Iragarkia

40. ALDIZKARIA - 2026ko otsailaren 24a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

11C/2026 EBAZPENA, urtarrilaren 21ekoa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Empark aparcamientos y servicios SA enpresaren hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

Ikusirik Empark aparcamientos y servicios SA enpresak (31101072012016 kodea) aurkeztu duen hitzarmen kolektiboa, 2026ko urtarrilaren 16an erregistro honetan sartu zena eta 2026ko urtarrilaren 9an sinatu zutena enpresaren enpresa eta sindikatu ordezkariek.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan xedatutakoa kontuan hartuta,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Empark aparcamientos y servicios SA enpresak aurkeztutako hitzarmen kolektiboa (kode-zenbakia: 31101072012016).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2026ko urtarrilaren 21ean.–Ekonomia Sozialeko eta Laneko zuzendari nagusia, Iñaki Mendióroz Casallo.

EMPARK APARCAMIENTOS Y SERVICIOS SA-REN HITZARMEN KOLEKTIBOA, 2022KO EKAINAREN 30EKO ALTA DUTEN NAFARROAKO ZENTROETARAKO

1. artikulua. Eremu funtzionala.

Hitzarmen honen xedea da Empark aparcamientos y servicios SA enpresaren eta bere langileen arteko lan harremanak arautzea.

2. artikulua. Lurralde eremua.

Aplikazio eremua izanen dira enpresak Iruñean eta Lizarran orain dituen aparkalekuak. Aparkalekuren bat gehitzen bazaio enpresari Iruñean, aztertuko da hitzarmen honetan sartzeko aukera. Horretarako, beharrezkoa bada, batzorde parekidea bilduko da.

3. artikulua. Eremu pertsonala.

Hitzarmen honen eraginpekoak dira Empark aparcamientos y servicios SA enpresan, aurreko artikuluan aipatutako lurralde eremuan, zerbitzuak ematen dituzten langile guztiak, edozein dela ere haien kategoria profesionala, Langileen Estatutuaren 2. artikuluaren a) apartatuan ezarritako salbuespenekin.

4. artikulua. Indarraldia.

Hitzarmen hau indarrean jarriko da 2025eko urtarrilaren 1ean, ondorio guztietarako, eta 2027ko abenduaren 31ra arte egonen da indarrean.

4. artikuluan aipatutako indarraldia bukatzearekin batera salatuko da hitzarmena, besterik gabe. Beraz, ez da beharrezkoa alderdiek hitzarmena salatzea eskumena duen lan agintaritzari. Era berean, erabakitzen da bi urte eta erdiko aurreraeragin aldia, hitzarmenaren indarraldia amaitzen denetik aurrera.

5. artikulua. Konpentsatzea eta irenstea.

Akordio honetan ezarritako ordainsariek akordioa indarrean jartzen denean dauden guztiak konpentsatu eta irentsiko dituzte, edozein dela ere ordainsari horien izaera edo jatorria.

Orokorrean eta nahitaez aplikatu beharreko legezko xedapenen bidez izaten ahal diren ordainsarien igoerek hitzarmen honetan itundutako baldintza ekonomikoetan izanen dute eragina, baldin eta lehen aipatu diren urte osoko ordainsariak, legez ezarritakoak baitira, hemen itundutakoak baino handiagoak badira.

Bestelako kasuan, hitzarmen honen ondoriozko hobekuntzek irentsiko dituzte legez ezarritakoak.

6. artikulua. Berme pertsonalak.

Ulertzen da hitzarmen honetan ezarritako baldintza guztiak gutxienekoak direla. Hortaz, hitzarmen honek indarra hartzen duenean enpresan dauden baldintzak eta egoerak, langileentzat hobeak badira, oso-osorik errespetatuko dira.

7. artikulua. Nafarroako lan gatazkak auzibidetik kanpo ebazteko lanbide arteko akordioarekiko atxikimendua.

Alderdiek erabakitzen dute Nafarroako Lan Auzitegiak esku hartuko duela hitzarmen kolektibo hau interpretatzean eta aplikatzean sortzen diren gatazka kolektiboak konpontzeko, bai eta langileei eta enpresari eragiten dien beste edozein gatazka konpontzeko ere, adiskidetze eta bitartekaritza faseetan.

Era berean, adierazten dute ahaleginak eginen dituztela alderdiak auzitegi horren arbitraje prozeduraren esanetara jar daitezen.

Beraz, artikulu honek balio du alderdiak gatazkak konpontzeko arbitraje organo horri berariaz atxikitzeko, eraginkortasun osoa duela, eta, ondorioz, itunak enpresa, sindikatuen ordezkariak eta langileak behartzen ditu beren desadostasunak aipatu organoaren bitartekaritza eta adiskidetze prozeduretan azaltzera epaiketara jo aurretik. Hortaz, ez da beharrezkoa alderdien desadostasun edo gatazka bakoitzerako atxikimendu berariazkoa eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

Era berean, hitzarmen kolektibo honen sinatzaileek hitzematen dute ahaleginak eginen dituztela langileen eta enpresaren artean sortzen ahal diren gatazka indibidualak Nafarroako Lan Auzitegiaren aurrean adiskidetze, bitartekotza eta arbitraje prozeduren mendean borondatez eta espresuki jar daitezen, Nafarroako Foru Komunitateko lan gatazkak auzibidetik kanpo ebazteko lanbide arteko akordioaren bigarren xedapen gehigarrian adierazten diren gaietan.

8. artikulua. Batzorde parekidea.

Hitzarmena aplikatzen denean sortzen ahal diren zalantzak eta desadostasunak interpretatu eta konpontzeko, batzorde misto parekidea eratuko da hitzarmenak indarra hartzen duenetik. Batzorde hori osatuko dute langileen bi ordezkarik eta enpresaren bi ordezkarik.

Batzordearen bi alderdietako edozeinek biltzeko eskatuta, gehienez ere 15 eguneko epean bildu beharko da.

Bi alderdien ordezkariak aholkulariek lagunduta joaten ahalko dira bileretara. Aholkulariak enpresatik kanpokoak izaten ahalko dira, ordezkariek libreki izendatuko dituzte eta ahotsa izanen dute, baina botoa ez.

Batzordeak 15 eguneko epea izanen du, biltzen denetik hasita, planteatu zaizkion desadostasunak interpretatu edo konpontzeari buruz erabakitzeko.

Betiere, Langileen Estatutuaren 85.3 e) artikuluan ezarritakoari jarraituko zaio.

Eszedentziei dagokienez, Langileen Estatutuaren 82.3 artikuluan xedatutakoari jarraituko zaio.

Enpresak ezin izanen dio inola ere heldu bere aldetik, hitzarmen hau ez aplikatzeko, Langileen Estatutuaren 82.3 artikuluan ezarritako prozedurari, eta muga-eguna iritsi aurretik negoziatzen saiatu beharko du hasiera batean.

Enpresaren eremuan akordiorik lortzen ez bada, alderdiek berariaz erabakitzen dute desadostasunak konpontzeko jarraituko dituzten prozesuak Nafarroako Lan Auzitegiaren adiskidetze eta bitartekotzakoak izanen direla. Arbitraje prozedura bera aplikatuko da, bakar-bakarrik, bi alderdiak haren menpe jartzeko ados badaude.

Orobat, gaia Aholku Batzorde Nazionalaren edo Autonomikoaren menpe jartzen ahalko da, alderdiak ados badaude.

9. artikulua. Hitzarmena ez aplikatzeko klausula.

Hitzarmenaren indarraldian, hartan dauden itun ekonomikoak errespetatuko dira, eta ez da aukerarik izanen gai ekonomikoei buruzko artikuluak ez aplikatzeko, ezta 22. artikulua ez aplikatzeko ere (aldi baterako ezintasunaren osagarria). Halaber, errespetatuko da urteko gehieneko lanaldia. Hau da, hitzarmenaren indarraldian arrazoi ekonomikorik, teknikorik, antolakuntzakorik edo ekoizpenekorik badago aipatutako artikuluak partez edo osoki ez aplikatzeko, enpresak artikulu horiek ezin izanen ditu aplikatu gabe utzi, salbu batzorde parekidean halako akordiorik hartzen bada. Artikulu honetan arautzen ez den guztian Langileen Estatutuaren 82.3 artikuluan ezarritakora jo beharko da, osagarri gisa.

10. artikulua. Hileko oinarrizko soldata eta hitzarmeneko plusa.

Hitzarmen honen eraginpeko langileek oinarrizko soldata eta hitzarmeneko plusa jasoko dituzte. Zenbatekoak izanen dira erantsitako soldata tauletan 2025., 2026. eta 2027. urteetarako adierazitakoak.

2025erako, soldaten berrikuspena %2,5ekoa izanen da.

2026rako, igoera %2,25ekoa izanen da.

2027rako, igoera %2,25ekoa izanen da.

11. artikulua. Antzinatasuna.

Antzinatasunaren ondorioetarako, langilea enpresan zerbitzuak ematen hasi zeneko lehenengo egunetik kontatuko da.

Antzinatasuneko osagarriak arau hauei jarraituko die:

Zenbateko horiek ordainduko dira hilabeteari dagokion soldataren ordainagirian.

Hitzarmen hau indarrean jartzean antzinatasuneko osagarri gisa hemen itundutakoak baino zenbateko handiagoak jasotzen ari diren langileek jarraituko dute beren aldeko aldea kobratzen, osagarri pertsonal ez-xurgagarri eta finkagarri gisa. Osagarri hori eguneratuko da langilearen oinarrizko soldata eguneratzen den ehuneko berean, eta gainerakoa hitzarmen honetan definitutako antzinatasuneko osagarri pertsonalera eramanen da, eta hitzarmenean zehaztutakoaren mende geratuko da.

12. artikulua. Aparteko haborokinak.

Langileek urtean zehar hiru aparteko haborokin jasoko dituzte; honako hauek biltzen dituzte: 30 eguneko oinarrizko soldata, hitzarmeneko plusa eta antzinatasuna:

UZTAILEKO APARTEKO ORDAINSARIA: dagokion urteko urtarrilaren 1etik ekainaren 30era bitartean sortzen da, eta urte bereko ekaineko nominarekin batera ordainduko da.

ABENDUKO APARTEKO ORDAINSARIA: dagokion urteko uztailaren 1etik abenduaren 31ra sortzen da, eta urte bereko abenduko nominarekin batera ordainduko da.

MARTXOKO ORDAINSARIA: urteko hamabi hilabeteetan sortzen da. Sortzapen urtearen hurrengo urteko martxoan ordainduko da, ordainketaren aurreko urte naturaleko abenduaren 31n indarrean dauden soldaten arabera.

13. artikulua. Garbiketako plusa. (II. eranskina).

Hitzarmen honen eraginpeko langileek garbiketako plusa jasoko dute. Zenbatekoa izanen da erantsitako soldata tauletan 2025., 2026. eta 2027. urteetarako adierazitakoa.

14. artikulua. Dirua erabiltzeagatiko kalte-ordaina. (II. eranskina).

Hitzarmen honen eraginpeko langileek dirua erabiltzeagatiko kalte-ordaina jasoko dute. Zenbatekoa izanen da erantsitako soldata tauletan 2025., 2026. eta 2027. urteetarako adierazitakoa.

15. artikulua. Gehiegizko lanaldia. (II. eranskina).

Langilea saiatuko da ahalik eta aparteko ordu gutxien egiten, eta beti modu boluntarioan eginen ditu. Aparteko ordutzat hartuko dira astean 40 orduko kopurua gainditzen dutenak eta egunean 8 orduko kopurutik gorakoak, betiere urteko lanaldia gainditzen bada, prestatutako urteko egutegiaren arabera. Aparteko ordu baten balioa izanen da ordu arruntaren balioa gehi %50:

16. artikulua. Gaueko lana. (II. eranskina).

Hitzarmen honen eraginpeko langileek gaueko laneko plusa jasoko dute. Zenbatekoa izanen da erantsitako soldata tauletan 2025., 2026. eta 2027. urteetarako adierazitakoa.

Ordu horiek gaueko ordutegitzat hartuko dira 22:00etatik 06:00etara.

17. artikulua. Lanaldia.

Asteko gehieneko lanaldia 40 ordukoa izanen da, eta itundutako urteko gehieneko lanaldia 1.768 ordukoa.

18. artikulua. Ordutegiak eta txandak.

Enpresak, bere zereginaren barruan eta langileen ordezkariekin batera, ordutegien, txanden eta oporren egutegia eginen du. Egutegia aurreko urteko abenduaren 31 baino lehen emanen zaie langileei, eta urtarrileko koadrantea aurreko urteko abenduaren 15a baino lehen.

Asteko lanaldia txandakako txandetan eginen da egunero hiriko aparkaleku guztietan. Txanda horiek egutegian ezarriko dira. Langileak 20 minutuko atsedenaldia hartzeko eskubidea izanen du ogitartekoa jateko, eta tarte hori benetako lan-denboratzat hartuko da. Hori guztia, eginen den urteko egutegiarekin bat.

Goizeko, arratsaldeko eta gaueko txandez gain, ondotik zehazten diren bi txandak sartzen dira. Batetik, txanda zatitu bat Blanca de Navarra aparkalekuan, aparkaleku agente guztiek eginen dutena, txandakako txandan aparkaleku horretan lan egitea egokitzen zaienean. Langile bakoitzak gehienez ere lau aldiz eginen du txanda hori hilean. Bestetik, errefortzuko txanda bat Baluarte aparkalekuan, ostegunetik igandera, langile guztien artean ekitatez banatuko dena.

Enpresak lantokien arteko mugikortasunerako behar diren bitartekoak emanen ditu.

19. artikulua. Beste aparkaleku batera bertaratzea.

Beren lanaldian zehar eta beren lantokian lanean hasi ondoren, langileei eskatzen ahal zaie enpresak kudeatzen duen eta langileen ohiko lanaldikoa ez den beste aparkaleku batean lan egiteko, eta langile horiek gaueko orduaren balioaren zenbatekoa jasoko dute, onartutako taulen arabera.

Lantoki batetik bestera joateko, enpresak jarritako bitartekoak erabiliko dira.

Nahitaezkoa izanen da beste aparkalekura bertaratzea. Gai puntualengatik operatibitateari lotutako zalantzarik izanez gero, leihatilako langileak telefonoz deituko die arduradunei, eta haiek aginduko diote edo beste aparkalekura bertaratzeko, edo une horretan egiten ari zen lana egiten jarraitzeko.

20. artikulua. Jaiegunak. (II. eranskina).

Zerbitzuaren beharrak direla eta, langileek egutegi ofizialean zehaztutako 14 jaiegunetan ere lan egin behar dute.

Hitzarmen honen eraginpeko langileek jaiegunetako plusa jasoko dute. Zenbatekoa izanen da erantsitako soldata tauletan 2025., 2026. eta 2027. urteetarako adierazitakoa.

21. artikulua. Oporrak.

Konpentsazio ekonomikoarekin ordeztu ezin den urteko oporraldia 31 egun naturalekoa izanen da.

18. artikuluan jasotakoa ahalbidetzeko, langileak, urte bakoitzeko urriaren 30a baino lehen, hurrengo urteko oporraldiari dagokionez zer lehentasun dituen adierazi beharko du. Hori horrela, 3 aukera aurkeztu beharko ditu lehentasun ordenaren arabera zerrendatuta.

Oporrak aukeratzeko lehentasun ordena bat ezartzen da langileen artean. Zozketa bidez eginen da, eta urtez urte txandakatuko da. Horri jarraikiz, dena delako urtean oporrak aukeratzeko lehen tokian dagoen langilea azken tokira igaroko da hurrengo urtean, eta horrela bata bestearen ondoren. Kontratu mugagabea duten langile berriak azken postura igaroko dira, kontratu mugagabea egiten den urteko lehentasun ordenaren arabera, eta, horrela, errotazio gurpilean sartuko dira, gainerako langileak bezala.

Urteko oporraldi ordainduan, langileek jasoko dituzte oinarrizko soldata eta aldizkako epemuga duten osagarriak (oinarrizko soldata, hitzarmeneko plusa, dirua erabiltzeagatiko kalte-ordaina eta garbiketako plusa).

Gaueko laneko osagarria ondorio horietarako aintzat hartuko da, honako irizpide hauei jarraikiz:

Langileak aurre-aurreko hamaika hilabeteetan benetan jasotako gaueko laneko osagarriaren batezbestekoaren baliokidea den zenbatekoa ordainduko da (zati 11).

Osagarri hori oporren ordainsarian sartzeko, langileak gaueko laneko osagarria jaso behar izan du zenbatutako hamaika hilabeteetatik gutxienez seitan.

Adierazitako zenbatekoa urte bakoitzeko urtarrileko nominan sartuko da, aurreko irizpideen arabera hala badagokio.

22. artikulua. Aldi baterako ezintasuneko osagarria.

Gaixotasun profesionalak edo laneko istripuak eragindako aldi baterako ezintasunagatik erakunde kudeatzaileak ematen dituen prestazioak alde batera utzita, enpresak osagarri bat ordainduko du, legez ezarritako prestazioei gehituta, soldataren %100 bermatzeko aldi baterako ezintasun-egoerak irauten duen bitartean.

Gaixotasun arruntagatik edo lanez kanpoko istripuagatik aldi baterako ezintasun-egoeran dagoen langilearen kasuan, enpresak honako hauek bermatuko ditu:

Urteko lehen baja: soldataren %100, bosgarren baja-hilabetera arte.

Urteko bigarren baja eta hurrengoak: soldataren %90, hirugarren baja-hilabetera arte.

Gaixotasun arruntaren kasuan, hitzarmeneko soldaten %100 arte osatuko zaie uztailaren 29ko 1148/2011 Errege Dekretuan jasotako gaixotasun larriak dituzten langileei.

23. artikulua. Aparkalekua erabiltzeko eskubidea.

Aparkalekuko langileek, baldin lantokira ibilgailu propioan joaten badira, lanaldian zehar aparkatzen ahalko dute zentroko zuzendaritzak horretarako zehazten dituen tokietan.

24. artikulua. Lizentziak eta baimen ordainduak.

Langileek, aurretik abisatuta eta justifikatuta, baimena dute lanera ez agertzeko, ordaindua izateko eskubidearekin, arrazoi hauetako bat dela medio:

A. Langilearen ezkontza edo izatezko bikotearen erregistroa: 17 egun natural.

B. Seme-alaben edo senideen ezkontza: egun bat probintzian bada eta 3 egun probintziatik kanpora.

C. Ezkontidearen, izatezko bikotekidearen edo bigarren gradura arteko odol edo ezkontza ahaidetasuneko ahaideen heriotza: 4 egun probintzian bada eta 6 egun probintziatik kanpora.

D. Ezkontidearen, izatezko bikotekidearen edo bigarren gradura arteko odol edo ezkontza ahaidetasuneko ahaideen (izatezko bikotekidearen ahaide odolkidea barne) istripu edo eritasun larriagatik, ospitalizazioagatik edo ospitalizaziorik gabe etxean atseden hartzea eskatzen duen ebakuntza kirurgikoagatik, bai eta aurrekoak ez bezalako beste edozein pertsonarengatik ere, langilearekin etxe berean bizi bada eta hura benetan zaindu behar badu: 5 lanegun.

E. Ohiko bizilekua aldatzeagatik, egun bat.

F Eskubide eta betebehar publikoak: ezinbesteko denbora.

G. Titulu edo ikastaro akademiko ofizialak lortzeko azterketak: ezinbesteko denbora.

H. Medikutara joateko: ezinbesteko denbora.

I. Enpresak, langileak idatziz eta 48 ordu lehenago eskatuta, ordaindutako hiru baimen-egun emanen ditu urtean, eta ezin izanen du eskatu langile batek baino gehiagok aldi berean. Modu etenean baliatuko da baimen hori, eta ezin izanen dira batu hiru baimen-egun horiek.

J. A eta I letren artean (biak barne) adierazitako kasu horietan guztietan, behar bezala justifikatu beharko dira baimenaren arrazoiak eta inguruabarrak.

25. artikulua. Eszedentziak.

Eszedentzia borondatezkoa edo nahitaezkoa izaten ahal da. Nahitaezko eszedentziak eskubidea emanen du lanpostua gordetzeko eta haren antzinatasuna zenbateko.

Eszedentzia guztiak idatziz eskatuko dira, eta, legeak kontrakoa xedatzen ez duen bitartean, langileek enpresan gutxienez urtebeteko antzinatasuna egiaztatu beharko dute borondatezko eszedentzia hartu ahal izateko.

a) Borondatezko eszedentzia.

Enpresan gutxienez urtebeteko antzinatasuna duen langileak eskubidea izanen du borondatezko eszedentzia hartzeko. Eszedentzialdi horrek gutxienez 4 hilabete iraunen du, eta gehienez 5 urte.

Langileak eskubidea baliatzen ahalko du, soil-soilik, aurreko eszedentziatik 4 urte igaro badira.

Borondatezko eszedentziaren kasuan, eszedentzia hasi arteko antzinatasuna aintzat hartuko du enpresak, baina borondatezko eszedentziaren iraupena ez da zenbatuko antzinatasunerako.

Langileak eszedentzia eskatu beharko dio enpresaren Nafarroako zuzendaritzari, gutxienez eszedentzia gauzatu baino 20 egun natural lehenago.

Borondatezko eszedentzian dagoen langileak ezin izanen du zerbitzurik eman aparkalekuen sektoreko beste enpresa batean, eszedentzia eman zuen enpresak berariaz baimentzen duenean salbu.

Eszedentzian dagoen langileari lanpostua gordeko zaio eszedentziaren lehen 24 hilabeteetan.

Lanpostua gordetzeko epe horretatik aurrera, eszedentzian dagoen langilea itzultzen ahalko da lanera baldin eta plaza hutsik badago bere kategorian edo antzeko batean eta lanera itzultzeko eskaera eszedentzia amaitu baino 30 egun baliodun lehenago eskatzen badu.

b) Nahitaezko eszedentzia, enpresari jakinarazpen fede-emailea egin ondoren, kasu hauetan emanen da:

–Langilea kargu publiko baterako izendatu edo hautatu badute eta hori dela-eta ezin badu lanera joan.

–Langilea probintziako edo eremu handiagoko sindikatu eginkizunetan aritzen bada, bere ordezkaritza karguak irauten duen denboran.

–Nahitaezko eszedentzian dagoen langileak enpresara itzuli beharko du bere eginkizuna bukatu edo kontratua eteteko arrazoia edo zergatia desagertu eta ondoko 30 egun naturaleko epean, gehienez ere. Epe horretan itzultzen ez bada, lanpostu erreserba bertan behera geratuko da, eta langileak borondatezko eszedentzia hartu duenaren izaera bera izanen du, non eta ez duen egiaztatzen nahitaezko beste eszedentzia bat hartzeko eskubidea duela.

–Etenaldia, semea edo alaba jaiotzeagatik. 16 aste, edo 2 aste gehiago, erditze anizkoitzaren kasuan, bigarren haurretik aurrerako haur bakoitzeko. Langileen Estatutuaren 48. artikulua ezarritakoarekin bat.

–Etenaldia, adopzioagatik edo harreragatik: Langileen Estatutuaren 48. artikulua ezarritakoarekin bat.

c) Ahaideak zaintzeko eszedentzia. Langileen Estatutuaren 46.3 artikuluarekin bat.

–Seme edo alaba bat zaintzeko, bereak nahiz adopziokoak, hiru urterako gehienez.

–Bigarren gradura arteko odol edo ezkontza ahaidetasuneko ahaideak zaintzeko. Ez du iraunen bi urte baino gehiago, negoziazio kolektiboaren ondorioz iraupen luzeagoa ezartzen bada salbu.

d) Etetea, lanpostua gordetzeko eskubidearekin. Langileen Estatutuaren 48. eta 48 bis artikuluekin bat.

26. artikulua. Prestakuntza.

Langileek eskubidea dute erraztasunak eman diezazkieten titulu akademiko nahiz profesionalak erdiesteko ikasketak egiteko, lanbide hobekuntzako ikastaroak egiteko eta enpresak edo enpresarekin loturiko erakundeek ematen dituzten lanbide berrikuntza eta gaikuntza ikastaroetan parte hartzeko.

Langileek, halaber, eskubidea dute lanaldiaren herena arte murrizteko, soldataren proportziozko murriztapen lineala aplikatuta, ikasketa homologatuak (titulu ofiziala) egiten dituztenean.

27. artikulua. Laneko arriskuen prebentzioa.

Enpresak emanen ditu behar diren norbera babesteko ekipamenduak, kalitate ziurtatua dutenak. Errekuntza gasen kontzentrazioa ebaluatuko da, arriskua kuantifikatzeko.

28. artikulua. Lanbide sailkapena.

Aparkalekuen eta Garajeen Sektoreko Eremu Nazionaleko VI. Hitzarmen Kolektibo Orokorraren IV. kapituluko 32., 33., 34. eta 35. artikuluetan xedatutakoari jarraituko zaio.

29. artikulua. Baliaezintasun eta heriotza asegurua.

Enpresak konpromisoa hartzen du hitzarmen kolektibo honen eraginpeko langile guztientzako laneko istripuak eragindako baliaezintasun edo heriotza kasuetarako istripu aseguru bat eratzeko, eta 27.500 euroko kapitala bermatuko du langile bakoitzeko.

Lana dela-eta edo lanaren ondorioz sortzen diren arriskuak honela estaliko dira:

1. Heriotza.

2. Baliaezintasun handia.

3. Edozein motatako jardueretarako erabateko baliaezintasuna.

4. Ohiko lana egiteko ezgaitzen duen baliaezintasun osoa.

30. artikulua. Lan-bizitza eta familia bateragarri egitea.

–Amatasunagatiko atsedenaldia:

Berdintasunari buruzko Legean eta Langileen Estatutuan gai honi buruz xedatuta dagoenari jarraituko zaio.

–Lanaldi murriztua:

Legezko zaintza dela eta, langileren batek bere kargu izanez gero hamabi urtetik beherako haur bat edo ordaindutako lanik egiten ez duen minusbaliatu fisiko, psikiko edo sentsorial bat, eskubidea izanen du eguneko lanaldia murrizteko, zortziren bat gutxienez eta erdia gehienez ere, soldata ere hein berean murriztuta.

–Haurrari bularra emateko baimena:

Bederatzi hilabetetik beherako seme-alabaren bat duten enplegatuek ordubete murrizten ahal dute lanaldia (soldata murriztu gabe), lanaldiaren hasieran edo bukaeran, betiere Langileen Estatutuaren 37.4 artikuluan ezartzen diren baldintzak betetzen badira. Era berean, baimen horren ondoriozko lanaldi murrizketaren eguneko ordubetea (Langileen Estatutuaren 37.4 artikulua) lanaldi osoetan metatzen ahalko da, eta amatasunagatiko atsedenari 13 lanegunetan metatu, amatasun baja hartzen denetik eta hartzeke dituen aurreko urteko oporrak hartu ondoren zenbatzen hasita, salbu eta alderdiek bestela erabakitzen badute eta erabakitzen badute langilea lanean hasten den urte naturaleko beste une batean hartzea.

31. artikulua. Ordezko zuzenbidea.

Hitzarmen honetan berariaz itundu ez den guztian, subsidiarioki aplikatuko da Aparkalekuen eta Garajeen Sektoreko Eremu Nazionaleko VII. Hitzarmen Kolektibo Orokorrean xedatutakoa.

SOLDATA TAULAK

2025

%2,5

2026

%2,25

2027

%2,25

F2600931

Iragarkiaren kodea: