157. ALDIZKARIA - 2026ko abuztuaren 11

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

113C/2026 EBAZPENA, uztailaren 11koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Mecanizados Alsasua SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Mecanizados Alsasua SL enpresak aurkeztutako hitzarmen kolektiboa (kode zenbakia: 31101002012015), erregistro honetan sartu baitzen 2026ko ekainaren 24an, 2026ko maiatzaren 20an enpresaren eta sindikatuen ordezkariek sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan ezarritakoarekin, eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, kontuan hartuta zer xedatzen den Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan,

EBAZTEN DUT:

Lehena.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Mecanizados Alsasua SL enpresak aurkeztutako hitzarmen kolektiboa (kode zenbakia: 31101002012015).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko uztailaren 11n.–Ekonomia Sozialeko eta Laneko zuzendari nagusia, Iñaki Mendióroz Casallo.

MECANIZADOS ALSASUA SL

1.–Langileen eremua eta lurralde eremua.

Hitzarmen kolektibo honek lantokia Altsasun duen "Mecanizados Alsasua SL" enpresako langile guztiengan izanen du eragina.

2.–Iraunaldia.

Hitzarmen honek hiru urteko indarraldia izanen du eta 2026ko urtarrilaren 1ean hartuko du indarra eta 2026ko abenduaren 31n azkenduko da.

Aurreraeragina: mugagabea.

Hitzarmenaren salaketa 2028ko urriaren 1etik aurrera.

3.–Lanaldia.

Lanorduen kopurua, gehienez ere, honako hau izanen da urtero, 2026, 2027 eta 2028an:

–Lanaldi zatitua.

2026. urtean, benetako lanorduak 1.649 izanen dira.

2027. urtean, benetako lanorduak 1.646 izanen dira.

2028. urtean, benetako lanorduak 1.642 izanen dira.

–Lanaldi jarraitua, bi txandatan edo gehiagotan egiten den lana kenduta.

2026. urtean, benetako lanorduak 1.634 izanen dira.

2027. urtean, benetako lanorduak 1.631 izanen dira.

2028. urtean, benetako lanorduak 1.627 izanen dira.

Lanaldi jarraitu horretan, gutxienez 10 minutuko atsedenaldi bat ezarriko da, baina ez da aurretik adierazitako benetako lanaldiaren zati izanen, eta beraz, ez da ordainduko.

–Bi txandatan edo gehiagotan egiten den lanaldia.

2026. urtean, benetako lanorduak 1.630 izanen dira, 10 minutuko atsedenaldia barne. Atsedenaldi hori benetako lan-denboratzat hartuko da eta, beraz, ordaindua izanen da.

2027. urtean, benetako lanorduak 1.627 izanen dira.

2028. urtean, benetako lanorduak 1.623 izanen dira.

4.–Benetako soldatak.

2026. urterako, egiazko soldatek Gipuzkoako 2025eko KPIaren igoera izanen dute (%2,6), gehi 0,70 = %3,3. Igoera finkagarria izanen da, eta %100 banatuko da ehunekotan.

2027. urterako, egiazko soldatek Gipuzkoako 2026ko KPIaren igoera izanen dute + 0,70. Igoera finkagarria izanen da, eta %100 banatuko da ehunekotan.

2028. urterako, egiazko soldatek Gipuzkoako 2027ko KPIaren igoera izanen dute + %0,70. Igoera hori finkagarria izanen da, eta honela banatuko da: KPIren %100 modu portzentualean eta %0,70 modu linealean.

5.–Familia laguntza.

Hitzarmenaren indarraldian 2008ko kopurua emanen zaie bere horretan, eta data horretan aitortua zuten langileek jasoko dute.

6.–Bizi asegurua.

Enpresak bizi asegururako poliza kolektibo bat izenpetuko du aseguru etxe batekin.

Hitzarmen hau sinatzen denetik eta indarrean dagoen bitartean aseguratutako kapitalak honako hauek izanen dira:

Heriotza naturala eta ezintasun absolutua: 25.000 euro.

Lan istripuak eragindako heriotza (lanekoa edo lanetik kanpokoa): 65.000 euro.

Trafiko istripu baten ondoriozko heriotza: 65.000 euro.

Ezintasun absolutua istripuagatik: 35.000 euro.

Ezintasun osoa: 23.000 euro.

Langile bat alta emanik badago Gizarte Segurantzan GH taldeko enpresa batean baino gehiagotan, enpresatako batean baizik ez du jasoko.

7.–Dietak, kilometrajeak eta beste.

A) Dietak eta kilometrajeak:

Langileek, enpresak aginduta, bidaiak edo lekualdaketak egin behar badituzte enpresa kokaturik dagoen herritik kanpora, eta horrek otorduak etxean* egitea galarazten badie, 2026an zenbateko hauek ere jasoko dituzte soldataz gainera:

–Dietak:

  • Bi eguneko edo gehiagoko lekualdaketak (dieta osoa, hotela barne): 106,43 euro.

–Egun berean egiteko joan-etorriak:

  • Bazkaria: 27,87 euro.
  • Afaria: 19,50 euro.
  • Kilometrajea ibilgailu propioan: 0,48 euro/km.

2027an eta 2028an egiazko soldatei aplikatzen zaizkien igoera berak aplikatuko zaizkie.

B) Irteera plusa:

Lehengo irteera plusa, orduen araberakoa, desagertu da eta honek hartuko du bere baitan.

Langileek, enpresak aginduta, bidaiak edo lekualdaketak egin behar badituzte enpresa kokaturik dagoen herritik kanpora, eta horrek gaua etxean ematea galarazten badie, plus hau jasoko dute.

Langileak, lan arrazoiengatik, gaua etxetik kanpo eman behar duenean bakarrik aplikatuko da. Plusa etxetik kanpo emandako gau bakoitzeko jasoko da.

2026. urtean, zenbatekoa honako hau izanen da:

–Irteerak Espainian eta atzerrian: 61,02 euro egunean.

–Irteerak arrisku handieneko herrialdeetan (muntatzaileak bakarrik): 90,97 euro egunean.

2027rako eta 2028rako, zenbatekoari egiazko soldatei aplikatzen zaizkien igoera berak aplikatuko zaizkio.

Jaiegunetan eta igandeetan gaua kanpoan emanez gero bidaiaren ondorioz baina lanik egin gabe, irteera plus hori bera ordainduko da, langilea lanean balego bezala.

Atzerriko irteeretarako, eta indarrean dagoen zerga-araudiak ahalbidetzen duen kasuetan (lan horiengatik atzerriko bezero bati faktura bat egin behar zaio), enpresak prozedura bat prestatuko du, langileak jarraitu beharko duena, atzerrian egindako lanak PFEZtik salbuetsita daudela justifikatzeko, eta hala aplikatzen bazaio.

C) Muntatze lanak atzerrian:

–Bi muntatzailek bidaiatuko dute muntako esku-hartzea behar denean, hala nola garabi-muntaketa oso bat eta orgaren, burualdearen eta abarren aldaketa. Pertsona bakar batek bidaiatzen ahalko du muntaketen ikuskapenak direnean, edo garrantzi txikiagoko piezak edo ordezko piezak aldatu behar direnean (bukaerako etengailuak eta abar, adibidez).

–Pertsona bakar batek bidaiatzen ahalko du bulegoko lanak direnean (saltzaileak, administrariak, teknikariak, etab.).

–Enpresa arduratuko da behar diren aseguruak eta bisak izapidetzeaz.

–Langileak ez dira behartuta egonen gomendatuta ez dauden herrialdeetara (arriskutsuak) joatera; herrialde horietako lanetara joaten diren muntatzaileen irteera-plusa 90,97 eurokoa izanen da gau bakoitzeko, B) atalean adierazten dugun bezala.

–Bidaia-ordu guztiak lan egindakotzat hartuko dira.

Zenbateko berriak 2026ko urtarrilaren 1etik aurrera aplikatuko dira.

8.–Aldi baterako ezintasuna.

Ohiko egoerengatik gertatzen diren aldi baterako ezintasun kasuan, aldi horiek honela ordainduko dira:

–Baja ospitaleratzearekin gertatzen bada, baja hasi aurreko hilabeteko egiazko soldata (*) osorik ordainduko zaio langileari ospitalean den bitartean.

–Gainerako egoeretan:

–Lehen hilabetean, aurreko hilabeteko benetako soldataren* %80.

–Bigarren hilabetean, aurreko hilabeteko egiazko soldataren* %90.

–Hirugarren hiletik aurrera (hori barne), baja hasi aurreko hileko benetako soldataren* %100.

(*) (Honako kontzeptu hauek sartzen dira benetako soldatan: soldata, hobaria, igandeak, antzinatasuna, errelebo plusa eta gaueko lanaren plusa).

Horri dagokionez, jarraian izandako baja aldiak lotu eginen dira arrazoi beragatik berriz gertatzen badira (hala dela adierazi beharko da gizarte segurantzak emandako baja agirian) eta aurreko altatik hiru hilabete baino gutxiago iragan badira.

Laneko istripuek edo eritasun profesionalak eragindako aldi baterako ezintasun kasuetan, aurreko hiru hilabeteetako egiazko soldataren batez bestekoa ordainduko da osorik, dietak, kilometroak eta irteera plusa kenduta.

Gaixotasun arruntak eta lanetik kanpoko istripuak eragindako aldi baterako ezintasunaren ordainketa eta alten eta bajen kontrola sistema publikoak eginen ditu (GSIN).

9.–Lan osasuna.

–Pintura Ataleko langileei berariazko analisi bat eginen zaie, beste langile guztiei egiten zaien urteko azterketa orokorraz gain.

–Langile batek osasun azterketa gaueko txandan ari dela egin behar badu, ordu ordaindu bat hartzeko eskubidea izanen du osasun azterketa egiteko.

–Langile guztiei laneko jantzi berriak emanen zaizkie, lanpostu bakoitzaren eskakizunen arabera, eta betiere araudi indarduna betez.

–Fisioterapia zerbitzu berria, zeinaren bidez enpresak gastuaren zati bat bere gain hartuko baitu, zehaztapen hauen arabera:

• 1.253 euroko urteko aurrekontua bideratuko da horretarako.

• Pertsona bakoitzeko 5 saioko muga eta saio bakoitzeko 25 euroko koordainketa ezartzen da, enpresak langileari soldatan ordainduko diona, faktura aurkeztu ondoren.

Zerbitzuaren jarraipena eta urteko balorazioa egiteko konpromisoa ezartzen da, beharrezkoa bada, baldintzak berraztertu ahal izateko.

–Segurtasun betaurrekoak (graduatuak zein graduatu gabe) norbera babesteko ekipamendua da, lantokian bakarrik erabiltzeko; enpresak betaurreko graduatuak emanen dizkie medikuaren ziurtagiria aurkezten duten langileei. Horretarako, enpresak itunduta ditu hainbat optika eta betaurreko modelo, balioztatutakoak, eta haien kostua bere gain hartuko du.

10.–Enplegu politika.

Enpresak konpromisoa hartzen du enpresako kontratu finko guztiak mantentzeko hitzarmenaren indarraldi osoan.

Aurreko konpromisotik kanpo daude hauek: lana borondatezko bajagatik uzten bada; ezintasun iraunkorra, erabatekoa edo osoa, aitortzen bada; eta arauzko adinera (65 urte) iristeagatik erretiroa hartzen bada edo errelebo kontratua borondatez egiten bada.

Enpresan egiten diren kontratu guztien berri emanen zaio enpresa batzordeari.

Behin-behineko ordezkotza kontratuaren erabilera (410): lanbide talde (lantegia duten bulego) desberdinetako pertsonen (ordezkaria eta ordeztua) artean egiten bada, gehienez ere 12 hilabetekoa izanen da. Neurri hau 2027ko urtarrilaren 1etik aurrera jarriko da indarrean.

11.–Aparteko orduak eta erreleboak.

Egindako aparteko orduak hertsiki araututa daude Nafarroako Industria Siderometalurgikoen 2023-2026 aldiko hitzarmen probintzialean edo haren ordezkoan, enpresarena indarrean egonda.

Aparteko orduak enpresak eskatzen dituenak izanen dira, eta idatziz jasoko da haien berri.

Aparteko ordu bakoitza ordubete eta 20 minutu balitz bezala zenbatuko da, baldin eta langilearen ordu saldoa positiboa bada.

Igande eta jaiegunetan ordu bakoitza ordubete eta 40 minutu balitz bezala zenbatuko da.

Lanbidearen borondatezko luzapenak ez dira hartuko gehiegizko lanalditzat edo aparteko ordutzat. Lanaldiko borondatezko ordu bakoitza ordubete balitz bezala zenbatuko da.

Arrazoi partikularrengatik hartutako orduak berreskuratzen ahalko dira, baimentzen diren egunetan ordu kopuru bera lan eginda.

Langilearen aldeko orduak hartzea enpresarekin adostu beharko da, eta, nolanahi ere, hilean ez dira elkarren segidako 5 lanegun baino gehiago izanen.

Produkzio eta koordinazio premiak, edo bezeroenak, direla eta, lanposturen batean justifikatzen bada lana txandaka egitea, batzordeari jakinaraziko zaio, eta, proposamena hobetzen duen beste konponbiderik ez bada, lan araubidea aldatu eginen da, betiere baloratuta horretarako ezintasun pertsonal arrazoiturik dagoen.

Urtero, abenduaren 31n, aparteko orduen emaitza zero izanen da, salbu eta enpresaren aldetik nahiz langileen aldetik gerta daitezkeen egoera berezietan.

12.–Txanda-plusa eta gaueko lanaren plusa.

2026an, kontzeptu hauek aplika dakizkiekeen langileek zenbateko hauek jasoko dituzte:

–2 txandako plusa: bi txandatan lan egiten duten langileek 3,34 euro jasoko dituzte lan egindako egun bakoitzeko.

–3 txandako plusa: hiru txandatan lan egiten dutenek (haietako edozein gauekoa izanda) 3,70 euro jasoko dituzte lan egindako egun bakoitzeko.

–Gaueko lanaren orduko plusa kalkulatzeko, GH soldata tauletako hileko eta orduko oinarrizko soldataren %30 aplikatuko da.

Kasuetatik, 2 txandakoak eta 3 txandakoak zein diren aztertuko da.

Zenbateko berriak 2026ko urtarrilaren 1etik aurrera aplikatuko dira.

2027. eta 2028. urteetarako, aurreko zenbateko horien igoera egiazko soldatei aplikatzen zaien portzentaje adinakoa izanen da.

13.–Gizarte gaiak:

–Testu guztiak ele bitan idatziko dira.

Enpresako langileen artean euskararen erabilera sustatzeko xedeaz, enpresak hartuko ditu bere gain prestakuntza ikastaroek ekarritako kostuak.

Ikastaro horiek lanalditik kanpo jasoko dira.

–Enpresako langileen prestakuntza eskaerak banaka aztertuko dira eta erabakiko da kostuetatik eta dedikazio orduetatik zenbatekoa hartzen duen enpresak bere gain eta zenbatekoa langileek. Edozein kasutan, halako moduan formalizatuko da non enpresak Gizarte Segurantzaren kotizazio kostua kentzen ahalko baitu, araudi indardunean ezarritakoarekin bat.

–Errelebo kontratua: enpresak erretiro aurreratuen eskaerei erantzunen die, errelebo kontratuaren bidez, horri buruzko araudiak eskatzen dituen baldintzak betetzen dituzten langileen kasuan. Era berean, manufaktura-industriarako araudi espezifikoa luzatzen bada, baldintzak betetzen dituzten kasuetarako.

Langileak lanaldi partzialeko kontratuaren lanaldiaren %75 (kasu bakoitzak behin betiko erretiroa hartu arte) benetan egin duenean (inolako absentismorik gabe), enpresak gainerako denboratik salbuetsiko du.

–Laneko arropa: enpresak bere gain hartuko du lan jantziak garbitzeko kudeaketa eta kostua.

–3 txandako lana: enpresak kontuan hartuko ditu 50 urte baino gehiago izanik 3 txandatan lanean 20 urte baino gehiago eman dituztenak, beren espezialitate-arloan hutsik dauden lanpostuak betetzeko. Langile horiek lehentasuna izanen dute hutsik geratzen den lanpostu batera aldatzeko, lanpostu berriaren profilaren eskakizunak betetzen badituzte eta baldintza berrietara egokitzen badira.

55 urtetik gorako langileek gaueko txandan lanik ez egiteko aukera izanen dute erretiroa hartu arte. Ahal dela, gaueko txanda lanpostuko beste langile batzuek beteko dute, eta, halakorik ezean, beste lanpostu batzuetako langileek edo langile berriek.

–Altuerako lanak: enpresak kontuan izanen ditu 50 urtetik gorako pertsonak, modu jarraituan altuerako lanak eskatzen dituzten lanpostuetan 20 urte baino gehiago egiaztatzen dutenak, beren espezialitate arloko lanpostu hutsak betetzeko (mekanikariak, elektrikariak). Langile horiek lehentasuna izanen dute hutsik geratzen den lanpostu batera aldatzeko, lanpostu berriaren profilaren eskakizunak betetzen badituzte eta baldintza berrietara egokitzen badira.

–Enpresak errespetatu eginen du langileek GH taldeko enpresa desberdinetan metatzen duten antzinatasuna. Praktika horrek 2020tik aurrerako atzeraeragina izanen du.

–Eszedentzia: gai honetan, Langileen Estatutuaren 46. artikuluan xedatutakoa beteko da, eta, arau osagarri gisa, Gipuzkoako Industria Siderometalurgikoaren 2020-2022 aldiko Hitzarmen Probintzial indardunean xedatutakoa.

Salbuespen gisa, enpresako langile finko guztiei aitortuko zaie gutxienez eta gehienez urtebete iraunen duen eszedentzia bat; behin eszedentzia denbora bukatutakoan beren lanpostura edo antzeko batera automatikoki itzultzeko eskubidea izanen dute.

–Ordaindu gabeko lizentzia: behar mediko justifikatua egotea eta 7 eguneko aurrerapenaz eskatzea ezinbesteko baldintzak dira ordaindu gabeko gehienez ere 5 eguneko lizentziarako eskubidea izateko, Gizarte Segurantzan baja hartu gabe. Departamentu edo atal bereko bi pertsona izanez gero, beharrezkoa izanen da enpresako zuzendariaren adostasuna.

–Antzinatasun berria: bosturtekoaren balio hau ezartzen da: hilean 45 euro gordin, lanbide kategoria guztietarako, administrazioko 2. mailako ofizialaren eta teknikarien eta antolaketako laguntzailearen kategorietan izan ezik, haien kasuan 55 euro izanen baita. Antzinatasuneko prezio berriak hitzarmen hau sinatu eta hurrengo hilabetetik aurrera aplikatuko dira. Prezio berria pertsonak orain arte metatu dituen bosturteko guztiei aplikatuko zaie, eta 2027tik aurrera, bosturtekoaren prezioa soldata errealei aplikatzen zaizkien ehuneko berberetan igoko da.

Berdintasun plana: hitzarmenari Berdintasun Plana gehitzen zaio, eranskin gisa, LGTBI planarekin batera. Indarreko araudiaren arabera aplikatuko da.

14.–Lanbide kategoriak.

Kategoria-aldaketak enpresako lanpostuak baloratzeko sistemaren irizpideari jarraituz eginen dira, honako kategoria hauetarako:

–1. mailako burua.

–1. mailako arduradunak.

–2. mailako arduradunak.

–Administrazioko 1. mailako ofiziala eta teknikariak.

–Antolaketako 1. mailako teknikaria.

–Administrazioko 2. mailako ofiziala eta teknikariak.

–1. mailako ofiziala, goi mailakoa.

Eta enpresako antzinatasunaren irizpideari jarraituz, honako neurri hauek aplikatuz:

–Langile teknikoak eta administraziokoak, 10 urteko antzinatasuna dutenak, antolaketako laguntzaileak izanen dira.

–Tailerreko langileak, 10 urteko antzinatasuna dutenak, 2. mailako ofizialak izanen dira.

–Tailerreko langileak, 20 urteko antzinatasuna dutenak, 1. mailako ofizialak izanen dira.

Erretiro partzialeko kontratua duten pertsonei ez zaie aplikatuko.

Soldata-taulan kategoria berriak sartu dira:

–1. mailako ofiziala, goi mailakoa.

–Era berean, sarrerako soldata bat ezartzen da administrari laguntzailearen eta 3. mailako ofizialaren kategorietarako, langile berrientzat, kontratuaren lehen 2 urteetan.

Berriz aztertuko dira 2026ko urtarrilaren 1etik aurrera enpresan 10 urte betetzen dituzten 3. mailako ofizialak eta enpresan 20 urte betetzen dituzten 2. mailako ofizialak, kategoriaz aldatzeko, eta dagozkion atzerakinak ordainduko dira, 2026ko urtarrilaren 1etik aurrerako ondorioekin. Hortaz, 2026ko kategorien aldaketak 2026ko urtarrilaren 1etik aurrera izanen ditu ondorioak.

2026ko uztailaren 1etik aurrerako kategoria aldaketek eskatutako antzinatasun irizpidea bete eta hurrengo hileko 1etik aurrera izanen dituzte ondorioak.

15.–Lizentziak.

–Osasun-kontsultetarako: 1. mailako ahaideei laguntzea barne, ordaindutako orduak 20 izanen dira. Gaueko txandan dauden langileen kasuan, kontsulta-ordua hartuko da kontuan, eta osasun kontsultak irauten duen denbora lan egindakotzat hartuko da (egun berean hartu beharko da), hitzorduaren ordua ez bada sarrera-ordutik 4 ordu baino gehiagora edo 6 ordu baino gehiagora txanda-irteeratik.

–Gaixotasun larriak edo ospitalizazioa: ezkontideak, izatezko bikotekideak, odol edo ezkontza bidezko bigarren mailara arteko ahaideek (izatezko bikotekidearen odol bidezko ahaideak barne) edo langilearekin etxe berean bizi den eta haren zaintza behar duen beste edozein pertsonak istripu edo eritasun larria baldin badu, ospitaleratu behar badu edo etxean atseden hartzea eskatzen duen ospitaleratzerik gabeko ebakuntza kirurgikoa egiten badiote, bost lanegun.

Justifikazioa:

Zuzeneko arduradunari abisatzea eta Giza Baliabideen atalera mezu bat idaztea, hauek justifikatuz:

1.–Baimena eskatzeko beharra (arrazoia, beharrezko denbora eta hartzeko modua).

2.–Baimenaren kausa (Osasunbidearen ziurtagiria).

Baimen horien erabilera hobeki kontrolatzea da helburua. Langileek ezagueraz eska dezaten baimena, aldi berean malgutasuna eskainiz, baimenaren erabilera premiara egokitzeko.

Hartzeko modua:

Kasuan-kasuan enpresarekin adostuta:

–Egunak jarraian.

–Txandakako egunak (gehienez 2 astean), ahaideak ospitalean jarraitzen duen ala ez.

–Orduak (gehienez 2 astean), ahaideak ospitalean jarraitzen duen ala ez.

Baimena hartu aurreko edo ondoko 2 egun gehituko dira, langileak bidaiatu behar badu (+300 km).

Gaixotasun larriak iraunez gero:

–Lehen lizentzia burutu eta segidako 15 egun igaro ondoren, 3 egun naturaleko bigarren lizentzia ordaindua hartzeko eskubidea izanen du titularrak edo ezkontideak, odol edo ezkontza bidezko 1. mailako ahaideak badira (gurasoak, aita-amaginarrebak, seme-alabak, suhi-errainak).

–Lehen lizentzia burutu eta segidako 30 egun igaro ondoren, 2 egun natural, odol edo ezkontza bidezko 2. mailako ahaideen kasuan (aiton-amonak, anaia-arrebak, koinatuak, biloba); kasu horretan ez da aplikatuko joan-etorriengatiko luzapena.

–Eskubidea izanen dute segidako lizentzia ordaindugabeak hartzeko, kasu beretan eta denbora berean, aurrekoa bukatzen denetik segidako 15 egun igaro badira. Kasu horretan ere ez da joan-etorriengatik luzatuko.

–Heriotzagatiko baimena:

  • Ezkontidearen, izatezko bikotekidearen eta seme-alaben heriotzagatik: 5 lanegun.
  • 2. mailara arteko ahaideen heriotzagatik (2. mailakoak barne): 2 lanegun.
  • Gainerako ahaideen heriotzagatik (3. mailakoak barne): lanegun bat.

2023-2025 aldiko enpresa-hitzarmeneko gainerako baldintzetan, Gipuzkoako Industria Siderometalurgikoaren 2023-2026 aldiko Hitzarmen Kolektibo Probintzialean xedatutakoa hartuko da kontuan.

16.–Malgutasuna.

Enpresak konpromisoa hartzen du, ordu gehiago edo gutxiago behar direnean, orain arte bezala egiteko: borondatezko langileekin. Behar hori ez bada horrela betetzen, eta orduan bakarrik, erabiliko du enpresak lege prozedura.

Halere, lanaldiaren banaketa irregularrean erabilitako orduak urte natural bateko epean hartu edo berreskuratzen ahalko dira, erabiltzen direnetik hasita kontatuta.

17.–Mugigarritasuna.

Behar izanez gero, Gipuzkoako Industria Siderometalurgikoaren 2023-2026 aldiko Hitzarmenean edo Langileen Estatutuan ezarritakoa aplikatuko da.

18.–Oporrak.

Langileen Estatutuaren 38.3 artikuluan jasotzen diren kasuetako batean, langileak erregelamenduko opor egunak dagokion urtean hartzerik ez badu, aipatutako artikuluan aurreikusten diren epeetan hartuko dira.

Kasu horretan, oporrak hartzeko eguna edo egunak bi aldeek –enpresak eta langileak– adostuta hartuko dira.

19.–Azken xedapenak.

–Beste itun batzuetan lortutako hobekuntzak hitzarmen berri guztietan mantenduko dira.

–Hitzarmen honen interpretazioak edo aplikazioak eragindako gatazkak Nafarroako lan gatazkak konpontzeko Auzitegiaren esku utziko dira.

–Enpresako hitzarmen honetan xedaturik ez dagoen guztian, aplikatzekoa izanen da Nafarroako Foru Komunitaterako Industria Siderometalurgikoen hitzarmen kolektiboa (hitzarmen horretan ezarritako baldintzak ez dira inola ere apalagoak izanen Gipuzkoako Industria Siderometalurgikoen 2023-2026 aldiko Hitzarmen Kolektiboko probintzialekoak baino).

20.–Batzorde paritarioa.

Batzorde Paritario bat eratu da, hitzarmenaren sinatzaileek osatua; gehienez ere 6 kide ditu, 3 langileen aldetik eta 3 enpresaren aldetik.

Batzordeak eskumen hauek izanen ditu:

–Hitzarmen kolektibo honetako arauak interpretatzea.

–Hitzarmen honetako konpromisoak garatzea.

Batzordearen bi aldeetako edozeinek biltzeko eskatuta, gehienez ere 15 eguneko epean bilduko da.

Dituen eskumenen ondorioz, edozein alderen hirutik batek eskatuz gero bilduko da batzorde paritarioa.

Batzorde parekidean dagoen sindikatuen ordezkaritzak bi aholkulariren laguntza izaten ahal du gehienez, bai eta enpresa-ordezkaritzak ere. Aholkulariak hitza izanen dute, baina botorik ez.

Batzorde parekidearen akordioek balioa izateko, ordezkaritza bakoitzaren botoen %51ren babesa izan beharko dute.

Erabakiak ebazteko edo hartzeko epea:

Batzorde parekidearen baitan sortzen diren desadostasunak konpontzeko, Nafarroako Foru Komunitateko lan gatazkak konpontzeko epaitegiz kanpoko prozedurei buruzko lanbidearteko Akordioan araututako bitartekaritza prozeduretara joko da (Nafarroako Aldizkari Ofiziala, 15. zk., 2014ko urtarrilaren 23koa), 15 egun naturaleko epean.

21.–Hitzarmenean itundutako baldintzak ez aplikatzea: hitzarmena ez betetzea.

Enpresak ez du hitzarmen hau aplikatu gabe uzten ahalko LEren 82.3 artikuluan eta LEren 41.1 artikuluko a) eta d) apartatuetan aipatutako prozeduraren bitartez. Horren ordez, berriro negoziatzen saiatu beharko du, hitzarmena iraungi baino lehen beste hitzarmen bat lortzeko, edo indarrean dagoena berrikusteko, LEren 86.1 artikuluak aurreikusitakoari jarraikiz.

Langileen Estatutuaren 86.1 artikuluan ezarritakoa aplikatzera behartzen duten inguruabarretako bat gertatzen denean prozedura hau erabiliko da:

1.–Enpresaren Zuzendaritzak kontsultaldi bat irekiko du langileen legezko ordezkariekin, 15 egunekoa; bertan enpresaren erabakia zerk ekarri duen aztertuko da, bai eta eragin horiek galarazteko edo murrizteko aukerarik dagoen eta zer neurri hartu behar den ere ukitutako langileen ondorioak apaltzeko.

Kontsultaldia indarrean den bitartean, alderdiek fede onez negoziatu beharko dute, akordio bat lortzea helburu. Akordio horretarako, beharrezkoa izanen da batzordeko langileen ordezkari gehienen adostasuna. Enpresaren eta langileen ordezkaritzaren artean ezarritako kontsulta aldian garatzen diren negoziazioetan akordiorik izanez gero, idatzi egin beharko da.

2.–Kontsulta aldia burututa adostasunik ez bada, edozein aldek jar dezake desadostasuna hitzarmenaren Batzorde Paritarioaren menpe, eta horrek, gehienez ere, zazpi eguneko epea izanen du erabakitzeko, desadostasuna batzordeari planteatzen zaionetik.

3.–Batzorde Paritarioan ere adostasunik ez badago, edo desadostasuna organo horretara eraman ez bada, aldeetako edozeinek jo dezake Nafarroako Foru Komunitateko lan gatazkak konpontzeko epaitegiz kanpoko prozedurei buruzko lanbidearteko Akordioan araututako bitartekaritza prozedurara desadostasuna konpontzeko, eta beste aldea beharturik egonen da bitartekaritza prozedura horretan parte izatera, baina alde bakoitzak askatasuna izanen du horretarako izendatutako bitartekariak emandako proposamena onartzeko edo ez.

Ekonomia, teknika, antolaketa edo produkzio arloko arrazoiak direla eta, enpresak hitzarmen kolektibo hau aldi batez ez aplikatzea nahi badu, langileen ordezkariekin akordiorik lortzen ez bada eta aplikatzekoak diren lanbidearteko akordioetako gatazkak konpontzeko prozedurek desadostasuna ebazten ez badute, bi aldeen arteko akordioa beharko da (enpresaren ordezkaritza eta langileen ordezkaritzaren gehiengoa) aplikazio ezaren gaineko desadostasuna hitzarmen kolektiboen kontsulta batzorde nazionalaren menpe jartzeko.

Hiru aletan sinatu da, Altsasun, 2026ko ekainaren 9an.

Enpresaren izenean:

Mecanizados Alsasua SL enpresaren batzordea.

Jose Antonio Guerra Altuna, Juan I. Gaya (LAB).

Ainara Iguiñiz Aracama, Jon Garciandia (LAB).

Iraitz Goñi (LAB).

Iragarkiaren kodea: F2609880