1. NAFARROAKO FORU KOMUNITATEA
1.7. BESTELAKOAK
3/2026 EBAZPENA, urtarrilaren 13koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, zeinaren bidez ematen baitira administrazio baimena eta exekuzio proiektuaren onespena, Sesmako udal mugartean gas sare bat eraikitzeko eta egokitzeko, biometanoa "Glide" industriatik RAA-E02 sarean injektatzeko.
Ingurumeneko zuzendari nagusiaren urriaren 29ko 1221E/2025 Ebazpenaren bidez, ingurumen baimen integratua eman zitzaion Sesmako udal mugartean dagoen biometanizazioko eta bioongarrietako instalazio bati. Instalazioaren titularra Biometano Sesma SL da.
2024ko abenduaren 9an, Hidrokarburoen Sektoreari buruzko urriaren 7ko 34/1998 Legean eta Gas naturala garraiatzeko, banatzeko, merkaturatzeko eta hornitzeko jarduerak eta gas naturaleko instalazioak baimentzeko prozedurak arautzen dituen abenduaren 27ko 1434/2002 Errege Dekretuan ezarritakoarekin bat, Nedgia Navarra SAk administrazio baimena eta exekuzio proiektuaren onespena eskatu zituen Sesmako udal mugartean gas sare bat eraikitzeko eta egokitzeko, biometanoa "Glide" industriatik RAA-E02 sarean injektatzeko.
Proiektu honen xedeko jarduketak honako hauek dira:
–Biometanoa injektatzeko modulu bat, "Glide" upgrading instalazioko gasa iragazi eta erregulatu eta horri usaina emateko, aurretik instalazioan bertan gasaren kalitatea egiaztatu ondoren; erregulazio eta neurketa gela bat eta kontrol gela bat izanen ditu. 310000000001364746OK katastroko erreferentzia duen lurzatian jarriko da, Sesmako udalerriaren hegoaldean dagoen La Pinilla alderdian (11. poligonoko 194. lurzatian).
–16 bar-eko operazio presio maximoa (OPM) izanen duen lurpeko hoditeria jarriko da, DN 4" eta L245 altzairuzkoa (36 m); jartzekoa den injekzio modulutik abituko da eta hegoaldean eta lurzati berean dagoen RAA-E02 banaketa sarearen konexio puntuan amaituko da.
–Instalazio osagarriak: ebakitze balbula, DN 4" altzairuzkoa, karga hargunea, ukondoak, potentzia hargunea, etab.
Hidrokarburoen Sektoreari buruzko urriaren 7ko 34/1998 Legearen 73. artikuluan eta abenduaren 27ko 1434/2002 Errege Dekretuaren 78. artikuluan xedatutakoa betez, Nedgia Navarra SAren eskaera jendaurrean jarri zen, iragarkia argitaratuz 2025eko 13. Nafarroako Aldizkari Ofizialean, urtarrilaren 21ekoan, eta 2025eko urtarrilaren 22ko Diario de Navarra eta Diario de Noticias egunkarietan; dokumentazioa Nafarroako Gobernu Irekiaren web-fitxan argitaratu zen. Ez da alegaziorik jaso.
Aldi berean, kontsulta igorri zitzaion Sesmako Udalari, abenduaren 27ko 1434/2002 Errege Dekretuaren 80. eta 84. artikuluetan ezarritakoari jarraikiz. Ez da erantzunik jaso.
Ingurumeneko zuzendari nagusiaren maiatzaren 25eko 436E/2025 Ebazpenaren bidez, ingurumen inpaktuaren txostena egin zen baimen honen xede den proiektuari buruz.
Lurralde Antolamenduko zuzendari nagusiaren abenduaren 29ko 652E/2025 Ebazpenaren bidez, proiektu bat baimendu zen biometanoa injektatzeko modulu bat kanalizatu eta jartzeko, biometano instalazio batetik datorren gas hodi batean, Sesmako udal mugartean. Sustatzailea Nedgia Navarra SA da.
Horregatik guztiagatik, aurkeztu den dokumentazioa ikusi eta espedientearen azterketa teknikoa egin ondotik, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatzen du prozedura behar bezala gauzatu dela, eta proposatzen du aipatutako instalaziorako Nedgia Navarra SAk eskatutako administrazio baimena ematea eta exekuzio proiektua onestea.
Azaldutakoarekin bat etorriz, eta Enpresa Sustapenerako eta Azpiegituretako zuzendari nagusiaren uztailaren 30eko 29/2025 Ebazpenaren bidez eskuordetu zaizkidan eskumenak baliatuz (2025eko 155. Nafarroako Aldizkari Ofiziala, abuztuaren 5ekoa), honako hau,
EBAZTEN DUT:
1. Nedgia Navarra SAri administrazio baimena ematea, Sesmako udal mugartean gas sare bat eraikitzeko eta egokitzeko, biometanoa "Glide" industriatik RAA-E02 sarean injektatzeko.
2. Onestea instalazio horren exekuzio proiektua, Alejandra Risco Barba industria ingeniari teknikoak sinatua, eta hogeita hamasei hilabete ematea obrak burutzeko.
3. Baimen hau emanda ere, eskatzaileak lortu beharko ditu instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, bat etorrita aplikatzekoak diren beste xedapen batzuekin.
4. Instalazioak aurkeztutako proiektuaren arabera egin beharko dira, eta uztailaren 28ko 919/2006 Errege Dekretuan xedatutakoa bete beharko dute (919/2006 Errege Dekretua, Gas-erregaien banaketa eta erabilerarako erregelamendua eta haren jarraibide tekniko osagarriak –ICG 01etik 11ra– onetsi zituena).
5. Bi hilabeteko epean, eta betiere instalazioak gauzatzen hasi baino lehen, aurkeztutako aurrekontuaren ehuneko bi adinako bermea jarri beharko du Nedgia Navarra SAk. Diru hori zerbitzuan jartzeari buruzko akta egiten denean itzuliko zaio.
6. Ebazpen hau Nafarroako Aldizkari Ofizialean argitaratzea, orok jakin dezan.
7. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzuari, Ingurumen Ebaluaziorako Atalari, Paisaiaren eta Landa-lurzoruaren Atalari eta Gobernu Irekiaren eta Herritarrentzako Arretaren Zerbitzuari.
8. Ebazpen hau Nedgia Navarra SAri eta Vodafone ONO SAUri jakinaraztea, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Hartan espediente zenbakia adierazi beharko da.
9. Ebazpen hau Sesmako Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal duela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ezertan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2026ko urtarrilaren 13an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.
Iragarkiaren kodea: F2600488
