Iragarkia

55. ALDIZKARIA - 2026ko martxoaren 17a

1. NAFARROAKO FORU KOMUNITATEA

1.7. BESTELAKOAK

64E/2026 EBAZPENA, otsailaren 17koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez ukatzen baita Garesko udal-mugartean ibilgailuak desegiteko dagoen instalazio baten ingurumen-baimen integratuan ezarritako funtzionamendu-baldintzen aldaketa. Instalazioaren titularra Recuperaciones Valdizarbe SL da.

Instalazio hau martxan dago gaur egun, eta ingurumen-baimen integratua du, Ingurumenaren eta Uraren zuzendari nagusiaren martxoaren 27ko 419/2012 Ebazpenaren bidez emana, Ingurumen Kalitatearen eta Klima Aldaketaren Zerbitzuko zuzendariaren otsailaren 4ko 28E/2016 Ebazpenaren bidez eguneratua, eta Ingurumeneko zuzendari nagusiaren apirilaren 9ko 288E/2025 Ebazpenaren bidez aldatua.

2025eko abenduaren 2an, titularrak eskatu zuen ingurumen-baimen integratuan dauden baldintzak aldatzeko. Zehazki, puntu bat aldatzeko eskatu zuen; hain zuzen, Ingurumeneko zuzendari nagusiaren apirilaren 9ko 288E/2025 Ebazpenean bidalitako dokumentazioaren VI. eranskineko 6. puntua.

Ekonomia Zirkularraren eta Berrikuntzaren Zerbitzuak, aurkeztutako eskaera aztertuta, ondorioztatu du ez dela onargarria; izan ere, eskatzen dena ez dator bat instalazioak ingurumen aldetik eduki beharreko funtzionamendu egokiarekin eta teknika erabilgarri onenen aplikazioarekin, I. eranskinean deskribatzen den bezala.

Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,

EBAZTEN DUT:

Lehena.–Ukatzea Garesko udal-mugartean ibilgailuak desegiteko dagoen instalazio baten ingurumen-baimen integratuan ezarritako funtzionamendu-baldintzen aldaketa. Instalazioaren titularra Recuperaciones Valdizarbe SL da.

Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen-diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.

Hirugarrena.–Ebazpen hau Nafarroako Aldizkari Ofizialean argitaratzea.

Laugarrena.–Ebazpen honek ez du administrazio-bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren aurka, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

Bosgarrena.–Ebazpen hau igortzea Recuperaciones Valdizarbe SL enpresari, Garesko Udalari eta Babes Zibileko eta Larrialdietako Zerbitzuari, behar diren ondorioak izan ditzan.

Iruñean, 2026ko otsailaren 17an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: Ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2602750