157. ALDIZKARIA - 2026ko abuztuaren 11

1. NAFARROAKO FORU KOMUNITATEA

1.7. BESTELAKOAK

1747/2026 EBAZPENA, uztailaren 22koa, Nafarroako Unibertsitate Publikoko errektoreak emana. Haren bidez agintzen da argitara dadila erabaki hau: "Erabakia, Nafarroako Unibertsitate Publikoko titulu bikoitzen eta unibertsitatearteko titulu bateratuen programei eta ikasketa ofizialen aldiberekotasunari buruzko araudia onesten duena".

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2026ko uztailaren 22an onetsitako erabakia, Nafarroako Unibertsitate Publikoko titulu bikoitzen eta unibertsitatearteko titulu bateratuen programei eta ikasketa ofizialen aldiberekotasunari buruzko araudia onesten duena.

"ERABAKIA, NAFARROAKO UNIBERTSITATE PUBLIKOKO TITULU BIKOITZEN ETA UNIBERTSITATEARTEKO TITULU BATERATUEN PROGRAMEI ETA IKASKETA OFIZIALEN ALDIBEREKOTASUNARI BURUZKO ARAUDIA ONESTEN DUENA

822/2021 Errege Dekretuak, 2021eko irailaren 28koak, Unibertsitateko ikasketen antolamendua eta haien kalitatea bermatzeko prozedura ezartzen dituenak, unibertsitateei aukera ematen die, haien autonomiaren eremuan, graduko eta masterreko titulu bikoitzeko programa akademikoak antolatzeko, bai eta hitzarmen baten bidez Espainiako edo atzerriko beste unibertsitate batzuekin batera ematen diren unibertsitatearteko tituluak ere.

Nafarroako Unibertsitate Publikoak esperientzia zabala du era horretako ikasketak diseinatzen eta ematen. Gaur egun, graduko eta masterreko titulu bikoitzeko hamalau programa ematen ditu, eta bi titulu ofizial lortzeko zein beste unibertsitate batzuekin batera emandako unibertsitatearteko tituluak lortzeko programetan parte hartzen du. Halaber, haren nazioartekotzeko estrategiak eta UNITA (Universitas Montium) Europako aliantzan integratua egoteak aukera ematen du nazioarteko programa bateratu gehiago garatzeko, 822/2021 Errege Dekretuaren beraren aurreikuspenekin bat.

Testuinguru horretan, beharrezkoa da araudi propio bat garatzea, titulu bikoitzeko eta unibertsitatearteko tituluetako programei aplikatzeko modukoak diren oinarrizko irizpide batzuk ezartzeko –titulu horiek estatukoak edo nazioartekoak izan daitezke, eta titulu ofizial bat edo gehiago lortzeko aukera eman–. Halaber, komenigarritzat jotzen da unibertsitateko ikasketen aldiberekotasuna arautzea, ikasleek beren kabuz antolatuta bi titulu edo gehiago lortzeko aukera gisa, titulazio bikoitzeko programa akademikoetatik apartekoa.

Arau hau Nafarroako Unibertsitate Publikoaren Estatutuetako 20.b) artikuluan ezarritakoaren babesean eman da –2003ko maiatzaren 12ko 110/2003 Foru Dekretuaren bidez onetsi ziren Estatutuak (NAO, 63 zk., 2003ko maiatzaren 19koa), eta Nafarroako Gobernuak 2011ko martxoaren 21ean hartutako erabaki baten bidez aldatu (NAO, 70. zk., 2011ko apirilaren 11koa)–; izan ere, artikulu horren arabera, Gobernu Kontseiluaren eginkizunen artean dago jarraibide orokorrak eta horiek ikasketak antolatzeko arloetan aplikatzeko prozedurak onestea.

Arau hau Nafarroako Unibertsitate Publikoaren Ikasketa Batzordeak 2026ko apirilaren 21ean egindako bileran aurkeztu zen lehenbiziko aldiz, eta, ondoren, Batzorde horrek 2026ko ekainaren 15eko bileran onetsi zuen. Gainera, haren aldeko txostena egin du Irakasle eta Ikertzaileen Araubide Juridikoaren eta Arau Garapenaren kudeatzaileordeak.

Honako hau da Gobernu Kontseiluak, Irakaskuntzako errektoreordeak proposaturik, bere kideek aldez aurretik eztabaida eginda, 2026ko uztailaren 22an egindako bileran, hartu duen

ERABAKIA:

Lehenbizikoa.–Onestea Nafarroako Unibertsitate Publikoko titulu bikoitzen eta unibertsitatearteko titulu bateratuen programei eta ikasketa ofizialen aldiberekotasunari buruzko araudia –erabaki honen eranskinean dago atxikita–.

Bigarrena.–Araudi horrek 2026-2027 ikasturtean hartuko du indarra.

Hirugarrena.–Erabaki hau aditzera ematea Ikasleen Gaietarako, Unibertsitateko Bizitzako eta Konpromiso Sozialeko Errektoreordetzari, Irakaskuntzako Errektoreordetzari, Irakaskuntza Zerbitzuari, Antolamendurako eta Kalitaterako Atalari, fakultate eta eskoletako dekanotza eta zuzendaritzei eta Ikasleen Kontseiluari.

Laugarrena.–Erabaki hau Nafarroako Unibertsitate Publikoaren iragarki ohol elektronikoan eta Nafarroako Aldizkari Ofizialean argitara dadila agintzea.

Bosgarrena.–Unibertsitate Sistemari buruzko 2023ko martxoaren 22ko 2/2023 Lege Organikoaren 38.4 artikuluak eta Unibertsitatearen Estatutuen 144.1 artikuluak ezarritakoaren arabera, erabaki honek administrazio bidea agortzen du. Erabaki honen aurka, zilegi da administrazioarekiko auzi-errekurtsoa jartzea, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat".

Iruñean, 2026ko uztailaren 22an.–Errektorea, Ramón Gonzalo García.

NAFARROAKO UNIBERTSITATE PUBLIKOKO TITULU BIKOITZEN ETA UNIBERTSITATEARTEKO TITULU BATERATUEN PROGRAMEI ETA IKASKETA OFIZIALEN ALDIBEREKOTASUNARI BURUZKO ARAUDIA

ATARIKO KAPITULUA.–XEDEA ETA APLIKAZIO EREMUA

1. artikulua. Xedea.

Araudi honen xedea da honako hauek arautzea:

a) Berariazko ibilbidea duten titulu bikoitzeko programa akademikoak, ondoz ondokoak edo aldiberekoak, aukera ematen dutenak Nafarroako Unibertsitate Publikoko bi titulu ofizial lortzeko edo Nafarroako Unibertsitate Publikoko titulu bat eta Espainiako edo atzerriko goi mailako irakaskuntzako beste erakunde bateko titulu bat lortzeko. Kategoria horretan sartzen dira, halaber, bi titulu baino gehiago lortzera bideratutako programak.

b) Unibertsitatearteko titulu bateratuak, Espainiako edo atzerriko goi mailako hezkuntza-erakundeen artekoak, modua ematen dutenak Espainiako edo atzerriko bi unibertsitatek edo gehiagok emandako titulu ofizial bakarra lortzeko.

c) Ikasketen aldiberekotasunerako araubidea, ikasketetako bat gutxienez Nafarroako Unibertsitate Publikoan egiten denean.

2. artikulua. Aplikazio eremua.

Nafarroako Unibertsitate Publikoko titulu bikoitzeko programa guztiei, Nafarroako Unibertsitate Publikoak parte hartzen duen unibertsitatearteko titulu guztiei eta aldi berean egindako ikasketetako bat Nafarroako Unibertsitate Publikoan egiten duten ikasleei aplikatuko zaie araudi hau, zeina 822/2021 Errege Dekretuaren babesean emana baita –2021eko irailaren 28koa, Unibertsitateko ikasketen antolamendua eta haien kalitatea bermatzeko prozedura ezartzen dituena–.

3. artikulua. Definizioak.

1. Titulu bikoitzeko programa akademikoak dira prestakuntza-proiektu komun batean oinarritzen diren programak, bi titulu desberdinekiko koherentzia akademikoa dutenak eta ikasleei aukera ematen dietenak berariazko ibilbide bat egin eta, hura gaindituz gero, programa osatzen duten bi titulu unibertsitario ofizialak lortzeko. Haiei esker, azkarrago lortzen ahal dira bi titulazioak, horietako bakoitza bere aldetik egitearekin alderatuta. Hori, dena den, nolabaiteko antzekotasuna duten titulazioen artean bakarrik da posible; horrela, programaren diseinu akademikoaren bidez, titulazioetako bateko aukerako irakasgaien zatia beste tituluko nahitaezko irakasgaiek osatzen dute.

2. Programa akademiko anizkoitza, bestetik, unibertsitateko bi titulu ofizial baino gehiago lortzeko modua ematen duen programa da.

3. Unibertsitatearteko titulu bateratua da ikasleei aukera ematen diena unibertsitate parte-hartzaile guztiek modu bateratuan emandako unibertsitate titulu ofizial bakar bat lortzeko.

4. Titulu bikoitzeko aldibereko programatzat hartzen da titulu bikoitzeko programa akademiko bat, zeinak, bere diseinuagatik, bi titulazioak gainditzeko aukera ematen baitu ikasturte bakoitzean bi tituluetako irakasgaiak aldi berean egitearen bidez.

5. Titulu bikoitzeko ondoz ondoko programak, bestetik, titulazioetako bat bestea gainditu eta gero lortzeko modua ematen duten programa akademikoak dira; horrela, moduluen diseinua dela-eta, lehenik bi tituluetako bat amaitu beharko dute ikasleek, eta, horren ondotik, beste titulazioa amaitzeko falta zaizkien irakasgaiak eginen dituzte.

6. Ikasketen aldiberekotasuna da Espainiako edozein unibertsitatetan –Nafarroako Unibertsitate Publikoa barne– titulu ofizial batean matrikulatutako ikasleek duten aukera Nafarroako Unibertsitate Publikoan maila bereko bigarren titulu ofizial bat aldi berean egiteko, aurretik deskribatu diren titulu bikoitzeko programetatik kanpo.

LEHENBIZIKO KAPITULUA.–TITULU BIKOITZEKO PROGRAMA AKADEMIKOAK

LEHENBIZIKO ATALA.–NAFARROAKO UNIBERTSITATE PUBLIKOKO TITULU BIKOITZEKO PROGRAMA AKADEMIKOEN XEDAPEN KOMUNAK

4. artikulua. Xedea eta aplikazio eremua.

1. Titulu bikoitzeko programa akademikoek oinarritzat izanen dute prestakuntza-proiektu komun bat eraikitzea, koherentzia akademikoa izanen duena eta ikasleen prestakuntza integrala indartuko duena; horrela, bermatu eginen da ikasleek aukera izatea Nafarroako Unibertsitate Publikoko tituluen memorietan definitzen diren funtsezko ezagutza eta konpetentziak eskuratzeko.

2. Erabaki honetan jasotako xedapenek arautuko dituzte programa horiek, eta, bereziki, ikasketen araubide akademikoari buruzkoek eta programa bakoitzerako onesten diren berariazko arauek.

3. Gobernu Kontseiluaren erabaki baten bidez onetsiko dira titulu bikoitzeko programa akademiko guztien berariazko arauak, betiere irakaskuntzako gaietan eskumena duen errektoreordetzak eta programa horiek osatzen dituzten tituluen ardura duen ikastegiak edo ikastegiek proposamena egin eta gero eta inplikatutako ikastegiko edo ikastegietako kalitatearen berme batzordeak nahitaezko eta aldeko txostena egin eta gero.

4. Titulu bikoitzeko programa akademikoek, gainera, programa osatzen duten tituluetako bakoitzaren memorian xedatutakoa bete beharko dute, bai prestakuntza-plana garatzeari dagokionez, bai memorietan jasotako gehieneko ikaspostuei dagokienez.

5. artikulua. Modalitateak.

Titulu bikoitzeko programa akademikoen bi modalitate ezartzen dira:

a) Titulu bikoitzeko aldibereko programak: maila akademiko bereko bi titulu ofizial aldi berean lortzeko aukera ematen diete ikasleei, bi tituluen artean kredituak aitortzeko sistema baten bidez. Programan sartzeak berekin dakar bi tituluetan aldi berean onartua egotea ikaslea.

b) Titulu bikoitzeko ondoz ondoko programak: maila akademiko bereko bi titulu ofizial elkarren segidan lortzeko aukera ematen diete ikasleei; horretarako, kredituak aitortzeko sistemak modua emanen du lehenbiziko tituluan gainditutako kredituen zati bat aitortua izateko bigarren titulu ofizialean. Berariazko programa Gobernu Kontseiluaren erabaki baten bidez onetsiko da, eta erabaki horretan zehaztuko da bigarren tituluan sartzeko sistema.

6. artikulua. Titulu bikoitzaren ikastegi arduraduna eta Kalitatearen Bermerako Sistema.

1. Programa bakoitza osatzen duten tituluak zer ikastegiri dauden atxikirik, ikastegi hori arduratuko da programa kudeatzeaz.

2. Programa osatzen duten bi tituluak bi ikastegi desberdinetara badaude atxikirik, bi ikastegietako bat bakarra arduratuko da titulu bikoitza kudeatzeaz, eta ikastegiak ados jarri beharko dira horretarako. Erabaki horrek behin betikoa izan behar du berariazko irakaskuntza-programazioa indarrean dagoen bitartean.

3. Titulu bikoitzaren Kalitatearen Bermerako Sistema titulu bakoitzari dagozkion organoetan egonen da, salbu eta irakastalde propioa eta urte osoko jarraipena duten titulu bikoitzen kasuan; kasu horretan, programaren arduradunari egokituko zaio.

4. Programaren jarraipena egiteko, Batzorde Akademikoa eratuko da, non honako hauek hartuko baitute parte gutxienez: titulu bien arduradunek eta titulu bikoitzean inplikatutako ikastegiko kalitatearen berme batzordeetako ordezkari batek.

5. Batzorde horren osaera eta funtzionamendua berariazko programazioa onesten duen araudian zehaztuko da, edo, unibertsitate batek baino gehiagok parte hartuz gero, dagokion hitzarmenean.

7. artikulua. Araubide akademikoa onartzea.

Titulu bikoitzeko programa batean onartua izateak berekin dakarkie ikasleei xedapen hauen arabera ezarritako araubide akademikoa onartzea, bai eta berariazko programa bakoitza onesten duten xedapenak ere.

8. artikulua. Berariazko irakaskuntza-programazioa.

1. Matrikulatzen diren ikasleek nahitaez bete beharko dute titulu bikoitzeko programa akademikoaren irakaskuntza-programazioa, eta eranskin gisa jasorik egonen da Gobernu Kontseiluak titulu bikoitzeko programa bakoitzerako onesten duen berariazko araudian.

2. Titulu bikoitza onesten duen araudian ezarriko da zenbat iraunen duen programari dagokion berariazko irakaskuntza-programazioa.

9. artikulua. Ikasketa-planak aldatzea edo iraungitzea.

1. Programa osatzen duten tituluen ikasketa-planetako bat aldatzen bada, titulu bikoitzaren Batzorde Akademikoak aitorpen taulak eta curriculum ibilbideak eguneratzea proposatuko du, titulu bakoitzaren kalitatearen berme batzordeek txostena egin ondoren.

2. Nafarroako Unibertsitate Publikoko Gobernu Kontseiluari dagokio aitorpen taulak eta curriculum ibilbide berriak onestea.

3. Gobernu Kontseiluak beretzat gordetzen du ikasturte jakin batetik aurrera titulu bikoitza ez eskaintzeko eskubidea, betiere tituluak atxikita dauden ikastegiak edo ikastegiek txostena egin ondoren, baina bermatu beharko du tituluko ikasleek ikasketak amaitzeko aukera izatea, bat etorriz Nafarroako Unibertsitate Publikoko graduko eta unibertsitate masterreko titulu ofizialak eta ikasketa-planak ezartzeko eta iraungitzeko prozeduren arauetan xedatutakoarekin.

4. Programa osatzen duten ikasketa-planetako bat iraungitzen bada, titulu bikoitzaren programa ere iraungiko da, Nafarroako Unibertsitate Publikoko graduko eta unibertsitate masterreko titulu ofizialak eta ikasketa-planak ezartzeko eta iraungitzeko prozeduren arauetan ezarritako baldintzetan.

10. artikulua. Ziurtagiriak eta Tituluaren Europako Gehigarria.

1. Titulu bikoitzeko programa akademikoetan gainditutako kreditu guztiak programa hori osatzen duten titulu indibidual bakoitzean islatuko dira. Hala, titulu horien ziurtagiri ofizialetan, gainditutako irakasgai guztiak jasoko dira, haietan lorturiko kalifikazioa eta guzti, programako aitorpen taularen arabera.

2. Tituluaren Europako Gehigarriaren 6. apartatuan, hots, informazio osagarria idaztekoan, hau erantsi behar da: "Ikasleak ikasketak amaitu ditu .......... eta .......... tituluen aldibereko programaren berariazko irakaskuntza-programazioaren barnean, Nafarroako Unibertsitate Publikoan (eta ..........(e)ko Unibertsitatean, hala badagokio)".

BIGARREN ATALA.–NAFARROAKO UNIBERTSITATE PUBLIKOKO TITULU BIKOITZEN ALDIBEREKO PROGRAMAK

11. artikulua. Berariazko araudia.

Gobernu Kontseiluak titulu bikoitzeko aldibereko programa bakoitzerako berariazko araudia onetsiko du. Araudi horretan, gutxienez, honako hauek jasoko dira:

a) Programaren prestakuntza-proiektua eta ikasketa-plana.

b) Gehieneko ikaspostuak eta sartzeko eta matrikula egiteko eskakizunak eta irizpideak.

c) Programan dauden tituluetako irakasgaien aitorpena egiteko plana.

d) Batzorde Akademikoaren osaera.

12. artikulua. Batzorde Akademikoaren eginkizunak eta funtzionamendua.

1. Programa bakoitzaren Batzorde Akademikoa arduratuko da programaren zuzendaritzaz eta antolaketa akademikoaz, eta honako eginkizun hauek izanen ditu:

a) Ordutegia eta azterketen egutegia bateragarriak izan daitezen bermatzea.

b) Ikastegiari ikasturte bakoitzean onartuko den ikaspostu kopuruaren muga proposatzea.

c) Programaren irakaskuntzaren kalitateari segimendua egiteko txostenak onestea, bidezkoa bada.

d) Gutxieneko errendimendua lortzen ez duten ikasleek programan jarraitzeari buruzko alderdiak ebaztea, halakorik balego.

e) Gobernu Kontseiluak onesten duen araudian edo berariazko hitzarmenean ezartzen diren beste eginkizun batzuk.

2. Gobernu Kontseiluak onesten duen araudian edo berariazko hitzarmenean definituko da Batzorde Akademikoaren funtzionamendua.

13. artikulua. Ikaspostuak eta onarpena.

1. Aldibereko programaren ikastegi arduradunak irakaskuntzako gaietan eskumena duen errektoreordetzari proposatuko dio zenbat ikaspostu egonen diren gehienez, Gobernu Kontseiluak onets dezan gainerako titulu ofizialetara sartzeko ikaspostu kopuruaren mugak onesten dituenean.

2. Nafarroako Unibertsitate Publikoak zer epe ezartzen duen titulu ofizialetara sartzeko eskaera egiteko, epe horretan egin beharko dute onartua izateko eskaera programa horietan sartu nahi duten ikasleek.

3. Nafarroako Unibertsitate Publikoko graduko eta unibertsitate masterreko ikasketa ofizialetan onartua izateko prozedura onesten duen araudian ezarritakoaren arabera eginen da onarpena.

4. Gradu bikoitzen kasuan, ezarritako ikaspostuak bete arte onartuko dira ikasleak, aurreinskripzioan aldibereko programa aukeratu dutenen artean, sartzeko noten araberako ordenan. Edonola ere, programa osatzen duen titulu indibidual bakoitzak atalase-nota bat izanen du, eta, programan sartzeko, beharrezkoa izanen da bi tituluetako baten nota bera edo handiagoa izatea ikasleak.

5. Master bikoitzen kasuan, bietan ezarritako onarpen irizpideak hartuko ditu kontuan Batzorde Akademikoak onarpen ordena ezartzeko.

14. artikulua. Matrikula eta prezio publikoak.

1. Aldibereko programa batean onartutako ikasleek programa horretan formalizatuko dute matrikula, eta bi titulu ofizialetan aldi berean matrikulatuta daudela ulertuko da.

2. Ikasturte bakoitzean, gainerako titulu ofizialetakoentzat ezarritako epe berean eta prozedura bera erabiliz matrikulatuko dira ikasleak.

3. Aldibereko programa batean matrikulatutako ikasleak Master Bikoitzaren berariazko irakaskuntza-programazioko irakasgaietan baizik ez dira matrikulatuko ikasturte bakoitzean, eta ezin izanen dira matrikulatu inondik ere programa osatzen duten titulu ofizial indibidualetan finkatutako eskaintza akademikoko beste irakasgaietan.

4. Matrikulatutako ikasleek prezio publikoak ordainduko dituzte, gai hori arautzen duen foru-arauak ezartzen duenaren arabera, eta bertan aurreikusten diren edo legearen arabera zilegi diren salbuespen eta hobarien onuradunak izanen dira, halakorik badagokie.

5. Aldibereko programa bat osatzen duten ikasketek prezio publiko desberdinak badituzte, kontuan hartuko da matrikulatutako irakasgai bakoitza zer titulu sinpleri dagokion, eta titulu horretako prezio publikoak aplikatuko zaizkio; hori guztia irakaskuntza-programazioaren eranskinean zehaztuko da, non programa osatzen duten irakasgaiak zerrendatuko baitira.

15. artikulua. Ebaluazioa eta errendimendua.

1. Aldibereko programaren irakasgaien ezagutzak ebaluatu edo egiaztatzeko, gainerako titulazio ofizialetarako ezarritako ohiko prozedura erabiliko da, Gobernu Kontseiluak titulu ofizialetarako onetsitako egutegi akademikoan finkatutako epe beretan.

2. Errendimendu akademiko berezia eskatzen ahalko da, eta hura lortzea ezinbestekoa izanen da programan jarraitzeko. Gobernu Kontseiluak titulu bikoitzeko aldibereko programa bakoitzerako onesten duen araudi edo berariazko hitzarmenean zehaztuko da errendimendu berezi hori.

3. Aurreko puntuan adierazitako errendimendua lortzen ez duten ikasleek programa utzi beharko dute, baina programa osatzen duten bi titulazio ofizialetako batean jarraitzen ahalko dute, programan sartzean zuten notaren arabera. Horrela, nota hori baino atalase-nota baxuagoa duen titulazioan bakarrik jarraitzen ahalko dute ikasleek. Ondorio horietarako, Batzorde Akademikoak administrazio zerbitzuei bidaliko die ikasturte bakoitza bukatzean zer ikaslek utzi behar duten programa.

4. Aparteko eta gerora sortutako egoeretan, Batzorde Akademikoak irakaskuntzako gaietan eskumena duen errektoreordetzari proposatzen ahalko dio ikasleek programan jarraitzeko, betiere ikasleek berek behar bezala justifikatzen eta egiaztatzen badute.

5. Nahiz eta programan eskatzen den errendimendua gainditu, ikasleek nahitaez bete beharko dute Nafarroako Unibertsitate Publikoko ikasketetan jarraitzeari buruzko araudia, Gizarte Kontseiluak ezarria.

16. artikulua. Programa uztea.

1. Ikasleek, hala nahi badute, programa uzteko eskaera egiten ahalko dute, idatziz, ikasketa ofizialetako prozedura administratiboen egutegian ezarritako epean.

2. Ikasleek bi titulazioetako edozeinetan jarraitzen ahalko dute ikasten baldin eta programazioa osatzen duten bi titulu horietan onartua izateko gutxieneko nota badute. Ikasleak bi titulu ofizialak bereizita ikastea aukeratzen badu, IV. kapituluan ("Ikasketen aldiberekotasuna") ezarritakoa aplikatuko zaio, eta ez du eskubiderik izanen titulu ofizial bakoitzerako ezarritakoez bestelako irakaskuntza-programazio bat eta beste ordutegi batzuk eskatzeko.

3. Ikasleren batek programa uzten badu eta bere onartua izateko notak bi tituluetako batean bakarrik sartzeko modua ematen badio, titulazio horretan bakarrik jarraitzen ahalko ditu ikasketak.

17. artikulua. Titulu bikoitzaren aldibereko programa amaitzea.

1. Ikasle batek aldibereko programa osatu duela ulertuko da berariazko programazioan eskatzen diren kreditu guztiak lortzen dituenean, eta horrek berekin dakar bi titulu indibidualak lortzeko baldintzak beteak izatea ikasleak.

2. Ikasleek programa amaitzen dutenean eta unibertsitateko titulu ofizialak eskatzen dituztenean, dagozkien planetara pasatuko dira lortutako kalifikazioak. Aldibereko programako irakasgai bakoitza zer planetakoa den, plan horretara pasatuko da dagokion irakasgaian lortutako nota, Gobernu Kontseiluak onetsitako erabakian aurreikusitako aitorpen prozeduraren bidez.

3. Programaren amaiera-data zehazteko, oro har, kredituen aitorpena ebazten den eguna hartuko da kontuan.

18. artikulua. Bekak eta sari bereziak.

1. Estatuak, autonomia-erkidegoek edo beste erakunde ofizial batzuek deitu eta Nafarroako Unibertsitate Publikoak kudeatzen dituen bekak edo ikasteko laguntzak eskatzearren ikasleak bi titulu ofizialetako batean matrikulatuta egotea beharrezkoa denean, dagokion deialdiari hobekien egokitzen zaiona tramitatuko da.

2. Araudi honetan araututako programetan aparteko sariak emateko, graduko eta masterreko ikasketa ofizialetan aparteko sariak emateko arauak bete beharko dira.

HIRUGARREN ATALA.–NAFARROAKO UNIBERTSITATE PUBLIKOKO TITULU BIKOITZEKO ONDOZ ONDOKO PROGRAMAK

19. artikulua. Ikasketak planifikatzea eta ematea.

1. Titulu bikoitzeko ondoz ondoko programek maila akademiko bereko bi titulu ofizial elkarren segidan lortzeko aukera emanen diete ikasleei, eta bi ibilbide desberdin izan ditzakete (1. titulua + 2. titulua edo 2. titulua + 1. titulua).

2. Ondoz ondoko programa onesten duen berariazko erabakian, aurreikusitako ibilbidea edo ibilbideak jasoko dira, eta berariaz adieraziko da lehenbiziko tituluko ikasleek zer irakasgai eta kreditu egin behar dituzten bigarren tituluan eta zenbat kreditu aitortuko zaizkien.

20. artikulua. Programan sartzeko baldintzak.

Honako hauek sartzen ahalko dira:

a) Ondoz ondoko programa osatzen duen lehenbiziko tituluko egresatuak.

b) Ondoz ondoko programa osatzen duen lehenbiziko tituluko ikasleak, baldin eta 180 ECTS kreditu (graduaren kasuan) edo 30 ECTS (masterraren kasuan) gaindituak badituzte.

21. artikulua. Ikaspostuak eta onarpena.

1. Gobernu Kontseiluak onetsiko du ondoz ondoko programa bakoitzak zenbat ikaspostu izanen dituen ikasturte bakoitzean, eta berariaz adieraziko du programa osatzen duen ibilbide bakoitzeko ikaspostu kopurua, halakorik balego.

2. Lehenbiziko tituluko egresatuek, bigarren tituluan onartuak izateko eskaera egiteko, unibertsitate tituludunentzako sarbide orokorreko prozedura erabili beharko dute.

3. 20.b) artikuluan aurreikusitako ikasleek, aldiz, ikasketaz aldatzeko prozeduraren bidez egiten ahalko dute bigarren tituluan onartuak izateko eskaera.

22. artikulua. Matrikula eta ikasketetan jarraitzea.

1. Ikasturte bakoitzerako onetsitako egutegi administratiboan oro har ezarritako epeetan eginen da programa osatzen duen bigarren tituluko matrikula.

2. Bigarren tituluaren matrikularen zenbatekoak bat etorriko dira prezio publikoak onesten dituen foru aginduan adierazitako esperimentaltasun mailarekin.

3. Ondoz ondoko programetan onartuak diren ikasleei Nafarroako Unibertsitate Publikoko Ikasketetan jarraitzeari buruzko araudia aplikatuko zaie.

23. artikulua. Kredituen aitorpena.

Programa osatzen duen bigarren tituluan kredituak automatikoki aitortuko dira, programan aurreikusitako kredituak gainditu ondoren, eta ez da prezio publikorik ordainduko.

24. artikulua. Programa uztea.

1. Programan onartuak izan eta bigarren titulua hasi eta gero, ikasleek programa uzten ahalko dute hala nahi izanez gero; ikasketetan jarraitzeko arauak ez betetzeak ere berekin ekarriko du programa uztea.

2. 20.b) artikuluan aipatzen den kasuan, programa utzi arren ikasleek aukera izanen dute bi tituluak ikasten jarraitzeko, kontu hori arautzen duen araudi orokorrarekin bat etorriz.

LAUGARREN ATALA.–BESTE UNIBERTSITATE BATZUEKIN BATERA EMATEN DIREN TITULU BIKOITZEKO PROGRAMA AKADEMIKOAK

25. artikulua. Beste unibertsitate batzuekin batera ematen diren titulu bikoitzeko programa akademikoak.

Beste unibertsitate batzuekin batera –dela Espainiakoak, dela atzerrikoak– ematen diren titulu bikoitzeko programa akademikoen kasuan, dagokion lankidetza-hitzarmenean jasoko dira funtzionamendu arauak.

26. artikulua. Hitzarmenen edukia.

Hitzarmenek honako hauek jaso beharko dituzte gutxienez:

a) Hitzarmenak barne hartzen dituen unibertsitate edo erakundeen datu osoak.

b) Proposatzen den unibertsitatearteko programaren helburuak.

c) Programan sartzeko baldintzak, eta, beharrezkoa izanez gero, hizkuntzaren eta mailaren berariazko baldintzak ere bai.

d) Zenbat ikaspostu eskainiko diren programan.

e) Programan parte hartuko duten ikasleak hautatzeko mekanismoa.

f) Ikasketen programa xehatua, parte hartzen duen unibertsitate bakoitzaren ikasketa-plan bakoitzean egin beharreko eta ikasleei aitortu beharreko berariazko gaiak jasoko dituena.

g) Programaren irakaskuntza-plangintza eta denboran izanen duen garapena, bateragarria izan beharko dena inplikatutako erakundeen egutegi akademiko eta administratiboekin.

h) Kalifikazio sistemak eta horien arteko baliokidetasuna.

i) Erakundeek hartutako konpromisoak egindako ebaluazioak elkarri aitortzeari, ikasleei laguntza emateari, prezio publikoei, jarraipen ekonomikorako mekanismoei eta abarri dagokienez.

j) Informazio akademikoa trukatzeko protokoloa (matrikula, emaitza akademikoak, ziurtagiriak...).

k) Tituluak emateko baldintzak.

l) Jarraipen Batzordea, hitzarmenaren baldintzak betetzen ote diren ikusteko.

m) Hitzarmenaren indarraldia, luzatzeko aukerak eta iraungitzeko baldintzak.

BIGARREN KAPITULUA.–UNIBERTSITATEARTEKO TITULU BATERATUEN PROGRAMAK

27. artikulua. Xedea eta aplikazio eremua.

1. Unibertsitatearteko titulu bateratuen programak dira Nafarroako Unibertsitate Publikoak Espainiako edo atzerriko unibertsitate batekin edo gehiagorekin edo goi mailako irakaskuntzako erakunde batekin edo gehiagorekin adostutako programak. Horien bidez, curriculum ibilbide bat diseinatzen da, unibertsitate horietako bakoitzean egindako ikasketen elkarrekiko aitortzan oinarritua, aukera ematen duena parte hartzen duten unibertsitate guztiek sinatutako titulu bakar bat lortzeko.

2. Unibertsitatearteko titulu bateratuak izanen dira, halaber, Nafarroako Unibertsitate Publikoak Campus Iberusen edo UNITAren esparruan goi mailako hezkuntzako beste erakunde batzuekin egindako aliantza estrategikoen barnean adostutakoak, bai eta Europako bikaintasuneko programak ere, hala nola Erasmus Mundus Joint Degrees deritzonak; horiek denek aukera ematen dute programan parte hartzen duten unibertsitate guztiek sinatutako titulu bakar bat lortzeko.

3. Programa horiek ezartzeko, berariazko hitzarmen bat sinatu beharko dute inplikatutako erakundeek, hurrengo artikuluan araututako prozeduraren bidez.

4. Hitzarmen horrek, gainera, Nafarroako Unibertsitate Publikoan eta beste erakundeetan hitzarmenen arloan aplikatzekoak diren baldintza guztiak bete beharko ditu.

28. artikulua. Unibertsitatearteko tituluen hitzarmenen edukia.

Hitzarmenek honako hauek jaso beharko dituzte gutxienez:

a) Hitzarmenak barne hartzen dituen unibertsitate edo erakundeen datu osoak.

b) Proposatzen den programa bateratuaren helburuak.

c) Programan sartzeko baldintzak, eta, beharrezkoa izanez gero, hizkuntzaren eta mailaren berariazko baldintzak ere bai.

d) Zenbat ikaspostu eskainiko diren programan.

e) Programan parte hartuko duten ikasleak hautatzeko mekanismoa.

f) Ikasketa-programa xehatua, zehaztuko duena berariazko zer irakasgai eginen diren unibertsitatetako bakoitzean eta zer hizkuntza eta modalitatetan emanen diren.

g) Programaren irakaskuntza-plangintza eta denboran izanen duen garapena, bateragarria izan beharko dena inplikatutako erakundeen egutegi akademiko eta administratiboekin.

h) Kalifikazio sistemak eta horien arteko baliokidetasuna.

i) Erakundeek hartutako konpromisoak egindako ebaluazioak elkarri aitortzeari, ikasleei laguntza emateari, prezio publikoei, jarraipen ekonomikorako mekanismoei eta abarri dagokienez.

j) Informazio akademikoa trukatzeko protokoloa (matrikula, emaitza akademikoak, ziurtagiriak...).

k) Titulu bateratua emateko baldintzak.

l) Jarraipen Batzordea, hitzarmenaren baldintzak betetzen ote diren ikusteko.

m) Hitzarmenaren indarraldia, luzatzeko aukerak eta iraungitzeko baldintzak.

29. artikulua. Unibertsitatearteko titulu bateratuak proposatzea eta onestea.

1. Edukiari dagokionez, gainerako unibertsitate titulu ofizialei aplikatzekoak zaizkien xedapenek arautuko dituzte unibertsitatearteko titulu bateratuak, eta onesteko prozedurari dagokionez, araudi honen lehenbiziko kapituluko lehenbiziko atalean ezarrita dagoenak.

2. Europako Batzordearen Europako Unibertsitateen Programaren esparruan ematen diren unibertsitate titulu bateratuak 822/2021 Errege Dekretuaren zazpigarren xedapen gehigarrian ezarritakoaren arabera arautuko dira.

3. Erasmus Mundus programaren esparruko nazioarteko titulu bateratuen kasuan (Erasmus Mundus Joint degrees), 822/2021 Errege Dekretuaren zortzigarren xedapen gehigarrian xedatutakoa aplikatuko da.

30. artikulua. Programen kudeaketa.

1. Irakaskuntzako gaietan eskumena duen errektoreordetza arduratuko da araudi honetan araututako unibertsitatearteko tituluen hitzarmenei buruzko informazioa kudeatzeaz eta eguneratuta edukitzeaz.

2. Nafarroako Unibertsitate Publikoko graduko edo unibertsitate masterreko tituluaren ardura duen ikastegiak zainduko du unibertsitatearteko programa behar bezala betetzea, hau da, hitzarmenean ezarritako baldintza akademikoen arabera betetzea.

31. artikulua. Alderdi akademikoak eta administratiboak.

1. Unibertsitatearteko tituluaren programa arautzen duten alderdi akademiko eta administratibo guztiak unibertsitateen artean sinatutako hitzarmenean jaso beharko dira, 28. artikuluan ezarritako edukiarekin.

32. artikulua. Mugikortasun programak.

Titulazio bikoitzeko programetan edo programa bateratuetan matrikulatutakoek NUPeko mugikortasun deialdietan parte hartzen ahalko dute, eta titulazio horietarako ezartzen diren destinoetara joaten ahalko dira. Atzerriko unibertsitateekin egiten diren titulazio bikoitzen edo titulazio bateratuen programen kasuan, programa osatzen duten unibertsitateak destino horien artean egoten ahalko dira.

HIRUGARREN KAPITULUA.–IKASKETEN ALDIBEREKOTASUNA

33. artikulua. Xedea eta aplikazio eremua.

1. Ikasketen aldiberekotasunak aukera emanen die ikasleei Nafarroako Unibertsitate Publikoko edo beste unibertsitate batzuetako bi titulu edo gehiago lortzeko, aldi berean egiten dituzten ikasketen antolaketa pertsonalaren bidez.

2. Aldiberekotasuna ikasle bakoitzaren aukera pertsonala da, eta ez da nahastu behar araudi honetan araututako titulu bikoitzen edo unibertsitatearteko tituluen berariazko programekin.

34. artikulua. Eskakizun orokorrak.

1. Nafarroako Unibertsitate Publikoko edo beste unibertsitate bateko titulu ofizial bat egiten ari diren ikasleek aukera izanen dute aldi berean bigarren titulu bat Nafarroako Unibertsitate Publikoan ikasteko, betiere eskakizun hauek betetzen badituzte:

a) Bigarren tituluan onartua izatea ikasketak aldi berean egin nahi diren ikasturterako aurreikusitako edozein onarpen prozeduraren bidez.

b) Lehenbiziko tituluko ikasketa-planeko kredituen %25 gainditu izana gutxienez. Hala ere, aurreko eskakizuna betetzen ez duten ikasleek ere aukera izanen dute ikasketak aldi berean egiteko eskaera egiteko, baldin eta aldi berean egin nahi duten tituluan ikaspostu hutsik badago matrikula-prozesuaren ondoren.

2. Lehenbiziko titulua beste unibertsitate batean egiten bada, dagoeneko hasita dauden ikasketen ziurtagiri akademiko pertsonala aurkeztu beharko da aurreko eskakizuna betetzen dela egiaztatzeko. Kasu horretan, gainera, jatorrizko unibertsitateko errektorearen edo agintari akademiko eskudunaren aldeko txostena edo baimena beharko da. Jatorrizko unibertsitateko espedientea lekualdatzeko eskaera egin beharko da, ikasketak aldi berean egiteko arrazoia adierazita. Jatorrizko unibertsitateak lekualdaketa onartzeak berekin ekarriko du ikasleari ikasketak aldi berean egiteko baimena ematea.

35. artikulua. Berariazko eskakizunak.

1. Aldibereko ikasketak egiteko baimena izateak ez die ikasleei eskubiderik ematen bi tituluak aldi berean egiteko modua emanen duen curriculum egokitzapen bat izateko; beraz, ezin izanen da bermatu bi ikasketen arteko ordutegi- eta ikasketa-bateragarritasunik.

2. Aldiberekotasuna onartua dutenek nahitaezkoa izanen dute titulu bakoitzean eska daitezkeen arduraldiari, matrikulari, sekuentzialtasunari eta errendimenduari buruzko araudia betetzea.

36. artikulua. Prozedura.

1. Ikasketak aldi berean egiteko eskaera Nafarroako Unibertsitate Publikoko errektoreari egin beharko zaio, ikasturte bakoitzeko matrikularako ezarritako epea amaitu baino lehen.

2. Eskatzailearen baldintzak ebaluatu ondoren, eta ikaspostu hutsik baldin badago, errektoreak berariaz ebatziko du aldiberekotasunaren eskaera, eta ezezkoa emanez gero, ebazpen arrazoitu bat eman beharko du.

3. Aldiberekotasuna baimendu ondoren, ikasleak espediente akademikoa irekita izanen du titulu bakoitzean.

XEDAPEN GEHIGARRIAK

Lehenbizikoa.–Araudia garatzeko baimena.

Irakaskuntzako gaietan eskumena duen Errektoreordetzari baimena ematen zaio araudi hau garatzeko eta aplikatzeko beharrezkoak diren ebazpenak emateko. Ebazpen horiek Unibertsitatearen iragarki ohol elektroniko ofizialean argitaratuko dira.

Bigarrena.–Ikasleen eskaerak.

Arau hauen aplikazio eremuan ikasleek aurkezten dituzten eskaerak, epea ezarrita ez dutenak, eskaera epea bukatzen denetik gehienez ere 30 egun naturaleko epean ebatziko dira. Nolanahi ere, administrazioaren isiltasunak eskaera ez onartzea dakar.

Hirugarrena.–Lanbide arautuetan aritzeko gaitzen duten tituluak.

Espainian lanbide arautuetan aritzeko gaitzen duten tituluen kasuan, araudi hau aplikatzekoa izanen da Gobernuak 2021eko irailaren 28ko 822/2021 Errege Dekretuaren hamabigarren xedapen gehigarrian jasotzen denaren arabera ezartzen dituen baldintzekin bateragarria den heinean –errege dekretu horrek unibertsitateko ikasketen antolamendua eta haien kalitatea bermatzeko prozedura ezartzen ditu–.

XEDAPEN IRAGANKOR BAKARRA

Araudi hau indarrean jartzen denetik aurrera, titulu bikoitzeko programa akademikoek urtebeteko epea izanen dute araudira egokitzeko.

XEDAPEN INDARGABETZAILE BAKARRA.–ARAUAK INDARGABETZEA

Indarrik gabe geldituko da Gobernu Kontseiluak 2018ko azaroaren 26an harturiko erabaki bat, titulu bikoitz ofizialen programazioen araudiek bete beharreko irizpideak ezartzen dituena. 2018ko erabaki horren babesean emandako titulu bikoitz bakoitzeko araudiek indarrean jarraituko dute harik eta erabaki hau garatzeko ezartzen den araudi berria ezarri arte eta aurka egiten ez dioten bitartean.

Indarrik gabe gelditzen dira erabaki honetan ezarritakoari aurka egiten dioten maila bereko edo txikiagoko xedapen guztiak.

AZKEN XEDAPENAK

Lehenbizikoa.–Eskumenen titulua.

Araudi hau honako bi artikulu hauetan ezarritakoaren babesean eman da: batetik, Unibertsitateei buruzko 2023ko martxoaren 22ko 2/2023 Lege Organikoaren 46. artikulua, zeinak Gobernu Kontseiluari esleitzen baitio irakaskuntzaren antolamenduaren eremuan ildo estrategikoak eta programatikoak ezartzeko eskumena eta haiek aplikatzeko jarraibideak eta prozedurak ezartzekoa; eta, bestetik, Nafarroako Unibertsitate Publikoaren Estatutuetako 20.b) artikulua, zeinaren arabera Gobernu Kontseiluaren eginkizunen artean baitago jarraibide orokorrak eta ikasketak antolatzeko arloetan jarraibideak aplikatzeko prozedurak onestea –2003ko maiatzaren 12ko 110/2003 Foru Dekretuaren bidez onetsi ziren Estatutuak (NAO, 63 zk., 2003ko maiatzaren 19koa), eta Nafarroako Gobernuak 2011ko martxoaren 21ean hartutako erabaki baten bidez aldatu (NAO, 70 zk., 2011ko apirilaren 11koa)–.

Bigarrena.–Indarra hartzea.

Araudi hau 2026ko irailaren 1ean sartuko da indarrean, eta 2026-2027 ikasturtetik aurrera izanen da aplikatzekoa.

Iragarkiaren kodea: F2610254