37. ALDIZKARIA - 2026ko otsailaren 19a - BEREZIA

1. NAFARROAKO FORU KOMUNITATEA

1.7. BESTELAKOAK

6/2026 FORU AGINDUA, urtarrilaren 22koa, Ekonomia eta Ogasuneko kontseilariak emana, ibilgailu eta ontzi erabilien salmentako batez besteko prezioak onesten dituena, oinordetzen eta dohaintzen gaineko zergaren, ondare-eskualdaketen eta egintza juridiko dokumentatuen gaineko zergaren eta zenbait garraiobideren gaineko zerga bereziaren kudeaketan aplikatzeko.

Urtero horretarako onetsitako foru-agindu baten bidez, ibilgailu eta ontzi erabilien salmentako batez besteko prezioak ezartzen dira, oinordetzen eta dohaintzen gaineko zergan, ondare-eskualdaketen eta egintza juridiko dokumentatuen gaineko zergan eta zenbait garraiobideren gaineko zerga berezian zerga-oinarria zehazteko aplika daitezkeenak.

Ibilgailuen eta ontzi erabilien parkearen berritzea eta ibilgailu horiek merkatuan dituzten prezioen berezko aldaketak direla-eta, bidezko da indarra duten batez besteko prezioak eguneratzea, eta horretarako prestatu dira foru-agindu honen I., II., III. eta IV. eranskinetako taulak.

Modelo eta prezioen taulak egiteko, garraiobideen fabrikatzaile eta saltzaileen elkarteen argitalpenak baliatu dira.

Foru-aginduaren I. eranskinari dagokionez, aurten, ibilgailuen propultsio moduari buruzko zutabean, modelo hibrido entxufagarriak sartu dira (PHEV: «Plug-in Hybrid»), bereizita identifikatzeko, halako ibilgailuei aplikatzekoak diren abantailak direla eta.

II. eranskinean, uretako motoei dagokienez, balorazioa errazteko, potentzia hartuko da kontuan, kilowattetan adierazita (kW). Kasu horretan, ontzi motordunentzat erabiltzen den balio-galera aplikatuko da. Bestalde, aldatu egin dira itsasoko ontzi eta motorren erabilerari dagozkion ehunekoak, baita hondar-balioa ere, merkatuaren errealitatera egokitzeko.

Bestalde, III. eranskinean, itsas motorren oinarrizko balorazioa eguneratu da, potentzia mekaniko errealeko unitate bakoitzekoa, eta aurten itsas motor elektrikoak sartu dira, energia berriztagarrien gorakadaren ondorioz. Motor horiek itsasoko gainerako motorren balio-galera bera izanen dute.

IV. eranskinean, balio-galeren ehunekoen taula mantentzen da, automobilen merkatuaren errealitatera eta ibilgailuen balio-galerara behar bezala egokitzeko. Horrez gain, beste taula bat ere mantentzen da, dagoeneko matrikulatuta dauden autokarabanen batez besteko prezioak eguneratzeko portzentaje espezifikoak jasotzeko; izan ere, ulertzen da karabanek ere denboraren poderioz merkatuan duten balioa galtzen dutela, baina gainerako ibilgailuenaz bestelako erritmo batean.

Aurreko urteetan bezala, modeloen informazio eta identifikazio gisa eta ohituragatik, zaldi potentziatan (ZP) adierazten da motorren potentzia, merkataritza-arloan interesa duen datu orokor bat baita, automobil modelo batzuk identifikatzeko baliagarria dena, nahiz eta ez den inola ere Neurketa Unitateen Legezko Sisteman onartutako unitate bat (Metrologiari buruzko abenduaren 22ko 32/2014 Legea). Halaber, merkaturatze-aldia adierazten da automobilen modelo batzuk bereizteko bestelako elementu gisa, zeren, zenbait ibilgailuren kasuan, desberdinak badira ere, merkataritzako izen berari eusten baitzaio urte askoan. Era berean, errekuntzako motorra duten motozikleta eta quad mota guztien batez besteko prezioak motorraren tamainaren arabera bereizten dira, zentimetro kubikotan adierazita, eta motozikleta elektriko moten batez besteko prezioak, berriz, motorrak garatzen duen potentziaren arabera bereizten dira, kW-etan adierazita.

Zenbait garraiobideren gaineko zerga bereziari dagokionez, haren balorazioa Europar Batasunaren irizpideetara egokitzeko asmoz, bere horretan uzten da erabilitako formula, hots, ibilgailu erabiliak, aurretik atzerrian matrikulaturik egon bada, jasan duen zeharkako zergapetzea merkatuko baliotik kentzekoa.

Horiek horrela, bidezkoa da salmentako batez besteko prezioak eta horiei aplikatzen zaizkien portzentajeak eguneratzea 2026. urterako.

Horiek horrela, bada,

AGINTZEN DUT:

1. artikulua. Batez besteko prezio aplikagarrien taulak.

I., II., III. eta IV. eranskinetan sartutako taulek Ekonomia eta Ogasuneko kontseilariaren otsailaren 7ko 14/2025 Foru Aginduaren bidez onetsitakoak ordeztuko dituzte ondorio guztietarako.

2. artikulua. Ibilgailu automobilen, autokarabanen, quad-en eta motozikleten balioa finkatzea.

Matrikulatutako ibilgailuen, autokarabanen, quad-en eta motozikleten balioa finkatzeko, I. eranskineko batez besteko prezioei dagozkien portzentajeak aplikatuko zaizkie, kontuan hartuta erabilera-urteak eta, egoki bada, ibilgailuaren jarduera. Portzentaje horiek IV. eranskinean jasotako taulan eta jarraibideetan daude.

3. artikulua. Aisialdiko ontzien, itsas motorren eta uretako motoen balioa zehaztea.

1. Aisialdiko ontzien eta itsas motorren balioa finkatzeko, bereizirik baloratuko dira ontzia motorrik gabe eta motorra, eta, horretarako, foru-agindu honen II. eranskinean jasotako balioei III. eranskineko taulako portzentajeak aplikatuko zaizkie, erabilera-urteak kontuan hartuta, eta gero balio eguneratuak gehituko zaizkie, ontziaren guztizko balioa lortzeko.

2. Uretako motoen kasuan, balioa unitate gisa eta batera finkatuko da (kroskoa eta motorra bereiz baloratu gabe). Horretarako, II. eranskinean jasotako balioei III. eranskineko taulako portzentajeak aplikatuko zaizkie, erabilera-urteak kontuan hartuta eta aipatutako III. eranskinean jasotako jarraibideen arabera.

4. artikulua. Zenbait garraiobideren gaineko zerga berezirako balioa finkatzeko arau berezia.

Zenbait garraiobideren gaineko zerga bereziari dagokionez, honako arau hauek aplikatuko dira:

Lehena.–I., II. eta III. eranskinetan ageri diren batez besteko prezioei erabilitako urteen arabera dagozkien portzentajeak aplikatuko zaizkie, eta, egoki bada, ibilgailuaren jarduerari dagokiona. Portzentaje horiek foru-agindu honen IV. eranskinean jasotako taulan eta jarraibideetan daude.

Ibilgailu modelo beraren kasuan, batez besteko prezio desberdinak egonez gero, modelo motaren araberakoak, zergadunak egiaztatu beharko du zer ibilgailu mota matrikulatu nahi duen, hori eskatzen diotenean. Egiaztatu ezean, zerga-administrazioak ibilgailu modelo horren mota garestienaren balioa hartuko du aintzat.

Bigarrena.–Aurretik atzerrian matrikulatuta egon eta behin betiko lehen matrikulazioa Espainian izan behar duten garraiobide erabiliak direnean, zeharkako zergetako kuoten hondarra kenduko zaio merkatuko balioari, betiere merkatuko balioa aurreko lehen arauan adierazitakoa kontuan hartuta kalkulaturik. Horretarako, formula hau erabil daiteke:

Azalpena:

ZO: zenbait garraiobideren gaineko zerga bereziko garraiobide erabilien zerga-oinarria.

MB: merkatuko balioa, IV. eranskineko portzentajeak aplikatu ondoren batez besteko prezioen taulek finkatutakoa.

BEZtasa: zerga-tasa, bateko hainbestean, garraiobideari orain Espainiako zer lurralde-eremutan matrikulatuko den, bertan lehen matrikulazioan eskatuko zitzaiokeen balio erantsiaren gaineko zergarena (BEZa).

ZGZBtasa: zerga-tasa, bateko hainbestean, garraiobideari orain Espainiako zer lurralde-eremutan matrikulatuko den, bertan lehen matrikulazioan eskatuko zitzaiokeen zenbait garraiobideren gaineko zerga bereziarena.

BESTELAKOtasak: bestelako zeharkako zerga-tasak batzearen emaitza, bateko hainbestean, baldin eta garraiobidearen erosketari kargatu bazaizkio, eta merkatuko balioan sartuak badaude.

Azken xedapenetako lehena.–Honako arau hau aldatzea: 134/2025 Foru Agindua, abenduaren 24koa, Ekonomia eta Ogasuneko kontseilariak emana, zeinaren bidez onesten baita 170 eredua, "Hileroko aitorpen informatiboa, edozein txartel motaren bidezko kobrantzak edo telefono mugikorreko zenbaki bati loturiko kobrantzak kudeatzeko sistemari atxikitako enpresariek edo profesionalek egindako eragiketei buruzkoa".

Abenduaren 24ko 134/2025 Foru Aginduaren 8.2 artikulua aldatzen da. Honela idatzita geldituko da:

"2. Aitorpenak akatsik badu, errefusatzeko arrazoirik ez duten erregistroak bakarrik onartuko dira. Kasu horretan, erantzunaren mezu informatikoak errefusatutako erregistroen zerrenda jasoko du, adierazita zergatik ez diren onartu.

Baldin erregistro bat, behintzat, onartzen bada, mezu informatikoak egiaztatzeko kode seguru bat ere izanen du, hemeretzi karakterekoa, erregistro aurkeztu eta onartuen frogagiri gisa.

Baldin erregistroa errefusatzen bada, behar diren zuzenketak egin beharko dira, eta berriz ere aurkeztu".

Azken xedapenetako bigarrena.–Honako arau hau aldatzea: 135/2025 Foru Agindua, abenduaren 24koa, Ekonomia eta Ogasuneko kontseilariak emana, zeinaren bidez onesten baita 196 eredua, "Mota guztietako finantza entitateetako kontuei buruzko hileko aitorpen informatiboa, eta kapital higigarriaren etekinen eta mota guztietako finantza entitateetako kontuen ondoriozko kontraprestazioagatik lorturiko errenten gaineko atxikipenen eta konturako sarreren urteko laburpena".

Abenduaren 24ko 135/2025 Foru Aginduaren 9.2 artikulua aldatzen da. Honela idatzita geldituko da:

"2. Aitorpenak akatsik badu, errefusatzeko arrazoirik ez duten erregistroak bakarrik onartuko dira. Kasu horretan, erantzunaren mezu informatikoak errefusatutako erregistroen zerrenda jasoko du, adierazita zergatik ez diren onartu.

Baldin erregistro bat, behintzat, onartzen bada, mezu informatikoak egiaztatzeko kode seguru bat ere izanen du, hemeretzi karakterekoa, erregistro aurkeztu eta onartuen frogagiri gisa.

Baldin erregistroa errefusatzen bada, behar diren zuzenketak egin beharko dira, eta berriz ere aurkeztu".

Azken xedapenetako hirugarrena.–Indarra hartzea.

Foru-agindu honek Nafarroako Aldizkari Ofizialean argitaratu eta biharamunean hartuko du indarra, eta 2026ko urtarrilaren 1etik aurrera izanen ditu ondorioak.

Iruñean, 2026ko urtarrilaren 22an.–Ekonomia eta Ogasuneko kontseilaria, José Luis Arasti Pérez.

Jaitsi dokumentu osoa (PDFa).

Iragarkiaren kodea: F2600985