Iragarkia

171. ALDIZKARIA - 2026ko abuztuaren 31

1. NAFARROAKO FORU KOMUNITATEA

1.7. BESTELAKOAK

534/2026 EBAZPENA, abuztuaren 7koa, Hezkuntzako eta Lanbide Heziketako zuzendari nagusiak emana, zeinaren bidez onesten baitira C eta B graduetako prestakuntza eskaintzak onartzeari eta Nafarroako Foru Komunitatean Laneko Arriskuen Prebentzioko modulua garatzeari buruzko jarraibideak.

Hezkuntzako eta Lanbide Heziketako zuzendari nagusiaren maiatzaren 13ko 283/2026 Ebazpenaren bidez (Nafarroako Gobernuko Hezkuntza Departamentuak baimendutako Lanbide Heziketako ikastetxe pribatuei zuzendua), Hezkuntzako eta Lanbide Heziketako zuzendari nagusiaren apirilaren 28ko 232/2026 Ebazpenaren bidez (irabazi-asmorik gabeko erakundeei zuzendua) eta Hezkuntzako eta Lanbide Heziketako zuzendari nagusiaren maiatzaren 11ko 252/2026 Ebazpenaren bidez (dagokion prestakuntza entitateen erregistroan akreditaturik dauden prestakuntza entitate pribatuei zuzendua), 2026. eta 2027. urteetan profesionaltasun-ziurtagiriak lortzearekin lotutako prestakuntza ekintzak egiteko dirulaguntzen oinarriak onartu ziren.

Hezkuntzako eta Lanbide Heziketako zuzendari nagusiaren ekainaren 26ko 447/2026 Ebazpenaren bidez (Nafarroako Gobernuko Hezkuntza Departamentuak baimendutako Lanbide Heziketako ikastetxe pribatuei zuzendua), Hezkuntzako eta Lanbide Heziketako zuzendari nagusiaren ekainaren 23ko 433/2026 Ebazpenaren bidez (irabazi-asmorik gabeko erakundeei zuzendua) eta Hezkuntzako eta Lanbide Heziketako zuzendari nagusiaren ekainaren 25eko 441/2026 Ebazpenaren bidez (dagokion prestakuntza entitateen erregistroan akreditaturik dauden prestakuntza entitate pribatuei zuzendua), 2026. eta 2027. urteetan profesionaltasun-ziurtagiriak lortzearekin lotutako prestakuntza ekintzak egiteko dirulaguntzen deialdiak ebatzi ziren.

Hezkuntzako kontseilariaren apirilaren 11ko 40/2024 Foru Aginduan, ikasleak Nafarroako Foru Komunitateko ikastetxe publiko eta pribatu itunduetan onartzeko prozesua arautu eta garatzen da, funts publikoen bidezko irakaskuntzak egiteko, aurrez aurreko modalitatean, Lanbide Heziketako Sistemaren D eta E graduei eta Arte Plastikoetako eta Diseinuko lanbide ikasketei dagozkienak, eta orobat, ikastetxe publikoetan, ikastetxe pribatuetan eta entitateetan, Nafarroako Foru Komunitatean baimenduetan, aurrez aurreko modalitatean, Hezkuntza Departamentuak kudeatzen duen Lanbide Heziketako Sistemako A, B, eta C graduei dagozkien irakaskuntzak egiteko.

Bestalde, Lanbide Heziketako Sistemaren antolamendua garatzen duen uztailaren 18ko 659/2023 Errege Dekretuaren 158. artikuluan eta lehenengo xedapen iragankorraren 4. puntuan ezarritakoaren arabera, ikasleak enpresako edo pareko erakundeko prestakuntzara sartu aurretik, Lanbide Heziketako sistemako ikastetxeek emanen duten laneko arriskuen prebentzioko prestakuntza gainditu beharko dute.

Etengabeko lanbide prestakuntzako ekintzak indarrean dagoen araudira egokitzeko, jarraibide hauek ematen dira, Nafarroako Foru Komunitatean prestakuntza hori ematen duten ikastetxe publiko, entitate eta baimendutako ikastetxe pribatuentzat.

Erabiliz Hezkuntza Departamentuaren egitura organikoa ezartzen duen azaroaren 15eko 245/2023 Foru Dekretuak emandako ahalmenak,

EBAZTEN DUT:

1. Eranskinetan agertzen diren jarraibideak onestea. Jarraibide horiek bete beharko dira Nafarroako Foru Komunitatean emandako B (konpetentzia ziurtagiriak) eta C (lanbide ziurtagiriak) graduen onarpen prozesuan eta prestakuntza eskaintza horretako laneko arriskuen prebentzioko moduluaren eskaintzan eta garapenean.

2. Ebazpen honen eranskinetan bildutako jarraibideak Nafarroako Foru Komunitatean prestakuntza hori ematen duten ikastetxe publiko, entitate eta baimendutako ikastetxe pribatuei aplikatuko zaizkie, dagozkien afera orotan, deusetan galarazi gabe ikastetxe eta entitate horien titularrek dituzten eskumenak.

3. Ebazpen hau eta eranskinak Nafarroako Aldizkari Ofizialean argitaratzea.

4. Ebazpen hau eta eranskinak igortzea Hezkuntzako Informazio Sistemen Zerbitzuari, Lanbide Heziketaren Plangintza eta Integraziorako Zerbitzuari, Hezkuntzako Ikuskapen Zerbitzuari, Akreditazio Profesionalen Atalari, Etengabeko Lanbide Prestakuntzaren eta Enpresen Atalari eta inplikatutako erakunde eta ikastetxeei, dagozkion ondorioak izateko.

5. Ebazpen honen eta eranskinen aurka gora jotzeko errekurtsoa jar daiteke, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

Iruñean, 2026ko abuztuaren 7an.–Lanbide Heziketako Plangintza eta Integraziorako Zerbitzuko zuzendaria, Sonia García Cifuentes. (Hezkuntzako kontseilariaren martxoaren 11ko 16/2026 Foru Aginduan ezarritakoaren arabera, haren bidez izendatzen baitira Hezkuntza Departamentuko zuzendari nagusien eta idazkari tekniko nagusiaren ordez aldi baterako arituko direnak).

1. ERANSKINA.–NAFARROAN B ETA C GRADUEN (konpetentzia ziurtagiriak eta lanbide ziurtagiriak) ESKAINTZAN ONARTZEKO PROZESURAKO JARRAIBIDEAK

1. Oro har, interesdunek gutxienez hilabeteko epea izanen dute eskainitako prestakuntza ekintzan onartuak izateko inskripzio-eskaera egin ahal izateko, ikasturtea hasten den egunetik zenbatzen hasita. Izena emateko epe hori ikasturtea hasi baino hamar egun lehenagora arte egonen da irekita.

2. Apirilaren 11ko 40/2024 Foru Agindua aplikatuz, sartzeko baldintzak betetzen dituzten eskaeren kopurua prestakuntza ekintza bakoitzerako eskainitako plazen kopurua (15) baino handiagoa denean, prestakuntza ematen duen ikastetxeak edo erakundeak hautaketa bat eginen du. Hautaketa hori irizpide hauen arabera erabakiko da:

a) Hartzaileen bi talde zehaztuko dira:

i. Landunak.

ii. Langabeak.

Prestakuntza ekintza lehentasunez hartzaile talde horietako bati zuzenduta dagoenean, plazen %100 talde horretako pertsonentzat erreserbatuko dira. 15 laguneko taldea osatzen ez bada, lehentasunezkoa ez den taldeko pertsonak sartzen ahalko dira prestakuntza ekintzara, baina osotara ez dira talde osoaren %30 baino gehiago izaten ahalko.

b) Sartzeko hiru azpitalde ezartzen dira, apirilaren 11ko 40/2024 Foru Aginduaren I. eranskinean adierazitako irizpideen arabera:

i. Lehentasunezko irizpideren bat betetzen duten pertsonak.

ii. Lehentasunezko irizpideren bat betetzen ez duten pertsonak.

iii. Lehentasun txikieneko irizpide gisa zehaztutako irizpidea betetzen duten pertsonak.

c) Talde horietako bakoitzaren lehentasun ordena ebazpen honen hurrengo puntuan adierazitako irizpide osagarrien eta dagokion puntuazioaren arabera eginen da.

d) Berdinketa gertatzen bada, hura hausteko, irizpide hauek hartuko dira kontuan:

i. Eskainitako ziurtagiriari begira, egiaztatutako modulu kopuru handiena izatea edo eskainitako modulua barne hartzea.

ii. Aurreko seihilekoan prestakuntza ekintzarik egin ez duten pertsonak.

iii. Berdinketak jarraitzen badu, Hezkuntza Departamentuak horretarako egindako zozketaren letra erabiliko da berdinketa hausteko. Eskatzaileen lehen abizenari aplikatuko zaio, eta prestakuntza ekintza hasten den ikasturteari dagokion zozketa hartuko da kontuan.

e) Prestakuntza ekintza bakoitzeko taldeetan, %33ko edo gehiagoko desgaitasun aitortua dutenentzako plaza erreserba eginen da (plaza bat), bai eta generoaren esparruan neurriz beherako ordezkaritza dutenentzako plaza erreserba ere (plaza bat). Irizpide hori Hezkuntza Departamentuak zehaztuko du, aldi bati dagokion eskaintzan izena emandako pertsonen generoa aztertu ondoren. Genero baten ehunekoa %70etik gorakoa bada, besteak ordezkaritza txikiagoa duela ulertuko da. Hezkuntza Departamentuaren webguneak irizpide hori zein lanbide arlotan eta zein generotan aplikatuko den jasotzen du.

f) Erreserbatutako plazak hartzeko irizpideak betetzen dituen pertsonarik ez badago, plaza horiek gainerako plazei gehituko zaizkie.

g) Ziurtagiri baten modulu guztiak gaindituta dituzten baina enpresako prestakuntza egin ez duten pertsonak (LBP):

Onarpen irizpideak aplikatu ondoren, C graduko modulu guztiak gaindituta dituen pertsona bat onartzen bada, ez da zenbatuko talde bakoitzeko 15 pertsonako kupoaren ondorioetarako, ezta prestakuntza burutzeagatik dirulaguntza jasotzeko ere. Hala ere, enpresako prestakuntza ordaintzeko kontuan hartuko da (LBP).

Talde bakoitzean gehienez bi pertsona egon daitezke egoera horretan onartuta.

2.1. Irizpideak eta haztapena:

2.2. Prozedura:

Entitateek izena eman duten pertsonen artxibo bat deskargatzen ahalko dute Nafar Lansare-Nafarroako Enplegu Zerbitzuaren IRIS aplikazio informatikotik.

Hezkuntza Departamentuak kanpoko aplikazio bat emanen die entitateei, inskribatutako pertsonen zerrenda automatikoki barematu dezaten. Barematu ondoren, ordenatu eginen da, bi irizpideren arabera:

1. Talde hartzailearen arabera (lehentasunez langabeei eta landunei zuzendutako prestakuntza).

2. Puntuazio handienetik txikienera.

Taldea eratzeko, ordena honi jarraituko zaio:

1. Desgaitasuna duten pertsonak, onartuen zerrenda ordenatuko lehen hamabost pertsonen artean ez daudenak.

2. Ordezkaritza neurriz beherakoa duen generoaren araberako plaza erreserbaren lanbide arloaren kasuan (IV. eranskina), ordezkaritza neurriz beherakoa duen generoko lehen pertsona, lehen hamabost pertsonen artean ez dagoena.

3. Lehentasunezko talde hartzaileko gainerako pertsonak, puntuazio handienetik txikienera.

4. Oraindik plazaren bat hutsik balego, lehentasunik gabeko talde hartzaileko pertsonak, puntuazio handienetik txikienera, harik eta hamabosteko taldea osatu arte.

Prestakuntza zentroak edo erakunde baimendu batek zerrendako lehen hamabost pertsonek emandako informazioa baliozkotuko du, egiaztatzeko betetzen dituztela adierazitako baldintzak eta prestakuntza egiteko interesa dutela. Bestela, zerrendako pertsonen baldintzak egiaztatzen jarraituko da, onarpen irizpideek ezarritako ordenan, 15 pertsonako taldea osatu arte.

Prestakuntza ekintzaren talde titularreko pertsonen kopurua 20 pertsonara handitzen ahalko da, baldin eta ikastetxeak edo erakunde antolatzaileak egokitzat jotzen badu.

2.3. Prestakuntza ekintza lanbide ziurtagiri bat bada (C gradua) eta prestakuntza ekintzan bajaren bat gertatzen bada, plaza hutsak hasieran egindako onarpen zerrenda erabiliz beteko dira, salbu eta interesdunik ez badago edo zerrenda hutsik badago. Horrelakorik gertatuz gero, ikasturtean onartzeko epea berriz irekitzen ahalko da, erakundeak ezarritakoaren arabera, eta eskatzaileen baremazioa eginen da, irizpide berberen arabera onartzeko.

Prestakuntza ekintza konpetentzia ziurtagiri bat bada (B gradua), B gradu bakoitzerako izen ematea eta onarpena eginen dira. Kasu horietan, ziurtagiri baten garapena bat badator hurrengo graduaren inskripzio eta onarpen epearekin, egiten ari den ziurtagiria ez da kontuan hartzen ahalko eskatzailearen baremazioan.

2.4. Hautaketa irizpideak aplikatu ondoren, programatutako prestakuntza moduluren bat jadanik egiaztatua duten pertsonak badaude onartutakoen artean, pertsona horiek ez dute akreditatuta dituzten moduluetara bertaratu beharrik, eta prestakuntza entitateek inguruabar horren berri eman beharko diote Hezkuntza Departamentuko Hezkuntzako eta Lanbide Heziketako Zuzendaritza Nagusiari. Ikasle horiek prestakuntza ekintzaren talde titularreko kide izaten jarraituko dute, ondorio guztietarako (titulazioa, matrikula, onarpena, etab.).

2.5. Baliabideak optimizatze aldera, eta jarraibide hauen 2.4. puntuan deskribatutako egoera prestakuntza ekintza batzuetan maiz gertatzen ahal dela aurreikusita, jarraibide hauek ezartzen dira, bai pertsona gehiago onartzeari dagokionez, bai prestakuntza ekintzak egiten eta burutzen dituzten ikasleei dagokienez:

2.5.1. Onarpena birdoitzea:

a) Talde titularreko ikasleren batek modulua gaindituta badu, plaza hutsak onarpen zerrendako hurrengo pertsonekin beteko dira, eskaera baliozkotu ondoren.

b) Prestakuntza ekintza modulu batekoa bada (B gradua), onarpena modulu bakoitzerako birdoituko da (B gradua). Prestakuntza ekintza lanbide ziurtagiri osokoa bada (C gradua), pertsona horiek plaza hutseko modulu bakoitzean (B gradua) ere sartuko dira. Jakinaraziko zaie eskaintzen zaien moduluan soilik sartuko direla, prestakuntza ekintza modularra (B graduak) edo osoa (C graduak) izan.

c) Prestakuntza ekintzaren talde titularrari gehienez ere bost pertsona gehitzen ahalko zaizkio; hau da, prestakuntza 20 pertsonak akreditatzen ahalko dute prestakuntza zentroak edo erakundeak ratioa 15 pertsonatan ezarriz gero, edo 25ek, 20 pertsonatan ezarriz gero.

d) Prestakuntza zentroak edo erakundeak alderdi hori kontuan hartuko du ikasleen enpresako prestakuntza (LBP) planifikatzeko eta kudeatzeko.

e) Hautaketa egin ondoren, prestakuntza entitateak haren emaitzen berri emanen dio Hezkuntza Departamentuari.

f) Modulua burutu ondoren, eskaintza ziurtagiri osokoa bada (C gradua), hurrengo moduluan onartzeko onartuen hasierako titular zerrenda hartuko da oinarri berriro.

2.6. Ikasketak egiten eta horiek burutzen dituzten ikasle bakoitzagatik jasoko den ordainketaren kalkulua (zentro pribatu baimenduei eta erakunde pribatuei finantzatutako ekintzetarako soilik).

a) Prestakuntza erakundeei egiten zaien ordainketak prestakuntza ekintzak burutzen dituzten ikasleak hartzen ditu kontuan, prestakuntza ekintza horiek finantzatzeko dirulaguntzen deialdi bakoitzean adierazten den bezala.

b) Ekintza horien bideragarritasun ekonomikoari laguntzeko, honela zenbatuko dira prestakuntza ekintzan parte hartu duten pertsonak:

i. Prestakuntza burutzen duen pertsona bakoitzak 1eko koefizientea jasoko du.

ii. 2.4 atalean deskribatutako egoera gertatzen bada (ziurtagiri oso baterako onartu diren baina modulu bat edo batzuk gaindituta dituzten, eta, beraz, prestakuntza horietara joaten ez diren pertsonak) eta erakundeak plaza hori beste pertsona batekin betetzen badu, pertsona horrek 1eko koefizientea jasoko du.

iii. Aldiz, plaza hori eskaintzen ez bada, edo bete ezin izan bada, 0,65eko koefizientea jasoko du plaza huts horrek, ordaindu beharreko dirulaguntzaren zenbatekoa zehazteko.

iv. Aurreko bi kasuetako edozeinetan, dirulaguntza jasotzeko gehieneko ratioa 15 pertsonakoa izanen da.

v. Zenbaketa horretatik kanpo geratzen dira ziurtagiriko modulu guztiak gaindituta izanda ratioaren gainetik onartutako ikasleak, (gehienez ere bi), enpresako prestakuntza egin zain daudenak (LBP).

II. ERANSKINA.–LANEKO ARRISKUEN PREBENTZIOARI BURUZKO PRESTAKUNTZA PROGRAMATZEA ETA GARATZEA, IKASLEAK ENPRESAKO PRESTAKUNTZA EGITEN HASI AURRETIK (LBP), KONPETENTZIA ZIURTAGIRIEN (B GRADUAK) ETA LANBIDE ZIURTAGIRIEN (C GRADUAK) ESPARRUAN, NAFARROAN

1. Lanbide Heziketako Sistemaren antolamendua garatzen duen uztailaren 18ko 659/2023 Errege Dekretuaren 158. artikuluan eta lehenengo xedapen iragankorraren 4. puntuan ezarritakoaren arabera, ikasleak enpresako edo pareko erakundeko prestakuntzara sartu aurretik, Lanbide Heziketako sistemako ikastetxeek emanen duten laneko arriskuen prebentzioko prestakuntza gainditu beharko dute.

2. Horregatik, enpresan edo erakunde parekatuan egonaldia hasi aurretik, bermatu beharko da ikasleek laneko arriskuen prebentzioko eginkizun oinarrizkoak betetzeko konpetentziak lortzeko prestakuntza egin dutela. Konpetentzia horiek ezarrita daude 39/1997 Errege Dekretuaren 35. artikuluan (39/1997 Errege Dekretua, urtarrilaren 17koa, Prebentzio zerbitzuen Erregelamendua onesten duena), deusetan ukatu gabe uztailaren 18ko 659/2023 Errege Dekretuaren 153.2.d) artikuluan ezarritakoa. Horretarako, baldin eta lanbide ziurtagiriren batek ez badu laneko arriskuei buruzko lanbide modulu bat edo prestakuntza multzo bat antolamenduan, gainontzeko lanbide moduluetako edozeinetan aipatu Errege Dekretuaren V. eranskineko 2. ikaskuntzaren emaitza sartu beharko da, Lanbide Heziketako ikastetxeak erabakita.

3. Irakasleak: etengabeko prestakuntzan laneko arriskuen prebentzioari buruzko prestakuntza (zuzeneko prestakuntza aurrez aurreko modalitatean edo tutoretza modalitate birtualean) emateko gaitutako irakasleak izanen dira Lanerako Prestakuntza eta Orientabideak (LPO) - Enplegagarritasunerako Ibilbidea (EI) espezialitatea emateko baimena duten irakasleak.

4. Ikastaro modalitatea: dirulaguntzak behar bezala kudeatzeko eta egungo araudira egokitzeko, LAPeko prestakuntza kudeatzeko eta ordaintzeko bi modalitate ezartzen dira aldi baterako, zentroen titulartasunaren arabera:

a. Lanbide Heziketako sistemako ikastetxe publikoak:

i. Prestakuntza modalitate birtualean eginen da, moodle plataformaren bidez (https://ikasaula.educacion.navarra.es/). Irakasleek matrikulatutako ikasleen tutore lanak eginen dituzte: prestakuntza gainbegiratuko dute, zalantzak argituko dituzte eta prestakuntza behar bezala garatzeko jarduerak eta/edo probak zuzenduko dituzte. Prestakuntza ekintzaren koordinatzailea izanen da prestakuntza horren arduraduna (tutorea).

Lanbide Heziketaren Plangintza eta Integraziorako Zerbitzuak zehaztuko ditu orduak eta ordainsariaren zenbatekoa.

b. Lanbide Heziketaren sistemako diruz lagundutako prestakuntza ematen duten zentro eta erakunde pribatuak.

i. 1. mailako prestakuntzetarako, LAPeko prestakuntza aurrez aurre emanen da, eta 30 ordu iraunen du. Irakasleak moodle plataformako online baliabidea erabiltzen ahalko du, baina prestakuntza ez da inola ere birtuala izanen. Likidazioaren ondorioetarako, prestakuntza hori behin bakarrik kontabilizatuko da talde eta prestakuntza ekintza bakoitzeko.

ii. 2. eta 3. mailako prestakuntzetarako, prestakuntza modalitate birtualean emanen da, moodle plataformaren bidez (https://ikasaula.educacion.navarra.es/). Prestakuntza horrek 15 orduko aitorpena izanen du talde eta prestakuntza ekintza bakoitzeko, dirulaguntzaren likidazioaren ondorioetarako. Taldeak gutxienez bi egunetan aurrez aurreko bost ordu izanen ditu, ikastaroaren jarraipena egiteko eta ikasleen tutoretza egiteko.

Iragarkiaren kodea: F2611090