Iragarkia

33. ALDIZKARIA - 2026ko otsailaren 16a

1. NAFARROAKO FORU KOMUNITATEA

1.7. BESTELAKOAK

4/2026 EBAZPENA, urtarrilaren 22koa, Hezkuntzako eta Lanbide Heziketako zuzendari nagusiak emana, zeinaren bidez ezartzen baitira Nafarroako Foru Komunitatean Lanbide Heziketa modalitate birtualean egiteko aldi iragankorra garatzeko jarraibideak.

Lanbide Heziketa Antolatu eta Integratzeari buruzko martxoaren 31ko 3/2022 Lege Organikoak 68.1 artikuluan ezartzen duenez, Lanbide Heziketako eskaintzak modalitate presentzial, erdipresentzial, birtual edo mistoan ematen ahalko dira; Nafarroan, modalitate birtuala urrutiko Lanbide Heziketaren online modalitatea (online LH) da.

Uztailaren 18ko 659/2023 Errege Dekretuak, I. tituluko IV. kapituluan, Lanbide Heziketaren eskaintzaren modalitateak arautzen ditu, eta horien artean dago heziketa birtuala.

Hezkuntzari buruzko maiatzaren 3ko 2/2006 Lege Organikoak 3.9 artikuluan ezartzen du urrutiko hezkuntzarako eskaintza egokia garatuko dela, eta 42. artikuluan, berriz, Lanbide Heziketako eskaintza antolatzeko aukera bat dela urrutiko Lanbide Heziketaren modalitatea; Nafarroan, urrutiko modalitatea urrutiko Lanbide Heziketaren lineako modalitatea da (online LH).

Nafarroako Foru Komunitateko hezkuntza sistemaren esparruan Lanbide Heziketaren antolamendua eta garapena arautzen dituen maiatzaren 26ko 54/2008 Foru Dekretuaren 5. artikuluan Lanbide Heziketa ikasteko urrutiko modalitatea ezartzen da, eta 26. artikuluan, berriz, urrutiko Lanbide Heziketa garatzeko plataforma bat sortuko dela, berrikuntzaren ildo estrategikoen barruan.

Uztailaren 19ko 122/2010 Foru Aginduak Nafarroako hezkuntza sisteman urrutiko Lanbide Heziketaren online modalitatearen ezarpena eta antolaketa arautzen ditu.

Azkenik, azaroaren 2ko 121/2020 Ebazpenak martxoaren 5eko 21/2019 Foru Aginduaren zenbait alderdi garatzen ditu, LHren online modalitateari dagokionez. 21/2019 Foru Aginduaren bidez arautzen dira Nafarroako Foru Komunitateko hezkuntza sistemako Lanbide Heziketako ikasleen ebaluazioa, titulazioa eta ikasketen egiaztapena.

2025-2026 eta 2026-2027 ikasturteetan, Lanbide Heziketaren modalitate birtualari dagozkion zikloen moduluak emanen dira, bai ikasketa plan zaharrari dagozkionak (Lanbide Heziketa Antolatu eta Integratzeari buruzko martxoaren 31ko 3/2022 Lege Organikora egokitu aurrekoak), bai ikasketa plan berriari dagozkionak (martxoaren 31ko 3/2022 Lege Organikora egokitu aurrekoak. Beharrezkotzat jotzen da jarraibideak ezartzea Lanbide Heziketaren modalitate birtualeko bi ikasketa planak indarrean dauden aldi iragankor horretarako, behar bezala gara daitezen.

Horrenbestez, eta ikusirik Lanbide Heziketaren Plangintza eta Integraziorako Zerbitzuko zuzendariak aldeko txostena eman duela Nafarroako Foru Komunitatean Lanbide Heziketaren modalitate birtuala garatzeko jarraibideak ezartzeko.

Erabiliz azaroaren 15eko 245/2023 Foru Dekretuak emandako ahalmenak (foru dekretu horrek ezarri zuen Hezkuntza Departamentuaren egitura organikoa),

EBAZTEN DUT:

1. Lanbide Heziketaren modalitate birtuala ematen duten ikastetxeetan eskola-egutegia eta ordutegi orokorra garatzeari buruzko jarraibide espezifikoak onestea, 2025-2026 eta 2026-2027 ikasturteetarako. Aldi horretan, aldi berean eskainiko dira ikasketa plan zaharreko eta ikasketa plan berriko moduluak, eta Ebazpen honen 1. eranskinean daude zehaztuta zein diren.

2. Lanbide Heziketaren modalitate birtuala ematen duten ikastetxeetan aldi iragankorra garatzeari buruzko jarraibide espezifikoak onestea, 2025-2026 eta 2026-2027 ikasturteetarako. Aldi horretan, aldi berean eskainiko dira ikasketa-plan zaharreko eta ikasketa-plan berriko moduluak. Ebazpen honen 2. eranskinean daude zehaztuta.

3. Modalitate birtualean prestakuntza zikloak ematen dituzten irakasleentzako aldi iragankorra garatzeko jarraibide espezifikoak onartzea. Ebazpen honen 3. eranskinean daude zehaztuta.

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen hau eta eranskinak igortzea Lanbide Heziketaren Plangintza eta Integraziorako Zerbitzura, Lanbide Heziketako Proiektuen eta Kualifikazioen Zerbitzura, Hezkuntzako Ikuskapen Zerbitzura, Azterlan Ekonomikoen eta Nominen Zerbitzura, Kudeaketa Juridiko-administratiboaren Atalera, Ikastetxeetako Informazioa Kudeatzeko Bulegora, Etengabeko Prestakuntzaren Bulegora eta ukitutako ikastetxeetara.

6. Ebazpen honen eta eranskinen aurka gora jotzeko errekurtsoa jar daiteke, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

Iruñean, 2026ko urtarrilaren 22an.–Hezkuntzako eta Lanbide Heziketako zuzendari nagusia, Gil Sevillano González.

1. ERANSKINA.–LH-REN MODALITATE BIRTUALAREN (URRUTIKOA ONLINE) ALDI IRAGANKORRARI DAGOKION ESKOLA-EGUTEGIARI ETA ORDUTEGI OROKORRARI BURUZKO JARRAIBIDE BERARIAZKOAK
(2025-2026 ETA 2026-2027 IKASTURTEAK)

1.–Ikasturteko egutegia.

1. LHren modalitate birtualeko (urrutikoa online) zikloak ematen dituzten ikastetxeetan, ikasturtea urteko iraileko lehen lanegunean hasiko da, eta ikasturteko ekaineko azken lanegunean burutuko.

2. Egutegiak bete behar dituen ezaugarriak Nafarroako Foru Komunitateko hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxeei dagozkien eskola-egutegia eta ordutegi orokorra onartzen dituen ebazpenean adierazitakoak izanen dira, salbu eta jarraian aipatzen diren baldintzei dagozkienak:

a) LHren modalitate birtualeko (urrutikoa online) eskola-egunen kopurua: Lanbide Heziketa birtualaren (urrutikoa online) egutegiari buruzko ebazpenean eskolak hasteko adierazitako datatik eskolak burutzeko adierazitako datara artekoak.

Ikaslea LP moduluan edo Proiektua moduluan soilik badago matrikulatuta, edo enpresako prestakuntza egiten ari bada (edo prestakuntza enpresaren pareko organismo batean), eskola-egunen kopurua prestakuntza hori egiteko beharrezkoa den kopurua izanen da.

b) Eskolak hasteko eta akitzeko egunak ikasturte bakoitzerako argitaratzen den LH birtualeko (urrutikoa online) ikasturteko egutegiaren ebazpenean ezarritakoak izanen dira.

c) Ebaluazio partzialaren eta azken ebaluazioaren datak finkatzerakoan, honakoak hartu behar dira kontuan:

–Ebaluazio partzialaren hondar saioaren eta azken ebaluazioko saioaren artean gutxienez 14 eguneko aldia egonen da, azaroaren 2ko 121/2020 Ebazpenean adierazten den bezala (Ebazpen horrek Lanbide Heziketako erdi eta goi mailako zikloen ebaluazioari buruzko foru agindua garatzen du).

–Ebaluazio partzialeko azken saioko ebaluazio probak eta jarduerak eginen dira ebaluazio partzialeko azken saioa maiatzean egitea ahalbidetzen duten egunetan, kontuan hartuta zein den azken eguna ikasleei jakinarazteko ebaluazio partzialeko azken saioan gainditu diren moduluen edo gainditu gabe gelditu diren moduluen berri (azken egun hori zein den ikasturte bakoitzaren egutegia zehazten duen ebazpenean adierazten da.

–Gainditu diren eta gainditu ez diren moduluen berri emateko azken egunaren biharamunetik hasita eskolak burutzeko finkatutako azken egunera bitarteko egunak erabiliko dira berreskurapen programa eta jarduerak aurrera eramateko, hain zuzen, egun horietan ikasleek aukera izan dezaten "gainditu gabe" kalifikazioa lortu duten moduluetan izandako zailtasunak gainditzeko eta azken ebaluazioa egokiago prestatzeko.

Kasu horretan, azken ebaluazioari dagozkion ebaluazio probak eta jarduerak maiatzean eginen dira, kontuan izanda zein den azken eguna ikasleei azken ebaluazioari dagozkion kalifikazioak emateko.

3. LHren modalitate birtualean (urrutikoa online) jarduten duten irakasleek ikasturtea antolatzeko erabiliko dute irailaren 1etik eskolak hasi bitarteko denbora. Lan hauek sartzen dira antolaketa lan horretan: ikasle izan nahi dutenek aurkezten duten dokumentazio egiaztatzailea eta beste edozein dokumentazio aztertzeko onarpen batzordean parte hartzea; giltza-moduluak egiaztatzea eta hartutako erabakiak eta erabakiak erregistratzea, onarpena kudeatzen duen aplikazio informatikoan; eta ikasturtean zehar emanen dituzten moduluen materialak berrikusi, akatsak zuzendu eta eguneratzea. Material horiek Nafarroako LHren online modalitatearen Moodle plataforman daude.

4. Eskolak akitzen direnetik ikasturtearen azken egunera arte, honako hauek eginen dira: ikasturtearen berrikuspen eta ebaluazio lan berariazkoak, modulu bakoitzaren memoria didaktikoak, departamentuen memoriak, ikasturte hondarreko memoria, orientazioa, erreklamazioak eta ikasleei arreta ematea, eta moduluak eguneratzea ikasturtean atzemandako beharren arabera, baita beharrezkoak diren administrazio egintza guztiak eta ikasturte hondarraren eta ondoko ikasturtearen antolamenduarekin lotutako jarduerak ere.

Bereziki, irakasleek ikasleen zereginen entregen deskargak eta kalifikazioak egin eta artxibatu beharko dituzte, eta Nafarroako online LHren Moodle plataforman berriro hasi beharko dute ikasturtea, hori guztia Lanbide Heziketaren Antolamendu eta Ebaluaziorako Atalak adierazten duenaren arabera.

LHren modalitate birtualaren (urrutikoa online) zikloetako koordinatzaileek ikasturte hondarreko memoriaren kopia bat igorriko dute Lanbide Heziketaren Plangintza eta Integraziorako Zerbitzura ikasturte bakoitzari dagokion urtearen uztailaren 1a baino lehen. Memoria horrek jaso beharko du, gutxienez, Hezkuntza Departamentuak koordinatzaileei emanen dien dokumentuan adierazitako informazioa.

5. Urrutiko LHren online modalitatean lantokiko prestakuntzaren modulua egiteko, eta enpresako prestakuntza (edo prestakuntza enpresaren pareko organismo batean) egiteko LHren modalitate birtualean, malgutzeko neurriak hartu beharko dira moduari, epeei eta hasteko eta akitzeko denborei dagokienez, Nafarroan irakaskuntza eta modalitate horiek egiten dituzten ikasle helduen egoera pertsonaletara egokitzeko.

2.–Ordutegi orokorra.

1. Ikaskuntza-ingurune birtualean ari diren irakasleen lanaldia, oro har, goizeko eta/edo arratsaldeko eskolaldietan eginen da, astelehenetik ostiralera.

2. LHren modalitate birtualean (urrutikoa online) ematen diren zikloetako irakasle taldeak, kurtsoa ikasgela birtualean hasi baino lehen argitaratu beharko ditu, horretarako dagoen gunean, ikasturtean zehar eginen diren jarduera presentzial guztien programazioa eta egutegia. Egutegi hori, justifikatutako arrazoiengatik, programatutako datak baino hilabete lehenago ere, gehienez, aldatzen ahalko da; hilabete horren barruan, ezinbesteko arrazoiak daudenean soilik aldatzen ahalko da, datak ikasleen egoerara egokitzeko.

3. Egutegia eta ordutegi orokorra, behin onartu eta gero, nahitaez bete beharko dira. Ikastetxeko zuzendariaren ardura izanen da horiek betearaztea, eta Hezkuntzako Ikuskapen Zerbitzuari dagokio betetzen diren ikuskatzea eta kontrolatzea.

4. Ikastetxe bakoitzaren egutegi eta ordutegi orokorra ikastetxearen iragarki taulan jarriko da.

5. Irakasleen banakako ordutegia aldatzen ahalko da, jarduera presentzialetara eta tutoretzetara egokitzeko.

6. Jarraibide hauetan finkatu gabeko alderdi guztietan, dagokion ikasturtean eskola-egutegia prestatzeko jarraibideak egiteko onartzen den ebazpenean xedatutakoari jarraituko zaio.

3.–Tramitazioa.

LHren modalitate birtualaren (urrutikoa online) egutegia ikastetxeak proposatu eta Hezkuntzako Ikuskapen Zerbitzuak onetsitako egutegian txertatuko da, bat etorriz ikasturterako eskola-egutegia egiteko jarraibideak onesteko dagokion ebazpenean ezarritako jarraibideekin.

2. ERANSKINA.–LANBIDE HEZIKETAREN MODALITATE BIRTUALEKO (URRUTIKOA ONLINE) ZIKLOAK EMATEN DITUZTEN IKASTETXEEN ANTOLAMENDUA ETA FUNTZIONAMENDUA ARAUTZEN DUTEN JARRAIBIDE BERARIAZKOAK. ALDI IRAGANKORRA (2025-2026 ETA 2026-2027 IKASTURTEAK)

Irakaskuntzak antolatzeko jarraibideak.

1.–Antolaketaren eta funtzionamenduaren gaineko jarraibideak.

LHren modalitate birtualeko (urrutikoa online) zikloak ematen dituzten ikastetxeek, jarraibide hauetan jaso gabeko puntu guztietan, men eginen diote oro har Nafarroan hezkuntza sistemako Lanbide Heziketako irakaskuntzak ematen dituzten ikastetxe publikoen funtzionamendu-jarraibideak onesteko, dagokion ikasturtean emanen den ebazpenean ezarrita dagoenari.

2.–LHren modalitate birtualaren (urrutikoa online) ezaugarriak.

1. LHren modalitate birtualeko ikasleen profila eta modalitate presentzialekoa desberdinak dira. Modalitate birtualean (urrutikoa online), ikasleen profila hau da: pertsona heldua, lan egiten duena edo lanaldi osoan ikasgelara aurrez aurre joateko aukerarik ematen ez dioten beste betebehar batzuk dituena, eta gaitasun profesionalak hobetzeko edo eskuratzeko interesa duena.

2. LHren modalitate birtualeko (urrutikoa online) zikloak emateko, konbinatu eginen dira ikasleen eta irakasleen lan-saioak, ikaskuntza-ingurune birtual batean egindakoak, eta ikastetxean egindako eskola-saio presentzialak. Azken horietara joatea nahitaezkoa izatea ezartzen ahalko da, etengabeko ebaluazio sistema aplikatzeko, eta etengabeko ebaluazio presentzialeko jardueratzat (AECP) edo azken ebaluazio jarduera presentzialtzat (ACFP) hartzen ahalko dira, Lanbide Heziketako erdi eta goi mailako zikloen ebaluazioari buruzko foru agindua garatzen duen azaroaren 2ko 121/2020 Ebazpenean adierazten den bezala.

Modulu bateko saio presentzialak ez dira, guztira, moduluaren guztizko orduen % 33tik gorakoak izaten ahalko.

Uztailaren 18ko 659/2023 Errege Dekretuaren 27. artikuluan ezarritakoaren arabera, modulu bakoitzerako azken ebaluazio proba presentzial bat egonen da gutxienez.

Modalitate honetan, lanbide moduluen garapena banakako eta taldekako tutoretza saioetan oinarritzen da. Saio horiek lanbide modulu bakoitzeko irakasleek gidatuko dituzte zuzenean.

3. Ikaskuntza-ingurune birtualean egiten diren lanak eta saioak, besteak beste, honako irakaskuntza lan hauekin bat etor daitezke:

–Banakako tutoretza lanak, non lanbide modulu bakoitzeko irakasleek ikaskuntza prozesuari buruzko orientazio eta dinamizazio lanak, galderak erantzun eta sostengu emateko lanak eginen baitituzte, ikasleak modu autonomoan ikasi ahal izan dezan ikaskuntza-ingurune birtualean eskuragarri dauden material didaktikoak erabiliz.

–Ikasleen arteko elkarlanerako interakzioak eta ikaskuntza kolaboratiboa sustatzeko eta bultzatzeko ekintzak.

–Taldekako tutoretza lanak, saio presentzialekin batera ikasleei aukera emateko modulu bakoitzaren ikaskuntza-helburuak lor ditzaten.

–Ebaluazio proba espezifikoen saioak Moodle plataformaren bidez. Proba horiek entregatzeko azken eguna eskola-egunean programatu behar da. Horrela, ikasleek entregatzeko garaian arazoren bat badute, moduluko irakasleekin harremanetan jarri ahalko dira, laguntza eskatzeko.

4. Ikastetxean egiten diren saio presentzialak, besteak beste, honako irakaskuntza lan hauekin bat etor daitezke:

–Metodologia aktiboen bidezko lan-saioak.

–Praktika presentzialak egiteko saioak: saio horien helburua da ikasleek kasuan kasuko lanbide moduluaren ikaskuntza-emaitzei lotutako lantegi praktiko bat egitea.

–Ikasleak egin beharreko ikaskuntza autonomoaren prozesuari sostengu emateko saioak, ikaslea gai izan dadin lanbide moduluaren heziketa helburuak bere kasa gainditzeko. Ikaskuntza-ingurune birtualean egiten diren taldekako tutoretza lanen osagarri dira.

–Ebaluazio-proba espezifikoen saioak.

5. Tutoretza lana prestakuntza prozesuaren osagai garrantzitsuenetako bat da, eta heziketa zikloan aritzen diren irakasle taldeko irakasle guztiek egin beharko dute.

Tutoretza lan horren bidez, besteak beste, irakaskuntza-ikaskuntza prozesuaren jarraipena eginen da, eta ikaslearen motibazioa eta ikasleen arteko elkarlana sustatuko dira.

Ikasleek kontsulta egin eta hurrengo bi eskola-egunetan erantzun beharko zaie. Ebalua daitezkeen atazen eta galdetegien zuzenketa hurrengo gaiari dagozkion atazak eta galdetegiak ireki aurretik egin eta jakinaraziko zaie ikasleei.

Era berean, taldeko tutoretzak eginez gero, bi txandatan programatu beharko dira, ikasleei horietara joan edo konekta daitezen errazteko.

6. LH birtualeko zikloetako (plan berria) ikasleentzako enpresako prestakuntza (edo enpresaren pareko organismo batean egindakoa) modalitate presentzialeko LHko ikasleen arau berberek arautzen dute, honako puntu hauetan izan ezik:

–LHren modalitate birtuala modularra denez, ez dago ikaslerik lehen edo bigarren mailan, eta pertsona bakoitzak bere ibilbidea du, bere beharren eta horretarako dituen orduen arabera. Hori dela eta, ezin da ikasturte guztietan ikasle guztiek enpresako prestakuntza egin ahal izatea (edo enpresaren pareko organismo batean). Lanbide Heziketaren izaera duala modalitate birtualean aplikatzeko, ziklo bakoitzean modulu zehatzei lotutako enpresa-orduen blokeak ezarri dira. Horrela, ikasleak bloke bati lotutako modulu guztiak gainditu baditu eta/edo bloke horri lotutako modulu guztietan matrikulatuta badago, bloke horri dagozkion enpresako orduak (edo enpresaren pareko organismo batekoak) eginen ahalko ditu, eta Gai kalifikazioa lortzen badu, bloke horri lotutako moduluak erabat gaindituta izanen ditu.

Enpresako orduei lotu dauden moduluen blokeak, ebazpen honen 4. eranskinean zerrendatuta daude, eta ikastetxeek proposatu dituzte eta Lanbide Heziketaren Antolamendu eta Ebaluaziorako Atalak onartu ditu. 2025-2026 ikasturtean ikastetxeek 2026-2027 ikasturterako ezarritako blokeak aldatzea proposa dezakete.

–LH birtualeko ikasleek, baldin eta moduluak egiten ari diren bitartean ez badute aukerarik enpresako prestakuntza egiteko (edo enpresaren pareko organismo bateko), zikloko modulu guztien zati akademikoa gainditu ondoren eginen ahalko dituzte prestakuntza-ordu guztiak enpresan edo enpresaren pareko organismoan.

–LHko modalitate presentzialean gertatzen den bezala, EDUCA kudeaketa akademikoko sistema prestatuta ez dagoen arte modulu bakoitzean kalifikazio akademikoa eta enpresakoa jasotzeko, LH birtualeko zikloetako koordinatzaileek barnean erregistratu eta zaindu beharko dute bloke bakoitzean enpresaren zatia gainditzen duten pertsonen informazioa, jakiteko zer modulu dauden erabat gaindituta, eta informazio hori gerora EDUCA kudeaketa akademikoko sistemara eraman ahal izateko.

–Bai enpresako prestakuntza (edo enpresaren pareko organismo batekoa) zein lantokiko prestakuntza ikasturtearen hasiera-egunetik egiten ahalko dira (irailaren 1etik).

3.–LHren modalitate birtualaren (urrutikoa online) antolaketa eta curriculuma.

1. LHren modalitate birtualean (urrutikoa online) ematen diren zikloen antolaketari esker, ikasleak bere prestakuntza ibilbidea eraikitzen ahalko du, eskaintza modularra egiten baita, kontuan harturik ikastetxeek gomendatuko ibilbidea eta giltza-moduluak (ziklo bakoitzerako izena emateko inprimakian adierazita daude).

2. LHren modalitate birtualean (urrutikoa online) ematen diren zikloen curriculumari dagokionez, kasuan kasuko heziketa zikloaren egitura eta curriculuma onesten dituen foru dekretuak Nafarroarako ezartzen duen berbera izanen da.

3. LHren modalitate birtualaren (urrutikoa online) ematen diren lanbide moduluen programazio didaktikoetan, behar diren egokitzapenak eginen dira eta alderdi pedagogiko egokiak finkatuko dira, eranskin honen 4 jarraibidean xedatutakoarekin bat. Moduluaren programazioan moduluaren ebaluazio partzialaren eta azken ebaluazioaren saioen datak ezarri behar dira. Data horiek ikasleei jakinarazi behar zaizkie ikasturtearen hasierako bileran.

4.–Alderdi pedagogikoak.

1. Nafarroan, LHren modalitate birtualean (urrutikoa online) ematen diren zikloen antolaketaren eta garapenaren funtsean dagoen eredu pedagogikoa oinarritzen da ikaskuntza-ingurune birtualetan egiten den tutoretza lanean eta ikaslearen lan autonomoan, saio presentzialekin batera, uztailaren 19ko 122/2010 Foru Aginduaren 12. artikuluan ezarritakoarekin bat.

2. Ikaskuntza ingurune birtualean egiten diren lanetan eta saioetan eta ikastetxeetako saio presentzialetan eranskin honen 2. jarraibidean ezarritakoa bete beharko da.

3. Lanbide modulu batean matrikulatzen den ikasle bakoitzak irakasle-tutore bat izanen du, modulu horren irakaskuntzaz eta tutoretza lanaz arduratuko dena. Gainera, ziklo bateko lanbide moduluetan matrikulatzen diren ikasleen talde bakoitzak zikloko irakasle koordinatzaile bat izanen du. Banakako edo taldeko tutoretzak eskuragarriagoak izateko, irakasleek ordutegia aldatu ahalko dute unean-unean, esleitu zaien ordutegian (goizez edo arratsaldez) tutoretza eskuratu ezin duten ikasleei arreta eman ahal izateko.

4. Irakasle-tutoreak modulu bakoitzerako programazio didaktikoa eginen du. Programazio horretan, besteak beste, lan-bloke bakoitzaren hasierako eta hondarreko daten plangintza agertuko da, baita ikasleek egin beharreko jardueren entrega-datak ere, Etengabeko Ebaluazioko Jardueratzat hartzen direnak eta, hala badagokio, Azken Ebaluazioko Jardueratzat hartzen direnak zehaztuta. Informazio hori ikasleen eskura egon beharko da eskolak hasteko adierazitako egunerako.

5. Erabakitzen bada modulu batean edo batzuetan saio presentzialak egin behar direla ikastetxean, modulu horietako irakasle-tutoreak antolatuko ditu saio presentzial horiek horretarako.

Saio presentzial horien programazioa eta egutegia moduluaren programazio didaktikoan islatuko dira, ikaskuntza-plataforma birtualean, eta bertan zehaztu beharko da saio presentzial horiek nahitaezkoak diren etengabeko ebaluazioaren sistema edo azken ebaluazioaren sistema aplikatzeko.

Zehazten bada saio presentzialak nahitaezkoak direla ebaluazioaren sistema aplikatzeko, eta etengabeko ebaluazio presentzialeko jardueratzat (AECP) edo azken ebaluazio jarduera presentzialtzat (ACFP) hartzen badira, saioak bi txandatan programatu beharko dira, goizez eta arratsaldez, ikasle helduen laneko eta familiako betebeharrak bateratzea errazteko; kasu horietan, irakasleek beren ordutegi pertsonala aldatzen ahalko dute, jarduera presentzialen ordutegira egokitzeko.

Informazio hori ikasleen eskura egon beharko da eskolak hasteko adierazitako egunerako.

Saio presentzialen programazioan zerbait aldatuz gero, modulu bakoitzeko irakasle-tutoreak garaiz jakinarazi beharko die ikasleei ikaskuntzarako plataforma birtualaren bidez, gutxienez hilabete lehenago.

Ez dira bi lanbide modulutako saio presentzialak ordu berean programatzen ahalko, ez bada saio horiek programaturk daudela ukitutako moduluetako ikasleendako. Salbuespen gisa, saio horiek ordu berean programatzen ahalko dira baldin eta moduluak elkarren osagarri badira, hau da, beharrezkoa bada bietako bat ikasi izana bestea ikasi ahal izateko.

6. Irakaskuntza-ikaskuntza prozesu osoan zehar egin beharreko jarduera guztiak, hala ikaskuntza-ingurune birtualean nola modu presentzialean egindakoak, ebaluaziokoak barne, lanbide moduluaren programazioan jasota egon beharko dute, eta hura online LHren Moodle plataforman. Informazio hori kurtsoa hasteko adierazitako egunerako egon beharko da eskuragarri.

Informazio hori antolatuko da halako moduan non ikasleak aukera izanen duen ikusteko, besteak beste, bere ikaskuntza prozesuaren emaitzak, bere kalifikazioak, bidalitako lanak eta irakasle-tutoreak egin dizkion oharrak.

Lanak bidali eta zuzentzeko bitarteko gisa ez da inoiz erabiliko norberaren posta elektronikoa edo online LHren Moodle plataformatik kanpoko bestelako tresnarik; pisu handiko lanak entregatzeko, berriz, estekak igortzen ahalko dira artxiboak gordetzeko Drive zerbitzura, @educacion.navarra.es helbide elektronikoari lotutakoa.

7. Ikasleek ikasturtearen hasieratik izanen dituzte eskuragarri matrikulatuta dauden lanbide moduluko edukien material guztiak. Jarduerak irakasle-tutore bakoitzak ezarritako datetan egin beharko dira.

5.–Ebaluazioa.

1. Bi ebaluazio sistema daude online LHren modalitatean, modalitate presentzial orokorrean bezala: etengabeko ebaluazioaren sistema eta azken ebaluazioaren sistema. LHren modalitate birtualeko (urrutikoa online) ebaluazioa etengabeko ebaluazioaren sistemaren bidez egituratzen da, eta azken ebaluazioaren sistema erabiliko da etengabeko ebaluazioaren sistema erabili ezin denean.

2. LHren modalitate birtualeko (urrutikoa online) ikasleen ebaluazioari, kalifikazioari, ziurtapenei eta titulazioari buruzko guztian, eta bereziki ebaluazio sistemei dagokien guztian, Lanbide Heziketako zuzendari nagusiaren azaroaren 2ko 121/2020 Foru Aginduan online LHren modalitateari dagokionez xedatutakoari jarraituko zaio, foru agindu horren bidez garatzen baitira Nafarroako Foru Komunitateko hezkuntza sistemako Lanbide Heziketako ikasleen ebaluazioa, titulazioa eta ikasketen ziurtapena arautzen duen martxoaren 5eko 21/2019 Foru Aginduaren zenbait alderdi. Ebazpen horretan zehaztuta ez dagoen guztirako, Lanbide Heziketako erdi eta goi mailako zikloen ebaluazioa arautzen duen martxoaren 5eko 21/2019 Foru Aginduan xedatutakoari jarraituko zaio, edo, bestela, Lanbide Hezkietako ebaluazioari buruz gerora garatzen den araudian.

3. LHren modalitate birtualean (urrutikoa online) ematen diren irakaskuntzek ohiko modalitate orokorrean ematen diren irakaskuntzen ondorio akademiko berberak izanen dituzte.

4. Irakasle-tutorea arduratuko da ematen duen moduluari dagokion kalifikazio-liburua antolatzeaz eta kudeatzeaz ikasgela birtualean. Kalifikazio-liburuan zehaztuko dira ebaluazio elementuak, programazio didaktikoan planteatutako ponderazioaren arabera. Ikasleek kontsulta ditzakete urrutiko LHren plataforman elementu ebaluagarrietan lortutako kalifikazioak.

5. Urrian edo azaroan –LHren modalitate birtualerako (urrutikoa online) egutegia zehazteko ebazpenean ezartzen denean– irakasle taldeak hasierako ebaluazio saio bat eginen du, urrutiko Lanbide Heziketaren modalitatean matrikulatutako ikasleen jatorria aztertzeko, baita moduluak egin behar dituzten ikasleen kopurua eta onartutako eta baliozkotutako moduluak dituztenen kopurua ere jakiteko. Saio horretan, besteak beste, ikasturtearen hasieran atzemandako arazoak eta horien konponbideak bateratuko dira, eta plataforman komunikatzeko jarraibideak zehaztuko dira.

6. Horrez gainera, azaroaren 2ko 121/2020 Ebazpenean ezarritako ebaluazio partzialeko saioak egin beharko dira.

Lanbide modulu bakoitzean ikasleei jarritako kalifikazio partzialak urrutiko Lanbide Heziketaren plataforman erregistratu beharko dira, baita EDUCA kudeaketa akademikorako sisteman ere. Erregistroa eskuratu eta hurrengo 3 egunetan egin beharko da.

Horrez gain, ebaluazio partzialeko saio horietan, zikloa koordinatzeko zereginekin lotutako lanak eginen dira, hauei buruzkoak: ikasleen bilakaera aztertzea, baita kurtsoan zehar plataforman proposatutako materialekin eta jarduerekin gertatu diren arazoak ere, eta konponbideak proposatuko dira. Saio horien helburua da baloratzea proposatutako lan motak, prozedurak eta urrutiko LHren plataforman irakasleak eta ikasleak egiten ari diren jarduerak, hobetzeko irizpide komunak hartzeko asmoz.

7. Etengabeko ebaluazioaren sistema eta azken ebaluazioaren sistema zehazteari dagokionez, azaroaren 2ko 121/2020 Ebazpenean xedatutakoari jarraituko zaio, zeinak prestakuntza-aldi bakoitzean aplikatuko baitira (irakaskuntza eta ebaluazioa); adibidez, ebaluazio partzialeko bi saio programatzeak esan nahi du prestakuntza-aldi bakoitzerako (ebaluazio partzialeko saio bakoitzari dagokion aldirako) jarraitu beharreko eredua zehaztu beharko dela:

–Etengabeko ebaluazioaren sisteman: azaroaren 2ko 121/2020 Ebazpenaren eranskineko 5. jarraibidean ezarritako bi ereduetako bat.

–Azken ebaluazioaren sisteman: azaroaren 2ko 121/2020 Ebazpenaren eranskineko 10. jarraibidean ezarritako eredua.

8. Goi mailako edo errendimenduko ikasle kirolariei dagokienez, kirol jardueraren bateragarritasuna bermatuko da, abuztuaren 4ko 534/2025 Ebazpenaren 96. instrukzioan xedatutakoaren arabera.

6.–Programazio didaktikoak. Irakaskuntza plana. Gida didaktikoak.

1. LHren modalitate birtualean (urrutikoa online) irakasten duten irakasleek, ikasturtea hasi baino lehen, kasuan kasuko moduluaren edo moduluen programazioa jarri beharko dute plataforman. Programazio horrek, aplikatu beharreko legerian ezarritako alderdiez gain, eranskin honetako jarraibideetan ebaluazio sistemak zehazteari buruz adierazitako alderdiak jaso beharko ditu.

2. Irakasleek lanbide moduluaren irakaskuntza plan bat jarri beharko dute ikasleen eskura, Moodle plataforman kurtsoaren azkenako saiorako ezarritako eguna baino lehen jarriz.

3. Irakaskuntza planak atal hauek jasoko ditu gutxienez:

–Lanbide moduluaren aurkezpena: lanbide moduluaren deskribapena, bai eta heziketa zikloko curriculumaren gainerako lanbide moduluekin duen harremanarena ere.

–Lanbide moduluari esker lortzen diren gaitasunak (profesionalak, pertsonalak eta sozialak) eta lanbide moduluarekin lotuta dauden gaitasun unitateak, baldin badaude.

–Lanbide moduluaren edukiak.

–Metodologia eta tutore lana.

–Ebaluazio-prozesua eta -sistemak. Etengabeko Ebaluazioko Jarduerak, Azken Ebaluazioko jarduerak...

–Irakaskuntza-ikaskuntza jardueren egutegia. Ikaskuntza-ingurune birtualeko jarduerak, Moodle plataforma. Jarduera presentzialak.

–Ikaskuntzarako baliabideak eta materiala. Gomendatutako webgrafia eta bibliografia.

Irakaskuntza plan hori Lanbide Heziketaren Plangintza eta Integraziorako Zerbitzuak zehazten dituen jarraibideekin eta ereduarekin bat eginen da.

7.–Material didaktikoa.

1. Modalitate honetan irakasten duten irakasleek Nafarroako online LHren Moodle plataforman dauden berariazko material didaktikoak eta jardueren proposamenak erabiliko dituzte.

Irakasle-tutoreak egiaztatu beharko du ikaskuntza birtualerako Moodle plataforman erabilgarri daudela, eta akatsik gabe, ikasleen eskura jarritako elementuak, lan multzo eta unitate guztietakoak.

2. Horiez gainera, irakasleek material lagungarria prestatzen ahalko dute curriculum-edukien alderdi jakin batzuk eguneratu, zabaldu edo hobetzeko. Irakasleek materiala prestatuz gero, irizpide hauek erabili beharko dira:

a) Kurtsoko egitura mantendu beharko da.

b) Materiala norberak sortutakoa izan beharko da, eta/edo hezkuntza helburuetarako libreki erabiltzeko lizentziarekin.

3. Hauxe da material lagungarri horiek online LHren plataforman dagokion moduluan argitaratzeko baimena lortzeko prozedura:

–Irakasleek materialen kopia bat eman beharko diote online heziketa zikloaren koordinatzaileari.

–Online heziketa zikloaren koordinatzaileak Lanbide Heziketaren Antolamendu eta Ebaluaziorako Atalera igorriko ditu materialak, hark azter ditzan, atal horrek ezartzen duenarekin bat.

–Lanbide Heziketaren Antolamendu eta Ebaluaziorako Atalak, materialak aztertu ondoren, erabakiko du ontzat hartzen duen ala ez online LHren Moodle plataforman argitaratzea. Erabakia online heziketa zikloaren koordinatzaileari jakinaraziko dio, horrek, bere aldetik, behar diren irakasleei jakinarazteko.

4. Lanbide moduluaren irakasleak zuzendu beharko ditu irakasleek plataformako materialean atzematen dituzten akatsak, hala nola ongi ez dabiltzan estekak, bideo zaharkituak, araudi aldatua eta abar.

Akatsak edukietan baldin badaude (scorm eta/edo inprimatzeko bertsioa), irakasleak koordinatzaileari jakinaraziko dio, eta horrek eskatuko dizkie iturburu-artxiboak (.elp) online LHren Moodle plataformaren administratzaileei. Ikastetxean artxibo horiek aldatu eta zuzendutako material berriak sortu ondoren, zikloaren koordinatzaileak online LHren Moodle plataformaren administratzaileei bidaliko dizkie, plataformara igo ditzaten eta bertan gordeta gera daitezen hurrengo kurtsoetarako.

5. Online heziketa zikloaren koordinatzailearen eginkizuna da, besteak beste, sustatzea online modalitateko irakasleek plataformarako material didaktiko berriak presta ditzatela, bai eta dauden edukiak egokitzea eta eguneratzea ere.

8.–Hasierako informazio saioa.

1. Heziketa ziklo bakoitzerako, ikastetxe bakoitzak informazio-saio bat eginen du kurtsoko eskolak hasi aurretik; saio horretara joatea borondatezkoa da ikasleentzat, eta matrikula egiteko unean adieraziko da zer egunetan eta ordutan izanen den, baita ikastetxearen webgunearen bitartez ere. Saio hori telematika bidez edo modu mistoan egiten ahalko da (presentziala eta telematikoa).

2. Online heziketa zikloko koordinatzaileak gidatuko du saioa, online zikloan aritzen diren irakasle taldeko gainerako irakasleekin eta, gutxienez, zuzendaritza taldeko ordezkari batekin.

3. Hasierako saioaren helburua da ikasturtea hasi aurretik ikasleen zalantzak argitzea eta argibideak ematea alderdi hauen gainean: zikloaren egutegia, jarduera presentzialak, tutoretza orduak, proba presentzialak, metodologia, ebaluazioaren ezaugarriak, moduluen baliozkotze-aitorpenak eta salbuesteak egiteko aukerak eta, oro har, kurtsoaren funtzionamendu orokorra. Hasierako saio honen funtsezko zati bat ikaskuntza-plataforma birtualaren funtzionamenduari buruzko argibideak emateko izanen da.

9.–Matrikula baliogabetzea eta ebaluazio deialdiari uko egitea LHren modalitate birtualean (urrutikoa online).

1. LHren modalitate birtualean (urrutikoa online) matrikularen baliogabetzea martxoaren 5eko 21/2019 Foru Aginduaren 23. artikuluan ezarritakoaren arabera arautuko da, eta horrek berekin ekarriko du ikaslea matrikulatuta dagoen lanbide modulu guztien irakaskuntzarako, ebaluaziorako eta kalifikaziorako eskubidea galtzea.

Nafarroan urrutiko LHren online modalitatea arautzen duen uztailaren 19ko 122/2010 Foru Aginduaren 7.4 artikuluan ezarritakoa ondoren emandako martxoaren 5eko 21/2019 Foru Aginduaren esparruan ulertu behar da. Ikasleek eskatuta matrikula baliogabetzea, 7.4 artikuluan adierazitakoa, bat dator martxoaren 5eko 21/2019 Foru Aginduaren 23. artikuluaren 3. eta 4. apartatuetan matrikula baliogabetzeko araututako egoerekin, eta haren erregulazioa aipatutako 23. artikuluan ezarritakoa da.

2. LHren modalitate birtualeko (urrutikoa online) ebaluazio deialdiari uko egitea martxoaren 5eko 21/2019 Foru Aginduaren 24. artikuluan ezarritakoaren arabera arautuko da, hurrengo xedapenetan izan ezik, xedapen horiek Nafarroako LHren online modalitateko ebaluazio deialdiari uko egitearen alderdi batzuk garatzen baitituzte.

a) Ebaluazio deialdiari uko egiteak berarekin dakar lanbide modulu baten edo gehiagoren azken ebaluazioa ez egitea; horrek ez dakar, baina, matrikula baliogabetzea. Matrikulatuta dagoen modulu guztiak ebaluatzeko deialdiari uko egin nahi bazaio, matrikula baliogabetzeko eskatu beharko da.

b) LHren modalitate birtualean (urrutikoa online), oro har, eskatzen ahalko da ikasturte bakoitzeko 2 moduluren azken ebaluazio deialdiari uko egitea gehienez, salbu eta martxoaren 5eko 21/2019 Foru Aginduaren 24.1 artikuluan adierazitako egoeraren batean dauden ikasleek, ez baitute mugaturik izanen uko egitea eskatzen duten moduluen kopurua.

Ebaluazio deialdiari uko egiteak berekin ekarriko du uko egiteko eskaerak hartzen dituen modulu edo lanbide modulu guztien irakaskuntzarako, ebaluaziorako eta kalifikaziorako eskubidea galtzea. Erabilitako ebaluazio deialdi arrunten kopuruaren ondorioetarako, ebaluazio deialdiari uko egitea eskatzen den dataren arabera zenbatuko dira:

–Ebaluazio deialdiari uko egitea eskatzen bada ikasturtea hasten den urteko abenduko azken eskola-eguna baino lehen, uko egite hori ez da kontuan hartuko ukitutako modulu(et)an erabilitako ebaluazio deialdi arrunten ondorioetarako.

–Ebaluazio deialdiari uko egitea eskatzen bada aurreko atalean adierazitako dataren ondotik, uko egite hori kontuan hartuko da erabilitako ebaluazio deialdi arrunten ondorioetarako.

3. ERANSKINA.–LH BIRTUALEKO (URRUTIKOA ONLINE) IRAKASLEENTZAKO JARRAIBIDEAK

1.–Irakasleak.

1. LHren modalitate birtualean (urrutikoa online) ematen diren zikloetan irakatsiko duten irakasleak kasuan kasuko heziketa zikloaren egitura eta curriculuma arautzen dituzten foru dekretuetan ezarritakoak izanen dira.

2. Irakasleek Moodle plataforma erabiltzen jakin behar dute. Hala ez bada, nahitaezkoa da Nafarroako urrutiko LHko Moodle plataforman sartutako autoprestakuntzako bi ikastaroak egitea. Horietan, irakasle guztiak matrikulatuta daude, eta eranskin honetako 5. jarraibidean zehazten dira.

3. Lanbide modulu bakoitzean irakasleek LHren modalitate birtualeko (urrutikoa online) ikasleei arreta emateko eta irakasle lanetan bete beharreko ordu kopurua modalitate presentzialerako orokorrean finkatutako bera izanen da, betiere kontuan hartuta, LHren modalitate birtualean (urrutikoa online), oro har, 35 lagunek osatzen dutela modulu bakoitzeko ikasle taldea. Moduluren batean hamabost ikasle baino gutxiago matrikulatuz gero, Hezkuntza Departamentuak zilegi izanen du modulu hori eskantzeari uztea.

2.–Irakasleen ordutegiaren banaketa.

1. Irakasleei urrutiko Lanbide Heziketaren modalitate birtualaren (urrutikoa online) eremuan eginkizunak betetzeko esleitzen zaizkien orduak beren eskola-ordutegiaren parte izanen dira, eta, horrenbestez, nahitaezkoa izanen dute ordu horietan ikastetxean egotea, eta EDUCA hezkuntza kudeaketarako programan jasoko dira.

2. 2.–Irakasleek modulu bakoitzean dituzten eskola-orduak ikasgela birtualean zuzeneko irakaslana egiteko orduak eta modu presentzialean zuzeneko irakaslana egiteko orduak izanen dira, eta ebazpen honen 2. eranskineko 2. jarraibidean adierazitako ekintzetan erabiliko dira. Saio presentzialetan egin beharreko ekintzetatik bat bederen ikasleentzako banakako tutore lanetarako erabiliko da. Saio horietara joatea borondatezkoa izanen da ikasleentzat. Ordutegia ikasturtearen hasierako saioan jakinarazi beharko zaie ikasleei, eta ikasgela birtualean ere argitaratu beharko da, kontuan hartuta ordutegi hori unean-unean aldatzen ahalko dela ikasleak tutoretza eskuragarri izateko eta aurrez aurreko jarduerak egiteko, ebazpen honen 2. eranskineko 4. jarraibidean adierazten den bezala.

3. Hezkuntza Departamentuak erabakitzen badu gutxieneko matrikula kopurura (15 lagun) iritsi ez den modulu bat ematea, modulu horretaz arduratzen den irakasle taldeari esleituriko ordu kopurua egokitzen ahalko da matrikulatutako ikasle kopuruaren arabera, eta ikastetxeko zuzendaritzak gainerako orduak beste eginkizun batzuetarako esleitzen ahalko ditu. Orduak Lanbide Heziketaren Plangintza eta Integraziorako Zerbitzuak egokituko ditu, ikastetxeko zuzendaritzak eskatuta.

3.–Ordutegi osagarria: koordinazio saioetarako erreserba.

LHren modalitate birtualeko (urrutikoa online) irakasleen lanaldian ordu batzuk erreserbatu beharko dira honako lan hauetarako:

–Irakasle taldeek koordinazio horizontaleko saioak egiteko, ebaluazio saioez gain.

Saio horietan, ikasleei arreta emateko eta haien jarraipena egiteko irizpideak zehaztu eta bateratuko dira, eta, orobat, materialak sortu eta hobetzeko, kurtsoen formatuaren gainean edo online zikloa garatu eta antolatzeko garrantzitsua den beste edozein alderdiri buruz. Saio horiek online heziketa zikloaren koordinatzaileak zuzenduko ditu, eta bilera horien akta eginen du, bai eta zikloaren hondarreko memoria bat ere, Hezkuntza Departamentuko online LHren arduradunei bidali beharko zaiena ikasturte horretako uztailaren 1a baino lehen.

–Irakasle taldeak koordinazio saioak egiteko, proiektuetan oinarrituriko ikaskuntzaren metodologia aplikatzearren.

Prestakuntza instituzionalaren planak hala eskatzen duenean, irakasle taldeak koordinatzeko saio horietarako orduak prestakuntza ordutzat hartzen ahalko dira, ikastetxeko zuzendariak horren berri izan ondoren oniritzia ematen badu.

4.–LHren modalitate birtualeko (urrutikoa online) irakasleen jarduna kurtsoaren hasieratik eskolak hasi bitartean.

Ikasleek kurtsoa hasi arte, LHren modalitate birtualeko (urrutikoa online) irakasleek murriztuta dituzten eskola-orduak lan hauetarako erabiliko dituzte, moduluko programazioa egiteaz gain:

–Ikasle izan nahi dutenek aurkeztutako frogagiriak eta beste edozein dokumentazio aztertzeaz arduratzen den onarpen batzordean parte hartzeko, eta giltza-moduluak egiaztatzeko eta hartutako erabakiak eta erabakiak erregistratzeko, onarpena kudeatzen duen aplikazio informatikoan.

–Lanbide moduluaren irakaskuntza plana eta jardueren gida didaktikoak prestatzeko.

–Moduluko materialak, Nafarroako online LHren Moodle plataforman daudenak, berrikusi eta eguneratzeko.

5.–LHren modalitate birtualeko (urrutikoa online) irakasleei sostengu emateko neurriak.

1. Hezkuntza Departamentuak irakasleentzako prestakuntza jardueren eskaintza bat eginen du, ikastetxeek egiten duten eskariaren araberakoa eta LHren modalitate birtualaren (urrutikoa online) beharren araberakoa. Horretarako, autoprestakuntzako bi ikastaro ditu online LHren Moodle plataforman jasota: ‘Lanbide Heziketako irakaskuntza birtualerako sarrera’ eta ‘Kalifikazioen liburua’. Online LHren Moodle plataformanaren administrazioko arduradunek ikastaro horietan matrikulatuko dituzte irakasleak.

2. Irakasleen etengabeko prestakuntzarako jarduera hauen helburua izanen da irakaslana hobetzea LHren modalitate birtualean (urrutikoa online), betiere ikasleen errendimendua hobetzeko eta haien garapen pertsonalean eta sozialean laguntzeko.

3. Hezkuntza Departamentuak, gainera, hezkuntza arloko ikerketa, esperimentazioa eta berrikuntza bultzatuko ditu, batez ere LHren modalitate birtualera (urrutikoa online) egokitutako curriculum-materiala garatzeari dagokionez. Horretarako, online LH plataformaren administrazioaz arduratzen diren langileek irakasle guztiak matrikulatuko dituzte "FPaD irakas-materialak" ikastaroan. Ikastaro horretan edukiak sortzeko eta aldatzeko tutorialak eta laguntza-materiala daude.

4. Hezkuntza Departamentuak, azkenik, curriculuma garatzeko materialak prestatzea sustatuko du, irakasleei laguntzekoak, bereziki LHren modalitate birtual (urrutikoa online) honetarako direnak. Goian adierazitako "FPaD irakas-materialak" ikastaro horretan, materiala egonen da edukien akatsak aldatzen laguntzeko, eta online irakaskuntzarako prestakuntza ere bai.

6.–Ikastetxeen eta Lanbide Heziketaren Plangintza eta Integraziorako Zerbitzuaren arteko koordinazioa.

1. Heziketa ziklo birtualaren (urrutikoa online) koordinatzaileari eta ikastetxeko zuzendariari edo hark eskuordetutako zuzendaritza taldeko kideari dagokie Lanbide Heziketaren Plangintza eta Integraziorako Zerbitzuarekin hitz egin eta komunikatzea, LHren modalitate birtualean (urrutikoa online) heziketa zikloak ematen dituzten ikastetxe guztiak koordinatzearren.

Irakasleek kontsultak eta eskaerak ziklo birtualeko koordinatzaileari bidaliko dizkiote beti, eta hark, ezin badio kontsultari edo eskaerari erantzun egokia eman, Nafarroako Lanbide Heziketa Birtualeko Aholkularitza Teknikora bidaliko du.

Ikasleak modulu bakoitzeko irakasleekin komunikatuko dira. Irakasleak kontsultaren bat egiteko beharra badu, ziklo birtualeko koordinatzailearekin harremanetan jarriko da, eta hark, ezin badio kontsultari erantzun egokia eman, Nafarroako Lanbide Heziketa Birtualeko Aholkularitza Teknikora bidaliko du.

2. LHren modalitate birtualaren (urrutikoa online) koordinazio taldea Lanbide Heziketaren Antolamendu eta Ebaluaziorako Ataleko (Nafarroako Lanbide Heziketa Birtualeko Aholkularitza Teknikoa) langileek eta ziklo birtual bakoitzeko koordinatzaileek osatuko dute. Taldea zuzentzea Lanbide Heziketaren Antolamendu eta Ebaluaziorako Atalaren (Nafarroako Lanbide Heziketa Birtualeko Aholkularitza Teknikoa) eskumena izanen da.

3. Lanbide Heziketaren Plangintza eta Integraziorako Zerbitzuak koordinazio taldearen aldian behingo bileretarako deiak eginen ditu, besteak beste, LHren modalitate birtualaren (urrutikoa online) antolaketarako eta funtzionamendurako irizpide orokorrak ezartzeko eta modalitate horren jarraipena eta ebaluazioa egiteko.

4. ERANSKINA.–ENPRESAN EDO HAREN PAREKO ERAKUNDE BATEAN PRESTAKUNTZA EGITEKO ORDUAK DITUZTEN MODULU BLOKEAK 2025-2026 IKASTURTEAN

1.–Erdi mailako heziketa zikloak.

2.–Goi mailako heziketa zikloak.

Iragarkiaren kodea: F2600999