1. NAFARROAKO FORU KOMUNITATEA
1.7. BESTELAKOAK
200/2026 EBAZPENA, urriaren 20koa, Enpresen Sustapenerako eta Azpiegituretako zuzendari nagusiak emana, zeinaren bidez eraikitzeko administrazio baimena ematen baita 4,8 MW-eko "La Caya" eguzki-instalazio fotovoltaikorako eta haren transformazio eta ebakuazio azpiegituretarako, Erriberriko eta Tafallako udal mugarteetan. Espedientearen kodea: 5323-CE.
1.–Aurrekariak.
2023ko apirilaren 21ean eta Sektore Elektrikoari buruzko abenduaren 26ko 24/2013 Legearen 53. artikuluan eta Energia elektrikoaren instalazioak baimentzeko prozedurak eta energia elektrikoa garraiatu, banatu, merkaturatu eta hornitzeko jarduerak arautzen dituen abenduaren 1eko 1955/2000 Errege Dekretuaren 122. eta 130. artikuluetan ezarritakoari jarraikiz, Ríos Renovables SLUk aurretiazko administrazio baimena eta eraikitzeko administrazio baimena eskatu zituen "La Caya" eguzki-instalazio fotovoltaikorako eta haren transformazio eta ebakuazio azpiegituretarako, Erriberriko eta Tafallako udal mugarteetan.
Eskaera behar bezala izapidetu ondoren, Enpresen Sustapenerako eta Azpiegituretako zuzendari nagusiaren abuztuaren 5eko 34/2025 Ebazpenaren bidez (2025eko 173. Nafarroako Aldizkari Ofizialean argitaratua, irailaren 1ekoan), aldez aurreko administrazio baimena eman zitzaion Ríos Renovables SLUri "La Caya" eguzki-instalazio fotovoltaikorako eta haren transformazio eta ebakuazio azpiegituretarako, Erriberri eta Tafallako udal mugarteetan.
Ebazpen hauek kontuan harturik eman zen ebazpen hori:
- 330E/2024 Ebazpena, apirilaren 26koa, Ingurumeneko zuzendari nagusiak emana, ingurumen inpaktuaren aldeko txostena egiten duena (2024ko 102. Nafarroako Aldizkari Ofizialean argitaratua, maiatzaren 17koan).
- 384E/2025 Ebazpena, abuztuaren 1ekoa, Lurralde Antolamenduko zuzendari nagusiak emana, lurzoru urbanizaezinean jarduerak egiteko baimena ematen duena.
2.–Eraikitzeko administrazio baimenaren eskaera.
2025eko irailaren 16an, abenduaren 1eko 1955/2000 Errege Dekretuaren 130. artikulua aplikatuta, Ríos Renovables SLUk eraikitzeko administrazio baimena eskatu zuen "La Caya" eguzki-instalazio fotovoltaikorako eta haren transformazio eta ebakuazio azpiegituretarako, Erriberriko eta Tafallako udal mugarteetan.
Entregatu diren azken agiri teknikoen arabera, eguzki-instalazio fotovoltaikoa Erriberriko udal mugarteko 11. poligonoaren 89. eta 96. lurzatietan dago, gutxi gorabehera 8,67 hektarea hartzen ditu, eta honela dago osatuta:
- Aldebiko 7.584 modulu fotovoltaiko, 822,25 W-eko potentzia unitarioa dutenak (1,15 × 715 W), guztira 6.235,944 kWp-eko potentzia-erpinarekin.
- 15 inbertsore fotovoltaiko, 40 ºC-tan 320 kW-eko potentzia izendatua dutenak eta, osotara, 4.800 kWn-ko potentzia instalatua.
- 5.500 kVA-ko transformazio zentro bat eta 30/0,8 kV-eko transformazio erlazioa.
- 30 kV-eko babes eta neurketa zentro bat.
Inbertsore fotovoltaikoen bidez, moduluek korronte zuzenean sortzen duten energia korronte alterno bihurtzen da, eta energia hori transformazio zentroetako behe-tentsioko armairuraino eramaten da, 30 kV-era eraldatzeko. Energia 30 kV-era transformatu ondoren, ebakuazio azpiegiturak 30 kV-eko lurpeko bi linea dira, bi transformazio zentroetatik hasi eta instalazio berean instalatutako babes eta neurketa zentroraino. Instalazio horretan, instalazio horrek eta sustatzaile berak proiektatzen dituen beste hiru eguzki-instalazio fotovoltaikok sortutako energia jasotzen da: "Las Planillas" (5321-CE), "Los Mulares" (5322-CE) eta "Baretón" (5447-CE).
Puntu horretatik aurrera, lau instalazioetako ebakuazio azpiegiturak partekatu egiten dira, I-DE Redes Eléctricas Inteligentes SAUren jabetzako 66 kV-eko "Tafalla" TAE azpiestazioan ebakuatu arte. Horrela, eraikitzeko administrazio baimen honetan, "La Caya" eguzki-instalazio fotovoltaikoaz gain, lau espedienteetarako instalazio komun hauek aurreikusten dira:
- 30 kV-eko lurpeko ebakuazio linearen proiektua, lau instalazioek sortutako energia ebakuatzeko, "Los Mulares" eguzki-instalazio fotovoltaikoan instalatutako babes eta neurketa zentrotik, "La Caya" eguzki-instalazio fotovoltaikoan kokatutako babes eta neurketa zentrotik igarota eta "Promotores Tafalla 30/66 kV" azpiestazioan amaituta, Erriberriko eta Tafallako udal mugarteetan.
- "Promotores Tafalla 30/66 kV" azpiestazioaren proiektua, zenbait sustatzailek partekatua, eta haren 66 kV-eko lurpeko ebakuazio linea, "Promotores Tafalla 30/66 kV" azpiestaziotik gaur egungo 66 kV-eko "Tafalla" TAE azpiestaziora (I-DE Redes Eléctricas Inteligente SAUren jabetzakoa).
3.–Kontsulten tramitea.
Lurralde Antolamenduko zuzendari nagusiaren abuztuaren 1eko 384E/2025 Ebazpenak honako hau ezartzen zuen: "Enpresen Sustapenerako eta Azpiegituretako Zuzendaritza Nagusiak emandako eraikitzeko administrazio baimena eman aurretik, proiektua igorriko da ebazpen honetan adierazitako neurriak betetzen direla egiaztatzeko".
Aurrekoa ikusita, proiektuaren kopia bidali zitzaion Paisaiaren eta Landa-lurzoruaren Atalari, egiazta zezan lurzoru urbanizaezinean jarduerak eta erabilerak baimentzeko eskatutakoa betetzen zuen. 2025eko abenduaren 18an, Paisaiaren eta Landa-lurzoruaren Atalak txosten teknikoa egin zuen, eta bertan ondorioztatu zen proiektu aldatua bat zetorrela abuztuaren 1eko 384E/2025 Ebazpenean jasotako neurriekin.
Bestalde, entitate sustatzaileak separata bat entregatu zuen Herri-lanen eta Azpiegituren Zuzendaritza Nagusiaren Zainketa Zerbitzurako, NA-6620 eta NA-115 errepideekiko 30 kV-eko lurpeko ebakuazio linearen gurutzaketei eta paralelismoei buruzkoa. 2026ko otsailaren 16an, Hegoaldeko Zainketa Atalak aldeko txostena eman zuen NA-6620 eta NA-115 errepideen gaineko ukipenei buruz. Txosten horren arabera, lanak hasi aurretik, entitate sustatzaileak Zainketa Zerbitzuaren baimena eskuratu beharko du. Horretarako, baimen eskaerarekin batera, lanak behar bezala definitzen dituzten agiri teknikoak eman beharko dizkio Herri-lanen eta Azpiegituren Zuzendaritza Nagusiari, tasa ordaintzeko baimenarekin batera.
AP-15 autobidearen gaineko ukipenari dagokionez, lanak hasi aurretik, entitate sustatzaileak Autopistas de Navarra SArekin (AUDENASA) harremanetan jarri beharko du, behar den gurutzaketa nola eginen den zehaztasunez zehazteko.
4.–Eraikitzeko administrazio baimenaren proposamena.
Enpresen Sustapenerako eta Azpiegituretako zuzendari nagusiaren 2026ko otsailaren 23ko 37/2026 Ebazpenaren bidez, eraikitzeko administrazio baimena eman zen energia elektrikoa ekoizteko "La Caya" (4,8 MW) izeneko eguzki-instalazio fotovoltaikorako eta haren transformazio eta ebakuazio azpiegituretarako, Erriberriko eta Tafallako udal mugarteetan. Ebazpen hori 2026ko 50. Nafarroako Aldizkari Ofizialean argitaratu zen, martxoaren 10ekoan.
Ondoren, 2026ko irailaren 25ean, Ríos Renovables SLUk beste aldaketa bat aurkeztu zuen proiektuan, eguzki-instalazio fotovoltaikoari dagokion konfigurazio elektrikoari soilik eragiten diona, eta eskatu zuen 2026ko otsailaren 23ko 37/2026 Ebazpena baliogabetzeko eta beste ebazpen bat emateko, definitutako azken osagaiak biltzen dituena, instalazioa eraikitzeko administrazio baimena eman dakion.
Horregatik guztiagatik, aurkeztutako agiriak ikusita eta Sektore Elektrikoari buruzko abenduaren 26ko 24/2013 Legean xedatutakoa kontuan hartuta, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatu du prozedura behar bezala gauzatu dela, eta proposatu du Ríos Renovables SLU enpresari eraikitzeko administrazio baimena ematea 4,8 MW-eko "La Caya" eguzki-instalazio fotovoltaikorako eta haren transformazio eta ebakuazio azpiegituretarako, Erriberriko eta Tafallako udal mugarteetan.
Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,
EBAZTEN DUT:
1. Ríos Renovables SLUri eraikitzeko administrazio baimena ematea 4,8 MW-eko "La Caya" eguzki-instalazio fotovoltaikorako eta haren transformazio eta ebakuazio azpiegituretarako, gaur egungo 66 kV-eko "Tafalla" TAE azpiestazioraino, Erriberriko eta Tafallako udal mugarteetan. Halaber, aurkeztutako proiektuak onartuko dira, eta hogeita hamasei hilabeteko epea emanen da horiek gauzatzeko.
2. Eraikitzeko administrazio baimen hau emanda ere, instalazioa gauzatzeko beharrezkoak diren emakida, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.
3. Ondoriorik gabe uztea 37/2026 Ebazpena, 2026ko otsailaren 23koa, Enpresen Sustapenerako eta Azpiegituretako zuzendari nagusiak emana, ebazpen honek ordezten baitu.
4. Aurkeztutako proiektuaren arabera gauzatu beharko dira instalazioak, eta bat etorri beharko dute honako hauetan xedatuarekin: maiatzaren 9ko 337/2014 Errege Dekretua, onesten dituena Goi tentsioko instalazio elektrikoen baldintza teknikoei eta segurtasun bermeei buruzko erregelamendua eta haren jarraibide tekniko osagarriak, JTO-GTE 01etik 23ra; otsailaren 15eko 223/2008 Errege Dekretua, onesten dituena Goi tentsioko linea elektrikoen baldintza teknikoei eta segurtasun bermeei buruzko erregelamendua eta haren jarraibide tekniko osagarriak, JTO-GTL 01etik 09ra; eta abuztuaren 2ko 842/2002 Errege Dekretua, onesten duena Behe tentsioko erregelamendu elektroteknikoa.
5. Behin proiektua gauzatuta, eskatzaileak probetarako behin-behineko ustiapenerako baimena eskatu beharko du. Eskaera horrekin batera obra bukaerako ziurtagiria aurkeztuko da, teknikari eskudun batek sinatua, baita araudian ezarritako gainerako agiriak ere.
6. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzuari; Ingurumen Ebaluazioaren Atalari; Paisaiaren eta Landa-lurzoruaren Atalari; Baso Plangintzarako Atalari; Herri-lanen eta Azpiegituren Zuzendaritza Nagusiko Zainketa Zerbitzuari; Ondare Historikoaren Zerbitzuko Ondare Arkitektonikoaren Atalari eta Erregistroaren, Ondasun Higigarrien eta Arkeologiaren Atalari; eta Gobernu Irekiaren eta Herritarrentzako Arretaren Zerbitzuari, behar diren ondorioak izan ditzan.
7. Ebazpen hau Nafarroako Aldizkari Ofizialean argitaratzea, orok jakin dezan.
8. Ebazpen hau jakinaraztea Ríos Renovables SLUri, i-DE Redes Eléctricas Inteligentes SAUri, Nafarroako Autobideak SAri (AUDENASA), Nafarroako Ubidea SAri (CANASA), Enagás Transporte SAUri, Energía Inagotable de Keneo SLri, Energía Inagotable de Kyoko SLri, Bodegas Pagos de Araiz SAri, Sustrai Erakuntza fundazioari, Ongaiz-Zangozerriko Ekologistak Martxan elkarteari, Landazuria-Erriberako Ekologistak Martxan elkarteari eta Aguacanali, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Hartan espediente kodea adierazi beharko da.
9. Ebazpen hau jakinaraztea Erriberriko eta Tafallako udalei eta Ebroko Konfederazio Hidrografikoari, eta aditzera ematea ezen honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, bi hilabeteko epean, honako hau jakinarazi eta biharamunetik hasita, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2026ko urriaren 20an.–Enpresen Sustapenerako eta Azpiegituretako zuzendari nagusia, Iñigo Arruti Torre.
Iragarkiaren kodea: F2613824
