Iragarkia

214. ALDIZKARIA - 2026ko urriaren 27a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

158C/2026 EBAZPENA, irailaren 28koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Sociedad Anónima de Vera –Savera– enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Aztertu da Sociedad Anónima de Vera –Savera– enpresak aurkeztutako hitzarmen kolektiboaren testua (kodea: 31008352012004), 2026ko irailaren 22an sartu zena erregistro honetan eta 2026ko uztailaren 10ean sinatu zutena enpresaren ordezkariek eta sindikatuen ordezkariek.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan xedatutakoa kontuan hartuta,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Sociedad Anónima de Vera –Savera– enpresak aurkeztutako hitzarmen kolektiboa (kode zenbakia: 31008352012004).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2026ko irailaren 28an.–Ekonomia Sozialeko eta Laneko zuzendari nagusia, Iñaki Mendióroz Casallo.

ENPRESAREN HITZARMEN KOLEKTIBOA

2026-2027 urteak

Enpresa Batzordearen eta enpresaren ordezkariek Beran onetsi eta izenpetu dute 2026ko uztailaren 10ean Berako Sociedad Anónima de Vera "SAVERA" enpresaren hitzarmena 2026. eta 2027. urteetarako, honako honi erantsi zaiona.

Langileen ordezkaritzaren aldetik,

Angel Pombar, Fernando Etxegarai, Juan José Echeveste, Juan Antonio Leonis, Miguel Gomez, Jon Ander Zapiain, Bernard Errandonea, Oskar Urkiola, Juan Ramón Pikabea.

Enpresaren izenean:

José Vicente Espín, Carlos Martínez-Iturralde.

SAVERA – SA DE VERA

1. artikulua. Eremu pertsonala.

Enpresaren hitzarmen honek SAVERAko plantillako langile guztiengan izanen du eragina, lan baldintzak eta ordainsariak banaka-banaka ituntzen dituzten zuzendaritzako langileengan izan ezik. Batzordeari jakinarazi beharko zaio salbuespen horren ondorioz ukitutako langileak nor diren.

2. artikulua. Indarraldia.

Hitzarmen kolektibo honek bi urteko indarraldia izanen du. 2026ko urtarrilaren 1ean hartuko du indarra ondorio guztiekin, eta 2027ko abenduaren 31n bukatuko da.

Hitzarmena 2027ko irailaren 30ean hartuko da salatutzat, hau da, amaiera eguna baino hiru hilabete lehenago; aldeek konpromisoa hartzen dute urriaren 31 baino lehen negoziazio batzorde bat osatzeko eta hitzarmen berriaren negoziazioa 15 eguneko epean hasteko, batzordea osatzen den egunetik hasita.

Berariaz adosten da ezen hitzarmena salatu eta itundutako iraunaldia amaitu ondoren, hitzarmenak indarrean jarraituko duela harik eta bi aldeek horren ordezko bat izenpetzen duten arte.

3. artikulua. Lotura.

Hemen itundutako baldintzek multzo organikoa eta zatiezina osatzen dute, eta, aplikazio praktikoari dagokionez, osotasunean hartuko dira.

4. artikulua. Batzorde paritarioa.

Batzorde paritarioa eratzen da hitzarmen hau interpretatzeko, baita Langileen Estatutuaren 85.3.e) artikuluan jasotako gaiak interpretatzeko ere. Enpresa zuzendaritzako hiru ordezkarik eta Enpresa Batzordeko beste hiruk osatuko dute. Hitzarmena indarrean dagoen bitartean, haren betetzeari, interpretazioari, irispideari edo aplikazioari buruz sortzen diren auzi guztiak batzorde horretan aztertuko dira bakar-bakarrik.

Batzorde paritario horrek alderdietako edozeinek eskatuta eginen du bilera, desadostasunak izaten direnean (banakakoak edo taldekakoak) hitzarmen honen nahiz Langileen Estatutuaren 85.3.e) artikuluan araututako gainerako gaien interpretazioaren edo betetzearen gainean. Halakoetan, ebazpen bat hartu beharko du zazpi eguneko epean. Batzorde paritarioak akordiorik lortzen ez duenerako, alderdiek berariaz adostu dute ez dutela nahitaezko arbitrajera joko. Edozein kasutan ere, alderdiek aukera izanen dute Langileen Estatutuaren 83. artikuluan aurreikusitako lanbidearteko akordioek ezarritako prozedura orokor eta aplikazio zuzenekoetara jotzeko, eraginkorki ebazteko akordio horiei buruzko negoziazioetan sortutako desadostasunak, zeinetan sindikatuek parte hartzen baitute Askatasun Sindikalari buruzko Lege Organikoaren 6.3 eta 7.2 artikuluekin bat.

Eskaera formala izateko, hitzarmena sinatu duten alderdietako baten kide guztien sinadurak bildu beharko dira.

5. artikulua. Maila-igoerak.

Goragoko lanbide kategoria batera igotzeko, langileak aurre-aurreko kategoriakoa izan beharko du eta alderdi hauek baloratuko dira:

–Titulazio egokia.

–Lanpostua/k ezagutzea.

–Enpresaren barreneko lanbide historia.

–Ezartzen diren probak gainditzea.

–Balioaniztasuna.

Nolanahi ere, aurretik langileen ordezkariei iritzia eskatuko zaie balorazioaz (ikusi lanbide kategorien taula IV. eranskinean).

6. artikulua. Lan baldintzen funtsezko aldaketa eta mugigarritasun geografikoa.

Langileei akordio edo itun kolektiboaren bidez aitortutako lan baldintzak edo langileek dituztenak funtsean aldatzeko, dela arrazoi ekonomiko edo teknikoengatik, dela antolaketari edo ekoizpenari dagozkien arrazoiengatik, dela enpresaburuak bere aldetik hartzen duen baina ondorio kolektiboak –lantokiko langile batengan, batzuengan edo denengan– dituen erabaki batek eraginda, prozedura hau bete beharko da:

–Langileen ordezkariei jakinaraziko zaie aldez aurretik, aldaketarako oinarri diren arrazoiak aipatuz.

–Langileen legezko ordezkariekin kontsulta epe bat ezarriko da, 15 egunekoa.

–Epe horretan gehiengoaren adostasuna lortzen ez bada aldaketaren beharraz, Langileen Estatutuaren 83. artikuluan aurreikusitako lanbidearteko akordioek ezarritako prozedura orokor eta aplikazio zuzenekoetara joko da, eraginkortasunez ebazteko akordio horiei buruzko negoziazioetan sortutako desadostasunak, zeinetan sindikatuek parte hartzen baitute Askatasun Sindikalari buruzko Lege Organikoaren 6.3 eta 7.2 artikuluekin bat. Nolanahi ere, alderdiek adierazten dute ez dutela onartzen nahitaezko arbitrajea.

Aurreko atalean aipatutako prozedura aplikatuko da, halaber, enpresaren zuzendaritzak planteatzen ahal dituen mugikortasun geografiko kolektiboetan.

7. artikulua. Lan osasuna.

Langileen laneko segurtasun eta osasuna denon erantzukizuna denez gero, enpresak hitzematen du behar diren antolaketa arau egokiak hartuko dituela arlo horretan kalitate handia lortzeko. Arduradun bat izendatuko du eta bere lana behar bezala gauzatzeko behar dituen giza eta diru baliabideak esleituko dizkio.

Urtean behin, enpresak azterketa medikoa eginen die langileei.

Aldi baterako ezintasun kasuetan, enpresak prestazio ekonomikoaren estaldura mantenduko du. Enpresak sistema publikoan mantenduko du prestazio ekonomikoen estaldura kontingentzia arrunten (eritasun arrunta eta lanekoak ez diren istripuak) ondoriozko aldi baterako ezintasun kasuetan, baita halakoetan izaten diren alta eta bajen osasun kontrolak ere. Beraz, enpresak ezin izanen du estaldura hori Gizarte Segurantzaren entitate laguntzaileen bitartez egin, enpresa batzordearen baimenik izan gabe.

Enpresak arrisku psikosozialen ebaluazioa egin beharko du, gehienez ere urtebeteko epean, hitzarmen hau sinatzen denetik aurrera. Ebaluazio horretarako metodoa Segurtasun eta Osasun Batzordeak erabakiko du, eta langileen osasunerako kalteak daudela ondorioztatzen bada, teknikari adituek egindako txostenaren ondorioetan proposatutako ekintzak eta epeak beteko dira.

8. artikulua. Laneko arropa.

Enpresak dohainik emanen dizkie langileei behar dituzten laneko jantzi guztiak. Gainera, jantziak garbitzeaz ere arduratuko da.

Jardunean ohiko betaurreko graduatuak behar dituenak nahitaez erabili beharko ditu jaurtitako partikuletatik babesteko bitarteko osagarriak, istripurik gerta ez dadin.

Segurtasuneko betaurrekoak: enpresak laguntza emanen du segurtasuneko betaurreko graduatuak ordaintzeko, gehienez ere 120 euro pertsona bakoitzeko.

9. artikulua. Absentismoa.

Absentismoagatik kaleratzea, Langileen Estatutuaren 52.d) artikuluan araututako moduan, bidegabetzat hartuko da, eta 45 eguneko kalte-ordaina ordainduko da urte bakoitzeko, gehienez ere 42 hilekotan.

Kaleratze mota hori indargabetuta eta desagertuta dago. Langileen Estatutuaren 54.2.a) artikuluan jasotako diziplinazko kaleratzea baizik ez dago.

10. artikulua. Urteko lanaldia.

Urte osoko lanaldia 1.688 ordukoa izanen da.

Bi txandatan aritzen diren langileen eguneko benetako lanaldiaren barrenean, 15 minutu sartu dira enpresaren kontura eta beste 5 minutu langilearen kontura.

Hiru txandatan aritzen diren langileentzat, berriz, eguneko lanaldia 8 ordukoa da, eta hortik 20 minutu atsedenaldirako izanen dira.

Urteko lanalditik goiti egiten diren egunen konpentsazioak egutegian sartuko dira, hitzarmena sinatu eta hurrengo hilabetean. Beste kontzeptu batzuk direla-eta sortzen diren egunak II. eranskinean azaltzen dira.

11. artikulua. Oporrak.

Oporrak Nafarroako Foru Komunitateko Industria Siderometalurgikoaren sektorerako hitzarmen kolektibo autonomikoan ezarritakoak izanen dira. Urtero, apirilaren 30erako, langile bakoitzaren oporraldiak finkatuta egon beharko dira.

Oporraldia eta edozein kausak eragindako aldi baterako ezintasuna aldi berean gertatzen badira, eta langileak ezin baditu opor guztiak edo haien zati bat hartu oporrei dagokien urte naturalean, langileak ezintasuna amaitu ondoren hartzen ahalko ditu oporrak.

Hori hala izanik ere, oporraldia noiz hartu enpresarekin adostu beharko da.

12. artikulua. Lan egutegia.

Lan egutegia enpresaren eta langileen ordezkarien artean adostuko da. Egutegia urtarrila bukatu baino lehen finkatuko da.

Nolanahi ere, urteko egun naturalei igandeak, larunbatak, jai ofizialak, oporraldiak eta zubiak kenduko zaizkie.

Orobat, 15 egun lehenagotik abisatuta, enpresak zilegi du lau txanda ezartzea, 2000ko otsailaren 16an horren gainean hartutako akordioaren arabera.

13. artikulua. Ordutegiaren malgutasuna.

Urtean 64 orduko malgutasuna izanen dute langileek, lanaldiari gehitzekoak, eta enpresak eskatuz gero ordu horietan lan egin beharko da. Ordu horiek bete/ordaintzeko baldintzak hauek izanen dira:

Ordu horiek hartzeko, 72 ordu lehenago abisatu beharko da, edo aurreko hirugarren eguneko goizeko txandan, nahiz eta, salbuespen kasuetan, epe hori murriztu daitekeen Enpresa Batzordearekin adostuta.

14. artikulua. Aparteko orduak.

Larunbatetan eta zubietan lan egin ahal izanen da, betiere II. eranskinean aparteko orduetarako ezartzen diren baldintzekin bat.

Ordu horiek hartzeko, 72 ordu lehenago abisatu beharko da, edo aurreko hirugarren eguneko goizeko txandan, nahiz eta, salbuespen kasuetan, epe hori murriztu daitekeen Enpresa Batzordearekin adostuta.

Gaueko txanda aparte uzten da.

Enpresak edozein arrazoi dela-eta eskaturik, ezarrita dagoen ohiko lanaldiaz gainera egiten den lan-denbora aparteko ordutzat hartuko da.

Debeku da ohiko lan-jardunbide gisa aparteko orduak egitea, alde batera utzita ezinbesteko arrazoiengatik, ustekabeko absentziengatik, mantentze-lanen ezinbesteko beharrengatik eta antzeko egoerengatik egiten direnak (egiturazko orduak).

Aparteko orduari dagokion diru-zenbatekoa kalkulatzeko formula hau erabiliko da: (oinarrizko soldata + antzinatasun saria + laneratze plusa) (urte osokoak) zati (urteko lanaldia) –ikusi II. eranskineko taula–.

Haien izaera dela eta, aparteko orduak borondatezkoak dira, salbu eta lehen aipatutako 64 ordu horiek.

Enpresako zuzendaritzak hilero egindako aparteko orduen kopurua jakinaraziko die langileen legezko ordezkariei, ohiko bideetatik, eta arrazoiak azalduko dizkie.

15. artikulua. Soldata.

2025eko abenduaren 31n sortutako soldatek igoera hauek izanen dituzte 2026an:

–I. multzoko lanbide kategoriak.

• 2026. urtea.
  • %2,54ko igoera (2025eko KPIa, %2,90, ken %0,36).
  • Aplikazio lineala.
  • %0,36 2030eko urtarrilaren 1era atzeratu da; aplikazio automatikoa izanen du.

–II. multzoko lanbide kategoriak.

• 2026. urtean:
  • Igoera 2025eko KPIa adinakoa izanen da (%2,90).
  • Portzentajearen araberako aplikazioa.

2026ko abenduaren 31n sortutako soldatek igoera hauek izanen dituzte 2027an:

–I. multzoko lanbide kategoriak.

• 2027. urtea.
  • 2026ko KPIa adinako igoera.
  • Aplikazio lineala.

–II. multzoko lanbide kategoriak.

• 2027. urtean:
  • 2026ko KPIa adinako igoera.
  • Portzentajearen araberako aplikazioa.

Hitzarmen hau indarrean dagoen bitartean, GEROA-BGAEra bideratutako ekarpenak langileek Gizarte Segurantzako Araubide Orokorrari kontingentzia arruntengatik kotizatzen dioten oinarriaren %4,6 izanen dira; horietatik, %2,3 langilearen kontura izanen da, eta beste %2,3a enpresaren kontura.

Ekarpenak enpresak egiten ditu, batera. Hortaz, langileari dagokion ehunekoa soldaten nominetatik kenduko dio.

Soldatak kobratzeko eguna hauxe izanen da beti: likidatzen den hilabetearen ondoko hilabeteko hirugarren laneguna.

Horrez gain, aparteko bi paga ezartzen dira, oinarrizko soldatari eta hitzarmeneko plusari dagozkien 30 eguneko zenbatekoarekin. Lehenbizikoa uztailaren 7a baino lehen ordainduko da eta bigarrena abenduaren 20a baino lehen. Aparteko paga horiek seihileko natural bakoitzean lan egindako denboraren proportzionalak izanen dira, eta kasu bakoitzean lanaldiari eta soldatari dagokienez egon daitezkeen murrizketak aplikatuko zaizkie.

–Produkzio prima.

• Alderdiek erabaki dute produkzio prima 7.293,50 eurokoa izanen dela urteko. Kalkulatzeko modua hauxe izanen da:
  • Lanaldi osoan lan egiten dutenen kasuan, produkzio prima gehienez ere 7.293,50 eurokoa izanen da urtean. Langile horiei 607,79 euroko zenbateko finkoa ordainduko zaie hilean (12 hilabete).
  • Baimenak edo bajak direla-eta lanera joaten ez direnen kasuan, hileko 607,79 euro horiek oinarri hartuta benetan lan egindako orduen zati proportzionalarekin kalkulatuko zaie prima. Orduak sortu edo kontsumitzen badira, ez dira kontuan hartuko prima hau kalkulatzeko.
  • Prima erdia dutenei 278,58 euro ordainduko zaizkie hilean, 12 hilekotan.
  • Nolanahi ere, egungo kalkulu sistema mantenduko da, aurrerago bere horretan erabili beharko balitz ere.

16. artikulua. Antzinatasuna.

Langileak enpresarekin duen denbora-lotura saritzeko soldata-osagarri pertsonala da.

Hirurtekoetan ordainduko da eta bakoitzari dagokion diru zenbatekoa soldaten tauletan agertzen da (ikusi III. eranskina).

17. artikulua. Gaueko lanaren plusa.

22:00etatik 6:00ak bitarte lan egiten duten langileek gaueko lanaren plusa kobratuko dute, benetako soldataren %25ekoa hain zuzen. Benetako soldata hau da: oinarrizko soldata, antzinatasuna eta produkzio prima gehituta.

Enpresan bi txandatan aritzeko diren lanpostuak edo atalak izan bitartean, horietan aritzeko lehentasuna 55 urteko langileek edo hortik gorakoek izanen dute.

18. artikulua. Laneratze plusa.

Hitzarmen honetan ere aplikatuko da laneratze plusa (txandak) izenekoa.

19. artikulua. Kontratazioak.

19.1. Behin-behineko kontratuak:

Behin-behineko kontratuak, egoera normaletan, 6 hilabetekoak izanen dira, gutxienez.

Egoera normaletan, enpresan aldi baterako kontratuen bajak egin behar direnean, enpresak baja eman baino gutxienez 15 egun lehenagotik jakinarazi beharko die ukitutako langileei, baina, ahal dela, hilabete lehenago jakinarazteko ahaleginak eginen dira.

–Behin-behineko langileak ezin dira plantillaren %20tik gora izan. Ehuneko hori bulegoetan eta lantegian aplikatuko da.

–Ohiz kanpoko egoeretan, enpresak, batzordearekin adostuz gero, ehuneko hori gainditzen ahalko du, baina sei hilabetez gehienez. Behin-behineko langileen ehunekoa kalkulatzeko, azken 12 hilabeteetako batez besteko haztatuaren portzentajea erabiliko da.

–Mugagabeko kontratua duten langileek erretiroa edo edonolako baja hartuz gero, egoera gehienez ere 2 hilabetez aztertuko da, eta lanpostu hori amortizatzen ez bada, mugagabeko beste kontratazio bat eginen da, edo beste epe bat adostuko da.

Behin-behineko kontratuen ondorioetarako, artikulu honetan xedatutakoari eta Nafarroako Foru Komunitateko Industria Siderometalurgikoaren sektorerako hitzarmen kolektibo autonomikoan, xedatutakoari eta araututakoari jarraituko zaio.

19.2. Aldizkako kontratu finkoak:

Produkzio-premiak handitu edo gutxitu direlako, merkatuaren eskaera puntualera egokitzeko plantilla handitu edo murriztu behar bada, aldizkako kontratu finkoen bidez egiten ahalko da kontratazioa. Kontratu horiek indarrean dagoen araudiari jarraituz arautuko dira, eta honako puntu hauek ere adostuko dira:

–Aldizkako kontratu finko berriek, edo modalitate horrekin kontratatuta dauden langileen aktibazioak, gutxienez 3 hilabeteko iraupena izanen dute.

–Antzinatasunaren arabera eginen da (enpresan kotizatutako egunak) kontratua aldi baterako eten zaien langileen jarduerarako deia edo aktibazioa.

–Enpresak kontratua aktibatzeko eskaintza egin ondoren, errekerimendua jaso duen langileak 5 laneguneko epean erantzunik ematen ez badu, langileak deiari uko egin diola ulertuko da, eta borondatezko bajatzat hartuko da.

–Kontratuen etena (aldi baterako etetea) ukitutako langileei jakinaraziko zaie, gutxienez etena gertatu baino astebete lehenago.

–Kontratuak aldi baterako eteten diren egunean (etena) hartzeko dauden egunak ordainduko dira, bai eta aparteko ordainsarien zati proportzionala ere.

–Aldizkako kontratu finkoa duen langile bat 24 hilabetean baino gehiago egonen balitz jardunean, kontratua mugagabe bihurtuko litzateke.

–Kontratuaren etena 18 hilabetetik gorakoa bada, enpresak kontratua deuseztatuko du, eta, horrekin batera, kontratutik eratorritako betebehar guztiak ukitutako langileekiko, eta langileei kalte-ordainak emanen dizkie, indarrean dagoen araudiari jarraituz.

–Enpresak, langileen legezko ordezkaritzari jakinarazi ondoren, aldizkako kontratu finkoak edozein unetan deuseztatzen ahalko ditu, indarrean dagoen araudiari jarraituz, eta ukitutako langileei gutxienez 15 egun lehenago jakinarazita.

20. artikulua. Erretiro partziala eta errelebo kontratua.

Savera enpresaren hitzarmen kolektiboak indarra izan bitartean, hau da, 2026ko urtarrilaren 1etik 2027ko abenduaren 31ra arte, honako hau erabaki da, betiere baldintzek gaur egun indarra duen araudian jasota bezala segitzen badute:

Lehena: 61 urte eta 9 hilabete betetzean, errelebo-kontratu bat egiteko baldintza guztiak eta 65 urterekin erretiroa hartzeko lege baldintzak betetzen dituzten Savera enpresako langile guztiek eskatzen ahalko diote enpresari errelebo-kontratua aplika diezaiela, legezko eragozpenik ez badago. Horrelakoetan, Savera enpresa errelebo-kontratua egitera behartua egonen da.

–Tramite formal hori legediak horretarako aukera eman bezain azkar egin beharko da, erreleboaren xede den langile bakoitzaren baldintzak kontuan harturik.

Bigarrena: Enpresako zuzendaritzak eta erreleboaren xede den langileak adostuko dute langileak lanaldi partzialean egin beharreko lan denbora nola banatuko den ohiko erretiro-adina bete arte.

Hirugarrena: Erretiro partziala hartzen duen langileak erretiro-sarirako legez ezarrita dagoen gehieneko ehunekoa jaso ahal izan dezan, enpresak mugagabeko errelebo-kontratua formalizatuko du, lanaldi osokoa.

Laugarrena: Dena dela, hitzarmen hau aplikatu behar den bitartean, erretiro partzialerako baldintzak aldatzen badira arau baten bidez, araudi berrian ezartzen dena aplikatuko da enpresan.

21. artikulua. Aldi baterako ezintasuna, lanetik kanpoko istripuaren edo eritasunaren ondoriozkoa.

–Aldi baterako ezintasuna.

Langileak, lan ezintasunak iraun bitartean, baja-agiria hartu aurreko hilabetean zuen erregulazio-oinarriaren %100era bitarteko soldata-osagarria jasoko du, baina lanean arituko balitz kobratuko lukeen kopurua gainditu gabe.

Osagarri hori jasotzeko eskubidea izateko, absentismoaren indizeak gehienez %2,55ekoa izan behar du, SAVERAn erabili ohi diren irizpideei jarraikiz. –Ikusi I. eranskina.

22. artikulua. Eszedentzia sindikala.

Langileek, enpresatik goragoko esparru batean eginbehar sindikalak betetzeko hautatuak izanez gero, eginkizun sindikaletarako eszedentzia eskatzen ahalko dute eta enpresak derrigorrez onartu beharko die kargu horretan dauden denborarako.

Eszedentzia bukatutakoan, ukitutako langileek eskubidea izanen dute berehala beren lanpostura itzultzeko, behar den denborarekin eskatzen badute. Eszedentzia hartu aurretik zuten kategoria eta lanpostura itzuliko dira.

23. artikulua. Azpikontratazioa.

Azpikontratazioren bat egin aurretik, enpresako zuzendaritzak asmo horren berri eman beharko die idatziz langileen ordezkariei, astebete lehenago gutxienez, horretarako arrazoiak emanez. Idazki horretan honako hauek adierazi beharko dira: erabakiaren azalpena, azpikontratatzen den enpresa edo tokia, azpikontratazioaren baldintzak eta entitate kontratatuak Gizarte Segurantzan duen egoera.

Langileen ordezkariak enpresak proposatzen duen azpikontratazioarekin ados ez badaude, desadostasuna adierazten ahalko dute, egoki iruditzen zaizkien arrazoiak alegatuz.

Azpikontratazioa enpresaz kanpoko langileekin egiten bada, langile horiek Savera enpresan lan horretan edo antzekoetan aritzen diren kategoria bereko langileen lanaldi eta baldintza ekonomiko berberak izanen dituzte.

Hiru egunetik beherako azpikontratazioetan, baldintza hauek bete beharko dira: Enpresa Batzordeari aldez aurretik abisatzea eta lantegiko lanaldia errespetatzea.

24. artikulua. Lanbide sailkapena.

Peoi espezializatuaren kategoria eta ordainsaria sei hilabetez aplikatuko dira gehienez, langilea enpresan aurrenekoz sartzen denean. Behin besterik ez zaio aplikatuko langile bakoitzari.

B espezialistaren kategoriak, gehienez, bi urteko antzinatasuna izanen du, benetan kotizatzen diren egunak kontatuta; A espezialistaren kategoriak, berriz, bi urtekoa, benetan kotizatutako egunak kontatuta. Hitzarmen hau sinatzen den egunean adierazitako baldintzak betetzen dituzten langileak goragoko kategoriara pasatuko dira hitzarmena sinatzen denetik beretik.

B administrari laguntzailearen kategoriak hiru urteko antzinatasuna izanen du gehienez ere, eta egiaz kotizatutako egunak zenbatuko dira horretarako. Hitzarmen hau sinatzen den egunean adierazitako baldintzak betetzen dituzten langileak goragoko kategoriara pasatuko dira hitzarmena sinatzen denetik beretik.

Kategoria aldatzeko proposamenak urtarrilean aztertuko dira, urtero.

Enpresak nahi dituen langileak izendatuko ditu agintea edo konfiantza behar duten lanpostuetara igotzeko.

Zuzeneko eskulangileak: langile batek gutxieneko kategoriako lanpostua betetzen badu, eta langileak duen makinari dagokiona goragokoa bada, bertan aritzen den bitartean aitortuko zaio soldata. Langile arduradunak eman beharko dio horren berri Langileria Departamentuari, eguneko lan gaztiguen bidez.

Zeharkako eskulangileak: langileren bat bere kategoriatik gorako lanetan aritzen bada, lanpostu berriaren soldata aitortuko zaio lanpostu horretan aritzen den bitartean, eta hango lanbide kategoria, berriz, lanpostuan urtebete eman ondoren. Dena dela, urtebete igaro baino lehen, lehenagoko lanpostura itzultzeko agintzen ahalko zaio, hartan zituen baldintza berberetan aritzeko (ikusi lanbide kategorien taula IV. eranskinean).

Unibertsitate Irakaskuntza, Gradu, Master edo Doktoregoko titulazioa duten langileek, baldin eta elkargo tekniko eta administratiboko lanpostu hutsak betetzeko kontratatzen badira, lanpostu hutsaren baldintza halako titulazioak izatea denean eta prestakuntza-kontratuen bidez kontratatzen direnean, Nafarroako Foru Komunitateko Industria Siderometalurgikoaren sektorerako 2022, 2023, 2024, 2025 eta 2026ko hitzarmen kolektibo autonomikoan ezarritakoaren arabera arautuko dira. Kontratu hori amaitu ondoren enpresan jarraitzen badute, langile finko izatera igaroko dira eta A motako administrari laguntzailearen kategoriarekin parekatuko dira soldatari dagokionez.

25. artikulua. Lanbide taldeen soldatak.

Lanbide kategorien araberako soldatak V. eranskineko taularen arabera araututa egonen dira.

26. artikulua. Hitzarmeneko soldata-baldintzak ez aplikatzeko klausula.

Enpresak ez dio inola ere heltzen ahalko hitzarmen hau ez aplikatzeko aukerari Langileen Estatutuaren 82.3 artikuluko prozeduraz baliatuz, eta saiatu beharko da muga-eguna baino lehen hitzarmena berriz ere negoziatzen, beste hitzarmen bat lortzeko edo hura berrikusteko Langileen Estatutuaren 86.1 artikuluan ezarritakoari jarraikiz.

Bi aldeek berariaz adosten dute ezen desadostasunak bideratzeko onartuko dituzten prozesuak izanen direla adiskidetze eta bitartekaritza bidezkoak; ez dute onartuko nahitaezko arbitrajea Langileen Estatutuaren 83. artikuluan aurreikusitako lanbidearteko akordioek ezartzen dituzten zuzeneko aplikazio orokorreko prozeduretan, hots, akordio horiei buruzko negoziazioetako desadostasunak eraginkortasunez ebazteko aurreikusten diren prozeduretan, zeinetan sindikatuek parte hartzen baitute Askatasun Sindikalari buruzko Lege Organikoaren 6.3 eta 7.2 artikuluekin bat.

27. artikulua. Inbertsioak.

Zuzendaritzak urtean egin asmo dituen inbertsioen aurrekontuen berri emanen die ordezkari sindikalei. Horrez gainera, lau hilabetean behin, egiten diren inbertsioen bilakaeraren berri emanen die.

28. artikulua. Familia laguntzak.

Langileren bat hil edo ezintasun egoeran geldituz gero eta, hori dela eta, haren seme-alabek ikasten segitzeko arazo ekonomikoak baldin badituzte, enpresak, batzordeak txostena eginda, hitz ematen du horretarako dirulaguntza emanen diola familiari. Dirulaguntzaren zenbatekoa eta iraupena kasuan-kasuan erabakiko dira.

29. artikulua. Jarduera sindikalak.

Enpresan %33tik gorako ordezkaritza duten sindikatuetan afiliaturik dauden langile guztiek bilera sindikalak eta prestakuntza ikastaroak egiteko eskubidea izanen dute lanorduetatik kanpora, urtean 6 ordu gehienez.

Bilera edo ikastaro horietarako zitazioa edo deialdia sindikatuek eginen dute 48 ordu lehenagotik, jarduera hasteko eta bukatzeko orduak eta tokia adierazita.

Jarduera horiek lantegian berean edo sindikatuen egoitzetan egiten ahalko dira, eta enpresak ordu horiei dagokien soldata erreala ordainduko du.

Arrazoi justifikatuak daudenean, Enpresa Batzordeko kideei beren lan sindikala egiteko zentzuz beharrezkoak diren ordu ordainduak emanen zaizkie, neurrizko kopuru bat gainditu gabe, baina enpresari bere xehetasun guztiekin justifikatu beharko zaizkio, onar ditzan.

Langileek behar adina batzar eginen dituzte, eta ez da horretarako ordu kopuru jakin bat finkatu urte osorako. Ordu horiek guztiak ordainduko dira. Biltzar horiek bi alderdiek onartua duten arautegiari jarraikiz eginen dira.

Enpresak ezin izanen du kaleratu edo zehatu Batzordeko kide gisa edo delegatu sindikal gisa enpresako langileen ordezkaritza duen langilea, bere ordezkaritza eginkizunetan izandako jokabidearengatik. Ustezko falta astun edo oso astun bategatik jartzen zaion zehapena edo kaleratzea beste arrazoi batzuengatik baldin bada, espedientea tramitatu aitzin, entzunaldia emanen zaie langileari eta bere sindikatuko ordezkari bati.

Berme horrek langilearen ordezkaritza bukatu eta bi urte igaro arte iraunen du.

30. artikulua. Euskara.

Ondotik aipatzen diren agiriak euskaraz ere egonen dira: Ele bitan erredaktatuko dira, euskaraz eta gaztelaniaz:

–Lan hitzarmen kolektiboa, iragarki-taulako oharrak.

–Nominak.

–Harrera egiteko eskuliburua.

–Kontratuak.

–Inprimakiak.

Ahozko harremanei dagokienez, enpresak euskararen aldeko jarrera eta motibazioa sustatzeko kanpainak egiten ahalko ditu, baita euskararen erabilera bultzatzekoak ere. Behar izanez gero, kanpaina horiek beste enpresa edo erakunde batzuekin egiten ahalko dira.

31. artikulua. Bizi- eta istripu-asegurua.

Kontratatzen den bizi eta istripu aseguru kolektiboak langile guztiak estaliko ditu. Langile guztiei aseguruaren kopia bana emanen zaie.

32. artikulua. Prestakuntza.

Enpresak langileen prestakuntza beharren diagnostiko bat eginen du. Diagnostiko horren berri batzordeari emanen zaio, ezagut eta onets dezan.

Beste lan mahai batean, langileen prestakuntza behar guztiak finkatu ondoren, behar horiek ahalik eta lasterren beteko direla bermatzeko sistema gauzatuko da (ikastaroak kanpoan, lantegian, kostua langileen eta enpresaren artean nola banatu...).

33. artikulua. Azken kitatzea.

Langileak eskatuz gero, langileen ordezkariek azken kitatzea aztertuko dute, sinatu aurretik.

34. artikulua. Kilometrajea.

Kontratazio berrietan, Savera abiapuntutzat duten joan-etorrien kilometrajea ordainduko da bakarrik, hots, langileen eginkizunekin lotuta dauden kudeaketen ondoriozko joan-etorrietako gastuak, kontuan hartu gabe etxetik lanpostura bitarteko joan-etorriak, hori soldataren barrenean dagoela ulertzen baita.

Lehengo kontratazioetan, non lantokira joateko kilometrajearen ordain bat finkatuta baitzegoen, soldatetarako itundua dagoen proportzio berean igoko da kopuru hori.

Autoa enpresaren zerbitzuan erabiltzen denean, 2026an, 0,457 euro emanen dira kilometro bakoitzeko.

35. artikulua. Deiaren saria.

Sari hau bere lanalditik kanpo lan egiteko deia jasotzeagatik lanera etortzen diren langile guztiek kobratuko dute: 1. deiaren balioa = 36,25 euro; 2. deiaren balioa = 69,02 euro.

Deia gauaz egiten bada eta 4 ordu baino gehiago lan egiten baldin bada, ordu horiek hurrengo egunean hartzen ahal dira. Kasu horretan, gaueko aparteko orduaren eta eguneko aparteko orduaren arteko aldea kobratuko da.

36. artikulua. Baimen ordainduak.

Enpresa lan bizitza eta familia bateragarri egiteko neurriak sustatzearen alde dagoenez, enpresak gogorarazten du ezen baimen ordainduen helburua dela langileari laguntzea bizitza pertsonalean sortzen zaion benetako behar baten aurrean.

Nafarroako Metalgintzako hitzarmenaren 38. artikuluaren 13. puntua: Tratamendu onkologikoa duten ezkontidea eta odol bidezko lehen mailako ahaideak laguntzeko, 16 ordu urtean, gehienez ere. Enpresak laguntza gehigarriaren beharra izan dezaketen kasuak aztertuko ditu.

37. artikulua. Berme-klausula.

Hitzarmen honetan berariaz jaso eta xedatu diren gaiek Saverako langileen lan baldintzak arautzen dituzte, eta hitzarmen honetan berariaz araututakoari dagokionez Saverako langileei aplikatu beharreko lan baldintzak ezartzen dituzten bakarrak dira.

Hitzarmen honetan arautzen ez den guztian, soldatei eta lanaldiei dagozkienetan izan ezik, Nafarroako Metalaren Sektorerako indarra duen Hitzarmen Probintzialean ezarritakoari jarraituko zaio, bai eta enpresaren aurreko itunetan eta, oro har, aplikatu daitezkeen gainerako arauetan ezarritakoari ere.

38. artikulua. Bateragarritasuna eta berdintasuna.

Enpresak hitz ematen du behar diren neurriak sustatuko dituela lanaren eta familiaren kontziliazioa hobea izan dadin, baita genero berdintasuna sustatzeko ere, lanpostu bakoitzaren ezaugarri eta aukeren arabera.

I. ERANSKINA.–LAN ABSENTISMOAREN KALKULUA

Adierazle hori kalkulatzeko, honako baldintza hauek hartuko dira kontuan:

a) Kalkulurako, SAVERAko plantillako langile guztiak hartuko dira kontuan.

b) Absentismoa kalkulatzean, eritasun arruntek eragindako bajak bakarrik hartuko dira kontuan, jarraian 30 egunetik goitikoak ez direnak.

c) Hiru hilabetetik behin kalkulatuko da, eta aipatutako kalkulua egin eta hurrengo hilabetean ordainduko da aldi horri dagokiona.

d) Nolanahi ere, urteko kalkulua ere eginen da, indize bera errespetatuz (%2,55), halako moldez non, urteko indize horrek %2,55 gainditzen ez baldin badu osagarria %100 arte ordainduko baita, kontuan hartu gabe ea aurreko hiruhileko naturaletako edozeinetan indize hori gainditu den edo ez.

e) Kalkulurako formula:

–Eritasun arruntagatiko bajak direla-eta urtean guztira galdutako egunak × 8 ordu = zatikizuna.

–Urteko egun guztiak (365) x 8 ordu x langile guztien kopurua = zatitzailea.

II. ERANSKINA.–SORTUTAKO EGUNAK HARTZEA

III. ERANSKINA.–ANTZINATASUNEN TAULA

IV. ERANSKINA.–LANBIDE KATEGORIEN TAULA

V. ERANSKINA.–SOLDATEN TAULA, LANBIDE KATEGORIEN ARABERA

2026. urteko soldata-taula

Iragarkiaren kodea: F2612956