Iragarkia

197. ALDIZKARIA - 2026ko urriaren 5a

1. NAFARROAKO FORU KOMUNITATEA

1.7. BESTELAKOAK

361E/2026 EBAZPENA, irailaren 15ekoa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez partez onartzen baita Elortzibarko udal mugartean irinak eta olo-malutak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Harinera del Mar Siglo XXI SL da.

Instalazio horrek ingurumen baimen integratua du, Ingurumenaren eta Uraren zuzendari nagusiaren azaroaren 23ko 2369/2007 Ebazpenaren bidez emana, Ingurumenaren eta Uraren zuzendari nagusiaren otsailaren 20ko 68E/2014 Ebazpenaren bidez eguneratua, eta, geroago, Ekonomia Zirkularraren eta Berrikuntzaren Zerbitzuko zuzendariaren maiatzaren 15eko 195E/2025 Ebazpenaren bidez berrikusia.

2026ko maiatzaren 11n, titularrak bere ingurumen baimen integratuan ezarritako baldintzak aldatzea eskatu zuen, zehazki, ingurumen baimen integratuaren III. eranskinean, sortutako hondakinen zerrendan, beste hondakin mota bat sartzeko, 150106 EHZ kodea duena, mantentze-lanetatik datozen iragazki-mahukei dagokiena.

Ekonomia Zirkularraren eta Uraren Zerbitzuak berrikusi du aurkeztutako eskaera, eta balorazio hau egin:

Era berean, 2026ko maiatzaren 11n, titularrak bere ingurumen baimen integratuan jasotako baldintzak aldatzea eskatu zuen; zehazki, guztizko partikula solidoen isurketen gehieneko isurketa-balioa handitzea honako foku hauetan:

–4. fokua: A fabrikako garraio pneumatikoa,

–5. fokua: B fabrikako garraio pneumatikoa,

–6. fokua: A eta B xurgaketa komunak,

–13. fokua: Ehoketa,

–16. fokua: C fabrikako garraioa,

–17. fokua: C fabrikako arazgailuak, gaur egun ingurumen baimen integratuan ezarritako baliotik (2 mg/Nm³) 5 mg/Nm³ balioraino.

Eskatutako gehieneko isurketa-balioa Batzordearen 2019ko azaroaren 12ko 2019/2031 (EB) Betearazpen Erabakiaren 28. TEOan lortu den teknika erabilgarri onenei lotutako isurtze-mailaren barruan dago (<2 eta 5 mg/Nm³ artean). Erabaki horren bidez, elikagaien, edarien eta esnearen industrietako teknika erabilgarri onenei (TEO) buruzko ondorioak ezartzen dira, bat etorriz Europako Parlamentuaren eta Kontseiluaren 2010/75/EB Zuzentarauarekin. Gainera, titularrak argudiatu du neurketen kostua handitu egin dela gehieneko isurketa-balioa aldatu delako, eta, bestalde, adierazi du ezen, ingurumen baimena duten instalazio batzuetan, antzeko prozesu bati lotutako fokuetan ezarritako gehieneko isurketa-balioa 5 mg/Nm³ dela.

Europako Parlamentuaren eta Kontseiluaren 2010eko azaroaren 24ko 2010/75/EB Zuzentarauak, industriako isurketei buruzkoak (kutsaduraren prebentzioa eta kontrol integratuak), 3. artikuluko 13. apartatuan, "teknika erabilgarri onenekin lotutako isurtze-mailak" definitzen ditu, aurrerantzean TEO-LIMak, eta honela definitzen ditu: ohiko funtzionamendu baldintzetan, teknika erabilgarri onenetako bat erabiliz [...], TEOei buruzko ondorioetan ezartzen den bezala [...], lortzen den isurtze-mailen tartea. 2019/2031 (EB) Betearazpen Erabakiaren arabera, 28. TEOa aplikatuta (mahuka-iragazki bat erabiltzea aleak ehotzetik datozen partikulen isurketa atmosferiko kanalizatuak murrizteko), lortzen den TEO-LIMa hauxe da: <2-5 mg/Nm³.

Bestalde, aipatutako zuzentarauaren 21.2 artikuluan xedatutakoaren arabera, agintaritza eskudunak baimenaren baldintzak berrikusteko, titularrak baimenaren baldintzak berrikusteko behar den informazio guztia aurkeztu behar du, isurketen monitorizazioaren emaitzak zehazki adierazita [...]. Baimenaren baldintzak berrikustean, agintaritza eskudunak kontroletatik edo ikuskapenetatik lortutako edozein informazio erabiliko du. Titularrak aurkeztutako emaitzak aztertuta, egiaztatu da alearen ehotzetik datozen partikulak atmosferara isurtzen dituzten fokuetan mahuka-iragazkiak erabiliz aipatutako tarteko mailarik zorrotzena lortzen dela.

Aurrekoarekin bat etorriz, agintaritza eskudunak instalazio baten baimenaren baldintzak berrikusten ditu hango isurketen monitorizazioaren emaitzetan oinarrituta, eta baldintza desberdinak izan daitezke, instalazio bakoitzera egokituak.

Azkenik, analisien laborategiaren kuantifikazio mugei dagokienez, zeinak jasotzen baitira foku horiek (4., 5., 6., 13., 16. eta 17. fokuak) kontrolatu diren atmosferara egindako isurketen saiakuntzen azken txostenean (CI-038279-001– 2022 Ed 1 kodea), ikusten da kuantifikazio mugak ingurumen baimen integratuan ezarritako gehieneko isurketa balioa (2 mg/Nm³) baino txikiagoak direla.

Ebazpen proposamena hamabost egunez egon da instalazioaren titularrari entzunaldia emateko tramitean, eta hark ez du proposamenaren aurkako alegaziorik aurkeztu.

Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,

EBAZTEN DUT:

Lehendabizikoa.–Partez onartzea Elortzibarko udal mugartean irinak eta olo-malutak fabrikatzen dituen instalazio baten ingurumen baimen integratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean adierazitako baldintzak bete beharko dituzte. Instalazioaren titularra Harinera del Mar Siglo XXI SL da.

Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuari buruzko Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.

Hirugarrena.–Ebazpen hau argitaratzea Nafarroako Aldizkari Ofizialean.

Laugarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

Bosgarrena.–Ebazpen hau Harinera del Mar Siglo XXI SLri eta Elortzibarko Udalari igortzea, behar diren ondorioak izan ditzan.

Iruñean, 2026ko irailaren 15ean.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: ebazpen honetan aipatzen diren eranskinak interesdunen eskura egonen dira, Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2612396