49. ALDIZKARIA - 2026ko martxoaren 9a

1. NAFARROAKO FORU KOMUNITATEA

1.7. BESTELAKOAK

324/2026 EBAZPENA, otsailaren 17koa, Nafarroako Unibertsitate Publikoko errektoreak emana. Haren bidez, agintzen da argitara dadila erabaki hau: "Erabakia, Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen lanpostuak betetzeko arautegia aldatzen duena".

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agindua ematen dut Gobernu Kontseiluak 2026ko otsailaren 17an hartutako erabaki hau argitaratzeko: "Erabakia, Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen lanpostuak betetzeko arautegia aldatzen duena".

GOBERNU KONTSEILUAREN ERABAKIA, ZEINAREN BIDEZ ALDATZEN BAITA NAFARROAKO UNIBERTSITATE PUBLIKOKO ADMINISTRAZIOKO ETA ZERBITZUETAKO LANGILEEN LANPOSTUAK BETETZEKO ARAUTEGIA, GOBERNU KONTSEILUAK 2018KO EKAINAREN 19AN EMANDAKO ERABAKI BATEN BIDEZ ONETSIA

Gobernu Kontseiluak 2018ko ekainaren 19an hartutako erabaki baten bidez, Nafarroako Unibertsitate Publikoko administrazioko eta zerbitzuetako langileen lanpostuak betetzeko arautegia onetsi zen.

Erabaki hori onetsi zenetik denbora luzea igaro denez gero, zenbait aldaketa egin behar ditugu hartan, betiere aldaketa horiek Unibertsitateko Langileen Batzordean ordezkatuta dauden sindikatuekin negoziatu eta gero.

Negoziazio horren ondorioz, Langileen Batzordeko ordezkarien gehiengoaren aldeko botoarekin, egungo arautegiaren zenbait alderdi aldatzea adostu da.

Bestalde, Unibertsitate Sistemari buruzko 2023ko martxoaren 22ko 2/2023 Lege Organikoak orain arte erabili izan den "administrazioko eta zerbitzuetako langile" izendapena aldatu du, haren ordez "teknikari eta kudeaketako eta administrazioko eta zerbitzuetako langile" izendapena ezarriz. Hortaz, izendapen berri hori aipatutako arauan ere jaso beharra dago.

Beraz, erabaki bat onetsi behar da aldaketa horiek sartzeko.

Azaldutakoari jarraikiz, kudeatzaileak proposatuta, hau da Gobernu Kontseiluak, bere kideek aldez aurretik eztabaida egin eta gero, 2026ko otsailaren 17an egindako bileran hartu duen,

ERABAKIA:

Lehenbizikoa.–Nafarroako Unibertsitate Publikoko administrazioko eta zerbitzuetako langileen lanpostuak betetzeko arautegiaren aldaketa.

Aldatu egin da Nafarroako Unibertsitate Publikoko administrazioko eta zerbitzuetako langileen lanpostuak betetzeko arautegia, Gobernu Kontseiluaren 2018ko ekainaren 19ko erabaki baten bidez onetsia, eta honela idatzita geldituko da:

1) "Administrazioko eta zerbitzuetako langile" adierazpenaren ordez, "teknikari eta kudeaketako eta administrazioko eta zerbitzuetako langile" forma erabiliko da testuan ageri den guztietan, arautegiaren izenburuan barne.

2) Gaztelaniazko testuan, "Gerente" adierazpenaren ordez, "Gerencia" forma erabiliko da testuan ageri den guztietan.

3) 6. artikulua aldatu da, eta honela idatzita geldituko da:

"6. artikulua. Atxikimendu aldaketak, zerbitzuko beharrak direla eta.

1.–Zerbitzuko beharren ondorioz langileak birbanatzea beharrezkoa denean, hutsik dauden lanpostuak betetzeko, zilegi izango da lanpostu horiei atxikitzea lanpostu horien berdina den lanpostu bati atxikitako langile funtzionarioak, baldin eta lanpostu horietan jarduteko 4. artikuluan aipatzen diren betekizunak betetzen badituzte.

Halaber, zerbitzuko beharrengatik gomendagarria denean, eta aurretik ebazpen arrazoitu baten bidez justifikatuta, zilegi izango da langile funtzionarioak beste atxikimendu eremu organiko bati dagokion beste lanpostu batera lekualdatzea, baldin eta daukatenaren izaera berekoa bada. Idatz-zati honetan ezarritako lekualdaketetan, ezingo da ez campusa ez lanaldi mota aldatu.

Atxikimendu horiek aldi baterakoak izango dira, baina egongo da haiek finkatzeko aukera. Atxikimendu aldaketa finkatuz gero, aldaketa horren ondoren deitzen den lehenbiziko merezimendu-lehiaketan sartuko da lanpostua. Lanpostua betetzen duen funtzionarioa behin-behineko atxikimendu egoerara igaroko da, eta, hortaz, lanpostuak betetzeko deitzen den hurrengo lekualdatze-lehiaketan parte hartu beharko du nahitaez.

2.–Errektoreak dauka eskuduntza langileei lanpostu jakin bat esleitzeko, bai eta bete gabe edo beteta dauden lanpostuen atxikimendua aldatzeko eta zerbitzuko beharrak direla eta langileak lekualdatzeko ere, Nafarroako Unibertsitate Publikoan dauden atxikimendu eremu ezberdinen artean.

3.–Nafarroako Unibertsitate Publikoko Teknikarien eta Kudeaketako eta Administrazioko eta Zerbitzuetako Langileen Batzordeari aldez aurretik eman beharko zaio artikulu honen babesean egiten diren aldaketa guztien berri."

4) 7. artikulua aldatu da, eta honela idatzita geldituko da:

"7. artikulua. Lanpostuen esleipena, lanpostura itzultzearen ondorioz.

1.–Izendapen libreko lanpostu batean edo unitate organiko baten burutzan edo zuzendaritzan jarduteko izendatutako funtzionario batek lan hori uzten duenean, berehala itzuli beharko du bere mailaren eta izendapenaren berezko eginkizunak betetzera, jatorrian zeukan atxikimendu eremu organikoaren barruan. Lanpostura itzultzean, ezingo da ez campusa ez lanaldi mota aldatu.

Salbuespen gisa, kargua uzten duen pertsonak eskatuta, zilegi izango da lanpostura itzultzea beste atxikimendu eremu edo campus batean, betiere zerbitzuko beharrek horretarako aukera ematen badute.

2.–Lanpostura itzultzen denari lanpostu jakin bat esleituko zaio.

Lanpostura itzuliko denaren atxikimendu eremuan lanpostu huts bat baino gehiago baldin badago aldi baterako kontratazio bidez beteta, eremu horretan zerbitzuak aldi baterako ematen denbora gehien eta etenik gabe daraman pertsonak betetzen duen lanpostua esleituko zaio.

3.–Lanpostua gorde gabe duten eta eszedentzian dauden funtzionarioak lanera itzultzen direnean, azken destinoa eduki zuen atxikimendu unitatean lanpostu bat baldin badago, lanpostu hori esleituko zaie. Eremu horretan aldi baterako kontratazio bidez betetako lanpostu huts bat baino gehiago baldin badago, 2. idatz-zatian ezarritakoa aplikatuko da.

Nolanahi ere, lanpostua gorde gabeko eszedentzia batetik itzultzen diren funtzionarioen lanpostuaren esleipena behin-behinekoa izango da, eta lanpostu hori esleipenaren ondoren deialdira ateratzen den lehenbiziko merezimendu-lehiaketan gehitu beharko da."

5) 9. artikulua aldatu da, eta honela idatzita geldituko da:

"9. artikulua. Lekualdatze-lehiaketak.

1.–Lekualdatze-lehiaketa aplikatu beharreko borondatezko mugikortasun prozedura izango da kasu hauetan:

a) Atalen edota atal baten barruan ez dauden maila txikiagoko unitate organikoen artean. Ondorio horietarako, laguntza administratiboko unitateak, laborategiari laguntzeko unitateak eta deialdiaren oinarrietan zehaztu daitezkeen beste unitate administratibo batzuk atal desberdintzat hartuko dira.

b) Langileen atxikimendu eremu organiko berari dagozkion lanpostuen artean, campus berean ez daudenean.

c) Lanaldi mota ezberdinak dauzkaten lanpostuen artean.

2.–Bete gabeko lanpostuak lekualdatze-lehiaketaren bidez betetzeko eskaini beharko dira, horiek funtzio publikoan sartzeko deialdietan gehitu baino lehenago. Halaber, zilegi izango da lekualdatze-lehiaketetarako deialdiak egitea antolakuntzako eta bestelako arrazoiek hala eskatzen dutenean.

3.–Lekualdatze-lehiaketetan parte hartu ahalko dute bete gabeko lanpostuetako mailakoak diren eta lanpostu horietan jarduteko 4. artikuluan aipatzen diren betekizunak betetzen dituzten Nafarroako Unibertsitate Publikoko funtzionarioek.

Alde horretatik, Kudeatzailetzak mugikortasun mapa bat onetsiko du, Teknikarien eta Kudeaketako eta Administrazioko eta Zerbitzuetako Langileen Batzordeari kontsultatu ondoren, eta bertan ezarriko da lekualdatzeko zer aukera dagoen lanpostu bakoitzerako.

Behin Unibertsitateko funtzionarioen arteko lekualdatze-lehiaketaren bidez lanpostuak betetzeko prozedura bakoitza bukatuta, zilegi da bete gabe gelditzen diren lanpostuak beste administrazio publikoetako funtzionarioei eskaintzea, Unibertsitateak horiekin elkarrekikotasun itun bat sinatuta badauka, bereziki G9 taldeko unibertsitateko funtzionarioei, lehiaketa bidez betetzeko."

6) 11. artikulua aldatu da, eta honela idatzita geldituko da:

"11. artikulua. Atalburutzak betetzea.

Nafarroako Unibertsitate Publikoko ataletako burutzak betetzeko, baita unitateetako arduradun, bulegoetako arduradun eta koordinatzaile karguak betetzeko ere, Nafarroako administrazio publikoetan aplikagarria den lanpostuak betetzeko araudian ezarritakoari jarraituko zaio, berezitasun hauek kontuan hartua:

1.–Lanpostu horiek betetzeko deialdira ateratzen diren lehiaketetan, elementu hauek baloratuko dira, ehun puntuko balio maximoa edukiko duen eta honela banatuta egongo den eskala batean:

–Administrazio publikoetan emandako zerbitzuak: hogeita bost puntu gehienez.

–Prestakuntza, irakaskuntza, ikerketa eta beste merezimendu batzuk: hamabost puntu gehienez.

–Hizkuntzak jakitea: hamar puntu gehienez.

–Lehiaketaren xede den burutzari edo zuzendaritzari buruzko memoria: berrogei puntu gehienez.

–Memoriaren aurkezpena eta defentsa: hamar puntu gehienez.

Elementu horiek horretarako onetsi diren deialdietan ezarritakoarekin bat etorriz baloratuko dira. Memoria, nolanahi ere, kanporatzailea izango da. Gainditzeko, ezinbestekoa izango da memoriaren ebaluazioan gutxienez hogei puntu eta memoriaren aurkezpenean eta defentsan gutxienez bost puntu lortzea.

Administrazio publikoetan emandako zerbitzuak eta prestakuntza, irakaskuntza, ikerketa eta bestelako merezimenduak, eta hizkuntzak jakitea Arautegi honen II. eranskinean ezarritako merezimenduen baremoan xedatutakoaren arabera baloratuko dira.

Memoria eta haren aurkezpena eta defentsa ebaluatzeko irizpideak Arautegi honen IV. eranskinean ezarritako merezimenduen baremoan daude jasota.

2.–Memoriaren egiletza egiaztatzea.

Epaimahai ebaluatzaileak arrazoizko zalantzak baditu hautagaiak aurkeztutako memoriaren egiletzari buruz, proba osagarri bat egiteko eskatzen ahalko du benetan hark egin duela egiaztatzeko.

Proba osagarria idatzizko ariketa bat izango da, aurrez aurrekoa eta gainbegiratua, eta, hartan, hautagaiak bere memoriaren funtsezko alderdiak garatu beharko ditu, epaimahaiak egindako galderei erantzun beharko die edo bere lanaren edukiarekin lotutako analisi kritiko bat egin beharko du.

Memoriaren aurkezpena eta defentsa egin aurretik edo ondoren, epaimahai ebaluatzaileak idatziz justifikatu beharko ditu proba osagarria egiteko arrazoiak, eta objektibotasunaren, inpartzialtasunaren eta hautagaiaren eskubideekiko errespetuaren printzipioak bermatu beharko ditu une oro. 5 egun balioduneko epea emango da erabaki horri buruzko alegazioak aurkezteko.

Alegazioak ebatzi ondoren, proba 5 egun baliodunetik beherako epean egingo da.

Memoriaren azken kalifikazioa proba osagarriaren emaitzaren arabera aldatzen ahal da, epaimahaiak aldez aurretik ezarritako irizpideen arabera.

3.–Burutzak betetzeko lehiaketak kalifikatzeko ardura daukaten epaimahaiak honela osatuta egongo dira:

–Epaimahaiburua: NUPeko Kudeatzailetzaren titularra, edo bete nahi den burutzari dagokion unitate organikoaren ardura daukan errektoreordea edo hark eskuordetutako pertsona.

–Epaimahaikidea: Teknikarien eta Kudeaketako eta Administrazioko eta Zerbitzuetako Langileen Batzordeak izendatua.

–Epaimahaikide-idazkaria: bete nahi den burutzari dagokion unitate organikoaren ardura daukan zerbitzuko zuzendaria. Zerbitzu bati atxikiak ez dauden burutzen kasuan, Giza Baliabideen Zerbitzuko zuzendaria edo hark eskuordetutako pertsona arituko da epaimahaikide-idazkari.

4.–Aurrekoari kalterik egin gabe, atalburutzak bitarteko gisa betetzen ahalko dira, organo eskudunak egindako izendapenaren bidez, eta nahitaez Nafarroako Unibertsitate Publikokoak diren edo hari atxikiak dauden funtzionarioek bete beharko dute kargu hori, Nafarroako Administrazio Publikoen Zerbitzuko Langileen Estatutuan xedatutakoaren arabera.

5.–Atal batean lanpostu bat baino gehiago badaude ingeleseko C1 mailako edo euskarako C1 mailako hizkuntza-eskakizuna dutenak, 1,5ekin biderkatuko da dagokion hizkuntza jakiteagatik esleitutako puntuazioa, merezimenduen baremoetako c) atalean ezarria."

7) 12. artikulua aldatu da, eta honela idatzita geldituko da:

"12. artikulua. Bulegoburutzak betetzea.

Nafarroako Unibertsitate Publikoko bulegoetako burutzak betetzeko, baita sailetako koordinatzaile, administratzaile, campuseko koordinatzaile, zerbitzuetako arduradun, unitateko arduradun eta bulegoetako eta antzeko unitateetako arduradun karguak betetzeko ere, Nafarroako administrazio publikoetan aplikagarria den lanpostuak betetzeko araudian ezarritakoari jarraituko zaio, berezitasun hauek kontuan hartua:

1.–Lanpostu horiek betetzeko deialdira ateratzen diren lehiaketetan, elementu hauek baloratuko dira, ehun puntuko balio maximoa edukiko duen eta honela banatuta egongo den eskala batean:

–Administrazio publikoetan emandako zerbitzuak: hogeita bost puntu gehienez.

–Prestakuntza, irakaskuntza, ikerketa eta beste merezimendu batzuk: hamabost puntu gehienez.

–Hizkuntzak jakitea: hamar puntu gehienez.

–Lehiaketaren xede den burutzari edo ardurari buruzko memoria: berrogeita bost puntu gehienez.

Elementu horiek horretarako onetsi diren deialdietan ezarritakoarekin bat etorriz baloratuko dira. Memoria, nolanahi ere, kanporatzailea izango da, eta, gainditzeko, ezinbestekoa izango da gutxienez hogeita bi puntu eta erdi lortzea.

Administrazio publikoetan emandako zerbitzuak eta prestakuntza, irakaskuntza, ikerketa eta bestelako merezimenduak Arautegi honen III. eranskinean ezarritako merezimenduen baremoan xedatutakoaren arabera baloratuko dira.

Memoria ebaluatzeko irizpideak Arautegi honen V. eranskinean ezarritako merezimenduen baremoan daude jasota.

2.–Memoria jendaurrean irakurriko da, eta epaimahaiak galderak egiten ahalko ditu memoria hobeto ebaluatzeko.

3.–Memoriaren egiletza egiaztatzea.

Epaimahai ebaluatzaileak arrazoizko zalantzak baditu hautagaiak aurkeztutako memoriaren egiletzari buruz, proba osagarri bat egiteko eskatzen ahalko du benetan hark egin duela egiaztatzeko.

Proba osagarria idatzizko ariketa bat izango da, aurrez aurrekoa eta gainbegiratua, eta, hartan, hautagaiak bere memoriaren funtsezko alderdiak garatu beharko ditu, epaimahaiak egindako galderei erantzun beharko die edo bere lanaren edukiarekin lotutako analisi kritiko bat egin beharko du.

Memoriaren irakurketa egin aurretik edo ondoren, epaimahai ebaluatzaileak idatziz justifikatu beharko ditu proba osagarria egiteko arrazoiak, eta objektibotasunaren, inpartzialtasunaren eta hautagaiaren eskubideekiko errespetuaren printzipioak bermatu beharko ditu une oro. 5 egun balioduneko epea emango da erabaki horri buruzko alegazioak aurkezteko.

Alegazioak ebatzi ondoren, proba 5 egun baliodunetik beherako epean egingo da.

Memoriaren azken kalifikazioa proba osagarriaren emaitzaren arabera aldatzen ahal da, epaimahaiak aldez aurretik ezarritako irizpideen arabera.

4.–Hautagai bakarra dagoenean eta deialdia baino lehenagoko bi urteetan lanpostuan etenik gabe jardun duenean, lanpostua automatikoki esleituko zaio, hurrengo artikuluan ezarritako baldintzetan.

5.–Burutzak betetzeko lehiaketak kalifikatzeko ardura daukaten epaimahaiak honela osatuta egongo dira:

–Epaimahaiburua: NUPeko Kudeatzailetzaren titularra, edo bete nahi den burutzari dagokion unitate organikoaren ardura daukan errektoreordea edo hark eskuordetutako pertsona.

–Epaimahaikidea: Teknikarien eta Kudeaketako eta Administrazioko eta Zerbitzuetako Langileen Batzordeak izendatua.

–Epaimahaikide-idazkaria: bete nahi den burutzari dagokion unitate organikoaren ardura daukan zerbitzuko zuzendaria. Zerbitzu bati atxikiak ez dauden burutzen kasuan, Giza Baliabideen Zerbitzuko zuzendaria edo hark eskuordetutako pertsona arituko da epaimahaikide-idazkari.

6.–Aurrekoari kalterik egin gabe, bulegoburutzak bitarteko gisa betetzen ahalko dira, organo eskudunak egindako izendapenaren bidez, eta nahitaez Nafarroako Unibertsitate Publikokoak diren edo hari atxikiak dauden funtzionarioek bete beharko dute kargu hori, Nafarroako Administrazio Publikoen Zerbitzuko Langileen Estatutuan xedatutakoaren arabera.

7.–Atal batean lanpostu bat baino gehiago badaude ingeleseko C1 mailako edo euskarako C1 mailako hizkuntza-eskakizuna dutenak, 1,5ekin biderkatuko da dagokion hizkuntza jakiteagatik esleitutako puntuazioa, merezimenduen baremoetako c) atalean ezarria."

8) 13. artikulua aldatu da, eta honela idatzita geldituko da:

"13. artikulua. Lehiaketa bidez betetako burutzetan jardutea.

1.–Merezimendu-lehiaketa bidez eskuratutako burutzan jarduteko aldia sei urte naturalekoa izango da. Aldi hori amaitzen denean, eta berariazko izendapen baten beharrik gabe, funtzionarioak burutza horretan bitarteko gisa jarduten jarraituko du, beste merezimendu-lehiaketa baten bidez betetzen den arte. Lehiaketa horren deialdia urtebeteko epean egin beharko da, gehienez, erakunde eskudunak bitarteko beste funtzionario bat izendatzeko aukera galarazi gabe.

2.–Burutza baten titulartasuna merezimendu-lehiaketa bidez eskuratzen duen pertsonak ezingo du bestelako burutza bat betetzeko ezein merezimendu-lehiaketara aurkeztu, hiru urte naturaleko aldia igaro arte.

Muga hori aplikatuko da, halaber, titularrak burutzari uko egiten badio, izendatzean ezarritako epea amaitu aurretik.

3.–Merezimendu-lehiaketa bidez eskuratutako burutza baten funtzionario titularrak jarduna utziko du kasu hauetan, burutza gordetzeko eskubiderik gabe eta dagozkion ordainsariak galduz:

–Sei urte naturaleko aldia igaro ondoren.

–Unitate organikoa kentzeagatik, Nafarroako Unibertsitate Publikoaren egitura organikoa aldatzearen ondorioz.

–Berariaz uko egiten badu.

–Bat-bateko arrazoiengatik, zeinen eragilea izan baitaiteke bai burutzan jarduteko gaitasunik eza edo egokitu ezina –burutzari esleitzen zaizkion eginkizunak modu eraginkorrean betetzeko errendimendu txikiegiak hala adierazia–, bai haren edukiaren aldaketa, interesdunari entzun eta gero eta Teknikarien eta Kudeaketako eta Administrazioko eta Zerbitzuetako Langileen Batzordeak txostena egin eta gero.

–Zerbitzu berezietara edo eszedentzia egoerara pasatzen bada, bai boluntariora eta bai nahitaezko edo berezira.

–Zigorra ezartzeagatik, diziplina espediente bidez, hutsegite larri edo oso larri baten ondorioz, edo gaitasungabetze zigorra jasotzeagatik prozesu penal batean.

–Funtzionarioen artetik izendapen libreko lanpostu baterako izendatzen badute.

–Zerbitzu eginkizunetan aritzeko postu bat ematen badiote, bai Nafarroako Unibertsitate Publikoaren barruan, bai beste edozein administrazio publikotan."

9) Xedapen gehigarri bakarra aldatu da, eta honela idatzita geldituko da:

"Xedapen gehigarri bakarra.–Deialdien egutegia.

Unibertsitateak merezimendu-lehiaketako deialdien egutegi bat egingo du, eta sei urteko urte anitzeko aldian deitu beharreko lanpostuak jasoko ditu. Egutegi hori urtero eguneratzen ahalko da."

10) Bigarren xedapen iragankorra aldatu da, eta honela idatzita geldituko da:

"Bigarren xedapen iragankorra.–1984ko abuztuaren 2ko 30/1984 Legearekin bat etorriz bete behar diren burutzak.

Egungo titularrek burutzak betetzen jarraitzen duten bitartean, Arautegiko VI. eranskinean adierazitako burutzen kasuan ez da aplikagarria izango burutzak betetzeari buruzko Arautegi honetan ezarritakoa, horiek guztiek merezimendu-lehiaketak izango baitituzte, 1984ko abuztuaren 2ko 30/1984 Legean eta bere garapen araudian ezarritakoaren arabera. Edozein arrazoirengatik lanpostu hutsak gelditzen direnean, horiek Arautegi honetan araututako erregimen orokorraren arabera beteko dira."

11) I. eranskina aldatu da, eta honela idatzita geldituko da:

"I. ERANSKINA.–MEREZIMENDUEN BAREMOA LEKUALDATZE-LEHIAKETETARAKO

a) Administrazio publikoetan emandako zerbitzuak: 30 puntu gehienez ere.

Administrazio publikoetan emandako zerbitzuen balorazioa egiteko, dagokion deialdia argitaratzean aitortutako antzinatasuna hartuko da aintzat, eta urte bakoitzak puntu bat balioko du.

Oharra a) atalari buruz: urte kopurua osoa ez bada, zerbitzualdiari proportzioan dagzokion puntuazioa esleituko zaio.

b) Prestakuntza, irakaskuntza eta ikerketa: 10 puntu gehienez ere.

Oharra b) atalari buruz: atal honetan, deialdiko lanpostuarekin zerikusia duten merezimenduak besterik ez da aintzat hartuko.

b.1. Erakunde edo zentro publikoek eta unibertsitateek antolatutako prestakuntza-jardueretan parte hartu izana: 0,10 puntu kreditu akademiko edo horren baliokide bakoitzeko (10 ikastordu); 7 puntu gehienez ere.

Oharrak b.1. atalari buruz:

1.–Baloratu beharreko prestakuntza-jardueretako ikastorduen zatikiak hainbanatuko dira.

2.–Ikastorduen kopurua adierazten ez duten ziurtagiriak kreditu batekotzat hartuko dira.

3.–Ikasturte bateko iraupena adierazten duten ziurtagiriak 12 kreditukotzat hartuko dira.

4.–Puntuazio berarekin baloratuko da prestakuntza-jardueretan parte hartu izana baldin eta, erakunde antolatzailearen baldintzak bete ez arren, Administrazioaren aginduz egin badira edo Administrazioak baliozkotu baditu. Horien artean espresuki sartuko dira sindikatuek administrazio publikoen Etengabeko Prestakuntza Akordioen barnean antolatutakoak.

5.–Titulu akademiko bat eskuratzeko ikasketak, nola unibertsitarioak hala unibertsitatez kanpokoak, ez dira atal honetan baloratuko.

b.2. Biltzar edo jardunaldietan txostenak edo komunikazioak aurkeztu izana, beka edo saria jaso duten zientzia- edo ikerketa-lanak egin izana eta aldizkari espezializatuetan lanak argitaratu izana: 2 puntu gehienez ere, epaimahaiak baloratu beharrekoak, betiere kontuan harturik lana edo jarduera bakarka edo taldean egina den eta biltzarrak edo argitalpenak nolako maila duen, hots, lokala, eskualdekoa, nazionala edo nazioartekoa.

b.3. Sektore publikoan prestakuntza-saioak antolatzea edo halakoetan irakasle aritzea: 2 puntu gehienez, epaimahai kalifikatzaileak baloratu beharrekoa jardueren iraunaldiaren arabera.

c) Puntuazioa hizkuntzak jakiteagatik.

c.1. Merezimenduen baremo guztietan, baloratu beharreko merezimendu gisa gehituko da frantsesa, ingelesa edo alemana jakitea, Europar Batasuneko hizkuntza ofizialak baitira. Bakoitzarengatik gehienez ere 2 puntu emango dira.

c.2. Merezimenduen baremoetan baloratu beharreko merezimendu gisa gehituko da euskara jakitea, Nafarroako Administrazio Publikoetan euskararen erabilera arautzen duen araudiarekin bat etorriz, eta gehienez ere 2,76 puntu emango dira.

Oharrak c) atal osoari buruz:

1.–Hizkuntzetarako Europako Erreferentzia Esparru Bateratuaren C1 mailaren baliokidea den ezagutza-maila egiaztatzen duen titulu edo ziurtagiri bat duenak gehieneko balorazioa eskuratuko du.

2.–Titulazio edo ziurtagiri hori ez badu, gehieneko puntuazioaren 1/5 emango zaio Hizkuntzetarako Europako Erreferentzia Esparru Bateratuaren A1 mailaren baliokidea den titulu edo ziurtagiri bat duenari, 2/5 A2 mailaren baliokidea duenari, 3/5 B1 mailaren baliokidea duenari, eta 4/5 B2 mailaren baliokidea duenari."

12) II. eranskina aldatu da, eta honela idatzita geldituko da:

"II. ERANSKINA.–MEREZIMENDUEN BAREMOA ATALBURUTZAK BETETZEKO LEHIAKETETARAKO

a) Administrazio publikoetan emandako zerbitzuak: 25 puntu gehienez ere.

a.1. Edozein administrazio publikotan emandako zerbitzuak, deialdian eskatzen diren maila/talde eta titulazio bereko edo altuagoko lanpostuetan: 2 puntu urte bakoitzeko.

a.2. Edozein administrazio publikotan emandako zerbitzuak, aurrekoetan ez bezalako lanpostuetan: 0,75 puntu urte bakoitzeko.

Oharra a) atalari buruz: urte kopurua osoa ez bada, zerbitzualdiari proportzioan dagokion puntuazioa esleituko zaio.

b) Prestakuntza, irakaskuntza, ikerketa eta beste merezimendu batzuk: 15 puntu gehienez ere.

Oharra b) atalari buruz: atal honetan, deialdiko lanpostuarekin zerikusia duten merezimenduak besterik ez da aintzat hartuko.

b.1. Erakunde edo zentro publikoek eta unibertsitateek antolatutako prestakuntza-jardueretan parte hartu izana: 0,10 puntu kreditu akademiko edo horren baliokide bakoitzeko (10 ikastordu); 10 puntu gehienez. Prestakuntza lantaldeen zuzendaritzari buruzkoa bada, edo burutza bat betetzeko berariazko prestakuntza bada, 0,20 puntu emango dira kreditu akademiko edo horren baliokide bakoitzeko.

Oharrak b.1. atalari buruz:

1.–Baloratu beharreko prestakuntza-jardueretako ikastorduen zatikiak hainbanatuko dira.

2.–Ikastorduen kopurua adierazten ez duten ziurtagiriak kreditu batekotzat hartuko dira.

3.–Ikasturte bateko iraupena adierazten duten ziurtagiriak 12 kreditukotzat hartuko dira.

4.–Puntuazio berarekin baloratuko da prestakuntza-jardueretan parte hartu izana baldin eta, erakunde antolatzailearen baldintzak bete ez arren, Unibertsitatearen aginduz egin badira edo Unibertsitateak baliozkotu baditu. Horien artean espresuki sartuko dira sindikatuek administrazio publikoen Etengabeko Prestakuntza Akordioen barnean antolatutakoak.

5.–Titulu akademiko bat eskuratzeko ikasketak, nola unibertsitarioak hala unibertsitatez kanpokoak, ez dira atal honetan baloratuko.

b.2. Biltzar edo jardunaldietan txostenak edo komunikazioak aurkeztu izana, beka edo saria jaso duten zientzia- edo ikerketa-lanak egin izana eta aldizkari espezializatuetan lanak argitaratu izana: 3 puntu gehienez ere, epaimahaiak baloratu beharrekoak, betiere kontuan harturik lana edo jarduera bakarka edo taldean egina den eta biltzarrak edo argitalpenak nolako maila duen, hots, lokala, eskualdekoa, nazionala edo nazioartekoa.

b.3. Sektore publikoan prestakuntza-saioak antolatzea edo halakoetan irakasle aritzea: 3 puntu gehienez, epaimahai kalifikatzaileak baloratu beharrekoa jardueren iraunaldiaren arabera.

b.4. Beste titulazio eta espezialitate akademiko batzuk, deialdian eskatzen denaren maila berekoak edo altuagokoak: 1,5 puntu emango dira haietako bakoitzeko, eta 3 puntu gehienez.

b.5. 1,5 puntu emango dira lizentzia edo graduondokoa izategatik, eta 2 puntu doktoretza izateagatik, betiere deialdian eskatutako titulazioari buruzkoa bada: 2 puntu gehienez ere.

b.6. Bestelako merezimenduak, epaimahaiak baloratu beharrekoak, hala nola sektore pribatuko lanak, bekak edo prestakuntza-egonaldiak, edo kontsultako, aholkularitzako, partaidetzako edo ordezkaritzako organoetan parte hartu izana: 2 puntu gehienez ere.

c) Puntuazioa hizkuntzak jakiteagatik: 10 puntu gehienez.

c.1. Merezimenduen baremo guztietan, baloratu beharreko merezimendu gisa gehituko da frantsesa, ingelesa edo alemana jakitea, Europar Batasuneko hizkuntza ofizialak baitira. Bakoitzarengatik gehienez ere 5 puntu emango dira.

c.2. Merezimenduen baremoetan baloratu beharreko merezimendu gisa gehituko da euskara jakitea, Nafarroako Administrazio Publikoetan euskararen erabilera arautzen duen araudiarekin bat etorriz, eta gehienez ere 6,9 puntu emango dira.

Oharrak c) atal osoari buruz:

1.–Hizkuntzetarako Europako Erreferentzia Esparru Bateratuaren C1 mailaren baliokidea den ezagutza-maila egiaztatzen duen titulu edo ziurtagiri bat duenak gehieneko balorazioa eskuratuko du.

2.–Titulazio edo ziurtagiri hori ez badu, gehieneko puntuazioaren 1/5 emango zaio Hizkuntzetarako Europako Erreferentzia Esparru Bateratuaren A1 mailaren baliokidea den titulu edo ziurtagiri bat duenari, 2/5 A2 mailaren baliokidea duenari, 3/5 B1 mailaren baliokidea duenari, eta 4/5 B2 mailaren baliokidea duenari."

13) Oraingo III. eranskina VI. eranskina izango da.

14) III. eranskina honela idatzita geldituko da:

"III. ERANSKINA.–MEREZIMENDUEN BAREMOA BULEGOBURUTZAK BETETZEKO LEHIAKETETARAKO

a) Administrazio publikoetan emandako zerbitzuak: 25 puntu gehienez ere.

a.1. Edozein administrazio publikotan emandako zerbitzuak, deialdian eskatzen diren mailako/taldeko eta titulazioko lanpostuetan: 2 puntu urte bakoitzeko.

a.2. Edozein administrazio publikotan emandako zerbitzuak, aurrekoetan ez bezalako lanpostuetan: 0,75 puntu urte bakoitzeko.

Oharra a) atalari buruz: urte kopurua osoa ez bada, zerbitzualdiari proportzioan dagokion puntuazioa esleituko zaio.

b) Prestakuntza, irakaskuntza, ikerketa eta beste merezimendu batzuk: 20 puntu gehienez ere.

Oharra b) atalari buruz: atal honetan, deialdiko lanpostuarekin zerikusia duten merezimenduak besterik ez da aintzat hartuko.

b.1. Erakunde edo zentro publikoek eta unibertsitateek antolatutako prestakuntza-jardueretan parte hartu izana: 0,10 puntu kreditu akademiko edo horren baliokide bakoitzeko (10 ikastordu); 10 puntu gehienez. Prestakuntza lantaldeen zuzendaritzari buruzkoa bada, edo burutza bat betetzeko berariazko prestakuntza bada, 0,15 puntu emango dira kreditu akademiko edo horren baliokide bakoitzeko.

Oharrak b.1. atalari buruz:

1.–Baloratu beharreko prestakuntza-jardueretako ikastorduen zatikiak hainbanatuko dira.

2.–Ikastorduen kopurua adierazten ez duten ziurtagiriak kreditu batekotzat hartuko dira.

3.–Ikasturte bateko iraupena adierazten duten ziurtagiriak 12 kreditukotzat hartuko dira.

4.–Puntuazio berarekin baloratuko da prestakuntza-jardueretan parte hartu izana baldin eta, erakunde antolatzailearen baldintzak bete ez arren, Unibertsitatearen aginduz egin badira edo Unibertsitateak baliozkotu baditu. Horien artean espresuki sartuko dira sindikatuek administrazio publikoen Etengabeko Prestakuntza Akordioen barnean antolatutakoak.

5.–Titulu akademiko bat eskuratzeko ikasketak, nola unibertsitarioak hala unibertsitatez kanpokoak, ez dira atal honetan baloratuko.

b.2. Sektore publikoan prestakuntza-saioak antolatzea edo halakoetan irakasle aritzea: 3 puntu gehienez, epaimahai kalifikatzaileak baloratu beharrekoa jardueren iraunaldiaren arabera.

b.3. Beste titulazio eta espezialitate akademiko batzuk, deialdian eskatzen denaren maila berekoak edo altuagokoak: 1,5 puntu emango dira haietako bakoitzeko, eta 3 puntu gehienez.

b.4. Lizentzia, graduondokoa edo doktoretza, deialdian eskatutako titulazioari buruzkoa: 2 puntu gehienez ere.

b.5. Bestelako merezimenduak, epaimahaiak baloratu beharrekoak, hala nola sektore pribatuko lanak, bekak edo prestakuntza-egonaldiak, edo kontsultako, aholkularitzako, partaidetzako edo ordezkaritzako organoetan parte hartu izana: 2 puntu gehienez ere.

c) Puntuazioa hizkuntzak jakiteagatik: 10 puntu gehienez.

c.1. Merezimenduen baremo guztietan, baloratu beharreko merezimendu gisa gehituko da frantsesa, ingelesa edo alemana jakitea, Europar Batasuneko hizkuntza ofizialak baitira. Bakoitzarengatik gehienez ere 5 puntu emango dira.

c.2. Merezimenduen baremoetan baloratu beharreko merezimendu gisa gehituko da euskara jakitea, Nafarroako Administrazio Publikoetan euskararen erabilera arautzen duen araudiarekin bat etorriz, eta gehienez ere 6,9 puntu emango dira.

Oharrak c) atal osoari buruz:

1.–Hizkuntzetarako Europako Erreferentzia Esparru Bateratuaren C1 mailaren baliokidea den ezagutza-maila egiaztatzen duen titulu edo ziurtagiri bat duenak gehieneko balorazioa eskuratuko du.

2.–Titulazio edo ziurtagiri hori ez badu, gehieneko puntuazioaren 1/5 emango zaio Hizkuntzetarako Europako Erreferentzia Esparru Bateratuaren A1 mailaren baliokidea den titulu edo ziurtagiri bat duenari, 2/5 A2 mailaren baliokidea duenari, 3/5 B1 mailaren baliokidea duenari, eta 4/5 B2 mailaren baliokidea duenari."

15) IV. eranskina gehitu da, eta honela idatzita geldituko da:

"IV. ERANSKINA.–MEMORIAREN EGITURA ETA PUNTUAZIOEN BAREMOA ATALBURUTZAK BETETZEKO LEHIAKETETARAKO

Memoriak honako hauek izango ditu:

a) Sarrera, aurrekariak eta Unitatearen egungo egoera. (5 puntu gehienez).

b) Unitateko burutzaren eginkizunen analisia. (12,5 puntu gehienez).

c) Eginkizunak betetzeko beharrezkoak diren betekizun, baldintza eta bitartekoak. (5 puntu gehienez).

d) Antolaketa tekniko-administratiboa. (5 puntu gehienez).

e) Unitatearen aurrekonturako proposamena. (5 puntu gehienez).

f) Hobekuntzarako proposamena eta plana hurrengo sei urteetarako. (7,5 puntu gehienez).

Memoriak 50 orrialde izango ditu gehienez ere. Epaimahaiak ez ditu balorazioan kontuan hartuko kopuru hori gainditzen duten orrialdeak.

Aurkezpenaren eta defentsaren puntuazioen baremoa.

a) Aurkezpenaren argitasuna eta antolaketa: 4 puntu gehienez.

b) Egokitasuna eta zehaztasuna epaimahaiari emandako erantzunetan: 6 puntu gehienez."

16) V. eranskina gehitu da, eta honela idatzita geldituko da:

"V. ERANSKINA.–MEMORIAREN EGITURA ETA PUNTUAZIOEN BAREMOA BULEGOBURUTZAK BETETZEKO LEHIAKETETARAKO

Memoriak honako hauek izango ditu:

a) Sarrera, aurrekariak eta Unitatearen egungo egoera. (5 puntu gehienez).

b) Unitateko burutzaren eginkizunen analisia. (15 puntu gehienez).

c) Eginkizunak betetzeko beharrezkoak diren betekizun, baldintza eta bitartekoak. (5 puntu gehienez).

d) Antolaketa tekniko-administratiboa. (10 puntu gehienez).

e) Hobekuntzarako proposamena eta plana hurrengo sei urteetarako. (10 puntu gehienez).

Memoriak 30 orrialde izango ditu gehienez ere. Epaimahaiak ez ditu balorazioan kontuan hartuko kopuru hori gainditzen duten orrialdeak."

Bigarrena.–Argitalpena.

Erabaki hau Nafarroako Unibertsitate Publikoaren iragarki ohol elektroniko ofizialean eta Nafarroako Aldizkari Ofizialean argitaratuko dira.

Hirugarrena.–Indarra hartzea.

Erabaki honek Nafarroako Unibertsitate Publikoaren iragarki ohol elektroniko ofizialean argitaratu eta biharamunean hartuko du indarra.

Laugarrena.–Hedapena.

Akordio hau Kudeatzailetzari eta Giza Baliabideen Zerbitzuari helaraziko zaie.

Bosgarrena.–Errekurtsoak.

Erabaki honen aurka, zilegi da administrazioarekiko auzi-errekurtsoa jartzea, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat."

Iruñean, 2026ko otsailaren 17an.–Errektorea, Ramón Gonzalo García.

Iragarkiaren kodea: F2603019