Iragarkia

190. ALDIZKARIA - 2026ko irailaren 24a

1. NAFARROAKO FORU KOMUNITATEA

1.7. BESTELAKOAK

577/2026 EBAZPENA, abuztuaren 25ekoa, Hezkuntzako eta Lanbide Heziketako zuzendari nagusiak emana, zeinaren bidez jarraibideak onesten baitira Nafarroako Foru Komunitateko lurraldean dauden eta Nafarroako Gobernuko Hezkuntza Departamentuaren titulartasuna duten Lehen Hezkuntzako ikastetxeetako, Haur eta Lehen Hezkuntzako ikastetxeetako, Hezkuntza Bereziko ikastetxeetako eta Helduen Oinarrizko Hezkuntzako ikastetxeetako eskola kontseiluak hautatzeko, eratzeko, haien zati bat berritzeko eta haietan hutsik dauden tokiak betetzeko.

Antolamendu, Prestakuntza eta Kalitate Zerbitzuko zuzendariak aldeko txostena eman du Nafarroako Gobernuko Hezkuntza Departamentuaren titulartasuna duten Lehen Hezkuntzako ikastetxeetako, Haur eta Lehen Hezkuntzako ikastetxeetako, Hezkuntza Bereziko ikastetxeetako eta Helduen Oinarrizko Hezkuntzako ikastetxeetako eskola kontseiluak hautatzeko, eratzeko, haien zati bat berritzeko eta haietan hutsik dauden tokiak betetzeko, hezkuntza-komunitateko sektore guztien parte-hartzea bermatzeko asmoz.

Ebazpen honen xedea da ikastetxe horietako eskola kontseiluak hautatzeko, eratzeko, haien zati bat berritzeko eta haietan hutsik dauden tokiak betetzeko jarraibideak onestea, bat etorriz Hezkuntzari buruzko maiatzaren 3ko 2/2006 Lege Organikoan eta otsailaren 25eko 14/2026 Foru Dekretuan erregelamendu bidez ezarritakoarekin (foru dekretu horren bidez, Nafarroako Foru Komunitatean ikasketa hauek ematen dituzten ikastetxe publikoen Antolaketa eta Funtzionamendu Erregelamendua arautzen da: Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa, Arte Irakaskuntzak, Hizkuntzak, Kirol Irakaskuntzak, Helduen Hezkuntza eta Hezkuntza Berezia).

Aipatutako otsailaren 25eko 14/2026 Foru Dekretuaren xedapen iragankor bakarrean ezarritakoari jarraikiz, eta haren araudian oinarriturik, ebazpen honen aplikazio eremuan sartutako ikastetxeetako eskola kontseiluen erregulazioak, foru dekretu horretan araututakoaren aurka ez doan guztian, Haur Hezkuntzako Eskola Publikoetako, Lehen Hezkuntzako Ikastetxe Publikoetako eta Haur eta Lehen Hezkuntzako Ikastetxe Publikoetako Erregelamendu Organikoa onesten duen otsailaren 10eko 24/1997 Foru Dekretuan hari buruz ezarritakoa betetzen segitu beharko du.

Hezkuntza Departamentuaren egitura organikoa ezartzen duen azaroaren 15eko 245/2023 Foru Dekretuak emandako ahalmenak erabiliz,

EBAZTEN DUT:

Lehenengoa.–Onestea Nafarroako Foru Komunitateko lurraldean dauden eta Nafarroako Gobernuko Hezkuntza Departamentuaren titulartasuna duten Lehen Hezkuntzako ikastetxeetako, Haur eta Lehen Hezkuntzako ikastetxeetako, Hezkuntza Bereziko ikastetxeetako eta Helduen Oinarrizko Hezkuntzako ikastetxeetako eskola kontseiluak hautatzeko, eratzeko, haien zati bat berritzeko eta haietan hutsik dauden tokiak betetzeko jarraibideak, bai eta haiei dagozkien eranskinak ere, honekin bat etorriz:

I.–Aplikazio eremua.

1. Ebazpen hau Nafarroako Gobernuko Hezkuntza Departamentuaren titulartasuna duten Lehen Hezkuntzako ikastetxeetan, Haur eta Lehen Hezkuntzako ikastetxeetan, Hezkuntza Bereziko ikastetxeetan eta Helduen Oinarrizko Hezkuntzako ikastetxeetan aplikatuko da, bai, halaber, Derrigorrezko Bigarren Hezkuntzako lehen zikloa behin-behinekoz eta aldi baterako ematen duten Lehen Hezkuntzako ikastetxeetan eta Haur eta Lehen Hezkuntzako ikastetxeetan, eta herrian Derrigorrezko Bigarren Hezkuntzako institutuekin batera funtzionatzen duten Lehen Hezkuntzako ikastetxeetan eta Haur eta Lehen Hezkuntzako ikastetxeetan, baldin eta:

–Beren eskola kontseiluak lehenbiziko aldiz hautatu behar badituzte.

–Eskola kontseiluen zati bat berritu behar badute, hau da, erdietako bat berritu behar badute bukatu delako hartan egoteko hautatutako kideei dagokien kargualdia.

–Eskola kontseiluko sektoreren batean hutsik dauden tokiak bete behar badituzte, bat etorriz atal honetako 2. eta 3. puntuetan ezarritakoarekin.

2. Erdietako bat berritu behar bada, zuzendariak sektoreak osatzeko aplikatzen ahalko du ebazpen hau, eskola kontseiluak toki hutsak dituenean berritu behar ez den erdian.

3. Erdietako bakar bat ere berritu behar ez bada, zuzendariak sektoreak osatzeko aplikatzen ahalko du ebazpen hau, eskola kontseiluaren bi erdietako sektore batean edo gehiagotan toki hutsak daudenean.

II.–Hauteskunde prozesua prestatzea.

1. Eskola kontseiluak hautatu eta haien zati bat berritzeko eta haietan hutsik dauden tokiak betetzeko deialdia ebazpen honetan horri buruz ezarritakoari jarraikiz eginen da, bai eta otsailaren 10eko 24/1997 Foru Dekretuan ezarritakoari jarraikiz ere. Izan ere, otsailaren 25eko 14/2026 Foru Dekretuaren xedapen iragankor bakarrean ezarritako araudian oinarriturik, 24/1997 Foru Dekretu hori aplikatu beharko da otsailaren 25eko 14/2026 Foru Dekretuari aurka egiten ez dion guztian.

2. Ikastetxeetako zuzendariek hezkuntza-komunitateko sektore bakoitzaren hautesle errolda eginen dute, botoa emateko eskubidea duten pertsonez osatua. Errolda hori jendaurrean jarriko da, baina bakarrik agertuko dira boto-emaile bakoitzaren izen-abizenak, edo haien NAN zenbakia (edo agiri baliokidearena). Errolda hori ikastetxe barruan besterik ez da argitara emanen.

3. Errolda hori behin-behinekoa izanen da. Haren kontra erreklamazioak aurkezten ahalko dira argitaratu eta hiru egun balioduneko epean. Erreklamazioak egiteko epea bukatuta, behin betiko errolda hurrengo egun baliodunean argitaratuko da.

4. Ikastetxeetako zuzendaritzek hauteskunde batzordeko kide titular eta ordezkoak hautatzeko jendaurreko zozketak antolatuko dituzte, publikotasun eta berdintasun printzipioak bermatuz. Era berean, hautapen prozesuko jarduketak errazteko behar diren prestaketa neurriak hartu beharko dituzte.

III.–Hauteskunde batzordea.

1. Hauteskunde batzordea 2026ko urriaren 16a baino lehen eratuko da, jendaurreko ekitaldi batean, hautapen prozedura antolatzeari ekiteko.

Hauteskunde batzordeak kide hauek izanen ditu:

–Ikastetxeko zuzendaria, burua izanen dena.

–Ikastetxeko irakasle bat, unitate bat baino gehiago duten ikastetxeetan.

–Ikastetxeko ikasle baten guraso bat edo legezko tutorea.

Azkeneko biak zozketaz hautatuko dira kasuan kasuko hautesle erroldan izena emanda daudenen artetik. Ordezkoak modu berean hautatuko dira. Horretarako, errolda bakoitzeko pertsona bakoitzari zenbaki arrunt bat esleitzen ahal zaio, 1etik aurrera, eta zenbaki bat ausaz atera, 1etik errolda osatzen dutenen kopurura artekoa. Hauteskunde batzordeko kide titular izanen da zozketan ateratzen den zenbakia daukana, baita horren ondokoak ere, kasuan kasuko sektorea osatzeko behar diren titularrak izan arte. Ordezkoak izanen dira erabilitako azken zenbakiaren hurrengoak dituztenak.

2. Helduen Oinarrizko Hezkuntzako ikastetxeetan, gurasoen eta legezko tutoreen ordezkariaren partez, ikasleen ordezkari bat izanen da hauteskunde batzordean. Zozketa bidez hautatuko da dagokion hautesle erroldan inskribaturik dauden ikasleen artetik (III.1 puntuan proposatutako sistema bera erabil daiteke). Ordezkari horren ordezkoa modu berean hautatuko da (III.1 atalean proposatutako sistema bera erabil daiteke).

3. Hala ere, ebazpen honen I.3 atalean azaltzen den kasuan, zuzendariak parte hartzetik salbuesten ahalko ditu bete behar ez diren sektoreetakoak diren hauteskunde batzordeko kideak.

4. Hauteskunde batzordeak hauteskunde mahaien eraketa sustatu behar du, eta bai titularrak bai ordezkoak izendatu.

5. Hauteskunde batzordearen eskumenak otsailaren 10eko 24/1997 Foru Dekretuaren 12. eta 13. artikuluetan eta ebazpen honetan adierazitakoak dira.

6. Artikulu horietan xedatutakoaz gain, hauteskunde batzordeak eskumena izanen du hauteskunde prozesuan sor daitezkeen gorabeherei buruz ebazteko.

IV.–Hauteskunde mahaiak.

1. Irakasleentzako eta guraso eta legezko tutoreentzako hauteskunde mahaiak eratuko dira, otsailaren 10eko 24/1997 Foru Dekretuaren 15. eta 16. artikuluetan ezarritakoaren arabera.

Eratutako hauteskunde mahaietako bakoitzak, bozketa saioan buru gisa aritzeaz gainera, bozketaren zuzentasuna begiratu, botoak zenbatu eta behar den akta eginen du.

2. Irakasleen sektorearen hauteskunde mahaiko kideak honako hauek izanen dira: ikastetxeko zuzendaria –mahaiburu lanetan ariko dena–, ikastetxean antzinatasun handiena duen irakaslea eta antzinatasun txikiena duena. Azken horrek hauteskunde mahaiko idazkari lanak eginen ditu. Antzinatasun bereko irakasle bat baino gehiago baldin badaude, antzinatasun handienekoen artean irakasle zaharrena izanen da mahaikide, eta antzinatasun txikienekoen artean gazteena. Hauek izanen dira ordezkoak:

–Zuzendariaren ordezkoa, ordena honi jarraikiz: ikastetxeko ikasketaburua, ikastetxeko idazkaria, ikastetxean antzinatasun handiena duen irakaslea.

–Ikastetxean antzinatasun handiena duen irakaslearen ordezkoa: antzinatasun handiena duten irakasleen artean bigarrena.

–Ikastetxean antzinatasun txikiena duen irakaslearen ordezkoa: antzinatasun txikiena duten irakasleen artean bigarrena.

3. Gurasoen eta legezko tutoreen sektorearen hauteskunde mahaiko kideak honako hauek izanen dira: ikastetxeko zuzendaria –mahaiburu lanetan ariko dena– eta lau guraso edo legezko tutore, zozketaz aukeratuak (III.1 atalean proposatutako sistema bera erabil daiteke). Haietatik gazteenak idazkari lanak eginen ditu. Nolanahi ere, hauteskunde mahaia eratzeko behar den guraso edo legezko tutoreen kopurua murrizten ahalko du hauteskunde batzordeak baldin eta, ikastetxeko zuzendariak ongi arrazoitutako inguruabarrengatik, hala komeni bada edo horretarako arrazoirik bada. Hauek izanen dira ordezkoak:

–Zuzendariaren ordezkoa, ordena honi jarraikiz: ikastetxeko ikasketaburua, ikastetxeko idazkaria, ikastetxean antzinatasun handiena duen irakaslea.

–Lau gurasoen edo legezko tutoreen ordezkoak: beste lau guraso edo legezko ordezkari, zozketaz aukeratuak (III.1 atalean proposatutako sistema bera erabiltzen ahalko da).

4. Helduen Oinarrizko Hezkuntzako ikastetxeetan ez da gurasoen eta legezko ordezkarien sektorearen hauteskunde mahairik izanen. Ikasleen hauteskunde mahaia, ordea, eratu egin beharko da, eta kide hauek izanen ditu: ikastetxeko zuzendaria (mahaiburu lanetan arituko da) eta bi ikasle, zozketaz aukeratuak (III.1 puntuan proposatutako sistema bera erabil daiteke). Ikasle zaharrenak idazkari lanak eginen ditu. Hauek izanen dira ordezkoak:

–Zuzendariaren ordezkoa, ordena honi jarraikiz: ikastetxeko ikasketaburua, ikastetxeko idazkaria, ikastetxean antzinatasun handiena duen irakaslea.

–Bi ikasleen ordezkoak: beste bi ikasle, zozketaz aukeratuak (III.1 atalean proposatutako sistema bera erabil daiteke).

V.–Hautatu beharreko ordezkariak eta hautagai zerrendak.

1. Sektore bateko kide guztiek eskubidea dute hautesle eta hautagai izateko, kontuan harturik otsailaren 10eko 24/1997 Foru Dekretuaren 14. artikuluak irakasleen sektorerako aipatzen dituen berezitasunak.

Horri dagokionez, kontuan hartuko da ikastetxean eskolatutako ikasleen guraso edo legezko ordezkarietako bakoitzak baliatzen ahalko duela haien ordezkariak hautatzeko eta ordezkari izateko eskubidea.

2. Ebazpen honetan aipatzen diren ikastetxeetako eskola kontseiluaren osaera otsailaren 10eko 24/1997 Foru Dekretuaren 9. artikuluan ezarrita dago, baita haren bigarren xedapen gehigarrian eta lehenbiziko xedapen iragankorrean ere.

3. Hezkuntza Bereziko ikastetxeetan eta Hezkuntza Bereziko unitateak dituztenetan, hezkuntza-arreta osagarriko langileek (HAOL) ere ordezkari bat izanen dute eskola kontseiluan, ebazpen honen XIII.4 atalean jasotako baldintzak kontuan hartuta.

4. Eskola kontseiluaren erdia bi urtetik behin berrituko da, lehenbizi erdi bat eta gero bestea. Agintaldiari eta hautatu beharreko ordezkarien kopuruari dagokienez, deialdi honetan berritu behar den erdia zein den kontuan harturik, otsailaren 10eko 24/1997 Foru Dekretuan xedatutakoari jarraituko zaio, hain zuzen ere 10. artikuluan, bigarren xedapen gehigarrian eta lehenbiziko eta hirugarren xedapen iragankorretan xedatzen denari. Ebazpen honen eranskinetan ageri da sektore bakoitzaren ordezkarien kopurua, erdi bakoitzerako.

5. Helduen Oinarrizko Hezkuntzako ikastetxeetan Lehen Hezkuntzako eta Haur eta Lehen Hezkuntzako ikastetxeetan gurasoei eta legezko tutoreei dagokien ordezkaritza ikasleei emanen zaie, hautapen prozesu baten bidez.

6. Hautagai zerrenda hauteskunde batzordeari igorritako idazki baten bidez aurkeztuko da; hautagaiak idazki hori sinatu beharko du, eta, horrekin batera, NANaren edo agiri baliokidearen fotokopia aurkeztuko du.

7. Hautagai zerrendak aurkezteko epea 2026ko urriaren 19an hasiko da, eta 2026ko urriaren 30eko 14:00etan bukatuko. Hautagai zerrendak aurkezteko epea bukatu eta hurrengo egun baliodunean argitaratuko du hauteskunde batzordeak hautagaien behin-behineko zerrenda.

Hautagai onartuen eta baztertuen behin-behineko zerrendaren kontra, erreklamazioa jartzen ahal da hura argitaratu eta hurrengo egun baliodunean. Hauteskunde batzordeak hurrengo bi egun baliodunetan ebatziko du, eta hautagaien behin betiko zerrenda argitaratuko du hurrengo egun baliodunean. Hartzen den erabakiaren kontra gora jotzeko errekurtsoa jartzen ahalko da, Hezkuntzako eta Lanbide Heziketako zuzendari nagusiari zuzendua, hilabeteko epean, eta hori berariaz adieraziko da hautagaien behin betiko zerrendaren beheko aldean; errekurtsoa jarrita ere, prozesua ez da etenen.

8. Gerta daiteke sektore batean aurkeztutako hautagaien kopurua txikiagoa izatea berritu edo bete beharreko ordezkariena baino, edo horren berdina izatea. Horrelakoetan, aurkeztu diren hautagaiak automatikoki aldarrikatuko ditu hauteskunde batzordeak, sektore horretako hauteskunde mahaira deitu beharrik gabe. Aldarrikapena eginda, eskola kontseilua eratu beharko da ebazpen honetako X. atalean ezarritakoari jarraikiz.

9. Sektore jakin bateko tokiak betetzeko hautagairik ez badago, sektore horretako tokiak hutsik geratuko dira.

VI.–Bozketa prozesua.

1. Hauteskunde batzordeak ezartzen dituen egunetan eginen dira eskola kontseiluetako sektoreen ordezkarien hauteskundeak, 2026ko azaroaren 10etik 20ra bitarte, biak barne.

Bozkatzeko orduak hautesleen parte-hartzea errazteko moduan ezarriko dira. Bozketa zuzenekoa izanen da, sekretua eta eskuordetu ezinekoa. Hauteskunde mahaiaren aurrean egiten diren bozketa presentzialetan, hautesleek beren nortasuna frogatu beharko dute NANa edo agiri baliokide bat aurkeztuz, eta ez da botoa ematerik izanen hauteskunde mahaian behar den frogagiria aurkeztu gabe.

2. Hauteskunde batzordeak berariazko boto-paper ereduak finkatzen ahal ditu. Boto-paper horietan hautagaien izenak agertuko dira, lehenbiziko deituraren arabera alfabetikoki ordenatuak. Gurasoen eta legezko tutoreen edo ikasleen sektoreetako hautagairen bat hautagaitza bereizi bateko partaidea bada, hautagai horien izenaren azpian beren elkartearen edo erakundearen izena agertuko da. Hautagai bakoitzaren izenaren aurrean laukitxo bat jarriko da. Boto-emaileak gurutze bat jarriko du laukitxoan edo laukitxoetan, kasuan-kasuan, botoa zein hautagairentzat den adierazteko.

3. Irakasleen sektoreko ordezkariak otsailaren 10eko 24/1997 Foru Dekretuaren 15. artikuluak xedatzen duenari jarraikiz hautatuko dira.

Zuzendariak klaustro berezi baterako deia eginen du, irakasleen hauteskunde mahaia eratzeko eta irakasleen ordezkariak hautatzeko prozesua egiteko.

Irakasle bakoitzak gehienez hiru izen jartzen ahal ditu bere boto-paperean, bete beharreko tokiak bost edo lau badira, bi izen hiru badira, eta izen bakarra ordezkari bat edo bi aukeratu behar direnean. Lehenbiziko bozketan behar diren irakasle guztiak aukeratzen ez badira, ekitaldi berean bigarren bozketa eginen da, azkena, kopuru horretara ailegatzeko asmoz.

Boto presentzialaren alternatiba gisa, Hezkuntza Departamentuak, EDUCAren bidez, irakasleek botoa telematikoki emateko aukera martxan jartzen ahalko du bozketarako berariaz antolatutako klaustro berezi horretan. Kasu horretan, Hezkuntza Departamentuak bozketa prozesua gauzatzeko jarraibide egokiak helaraziko dizkie ikastetxeei.

4. Gurasoen eta legezko tutoreen sektorearen ordezkariak hautatuko dira otsailaren 10eko 24/1997 Foru Dekretuaren 16. artikuluak xedatzen duenari jarraikiz.

Bozketa prozesua zuzenduko duen hauteskunde mahaia eratuko da. Hautesle bakoitzak gehienez ere hiru izen idatziko ditu bere boto-paperean hautatu beharrekoak bost edo lau direnean, bi izen idatziko ditu hautatu beharrekoak hiru direnean, eta izen bakarra, bat edo bi hautatu behar direnean.

Ikastetxeek erabakitzen ahal dute bozketa presentzialaz gain bozkatzeko beste modu bat ezartzea.

Hezkuntza Departamentuak gaituko du aukera hori EDUCAren bitartez eta, horrela, ikasleen gurasoek eta legezko tutoreek telematikoki bozkatzen ahalko dute. Kasu horretan, Hezkuntza Departamentuak bozketa prozesua gauzatzeko jarraibide egokiak helaraziko dizkie ikastetxeei.

Bozketa telematikoa aukeratzen duten ikastetxe guztiek lagundu egin beharko diete laguntza eskatzen duten guraso edo legezko ordezkari guztiei, eta betiere bermatuko dute botoa zuzenekoa, isilpekoa eta eskuordetu ezina dela.

Bozketa telematikoak egin badira, boto telematikoa eman dutenek debekatuta izanen dute botoa modu presentzialean ematea. Era berean, kontuan hartu beharko da bozketa telematikoen emaitza isilpekoa izanen dela botoen zenbaketa egin arte.

Nolanahi ere, bozketa telematikoaren aukera bozketa presentzialaren osagarri gisa ulertu behar da, eta hura erabiltzeak ez du inolaz ere esan nahi prozesu presentzialari uko egiten ahal zaionik. Izan ere, botoa modu presentzialean eman nahi duten hautesleek beti izan behar dute bermatuta aukera hori.

5. Administrazioko eta zerbitzuetako langileen sektoreko (AZL) ordezkaria otsailaren 10eko 24/1997 Foru Dekretuaren 17. artikuluak xedatzen duenari jarraikiz hautatuko da, kontuan hartuta, nolanahi ere, ebazpen honen XIII.4 atalean jasotako baldintzak. Bozketa irakasleen hauteskunde mahaian eginen da, beste hautetsontzi batean. Hautesle bakoitzak hautagai bakarrari emanen dio botoa.

6. Derrigorrezko Bigarren Hezkuntzako lehen eta bigarren maila ematen duten Haur eta Lehen Hezkuntzako ikastetxeetan eta martxoaren 13ko 150/1996 Foru Dekretuaren bidez sortu ziren Derrigorrezko Bigarren Hezkuntzako institutuen eskola-eremu berean dauden ikastetxeetan, Derrigorrezko Bigarren Hezkuntzako ikasleen ordezkari bat eskola kontseiluko kide izanen da, hala agintzen baitute, hurrenez hurren, otsailaren 10eko 24/1997 Foru Dekretuaren lehen xedapen iragankorrak eta bigarren xedapen gehigarriak.

Ikasleen ordezkari hori dela eta, gurasoen eta legezko tutoreen sektoreko lehen erdian kide bat gutxiago izanen da. Aipatutako ordezkari hori bi urtetik behin berrituko da, eta prozesu horretan, Derrigorrezko Bigarren Hezkuntzan ikasten ari diren ikasleak soilik izan daitezke hautesle eta hautagai, ikastetxeko hezkuntza proiektuan ezarritako prozedurari jarraikiz.

7. Helduen Oinarrizko Hezkuntzako ikastetxeetan, ikasle bakoitzak gehienez hiru izen jarriko ditu bere boto-paperean bete beharreko tokiak bost edo lau badira, bi izen hiru badira eta izen bakarra ordezkari bat edo bi aukeratu behar direnean. Bozketa egiteko, hauteskunde batzordearen jarraibideen arabera jokatuko da.

Ikastetxeek erabakitzen ahal dute bozketa presentzialaz gain bozkatzeko beste modu bat ezartzea.

Hezkuntza Departamentuak gaituko du aukera hori EDUCAren bitartez eta, horrela, ikasleek telematikoki bozkatzen ahalko dute. Kasu horretan, Hezkuntza Departamentuak bozketa prozesua gauzatzeko jarraibide egokiak helaraziko dizkie ikastetxeei.

Bozketa telematikoa aukeratzen duten ikastetxe guztiek lagundu egin beharko diete laguntza eskatzen duten ikasle guztiei, eta betiere bermatuko dute botoa zuzenekoa, isilpekoa eta eskuordetu ezina dela.

Bozketa telematikoak egin badira, boto telematikoa eman dutenek debekatuta izanen dute botoa modu presentzialean ematea. Era berean, kontuan hartu beharko da bozketa telematikoen emaitza isilpekoa izanen dela botoen zenbaketa egin arte.

Nolanahi ere, bozketa telematikoaren aukera bozketa presentzialaren osagarri gisa ulertu behar da, eta hura erabiltzeak ez du inolaz ere esan nahi prozesu presentzialari uko egiten ahal zaionik. Izan ere, botoa modu presentzialean eman nahi duten hautesleek beti izan behar dute bermatuta aukera hori.

8. Hezkuntza-arreta osagarriko langileen (HAOL) ordezkaria bederatzi unitate edo gehiago dituzten ikastetxeetan hautatuko da, irakasleen sektorearen hauteskunde mahaian, beste hautetsontzi batean. Hautesle bakoitzak hautagai bakarrari emanen dio botoa. Hezkuntza-arreta osagarriko langileen ordezkaria eskola kontseiluaren lehen erdikoa izanen da, eta erdi horri dagokion kargualdia bukatzean utziko dio bere agintaldiari, ebazpen honen XIII.4 atalean jasotako baldintzak kontuan hartuta.

VII.–Toki hutsak betetzea.

1. Ebazpen honen I.3 atalean ezarritakoari jarraikiz, eta nahiz eta ez egon eskola kontseiluko erdietako bat berritzeko premia, zuzendariak, egoki iritziz gero, hauteskundeetarako deia egiten ahalko du sektoreetan diren toki hutsak betetzeko, erdi batean edo bietan, betiere toki hutsak ordezkoen zerrendaren bitartez betetzerik izan ez denean.

Toki hutsak esleitzeko orduan, boto gehien duen hautagaiak agintaldi luzeena hartuko du, eta haren agintaldia bukatuko da ordezten duenaren agintaldiak zer egunetan bukatu beharko lukeen, egun horretan.

2. Bi erdietako bat berritu behar duten ikastetxeek toki hutsak esleitzeko deskribatu den prozesua erabiliko dute berritu beharrekoa ez den erdiko toki hutsak betetzeko, hala egokitzen denean.

Hala gertatuz gero, sektore bakoitzean boto gehien eskuratzen duten hautagaiei berritzen ari den erdiko tokiak esleituko zaizkie, eta hurrengoek beste erdiko toki hutsak beteko dituzte. Azken ordezkari horien agintaldia sektore bakoitzean ordeztutakoen agintaldiak bukatu behar zuen egun berean bukatuko da.

3. Sektore bateko hautagaien kopurua bi erdietan bete beharreko toki hutsen kopurua adinakoa bada, hauteskunde batzordeak zehaztuko du erdi bati edo besteari esleitzeko prozedura. Akta ofizial batean jaso beharko du esleitzeko zer prozedura erabili duen.

VIII.–Botoak zenbatzea, aktak egitea eta hautagaiak aldarrikatzea.

1. Hauteskunde ekitaldi bakoitzean, bozketa bukatu ondoren, hauteskunde mahaiak botoak zenbatuko ditu, hautetsontzian bertan emandako botoak eta telematikoki emandakoak kontuan hartuta, horrelakorik baldin badago.

Botoak baliogabetzeko irizpide orokorrez gainera (edukikoak eta formakoak), bozketa presentzialaren kasuan, batzordeak ereduren bat onartzen badu boto-paperetarako, beste eredu batean ematen diren botoek ez dute baliorik izanen.

Botoak jendaurreko ekitaldian zenbatu ondotik, hauteskunde mahaiko kide guztiek sinatu beharreko akta eginen da, datu hauek bildu beharko dituena: aurkeztutako hautagaien zerrenda eta bakoitzak lortutako boto kopurua, eskola kontseiluko kide izateko aukeratuen zerrenda eta gerta daitezkeen toki hutsak betetzeko ordezkoen zerrenda, horietako bakoitzak lortu duen boto kopurua adierazita eta horren arabera ordenatuta, boto kopuru handienetik txikienera. Hauteskunde mahai bakoitzak akta igorriko dio ikastetxeko hauteskunde batzordeari, hautetsien aldarrikapena egin dezan.

Kontuan hartu behar da sektore bakoitzerako ordezkoen zerrenda indarrean egonen dela eskola kontseiluaren erdietako bat berritzen denera arte. Izan ere, berritzearekin batera ordezkoen zerrenda berria osatuko da, zeinak aurreko zerrenda indargabetuko baitu. Eskola kontseiluaren erdiren bat berritu behar ez den ikasturteetan sektore jakin bateko toki hutsak betetzen diren kasu guztietan, prozedura zabaltzeagatik sektore horretan eratzen den ordezkoen zerrenda indarrean egonen da eskola kontseiluaren erdietako bat partzialki berritu arte.

2. Bozketetan berdinketarik izanez gero, hauteskunde mahaiak zozketa bidez eginen du hautaketa. Hauteskunde batzordeari igortzen zaion aktan horren berri emanen da.

3. Hauteskunde mahaiek botoen zenbaketa eta aktak egin ondotik, hauteskunde batzordeak hautetsien aldarrikapena eginen du. Batzordearen erabakien aurka, gora jotzeko errekurtsoa aurkezten ahalko da, Hezkuntzako eta Lanbide Heziketako zuzendari nagusiari zuzendua, hilabeteko epean, ebazpena jakinarazi edo argitaratu eta biharamunetik aurrera. Horren berri berariaz emanen da jakinarazpenaren edo argitalpenaren beheko aldean.

4. Ikastetxeko zuzendariak, hauteskunde batzordeko burua den aldetik, ebazpen honetan ikastetxe motaren arabera zehazten den eranskina igorri beharko du, behar bezala beterik, Hezkuntza Departamentuko Ikasketak Antolatzeko Atalera (ordenacion.academica@navarra.es), sektore guztietako bozketak bukatu eta bost egun balioduneko epean, gehienez ere.

IX.–Kide izendatuak.

1. Otsailaren 10eko 24/1997 Foru Dekretuaren 9. artikuluak ezartzen duen moduan, eskola kontseiluko kide izanen dira ikastetxea kokatua dagoen udalerriko zinegotzi edo udal ordezkari bat eta, legez eratuta izanik, ordezkaritza handiena duen guraso elkartearen ordezkari aritzen den guraso edo legezko tutore bat.

2. Ikastetxeko zuzendariak, hauteskunde batzordeko burua edo, hala badagokio, eskola kontseiluko burua den aldetik, ikastetxea kokatua dagoen herriko udalari eskatuko dio izenda dezala eskola kontseiluko kide izanen den zinegotzia edo ordezkaria.

3. Landa ikastetxe bateratuen kasuan, batasunak bere aplikazio eremuan hartzen dituen udalen artean adostasunik ez bada, biztanleen kopuruaren ordenari segituz izendatuko dute udalek ikasturte bakoitzerako zinegotzia edo ordezkaria, biztanle gehien duen herritik hasita. Gainerako udalen ordezkariek ere esku hartzen ahal dute eskola kontseiluan, hitzarekin baina botorik gabe.

4. Orobat, ikastetxeko zuzendariak, hauteskunde batzordeko burua edo, hala badagokio, eskola kontseiluko burua den aldetik, ikastetxean ordezkaritza handiena duen guraso elkarteari eskatuko dio izenda dezala eskola kontseiluan bere ordezkari gisa arituko den kidea. Horretarako, ordezkaritza handiena duen guraso elkartea izanen da hautesle erroldak onartzen diren egunean elkarteko kide diren familia kopuru handiena duena, guraso elkartearen idazkariak aurkeztu beharreko ziurtagirian adierazten denaren arabera. Zuzendariak edozein unetan eska dezake egokitzat jotzen duen dokumentazioa, aurkeztutako datuak egiazkoak direla frogatzeko.

Elkarte horren izendapen proposamenik ez bada edo ikastetxean horrelako elkarterik ez bada, toki huts hori beteko du gurasoen eta legezko tutoreen sektoreko ordezkoen zerrendan lehenbizi dagoen hautagai ez-hautetsiak, eskola kontseiluaren zati bat berriz berritu arte.

5. Ordezkaritza handiena duen guraso elkarteak izendatutako ordezkaria, unitate bateko edo biko ikastetxeetako gurasoen eta legezko tutoreen ordezkaria eta udaleko zinegotzi edo ordezkaria bi urtetik behin berrituko dira, edo lehenago, haiek izendatu zituen organoak erabakitzen duenean.

6. Guraso elkarteak izendatutako ordezkariak kargua uzten badu bi urteko aldi hori bukatu baino lehen, guraso elkarteak beste ordezkari bat proposatuko du gelditzen den aldirako. Proposamen hori bi hilabeteko epean egin ezean, toki hutsa gurasoen eta legezko tutoreen sektoreko zerrendan lehenbizi dagoen ordezkoak beteko du, eskola kontseiluaren zati bat berriz berritu arte.

X.–Eskola kontseilua eratzea.

1. Hamar egun balioduneko epean, hautatutako hautagaiak aldarrikatzen diren egunetik zenbatzen hasita, eskola kontseilua eratzeko bilera bat egin beharko da, zuzendariak deialdia egin ondoren.

2. Ikastetxeko hezkuntza-komunitateko sektoreren batek ordezkariak hautatu ez baditu ere sektoreari berari egotz dakiokeen arrazoiren batengatik, eskola kontseiluaren eraketa baliozkoa izanen da.

XI.–Eskola kontseiluaren eskumenak.

Hezkuntzari buruzko maiatzaren 3ko 2/2006 Lege Organikoaren 127. artikuluan ezarritakoarekin bat etorriz (lege hori abenduaren 29ko 3/2020 Lege Organikoak aldatu zuen), honako hauek dira ikastetxeko eskola kontseiluaren eskumenak:

a) Maiatzaren 3ko 2/2006 Lege Organikoaren V. tituluko II. kapituluan adierazitako proiektuak eta arauak onestea eta ebaluatzea.

b) Ikastetxeko urteko programazio orokorra onestea eta ebaluatzea, irakaskuntzaren planifikazioari eta antolamenduari dagokienez irakasleen klaustroak dituen eskumenak ukatu gabe.

c) Hautagaiek zuzendaritzarako aurkezten dituzten hautagai zerrenden eta zuzendaritza proiektuen berri izatea.

d) Ikastetxeko zuzendariaren hautaketan parte hartzea, maiatzaren 3ko 2/2006 Lege Organikoan ezarritako moduan. Zuzendaritza taldeko gainerako kideen izendapenen eta kargu-uzteen berri izatea. Hala badagokio, eta kideek hala erabaki eta gero, zuzendariaren izendapena atzera bota dadin proposatzea bi hereneko gehiengoz onetsita.

e) Ikasleen onarpenarekin zerikusia duten erabakiak hartzea, maiatzaren 3ko 2/2006 Lege Organikoan eta hura garatzeko xedapenetan ezarritakoari jarraikiz.

f) Haurren eskubideen aitortza eta babesa sustatzen duten hezkuntzako neurriak har daitezen bultzatzea eta neurrion jarraipena egitea.

g) Honako alderdi hauek bultzatzeko neurriak eta ekimenak proposatzea: bizitzeko era osasungarriak; bizikidetza ikastetxean; emakumeen eta gizonen arteko benetako berdintasuna; diskriminaziorik eza; eskola-jazarpenaren eta genero-indarkeriaren prebentzioa eta gatazkak modu baketsuan konpontzea norberaren bizitzan, familian eta gizartean.

h) Bizikidetzaren aurkako portaeren berri izatea eta hezkuntzako eta bitartekaritzako neurriak eta neurri zuzentzaileak aplikatzea, neurriok indarrean dagoen araudiaren araberakoak direla zainduta. Zuzendariak neurri zuzentzaileak hartzen dituenean ikasleek ikastetxeko bizikidetza nabarmen kaltetzen duten portaerak izan dituztelako, eskola kontseiluak, gurasoek edo legezko tutoreek edo, bestela, ikasleek hala eskatuta, hartutako erabakia berrikusten ahalko du, eta, hala badagokio, neurri egokiak proposatu.

i) Eskolako instalazioak eta ekipamenduak behar bezala zaintzen eta berritzen joan daitezen sustatzea, horrek kalitatea hobetu eta jasangarritasunari lagunduko baitio, eta baliabide osagarriak eskuratzeko erabakiak onestea, bat etorriz maiatzaren 3ko 2/2006 Lege Organikoaren 122.3 artikuluan ezarritakoarekin.

j) Toki administrazioekin eta beste ikastetxe, erakunde eta entitate batzuekin lankidetzan aritzeko irizpideak finkatzea, hezkuntza eta kultura arloko helburuak lortzearren.

k) Honako hauek aztertzea eta baloratzea: ikastetxearen jardun orokorra, eskola errendimenduaren bilakaera eta ebaluazioen emaitzak (ikastetxeak parte hartzen duen barneko zein kanpoko ebaluazioen emaitzak).

l) Bere ekimenez edo dagokion administrazioak aginduta proposamenak eta txostenak egitea ikastetxearen funtzionamenduari eta kudeaketaren kalitatea hobetzeari buruz, baita kudeaketaren kalitatearekin lotutako beste alderdi batzuei buruz ere.

m) Ikastetxearen aurrekontuaren proiektua onestea.

n) Hezkuntza Departamentuak esleitzen dion beste edozein.

XII.–Eskola kontseiluaren funtzionamendua.

1. Eskola kontseilua, gutxienez, ikasturteko hiruhileko bakoitza bukatutakoan bilduko da. Era berean, zuzendariak deialdia egiten duen bakoitzean edo gutxienez kideen heren batek eskatzen duenean bilduko da. Nolanahi ere, ikasturte hasieran bilera bat eginen da nahitaez.

2. Eskola kontseiluaren bilerak kide guztiak joateko moduko egun eta orduetan eginen dira, ahal den neurrian. Zuzendariak, gutxienez, bilera egin baino bost egun natural lehenago bidaliko die deialdia eskola kontseiluko kideei. Bertan, gai zerrendaz gainera, eztabaidatuko eta, hala badagokio, onartuko den dokumentazioa jasoko da. Gainera, ohiz kanpoko bileretarako deialdiak egiten ahalko dira, bilera egin baino gutxienez berrogeita zortzi ordu lehenago, aztertu beharreko gaien izaerak hala eskatzen duenean.

Era berean, zuzendariak baimena ematen ahalko die eskola kontseilukoak ez diren beste pertsona batzuei eskola kontseiluaren bileretara joateko; pertsona horiek hitza izanen dute, baina botorik ez.

3. Eskola kontseiluak gehiengo soilez hartuko ditu erabakiak, non eta arau bidez ez den bestelako gehiengorik ezartzen, aztertu beharreko gaien izaeraren arabera.

4. Eskola kontseiluaren bileretako burua ikastetxeko zuzendaria izanen da. Idazkaria ikastetxeko idazkaria izanen da, zeinak hitza izanen baitu, baina botorik ez. Kargu hori ez duten ikastetxeetan, funtzio hori eskola kontseiluko irakasle batek beteko du, zuzendariak izendatzen duenak. Irakasleen sektoreko ordezkari gisa, hitza eta botoa izanen ditu.

5. Era berean, ikastetxeetako eskola kontseiluak egokitzat jotzen dituen lan batzorde guztiak eratzen ahalko ditu, baina batzorde horiek ez dira ez erabakitzaileak ez lotzaileak izanen, inola ere.

XIII.–Unitate kopurua edo horien izaera aldatzeak eragindako ondorioak.

1. Hauteskunde hauetan eskola kontseiluaren zati bat berritu behar duten ikastetxeek unitate kopuruan aldaketa izan baldin badute eta, horren ondorioz, eskola kontseiluaren osaeran ere aldaketa egin behar baldin badute, kasu bakoitzean berritu behar den erdia moldatuko dute dagokion osaera berriari egokitzeko, ikastetxeak duen ikasle kopuruaren arabera, otsailaren 10eko 24/1997 Foru Dekretuaren 10. artikuluak xedatzen duenari jarraikiz. Beste erdiari dagokion kide kopurua ez da aldatuko berritze partzial honetan.

2. Hauteskunde hauetan eskola kontseiluaren zati bat berritu behar duen ikastetxeren bat bi unitate izatetik unitate gehiago izatera igarotzen denean edo bi unitate izatera itzultzen denean, une horretako eskola kontseilua desegin eta berria aukeratu beharko da, eskola kontseilua lehenbizikoz eratuko balitz bezala, eta kontuan hartuta ikastetxeak daukan unitate kopuru berria.

3. Kontuan hartu gabe hauteskunde hauetan erdietako baten zati bat berritzea dagokien edo ez, ikastetxeko unitate kopurua aldatzeagatik kide ez-hautetsiak aldatzen diren kasu guztietan, eskola kontseilua egoera horretara egokitu beharko da.

4. Atal honetako 1. puntuan xedatutakoa gorabehera, administrazio eta zerbitzuetako langileen (AZL) eta hezkuntza-arreta osagarriko langileen (HAOL) ordezkariei dagokienez, honako hauek hartu beharko dira kontuan:

–Kontuan hartu gabe hauteskunde hauetan erdietako bat berritzea dagokien edo ez, ikastetxeko unitate kopurua bederatzitik beherakoa denean, administrazio eta zerbitzuetako langileen (AZL) ordezkaritzarik ez da egonen eskola kontseiluan, eta gobernu organo horretan boto-eskubidea duten gehieneko kideen kopuruari bat kenduko zaio. Era berean, ikastetxe bat bederatzi unitate edo gehiago izatera pasatzen denean, eskola kontseiluaren osaeran langile horien ordezkari bat egonen da, eta gobernu organo horretan boto-eskubidea duten gehieneko kideen kopuruari beste bat gehituko zaio.

–Kontuan hartu gabe hauteskunde hauetan erdietako bat berritzea dagokien edo ez, ikastetxe batean Hezkuntza Bereziko unitateak sortzen badira, hezkuntza-arreta osagarriko langileen (HAOL) ordezkari bat sartuko da eskola kontseiluaren osaeran, eta gobernu organo horretan boto-eskubidea duten kideen gehieneko kopuruari beste bat gehituko zaio. Era berean, ikastetxe batek Hezkuntza Bereziko unitateak izateari uzten badio, langile horien ordezkaritzarik ez da egonen eskola kontseiluan, eta gobernu organo horretan boto-eskubidea duten kideen gehieneko kopuruari bat kenduko zaio.

XIV.–Prozesuaren bermea.

1. Antolamendu, Prestakuntza eta Kalitate Zerbitzuak, Hezkuntzako Ikuskapen Zerbitzuak, eskoletako zuzendariek eta hauteskunde batzordeek behar diren neurriak hartuko dituzte ikastetxeko eskola kontseilua behar bezala eratu dadin; orobat, bermatuko dute kasuan kasuko prozesuetan hezkuntza-­komunitateko sektore guztiek parte hartzen dutela, horretarako erraztasunak emanez.

2. Eskola kontseiluak eratu ondoren, ikasturtean zehar gertatzen diren aldaketa guztiak Hezkuntza Departamentuari jakinarazi beharko zaizkio. Eskola kontseiluko kide hautetsiak aldatuz gero, jakinarazpena egiteko, Ikasketak Antolatzeko Atalera igorri beharko dira (ordenacion.academica@navarra.es) eraketa berria eta ordezkoen zerrenda, halakorik bada (ebazpen honen eranskineko 1., 5b eta 6. atalak). Eskola kontseiluko kide ez-hautetsiak aldatzen direnean, aski izanen da jakinaraztea zer kide ateratzen den eta zein sartzen.

Bigarrena.–Ebazpen honek eta haren eranskinek ez dute administrazio bidea amaitzen eta haien aurka gora jotzeko errekurtsoa jartzen ahal da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

Hirugarrena.–Ebazpen hau eta eranskinak igortzea, behar diren ondorioak izan ditzaten, Antolamendu, Prestakuntza eta Kalitate Zerbitzura, Hezkuntzako Ikuskapen Zerbitzura eta Hezkuntzako Teknologien eta IKT Azpiegituren Zerbitzura.

Laugarrena.–Ebazpen hau eta eranskinak Nafarroako Aldizkari Ofizialean argitaratzea.

Iruñean, 2026ko abuztuaren 25ean.–Hezkuntzako eta Lanbide Heziketako zuzendari nagusia, Gil Sevillano González.

I. ERANSKINA.–ESKOLA KONTSEILUAK HAUTATZEA, HAIEN ZATI BAT BERRITZEA EDO SEKTOREAK OSATZEA LEHEN HEZKUNTZAKO IKASTETXEETAN, HAUR ETA LEHEN HEZKUNTZAKO IKASTETXEETAN ETA HEZKUNTZA BEREZIKO IKASTETXEETAN (2026-2027)

.....................................................(e)n, 20...(e)ko .........................................aren ..........(e)(a)n

Ikastetxeko zuzendaria

II. ERANSKINA-ESKOLA KONTSEILUAK HAUTATZEA, HAIEN ZATI BAT BERRITZEA EDO SEKTOREAK OSATZEA HELDUEN OINARRIZKO HEZKUNTZAKO IKASTETXEETAN (2026-2027)

.....................................................(e)n, 20...(e)ko .........................................aren ..........(e)(a)n

Ikastetxeko zuzendaria

III. ERANSKINA.–ESKOLA KONTSEILUAK HAUTATZEA, HAIEN ZATI BAT BERRITZEA EDO SEKTOREAK OSATZEA HELDUEI EUSKARA

ERAKUSTEKO IKASTETXEETAN (2026-2027)

.....................................................(e)n, 20...(e)ko .........................................aren ..........(e)(a)n

Ikastetxeko zuzendaria

Iragarkiaren kodea: F2611531