Iragarkia

200. ALDIZKARIA - 2026ko urriaren 8a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

4976E/2026 EBAZPENA, abuztuaren 28koa, zeinaren bidez onartzen baitira Nafarroako Foru Komunitatean enpleguaren eta ekintzailetzaren arloko proiektu berritzaileak eta esperimentalak garatzeko dirulaguntzen deialdia eta oinarri arautzaileak, Nafar Lansare-Nafarroako Enplegu Zerbitzuaren (NL-NEZ) Enplegurako Orientazio, Ekintzailetza, Laguntza eta Berrikuntza Zentroaren (COE) jardueren esparruan. DDBN kodea: 927085.

Nafar Lansare-Nafarroako Enplegu Zerbitzua erakunde autonomoaren estatutuak onesten dituen otsailaren 7ko 13/2024 Foru Dekretuak, 2. artikuluan, Nafar Lansare-Nafarroako Enplegu Zerbitzuaren eskumen-eremua ezartzen du. Hain zuzen, adierazten du Nafar Lansare-Nafarroako Enplegu Zerbitzuari dagokiola Nafarroako Foru Komunitateko Administrazioari arlo hauetan esleitutako eskumenak erabiltzea: gizarte eragileekin adostutako enplegu politikak planifikatzea, ebaluatzea, gauzatzea eta kontrolatzea, enplegurako prestakuntzaren gainean ezartzen diren zerbitzu eta programak modu koordinatuan kudeatuz; lanbide orientazioa; enpresekin bitartekari eta aholkulari lanak egitea; lana aurkitzea; enplegua sustatzea; nork bere lana sortzeko eta ekintzailetzarako aholku ematea; lan sustapena; aukera berdintasuna eta laneratzea; eta enpleguaren egoeraren eta enplegu politiken azterketa Nafarroan.

Enpleguari buruzko otsailaren 28ko 3/2023 Legeak ematen die COEi Enplegu Sistema Nazionalaren euskarri espezializatuaren izaera, orientazio, ekintzailetza eta berrikuntzaren arloko dinamizazioa eta planifikazioa indartzeko.

Enplegu Sistema Nazionalean enplegua aktibatzeko programa komunak arautzen dituen irailaren 28ko 818/2021 Errege Dekretuak, 88. artikuluan, arautzen du Enplegurako Orientazio, Ekintzailetza eta Berrikuntza Zentroak (COE) abian jartzea, eta zentro horien eginkizunak deskribatzen ditu.

Estatuko Enplegu Zerbitzu Publikoaren Zuzendaritza Nagusiaren 2022ko maiatzaren 12ko Ebazpenaren bidez, Nafarroako COE kalifikatzen da (Estatuko Aldizkari Ofiziala, 181. zk., 2022ko uztailaren 29koa).

2022tik 2026ra bitarteko COE NL-NEZren lan-planen kudeaketan lortutako esperientzian oinarriturik, deialdi hau egiten da, zeinaren xedea baita Nafarroako Foru Komunitatearen eremuan enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak arautzea.

Horrenbestez, Nafar Lansare-Nafarroako Enplegu Zerbitzuaren estatutuak onesten dituen otsailaren 7ko 13/2024 Foru Dekretuaren 14. artikuluan emandako ahalmenak erabiliz,

EBAZTEN DUT:

1. Onestea Nafarroako Foru Komunitatean orientazioaren, ekintzailetzaren, aholkularitzaren eta enplegurako berrikuntzaren arloan 2026rako proiektu berritzaile eta esperimentalak garatzeko hautatutako erakundeentzako dirulaguntzen deialdia eta oinarri arautzaileak.

2. 160.000,00 euroko gastua baimentzea, 2026ko gastuen aurrekontuko 950003 96400 4819 241302 partidaren kargura, "Konferentzia sektoriala. COE proiektu berritzaileentzako dirulaguntzak", honela banatuta:

• 80.000 euro enpleguaren eta/edo orientazioaren arloko metodologia eta/edo tresna berrien diseinua, prototipoak egitea eta transferentzia barne hartzen dituzten proiektu berritzaileak garatzeko, baita azterketako eta bitartekaritzako proiektuak ere (I. ildoa).
• 80.000 euro ekintzailetzaren arloko metodologia eta/edo tresna berrien diseinua, prototipoak egitea eta transferentzia barne hartzen dituzten proiektu berritzaileak garatzeko (II. ildoa).

3. Ebazpen hau Nafarroako Aldizkari Ofizialean argitaratzea.

4. Ebazpen hau Lan Aktibaziorako eta Lurralde Koordinaziorako Zerbitzuari jakinaraztea.

5. Ebazpen honek ez du administrazio bidea agortzen, eta zilegi da haren aurka gora jotzeko errekurtsoa jartzea, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, argitaratu eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 122.1 artikuluari eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 57.1 artikuluari jarraikiz.

Iruñean, 2026ko abuztuaren 28an.–Nafar Lansare-Nafarroako Enplegu Zerbitzuko zuzendari kudeatzailea, María Esther Fernández Razquin.

ERANSKINA.–Enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzen deialdiaren oinarri arautzaileak

1.–Xedea.

Deialdi honen xedea da esperimentatu eta ebaluatu ondotik enplegu-zerbitzuetara eskalatzen ahal diren enplegu eta ekintzailetzaren arloko berrikuntza-proiektu pilotuak finantzatzeko eta sustatzeko dirulaguntzak ematea, norgehiagoka araubidean, enplegu eta ekintzailetzaren arloko esku-hartzea eraldatzen lagundu dezaten, Nafarroako Foru Komunitatearen eremuan.

Proiektu horiek Nafar Lansare-Nafarroako Enplegu Zerbitzuaren (NL-NEZ) Enplegurako Orientazio, Ekintzailetza, Laguntza eta Berrikuntza Zentroaren (COE) jardueren esparruan egin beharko dira, eta Nafarroako enplegu eta ekintzailetzako ekosistema hobetzera bideratuta egonen dira, honako arlo hauetan:

–Enplegua eta/edo lanbide orientazioa.

–Ekintzailetza.

–Lan-bitartekotza eta -azterketa.

Ez dira dirulaguntza honen xede izanen pertsona edo erakunde sustatzaileek merkataritza-ustiapenerako enpresa proiektu bat sortzea helburu nagusi duten proiektuak, nahiz eta elementu berritzaileak txertatu, salbu eta jarduera hori bitarteko instrumentala bada esku hartzeko metodologiak, tresnak, zerbitzuak edo ereduak esperimentatzeko, baldin eta balio publikoa sortzen badute eta enpleguko eta ekintzailetzako zerbitzu publikoetan transferitu, erreplikatu edo sar badaitezke.

2.–Dirulaguntzen entitate onuradunak.

Deialdi honen onuradun izan eta laguntzak eskatzen ahal dituzte entitate hauek:

a) Toki entitateek, horien tokiko korporazioek barne, eskualdeko kontseiluek, eskualdez haragoko kontseiluek edo lurralde erakundeek, eta baita horien mende edo baitan egonik, enplegurako politika aktiboetan, tokiko garapenean eta okupazioaren sustapenean eskumenak dituzten horietako organismo autonomoek, betiere, beren titulartasuna aipatu tokiko entitateenak edo horietako korporazioenak baldin badira zeharo.

b) Berezko nortasun juridikoa duten irabazi-asmorik gabeko entitate publiko edo pribatuek.

c) Autonomoek, enpresek eta enpresa elkarteek.

d) Nortasun juridikorik gabeko elkarteek.

3.–Entitate onuradunek bete beharrekoak.

Deialdi honetan aipatzen diren dirulaguntzen onuradun izateko, entitateek baldintza hauek bete beharko dituzte:

a) Jarduerak Nafarroako Foru Komunitatean gauzatzea.

b) Zerga arloko eta Gizarte Segurantzako betebeharrak egunean izatea, baita Nafarroako Foru Komunitateko Administrazioari edo haren erakunde autonomoei zorrak ordaintzeko betebeharrak ere.

c) Ez egotea dirulaguntzak eskuratzeko gaitasunaz gabeturik ebazpen irmoan ezarritako zehapenaren ondorioz, emakumeen eta gizonen arteko berdintasunaren arloko legeetan, Dirulaguntzei buruzko Foru Legean edo zergei buruzko lege orokorretan ezarritakoaren arabera.

d) Dirulaguntzen onuraduna izateko gainerako debeku-egoeretan ez egotea, zeinak jasotzen baitira Dirulaguntzei buruzko azaroaren 9ko 11/2005 Foru Legearen 13. artikuluko 2. eta 3. apartatuetan.

Eskaerak aurkezteko epea agortzen den egunean bete beharko dira baldintza guztiak, eta, orobat, diruz laguntzen den jarduerak irauten duen bitartean.

4.–Proiektu diruz lagungarriak.

4.1. Ekintzailetzaren, enpleguaren eta/edo azterketaren eta bitartekaritzaren arloan ideia berriak, egiteko modu berriak edo metodologia berritzaileak dakartzaten proiektuak diseinatu, garatu eta gauzatzeko dirulaguntzak emanen dira, betiere NL-NEZen eskumen-esparruarekin eta haren Enplegurako Orientazio, Ekintzailetza, Laguntza eta Berrikuntza Zentroaren (COE) eginkizunekin bat badatoz.

4.2. Deialdi honen babesean, proiektu berritzaileen ildo hauek gauzatzeko dirulaguntzak emanen dira, betiere erakundearen beste deialdi batzuek diruz lagundu ez badituzte:

a) I. ildoa: Enpleguaren eta/edo orientazioaren arloko metodologia eta/edo tresna berrien diseinua, prototipoak egitea eta transferentzia barne hartzen dituzten proiektu berritzaileak, baita azterketako eta bitartekaritzako proiektuak ere, hala nola:

–Enplegagarritasuna hobetzeko zeharkako konpetentzien diagnostikoa eta garapena (soft skills).

–Interes profesionalen identifikazioa.

–Adimen artifizialak sortutako larrialdiaren ondorioz langabezia arriskuan dauden kolektibo profesionalei zuzendutako prebentzio jarduketak.

–Kolektibo jakin batzuekin esku hartzeko prozedurak hobetzea, hala nola kualifikazio handiko pertsonekin, birkokatze prozesuan dauden pertsonekin...

–Enpleguan genero arrakala eta segmentazioa murrizten duten proiektuak.

–Pertsonak enplegu-zerbitzu publikoetan errazago sartzeko proiektuak.

–Enpresekiko komunikazioa sustatzen duten metodologiak.

–COEren enplegu eta/edo orientazio arloko beste edozein proiektu berritzaile.

b) II. ildoa: Ekintzailetzaren arloko metodologia eta/edo tresna berrien diseinua, prototipoak egitea eta transferentzia barne hartzen dituzten proiektu berritzaileak, hala nola:

–Ekintzailetzarako konpetentzien diagnostikoa eta garapena.

–Ekimen ekintzaileen bideragarritasunaren diagnostikoa.

–Ekimen ekintzaileen jarraipena eta tutoretza.

–Belaunaldien arteko erreleboa errazten duten tresnak edo metodologiak.

–Trantsizio berderako eta/edo digitalerako proiektuak.

–Ekintzailetzan genero arrakala eta segmentazioa murrizten duten proiektuak.

–COEren ekintzailetzaren arloko beste proiektu berritzaile batzuk.

Aurreko paragrafoan jasotako gaien zerrenda ez da zehatza, eta adibide gisa eskaintzen da.

Proiektuak dirulaguntza emateko ebazpenaren jakinarazpenaren dataren eta 2027ko urriaren 30aren artean gauzatu beharko dira.

5.–Proiektuak baloratzeko eta dirulaguntzak emateko irizpideak.

Proiektuak baloratzeko irizpideak honako hauek izanen dira, eta gehienez ere 100 puntu lortzen ahalko dira:

1. Aurre egin beharreko erronka eta proiektuaren helburuak. Aurre egin beharreko erronka eta proiektuaren helburu orokorra eta helburu espezifikoak identifikatzean, argitasuna, zehaztasuna eta egokitasuna baloratuko dira.

Gehienez 5 puntu.

2. Ekintza-plana. Helburuak lortzeko proiektuan proposatutako jardueren egokitasuna eta koherentzia baloratuko dira. Faseen sekuentzia koherentea eta proposamen metodologikoa barne hartuko ditu, zeina argia, egokia eta zehatza izan beharko baita.

Aurkeztutako proiektuak erabiltzaileen parte-hartzea barne hartzen badu, argi eta garbi zehaztu beharko dira horiek erakartzeko aurreikusitako mekanismoak eta epeak.

Gehienez 20 puntu.

3. Proiektuaren egokitasuna. Proiektuak COEren jarduketa-esparruekiko duen egokitasuna eta NL-NEZerako duen erabilgarritasuna baloratuko dira.

Gehienez 10 puntu.

4. Erabili behar diren aurrekontua eta baliabideak. Baloratuko da aurrekontua egokia eta koherentea den jarduerak egiteko eta proiektuan aurreikusiriko emaitzak lortzeko.

Gehienez 10 puntu.

5. Izaera berritzailea. Proposatutako proiektuaren sormena eta berrikuntza baloratuko dira, esate baterako, honako alderdi hauetan: ikuspegia, antolaketa, metodologia, produktua, teknologiak, onuradunek proiektuaren diseinuan eta gauzatzean parte hartzea, zer motatako kolektiboa izanen den proiektuaren hartzailea…

Gehienez 25 puntu.

6. Ebaluazio sistema. Proiektua ebaluatzeko proposamena baloratuko da. Aurreikusitako adierazleen identifikazioa eta kuantifikazioa jaso beharko ditu, baita horiek egiaztatzeko iturriak ere. Adierazleek, inplikatutako eragileen gogobetetzea neurtzeaz gain, proiektuak gizarteari, enpresa-sareari eta xede duen sektore espezifikoari eragiten dien itzulera eta efektu biderkatzailea ere neurtu beharko dituzte.

Gehienez 10 puntu.

7. Transferentzia. Proiektua transferitzeko proposamena baloratuko da, eta, bereziki, NL-NEZen eta/edo erakunde laguntzaileetan benetan erreplikatu ahal izatea.

Gehienez 10 puntu.

8. Genero ikuspegia integratzea proiektuan. Proiektuaren fase guztietan (sorrera, garapena, ebaluazioa eta transferentzia) genero-ikuspegia txertatu dela frogatzen duten elementu eta neurri zehatzak baloratuko dira.

Gehienez 10 puntu.

Proiektuak baloratu gabe geratuko dira eta baztertu eginen dira, baldin eta horien xedea ez badator bat Enplegurako Orientazio, Ekintzailetza, Laguntza eta Berrikuntza Zentrorako (COE) legez ezarritako eskumenen eremuarekin.

Berritasunaren atalean gutxienez 15 puntu lortzen ez dituzten proiektuak ez dira baloratuko gainerako apartatuetan, eta dirulaguntza ezetsiko da.

Transferentziaren atalean gutxienez 5 puntu lortzen ez dituzten proiektuak ez dira baloratuko gainerako apartatuetan, eta dirulaguntza ezetsiko da.

Guztizko balorazioan gutxienez 60 puntu lortzen ez dituzten proiektuak ez dira diruz lagunduko.

6.–Diruz laguntzen ahal diren gastuak.

Honako gastu hauek dira diruz lagungarriak:

a) Entitate eskatzailearen langileen kostuak. Langileen gastuen kontzeptuan honako zenbateko hauek ordainduko dira modulu gisa:

–Koordinatzaileak: 32 euro/ordu; gehienez, proiektuari esleitutako langileen orduen %10.

Gehieneko muga: koordinazio orduen kopurua/langileen guztizko orduen ≤ %10

–Arlo teknikoko langileak: 27 euro/ordu.

–Laguntzaileak: 22 euro/ordu; gehienez, proiektuari esleitutako langileen orduen %20.

Gehieneko muga: laguntza orduen kopurua/langileen guztizko orduen ≤ %20

Proiektuari atxikitako langileen lanorduak beren lanaldiaren %100 edo gutxiago izan beharko dira.

b) Kostu orokorrak: proiektuari egotzitako langileen kostu guztien %25 ordainduko da, gehienez ere.

Gehieneko muga: kostu orokorrak/langileen guztizko kostuen ≤ %25

Gastu horiek behar bezala justifikatu beharko dira, eta kontzeptu hauei dagozkie:

–Proiektuak gauzatzeko sortzen diren materialak eta hornidurak.

–Proiektuaren xede diren jarduerak gauzatzearekin lotura zuzena duten bidaiak eta dietak.

–Proiektuan jasotako jarduera puntualak egiteko aretoak alokatzea, onuradunei zuzenduak eta proiektua sustatzen duen entitatearen instalazioetan egin ezin direnak.

–Entitateaz kanpoko profesionalak proiektuan jasotzen den jarduera jakin bat egiteko kasu puntualetan kontratatzeari loturiko zerbitzu tekniko eta profesionalak.

–Proiektuen hartzaileen istripu-aseguruak.

Gastuek bat etorri beharko dute proiektua gauzatzeko datekin.

Dirulaguntzei buruzko azaroaren 9ko 11/2005 Foru Legearen 28.8 artikuluan xedatutakoaren arabera, zeharkako zergak ez dira gastu diruz lagungarritzat hartuko, baldin eta berreskuratu edo konpentsatu badaitezke, ezta errentaren gaineko zerga pertsonalak ere.

7.–Dirulaguntzaren zenbatekoa eta banaketa.

Dirulaguntzaren zenbatekoa 160.000 eurokoa da guztira.

Dirulaguntzaren ildo bakoitzak 80.000 euroko zuzkidura izanen du. I. ildorako ezarritako dirulaguntza guztiak ematen ez badira, esleitu gabe geratu den zenbatekoa II. ildora bideratzen ahalko da, eta alderantziz.

Gehienez erakundeek aurkeztutako ildo bakoitzeko proiektu bat laguntzen ahalko da diruz. Hala ere, aurrekontua badago eta beste erakunde batzuen onartutako proiekturik ez badago, ildo bereko bigarren proiektu baten onuradun izan daitezke.

Proiektu bakoitzeko gehienez ere 40.000 euro emanen dira.

Unitate kudeatzaileak dirulaguntza emanen du, 4. oinarrian ezarritako ildo bakoitzaren barruan, proiektuen lehentasun-ordenari jarraikiz, 5. oinarrian ezarritako irizpideen arabera, harik eta dirulaguntzaren zenbatekoa agortu arte, betiere proposamenek 5. oinarri horretan ezarritako gutxieneko puntuazioa lortu badute.

Proiektuei esleitutako guztizko puntuazioan berdinketa gertatuz gero, 5. irizpidean ("Izaera berritzailea") puntuazio handiena lortu duten proiektuen alde ebatziko da. Berdinketak jarraitzen badu, 7. irizpidean ("Transferentzia") puntuazio handiena lortu duen proiektuaren alde. Berdinketak bere horretan badirau, honako irizpide hauetan puntuazio handiena lortu duten proiektuen alde eginen da, hurrenkera honetan: 8, 3, 1, 2, 6 eta 4.

Soberakinik badago, baina ondorengo dirulaguntza-proiektuen zenbatekoa baino txikiagoa bada, gainerako eskatzaileei proiektua birformulatzea eskatzen ahalko zaie, soberakinaren zenbatekora egokitzeko, betiere balorazioan puntuazio handiena lortu duten proiektuen ordena errespetatuz esleipena egiteko.

Eskatzaileek birformulatu edo atzera egiten ahalko dute, bost egun naturaleko epean. Epe hori beste bost egunez luzatzen ahalko da, erakundeak hala eskatuta eta birformulazio-errekerimendua jakinarazten denetik aurrera.

Bi ildoetan soberakina gelditzen bada, zenbatekoa metatu eta birformulatzeko eskatzen ahalko da, balorazio handiena lortu duten proiektuen ordena errespetatuz. Puntuazioan berdinketa gertatuz gero, I. ildoa lehenetsiko da.

Nolanahi ere, proiektua birformulatzean dirulaguntzaren xedea, baldintzak eta helburuak errespetatu beharko dira, bai eta eskaeretarako ezarritako balorazio irizpideak ere.

Birformulatzea soilik eskatuko da emakida 2026ko zerga-ekitaldiaren esparruan ebatzi badaiteke.

8.–Eskaerak eta aurkezteko epea.

8.1. Eskaerak aurkezteko epea hilabetekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

8.2. Eskaerak elektronikoki tramitatuko dira Nafarroako Atarian, "Tramiteak" atalean dagoen deialdiaren fitxan (aurrerantzean laguntzen fitxa), "Tramitatu" aukeratuz.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.8 eta 66.6 artikuluetan xedatutakoari jarraikiz, ez dira aurkeztutzat hartuko laguntzen fitxan dagoen eredura egokitzen ez diren eskaerak, ez eta telematikoki eta aipatutako fitxaren bitartez aurkezten ez direnak ere. Horrenbestez, ez-aurkeztutzat jotzen direnez, eskaera horiek ez dira zuzentzen ahalko.

Dokumentazio hau aurkeztu beharko da eskaerarekin batera, laguntzen fitxan eskura dauden ereduen araberakoa, betiere:

a) Proiektuaren memoria.

b) Proiektuaren aurrekontua: Dokumentua Excel formatuan eta PDF formatuan (sinatuta) aurkeztu beharko da.

c) Erantzukizunpeko adierazpenen inprimakia.

8.3. Eskaera aurkezteak berekin dakar deialdi hau arautzen duten oinarriak onartzea. Halaber, eskaera aurkeztean baimena ematen zaio Nafar Lansare-Nafarroako Enplegu Zerbitzuari eskaera ebazteko behar den informazioa kontsultatzeko eta administrazio publikoek egiten edo gordetzen duten dokumentazioa eskuratzeko. Horri berariaz aurka egin nahi izanez gero, dagokion dokumentazioa aurkeztu beharko da.

8.4. Ez dira berriz aurkeztu beharko entitate eskatzaileak edozein administraziori lehendik aurkeztu dizkion agiriak, ez eta administrazioak berak eginak direnak ere. Ondorio horietarako, interesdunak azaldu beharko du administrazioaren zein organoren aurrean eta noiz aurkeztu zituen aipatutako agiriak, eta NL-NEZek bide elektronikotik eskatuko ditu, salbu eta interesdunak berariaz egin badu horren aurka. Hala bada, berak aurkeztu beharko ditu agiriak, Administrazio Publikoen Administrazio Prozedura Erkideari buruzko urriaren 1eko 39/2015 Legearen 28.3 artikuluan aurreikusitakoarekin bat. Salbuespen gisa, aipatu organoak ezin baditu agiri horiek eskuratu, berriz aurkez ditzan eskatzen ahalko dio interesdunari.

9.–Instrukzioa eta tramitazioa.

9.1. Prozeduraren instrukzioa eta tramitazioa Nafar Lansare-Nafarroako Enplegu Zerbitzuko Lana Aktibatzeko eta Lurralde Koordinaziorako Zerbitzuari dagozkio.

9.2. NL-NEZeko Lan Aktibaziorako eta Lurralde Koordinaziorako Zerbitzuak ebaluatuko ditu aurkeztu diren proiektuak, deialdi honen 5. oinarrian zehaztu diren irizpideen arabera.

Egindako ebaluazioa ikusirik, organo kudeatzaileak NL-NEZeko zuzendari kudeatzaileari helaraziko dio ebazpen-proposamen bat. Horretan, zerrendatuko da zer entitate eskatzaileri eta zenbateko dirulaguntza ematea proposatzen den eta zer puntuazio esleitu zaien.

9.3. Entitate eskatzaileen erreserba-zerrenda bat ezartzen da. Puntuazio ordenaren arabera deituko zaie baldin eta onuradunek uko egiten badute, baldintzak betetzen ez badituzte edo kobratzeko eskubidea galtzen badute, betiere 2026ko urte fiskalaren barnean gertatzen bada.

10.–Dirulaguntzak emateko prozedura.

Dirulaguntzak emateko prozedura norgehiagokako araubidearen bidez tramitatuko da, Dirulaguntzei buruzko Foru Legearen 17.1 artikuluan xedaturikoari jarraikiz. Prozedura hau honakoan datza: aurkezturiko eskaeren konparaketa egitea, proiektuak baloratzea haien arteko lehentasun hurrenkera ezartzeko, eta balorazio onena lortu dutenei dirulaguntzak esleitzea, deialdian ezarritako muga eta kreditu erabilgarria gainditu gabe.

11.–Dirulaguntza emateko ebazpena.

11.1. Nafar Lansare-Nafarroako Enplegu Zerbitzuko zuzendari kudeatzaileak, instrukzio organoak egindako proposamena jasorik, ebatziko du dirulaguntza eman edo ukatzen den.

Ebazpena gehienez ere bi hilabetean eman eta jakinaraziko da, eskaera aurkezten denetik hasita. Epe hori berariazko ebazpenik jakinarazi gabe agortzen bada, aurkeztutako eskaera ezetsi egin dela ulertuko da, deusetan galarazi gabe organo eskudunak ebazpena emateko duen betebeharra.

11.2. Ebazpena entitate eskatzaileari jakinaraziko zaio, dirulaguntza eman edo ukatzearen arrazoiak adierazita.

11.3. Eskaeraren gaineko presuntziozko edo berariazko ebazpenaren aurka gora jotzeko errekurtsoa aurkezten ahalko da Nafarroako Gobernuko Eskubide Sozialetako, Ekonomia Sozialeko eta Enpleguko kontseilariari zuzendua, jakinarazi eta biharamunetik hasita hilabeteko epean. Ebazpena berariazkoa ez bada, noiznahi aurkezten ahalko da errekurtsoa, ebazteko gehieneko epea agortu eta biharamunetik hasita.

12.–Dirulaguntzaren ordainketa eta justifikazioa.

12.1. Proiektuaren %20 gauzatu eta gero, erakundeak konturako ordainketa bat eskatzen ahalko du, gauzatze-memoria tekniko bat aurkeztuta. Konturako ordainketa bat eskatzen ahalko da gehienez, eta guztira ez du emandako zenbatekoaren %60 gainditzen ahalko. Konturako ordainketa hori eskatzeko azken eguna 2027ko ekainaren 1a da.

12.2. Dirulaguntzaren edo, aurrerakina ordaindu bazaio, gainerako zenbatekoaren azken ordainketa egiteko, entitate onuradunak justifikazio-agiri hauek aurkeztu beharko ditu 2027ko azaroaren 20a baino lehenago:

a.–Dirulaguntza emateko orduan ezarritako baldintzak betetzen dituela frogatzeko jarduketa-memoria bat, laguntzen fitxan eskuragarri dagoen ereduaren araberakoa.

b.–Justifikazio memoria ekonomikoa, laguntzen fitxan eskuragarri dauden ereduen araberakoa, egotzitako gastuak gauzatu izanari buruzko erantzukizunpeko adierazpena barne.

c.–Proiektuan aurreikusitakoaren arabera entregatzeko diren agiriak.

12.3. Edozein ordainketa egiteko, instrukzio-organoak egiaztatu beharko du eskaeraren xede den jarduketa egin dela, eta erakunde onuradunak egunean dituela zerga-betebeharrak eta Gizarte Segurantzarekikoak.

13.–Erakunde onuradunaren betebeharrak.

13.1. Dirulaguntza hauen onuradun diren entitateek Dirulaguntzei buruzko azaroaren 9ko 11/2005 Foru Legearen 9. artikuluan ezarritako betebehar orokorrak bete beharko dituzte.

13.2. Zehazki, beranduenez ere proiektua hasi baino bi egun lehenago, honako hauek bidali beharko dituzte NL-NEZera:

a) Proiektua hasiko delako jakinarazpena. Ezarritako epean ez jakinarazteak penalizazio bat ekarriko du berekin: emandako zenbatekoa murriztea, hasiera jakinarazi behar zen egunetik jakinarazi gabe iragan diren egunen zati proportzionalaren baliokidea.

b) Proiektuari atxikitako lantaldearen aurkezpena, parte-hartzaile bakoitzaren titulazio akademikoa eta lan esperientzia adierazita.

c) Proiektua hastean, proiektuan zehar egin beharreko jarduera osoaren plangintza eta egutegi zehatza aurkeztea.

13.3. Aldez aurreko betebehar horiez gain, entitate onuradunek honako betebehar hauek izanen dituzte:

a) Jarduera hilabeteko epean hastea, dirulaguntza emateko ebazpena jakinarazi eta hurrengo egunetik aurrera. Epe hori luzatzen ahalko da erakundeak eskatzen badu eta organo emaileak baimena ematen badu, betiere justifikatutako eta behar bezala frogatutako arrazoiren bat badago.

b) Dirulaguntzaren xedeko jarduera deialdian eta entitateak aurkeztutako memorian ezarritako moduan eta epean egitea.

c) Dirulaguntza emateko unean kontuan hartutako inguruabar eta baldintzetan edozein aldaketa gertatuz gero, NL-NEZi horren berri ematea, baita entitate onuradunak bere gain hartutako konpromiso eta betebeharretan gertatutako aldaketen berri ere.

d) Egindako jarduketak erregistratzea Nafar Lansare-Nafarroako Enplegu Zerbitzuak dituen aplikazioetan (SilcoiWeb, Orientasare edo adierazten den beste edozein aplikaziotan), gehienez 5 laneguneko epean, ezinbesteko kasu justifikatuetan izan ezik.

e) NL-NEZak edo beste kontrol-erakunde batzuek egin beharreko egiaztapen-, jarraipen- eta kontrol-lanak onartzea.

f) Aurreikusitako helburuak ezarritako adierazleen bidez betetzen direla NL-NEZi behar bezala justifikatzea.

g) Proiektuari egotzitako pertsonen dedikazioaren ordutegi kontroleko orri bat betetzea, langileak eta proiektuaren arduradunak sinatuta.

h) Gordetzea jasotako diruaren erabilerari buruzko frogagiriak, agiri elektronikoak barne, egiaztatze eta kontrolaren xede izan daitezkeen artean.

i) Diruz lagundutako jarduerak izaera publikoa duela agerraraztea. Diruz laguntzen diren programak gauzatzearekin eta zabaltzearekin zerikusia duten jarduketa guztietan, gutxienez, Nafarroako Gobernuaren ikurra sartu beharko da, eta Nafar Lansare-Nafarroako Enplegu Zerbitzuarekin egindako lankidetza aipatu. Horiek guztiak lehentasunezko tokian jarriko dira, eta ez dira inola ere erakunde onuradunaren ikurra baino txikiagoak izanen. Betiere proportzioak eta jatorrizko gama kromatikoa errespetatuko dira.

Entitateak deialdi honen berri emateko eta zabalkunderako baliatzen dituen dokumentazio, publizitate, irudi edo material guztietan, hizkuntzaren erabilera ez-sexista erabili beharko da, emakumeak diskriminatzen dituen edozein eredu edo estereotipo sexista baztertu, eta berdintasun balioetan, presentzia orekatuan eta rolen eta genero identitateen aniztasunean oinarritutako irudia sustatu.

j) Nafar Lansare-Nafarroako Enplegu Zerbitzuari jakinaraztea laguntzen jarraipena egiteko behar duen informazio guztia.

k) Erantzukizun zibileko eta/edo istripuetarako aseguru-poliza bat izatea, proiektuan jasotako jarduerak estaliko dituena.

14.–Gardentasun-betebeharrak.

Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 3.c) artikuluan aipatutako entitateak behartuak daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru sarrera guztien %20 edo gehiago badira, betiere 5.000tik gorako kopurua bada.

Dirulaguntzen onuradun diren erakundeek, aipatu diren inguruabarrak gertatzeagatik behartuta badaude gardentasun betebeharra betetzera, ondoren adierazten den informazioa eman beharko dute dirulaguntza ematen duen ebazpena jakinarazi eta hilabeteko epean:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Entitate sortu berrien kasuan, haien aurrekontuetan edo plan ekonomiko-finantzarioan adierazitakoa izanen da informazioa.

d) Entitatearen gobernu-, administrazio- eta zuzendaritza-eginkizunetan ematen den dedikazioaren araubidea.

e) Entitate onuradunaren azken urteko kontuen kopia.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta dirulaguntza kudeatzen duen administrazio-unitateari bidaliko zaio.

Erakundeak ez badu gardentasun betebeharrik, aurreikusitako egoerak gertatzen ez direlako, horren gaineko aitorpena aurkeztu beharko du.

Entitateak dirulaguntza bat baino gehiago jasotzen baditu ekitaldi berean, ez du informazioa berriz eman beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak adierazi beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, emandako dirulaguntza ez da ordainduko, ezta aurrerakinak ere, eta, kasua bada, kobratutako zenbatekoak itzuli egin beharko dira, Dirulaguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

Aurrekoa deusetan galarazi gabe, onuradun guztiak behartuak daude unitate kudeatzaileari behar den informazio guztia ematera, aurretiazko errekerimendua eginda eta hamar eguneko epean, hark bete ahal izan ditzan maiatzaren 17ko 5/2018 Foru Legearen II. tituluan ezarritako gardentasun betebeharrak (Gardentasunari, Informazio Publikoa Eskuratzeari eta Gobernu Onari buruzko Foru Legea).

Errekerimenduan emandako epea agortzen bada eskatutakoa bete gabe, hertsapen-isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondotik eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, kontuan hartuko dira ez-betetzearen astuntasuna eta proportzionaltasunaren printzipioa.

15.–Dirulaguntzen bateragarritasuna.

Deialdi honen xedeko dirulaguntzak ez dira bateragarriak helburu berarekin jarduera berak garatzeko ematen diren beste dirulaguntza batzuekin, administrazio honek edo eskualdeko, tokiko, nazioko edo Europako beste administrazio publiko batzuek edo erakunde publiko zein pribatuek eman.

16.–"De minimis" laguntza.

Deialdi honetako dirulaguntzak "de minimis" laguntzak dira, Europako Batzordeak 2023ko abenduaren 13an emandako 2023/2831 Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua xedatzea (2023ko abenduaren 15eko EBAO).

Erregelamendu horrekin bat, enpresa bakar bati hiru urteko edozein alditan emandako "de minimis" laguntza guztien batura ezin da 300.000 eurotik gorakoa izan. Enpresa bakarraren definizioa aipatu erregelamenduaren 2.2 artikuluan ezarrita dago.

Horretarako, entitate interesdunek kasuan kasuko urteko ekitaldian eta aurreko bi urteetako ekitaldietan hartutako bestelako "de minimis" laguntzak aitortu beharko dituzte eskaeran.

17.–Azpikontratazioa.

Entitate onuradunek ez dute hirugarrenekin azpikontratatzen ahalko, 6.b oinarrian zerrendatutako kostu orokorren kategoriatik eratorritakoak izan ezik, eta oinarri horretan ezarritako mugekin.

18.–Onetsitako proiektuen aldaketak.

18.1. Proiektuak edo dirulaguntzak ematerakoan kontuan hartutako baldintzak aldatu aurretik, horren berri eman beharko zaio Nafar Lansare-Nafarroako Enplegu Zerbitzuari, haietarako baimena eman dezan.

18.2. Aldaketa egiteko eskaeretan behar bezain ongi azaldu beharko da aldaketarako arrazoia, edo zer arazo sortu den proiektua hasieran pentsatu bezala ez egiteko. Horrelako eskaerak proposatu nahi den aldaketa hasi baino gutxienez 5 egun natural lehenago aurkeztu beharko dira.

18.3. Aldaketa horiek funtsezkotzat jotzen badira, NL-NEZek ebazpen bat emanen du onartutako dirulaguntzaren zenbatekoa gutxitu edo bertan behera uzten ahalko duena, kasua bada, egindako aldaketen garrantziaren proportzioan betiere.

19.–Jarraipena eta ebaluazioa.

19.1. Nafar Lansare-Nafarroako Enplegu Zerbitzuak beharrezko zeregin guztiak eginen ditu programak ebaluatu eta haiei jarraipena egiteko. Entitate onuradunek beharrezkoak diren datu, agiri eta informazio guztiak emanen dituzte egindako jarduketa ebaluatzeko, justifikatzeko, kontrolatzeko eta haren jarraipena egiteko.

19.2. NL-NEZek laguntzaren xedeko jarduketak ikuskatzen ahalko ditu, dirulaguntzak ematean aintzat hartutako eta ezarritako baldintza eta zehaztapenekin bat ote datozen egiaztatzeko. Horretarako, beharrezkoak diren bisitak eginen ditu, baita dirulaguntza jaso duten jarduerak egiten diren tokietara ere, beharrezkoa bada, horien betetze maila ebaluatze aldera.

19.3. Jarraipen Batzorde bat osatuko da, organo kudeatzaileko eta entitate onuraduneko profesionalek osatua, zehazten den aldizkakotasunez elkartuko dena.

Une oro, bi aldeak ados jarri ondoren, batzorde horren konposizioa areagotzen ahalko da, eta lanbide-profil jakinak izatea eskatzen ahalko da, jorratzeko gaien arabera.

Hauek izanen dira batzorde horri esleitutako zeregin nagusiak:

–Helburuak eta jarduerak berrikustea.

–Egokiak diren aurreikuspenak egitea.

–Proiektuan egindako lana NL-NEZekin koordinatzea.

–Programa gauzatzean sortzen ahal diren zailtasunak ebaztea.

Saio horietan, entitate onuradunak garatutako ekintzen jarraipena egiteko txostenak eta eskatzen ahal zaion beste edozein dokumentazio helaraziko du. Horretarako, hori egiteko maiztasuna eta modua entitatearekin adostuko da.

20.–Dirulaguntzen publizitatea.

Dirulaguntzei buruzko azaroaren 9ko 11/2005 Foru Legearen 15. artikuluan xedatutakoarekin bat, Lan Aktibaziorako eta Lurralde Koordinaziorako Zerbitzuak jendaurrean jarriko ditu emandako dirulaguntzak Nafarroako Atarian (www.nafarroa.eus), eta bertan adieraziko dira deialdia, aurrekontuko zein programari eta kredituri egotzi zaizkien, onuraduna, emandako zenbatekoa eta dirulaguntzaren xedea. Estatuko Administrazioko Kontu-hartzailetza Nagusiak ere argitaratuko ditu datu horiek bere webgunean, Dirulaguntzei buruzko azaroaren 17ko 38/2003 Lege Orokorraren 20.8 artikuluan xedatutakoarekin bat.

21.–Datuen babesa.

Deialdi honek ezartzen duena betetzeko beharrezkoak diren datu pertsonalen tratamendua honako arau hauen arabera eginen da: 2016/679 (EB) Erregelamendua, apirilaren 27koa, Europako Parlamentuarena eta Kontseiluarena, datu pertsonalen tratamenduari dagokionez pertsona fisikoak babesteari eta datu horien zirkulazio askeari buruzkoa, eta 95/46/EE Zuzentaraua indargabetzen duena; 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa; eta gainerako garapen arauak, hari aurka egiten ez dioten heinean.

Erakunde onuradunen ardura izanen da programetan parte hartzen duten pertsonei aipatu (EB) Erregelamenduaren 13. artikuluan adierazitako informazioa ematea.

Halaber, organo kudeatzaileak programetako parte-hartzaileen lan-bizitzak kontsultatu ditzan, entitate onuradunek dagozkien baimenak eskatu behar dizkiete horiei.

22.–Betebeharrak ez betetzea eta dirulaguntzak itzultzea.

22.1. Hartutako zenbatekoa itzuli egin beharko da, osorik edo partez, baldin eta programa gauzatzen ez bada, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo oinarri hauetan berariaz aipatzen diren betebeharrak betetzen ez badira. Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sorturiko berandutze-interesak ordaintzeko eskatzea.

22.2. Ezarritako epean justifikatzen ez bada, onartutako dirulaguntza kobratzeko eskubidea galduko da eta aurreratutako zenbatekoak itzuli beharko dira, berandutze-interesak barne.

22.3. Dirulaguntza erabiltzen baldin bada eman zen helburuetarako ez beste batzuetarako, eta aldaketa horren berri NL-NEZi ematen ez bazaio, dirulaguntza osoa itzuli beharko da, berandutze-interesak barne, ezar daitekeen zehapena galarazi gabe.

Entitate onuradunak dirulaguntzak emateko aintzat hartutako baldintzen edo proiektuen aldaketaren berri eman eta NL-NEZk onartu badu, dirua itzultzea beharrezkoa bada, ez da berandutze-interesik eskatuko.

22.4. Entitate onuraduna ezarritako baldintza guztiak arras betetzetik aski hurbil gelditu bada eta egiaztatzen badu konpromisoak betetzera bideratu duela bere jarduna, baldintzak ez betetzearen bolumenaren eta mailaren araberakoa izanen da partez emandako dirulaguntzaren kenkaria, proportzionaltasun irizpideari jarraikiz. Deialdi honen ondorioetarako, "esanguratsutzat" joko da onetsitako proiektuaren %75 beteta edukitzea.

Aurkeztutako proiektua ez bada betetzen, emandako zenbateko hauek itzuli beharko dira:

• %5, ez betetzea %25era artekoa bada.
• %10, ez betetzea %26ren eta %50en artekoa bada.
• %15, ez betetzea %51ren eta %75en artekoa bada.
• %100 edo zenbateko guztia itzultzea, ez betetzea %75etik gorakoa bada.

22.5. Entitate onuradunak organo kudeatzaileari eskatzen ahalko dio dirulaguntzaren zati bat bere borondatez itzultzeko. Entitateak bere borondatez itzultzen badu dirua eta, dirulaguntzei buruzko azaroaren 9ko 11/2005 Foru Legearen 35. artikuluan xedatutakoa aplikatuz, bidezkoa bada beranduntze-interesak aplikatzea, horiek kalkulatuko dira dirua itzultzen duen arte.

22.6. Garatzeko erabiltzaileen parte-hartzea behar duten proiektuen kasuan, gutxieneko parte-hartzaileak ez lortzeagatik proiektua gauzatu ezin bada, erakundearen erantzukizuna izanen da. Horren ondorioz, dirulaguntza kobratzeko eskubidea galduko da.

23.–Zehapen araubidea.

Arau-hauste eta zehapenen araubideari dagokionez, Dirulaguntzei buruzko azaroaren 9ko 11/2005 Foru Legearen IV. tituluan xedaturikoa aplikatuko da.

Iragarkiaren kodea: F2612048