Iragarkia

38. ALDIZKARIA - 2026ko otsailaren 20a

1. NAFARROAKO FORU KOMUNITATEA

1.7. BESTELAKOAK

5/2026 EBAZPENA, urtarrilaren 16koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, zeinaren bidez aldez aurreko administrazio baimena eta eraikitzeko administrazio baimena ematen baitira "Murieta-Arroniz" zirkuituko 13,2 kV-eko erdi tentsioko linea lurperatzeko Ermita transformazio-zentroaren eta 1606 zenbakiko euskarriaren artean, Arroizko udal-mugartean, eta instalazio horrek onura publikoa duela zehazki deklaratzen baita. Espedientearen kodea: SAT11650.

2024ko azaroaren 27an, eta jarraikiz Sektore Elektrikoari buruzko abenduaren 26ko 24/2013 Legean ezarritakoari, I-DE Redes Eléctricas Inteligentes SAUk aldez aurreko administrazio baimena eta eraikitzeko administrazio baimena eskatu zituen "Murieta-Arroniz" zirkuituko 13,2 kV-eko erdi tentsioko linea lurperatzeko Ermita transformazio-zentroaren eta 1606 zenbakiko euskarriaren artean, Arroizko udal-mugartean, eta, orobat, eskatu zuen instalazio horrek onura publikoa duela zehazki deklaratzea.

Sustatzaileak aurkeztutako dokumentazio teknikoaren arabera, 13,2 kV-eko erdi tentsioko lurpeko linea berri bat proiektatu da Arroizko Ermita transformazio-zentroaren eta 1606 zenbakiko euskarriaren artean. 475 metroko luzera izanen du, eta HEPRZ1 12/20 1x240 K Al+H16 kablea izanen du. Lurpeko linea berria eraikita, aireko linea (LA-56 eroalea) desmuntatuko da (416 metroko luzera du). Egungo 1606 zenbakiko euskarriaren ordez, beste bat paratuko da, C serieko saretazko bat.

Sektore Elektrikoari buruzko abenduaren 26ko 24/2013 Legearen 55. artikuluan eta abenduaren 1eko 1955/2000 Errege Dekretuaren 125. eta 144. artikuluetan xedatutakoa betez, proiektua eta ukitutako ondasun eta eskubideen zerrenda jendaurrean jarri ziren hogeita hamar egun balioduneko epean, iragarki bat argitaratu baitzen 2025eko 5. Nafarroako Aldizkari Ofizialean, urtarrilaren 9koan, eta Diario de Navarra egunkarian (2025eko urtarrilaren 10ean), eta dokumentazioa argitara eman baitzen Nafarroako Gobernu Irekiaren web fitxan. Informazioaren berri eman zitzaion, halaber, Arroizko Udalari, jendaurrean jar zezan iraupen bereko epean.

Ez da alegaziorik jaso.

Aldi berean, abenduaren 1eko 1955/2000 Errege Dekretuaren 127., 131. eta 146. artikuluetan ezarritakoa aplikatuz, kontsulta egin zitzaion Arroizko Udalari.

Ez da txostenik jaso.

Bestalde, espedientean honako hauek daude jasota:

–436E/2024 Ebazpena, abenduaren 27koa, Biodibertsitatearen eta Arrantza Kudeaketaren Zerbitzuko zuzendariak emana, ingurumen ukipenen txostena egiten duena, aldekoa baina ingurumen ebazpenean jasotako neurri jakin batzuk aplikatzeko baldintzapean.

–659E/2025 Ebazpena, abenduaren 31koa, Lurralde Antolamenduko zuzendari nagusiak emana, zeinaren bidez lurzoru urbanizaezinean jarduerak eta erabilerak egiteko baimena ematen baitzaio proiektuari, ebazpenean bertan zehazten diren determinazio batzuk betetzeko baldintzarekin.

Ikusirik aurkeztutako dokumentazioa, eta kontuan hartuta Sektore Elektrikoari buruzko abenduaren 26ko 24/2013 Legean eta abenduaren 1eko 1955/2000 Errege Dekretuan xedatutakoa, Azpiegitura Energetikoen Atalak proposatzen du eskatutakoa onartzea.

Azaldutakoarekin bat etorriz, eta Enpresa Sustapenerako eta Azpiegituretako zuzendari nagusiaren uztailaren 30eko 29/2025 Ebazpenaren bidez eskuordetu zaizkidan eskumenak baliatuz (2025eko 155. Nafarroako Aldizkari Ofiziala, abuztuaren 5ekoa), honako hau,

EBAZTEN DUT:

1. Aldez aurreko administrazio baimena eta eraikitzeko administrazio baimena ematea I-DE Redes Eléctricas Inteligentes SAUri, "Murieta-Arroniz" zirkuituko 13,2 kV-eko erdi tentsioko linea lurperatzeko Ermita transformazio-zentroaren eta 1606 zenbakiko euskarriaren artean, Arroizko udal-mugartean, eta aurkeztutako exekuzio-proiektua onestea. Orobat, hogeita hamasei hilabeteko epea ematen zaio proiektua exekutatzeko.

2. Aurretiazko administrazio baimena eta eraikitzeko administrazio baimena emanda ere, instalazioaren eskatzaileak lortu beharko ditu instalazioa gauzatzeko beharrezkoak diren emakida, lizentzia eta baimen guztiak, publikoak nahiz pribatuak, aplikatzekoak diren beste xedapen batzuekin bat.

3. Instalazioak egin beharko dira aurkeztutako proiektuei jarraikiz, eta bat etorri beharko dute honako arau hauetan xedatutakoarekin: maiatzaren 9ko 337/2014 Errege Dekretua, Goi-tentsioko instalazio elektrikoetako baldintza teknikoei eta segurtasun-bermeei buruzko erregelamendua eta haien jarraibide tekniko osagarriak (ITC-RAT 01-23) onesten dituena, eta otsailaren 15eko 223/2008 Errege Dekretua, Goi-tentsioko linea elektrikoen baldintza teknikoei eta segurtasun-bermeei buruzko erregelamendua eta haien jarraibide tekniko osagarriak (ITC-LAT 01-09) onesten dituena.

4. Behin proiektua exekutaturik, eskatzaileak ustiatzeko behin betiko baimena eskatu beharko du. Eskaera horri obra-bukaerako ziurtagiria erantsi beharko zaio, teknikari fakultatibo eskudunak izenpetua, bai eta aplikatzekoa den araudiko gainerako dokumentazioa ere.

5. Instalazio horren onura publikoa zehazki deklaratzea, Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan, eta abenduaren 1eko 1955/2000 Errege Dekretuaren 148. eta 149. artikuluetan ezarritakoarekin bat; hori horrela, i-DE, Redes Eléctricas Inteligentes SAU entitatea onuraduna izanen da desjabetze espedientean. Ukitutako ondasun eta eskubideen zerrenda ez da aldatu jendaurreko aldia igaro ondoren, eta ebazpen honen eranskinean ageri da.

6. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzuari, Biodibertsitatearen eta Arrantza Kudeaketaren Zerbitzuari, eta Lurralde eta Paisaia Zerbitzuari, behar diren ondorioak izan ditzan.

7. Ebazpen hau Nafarroako Aldizkari Ofizialean argitaratzea, orok jakin dezan.

8. Ebazpen hau jakinaraztea I-DE Redes Eléctricas Inteligentes SAUri eta ukitutako ondasun eta eskubideen titularrei, eta ohartaraztea ezen ebazpen honek ez duela administrazio bidea amaitzen eta honen aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, ebazpen hau jakinarazi eta biharamunetik hasita. Errekurtsoan espediente kodea adierazi beharko da.

9. Ebazpen hau Arroizko Udalari jakinaraztea, eta ohartaraztea honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, honako hau jakinarazi eta biharamunetik hasita bi hilabeteko epean, deusetan eragotzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko urtarrilaren 16an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.

ERANSKINA.–SAT11650 ESPEDIENTEAK UKITUTAKO ONDASUN ETA ESKUBIDEEN BANAKAKO ZERRENDA ZEHATZA, HAREN ONURA PUBLIKOA ZEHAZKI DEKLARATZEKO

–Aireko linearen ukipenak.

–Lurpeko linearen ukipenak.

Iragarkiaren kodea: F2600881