160. ALDIZKARIA - 2026ko abuztuaren 14a

3. ESTATUKO ADMINISTRAZIOA

TRANTSIZIO EKOLOGIKORAKO ETA ERRONKA DEMOGRAFIKORAKO MINISTERIOA

Ebazpena, Energia Politikako eta Meatzeetako Zuzendaritza Nagusiak emana, zeinaren bidez onartzen baita Renantis España 2 SLk (Falck Renewables Power 2 SL zena) atzera egitea aurretiazko administrazio-baimena eta eraikitzeko administrazio-baimena emateko eta onura publikoa zehazki deklaratzeko eskaeran, 50,10 MW-eko potentzia instalatuko "Campos de Zuloaga" instalazio fotovoltaikoaren eta haren ebakuazio-azpiegituren proiekturako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian. Horrekin batera, pfot-726 espedientea artxibatzea erabakitzen da. SEE/DGPEM/atzera egiteari buruzko ebazpena pfot-726

Sektore Elektrikoari buruzko abenduaren 26ko 24/2013 Legearen 53. artikuluan eta Energia elektrikoa garraiatu, banatu, merkaturatu eta haren horniketa egiteko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuan ezarritakoarekin bat, honako hauek kontuan hartuz:

I.–Aurrekariak.

Lehenengoa.–Proiekturako aurretiazko administrazio-baimena.

Falck Renewables Power 2 SLk (aurrerantzean, sustatzailea), 2021eko uztailaren 16an, aurretiazko administrazio-baimena eskatu zuen "Campos de Zuloaga" instalazio fotovoltaikorako (122,62 MW-ekoa, modulu fotovoltaikoetan eta 72,177 MW-ekoa, inbertsoreen potentzian) eta haren ebakuazio-azpiegituretarako, Nafarroako probintzian, Zizurko, Oltza Zendeako eta Orkoiengo udal-mugarteetan.

Espedienteari hasiera eman zitzaion Gobernuak Nafarroan duen Ordezkaritzako Industria eta Energia Arloan, eta izapidetu zen bat etorriz Energia elektrikoa garraiatu, banatu, merkaturatu eta haren horniketa egiteko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuan eta Ingurumen Ebaluazioari buruzko abenduaren 9ko 21/2013 Legean xedatutakoarekin, eta kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen ahal dituen heinean.

2022ko urtarrilaren 17an, geroago osatu bazen ere, izapidetze horren txostena eta espedientea jaso ziren, Gobernuak Nafarroan duen Ordezkaritzako Industria eta Energia Arloak eginak, eta, 2022ko otsailaren 14an, Ingurumen Ebaluaziorako Zuzendariordetza Nagusiari bidali zitzaizkion, ingurumen-inpaktuaren ebaluazio arruntaren prozedurarekin jarraitzeko, abenduaren 9ko 21/2013 Legearen 39. artikuluan xedatutakoari jarraikiz.

Ingurumen Kalitatearen eta Ebaluazioaren Zuzendaritza Nagusiak, 2023ko abuztuaren 11n, ebazpen bat eman zuen, zeinaren bidez aldeko ingurumen-inpaktuaren adierazpena ematen baita 62 MW-eko potentzia izendatuko "Campos de Zuloaga" eguzki-instalazio fotovoltaikoaren eta haren ebakuazio-azpiegituren proiektuaz (aurrerantzean, IIA). Ebazpena 2023ko 203. Estatuko Aldizkari Ofizialean eman zen argitara, abuztuaren 25ekoan. Ebazpena esteka honetan kontsultatu daiteke:

https://www.boe.es/diario_boe/txt.php?id=BOE-A-2023-18655

2023ko azaroaren 10ean, Energia Politikako eta Meatzeetako Zuzendaritza Nagusiaren ebazpen baten bidez, aurretiazko administrazio-baimena eman zitzaion Falck Renewables Power 2 SLri 72,177 MW-eko potentzia instalatuko "Campos de Zuloaga" instalazio fotovoltaikorako eta haren ebakuazioazpiegituretarako, Zizurko, Oltza Zendeako eta Orkoiengo udal-mugarteetan, Nafarroako probintzian (aurrerantzean, aurretiazko administrazio-baimenaren ebazpena); 2023ko 280. Estatuko Aldizkari Ofizialean argitaratu zen, azaroaren 23koan. Ebazpena esteka honetan kontsultatu daiteke:

https://www.boe.es/diario_boe/txt.php?id=BOE-A-2023-23857

Bigarrena.–Proiektua eraikitzeko administrazio-baimena.

2024ko martxoaren 27an, sustatzaileak aurretiazko administrazio-baimena eskatu zuen proiektu horretan egindako aldaketetarako, eta eraikitzeko administrazio-baimena, berriz, 50,10 MW-eko potentzia instalatuko "Campos de Zuloaga" instalazio fotovoltaikorako eta haren ebakuazio-azpiegituretarako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian.

Espedienteari hasiera eman zitzaion Gobernuak Nafarroan duen Ordezkaritzako Industria eta Energia Arloan, eta izapidetu zen bat etorriz abenduaren 1eko 1955/2000 Errege Dekretuaren 127. eta 131. artikuluetan ezarritakoarekin; kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen ahal dituen zatian.

Gobernuak Nafarroan duen Ordezkaritzako Industria eta Energia Arloak txostena eman zuen 2025eko urtarrilaren 10ean.

2025eko martxoaren 5ean, Energia Politikako eta Meatzeetako Zuzendaritza Nagusiaren ebazpen bidez, Renantis España 2 SLri (Falck Renewables Power 2 SL zena) aldaketetarako aurretiazko administrazio-baimena eman zitzaion eta eraikitzeko administrazio-baimena, berriz, 50,10 MW-eko potentzia instalatuko "Campos de Zuloaga" instalazio fotovoltaikorako eta haren ebakuazio-azpiegituretarako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian. Ebazpen hori 2025eko 67. Estatuko Aldizkari Ofizialean argitaratu zen, martxoaren 19koan. Ebazpena esteka honetan kontsultatu daiteke:

https://www.boe.es/diario_boe/txt.php?lang=eu&id=BOE-A-2025-5505

Hirugarrena.–Onura publikoa zehazki deklaratzeko eskaera.

2025eko maiatzaren 19an, sustatzaileak eskatu zuen hasiera ematea 50,10 MW-eko potentzia instalatuko "Campos de Zuloaga" instalazio fotovoltaikoaren eta haren ebakuazio-azpiegituren proiektua, Zizurko, Oltza Zendeako eta Orkoiengo udal-mugarteetan, Nafarroako probintzian, onura publikokoa dela zehazki deklaratzeko izapideari.

Espedienteari hasiera eman zitzaion Gobernuak Nafarroan duen Ordezkaritzako Industria eta Energia Arloan, eta izapidetu zen bat etorriz abenduaren 1eko 1955/2000 Errege Dekretuaren 146. artikuluan xedatutakoarekin, eta kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen ahal dituen zatian.

Gobernuak Nafarroan duen Ordezkaritzako Industria eta Energia Arloak txostena eman zuen 2026ko otsailaren 25ean.

Laugarrena.–Sustatzaileak atzera egitea.

2026ko martxoaren 30ean, sustatzaileak eskaera aurkeztu zuen Pfot-726 administrazio espedientea artxibatzeko, nagusiki argudio hauek alegatuta, baimendutako proiektua eraikitzea ezinezko bihurtzen dutelakoan:

–2025eko martxoaren 30ean, jakinarazi zitzaion Lurralde Antolamenduko zuzendari nagusiaren martxoaren 27ko 143E/2025 Ebazpena, zeinaren bidez ukatzen baitzaio lurzoru urbanizaezineko jardueren eta erabileren baimena "Campos de Zuloaga" eguzki-instalazio fotovoltaikorako, Zizurko udal-mugartean. Proiektuaren ebakuazio-azpiegiturak Zizurko, Oltza zendeako eta Orkoiengo udal-mugarteetan barna doaz.

–2025eko apirilaren 29an, gora jotzeko errekurtsoa aurkeztu zen Lurralde Antolamenduko zuzendari nagusiaren martxoaren 27ko 143E/2025 Ebazpenaren kontra.

–2025eko abenduaren 9an, jakinarazi zitzaion Lurralde Kohesiorako kontseilariaren abenduaren 5eko 169E/2025 Foru Agindua, zeinaren bidez ezesten baita Renantis España 2 SLUk aurkeztutako gora jotzeko errekurtsoa, Lurralde Antolamenduko zuzendari nagusiaren martxoaren 27ko 143E/2025 Ebazpenaren aurkakoa (ebazpen horren bidez, baimena ukatzen zaio "Campos de Zuloaga" eguzki-instalazio fotovoltaikorako, Zizur zendeako udal-mugartean; proiektuaren ebakuazio-azpiegiturak Zizurko, Oltza zendeako eta Orkoiengo udal-mugarteetan barna doaz).

–Aipatutako 143E/2025 eta 169E/2025 ebazpenek eragozten dute proiektua garatu eta eraikitzea, hura ezartzeko beharrezkoa baita lurzoru urbanizaezineko jardueren eta erabileren baimena lortzea, eta, horrenbestez, 1183/2020 Errege Dekretuaren 23.6 artikuluan aipatzen den kasua betetzen da, alegia, administrazio baten ebazpena dagoela, proiektua eraikitzea eragozten duena.

Beraz, sustatzaileak eskatzen du espedientea artxibatzea eta, Energia elektrikoa garraiatzeko eta banatzeko sareetarako sarbideari eta konexioari buruzko abenduaren 29ko 1183/2020 Errege Dekretuko 23.6 artikuluan jasotakoaz baliatuz, berme ekonomikoa deuseztatzea eta itzultzea (gordailu zenbakia: 2020-00373-O-0018680; abal zenbakia: 10001182725).

Bosgarrena.–Garraio sarearekiko konexioa eta sarbidea izateko baimenak.

Proiektuak badu sarbiderako baimena, Red Eléctrica de España SAUk (REE) 2021eko otsailaren 5ean emandakoa bere jabetzako 220 kV-eko ORKOIEN azpiestazioan.

Seigarrena.–Entzunaldiaren izapidea.

2026ko apirilaren 15ean entzunaldiaren izapidea jakinarazi zen proiekturako aurretiazko administrazio-baimenaren, eraikitzeko administrazio-baimenaren eta onura publikoaren deklarazioaren eskaera ezesten duen ebazpen-proposamenari buruz, SGIISE/PFot-726 espedientean.

Sustatzaileari ebazpen-proposamena jakinarazi eta biharamunetik hasitako hamabost egun balioduneko epea iraganik, zuzendaritza nagusi honetan ez da haren erantzunik jaso.

Jasotako dokumentazioa aztertu da eta aintzat hartu dira honako hauek:

I.–OINARRI JURIDIKOAK

Lehena.–Aplikatu beharreko arauak.

Kontuan hartu da abenduaren 26ko 24/2013 Legean, abenduaren 1eko 1955/2000 Errege Dekretuan, abenduaren 9ko 21/2013 Legean, urriaren 1eko 39/2015 Legean eta Energia elektrikoa garraiatzeko eta banatzeko sareetarako sarbideari eta konexioari buruzko abenduaren 29ko 1183/2020 Errege Dekretuan ezarritakoa.

Bigarrena.–Energia elektrikoa sortzeko instalazioak baimentzea.

Sektore Elektrikoari buruzko abenduaren 26ko 24/2013 Legeak honako hau xedatzen du 21. artikuluan, energia elektrikoa ekoizteko jarduerei buruzkoan: "Energia elektrikoa ekoizteko instalazioak martxan jartzeko, aldatzeko, aldi batez ixteko, eskualdatzeko eta behin betiko ixteko, 53. artikuluan eta hura garatzeko araudian ezarritako baimen-araubidea bete beharko da aldez aurretik".

53. artikuluak arautzen du nola jarri behar diren martxan energia elektrikoa garraiatzeko, banatzeko eta ekoizteko instalazio berriak, bai eta zuzeneko lineak ere. Ezartzen du, honako administrazio-baimen hauek lortu behar direla horretarako: aurretiazko administrazio-baimena, eraikitzeko administrazio-baimena eta ustiatzeko baimena.

Bat etorrita abenduaren 26ko 24/2013 Legearen 3.13 artikuluarekin, Estatuko Administrazio Orokorrari dagozkio, lege horretan ezarritako baldintzetan, honako eskumen hauek:

"Honako instalazio elektriko hauek baimentzea:

a) Energia elektrikoa ekoizteko penintsulako instalazioak –ebakuazio-azpiegiturak ere barnean hartuta–, 50 MW elektrikotik gorako potentzia elektrikoa instalatuta dutenak; penintsulako lehen mailako garraio-instalazioak eta 380 kV-eko edo gehiagoko tentsio-harguneak".

b) Autonomia-erkidego baten lurralde-eremua gainditzen duten ekoizpen-instalazioak, barne direla haien ebakuazio-azpiegiturak, bigarren mailako garraioa, banaketa, harguneak, zuzeneko lineak eta 3.000 kW-etik gorako potentzia duten ibilgailu elektrikoak kargatzeko estazioetako azpiegitura elektrikoak, bai eta Estatuaren eskumeneko sorkuntza-instalazioei konektatutako linea zuzenak ere".

Aurretiazko administrazio-baimenari dagokionez, abenduaren 26ko 24/2013 Legearen 53. artikuluan xedatzen da ezen instalazioaren aurreproiektuarekin izapidetuko dela, dokumentu tekniko gisa, eta, hala badagokio, ingurumen-inpaktuaren ebaluazioarekin batera, bat etorriz abenduaren 9ko 21/2013 Legean xedatutakoarekin, eta baimendutako enpresari eskubidea emanen diola instalazio jakin bat baldintza zehatz batzuetan egiteko. Elektrizitatea sortzeko instalazioen administrazio-baimena ezin izanen da eman baldin eta titularrak ez baditu aldez aurretik lortu kasuan kasuko garraio edo banaketa sareetarako sarbide eta konexio baimenak. Halaber, baimen eskaerak bete beharko ditu urriaren 1eko 39/2015 Legean oro har jasotako administrazio baldintza orokorrak, baita aplikatzekoa den araudi sektorialean jasotako baldintza orokor teknikoak ere.

Bestalde, abenduaren 1eko 1955/2000 Errege Dekretuak, 121., 122., 123. eta 124. artikuluetan, arautzen ditu, oro har, administrazio-baimenaren eskaerarekin lotutako zenbait kontu. Zehazki, abenduaren 1eko 1955/2000 Errege Dekretuaren 124. artikuluak ezartzen du ezen energia elektrikoa ekoitzi, garraiatu eta banatzeko instalazioen proiektuei ingurumen-inpaktuaren ebaluazioa eginen zaiela, arlo horretan aplikatu beharreko legeriak hala exijitzen duenean.

Abenduaren 9ko 21/2013 Legearen 42. artikuluak ezartzen duenez, organo substantibo honek behar bezala hartu beharko du kontuan, proiektua baimentzeko prozeduran, egindako ingurumen-inpaktuaren ebaluazioa.

Era berean, eraikitzeko administrazio-baimenak instalazioa eraikitzeko aukera ematen dio titularrari, eskatzen diren baldintza teknikoak betez. Baimen hori eskatzeko, titularrak exekuzio-proiektu bat aurkeztuko du, erantzukizunpeko adierazpena erantsita, aplikatzekoa zaion araudia betetzen dela frogatzeko. Aurretiazko administrazio-baimena eta eraikitzeko administrazio-baimena bata bestearen ondotik, aldi berean edo batera izapidetu eta ebazten ahalko dira.

Aurrekoa zehaztu egin behar da, Auzitegi Gorenaren zenbait epaitan jasotakoaren arabera, bai eta abenduaren 26ko 24/2013 Legean eta abenduaren 1eko 1955/2000 Errege Dekretuan aurreikusitako baimen-araubidearen ondorioz ere, eta, besteak beste, martxoaren 8ko 1046/2010 Epaian adierazten denez: "Argi dago ezin izanen litzatekeela exekuzio-proiektua onetsi (hau da, instalazioaren proiektu zehatza, titularrari hura eraikitzeko edo ezartzeko aukera ematen diona, 115.b artikuluaren arabera) administrazio-baimena eman aurretik, baimen hori instalazioaren aurreproiektu bati buruzkoa baita eta ingurumen-izapideak benetan betetzen dituela egiaztatzen baitu".

Onura publikoa zehazki deklaratzeko eskaerari dagokionez, abenduaren 1eko 1955/2000 Errege Dekretuaren 143.2 artikuluak ezartzen du ezen eskaera hori administrazio-baimenaren eskaerarekin eta/edo exekuzio-proiektua onesteko eskaerarekin batera egin daitekeela; hala ere, horri dagokionez, Auzitegi Gorenak ezarritako jurisprudentziak, besteak beste otsailaren 25eko 932/2010 Epaian eta martxoaren 22ko 1591/2010 Epaian, honako hau zehazten du: "aintzat hartuta onura publikoa deklaratzeak bide ematen diola, beste izapiderik gabe, ukitutako ondasun zehatzak desjabetzeko prozedurari (zehazki, Nahitaezko Desjabetzeari buruzko Legearen 15. artikuluan jasotzen den berariazko izapiderik gabe), ezin da onetsi ukitutako ondasun horiek guztiz eta behin betiko zehaztuta egon gabe, eta hori ez da gertatzen exekuzio-proiektua onetsi arte".

Hirugarrena.–Atzera egiteko eskubidea.

Urriaren 1eko 39/2015 Legearen 94.1 artikuluak xedatzen du interesdunak atzera egiten ahalko duela bere eskaeran.

Aplikatzekoa da arau horren beraren 4. apartatua, zeinaren arabera Administrazioak bere horretan onartuko baitu atzera egitea edo uko egitea, eta amaitutzat emanen baitu prozedura, salbu eta, prozeduran hirugarren interesdun batzuk pertsonatuta egonik, haiek eskatzen badute prozedurak jarraitzeko, atzera egitearen edo uko egitearen berri eman ondorengo hamar eguneko epean eskatu ere.

Urriaren 1eko 39/2015 Legearen 84.1 artikuluak, berriz, honako hau dio: "Prozedura amaitzeko arrazoiak hauek dira: ebaztea, atzera egitea, eskaeraren oinarri den eskubideari uko egitea –ordenamendu juridikoak uko hori debekatzen ez badu– eta iraungitzat deklaratzea".

Eta urriaren 1eko 39/2015 Legearen 21.1 artikuluak gehitzen du ezen Administrazioa behartuta dagoela berariazko ebazpena ematera eta jakinaraztera prozedura guztietan, hasiera-modua edozein dela ere. Preskripzio kasuetan, eskubideari uko egiten bazaio, prozedura iraungitzen bada edo eskaeran atzera egiten bada eta, halaber, prozeduraren xedea gerora desagertu bada, ebazpenean adierazi beharko da kasu bakoitzean zer inguruabar dagoen eta zein diren gertatutako egitateak eta aplikatu beharreko arauak".

Laugarrena.–Elektrizitatea garraiatzeko eta banatzeko sareetarako sarbidea eta konexioa lortzeko administrazio-pausuak betetzea.

Ekainaren 23ko 23/2020 Errege Lege-dekretuak, zeinaren bidez onesten baitira energiaren arloko eta ekonomia suspertzeko beste eremu batzuetako zenbait neurri, 1. artikuluaren 1. apartatuan xedatzen du ezen energia elektrikoa sortzeko instalazioetarako sarbide-baimenen titularrek, baldin eta baimen horiek eskuratu badituzte 2020 ekainaren 25etik aurrera, aldeko ingurumen-inpaktuaren adierazpena lortu beharko dutela 31 hilabeteko epean, aurretiazko administrazio-baimena 34 hilabeteko epean, eta eraikitzeko administrazio-baimena 37 hilabeteko epean (8/2023 Errege Lege-dekretuak 49 hilabetera luzatu du), baimenak lortu zituztenetik.

Goian adierazitakoa abenduaren 26ko 24/2013 Legearen 53. artikuluarekin lotu behar da; izan ere, artikulu horren arabera ezin da sorkuntzarako instalazioetako administrazio-baimenik eman titularrak ez baditu aldez aurretik lortu banaketa- edo garraio-sareetarako sarbide- eta konexio-baimenak.

Jarraian, honako hau gehitzen da ekainaren 23ko 23/2020 Errege Lege-dekretuaren 1. artikuluaren 2. apartatuan:

"Administrazio-pausu horiek behar den moduan eta epean bete direla frogatzen ez bazaio sarearen kudeatzaileari, besterik gabe iraungiko dira emandako sarbide-baimenak, bai eta, hala badagokio, sarbide- eta konexio-baimenak ere, eta administrazio-baimenak emateko eskumena duen organoak berehala betearaziko ditu berme ekonomikoak, garraio- eta banaketa-sareetarako sarbide-eskaera izapidetzeko aurkeztutakoak. Hala ere, sustatzaileari egotzi ezin zaizkion arrazoiengatik ingurumen inpaktuaren adierazpena aldekoa ez bada, berme horiek ez dira betearaziko".

Bosgarrena.–Garraio-sarerako sarbide- eta konexio-eskaerei aplikatu beharreko berme ekonomikoa.

Abenduaren 29ko 1183/2020 Errege Dekretuak, Energia elektrikoa garraiatzeko eta banatzeko sareetarako sarbideari eta konexioari buruzkoak, 23. artikuluan arautzen du zer berme ekonomiko behar diren elektrizitatea sortzeko instalazioen sarbide- eta konexio-prozedurak izapidetzeko. Zehazki, artikulu horren 1. apartatuan honako hau xedatu da: "Elektrizitatea sortzeko instalazioen kasuan, eskatzaileak, garraio-sarera edo, hala badagokio, banaketa-sarera sartzeko eta konektatzeko eskaera egin aurretik, aurkeztu beharko du, instalazioa baimentzeko eskumena duen organoaren aurrean, errege dekretu honek indarra hartu ondoren berme ekonomiko bat (40 euro, instalatutako kW bakoitzeko) jarri duela egiaztatzen duen frogagiria".

Era berean, 23. artikulu horren 6. apartatuak honako hau ezartzen du:

"Baldin sarbide- eta konexio-baimenak iraungitzen badira errege dekretu honen 26. artikuluan ezarritakoaren arabera, administrazio-baimenak emateko eskumena duen organoak berehala betearaziko ditu garraio- edo, kasua zein den, banaketa-sarera sartzeko eskaera izapidetzean aurkeztutako berme ekonomikoak.

Nolanahi ere, instalazioa baimentzeko eskumena duen organoak jarritako bermea betearazi behar izatetik salbuetsi ahal izanen du, baldin eta sarbide- eta konexio-baimenak iraungi badira administrazio publiko baten txosten edo ebazpen batek eraikuntza hori eragotzi duelako, eta hark hala eskatzen badu".

Aurkeztutako dokumentazioa ikusita, egindako izapideak kontuan hartuta, eta abenduaren 26ko 24/2013 Legearen 53. artikuluarekin bat etorrita, Energia Politikako eta Meatzeetako Zuzendaritza Nagusi honek, abenduaren 1eko 1955/2000 Errege Dekretuak esleitzen dizkion eskumenak baliatuz (errege dekretu horren bidez Energia elektrikoa garraiatu, banatu, merkaturatu eta haren horniketa egiteko jarduerak eta instalazioak baimentzeko prozedurak arautzen dira), honako hau

EBAZTEN DU:

Bakarra.–Onartzea Renantis España 2 SLk (Falck Renewables Power 2 SL zena) atzera egitea aurretiazko administrazio-baimena eta eraikitzeko administrazio-baimena emateko eta onura publikoa zehazki deklaratzeko eskaeran, 50,10 MW-eko potentzia instalatuko "Campos de Zuloaga" instalazio fotovoltaikoaren eta haren ebakuazio-azpiegituren proiekturako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian. Horrekin batera, pfot-726 espedientea artxibatzea erabakitzen da.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan eta Sektore Publikoaren Araubide Juridikoari buruzko urriaren 1eko 40/2015 Legearen 62.2.i) artikuluan xedatutakoarekin bat, ebazpen honek ez du administrazio bidea amaitzen, eta honen kontra gora jotzeko errekurtsoa aurkezten ahalko da Energiaren estatu-idazkariaren aurrean, Estatuko Aldizkari Ofizialean argitaratu eta biharamunetik hasita hilabeteko epean.

Epe hori iraganik errekurtsoa jarri gabe, ebazpena irmoa izanen da ondorio guzietarako. Hilabetekako epeak zenbatzeko, aintzat hartu beharko da urriaren 1eko 39/2015 Legearen 30. artikuluan xedatutakoa.

2026ko uztailaren 28an.–Zuzendari nagusia, Manuel García Hernández.

Iragarkiaren kodea: E2610473