikuluko prozeduraz baliatuz, eta lehenik eta behin saiaketa egin beharko du mugaeguna baino lehen hitzarmena berriz ere negoziatzeko, beste hitzarmen bat lortzeko edo Langileen Estatutuaren 86.1 artikuluak aurreikusten duen berrikuspena egiteko.

Enpresan akordiorik lortzen ez bada, bi alderdiek espresuki erabaki dute ezen, desadostasunak konpontzeko, Nafarroako Lan Auzitegiko akordioaren adiskidetze eta bitartekaritza prozesuen menpe jarriko direla. Arbitraje prozedura aplikatuko da, bakar-bakarrik, bi alderdiak haren menpe jartzeko ados badaude.

Orobat, gaia Aholku Batzorde Nazionalaren edo Autonomikoaren menpe jartzen ahalko da, alderdiak ados badaude.

42. artikulua. Arau hausteak eta zehapenak.

–Honako hauek dira falta arinak:

a) Hogeita hamar egunean lanera hiru aldiz berandu iristea.

b) Lanera huts egitearen arrazoiak ez jakinaraztea aurrez behar den denboraz.

c) Lanetik bidezko arrazoirik gabe alde egitea, nahiz eta denbora gutxirako izan, baldin eta enpresarentzako, erabiltzaileentzako edo lankideentzako kalteak direla-eta falta astun edo oso astuntzat hartzerik ez badago.

d) Fitxatzeko eginbeharra ez betetzea.

e) Zabarkeriaz jokatzea arauei edo jasotako aginduei dagokienez.

f) Aldi baterako ezintasuneko kasuetan, baja edo berrespen agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta gizarte segurantzaren ondorioetarako garrantzitsuak izan daitezkeen gainerako datuak ere.

g) Laneko segurtasun eta higiene arauak ez betetzea, horren inguruabar edo ondorioengatik astuntzat edo oso astuntzat kalifikatzerik ez badago.

–Honako hauek dira falta astunak:

a) Lanera behin berandu iristea, enpresari edo erabiltzaileei kalte larria egiten bazaie edo haientzako arriskugarria bada.

b) Hogeita hamar egunean lanera hiru aldiz baino gehiagotan eta hamar baino gutxiagotan berandu iristea.

c) Hogeita hamar egunean behin lanera ez joatea justifikatu gabe.

d) Zerbitzuari dagokionez, agindutako lanetan behar den arreta ez jartzea eta goragokoen jarraibideei jaramonik ez egitea, enpresaren edo erabiltzaileen kalterako.

e) Hirurogei egunean falta arin bera errepikatzea edo beste falta arin bat egitea.

f) Hirurogei egunean falta arin bera errepikatzea edo beste falta arin bat egitea, nahiz eta beste mota batekoa izan, idatzizko zehapena egon den kasuetan.

g) Lankide baten ordez fitxatzea.

h) Laneko segurtasun eta higiene arauak ez betetzea, horren inguruabar edo ondorioengatik oso astuntzat kalifikatzerik ez badago.

–Falta oso astunak honako hauek dira:

a) Lanera bitan edo gehiagotan berandu iristea, enpresari edo erabiltzaileei kalte larria egiten bazaie edo haientzako arriskugarria bada.

b) Hamabi hilabeteko aldian 20 aldiz baino gehiagotan berandu iristea.

c) Hogeita hamar egunean hirutan lanera ez joatea justifikatu gabe.

d) Gaixotasun edo istripuaren itxurak egitea.

e) Lana uztea edo zabarkeriaz egitea, baldin eta enpresari edo erabiltzaileei kalte larriak ekartzen ahal badizkie.

f) Hitzezko eta egitezko tratu txarrak ematea erabiltzaileei, goragokoei edo lankideei.

g) Iruzurra, leialtasun eza edo konfiantza-abusua agindu zaion lanean.

h) Enpresari edo beste edozein pertsonari ebastea, lapurtzea edo jokabide horren konplize gisa aritzea, enpresan berean edo jardueraren kokaleku den lantokian.

i) Agintekeria.

j) Lanerako bajan dagoen bitartean langileak norbere zein besteren kontura lan egitea, bai eta baja egoera sortu edo luzatze aldera iruzur egitea ere.

k) Laurogeita hamar egunean falta astun bera errepikatzea edo beste falta astun bat egitea, nahiz eta beste mota batekoa izan.

Aurreko artikuluetako falten zerrenda adierazpen gisa eman da.

–Zehapenak:

Enpresak zehapenak jartzeko ahalmena du. Zehapenak idatziz komunikatuko zaizkio langileari; gertakariak, faltaren gradua eta ezarritako zehapena adieraziko dira.

Falta astunak eta oso astunak lehenbizi langileen ordezkariei jakinaraziko zaizkie, eta haien iritziak entzunen ditu enpresak zehapena jarri aitzin. Dena den, zehapenak jartzeko ahalmena enpresak izanen du beti.

Enpresak, falten larritasuna eta inguruabarrak kontuan hartuta, gehienez zehapen hauek jartzen ahal ditu:

a) Falta arinak: idatzizko kargu-hartzea.

  • Enplegu eta soldatarik gabe uztea gehienez bi egunez.

b) Falta astunak: idatzizko kargu-hartzea.

  • 3 egunetik 15era bitartean enplegu eta soldatarik gabe uztea.

c) Falta oso astunak: enplegu eta soldatarik gabe uztea 16 egunetik 60ra bitarte.

  • Kaleratzea.

43. artikulua. Falten preskripzioa.

Graduaren arabera, falta arinek hamar egunen buruan preskribatuko dute, astunek hogei egunen buruan eta oso astunek hirurogei egunen buruan.

Horiek guztiak enpresak gertaeren berri izaten duenetik eta, betiere, gertatu eta handik sei hilabetera.

44. artikulua. Erretiro partziala eta errelebo-kontratua.

Hitzarmena Nafarroako Aldizkari Ofizialean argitaratzen den egunetik aurrera, indarreko legeriak aldian-aldian ezartzen dituen baldintzak betetzen dituzten langileek erretiro partziala hartzen ahalko dute borondatez, baldin eta eskaera egiteko unean daukaten lanaldiaren %50 edo gehiago uzten badute.

Erretiroa hartu nahi badute lanaldiaren %50 baino gutxiago utzita, langilearen eta enpresaren arteko akordioa beharko da.

Aurreikusitako kasuetako edozeinetan, erretiro partziala hartu nahi duen langileak aurreabisua eman beharko du gutxienez erretiroa hartzeko eguna baino sei hilabete lehenago.

45. artikulua. Kontingentzia arrunten kontrola.

Enpresak kontingentzia arrunten ondoriozko aldi baterako ezintasun prozesuen kudeaketa (kontrola, jarraipena eta prestazio ekonomikoaren estaldura) mantenduko ditu Gizarte Segurantzaren entitate kudeatzailearekin (GSINekin), eta kudeaketa hori ez du inoiz hitzartuko Gizarte Segurantzaren entitate laguntzaileekin (mutuekin).

Hitzarmen hau sinatzean indarra duen kontratuaren arabera mutuak kontrolatzen baditu kontingentzia arruntak, hala iraunen du indarraldia amaitu arte, eta une horretan kontingentzia horien kontrola osasun sistema publikora itzuliko da.

46. artikulua. Haurrekin egiten diren igeriketa jardueren ratioak.

Haurrekin egiten diren igeriketa jardueretan gehieneko haur kopuru bat ezarriko da, kirol mailan oinarrituta, irizpide honi jarraikiz:

–Hasierako maila: 8 haur.

–Gainerako mailak: 12 haur.

47. artikulua. Lege subsidiarioak.

Hitzarmen honetan jasota ez dagoen orotan, aintzat hartuko da Nafarroako beste entitate batzuen jabetzako kirol ekipamenduak eta zerbitzuak kudeatzen dituzten enpresa eta entitateen hitzarmen kolektiboan, Langileen Estatutuan eta indarreko legedian xedatutakoa.

Alderdiren batean hitzarmen sektoriala Kirol Martiket 2015ena baino hobea bada, hobekuntza horiek automatikoki sartuko dira enpresako hitzarmenean.

48. artikulua. Bazkide kuota Kirol Martiketeko plantillako langileentzat.

Langileei %25eko deskontua aplikatuko zaie banakako abonamenduetan, baina ez familiako abonamenduetan. Deskontu horretatik kanpo daude borondatezko eszedentzian dauden langileak.

Horrez gain, hitzarmenean ezartzen da langileek kirol instalazioak erabiltzen ahalko dituztela lan-orduetan, baldin eta, lan ordutegiaren arabera, eskola bat amaitu eta hurrengoa hasi bitarte (eskola edo txanda) ordu erdi baino gehiago baldin badaukate libre.

AZKEN XEDAPENETAKO LEHENA

"Fideltasun plusa" izenekoa ezartzen da, hamabi hilabeteetako paga bakoitzean kobratuko dena, enpresarekiko fideltasun baldintza jakin batzuk betetzen dituzten langileentzat, era honetan:

–Enpresarekin 2 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %2 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 3 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %4 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 4 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %6 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 6 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %8 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 9 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %10 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 12 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %12 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 15 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %14 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

–Enpresarekin 18 urte eta egun bateko lotura duten langileek hitzarmeneko tauletan beren mailarako finkatutako hileko oinarrizko soldataren %16 jasoko dute kontzeptu honengatik, gehi lanpostuaren egokitzapena dela-eta legokiekeen osagarria, edo bestela, kontratatua duten lanaldiaren proportziozko partea.

Ehuneko horiek ezin dira metatu.

Plus honi dagokionez, ezarritako ehuneko bakoitza jasotzeko, lotura tarte bakoitza osorik osatu behar da, hots: 2 urte eta egun bat, 3 urte eta egun bat, 4 urte eta egun bat, 6 urte eta egun bat, 9 urte eta egun bat, 12 urte eta egun bat, 15 urte eta egun bat, eta, azkenik, 18 urte eta egun bat.

Antzinatasunaren ondorioetarako, aintzat hartuko da instalazioa aurretik kudeatu duten hirugarren enpresetan izandako antzinatasuna, probintziako hitzarmen sektorialaren 35. artikuluan jasotako langileen subrogazio eskubideak oinarri hartuta.

AZKEN XEDAPENETAKO BIGARRENA

–Berdintasun planak.

Probintziako hitzarmen sektorialean kapitulu honi dagokionez ezarritakoari jarraituko zaio.

1. ERANSKINA.–2023KO SOLDATA TAULA

LANBIDE

KATEGORIA

OINARRIZKO SOLDATA

(12 paga)

UZTAILEKO ETA

EGUBERRIETAKO PAGA

UDABERRIKO PAGA

GUZTIRA,
URTEAN

SOLDATA

ORDUKO

GAUEKO
LANAREN PLUSA
(orduko)

1. taldea

1.843,75

1.843,75

1.843,75

27.656,24

17,07

3,28

2. taldea

1.681,98

1.681,98

1.681,98

25.229,76

15,57

3,02

3. taldea (monitorea)

1.423,20

1.423,20

1.423,20

21.348,03

13,93

2,72

4. taldea (orokorra)

1.423,20

1.423,20

1.423,20

21.348,03

13,18

2,63

Aretoko teknikaria

1.423,20

1.423,20

1.423,20

21.348,03

13,75

2,68

5. taldea

1.358,62

1.358,62

1.358,62

20.379,26

12,58

2,48

6. taldea

1.292,94

1.292,94

1.292,94

19.394,03

11,97

2,39

–Jaiegunetako plusa: 4,59 euro/ordu.

–Igandeetako plusa: 4,47 euro/ordu.

–Kilometrajea: 0,23 euro/km.

2024KO SOLDATA TAULA

LANBIDE

KATEGORIA

OINARRIZKO SOLDATA

(12 paga)

UZTAILEKO ETA EGUBERRIETAKO PAGA

UDABERRIKO PAGA

GUZTIRA,
URTEAN

SOLDATA ORDUKO

GAUEKO
LANAREN PLUSA
(orduko)

1. taldea

1.899,48

1.899,48

1.899,48

28.492,20

17,59

3,39

2. taldea

1.732,81

1.732,81

1.732,81

25.992,16

16,04

3,12

3. taldea (monitorea)

1.466,22

1.466,22

1.466,22

21.993,37

14,36

2,79

4. taldea (orokorra)

1.466,22

1.466,22

1.466,22

21.993,37

13,58

2,70

Aretoko teknikaria

1.466,22

1.466,22

1.466,22

21.993,37

14,16

2,75

5. taldea

1.399,68

1.399,68

1.399,68

20.995,25

12,96

2,55

6. taldea

1.332,02

1.332,02

1.332,02

19.980,25

12,33

2,46

–Jaiegunetako plusa: 4,72 euro/ordu.

–Igandeetako plusa: 4,60 euro/ordu.

–Kilometrajea: 0,23 euro/km.

2. ERANSKINA.–LANPOSTUAREN EGOKITZAPENAGATIKO OSAGARRIA

Soldata osagarri bat ezartzen da, erantsitako taulan adierazitako ehunekoa adinakoa, lanpostu jakin batzuen ezaugarri bereziak konpentsatzeko:

LANPOSTUA

LANPOSTU OSAGARRIDUNAREN EZAUGARRIAK

OSAGARRIAREN %,
OINARRIZKO SOLDATAREN GAINEAN

GARBIKETAKO PEOIA

Arrisku eta nekagarritasun faktore berezia

%4,04

ADMINISTRARI LAGUNTZAILEA

Kudeaketako erantzukizun operatiboa

%2,23

ZERBITZU OROKORRAK

Arrisku eta nekagarritasun faktore berezia

%2,23

LEHEN MAILAKO ADMINISTRARI-OFIZIALA

Kudeaketako erantzukizun operatiboa

%1,69

SOROSLEAK

Arrisku eta nekagarritasun faktore berezia

%1,69

MONITOREAK

Kudeaketako erantzukizun operatiboa

%1,69

KUDEATZAILETZA

Kudeaketako erantzukizun operatiboa

%0,95

Iragarkiaren kodea: F2602245