Iragarkia

36. ALDIZKARIA - 2026ko otsailaren 19a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

4C/2026 EBAZPENA, urtarrilaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Adisco CEE enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Aztertu da Adisco CEE enpresak aurkeztutako hitzarmen kolektiboa (kode zenbakia: 31008252012003), erregistro honetan sartu zena 2025eko abenduaren 23an, 2025eko abenduaren 12an enpresaren eta sindikatuen ordezkaritzek sinatu ondotik.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuari dagokionez,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Adisco CEE enpresak aurkeztutako hitzarmen kolektiboa (kode-zenbakia: 31008252012003).

Bigarrena.–Nafarroako Aldizkari Ofizialean argitara dadila xedatzea, orok jakin dezan.

Iruñean, 2026ko urtarrilaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

ADISCO CEE ENPRESAREN V. HITZARMEN KOLEKTIBOA

I. TITULUA.–XEDAPEN OROKORRAK

1. artikulua. Xedea eta lurralde eremua. Hitzarmen kolektibo honek ADISCO Centro Especial de Empleo enpresaren eta bere langile esparruan sarturik dauden langileen arteko lan harremanak arautzen ditu.

Hitzarmen hau ADISCO CEE enpresak Nafarroako Foru Komunitatean dituen ataletako eta kanpoko zerbitzuetako edozeinetan lan egiten duten langileei aplikatuko zaie.

2. artikulua. Denbora-eremua, hitzarmena salatzea eta indarraldia. Hitzarmen kolektibo honek 2025eko urtarrilaren 1ean hartuko du indarra eta 2028ko abenduaren 31ra arte iraunen du. Hitzarmen honetako lansarien egitura osatzen duten kontzeptuen ondorioak 22. artikulutik 27. artikulura bitarte zehazten dira, biak barne.

Hitzarmena automatikoki salatuko dute negoziazio batzordeko alderdiek haren indarraldia bukatzean, salaketa berariaz adierazi beharrik gabe; orduan, negoziazio mahai berria eratu beharko da hurrengo hitzarmenerako negoziazioak hasteko, indarraldia bukatu aurreko bi hilabeteko epean.

Langileen Estatutuaren 86.3 artikuluan ezarritakoaren ondorioetarako, berariaz adostu da ezen, hitzarmena salatu eta itundutako iraunaldia amaitu ondoren, hitzarmenak indarrean jarraituko duela epemugarik gabe harik eta bi alderdiek horren ordezko bat sinatzen duten arte.

3. artikulua. Alderdiak zehaztea, langile esparrua eta esparru funtzionala. Hitzarmen hau ADISCO CEE enpresak eta horren Enpresa Batzordeak sinatu dute.

Hitzarmen kolektibo honek ADISCO Centro Especial de Empleo enpresan, edozein ataletan eta kanpoko zerbitzuetan, ari diren langileak hartzen ditu, honakoetan ezarritako edozein kontratazio mota dutenak: Langileen Estatutuan eta hura garatzeko gainerako legedian, batik bat 427/99 Errege Dekretuaren bidez aldatutako uztailaren 17ko 1368/85 Errege Dekretuan (enplegurako zentro berezietan lanean ari diren eta desgaitasunen bat duten pertsonen edo haiek ordezkatzen dituztenen lan harreman berezia arautzen duena).

Hitzarmenaren aplikaziotik kanpo gelditzen dira gizarte boluntario gisa lana egiten dutenak edo prestakuntza praktiketan edo erlijio zereginetan ari direnak, eta ADISCO Centro Especial de Empleo entitatearekin zerbitzuen errentamendu kontratuak hitzartuak dituzten enpresen plantilletakoak.

II. TITULUA.–LANBIDE SAILKAPENA

4. artikulua. Langileen sailkapena. Langileak, betetzen duten lanaren arabera, lanbide talde edo kategoria hauetan sailkatuko dira:

1. taldea.–Erdi mailako teknikariak.

–Tailerreko arduraduna.

–Ataleko arduraduna.

2. taldea.–Administrazio-langileak.

–Administrari laguntzailea.

3. taldea.–Produkzioko/Zerbitzu Orokorretako langileak.

–Auto gidaria.

–Biltegizaina.

–Produkzioko langilea.

Artikulu honetan jasotako talde, kategoria eta mailen sailkapena adierazpen hutsezkoa da, baina horrek ez du esan nahi talde horiek guztiak egonen direnik, eta, aldi berean, beste talde, kategoria eta maila batzuk sar daitezke, eginkizun jakin batzuk esleituta dituztela.

5. artikulua. Kategorien definizioa eta eginkizunak.

1. taldea.–Erdi mailako teknikariak. Unibertsitate bateko edo maila bereko eskola tekniko bateko titulua edo frogatutako esperientzia eta prestakuntza teknikoa izanik, kontratuaren xede diren erantzukizuneko eginkizunak betetzen dituzte ADISCO enpresan. Zuzendariarekin batera beren arloaren erantzukizun osoa hartzen dute beren gain.

Tailerreko arduraduna: behar bezalako ezagutzak izanik, eta Zuzendaritzaren agindupean, oinarrizko eginkizun hauek ditu:

–Zuzentzen duen taldea dinamizatzea eta, langileen gaitasunen arabera, haiei lanak banatzea.

–Ezarritako ekoizpena eta bere mende dituen langileek egiten dituzten arloetarako ezartzen diren kalitatearen betebeharrak bermatzea.

–Bere atala etengabe hobetzen jardutea eta prestakuntzarako ekintzak, ekoizpena hobetzekoak eta antolamendurakoak proposatzea.

–Langileei laguntzea errendimendurik hoberenak lortzeko, eta bere mendeko langileen beharrak eta arazoak hauteman eta bideratzea.

–Laguntzea, beharrezkoa bada, ekoizpen eginkizun zuzenetan.

–Bere ardura diren makinak, instalazioak, materialak eta abar egoera ezin hobean mantentzea.

–Bere lanak egiteko behar diren tresna, lanabes eta bestelako osagaiak kontrolatzea.

–Zuzendaritzarekin elkarlanean aritzea, bere erantzukizuneko atalaren errendimenduen datu eta adierazleak kudeatzeko.

–Kalitate sisteman ezarririko eginkizun eta erantzukizunak, eta bere karguagatik eta bere erantzukizunagatik dagozkion besteak egitea.

Ataleko arduraduna: behar bezalako ezagutzak izanik, eta Zuzendaritzaren agindupean, oinarrizko eginkizun hauek ditu:

–Zuzentzen duen taldea, gehienez ere 25 pertsonakoa, dinamizatzea eta, langileen gaitasunen arabera, haiei lanak banatzea.

–Ezarritako ekoizpena eta bere mende dituen langileek betetzen dituzten eginkizunetarako ezartzen diren kalitatearen betebeharrak bermatzea.

–Bere atala etengabe hobetzen jardutea eta prestakuntzarako ekintzak, ekoizpena hobetzekoak eta antolamendurakoak proposatzea.

–Langileei laguntzea errendimendurik hoberenak lortzeko, eta bere mendeko langileen beharrak eta arazoak hauteman eta bideratzea.

–Laguntzea, beharrezkoa bada, ekoizpen eginkizun zuzenetan.

–Bere ardura diren makina, instalazio eta materialak egoera ezin hobean mantentzea.

–Bere lanak egiteko behar diren tresna, lanabes eta bestelako osagaiak kontrolatzea.

–Tailerreko buruarekin eta beste arlo batzuetako arduradunekin elkarlanean aritzea, bere erantzukizuneko atalaren etekinen datu eta adierazleak kudeatzeko.

–Kalitate sisteman ezarririko eginkizun eta erantzukizunak, eta bere karguagatik eta bere erantzukizunagatik dagozkion besteak egitea.

Oharra: ADISCO CEE enpresaren gaur egungo tamaina dela eta, posible da pertsona bakar batek bere gain hartu behar izatea tailerreko arduradunen eta ataleko arduradunen kategoriei dagozkien eginkizunak. Pertsona horri eskuarki aurreko definizioetara hobekien egokitzen denari loturiko lanbide kategoria esleituko zaio.

2. taldea.–Administrazio langileak.

Administrari laguntzailea: beste batzuek gainbegiraturik, bere arloko langile eta baliabideen tramitazio administratiboa antolatu eta burutzen du, zentroan berean eta hortik kanpo. Harrera kudeatu, txostenak prestatu eta kalitate sisteman ezarririko beste eginkizun eta erantzukizun batzuk, eta bere karguagatik eta erantzukizunagatik dagozkionak egiten ditu.

3. taldea.–Produkzioko/Zerbitzu Orokorretako langileak.

Gidaria: erabili behar duen ibilgailuari dagokion gidabaimena du. Baimendurik dauzkan ibilgailuak gidatzeaz eta horien funtzionamendua eta garbiketa mantentzeaz arduratzen da. Zuzemenak agintzen ahalko zaizkio ADISCO enpresaren edo besteren tokietan. Garraiatu beharreko mandatuak kontrolatu eta kalitate sisteman ezarririko eginkizun eta erantzukizunak, eta bere karguagatik eta bere erantzukizunagatik dagozkion besteak eginen ditu.

Gidatzen ari ez denean, atal jakin bati dagozkion produkzio eginkizun propioak eginen ditu.

Biltegizaina: materiala hartzeaz eta biltzeaz arduratzen da. Barruko eta kanpoko igorpenak prestatu, enpresaren eta besteren ibilgailuetan zamalanak egin eta unean-unean hartzen dituen jarraibideen arabera salgaiak plantan banatzen ditu. Kalitate sisteman ezarririko eginkizun eta erantzukizunak, eta bere karguagatik eta bere erantzukizunagatik dagozkion besteak eginen ditu.

Biltegizain eginkizunak egiten ari ez denean, atal jakin bati dagozkion eginkizun propioak eginen ditu.

Ekoizpeneko langilea: produkzio arloetan eta zerbitzu orokorretan, lan metodo zehatz baten arabera, zehazki gainbegiraturik, ahalegin fisikoa edo arreta behar duten lanak egiten ditu. Aldian-aldian oinarrizko lanbide ezagutza ere beharko du, baita egokitzeko epe bat ere.

Artikulu honetan lanbide sailkapen bakoitzarentzat adierazi diren eginkizun eta lanak adibide moduan jarri dira. Hortaz, langile guztiak gainean dituzten agintariek agintzen dizkieten bestelako lan eta eginkizunak egitera behartuta daude, hemen adierazi ez badira ere; betiere, beren eskumen eta kategoriaren barrenekoak baldin badira.

6. artikulua. Igoerak. ADISCOn hutsik dauden lanpostuak, hark erabakirik, bete edo amortizatzen ahalko dira, hala baderitzo, lanaren, garapen teknologikoaren eta hala eskatzen duten bestelako inguruabarren arabera.

Hiru modu izanen dira lanpostu hutsak betetzeko: izendapen librea, merezimendu bidezko barne igoera eta kontratazio berriak.

Arlo teknikoetako eta administrazioko lanpostuak eta, eskuarki, agintaritza edo konfiantza eta erantzukizun berezia behar duten lanpostuak, ADISCO enpresaren egituraren edozein mailatan, izendapen libreen edo kontratazio berrien bidez beteko dira.

Beste lanpostuak merezimendu eta gaitasunaren araberako irizpide eta proba objektiboei jarraituz beteko dira eta halaxe izanen dira lanbide mailen arteko igoerak. Irizpide eta proba horiek zuzendaritzak ezarriko ditu, langileen ordezkariei galdeturik.

III. TITULUA.–LANEAN HASTEA ETA LANA UZTEA, PROBALDIA

7. artikulua. Kontratuak. Kontratu guztiak idatziz formalizatuko dira, eta aldi baterako eta prestakuntzarako kontratuei buruz indarrean dagoen legediak ezarritako modalitateen arabera; horrez gain, kontuan hartu beharko da enplegu zentro berezietan lanean ari diren eta desgaitasuna duten pertsonen lan harreman berezia arautzen duen martxoaren 12ko 42/1999 Errege Dekretuak ezarritakoa.

8. artikulua. Aldi baterako laneko enpresak ADISCOk, oro har, aldi baterako lan enpresez ez baliatzeko hitza ematen du. Horregatik, bakarrik aparteko kasuetan, langileen ordezkari gehienak ados daudela, izenpetzen ahalko dira kontratuak aldi baterako lan enpresekin langileak atzemateko.

9. artikulua. Probaldia. Langileak enpresan lanean hastean proba gisan arituko direla ulertuko da, idatziz horrela agertzen bada. Probaldiaren iraupena aldakorra izanen da, bete beharreko lanpostuen eta gainerako gorabeheren arabera. Hala ere, behin ere ez da izanen 1368/85 Errege Dekretuaren 10.2 artikuluan, 427/99 Errege Dekretuaren bidez eman zaion idazketan, xedatzen dena baino luzeagoa, ezta hura ordezten duten beste arau edo xedapen batzuk edo indarreko legediak ezarritakoa baino luzeagoa ere.

10. artikulua. Lana norbere borondatez uztea. ADISCO bere borondatez utzi nahi duen langileak gutxienez 15 egun lehenago horren berri eman beharko du. Aurreabisu horren epea ez betetzeak kenketa bat eraginen du azken likidazioan eta kitapenean, eta haren balioa aurreabisua egin behar zuenetik egin duenera bitarteko egunei dagokien lansaria adinakoa izanen da.

Zentroa, aurreabisua garaiz eta behar bezala jasotzen badu, beharturik egonen da lan harremanari bukaera ematean langileari dagokiokeen azken likidazioa eta kitapena ematera. Eginbehar hori bete ezik, langileak eskubidea izanen du kalte-ordain bat jasotzeko. Honelaxe kalkulatuko da: atzeratu den egun bakoitzeko bi eguneko lansaria ordainduko zaio, gehienez ere 15 egunekoa.

IV. TITULUA.–LAN OSASUNA

11. artikulua. Laneko segurtasuna eta osasuna. Arlo honetan, une bakoitzean indarra duen legediak agintzen duenari jarraituko zaio, eta, bereziki, Laneko Arriskuen Prebentzioari buruzko Legeak eta hura garatzen duten arauek ezarritakoari.

12. artikulua. Laneko arropa eta babes jantziak. Egiten den lanaren arabera behar diren jantzi eta ekipoak banatuko dira. Kanpoan diharduten langileei ere emanen zaizkie behar dituzten jantziak. Horiek guztiak zentzuz erabili eta hondatzen diren heinean berritu beharko dira. Horri dagokionez, espresuki ezartzen da ADISCOk jantzi eta ekipo erabiliak itzultzea eskatzen ahal duela berriak eman baino lehen.

Arlo honen inguruan sortzen ahal diren gorabeherak, hala nola jantziak aldatzeko datak eta maiztasuna, arropa mota eta haren ezaugarriak eta abar, langileen ordezkariek eta zentroko zuzendaritzak elkarrekin eztabaidatu ondoren erabakiko dira.

V. TITULUA.–LANALDIA, OPORRAK, LIZENTZIAK ETA ESZEDENTZIAK

13. artikulua. Lanaldia. Lanaldia 1760 ordukoa izanen da urtero. Egutegiak 220 lanegun eta benetako 1687 lanordu izanen ditu, 14. artikuluan aipatzen diren atsedenaldiak kenduta.

14. artikulua. Atsedenaldiak. Lanaldi jarraitua eta lanaldi zatitua duten langileendako 20 minutuko atsedenaldia ezartzen da, aurreko artikuluan zehaztutako lanalditik deskontatu beharrekoa.

Halaber, ADISCO enpresak atal eta langile talde bakoitzaren atsedenaldirako ordutegi zehatzak zehaztuko ditu. Atsedenaldi horiek, hala komeni denean, aldatzen ahalko dira antolaketaren edo produkzioaren arabera.

Lanaldien arteko eta asteko atsedenaldiei dagokienez, ADISCOk prestaturiko ordutegi eta egutegietan xedatu bezala eginen da. Horiek, betiere, legeak unean-unean aurreikusiriko gutxieneko iraupenak errespetatu beharko dituzte.

15. artikulua. Lan egutegia. Urtero, bezeroen beharren arabera, ADISCOk lan egutegi bat osatuko du, non ADISCOren egiturako atal eta bulegoetako txanda, ordutegi eta lanegunak zehaztuko baitira.

Zentroko atal eta bulegoetako lan egutegia zehaztu ondoren, ADISCOk aldaketak egiten ahalko ditu. Horien arabera, zentro osoak edo atal batzuek hasiera batean egutegian laneguntzat jotzen ez ziren egunetan lan egitea erabakitzen ahalko da. Kasu horietan, ordaina honelaxe eginen da: hasiera batean laneguna ez zen baina egiazki lan egin den egun bakoitzeko, egun eta erdiko atsedenaldia. Langileak edo haren legezko tutoreak, nahi badute, aukera izanen dute ordainean atsedenaldia hartzeko edo lan eginiko denboragatik diru-ordain bat kobratzeko. Diru-ordain hori 12 orduko lanari dagokiona izanen da, 24. artikuluan, aparteko orduei buruzkoan, ezarritakoaren araberakoa, hain zuzen ere.

Ordaineko atsedenaldi hori hartzeko egunei dagokienez, hitzarmen honetako 18. artikuluko 2. apartatuan norberaren aferen egunerako zehazten den prozedurari lotuko zaio.

Langileen Estatutuaren 34.2 artikuluan ezarritakoaren ondorioetarako, erabaki da lanaldiaren %100 modu erregularrean banatuko dela. Hortaz, ez da modu irregularrean banatzen ahalko, hitzarmen honetan berariaz xedatutakotik aparte.

16. artikulua. Oporrak. Hitzarmen honen eraginpeko langile guztiek urtean 30 egun naturaleko oporrak izanen dituzte, ordainduak.

Urteko opor horiek, urte naturalean hartu beharko direnak, ez dira eskudirutan ordaintzen ahalko, salbu eta lan harremana hautsiz gero edo eszedentzia hartuz gero.

Urte natural baten barnean kontrataturiko langileek zenbat denbora lan egiten duten, horri proportzioz dagozkion oporrak izanen dituzte.

Oporrak, horiek hartzean langileak kobratzen duen benetako soldataren arabera ordainduko dira.

Oporretarako txandak urtero zehaztuko dira, ahalik eta lasterren, ADISCOko zuzendaritzaren eta langileen ordezkarien arteko adostasunaren bidez. Bezeroen zerbitzu beharrak kontuan hartuko dira.

Hori horrela, bezeroen zerbitzu beharrak ezagutu ahala, zuzendaritza eta langileen ordezkariak, hitzarmena interpretatu eta betearazteko batzorde mistoan, bulego, atal edo lanpostu bakoitzerako oporrak hartzeko egunak zehaztuz joanen dira. Data hauek ezartzean, posible bada aukera batzuen artean hautatzea, ahalik eta lasterren jakinaraziko zaie langileei, beren bulego, atal edo lanposturako txanden artean hautatu dezaten. Kasu horietan, langileak hautatu ondoren, ezarririko egunak ezin izanen dira aldatu, salbu eta langilea eta ADISCO espresuki ados badaude.

Azken kasu hauetan lortu nahi den helburua oporrak bulego, atal edo lanpostu bakoitzean gutxieneko lanari eta bezeroendako zerbitzuari eutsiz hartzea denez, espresuki esku ematen zaio hitzarmena interpretatzeko batzorde mistoari, gutxieneko lana bermatuz, oporrak hartzeko lehentasunezko irizpideak eta metodoak ezartzeko, helburu hori ahalik eta hobekien erdiesteko. Lan maila eta lehentasunezko irizpide horiek ukituriko langileei jakinaraziko zaizkie, horiei lotuz norberak bere oporrak hartu ahal ditzan.

17. artikulua. ABE oporretan.

Indarreko legediaren arabera (LEren 38. artikulua) oporraldia eta aldi baterako ezintasuna bat baldin badatoz, langileak eskubidea du arrazoi horregatik gozatu ezin izan dituen opor egunak errekuperatzeko, behin baja bukatuta. Berdin da baja oporraldiaren aurretik edo oporraldian zehar hartu den.

Kasuan kasuko langilearen eta ADISCOren artean adostuko dute opor egun horiek noiz errekuperatuko diren, baina denbora muga bat dago: ezin dira 18 hilabete baino gehiago igaro opor egun horiek dagozkion urtea bukatzen denetik.

Ezin izan badira oporrak hartu amatasunagatik, haurdunaldiko arriskuengatik, metatutako edoskitze naturalagatik edo aitatasunagatik, opor egunak inguruabarra bukatzen denean hartzeko eskubidea izanen du langileak.

Baja medikoetarako aurreikusitako egoera bera da, eta, beraz, oporrak amatasuna, aitatasuna, haurdunaldiko arriskua edo metatutako edoskitze naturala bukatzean hartu ahal izanen dira. Alabaina, kasu horietan ez dago 18 hilabeteko epe mugarik, eta, beraz, oporrak dagozkion urtea bukatzen denetik edozein denbora tarte igarotzen ahal da opor horiek hartzeko.

18. artikulua. Baimen ordainduak.

18.1. Langileek, ahalik eta denbora gehienarekin aldez aurretik abisatuz eta ondoren justifikatuta, baimena dute lanera ez agertzeko, benetako soldata indarduna eskuratzeko eskubidea galdu gabe, honako arrazoi hauetakoren bat tartean denean, eta kasu bakoitzean adierazten den denboraz. Baimen horiek lehen lanegunean hasiko dira zenbatzen:

a) Ezkontza, izatezko bikotea edo bikote egonkorra: 15 egun natural. (behin bakarrik bikotekide beragatik).

b) Semearen edo alabaren jaiotza edo adopzioa: 4 egun natural, berehala edo adopzioaren ebazpen legala eman osteko hilabetean.

Erditze anizkoitzean, egun bat gehiago luzatuko da baimena ume bakoitzagatik.

c) Istripu edo eritasun larriagatik, ospitaleratzeagatik edo ospitaleratzerik behar ez, baina etxean atseden hartzea eskatzen duen ebakuntzagatik:

1.–Ezkontidea, edo izatezko bikotekidea, edo bikotekide egonkorra, eta seme-alabak: 5 lanegun.

2.–Gurasoak: 5 lanegun.

3.–Anai-arrebak: 5 lanegun.

4.–Gainerako ahaideak, odol edo ezkontza bidezko bigarren mailara artekoak (koinatu-koinaten senar-emazteak edo anai-arreben koinatu-koinatak izan ezik): 5 lanegun.

d) Ondoko hauen heriotzagatik:

1.–Ezkontidea, edo izatezko bikotekidea, edo bikotekide egonkorra, eta seme-alabak: zazpi egun natural.

2.–Gurasoak eta/edo legezko tutoreak: 5 egun natural.

3.–Anai-arrebak: bi egun.

4.–Aitona-amonak eta aitagin-amaginarrebak: bi egun.

5.–Gainerako ahaideak, odol edo ezkontza bidezko bigarren mailara artekoak: bi egun.

c) eta d) ataletako kasuetan arrazoi horiek direla-eta langileak Foru Komunitatetik kanpora joan behar badu, lizentzia hori egun natural bat luzatuko da, probintzia mugakideen kasuan, eta 2 egun natural, gainerakoetan.

Langileen Estatutuaren 37.3 b artikuluaren arabera, langileak joan-etorriren bat egin behar badu, baimena 4 egunetara luzatuko da d letrako 3 eta 4 puntuetako kasuetan.

Kasu guztietan, arrazoi horregatik langilea bidaia egin beharrean bada, baimen minimoa 4 egunekoa izanen da.

Ospitaleratze kasuetan, egoerak irauten duen denbora guztian izanen da baimena hartzeko aukera. Langileak ezein kasutan ezin izanen ditu hartu, gozamen geroratuaren sistema berriaren bidez, gertaera eragilearen ondotik egokituko litzaizkiokeenak baino lanegun gehiago.

e) Ohiko bizilekua aldatzea: egun bat.

f) Gurasoen, seme-alaben edo anai-arreben ezkontza: egun natural bat.

g) Osasun zentro publikoetan familiaren medikuari eta sendagile espezialistei egin beharreko kontsulta medikoen kasuetan eta errehabilitaziorako tratamendu mediko-funtzionaletan, lanaldiz kanpo joaterik ez dagoenean, baimen hauek hartzeko eskubidea izanen da:

1.–Kontsulta enpresa dagoen herrian edo hortik 8 kilometro bitarte dagoen herri batean egiten denean, gehienez ere ordu eta erdi.

2.–Kontsulta 8 kilometro baino gehiagora dagoen herri batean egiten bada, gehienez ere hiru ordu.

3.–Bisita horretarako 80 kilometro baino gehiago egin behar badira, egun osoa emanen da.

Aurreko puntuetan adierazten dena baino denbora gehiago emanez gero, baimen ordaindugabetzat joko da, salbu eta langileak egoki den ziurtagiriaren bidez osasun zerbitzuan zer ordutan sartu zen eta zeinetan atera frogatzen badu.

Baimen hau hartzeko ezinbestekoa da sendagileak eginiko ziurtagiria aurkeztea enpresan, kontsultan sartu eta hortik ateratzeko ordua adierazten duena.

Kontsulta medikora doan egun berean langileak lanera itzultzerik ez badu, atsedena hartu behar duelako, hurrengo egunean baja agiria aurkeztu beharko du, salbu eta kontsulta medikora lanaldia hasi eta gero joan bada. Kasu horretan, osasun txostena aurkeztu beharko du, sendagilearen agindua frogatzen duena.

Osasun zerbitzu publikoaren barrenean sartzen dira kasuan kasuko ikuskapen medikoak baimenduriko frogagiriaren bidez entitate pribatuek eginiko kontsulta, tratamendu eta errehabilitazioak.

h) Betebehar publiko eta pertsonal baterako, beharrezkoa den ezinbesteko denbora.

i) Titulu akademikoren bat lortzeko asmoz Hezkuntza eta Zientzia Ministerioak eta/edo Nafarroako Gobernuak antolatutako ikastaro ofizial edo aitortuetan inskribatutako langileak edo lanposturen bat eskuratzeko oposizioa egiten dutenak: azterketetara eta gaitasun- eta ebaluazio-probetara joan ahal izateko behar-beharrezkoa den denbora.

j) Eginkizun sindikaletan edo langileen ordezkaritza-lanetan aritzeko denbora, legeetan ezarritakoari jarraikiz.

k) Behar-beharrezkoa den denbora, erditu aurreko azterketa medikoak egiteko eta erditzea prestatzeko tekniketan trebatzeko, lanorduetan egin behar badira.

a) eta e) bitarteko ataletako lizentziak, biak barne, egun naturaletan kontatuko dira, eta, c) ataleko ospitaleratzeetarako egindako oharraren kasuan salbu, gertaera eragilea sortu den unetik beretik hartuko dira.

18.2. Baimen ordaindua, norberaren aferetarako:

Langileek urtean hiru egun izanen dituzte gehienez "norberaren aferetarako" baimen ordaindu gisa. Egun horiek ez dira opor eguntzat hartzen eta artikulu honetako aurreko idatz-zatietan aipatzen ez diren beharretarako erabiliko dira.

Baimen ordaindu hori hartzeko, langileak 48 ordu lehenago jakinarazi beharko du idatziz noiz hartu nahi dituen egun horiek (denak edo horietako batzuk izan). Arduradunak idatziz onartu edo ukatuko ditu egun horiek, arrazoia adierazita.

Onartu ezik, baimen hori ezin izanen da egun horietan hartu. Ukoa, baina, arrazoi objektibo eta frogagarrietan oinarritzen ahalko da bakarrik, hala nola, egun berean beste eskaera batzuk izateagatik, beste langile batzuk gaixo edo oporretan egoteagatik edo baimena hartuak izateagatik eta, oro har, antolamenduagatik edo ekoizpenagatik.

19. artikulua. Ordaindu gabeko baimenak. Langile guztiek eskubidea izanen dute urtero gehienez ere 15 eguneko baimena eskatzeko. 20 egun lehenago gutxienez eskatuz gero eta zentroan egoera berean bi langile baino gehiago egon ezik, eman egin beharko zaizkie.

Behar bezala frogaturiko salbuespenezko kasuetan, ADISCOk, langilearekin edo haren legezko tutorearekin ados dagoela, ordaindu gabeko baimen luzeagoak ematen ahalko dizkio.

20. artikulua. Eszedentziak.

20.1. Borondatezko eszedentzia norberaren aferetarako.

Langile finko orok aukera izanen du hiru hilabetetik urtebetera bitarteko borondatezko eszedentzia hartzeko, lanpostua gorderik. Lanpostua gordetzeko denbora bukaturik, langileak, ADISCOra itzuli ez bada, eskatzen ahalko du eszedentzia urtebetez luzatzea, lanpostua gorde gabe, baina lanpostu hutsak betetzeko lehentasunezko eskubideari eutsiz, zentroan dauden kategoria berean edo antzekoan.

Eszedentzia hartuz gero, bukatzen denetik bi urte igaro behar dira eskubide horretaz berriro baliatu ahal izateko.

20.2. Borondatezko eszedentzia lan munduan sartzeko.

Zentroko desgaitasunak dituzten langileei lan munduan sartzeko erraztasunak emateko, ohiko enpresa batean (enplegurako zentro berezia ez den batean) zerbitzu ordainduetan hasiko dela frogatzen duen desgaitasuna duen langile orok eskubidea izanen du, hori dela eta, borondatezko eszedentzia hartzeko, gehienez ere hiru urtez, lanpostua gorderik. Lanera itzultzea eskatu ondoren, hilabeteko epean itzuli beharko du.

20.3. Gainerako kasuak.

Aurreko apartatuetan aurreikusi ez diren gainerako eszedentzien kasuetarako, Langileen Estatutuaren 46. artikuluan xedatuari jarraituko zaio (Langilearen Familia eta Lan Bizitza Uztartzea sustatzeko azaroaren 5eko 39/1999 Legearen ondoko idazketa), baita aplikatu beharreko beste edozein legezko arauri ere.

21. artikulua. Adingabearen jaiotza eta zaintza.

Gai hauek honako hauetan xedatutakoaren arabera arautuko dira: Emakumeen eta Gizonen arteko Berdintasun Eraginkorrerako 3/2007 Legea, Lanean gizonen eta emakumeen arteko tratu eta aukera berdintasuna bermatzeko premiazko neurriei buruzko martxoaren 1eko 6/2019 Legegintzako Errege Dekretua eta Langileen Estatutua.

VI. TITULUA.–BALDINTZA EKONOMIKOAK

22. artikulua. Soldata egitura. Soldaten egiturak kategoria bakoitzeko oinarrizko soldata, denbora edo lan unitateko sari finkoa den aldetik, eta, hala bada, kasuan-kasuan bidezko diren soldata osagarriak, hurrengo artikuluetan zehazten direnak, bilduko ditu.

Kategoria bakoitzeko oinarrizko soldataren bidez egiazko lanaldia eta hitzarmen honetan edo legeetan ezarririko atsedenaldiak pagatzen dira. 2025erako oinarrizko soldataren hileroko balioak hitzarmen honetako soldata tauletako eranskinean ageri dira.

Uztailaren 17ko 1368/1985 Errege Dekretuaren arabera kontrataturiko langileen oinarrizko lansaria gobernuak urtean-urtean finkatzen duen lanbideen arteko gutxieneko soldatarekin bat etorriko da. Errege dekretu hori 427/99 Errege Dekretuaren bidez aldatu zen. Honen bitartez enplegurako zentro berezietan diharduten eta desgaitasunak dituzten pertsonen lan harreman berezia arautzen da.

Langileen Estatutuaren 26.4 artikuluan xedatutakoari jarraikiz, hitzarmen honetan ezarrita dauden ordainsari guztiak gordinak dira. Ohartarazi beharra dago, halaber, soldaten taulen eranskinean ageri diren zenbateko guztiak lanaldi osoari dagozkiola.

23. artikulua. Kilometrajea. Langile batek bere autoa zentroaren edo ADISCOren beharrak bete edo eginkizunen bat egiteko erabili behar baldin badu, 2025ean 0,38 euro hartuko ditu eginiko kilometro bakoitzeko. Zenbateko hori urtero eguneratuko da Nafarroako Foru Komunitatearen KPIaren arabera.

24. artikulua. Aparteko orduak. ADISCO CEEn lan egiten duten eta desgaitasuna duen pertsonek aparteko orduak egin ahal izateko, uztailaren 17ko 1568/1985 Errege Dekretuaren 13. artikuluan ezarritakoa bete beharko da. Dekretu horren bidez, desgaitasuna duten eta enplegurako zentro berezietan lan egiten duten pertsonen lan harreman berezia arautzen da.

Bi alderdiek erabaki dute aparteko orduak ezinbesteko kasuetan baino ez direla eginen.

Eginez gero, gehienbat atsedenaldiekin ordainduko dira, honelaxe: lanegunetan, astelehenetik ostiralera, eginiko aparteko ordu bakoitza ordu bateko atsedenaldia eta larunbatetan, igandeetan, jaiegunetan edo gauaz (22:00etatik 6:00ak arte) eginiko aparteko ordu bakoitzeko, ordu eta erdiko atsedenaldia.

Desgaitasuna duen langileari edo haren legezko tutoreari, dirua nahiago badu, 2025eko urtarrilaren 1etik aurrera, 9,42 euro emanen zaizkio eginiko ordu bakoitzeko.

Zenbateko hori lanbide arteko gutxieneko soldatan izaten diren gorakaden arabera eguneratuko da.

Aparteko orduaren prezioa honelaxe kalkulatuko da: urteko lansaria (osagarriak barne) zati urtean eginiko lanorduak. Ordu arruntetatik kanpo eginez gero, dagokion koefizientea gaineratuko zaio.

25. artikulua. Aparteko haborokinak. Langile guztientzako bi aparteko haborokin izanen dira, bata udan eta bestea eguberrietan. Haietariko bakoitzaren zenbatekoa, osorik kobratzeko eskubiderik izanez gero, hilabeteko oinarrizko soldata izanen da, edo bestelako pizgarria gehiturik, horrelakorik baldin bada.

Aparteko paga horiek urtean urteko ekainaren 30ean eta abenduaren 22an ordainduko dira, egun horretan indarra duten zenbatekoen arabera.

Udako eta eguberrietako haborokinen sorrarazpena seihileko naturalekoa izanen da bi kasuetan, eta ordainketa, kontaketa edo likidaziorako hainbanaketa, hasiera edo bukaera ezartzeko, urtarrilaren 1etik ekainaren 30era bitarteko tartea hartuko da lehen kasuan eta uztailaren 1etik abenduaren 31 bitartekoa bigarrenean.

VII. TITULUA.–HOBEKUNTZA SOZIALAK

26. artikulua. Lanerako aldi baterako ezintasuna eta haurdunaldiko arrisku egoera. Gorabehera bakoitzerako legez xedaturikoaren arabera langile bakoitzari dagokion prestazioak osatuko ditu ADISCOk, zehaztapen hauei jarraikiz:

Lan istripuen ondoriozko (in itinere istripuak barne) aldi baterako ezintasunetarako eta lanbide eritasunetarako, kotizazio-oinarriaren %100era arte osatuko da, baja hasten denetik bukatzen den arte.

–Langileak aldi baterako ezintasuna baldin badu eritasun larrietarako tratamendu espezifikoren bat jaso ondoren, tratamenduak irauten duen bitartean egun horietako kotizazio-oinarriaren %100era arte osatuko da.

Nolanahi ere, adostasunez ezin bada erabaki osagarria jasotzea egoki den ala ez patologia kontuan izanda, Hitzarmenaren Batzorde Paritarioaren ebazpenaren bidez ebatziko da.

–Eritasun arruntaren edo lanez kanpoko istripuaren ondoriozko urteko lehenbiziko bajan, kotizazio-oinarriaren %75era arte osatuko da bajaren lehen egunetik baja amaitu arte.

Hurrengo bajetan, langileak legez ezarririk dagoena kobratuko du.

–Halaber, egoera horrek dirauen bitartean, gehienez ere kotizazio-oinarriaren %100era bitarte osatuko da, legez xedaturikoarekin bat, haurdunaldian arriskuak dituzten eta amatasun bajak hartzen dituzten langileei dagozkien prestazioetarako.

–Edozein kasutan, indarreko legediaren arabera jardunen da gai horietan.

Hobekuntza lehen egunetik aurrera ordainduko da eta, aldi baterako ezintasunak dirauen bitartean, ordainketa delegatuaren bidez.

27. artikulua. Prestakuntza. ADISCOk konpromisoa hartzen du bere langileen prestakuntza etengabea begiratzeko. Horretarako, urtero prestakuntzarako plan bat osatuko da. Haren diseinuaz eta haren garapenaz aldian-aldian argibideak emanen zaizkio batzordeari. Batzordeak nahi adina iradokizun aurkezten ahalko ditu.

28. artikulua. Erretiroak. ADISCOk errelebo kontratua eskainiko du horretarako legez ezarritako baldintzak betetzen dituzten pertsona guztientzat.

VIII. TITULUA.–DIZIPLINA ARAUBIDEA, FALTAK ETA ZEHAPENAK

29. artikulua. Zehapenak jartzeko gaitasuna. Zentroko zuzendaritzak zehapenak jartzen ahal dizkie langileei, lanean faltak egiteagatik, titulu honetan ezarritako falten eta zehapenen mailaketari jarraikiz.

30. artikulua. Falten mailaketa. Langileek lanean edo lanaren ondorioz egiten dituzten diziplinazko faltak. Arinak, astunak edo oso astunak izaten ahal dira.

A) Falta arinak dira:

A.1) Lankideenganako errespetu edo begiramendu falta.

A.2) Hilean behin lanera ez joatea, bidezko arrazoirik gabe. Langilea lanaldia hasi eta ordubete pasa iristen bada lanera, lanera ez joatea bezala joko da. Horrek ez du esan nahi egun horretako lansari osoa galduko duenik, lanetik kanpo emaniko denborari dagokiona baizik.

A.3) Puntualtasun falta, arrazoirik eman gabe, ADISCOk ezarritako ordutegiaren arabera, hiru aldiz hilabete batean gehienez. Langilea zentrora berandu iritsi dela ulertuko da lanaldia hasteko ordutik kontatuta ordubete igaro baino lehen iristen denean.

A.4) Gorputz-higienerik eza.

A.5) Aldi baterako ezintasun kasuan, baja-agiriak edo baja berresteko agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta Gizarte Segurantzaren ondorioetarako garrantzitsuak izan daitezkeen datuak ere.

B) Falta astunak dira:

B.1) Hilabete berean lau aldiz berandu iristea lanera, bidezko arrazoirik izan gabe.

B.2) Hilabetean bi egunetan lanera huts egitea, bidezko arrazoirik izan gabe.

B.3) Lantokitik ateratzea, bidezko arrazoirik izan gabe.

B.4) Noizean behin mozkortzea edo bestelako drogak hartzea.

B.5) Aldi baterako ezintasun kasuan, baja-agiriak edo baja berresteko agiriak horretarako ezarritako epean ez komunikatzea, behin baino gehiagotan, ez eta helbide aldaketak eta, oro har, egoera zibilari eta familiarrari buruz zergen eta Gizarte Segurantzaren ondorioetarako garrantzitsuak izan daitezkeen datuak ere, langileak lehenago ere arrazoi horrengatik zehapena jaso duenean.

B.6) Gorputz-higienerik eza, behin eta berriro, langilea lehen ere horrexegatik zehatua izan denean.

B.7) Beste langile baten laneratzea simulatzea, haren ordez fitxatuz.

B.8) Diziplinarik edo obedientziarik eza lanean.

B.9) Hiru falta arin egitea, desberdinak izanagatik, hiruhileko berean, tartean falta horien idatzizko zehapena izan denean.

C) Falta oso astunak dira:

C.1) Lantokian diziplinarik edo obedientziarik eza, behin eta berriro, langilea lehen ere horrexegatik zehatua izan denean.

C.2) Lanera behin eta berriz berandu iristea, bidezko arrazoirik izan gabe, hamar aldiz baino gehiago hilean edo hogei aldiz baino gehiago hiru hilabetean.

C.3) Lanera hiru egun jarraian huts egitea edo bost egun tartekatutan hilabete batean, bidezko arrazoirik eman gabe.

C.4) Bajan dagoen bitartean langileak norbere zein besteren kontura lan egitea, bai eta baja lortu edo luzatze aldera egindako edozer ere.

C.5) Lankideak hitzez larriki iraintzea.

C.6) Lankideei eraso egitea.

C.7) Sexu jazarpena.

C.8) Lantokian behin eta berriro mozkortzea edo bestelako drogak hartzea, langilea lehen ere horrexegatik zehatua izan denean.

C.9) Agintekeria.

C.10) Leialtasunik eza eta, eskuarki, kontratuko fede ona urratzen duen beste edozein portaera.

C.11) ADISCOren edo lankideen ondasunak lapurtu edo ebastea.

C.12) Sei hilabetean falta astun bat baino gehiago egitea, nahiz eta mota desberdinetakoak izan, baldin eta langileari, haien ondorioz, zehapenik jarri bazaio.

31. artikulua. Zehapenak. Falten kalifikazioaren arabera enpresak ezartzen ahal dituen zehapenak hauek dira:

A) Falta arinengatik:

–Hitzezko kargu hartzea. Behin eta berriz gertatzen baldin bada, idatzizko kargu-hartzea.

B) Falta astuna egiteagatik:

–Idatzizko kargu-hartzea eta langileen ordezkariari edo enpresa batzordeari jakinaraztea.

Gehienez hamabost egunez enpleguz eta soldataz gabetzea, falta behin baino gehiagotan egin denean.

C) Falta oso astuna egiteagatik:

–Kaleratzeko ohartarazpena.

–Enplegu eta soldata gabe uztea, 60 egunez gehienez.

–Kaleratzea.

Lanera arrazoirik izan gabe berandu iristeagatik egiten diren puntualtasun faltak gehiago zehaztuz, zehapen hauek ezarriko dira:

–Lehenbizikoz eta bigarrengoz berandu iristea: hitzezko kargu-hartzea.

–Hilabete berean hirugarrenez berandu iristea: idatzizko kargu-hartzea.

Puntualtasun-falta egin aurreko hilabetean ere bitan edo gehiagotan berandu iritsi bada, zehapen hauek ezarriko dira:

–Lehenbiziko eta bigarren puntualtasun-falta: enplegu eta soldatarik gabe uztea egun batez.

–Hilabete berean hirugarrenez berandu iristea: bi egunez enplegu eta soldata gabe uztea.

32. artikulua. Zehapen prozedura. Zehapen ororen berri, hitzez kargu hartzea salbu, idatziz emanen zaio langileari. Jakinarazpen horretan zehatz-mehatz esanen zaio zein falta egin duen eta noiz, faltaren kalifikazioa eta zer zehapen jarriko zaion.

Halaber, ADISCOk falta astun edo oso astunengatik jartzen diren zehapen guztien berri emanen die langileen ordezkariei. Zehapena ezarririk, haren datatik bi hilabete arte luzatzen ahal da bete gabe.

33. artikulua. Falten preskripzioa. Mailari begiraturik, falta arinak hamar egunen buruan preskribatuko dira, astunak hogei egunen buruan, eta oso astunak hirurogeiren buruan, ADISCOk faltaren berri izaten duen egunetik aitzina, eta, nolanahi ere, falta egin eta sei hilabeteren buruan.

IX. TITULUA.–ESKUBIDE SINDIKALAK

34. artikulua. Ordu sindikalak eta haien metaketa. Langileen ordezkariek 180 ordu izanen dituzte urtean ordezkari lanetarako. Kreditu hau erabili ahal izateko, aski da ahalik eta lasterren zuzendaritzari jakinaraztea noiz hartu nahi diren ordu horiek eta zenbat denboraz, eta gero justifikatzea.

Lan sindikala lan orduetatik kanpo egiten denean, ordu haiek konpentsatuko dira, denbora hori behar bezala justifikatu eta gero. Ordu haien ordez atsedenaldi ordaindua hartzen ahalko du ordezkari sindikalak, ordu haien ondoko bi lanegunetan. Hala ere, ordu horiek ondorengo beste batzuei metatzen ahalko zaizkie, hilabeteko epean, lehenbiziko ziurtagiria aurkezten denetik hasita.

Langileen Estatutuaren 68. artikuluko e) apartatuko azken lerroaldean xedaturikoarekin bat, posible izanen da langileen ordezkari bakoitzari dagozkion orduak metatzea, guztira gehienekoa gainditu gabe, osorik edo hein batean kide bakar batek hartuta.

Horretarako, orduak metatzea erabakiz gero, langileen ordezkariek zuzendaritzari jakinaraziko diote nork hartuko dituen orduak, zer baldintzatan eta zer epetan.

35. artikulua. Iragarki taula eta artxiboa. Langileen ordezkarien lana erraztearren, sindikatuentzako iragarki taula bat eta gutunontzi bat jarriko dira, proposamenak eta iradokizunak jasotzeko. Halaber, ADISCOk agiriak artxibatzeko eta bulegoko material txikia erosteko behar diren baliabideak ordainduko ditu.

36. artikulua. Biltzeko eskubidea. Langileen Estatutuaren 4. artikuluan, 77.ean eta hurrengoetan xedatutakoari jarraikiz, bermatu eginen da langileek biltzeko duten eskubidea.

Batzarrak egitekotan, gutxienez 48 ordu lehenago jakinarazi beharko zaio zentroko zuzendaritzari; betiere adieraziko da zein diren jorratu beharreko gaiak eta zentrotik kanpoko zer pertsona joanen diren bileretara, halakorik baldin badago. Lanorduetatik kanpo eginen dira, ADISCO espresuki ados dagoenean izan ezik.

37. artikulua. Langileen ordezkariei eman beharreko informazioa. ADISCOk, Langileen Estatutuaren 64. artikuluaren arabera, informazioa emanen die langileen ordezkariei zentroaren bilakaera ekonomiko eta produktiboari buruz, baita kontratazioei buruz eta legez aurreikusten diren gainerako gaiei buruz ere.

X. TITULUA.–XEDAPEN GEHIGARRIAK ETA AZKEN XEDAPENAK

Lehen xedapen gehigarria.–2025., 2026., 2027. eta 2028. urteetako soldata igoera.

Lanbide arteko gutxieneko soldatari eta oinarrizko soldataren oinarrian LAGS duten kategoriei dagokienez izan ezik, gainerako lansari kontzeptuak (beste kategorietako oinarrizko lansaria, ekoizpen osagarria, aparteko orduak eta kilometrajea) ehuneko hauetan handituko dira:

a) –2025erako: Nafarroako KPIa 2024ko abenduaren 31n.

b) –2026rako: Nafarroako KPIa 2025eko abenduaren 31n.

c) –2027rako: Nafarroako KPIa 2026ko abenduaren 31n.

d) –2028rako: Nafarroako KPIa 2027ko abenduaren 31n.

Betiere, lanbide arteko gutxieneko soldataren igoera urte bakoitzeko KPIaren ehunekoei dagozkien zenbatekoa baino gehiago izanez gero, oinarrizko lansariak urte bakoitzeko lanbide arteko gutxieneko soldata gehitzen dena handituko dira.

Azken xedapenetako lehena.–Arau subsidiarioak. Hitzarmen honetan arauturik ez dagoen guztian, Desgaitasuna duen Pertsonei Arreta Emateko Zentro eta Zerbitzuen Hitzarmen Kolektibo orokorrean, Langileen Estatutuan eta hura garatzen duten xedapenetan ezarritakoari jarraituko zaio, eta, bereziki, martxoaren 12ko 427/1999 Foru Dekretuaren bidez aldatutako uztailaren 17ko 1368/1985 Errege Dekretuan xedatutakoari, non arautzen baita desgaitasuna izanik enplegurako zentro berezietan aritzen diren pertsonen lan harreman berezia, baita foru dekretu hori ordeztu edo osatzeko ematen diren beste arau batzuetan eta indarreko araudi guztian xedatutakoari ere.

Azken xedapenetako bigarrena.–Batzorde Paritarioa Hitzarmen hau interpretatu eta betetzerakoan sortzen ahal diren zalantzak ebazteko, eta lan arloko agintaritzari eta jurisdikzio organoei legez aitortu zaizkien eskumenak deusetan ukitu gabe, Interpretaziorako Batzorde Paritario bat sortuko da, zeinetan bi alderdiek hartuko baitute parte. Hasiera batean, hitzarmena interpretatu eta betetzean sortzen ahal diren liskarrak hortxe konponduko dira. Batzordea hitzarmena sinatu eta hilabeteko epean gehienez eratuko da.

Batzorde horrek lau kide izanen ditu. Zuzendaritzak bi izendatuko ditu. Beste biak hitzarmen kolektibo hau sinatzen duten langileen ordezkarien artetik hautatuko dira.

Aholkulariek laguntzen ahalko diete bi alderdien ordezkariei. Eztabaidetan parte hartuko dute eta hizpidea izanen dute, baina botorik ez.

Bi alderdietako edozeinek biltzeko deia eginik, gehienez ere 15 eguneko epean bildu beharko da. Deialdia enpresaren bidez edo sindikatuetako ordezkarien bidez eginen da.

Batzorde Paritarioak eginkizun hauek izanen ditu:

a) Hitzarmen honen interpretazioaren inguruan pizten diren aferen berri ematea lan arloko agintaritzari.

b) Hitzarmen kolektibo honetan itundutakoa betetzen dela begiratzea.

c) Hitzarmen kolektibo honen aplikaziotik pizten ahal diren aferak ezagutzea eta haiei buruzko erabakiak hartzea, eginkizunei, langileei edo lurraldeari eragiten badiete, esaterako: lan baldintzak errotik aldatzea, mugikortasun profesionala, enplegu erregulazioko espedienteak eta hitzarmen kolektibo honek arautzen dituen gai oro, adostasunez Batzorde Paritarioak baloratzea erabakitzen dituenez gain.

d) Bitartekaritza eta arbitraje lana egitea alderdiek berak azter ditzan utzitako aferetan. Batzorde Paritarioak ebatzi eginen ditu bitartekaritza eta arbitrajearen mendean jarritako gaiak, gehienez ere zazpi laneguneko epean.

e) Laneko segurtasun eta osasun arloan aurkezten diren aferak ezagutu eta erabakiak hartzea.

f) Ezarrita diren eginkizun horiez gain, Batzorde Paritarioak, eratzen den unean, bere funtzionamendurako erregelamendua egokituko du indarra duen legezko araudiarekin bat, araudi horrek ezarritako eginkizun eta eskumenak barne direla.

g) Baliozkoak izanen badira, alderdi bakoitzeko kideen %50ek baino gehiagok egon beharko dute bileran erabakiak hartzen direnean.

Azken xedapenetako hirugarrena.–Nafarroako Lan Gatazkak Konpontzeko Auzitegiaren onarpena.

1. Bi alderdiek erabaki dute lan hitzarmen hau interpretatu eta aplikatzerakoan sortzen diren gatazkak konpontzeko, adiskidetze eta bitartekotza aldietan, Nafarroako Lan Gatazkak Konpontzeko Auzitegiaren iritziaren mende jarriko direla, betiere honako hitzarmen kolektibo honek eratutako Batzorde Paritarioan adostasunik lortu ez bada. Era berean, adierazten dute ahaleginak eginen dituztela eraginpeko alderdiak auzitegi horren arbitraje prozeduraren esanetara jar daitezen.

Beraz, artikulu honek balio du alderdiak gatazkak konpontzeko arbitraje organo horri berariaz atxikitzeko, eraginkortasun osoa duela, eta ondorioz, itunak ADISCO, sindikatuen ordezkariak eta langileak behartzen ditu beren desadostasunak aipatu organoaren bitartekotza eta adiskidetze prozeduretan azaltzera epaiketara jo aitzin. Hortaz, ez da nahitaezkoa alderdien desadostasun edo gatazka bakoitzerako atxikimendu berariazkoa eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

2. Orobat, hitzarmen kolektibo honen sinatzaileek ahaleginak eginen dituzte langileen eta ADISCOren artean sor daitezkeen banakako gatazkak Nafarroako Lan Gatazkak Konpontzeko Auzitegiko adiskidetze, bitartekotza eta arbitraje prozeduren mendean jar daitezen borondatez eta berariaz, Nafarroako Foru Komunitateko Nafarroako Lan Gatazkak Auzibidetik Kanpo Konpontzeko Prozedurei buruzko Lanbide arteko akordioaren bigarren xedapen gehigarrian jasotako gaietan.

3. Baldin eta hitzarmen honetan adostutako lan baldintzak ez badira aplikatzen, honako hau izanen da Langileen Estatutuaren 41. eta 82.3 artikuluetan ezarritako lan baldintza kolektiboak aldatzeko eta ez aplikatzeko desadostasunak ebazteko prozedura espezifikoa:

1.–Batzordeari kontsulta egitea, 15 eguneko epean.

2.–Akordiorik ez bada, hitzarmeneko Batzorde Paritarioari emanen zaio eskumena, zazpi egunean ebatz dezan.

3.–Nafarroako Lan Auzitegira bidaltzea, bitartekaritza eta arbitraje prozeduretara.

4.–Alderdiek adostu dute beharrezkoa izanen dela bi alderdien arteko akordioa (enpresaren ordezkaritza eta langileen ordezkaritzaren gehiengoa), hitzarmena ez aplikatzearen gaineko desadostasuna Hitzarmen Kolektiboetarako Aholku Batzorde Nazionalaren edo Nafarroako Foru Komunitatean sortzen ahal den hirualdekoaren mende jartzeko.

ERANSKINA.–2025EKO SOLDATA TAULAK

(22., 23., 24. eta 25. artikuluak)

Iragarkiaren kodea: F2600536