1. NAFARROAKO FORU KOMUNITATEA
1.7. BESTELAKOAK
121/2025 EBAZPENA, abenduaren 22koa, Enpresen Sustapenerako eta Azpiegituretako zuzendari nagusiak emana, zeinaren bidez industria segurtasunaren arloko lanbide gaikuntza eta txartel profesionalak lortzeko proben 2026ko deialdia onesten baita.
Maiatzaren 7ko 560/2010 Errege Dekretuak eta martxoaren 5eko 249/2010 Errege Dekretuak industria segurtasunaren arloko erregelamenduzko zenbait arau eta energiaren eta meategien gaineko zenbait xedapen aldatu zituzten, arau-xedapen horiek egokitzeko, batetik, azaroaren 23ko 17/2009 Legera (zerbitzu jardueretan libreki sartu eta horietan aritzeari buruzkoa), eta, bestetik, abenduaren 22ko 25/2009 Legera (zenbait lege aldatzen dituena zerbitzu jardueretan libreki sartu eta horietan aritzeari buruzko Legera egokitzeko asmoz).
Apirilaren 21eko 298/2021 Errege Dekretuak industria segurtasunaren arloko Espainiako araudia eguneratzen du, eta dauden erregelamenduak harmonizatzen ditu enpresa instalatzaileen lan eta giza bitartekoei dagokienez. Era berean, jarduera betetzeko irizpideak bateratzen ditu, eta arautzen du zer egoeratan den beharrezkoa autonomia erkidegoko organo eskudunaren aurrean azterketa bat gainditzea, profesionalak instalatzaile, konpontzaile edo operadore gisa aritu ahal daitezen eta/edo dagokien txartel profesionala lor dezaten.
Bestalde, industria segurtasunaren arloko profesionalak Nafarroako Foru Komunitatean egiaztatzeko prozedura arautzen duen ekainaren 30eko 291/2011 Foru Aginduaren bosgarren artikuluan ezarrita dago azterketak egiteko eta gaikuntza lortzeko prozedura.
Xedapen horiek betetzeko asmoz, bidezkoa da industria segurtasunaren arloko lanbide gaikuntza eta txartel profesionalak lortzeko 2026. urterako deialdi hau onestea.
Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,
EBAZTEN DUT:
1. Onestea industria segurtasunaren arloko lanbide gaikuntza eta txartel profesionalak lortzeko proben 2026ko deialdia.
2. Onestea deialdi hori arautuko duten oinarriak eta baldintzak, ebazpen honen eranskinetan ageri direnak.
3. Ebazpen honen aurka gora jotzeko errekurtsoa jartzen ahal da, Industriako eta Enpresen Trantsizio Ekologiko eta Digitalerako kontseilariari zuzendua, Nafarroako Aldizkari Ofizialean argitaratu eta biharamunetik hilabeteko epean.
4. Ebazpen hau eta eranskinak Nafarroako Aldizkari Ofizialean argitaratzea.
Iruñean, 2025eko abenduaren 22an.–Enpresen Sustapenerako eta Azpiegituretako zuzendari nagusia, Iñigo Arruti Torre.
I. ERANSKINA.–OINARRIAK
Lehena.–Xedea.
Ebazpen honen xedea proben deialdia egitea da honako hauek lortzeko gaitasun azterketak egiteko:
–Galdaretako operadore industrialaren lanbide gaikuntza.
–Gas-instalatzailea (A, B eta C kategoriak).
–Petrolio produktu likidoen instalatzailea edo konpontzailea (I., II. eta III. kategoriak).
–Dorre-garabiko operadorearen txartela.
–Eraikinetako instalazio termikoen arloko txartel profesionala.
Bigarrena.–Izena ematea.
1. Izena eman nahi dutenek izena emateko eskabide bat (II. eranskina) aurkeztu beharko dute, ezarritako epearen barruan, izena eman nahi duten azterketa bakoitzeko.
Honela ematen ahalko da izena:
–Aurrez aurre: Nafarroako Gobernuko erregistro bulegoetan, edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritako lekuetan. Eskubide hori erabiliz, espedientea posta bidez igortzen bada, gutun-azal irekian aurkeztuko da, postetxeko funtzionarioak data eta zigilua jar ditzan eskabidean gutuna ziurtatu baino lehen.
–Telematikoki: www.nafarroa.eus webgunetik (bilatzailea: "industria segurtasuneko 2026ko azterketak").
Azterketa egiteko izena emateko eskabide bakoitzeko, 15 euroko tasa ordaindu beharko da, azterketa-eskubideak direla eta. Tasa bakoitzaren ordainagiria dagokion izena emateko eskabidearekin batera aurkeztuko da. Tasa ordaintzen ez bada, izangaia bazterturik geratuko da.
Tasa ordaindu izanaren frogagiria aurkezteak ez du inola ere aldatuko izena emateko eskabidea behar den epean eta moduan aurkeztu beharra.
Tasa itzultzea, interesdunak eskaturik, bidezko izanen da, bakar-bakarrik, bitan ordaindu bada.
2. 2026. urtean bi epe izanen dira izena emateko:
Izena emateko lehen epea (galdaretako operadore industrialaren, gas-instalatzailearen, petrolio produktu likidoen instalatzaile edo konpontzailearen, dorre-garabiko operadorearen eta eraikinetako instalazio termikoen arloko instalatzailearen azterketetarako): eskabidea eta ordainagiria 2026ko martxoaren 1etik 15era aurkeztu beharko dira, bi egunak barne.
Izena emateko bigarren epea (galdaretako operadore industrialaren, gas-instalatzailearen, petrolio produktu likidoen instalatzaile edo konpontzailearen, dorre-garabiko operadorearen eta eraikinetako instalazio termikoen arloko instalatzailearen azterketetarako): eskabidea eta ordainagiria 2026ko irailaren 1etik 15era aurkeztu beharko dira, bi egunak barne.
Hirugarrena.–Izangaiak azterketa egiteko onartzea eta erreklamazioak.
Eskabideak aurkezteko epea amaituta, eta 10 egun balioduneko gutxieneko epean, izangai onartu eta baztertuen behin-behineko zerrenda argitaratuko da www.nafarroa.eus webgunean (bilatzailea: "industria segurtasuneko 2026ko azterketak").
Bazterturik gelditu direnek bost egun balioduneko epea izanen dute, behin-behineko zerrendak argitaratzen direnetik, erreklamazioak aurkezteko eta, akatsik egin badute, horiek zuzentzeko.
Erreklamazioak ebatzi ondoren, izangai onartu eta baztertuen behin betiko zerrenda argitaratuko da, azterketak egiteko datarekin, ordutegiarekin eta lekuarekin batera. Azterketak maiatzean eta azaroan egitea aurreikusten da.
Izangaiak onartuen behin betiko zerrendetan egoteak ez dakar inola ere Administrazioak aitortzea deialdiaren oinarrietan eta kasuan kasuko erregelamenduetan eskatzen diren baldintzak betetzen dituztela.
Laugarrena.–Kalifikazio epaimahaia.
Hauek izanen dira kalifikazio epaimahaiko kideak:
–Epaimahaiburua: Javier Amezaga Ruiz jauna, Industria Segurtasuneko Erregistroaren Ataleko burua.
Ordezkoa: Laura Larraya Irigoyen andrea, Industria Antolamenduaren, Azpiegitura Energetikoen eta Meatzeen Zerbitzuko zuzendaria.
–Epaimahaikidea: Yolanda Tofiño Alba andrea, Enpresen Bulegoko burua.
Ordezkoa: Nuria Viedma Hervás andrea, Industria Segurtasuneko Erregistroaren Ataleko administraria.
–Idazkaria: Ana Sainz Jiménez andrea, Industriaren, Energiaren eta Meatzeen Araubide Juridikoaren Ataleko burua.
Ordezkoa: Isabel Akerreta Larraz andrea, Laguntza Juridikoaren Ataleko burua.
Epaimahaiko buruak deialdia egin ondoren, epaimahaia eratuko da baldin eta kideen gehiengo soila bertaratzen bada, titularrak nahiz ordezkoak izan. Bilkura horretan, epaimahaiak behar diren erabakiak hartuko ditu probak behar bezala gara daitezen.
Bosgarrena.–Proben garapena eta edukia.
1. Azterketa teorikoa:
Azterketetan izena eman dutenek nortasun-agiri nazionala, pasaportea edo legez onartua den beste edozein dokumentu, identitatea behar adina frogatzen duena, eraman beharko dute probak egiterakoan.
Azterketak test moduko 40 galdera izanen ditu, ebazpen honen III. eranskinean ezarritako edukiei buruzkoak. Galderetako bakoitzak hiru erantzun alternatibo izanen ditu, eta erantzun zuzenak puntu batekin baloratuko dira, eta okerrak, erantzun gabeak edo erantzun bat baino gehiago dauzkatenak, berriz, ez dira puntuatuko, ez positiboki ez negatiboki.
Azterketa gainditzeko 32 puntu lortu behar dira gutxienez.
Proba hori egiteko, ordubete izanen da.
Proba egiteko ez da inolako kalkulagailurik erabiltzen ahalko, ez eta telefono mugikorrik edo bestelako materialik ere, soil-soilik punta lodiko bolaluma urdina edo beltza.
Azterketatik bazterturik geldituko dira adierazten diren egun, ordu eta tokietan agertzen ez diren izangaiak, arrazoia edozein dela ere, edo identitatea behar bezala frogatzen ez dutenak.
Azterketak epaimahaiak ezartzen dituen moduan eta tokian eginen dira, eta www.nafarroa.eus webgunean (bilatzailea: "industria segurtasuneko 2026ko azterketak") iragarriko dira.
Seigarrena.–Gainditu duten izangaien zerrenda eta erreklamazioak.
Ariketen kalifikazioa bukatuta, gai eta ez gai direnen eta aurkeztu ez direnen behin-behineko emaitzak argitaratuko dira www.nafarroa.eus webgunean (bilatzailea: "industria segurtasuneko 2026ko azterketak").
Behin-behineko emaitzak argitaratu ondoren, 5 egun balioduneko epea emanen da erreklamazioak aurkezteko. Erreklamazioen gainean ebatzi ondoren, Enpresen Sustapenerako eta Azpiegituretako zuzendari nagusiak ebazpen bat eman eta argitaratuko du behin betiko zerrenda onesteko. Ebazpen horren aurka gora jotzeko errekurtsoa jartzen ahalko da, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean.
II. ERANSKINA.–Eskabidea, industria segurtasunaren arloko profesionalaren txartela edo gaikuntza lortzeko azterketan onartua izateko
Deialdiaren datuak: |
Deialdia: 2026 |
......./...... Ebazpena, ..................aren ......(e)koa, Enpresen Sustapenerako eta Azpiegituretako zuzendari nagusiak emana, zeinaren bidez industria segurtasunaren arloko lanbide gaikuntza eta txartel profesionalak lortzeko proben 2026ko deialdia onesten baita. |
ESKATZAILEAREN DATU PERTSONALAK: |
IFZa/AIZa: | Jaioteguna: | Gizonezkoa [ ] Emakumezkoa [ ] |
Izena: | Deiturak: |
Helbidea: | Zenbakia: | Solairua/letra: |
PK: | Herria: | Probintzia: |
1. tel.: | 2. tel.: | Helb. elek.: |
Zein AZTERKETATARA aurkeztu nahi duzun (markatu laukitxo bat bakarrik). Beste azterketa batean izena emateko, beste eskabide bat aurkeztu beharko duzu. |
Jasotzeko gailuak eta haien mantentze-lanak | [ ] Dorre-garabiko operadorearen txartela |
Eraikinetako instalazio termikoak | [ ] Eraikinetako instalazio termikoen txartela |
Presio-ekipoak | [ ] Galdaretako operadore industriala |
Gas-instalazioak | [ ] A kategoria [ ] B kategoria [ ] C kategoria |
Petrolio produktu likidoen instalazioak | [ ] IP-I kategoria [ ] IP-II kategoria [ ] Konpontzailea IP-III kategoria |
AURKEZTEN DIREN AGIRIAK: |
[ ] Tasak ordaindu izanaren ziurtagiria |
Sinatzaileak ESKATZEN du onar dezatela eskabide honetan adierazitako prozesuan, eta ADIERAZTEN du, bere erantzukizunpean, bertan agertzen diren datu guztiak egiazkoak direla eta deialdiaren oinarrian eskatutako betebehar guztiak betetzen dituela proba egiteko unean.
Iruñean, 2026ko martxoaren/irailaren .....(e)(a)n
ESKATZAILEAREN SINADURA.
Oharra: dorre-garabiko eta instalazio termikoetako probak gainditzen dituztenek txartela egiteko eskatu beharko dute; horretarako, frogatu beharko dute dagokion araudian ezarritako baldintzak betetzen dituztela.
III. ERANSKINA.–GAI-ZERRENDA
Azterketa: galdaretako operadore industriala.
Beharrezkoak diren gutxieneko ezagutzak adierazita daude Presio-ekipoen erregelamendua eta haren jarraibide tekniko osagarriak onesten dituen abenduaren 21eko 809/2021 Errege Dekretuaren PE-1 jarraibide tekniko osagarriaren II. eranskinean.
Azterketa: eraikinetako instalazio termikoen txartel profesionala.
Beharrezkoak diren gutxieneko ezagutzak adierazita daude Eraikinetako Instalazio Termikoen Erregelamendua onesten duen uztailaren 20ko 1027/2007 Errege Dekretuaren 3.1 eta 3.2 gehigarrietan.
Azterketa: gas-instalatzailea, A kategoriakoa.
Beharrezkoak diren gutxieneko ezagutzak adierazita daude uztailaren 28ko 919/2006 Errege Dekretuaren JTO-ICG-09ko 1. eranskineko 1. puntuan. Errege dekretu horren bidez, Gas-erregaien banaketa eta erabilerarako erregelamendua eta haren jarraibide tekniko osagarriak –ICG 01etik 11ra– onetsi ziren.
Azterketa: gas-instalatzailea, B kategoriakoa.
Beharrezkoak diren gutxieneko ezagutzak adierazita daude uztailaren 28ko 919/2006 Errege Dekretuaren JTO-ICG-09ko 1. eranskineko 2. puntuan. Errege dekretu horren bidez, Gas-erregaien banaketa eta erabilerarako erregelamendua eta haren jarraibide tekniko osagarriak –ICG 01etik 11ra– onetsi ziren.
Azterketa: gas-instalatzailea, C kategoriakoa.
Beharrezkoak diren gutxieneko ezagutzak adierazita daude uztailaren 28ko 919/2006 Errege Dekretuaren JTO-ICG-09ko 1. eranskineko 3. puntuan. Errege dekretu horren bidez, Gas-erregaien banaketa eta erabilerarako erregelamendua eta haren jarraibide tekniko osagarriak –ICG 01etik 11ra– onetsi ziren.
Azterketa: dorre-garabiko operadorea.
Beharrezkoak diren gutxieneko ezagutzak adierazita daude ekainaren 27ko 836/2003 Errege Dekretuaren VI. eranskineko 4.1 puntuan. Errege dekretu horren bidez Jasotzeko gailuen eta haien mantentze-lanetarako Erregelamenduaren jarraibide tekniko osagarri berri bat onesten da, "IEM-JGM-2", obretarako eta bestelako aplikazioetarako dorre-garabiei buruzkoa.
Azterketa: petrolio produktu likidoen instalatzailea (I. kategoria).
Beharrezkoak diren gutxieneko ezagutzak adierazita daude "Petrolio produktu likidoen instalatzaile edo konpontzaileak edo enpresa instalatzaile edo konpontzaileak" IM-PI05 jarraibide tekniko osagarria onesten duen apirilaren 8ko 365/2005 Errege Dekretuaren II. GEHIGARRIAN.
Azterketa: petrolio produktu likidoen instalatzailea (II. kategoria).
Beharrezkoak diren gutxieneko ezagutzak adierazita daude "Petrolio produktu likidoen instalatzaile edo konpontzaileak edo enpresa instalatzaile edo konpontzaileak" IM-PI05 jarraibide tekniko osagarria onesten duen apirilaren 8ko 365/2005 Errege Dekretuaren III. GEHIGARRIAN.
Azterketa: petrolio produktu likidoen konpontzailea (III. kategoria).
Beharrezkoak diren gutxieneko ezagutzak adierazita daude "Petrolio produktu likidoen instalatzaile edo konpontzaileak edo enpresa instalatzaile edo konpontzaileak" IM-PI05 jarraibide tekniko osagarria onesten duen apirilaren 8ko 365/2005 Errege Dekretuaren IV. GEHIGARRIAN. IV. GEHIGARRIA. Ezagutza teoriko-praktikoak–III. kategoria.
Oharra: gai guztiak ebazpen hau Nafarroako Aldizkari Ofizialean argitaratzen den egunean indarra duen legeriaren arabera eskatuko dira.
Iragarkiaren kodea: F2517072