1. NAFARROAKO FORU KOMUNITATEA
1.5. ESTATUTUAK ETA LAN HITZARMEN KOLEKTIBOAK
5C/2026 EBAZPENA, urtarrilaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita erregistratu, gordailutu eta Nafarroako Aldizkari Ofizialean argitaratu dadila Iruñeko Udaleko eta haren erakunde autonomoetako langileen akordio kolektiboa.
Ikusi da Iruñeko Udaleko eta haren erakunde autonomoetako langileen akordio kolektiboa aldatzeko erabakiaren testua (kodea: 31100182132017), zeina erregistroan sartu baitzen 2026ko urtarrilaren 8an eta Udaleko eta sindikatuetako ordezkariek sinatu baitzuten 2025eko urriaren 30ean.
Funtzionarioen eta administrazio-kontratudunen lan arloko agintaritzak akordioaren testuaren kontrol formalaren eskumena besterik ez du, Langileen Estatutuaren 85.3 artikuluan hitzarmen kolektiboetarako ezarritako gutxieneko edukia betetzen duela egiaztatzeko.
Aurrekoa gorabehera, ohartarazi behar da toki erakundeak abuztuaren 30eko 251/1993 Legegintzako Foru Dekretuaren mende daudela. Foru dekretu horrek Nafarroako Administrazio Publikoen zerbitzuko Langileen Estatutuaren testu bategina onesten du, eta dekretuan ezartzen diren arauak aginduzkoak eta ez gutxienetakoak dira.
Bat etorriz xedatuta dagoenarekin Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretuaren 84.3 artikuluan, bai eta Langileen Estatutuaren Legearen testu bategina onetsi zuen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ere.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidan eskudantziak erabiliz,
EBAZTEN DUT:
Lehena.–Agindua ematea Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskriba dadin Iruñeko Udaleko eta haren erakunde autonomoetako langileen akordio kolektiboa aldatzeko erabakia (kodea: 31100182132017).
Bigarrena.–Nafarroako Aldizkari Ofizialean argitaratzeko agintzea, orok jakin dezan.
Iruñean, 2026ko urtarrilaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.
AKORDIOA, IRUÑEKO UDALEKO ETA HAREN ERAKUNDE AUTONOMOETAKO FUNTZIONARIOEN ETA ADMINISTRAZIO-KONTRATUDUNEN AKORDIO KOLEKTIBOA ALDATZEN DUENA
Iruñeko Udaltzaingoaren ordainsariak arautzeko legezko betebeharra betez, eta erregelamendu horretan xedatutakoak eta Iruñeko Udaltzaingoaren ordainsarien gainerako baldintzei buruz adostutakoak bat egin dezaten, Iruñeko Udaleko Giza Baliabideen Zuzendaritzak eta haren ordezkaritza sindikalak erabaki dute honako aldaketa hauek egitea akordio kolektiboan:
Akordio kolektiboaren 6.2 artikulua aldatzea:
Honela idatzita geldituko da behin betiko:
"2. Udaltzainentzat lanaldia 8 orduko txandaz osatua izanen da, eta oro har 1.a) puntua aplikatuko zaie, bai ordu-kontaketarako bai txanda-banaketarako.
Txanda horiek honela garatuko dira oro har, hurrengo apartatuan ordutegiak gainjartzeari dagokionez xedatutakoa izan ezik:
a. Goizeko txanda: 06:30etik 14:30era.
b. Arratsaldeko txanda: 14:30etik 22:30era.
c. Gaueko txanda: 22:30etik 06:30era.
Ordutegi-gainjartzea arautzeko konpromisoa betez, aldeek gainjartzea adosten dute, VII. eranskin berriarekin bat.
Txandak zerbitzuaren eraginkortasuna bilatuz aplikatuko dira, txandetan langile operatiborik ez egotea saihesteko eta lan-txanda amaitzean gorabeherei erantzun behar izatearen ondorioz lanaldia luzatzeagatiko aparteko orduak murrizteko".
6 bis artikulua gehitu zaio akordioari, eta honela idatzita geratuko da:
6 bis artikulua. Udaltzaingoan gehitutako ordutegi-araubideak.
1. Ordutegi malguaren araubidea eta egunetan zenbatzeko ordu-araubidea onesten dira Iruñeko Udaltzaingoan.
Ordutegi malguaren araubidea:
Ordutegi malguaren araubidea akordio honen VIII. eranskinean zerrendatutako unitateei aplikatuko zaie; izan ere, unitate horietan, esleituta dituzten polizia-eginkizunen arabera, eguneko lanaldia eginkizun horiek betetzearen mende geratzen da, eta, beraz, ezinezkoa da aldez aurretik zehaztea.
Eguneko lanaldiak 8 orduko iraupena izanen du gutxienez, eta 10 ordukoa gehienez etenik gabe. Ohiko lanalditik gora lan egindako orduak urteko lanaldiari egotziko zaizkio, eta hamargarrenetik aurrera lan egindakoak aparteko ordutzat joko dira.
Dagokion buruak, eguneko lanaldia programatzean, hiru orduz aurreratu dezake lanaldiaren hasiera edo atzeratu bukaera, gehienez 5 lanalditan urtean langile bakoitzeko. Gutxienez 48 ordu lehenago jakinaraziko du. Nolanahi ere, planifikatutako lan-txanda mantenduko da, eta txanda horren ohiko ordutegia errespetatuko da.
Egunetan zenbatzeko araubidea:
Egunetan zenbatzeko araubidea agintariak babesteko ardura duen Udaltzaingoko unitateko langileei aplikatuko zaie (Segurtasun Instituzionaleko Taldea); izan ere, esleituta dituen eskumenak babesten dituzten agintarien agendaren araberakoak dira, eta, beraz, ezin da ordutegi-aurreikuspenik egin.
Araubide horretan zerbitzuak ematen dituztenek bete beharreko urteko lanaldia Udaltzaingoaren lanaldi orokorrean finkatuta geratzen da, eta lanaldi horretan sartzen da benetan emandako zerbitzu-denbora.
Langile horien sarrera-orduak agintariaren jardueraren araberakoak izanen dira. Eguneko txanda bat ezartzen da, 8 eta 10 ordu bitartekoa; eta lanaldia, goizeko txandan, 06:00etatik 09:00etara bitartean hasiko da, eta arratsaldeko txandan, 13:30etik 15:30era bitartean. Unitate organikoko arduradunak erabakiko du noiz hasiko diren lan-txandak eta zein izanen den lanaldia.
Lanaldi bakoitza gehienez 10 ordukoa izanen da, eta zortzigarrenetik gora lan egindako orduak urteko lanaldiari egotziko zaizkio.
Egunetan zenbatzeko ordu-araubidea aplikatu behar zaien unitateak aldatzea, bai eta unitate berriak sartzea ere, Giza Baliabideen zinegotzi ordezkariaren ebazpen bidez formalizatuko da, udaltzainburuak txostena egin eta negoziazio-mahaian negoziatu ondoren.
Akordio kolektiboaren 9.6 artikulua aldatu da, eta honela idatzita geldituko da:
Sanferminetan zerbitzuak emateagatiko konpentsazioa atsedena hartuta edo dirutan egiten ahalko da, edo bestela, erdia eta erdia –erdia atseden gisa eta beste erdia dirutan–.
Konpentsazio ekonomikoa, zaindariaren jaietan lan egiteagatiko konpentsazio gisa hartuta, jarraian zehazten diren zenbatekoetan finkatzen da. Zenbateko horiek eguneratzen ahalko dira ordainsari guztietarako urtero zehazten den soldata-igoeraren ehuneko berean. Konpentsazio ekonomiko horri sanferminetako lanaldi bakoitzeko gehitutako aparteko orduari dagokion zenbatekoa gehituko zaio, zeina jasotzen baita artikulu honetako 3.c.1, 3.c.2 eta 3.c.3 puntuetan.
VII. ERANSKINA.–GAINJARTZE-SISTEMA IRUÑEKO UDALTZAINGOAN
Iruñeko Udaltzaingoaren lanaldi eta ordutegiak / gainjartzea
A motako txanda.
A0.
–Astelehenetik ostiralera: Arloburuak.
- 07:00etatik 15:00etara. Brigadako burua.
B motako txanda.
B1.–Trafikoko Taldea.
–Astelehenetik ostiralera:
- 07:00etatik 15:00etara.
- 14:00etatik 22:00etara.
B2.–Hurbileko Poliziaren Taldea.
–Astelehenetik igandera:
- 07:00etatik 15:00etara.
- 15:00etatik 23:00etara.
C motako txanda.
C1.–Hurbilekoa-Prebentziokoa, AGINTARIAK.
–Astelehenetik igandera: Prebentzioko Taldea (Laguntzako Taldea izan ezik).
- 06:00etatik 14:00etara.
- 14:00etatik 22:00etara.
- 22:30etatik 06:30era.
VIII. ERANSKINA.–UDALTZAINGOAREN ZEIN UNITATETAN APLIKATUKO DEN ORDUTEGI MALGUAREN ARAUBIDEA
–Bitartekaritza eta Instrukzioko Arloa, Komunitate Poliziako Taldea izan ezik.
–Atestatuetako Taldea.
Iragarkiaren kodea: F2600537
