Iragarkia

44. ALDIZKARIA - 2026ko martxoaren 2a

1. NAFARROAKO FORU KOMUNITATEA

1.7. BESTELAKOAK

29/2026 EBAZPENA, otsailaren 4koa, Enpresen Sustapenerako eta Azpiegituretako zuzendari nagusiak emana, ukatzen dituena aurretiazko administrazio baimenak "Mar Adriático", "Mar Caspio", "Mar Egeo", "Mar Báltico" eta "Mar Mediterráneo" izeneko parke eolikoetarako (4,99 Mw-ekoa bakoitza) eta haien eraldaketa eta ebakuazio azpiegituretarako, Corella, Cintruénigo eta Tuterako udal mugarteetan. Espedientearen kodeak: 1294-CE, 1295-CE, 1296-CE, 1297-CE eta 1298-CE.

1.–Aurretiazko administrazio baimenen eskaerak.

2024ko otsailaren 8an, Nafarroan haize parkeetarako baimena arautzen duen maiatzaren 8ko 56/2019 Foru Dekretuan ezarritakoa aplikatuz, Savanna Power Solar 14 SLU, Savanna Power Solar 15 SLU, Savanna Power Solar 16 SLU, Savanna Power Solar 17 SLU eta Savanna Power Solar 18 SLU entitate sustatzaileek aurretiazko administrazio baimenak eskatu zituzten Corella, Cintruénigo eta Tuterako udal mugarteetan ezarri nahi diren "Mar Adriático", "Mar Caspio", "Mar Egeo", "Mar Báltico" eta "Mar Mediterráneo" izeneko parke eolikoetarako (4,99 Mw-ekoa bakoitza) eta haien eraldaketa eta ebakuazio azpiegituretarako.

Geroago, 2025eko abuztuaren 21ean, sustatzaileek eskaera egin zuten espedientean dokumentazio berria sartzeko.

2.–Jendaurreko informazioaren eta kontsulten izapideak.

Bat etorriz maiatzaren 8ko 56/2019 Foru Dekretuaren 7. artikuluan jasotakoarekin, aurreproiektuak eta ingurumen inpaktuaren azterketak jendaurrean jarri ziren, 30 egunez, iragarki bat argitaratuta 2025eko 200. Nafarroako Aldizkari Ofizialean, urriaren 7koan, eta Diario de Navarra eta Diario de Noticias egunkarietan (2025eko urriaren 8an), eta dokumentazioa Nafarroako Gobernu Irekiaren dagokion web-orrian argitaratu zen. Era berean, informazioa ukitutako udalei igorri zitzaien, jendaurrean jar zezaten epe berean.

Erakunde hauen alegazioak jaso ziren:

–Herri-lurren Atala.

–Corellako Udala.

–TotalEnergies.

–Eólica Montes de Cierzo.

–Gurelur elkartea.

–Sustrai Erakuntza fundazioa.

–Ongaiz-Zangozerriko Ekologistak Martxan elkartea.

–Landazuria-Erriberako Ekologistak Martxan elkartea.

Aldi berean, eta maiatzaren 8ko 56/2019 Foru Dekretuaren 8. artikuluan ezarritakoa aplikatuz, kontsulta egin zitzaien taulan zerrendatzen diren erakundeei, eta horietatik 8k bidali zuten txostena:

Ebazpen honen xede diren espedienteetan dago alegazio eta txostenen edukia.

Nafarroan haize parkeetarako baimenak arautzen dituen maiatzaren 8ko 56/2019 Foru Dekretuaren 9. artikuluari jarraikiz, 2025eko azaroaren 20an parke eolikoen sustatzaileei igorri zitzaizkien aipatu txostenak eta alegazioak.

3.–Atzera egitea eta berme ekonomikoak itzultzeko eskaera.

Ingurumen Ebaluaziorako Atalak egindako txostenak adierazten du proiektuak eginez gero talka egiteko arriskua, hutsaren efektua eta oztopo efektua sortuko liratekeela, besteak beste, eta horrek ondorio kaltegarri nabarmenak eraginen lituzkeela intereseko hegazti faunaren espezie katalogatu batzuengan. Inpaktu horiek are handiagoak izanen lirateke inguruan dauden beste parke eoliko batzuekin sortuko liratekeen metatze-efektu eta efektu sinergikoengatik.

Aurrekoa ikusirik, 2026ko urtarrilaren 15ean, sustatzaileek jakinarazi zuten ez zutela jarraituko espedienteekin eta eskatu zuten sarbide eta konexio baimenei lotutako berme ekonomikoak itzultzeko; izan ere, haien iritziz, txosten horrek baldintzatzen du proiektuen garapena eta eraikuntza, eta bideragarritasunik gabe uzten ditu.

4.–Aurretiazko administrazio baimenak ukatzeko proposamena.

Aurrekoa kontuan harturik, eta zortzi espedienteen azterketa teknikoa egin ondoren, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak proposatzen du espediente horiek ebaztea eta eskatutako aurretiazko administrazio baimenak ukatzea.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 57. artikuluaren arabera, aurkeztutako eskaerak funtsean berdinak direnez, bidezkoa da eskaera horiek metatzea baimenak ukatzeko ebazpenean.

Adierazitakoarekin eta espedientean jasotako agiriekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabilita,

EBAZTEN DUT:

1. Ukatzea aurretiazko administrazio baimenak "Mar Adriático", "Mar Caspio", "Mar Egeo", "Mar Báltico" eta "Mar Mediterráneo" izeneko parke eolikoetarako (4,99 Mw-ekoa bakoitza) eta haien eraldaketa eta ebakuazio azpiegituretarako, Corella, Cintruénigo eta Tuterako udal mugarteetan.

2. Diruzaintza Atalari proposatzea sarbide eta konexio prozedurekin lotutako bost bermeak itzultzeko. Abal gordailuaren frogagiriak eta itzulketa eginbideenak ebazpen honen eranskinetan daude.

3. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzura, Ingurumen Ebaluaziorako Atalera, Paisaiaren eta Landa-lurzoruaren Atalera, Ustiapen Atalera, Herri-lurren Atalera, Ondare Arkitektonikoaren Atalera, Erregistroaren, Ondasun Higigarrien eta Arkeologiaren Atalera, Gobernu Irekiaren eta Herritarrentzako Arretaren Zerbitzura, eta Ekonomia eta Ogasun Departamentuko Ekonomia eta Finantza Zerbitzuko Diruzaintza Atalera.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea honako hauei: Savanna Power Solar 14 SLU, Savanna Power Solar 15 SLU, Savanna Power Solar 16 SLU, Savanna Power Solar 17 SLU, Savanna Power Solar 18 SLU, TotalEnergies, Eólica Montes de Cierzo SLU, Gurelur elkartea, Sustrai Erakuntza fundazioa, Ongaiz-Zangozerriko Ekologistak Martxan elkartea, Landazuria-Erriberako Ekologistak Martxan elkartea, Nafarroako Ekologistak Martxan elkartea, Espainiako Ornitologia Elkartea (SEO Birdlife), I-DE Redes Eléctricas Inteligentes SAU, Red Eléctrica de España SAUko Operazioetako eta Sistemaren Garapeneko zuzendaritzak eta Enagás Transporte SAU; ohartaraztea, halaber, ebazpen honek ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, jakinarazi eta biharamunetik hasita. Errekurtsoan espediente kodea adierazi beharko da.

6. Ebazpen hau jakinaraztea Corella, Cintruénigo eta Tuterako udalei, Trantsizio Ekologikorako eta Erronka Demografikorako Ministerioari, Ebroko Konfederazio Hidrografikoari eta Aire Segurtasuneko Estatu Agentziari, eta ohartaraztea haren kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzenduta, bi hilabeteko epean, galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko otsailaren 4an.–Enpresen Sustapenerako eta Azpiegituretako zuzendari nagusia, Iñigo Arruti Torre.

Iragarkiaren kodea: F2601861