Iragarkia

33. ALDIZKARIA - 2026ko otsailaren 16a

1. NAFARROAKO FORU KOMUNITATEA

1.7. BESTELAKOAK

13/2026 EBAZPENA, urtarrilaren 20koa, Enpresen Sustapenerako eta Azpiegituretako zuzendari nagusiak emana, zeinaren bidez aurretiazko administrazio baimena ematen baita energia elektrikoa ekoizteko "Santa Brígida" eguzki instalazio fotovoltaikorako eta haren ebakuazio instalazioetarako, Pitillasko eta Erriberriko udal mugarteetan. Espedientearen kodea: 5378-CE.

1.–Aurretiazko administrazio baimena eta eraikitzeko administrazio baimena eskuratzeko eskaera.

Sektore Elektrikoari buruzko abenduaren 26ko 24/2013 Legearen 53. artikuluan eta abenduaren 1eko 1955/2000 Errege Dekretuaren 122. eta 130. artikuluetan ezarritakoari jarraikiz (errege dekretu horrek energia elektrikoaren instalazioak baimentzeko prozedurak eta energia elektrikoa garraiatu, banatu, merkaturatu eta haren horniketa egiteko jarduerak arautzen ditu), 2025eko urtarrilaren 31n, Energías Fotovoltaicas de Navarra SLk aurretiazko administrazio baimena eta eraikitzeko administrazio baimena eskatu zituen 4,5 MW-eko potentzia instalatuko "Santa Brígida" eguzki instalazio fotovoltaikorako (biltegiratze sistema eta ibilgailu elektrikoetarako kargagailuak ditu) eta haren ebakuazio azpiegituretarako, Pitillasko eta Erriberriko udal mugarteetan.

Eguzki instalazio fotovoltaikoak honako hauek ditu:

• 9.912 modulu fotovoltaiko, unitateko 620 Wp-eko potentziakoak, guztira 6.145,44 kWp-eko potentzia erpina izateko, eta 8,2 hektarea inguruko azalera okupatuarekin.
• 18 inbertsore fotovoltaiko, 250 kW-eko potentzia izendatua dutenak eta, osotara, 4.500 kWn egiten dutenak.
• 3 SPS estazio eta dagozkien transformadoreak, 0,8/20 kV eta 2.000 kVA-koak.

Inbertsore fotovoltaikoen bidez, moduluek korronte zuzenean sortzen duten energia korronte alterno bihurtzen da, eta energia hori SPS estazioetan dauden behe tentsioko koadro orokorretaraino eramaten da, 20 kV-era eraldatzeko.

Energia 20 kV-era eraldatu ondoren, eguzki instalazio fotovoltaikoaren proiektuaren barruan aurreikusitako ebakuazio azpiegiturek 3.931 metro inguruko erdi tentsioko lurpeko linea bat dute, "Santa Brígida" azpiestazio berriarekin konektatzen dena. Linea hori "La Pedrera I" eguzki parkeak orain hartzen duen lursailaren barruan jarriko da, eta, bertan, 66 kV-era igoko da tentsioa.

Azpiestazio horretatik, energia I-DE Redes Inteligentes SAUrena den 66 kV-eko "La Pedrera" sekzionamendu zentroraino iristen da, linea berri baten bidez (3x1x150 mm²-koa eta HEPR-Z1 33/66 kV-ekoa).

2.–Jendaurreko informazioaren eta ukitutako administrazio publiko eta erakundeei kontsulta egiteko izapideak.

Abenduaren 1eko 1955/2000 Errege Dekretuaren 125. artikulua aplikatuz (errege dekretu horrek energia elektrikoaren instalazioak baimentzeko prozedurak eta energia elektrikoa garraiatu, banatu, merkaturatu eta haren horniketa egiteko jarduerak arautzen ditu), eskaera jendaurrean jarri zen 30 egun balioduneko epean, iragarkia jarrita 2025eko 50. Nafarroako Aldizkari Ofizialean, martxoaren 13koan. Dokumentazioa Nafarroako Gobernu Irekiaren web-fitxan argitaratu zen. Era berean, informazioa Pitillasko Udalari igorri zitzaion, epe berean jendaurrean jar zezan bere ediktuen taulan. Ez zen alegaziorik jaso.

Aldi berean, eta abenduaren 1eko 1955/2000 Errege Dekretuaren 127. eta 131. artikuluetan ezarritakoa aplikatuz, ukitutako gainerako administrazio publikoei eta entitateei kontsulta egin zitzaien, dagozkien txostenak egin zitzaten.

Taulan ageri diren erakundeei kontsulta egin zitzaien, eta bertan adierazitako txostena jaso zen:

Aguacanalek bere txostenean adierazi du ados dagoela proiektua baimentzearekin, eta erantsi ditu, batetik, atzemandako ukipenak jasotzen dituen dokumentu bat eta, bestetik, proiektua gauzatzeko baldintzak, aintzat hartu behar direnak bai proiektu fasean bai gauzatze fasean. Nolanahi ere, txostenaren arabera, baimen hori ez da eraginkorra izanen sustatzaileak adostasun dokumentu bat sinatu eta kudeaketa eta gainbegiratze kostuak ordaindu arte.

3.–Ingurumen inpaktuaren txostena eta lurzoru urbanizaezinean jarduerak egiteko baimena.

Ingurumeneko zuzendari nagusiaren urriaren 9ko 1168E/2025 Ebazpenaren bidez, proiektuaren aldeko ingurumen inpaktuaren txostena formulatu zen, zenbait baldintza betetzearen baldintzapean (2025eko 217. Nafarroako Aldizkari Ofizialean argitaratu zen, urriaren 30ekoan).

Lurralde Antolamenduko zuzendari nagusiaren urtarrilaren 19ko 6E/2026 Ebazpenaren bidez, lurzoru urbanizaezinean jarduerak egiteko baimena eman zen. Proiektuak, hain zuzen, baimen horretan ezarritako determinazioak bete beharko ditu.

4.–Aurretiazko administrazio baimena emateko proposamena.

Frogatu dira Energías Fotovoltaicas de Navarra SLren gaitasun legala, teknikoa eta ekonomikoa, eta, hala, bete da Sektore Elektrikoari buruzko abenduaren 26ko 24/2013 Legean eta abenduaren 1eko 1955/2000 Errege Dekretuan ezarritakoa.

Abenduaren 26ko 24/2013 Legearen 53. artikuluan xedatutakoari jarraikiz, espedientean jasota daude banaketa sarera sartzeko eta konektatzeko I-DE Redes Eléctricas Inteligentes SAUk emandako baimenak. Adierazi behar da sartzeko eta konektatzeko baimenak 4,4 MW-eko potentzia instalatuko instalazio fotovoltaiko baterako eman direla. Ez dago jasotako gainerako instalazioetara sartzeko eta konektatzeko baimenik.

Ikusirik aurkeztutako dokumentazioa, Sektore Elektrikoari buruzko abenduaren 26ko 24/2013 Legean xedatutakoa betez, eta ikusirik ingurumen inpaktuaren txostenean eta lurzoru urbanizaezinean jarduera baimengarriak egiteko baimenean ezarritako baldintzak, bai eta sartzeko eta konektatzeko baimena ere, Industria Antolamenduaren, Azpiegitura Energetikoen eta Meatzeen Zerbitzuak ondorioztatzen du prozedura behar bezala gauzatu dela, eta proposatzen du Energías Fotovoltaicas de Navarra SLri aurretiazko administrazio baimena ematea energia elektrikoa ekoizteko 4,4 MW-eko potentzia instalatuko "Santa Brígida" eguzki instalazio fotovoltaikorako eta haren ebakuazio azpiegituretarako.

Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,

EBAZTEN DUT:

1. Aurretiazko administrazio baimena ematea Energías Fotovoltaicas de Navarra SLri, energia elektrikoa ekoizteko 4,4 MW-eko potentzia instalatuko "Santa Brígida" eguzki instalazio fotovoltaikorako eta haren ebakuazio azpiegituretarako, Pitillasko eta Erriberriko udal mugarteetan.

2. Aurretiazko administrazio baimen hau emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.

3. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzura, Ingurumen Ebaluaziorako Atalera, Paisaiaren eta Landa-lurzoruaren Atalera, Larrialdietako, Prebentzioko eta Babes Zibileko Zerbitzura eta Zainketa Zerbitzuko Ustiapen Atalera.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea Energías Fotovoltaicas de Navarra SLri, I-DE Redes Eléctricas Inteligentes SAUri, Aguacanali eta SEPRONAri, eta ohartaraztea ebazpen honek ez duela administrazio bidea amaitzen eta haren aurka gora jotzeko errekurtsoa jartzen ahal dela Industriako eta Enpresen Trantsizio Ekologiko eta Digitalerako kontseilariari zuzendua, ebazpen hau jakinarazi eta biharamunetik hilabete iragan baino lehen, errekurtsoan espedientearen kodea adierazita.

6. Ebazpen hau jakinaraztea Pitillasko Udalari eta Erriberriko Udalari, eta ohartaraztea haren aurka administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, honako hau jakinarazi eta biharamunetik hasita bi hilabeteko epean, deusetan eragotzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2026ko urtarrilaren 20an.–Enpresen Sustapenerako eta Azpiegituretako zuzendari nagusia, Iñigo Arruti Torre.

Iragarkiaren kodea: F2600766