50. ALDIZKARIA - 2026ko martxoaren 10a

1. NAFARROAKO FORU KOMUNITATEA

1.7. BESTELAKOAK

37/2026 EBAZPENA, otsailaren 23koa, Enpresen Sustapenerako eta Azpiegituretako zuzendari nagusiak emana, zeinaren bidez administrazio-baimena ematen baita 4,8 MW-eko "La Caya" eguzki-instalazio fotovoltaikoa eta horrekin lotutako transformazio eta ebakuazio azpiegiturak eraikitzeko Erriberriko eta Tafallako udal mugarteetan. Espedientearen kodea: 5323-CE.

1.–Aurrekariak.

2023ko apirilaren 21ean eta Sektore Elektrikoari buruzko abenduaren 26ko 24/2013 Legearen 53. artikuluan eta Energia elektrikoaren instalazioak baimentzeko prozedurak eta energia elektrikoa garraiatu, banatu, merkaturatu eta haren horniketa egiteko jarduerak arautzen dituen abenduaren 1eko 1955/2000 Errege Dekretuaren 122. eta 130. artikuluetan ezarritakoari jarraikiz, Ríos Renovables SLUk aurretiazko administrazio-baimena eta administrazio-baimena eskatu zituen Erriberriko eta Tafallako udal mugarteetan "La Caya" eguzki-instalazio fotovoltaikoa eta horri lotutako transformazio eta ebakuazio azpiegiturak eraikitzeko.

Eskaera behar bezala izapidetu ondoren, Enpresen Sustapenerako eta Azpiegituretako zuzendari nagusiaren abuztuaren 5eko 34/2025 Ebazpenaren bidez (2025eko irailaren 1eko Nafarroako Aldizkari Ofizialean argitaratua, 173. zenbakian), aldez aurreko administrazio-baimena eman zitzaion Ríos Renovables SLUri "La Caya" eguzki-instalazio fotovoltaikoa eta horri lotutako transformazio eta ebakuazio azpiegiturak egiteko, Erriberri eta Tafallako udal mugarteetan.

Ebazpen hori ebazpen hauek kontuan harturik eman zen:

–330E/2024 Ebazpena, apirilaren 26koa, Ingurumen zuzendari nagusiarena ,ingurumen inpaktuaren aldeko txostena egiten duena (2024ko maiatzaren 17ko Nafarroako Aldizkari Ofizialean argitaratua, 102. zenbakian).

–384E/2025 Ebazpena, abuztuaren 1ekoa, Lurralde Antolamenduko zuzendari nagusiak emana, lurzoru urbanizaezinean jarduerak egiteko baimena ematen duena.

2.–Eraikitzeko administrazio-baimenaren eskaera.

2025eko irailaren 16an, abenduaren 1eko 1955/2000 Errege Dekretuaren 130. artikulua aplikatuta, Ríos Renovables SLUk administrazio-baimena eskatu zuen Erriberriko eta Tafallako udal mugarteetan "La Caya" eguzki-instalazio fotovoltaikoa eta hari lotutako transformazio eta ebakuazio azpiegiturak eraikitzeko.

Entregatu diren agiri teknikoen arabera, eguzki-instalazio fotovoltaikoa Erriberriko udal mugarteko 11. poligonoaren 89. eta 96. lurzatietan dago, gutxi gorabehera 8,69 hektarea hartzen ditu, eta honela dago osatuta:

  • Alde biko 7.656 modulu fotovoltaiko, 822,25 W-ko potentzia unitarioa dutenak (1,15 x 715 W), guztira 6.295,146 kWp-ko potentzia-erpinarekin.
  • 15 inbertsore fotovoltaiko, 40ºC-tan 320 kW-eko potentzia izendatua dutenak eta, osotara, 4.800 kWn-ko potentzia instalatua dutena.
  • 2.500 kVA-ko bi transformazio zentro eta 30/0,8 kV-ko transformazio erlazioa.
  • 30 kV-ko babes eta neurketa zentro bat.

Inbertsore fotovoltaikoen bidez, moduluek korronte zuzenean sortzen duten energia korronte alterno bihurtzen da, eta energia hori transformazio-zentroetako behe-tentsioko armairuraino eramaten da, 30 kV-era eraldatzeko. Energia 30 kV-era transformatu ondoren, ebakuazio-azpiegiturak 30 kV-ko lurpeko bi linea dira, bi transformazio zentroetatik hasi eta instalazio berean instalatutako babes eta neurketa zentroraino. Instalazio horretan, instalazio horrek eta sustatzaile berak proiektatzen dituen beste hiru eguzki-instalazio fotovoltaikok sortutako energia jasotzen da: "Las Planillas" (5321-CE), "Los Mulares" (5322-CE) eta "Baretón" (5447-CE).

Puntu horretatik aurrera, lau instalazioetako ebakuazio azpiegiturak partekatuak izanen dira, harik eta "Tafalla 66 kV" azpiestazioan ebakuatu arte. Azpiestazio hori I-DE Redes Eléctricas Inteligente SAUrena da. Horrela, eraikitzeko administrazio-baimen honetan, "La Caya" eguzki-instalazio fotovoltaikoaz gain, lau espedienteetarako instalazio komun hauek ere jasotzen dira:

–30 kV-ko lurpeko ebakuazio linearen proiektua. Proiektuan lau instalazioek sortutako energia ateratzen da "Los Mulares" eguzki-instalazio fotovoltaikoan instalatutako babes eta neurketako zentrotik, "La Caya" eguzki-instalazio fotovoltaikoan kokatutako babes eta neurketako zentrotik igarotzen da, eta "Promotores Tafalla 30/66 kV" azpiestazioan akitzen da, Erriberriko eta Tafallako udal mugarteetan.

–"Promotores Tafalla 30/66 kV" azpiestazioaren proiektua, zenbait sustatzailek partekatua, eta haren 66 kV-ko lurpeko ebakuazio linea, "Promotores Tafalla 30/66 kV" azpiestaziotik gaur egungo "Tafalla 66 kV" azpiestaziora (I-DE Redes Eléctricas Inteligente SAUren jabetzakoa).

3.–Kontsulten izapidea.

Lurralde Antolamenduko zuzendari nagusiaren abuztuaren 1eko 384E/2025 Ebazpenak honako hau ezartzen zuen: "Enpresen Sustapenerako eta Azpiegituretako Zuzendaritza Nagusiak emandako eraikitzeko administrazio-baimena eman aurretik, proiektua igorriko da ebazpen honetan adierazitako neurriak betetzen direla egiaztatzeko".

Aurrekoa ikusita, proiektuaren kopia bidali zitzaion Paisaiaren eta Landa-lurzoruaren Atalari, egiazta zezan lurzoru urbanizaezinean jarduerak eta erabilerak baimentzeko eskatutakoa betetzen zuela. 2025eko abenduaren 18an, Paisaiaren eta Landa-lurzoruaren Atalak txosten teknikoa egin zuen, eta bertan ondorioztatu zen proiektu aldatua bat zetorrela abuztuaren 1eko 384E/2025 Ebazpenean jasotako neurriekin.

Bestalde, erakunde sustatzaileak separata bat entregatu zuen Herri-lanen eta Azpiegituren Zuzendaritza Nagusiaren Zainketa Zerbitzurako, NA-6620 eta NA-115 errepideekiko 30 kV-ko lurpeko ebakuazio linearen gurutzaketei eta paralelismoei buruzkoa. 2026ko otsailaren 16an, Hegoaldeko Zainketa Atalak aldeko txostena eman zuen NA-6620 eta NA-115 errepideetako eraginei buruz. Txosten horren arabera, lanak hasi aurretik, erakunde sustatzaileak Zainketa Zerbitzuaren baimena eskuratu beharko du. Horretarako, baimen eskaerarekin batera, lanak behar bezala definitzen dituzten agiri teknikoak eman beharko dizkio Herri-lanen eta Azpiegituren Zuzendaritza Nagusiari, tasa ordaintzeko baimenarekin batera.

AP-15 autobidearen gaineko ukipenari dagokionez, lanak hasi aurretik, erakunde sustatzaileak Autopistas de Navarra SArekin (AUDENASA) harremanetan jarri beharko du, behar den gurutzaketa nola eginen den zehaztasunez zehazteko.

4.–Eraikuntzarako administrazio-baimenaren proposamena.

Horregatik guztiagatik, aurkeztutako agiriak ikusita eta Sektore Elektrikoari buruzko abenduaren 26ko 24/2013 Legean xedatutakoa kontuan hartuta, Industria Antolamendu, Energia Azpiegitura eta Meategien Zerbitzuko Energia Azpiegituren Atalak prozedura behar bezala gauzatu dela ondorioztatu du, eta Ríos Renovables SLU enpresari Erriberriko eta Tafallako udal mugarteetan 4,8 MW-eko "La Caya" eguzki-instalazio fotovoltaikoa eraikitzeko administrazio-baimena ematea proposatu du, baita horri lotutako transformazio eta ebakuazio azpiegiturak egiteko ere.

Adierazitakoarekin bat, eta Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, honako hau,

EBAZTEN DUT:

1. Ríos Renovables SLUri 4,8 MW-eko "La Caya" eguzki-instalazio fotovoltaikoa eraikitzeko administrazio-baimena ematea, baita horri lotutako transformazio eta ebakuazio azpiegiturak Erriberriko eta Tafallako udal mugarteetan dagoen "Tafalla 66 kV" transformazio azpiestazio elektrikora eramateko ere. Halaber, aurkeztutako proiektuak onartuko dira, eta hogeita hamasei hilabeteko epea emanen da horiek gauzatzeko.

2. Eraikitzeko administrazio-baimen hau emanda ere, instalazioa gauzatzeko beharrezkoak diren emakida, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.

3. Instalazioak aurkeztutako proiektuari jarraikiz gauzatu beharko dira, eta bat etorri beharko dute honako hauetan xedatutakoarekin: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua eta haren jarraibide tekniko osagarriak JTO-GTE 01etik 23ra; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua eta haren jarraibide tekniko osagarriak JTO-GTL 01etik 09ra; eta Behe tentsioko erregelamendu elektroteknikoa onesten duen abuztuaren 2ko 842/2002 Errege Dekretua.

4. Behin proiektua egikariturik, eskatzaileak probetarako behin-behineko ustiapenerako baimena eskatu beharko du. Eskaera horrekin batera obra bukaerako ziurtagiria emanen da, teknikari eskudun batek sinatua, baita araudian ezarritako gainerako agiriak ere.

5. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzuari; Ingurumen Ebaluazioaren Atalari; Paisaia eta Landa-lurzoruaren Atalari; Baso Plangintzarako Atalari; Herri-lanen eta Azpiegituren Zuzendaritza Nagusiko Zainketa Zerbitzuari; Ondare Historikoaren Zerbitzuaren Ondare Arkitektonikoaren Atalari eta Erregistroaren, Ondasun Higigarrien eta Arkeologiaren Atalari; eta Gobernu Irekiaren eta Herritarrentzako Arretaren Zerbitzuari, behar diren ondorioak izan ditzan.

6. Ebazpen hau Nafarroako Aldizkari Ofizialean argitaratzea, orok jakin dezan.

7. Ebazpen hau jakinaraztea Ríos Renovables SLUri; i-DE Redes Eléctricas Inteligentes SAUri; Autopistas de Navarra SAri (AUDENASA); Canal de Navarra SAri (CANASA); Enagás Transporte SAUri; Energía Inagotable de Keneo SLri; Energía Inagotable de Kyoko SLri; Bodegas Pagos de Araiz SAri; Sustrai Erakuntza fundazioari; Ongaiz-Zangozerriko Ekologistak Martxan elkarteari; Landazuria-Erriberako Ekologistak Martxan elkarteari eta Aguacanali, eta ohartaraztea ebazpenak ez duela administrazio bidea agortzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Hartan espediente kodea adierazi beharko da.

8. Ebazpen hau jakinaraztea Erriberriko eta Tafallako udalei eta Ebroko Konfederazio Hidrografikoari, eta aditzera ematea ezen honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, bi hilabeteko epean, honako hau jakinarazi eta biharamunetik hasita, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko otsailaren 23an.–Enpresen Sustapenerako eta Azpiegituretako zuzendari nagusia, Iñigo Arruti Torre.

Iragarkiaren kodea: F2602914