Iragarkia

44. ALDIZKARIA - 2026ko martxoaren 2a

1. NAFARROAKO FORU KOMUNITATEA

1.7. BESTELAKOAK

30/2026 EBAZPENA, otsailaren 4koa, Enpresen Sustapenerako eta Azpiegituretako zuzendari nagusiak emana, ukatzen dituena aurretiazko administrazio baimenak eta eraikitzeko baimenak "Galera 4", "Cote 5", "La Casa de Palo 2", "Azafea 3" eta "Margarita 3" izeneko parke eolikoetarako (4,99 Mw-ekoa bakoitza) eta haien eraldaketa eta ebakuazio azpiegituretarako, Oibar, Leatxe eta Zangozako udal mugarteetan. Espediente kodeak: 1311-CE, 1312-CE, 1313-CE, 1314-CE eta 1315-CE.

1.–Aurretiazko administrazio baimenen eta eraikitzeko administrazio baimenen eskaerak.

2024ko maiatzaren 14an, Nafarroan haize parkeetarako baimena arautzen duen maiatzaren 8ko 56/2019 Foru Dekretuan ezarritakoa aplikatuz, Enigma Green Power 21 SLU, Enigma Green Power 22 SLU, Enigma Green Power 23 SLU, Enigma Green Power 24 SLU eta Enigma Green Power 25 SLU entitate sustatzaileek aurretiazko administrazio baimenak eta eraikitzeko administrazio baimenak eskatu zituzten Oibar, Leatxe eta Zangozako udal mugarteetan ezarri nahi diren "Galera 4", "Cote 5", "La Casa de Palo 2", "Azafea 3" eta "Margarita 3" izeneko parke eolikoetarako (4,99 Mw-ekoa bakoitza) eta haien eraldaketa eta ebakuazio azpiegituretarako.

Geroago, sustatzaileek proiektuen dokumentazio teknikoa osatu zuten 2025eko irailaren 2an eta urriaren 17an erregistratutako agiri gehiago aurkeztuta.

2.–Jendaurreko informazioaren eta kontsulten izapideak.

Bat etorriz maiatzaren 8ko 56/2019 Foru Dekretuaren 7. artikuluan jasotakoarekin, proiektuak eta ingurumen inpaktuaren azterketak jendaurrean jarri ziren, 30 egunez, iragarki bat argitaratuta 2025eko 225. Nafarroako Aldizkari Ofizialean, azaroaren 11koan, eta Diario de Navarra eta Diario de Noticias egunkarietan (2025eko azaroaren 12an), eta dokumentazioa Nafarroako Gobernu Irekiaren dagokion web-orrian argitaratu zen. Era berean, informazioa ukitutako udalei igorri zitzaien, jendaurrean jar zezaten epe berean.

Erakunde hauen alegazioak jaso ziren:

–Joluga Energy SLU.

–María Esperanza García Arbeloa andrea.

–Sustrai Erakuntza fundazioa.

–Ongaiz-Zangozerriko Ekologistak Martxan elkartea.

Aldi berean, eta maiatzaren 8ko 56/2019 Foru Dekretuaren 8. eta 15. artikuluetan ezarritakoa aplikatuz, kontsulta egin zitzaien taulan zerrendatzen diren erakundeei, eta horietatik 8k bidali zuten txostena.

Ebazpen honen xede diren espedienteetan dago alegazio eta txostenen edukia.

3.–Atzera egitea eta berme ekonomikoak itzultzeko eskaera.

Ingurumeneko zuzendari nagusiaren abuztuaren 25eko 948E/2025 Ebazpenaren bidez, "As de Guía 3", "Ballestrinque 3", "Ballinger 3", "Carabela 3" eta "Carraca 3" izeneko parke eolikoen ingurumen-inpaktuaren adierazpen ezezkoa egin zen, baita haien eraldaketa eta ebakuaziorako azpiegiturena ere, zeinak "Galera 4", "Cote 5", "La Casa de Palo 2", "Azafea 3" eta "Margarita 3" izeneko parke eolikoetarako azpiegiturak ere badiren.

Aurrekoa ikusirik, 2025eko azaroren 14an, enpresa sustatzaileek jakinarazi zuten ez zutela jarraituko espedienteekin eta eskatu zuten sarbide eta konexio baimenei lotutako berme ekonomikoak itzultzeko.

4.–Aurretiazko administrazio baimenak eta eraikitzeko administrazio baimenak ukatzeko proposamena.

Aurkeztutako dokumentazioa ikusirik, eta bost espedienteen azterketa teknikoa egin ondoren, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak proposatzen du espediente horiek ebaztea eta eskatutako aurretiazko administrazio baimenak eta eraikitzeko baimenak ukatzea.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 57. artikuluaren arabera, aurkeztutako eskaerak funtsean berdinak direnez, bidezkoa da eskaera horiek metatzea baimenak ukatzeko ebazpenean.

Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Ukatzea aurretiazko administrazio baimenak eta eraikitzeko baimenak Oibar, Leatxe eta Zangozako udal mugarteetan ezarri nahi diren "Galera 4", "Cote 5", "La Casa de Palo 2", "Azafea 3" eta "Margarita 3" izeneko parke eolikoetarako eta haien eraldaketa eta ebakuazio azpiegituretarako.

2. Diruzaintza Atalari proposatzea sarbide eta konexio prozedurekin lotutako bost bermeak itzultzeko. Abal gordailuaren frogagiriak eta itzulketa eginbideenak ebazpen honen eranskinetan daude.

3. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzuari, Ingurumen Ebaluazioaren Atalari, Paisaiaren eta Landa-lurzoruaren Atalari, Ustiapen Atalari, Herri-lurren Atalari, Ondare Arkitektonikoaren Atalari, Erregistroaren, Ondasun Higigarrien eta Arkeologiaren Atalari eta Gobernu Irekiaren eta Herritarrentzako Arretaren Zerbitzuari.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea honako hauei: Enigma Green Power 21 SLU, Enigma Green Power 22 SLU, Enigma Green Power 23 SLU, Enigma Green Power 24 SLU eta Enigma Green Power 25 SLU, Joluga Energy SLU, María Esperanza García Arbeloa andrea, Sustrai Erakuntza fundazioa, Ongaiz-Zangozerriko Ekologistak Martxan elkartea, Nafarroako Ekologistak Martxan elkartea, Espainiako Ornitologia Elkartea (SEO Birdlife), I-DE Redes Eléctricas Inteligentes SAU, Red Eléctrica de España SAUko Operazioetako eta Sistemaren Garapeneko zuzendaritzak, Enagás Transporte SAU, Nedgia Navarra SA, Acciona Generación Renovable, Helisolar, Viscofan, Smurfit Kappa, Vodafone Ono, Nasertic eta Retevisión I SAU; ohartaraztea, halaber, ebazpen honek ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, jakinarazi eta biharamunetik hasita. Errekurtsoan espediente kodea adierazi beharko da.

6. Ebazpen hau jakinaraztea Oibarko, Leatxeko eta Zangozako udalei, Trantsizio Ekologikorako eta Erronka Demografikorako Ministerioari, Ebroko Konfederazio Hidrografikoari, Aire Segurtasuneko Estatu Agentziari, Done Jakue Kontseiluari eta Zangozako Mankomunitateari, eta ohartaraztea haren kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzenduta, bi hilabeteko epean, galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko otsailaren 4an.–Enpresen Sustapenerako eta Azpiegituretako zuzendari nagusia, Iñigo Arruti Torre.

Iragarkiaren kodea: F2601862