Iragarkia

151. ALDIZKARIA - 2026ko abuztuaren 4a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

117E/2026 FORU AGINDUA, ekainaren 22koa, Kultura, Kirol eta Turismoko kontseilariak emana, Nafarroako kirol federazioei dirulaguntzak emateko oinarri arautzaileak onesten dituena, 2026ko irailaren 1etik 2027ko abuztuaren 31ra bitarteko aldirako. DDBN kodea: 914889.

Nafarroako Kirolari buruzko uztailaren 5eko 15/2001 Foru Legeak 6.1 artikuluan ezartzen duenaren arabera, Foru Komunitateko kirol administrazioari dagokio, egun Nafarroako Kirolaren eta Jarduera Fisikoaren Institutuaren bitartez, Nafarroako Gobernuaren kirol gaietako politika planifikatu eta betearaztea. 6.2.e) artikuluan adierazten da haren eskumenen artean dagoela Nafarroako kirol federazioak, esleitu zaizkien eginkizun publikoak betetzen ari direnean, koordinatu eta begiratzea, haien jarduera pribatua ezertan eragotzi gabe.

Aipatutako foru legeak, 33.a) artikuluan, zehazten du Foru Komunitateko kirol administrazioak dirulaguntzak ematen ahalko dizkiela Nafarroako kirol federazioei.

Ikusirik espedienteko txosten tekniko eta juridikoak, zeinek adierazten baitute, hurrenez hurren, dirulaguntza hauek ematea egokia eta interes publikokoa dela, eta deialdia eta oinarri arautzaileak legezkoak direla.

Horrenbestez, Kultura, Kirol eta Turismo Departamentuaren oinarrizko egitura ezartzen duen azaroaren 15eko 256/2023 Foru Dekretuak ematen dizkidan ahalmenak erabiliz,

AGINTZEN DUT:

1. Nafarroako kirol federazioei dirulaguntzak emateko deialdia onestea, 2026ko irailaren 1etik 2027ko abuztuaren 31ra bitarteko aldirako.

2. Nafarroako kirol federazioei dirulaguntzak norgehiagokako araubidean emateko oinarri arautzaileak onestea, 2026ko irailaren 1etik 2027ko abuztuaren 31ra bitarteko aldirako, baita dokumentazioa aurkezteko erabili beharreko ereduak ere. Oinarri arautzaileen testua I. eta II. eranskinetan dago, eta ereduak III., IV., V., VI., VII. eta VIII. eranskinetan.

3. Deialdi honen konpromisoei aurre egiteko, aurrekontuko kreditu hauek erreserbatu dira:

4. Deialdi honen konpromisoei aurre egiteko, jarraian adierazten diren aurrekontu-kredituak baimentzen dira; hala ere, aldaketak egiten ahalko dira, jasotzen diren eskaerak kontuan hartuta:

5. Foru agindu hau eta I. eta II. eranskinak Nafarroako Aldizkari Ofizialean argitaratzea. Gainerako eranskinak nafarroa.eus web-orrian eskuratzen ahalko dira.

6. Deialdi honen eta oinarri arautzaileen kontra gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, argitaratu eta biharamunetik hasita.

Iruñean, 2026ko ekainaren 22an.–Kultura, Kirol eta Turismoko kontseilaria, Rebeca Esnaola Bermejo.

I. ERANSKINA.–OINARRI ARAUTZAILEAK, NAFARROAKO KIROL FEDERAZIOEI DIRULAGUNTZAK EMATEKO DEIALDIRAKO, 2026KO IRAILAREN 1ETIK 2027KO ABUZTUAREN 31RA BITARTEKO ALDIRAKO

1. oinarria. Xedea eta helburua.

1. Deialdi honen xedea da arautzea nola eman dirulaguntzak Nafarroako kirol federazioei, 2026ko irailaren 1etik 2027ko abuztuaren 31ra bitarteko aldirako.

2. Dirulaguntza horiek emanez Nafarroako kirol federazioei lagundu nahi zaie Nafarroako Kirolari buruzko uztailaren 5eko 15/2001 Foru Legeak eta hura garatu zutenek ezartzen dituzten eginkizunak bete ditzaten.

3. Dirulaguntza hauen bidez helburu sozial hauek lortu nahi dira:

a) Nafarroako kirol federazioen ohiko funtzionamendua sustatu eta erraztea.

b) Nafarroako lehiaketa ofizialak sustatzea, horrelakoak antolatzeko erraztasunak ematea eta nazio mailako lehiaketetako parte-hartzea sustatzea.

c) Kirol praktika federatua Nafarroako Foru Komunitatean garatu eta heda dadila bultzatzea.

2. oinarria. Kontzeptu diruz lagungarriak.

1. Ohiko funtzionamendurako gastuak.

2. Nafarroako txapelketa ofizialak antolatzea.

3. Txapelketa nazional ofizialetan parte hartzea.

4. Txapelketa nazional ofizialak antolatzea.

5. Sustapen jarduerak.

6. Prestakuntza jarduerak.

7. Kirol arloko trukeak.

8. Kirol jantziak.

9. Material inbentariagarriaren ekipamendua.

3. oinarria. Entitate onuradunak.

Nafarroako Kirolaren Erregistroan inskribaturik dauden Nafarroako kirol federazioak izan daitezke dirulaguntza hauen onuradun, apirilaren 14ko 80/2003 Foru Dekretuan xedatutakoarekin bat, horren bidez arautu baitziren Nafarroako kirol entitateak eta Nafarroako Kirol Entitateen Erregistroa (gaur egun, Nafarroako Kirolaren Erregistroa esaten zaio).

4. oinarria. Kirol federazioek, onuradun izateko, bete beharreko baldintzak.

1. Nafarroako Kirolaren Erregistroan inskribatuta egotea.

2. Zerga arloko eta Gizarte Segurantzarekiko betebeharrak egunean izatea, baita Nafarroako Foru Komunitateko Administrazioari edo haren erakunde autonomoei zorrak ordaintzeko betebeharrak ere.

3. Aseguru bat kontratatuta izatea, kirol federazioek antolatutako jardueren ondoriozko erantzukizun zibila estaltzen duena, bai entitatearentzat berarentzat, bai haren izenean ari diren pertsonentzat ere (zuzendaritza taldekoentzat eta langileentzat).

4. Dirulaguntzen onuraduna izateko, Dirulaguntzei buruzko azaroaren 9ko 11/2005 Foru Legearen 13. artikuluan ezarritako debekuetatik kanpo egotea.

5. Jokoari buruzko abenduaren 14ko 16/2006 Foru Legearen 2. xedapen gehigarriak araututakoarekin bat, federazioak ezin izanen dira onuradun izan baldin eta apustu enpresek (apustu makinen operadore diren enpresak barne), guztiz edo zati batean, finantzatzen eta/edo babesten badituzte. Halaber, deialdi honetatik bazter gelditzen dira halako enpresen edozein publizitate mota duten federazioak, dela jarduera egin behar den instalazioetan, dela parte-hartzaileen ekipamenduetan eta materialean.

6. Halaber, kirol federazioak ez dira izaten ahalko deialdi honen xedeko dirulaguntzen onuradun baldin eta, laguntza eskatzen dutenean, administrazio-zehapen irmo bat edo kondena-epai irmo bat betetzen ari badira sexu- edo genero-diskriminaziotzat hartutako lan-praktikak egiteagatik edo onartzeagatik. Era berean, kirol federazioak ez dira deialdi honen xedeko dirulaguntzen onuradun izaten ahalko baldin eta, laguntza eskatzen dutenean, arrazoi horiengatik ezarritako zehapen bat edo kondena epai bat bete zain badaude.

Eskaerak aurkezteko epea bukatzen den egunean bete beharko dira baldintza guztiak, eta, orobat, diruz lagundutako jarduerak irauten duen bitartean.

5. oinarria. Eskaerak aurkeztea.

1. Eskaerak aurkezteko epea 45 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

2. Eskaerak telematikoki aurkeztuko dira nahitaez, Nafarroako Gobernuak Interneten duen Atariaren (www.nafarroa.eus) tramiteen katalogoko fitxa erabiliz (hemendik aurrera, laguntzen fitxa).

Eskaera Nafarroako Kirolaren eta Jarduera Fisikoaren Institutuari zuzenduko zaio, horretarako ezarritako eredu ofizialari jarraikiz. Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.8 eta 66.6 artikuluetan xedatutakoari jarraikiz, ez dira aurkeztutzat hartuko laguntzen fitxan dagoen eredura egokitzen ez diren eskaerak, ez eta telematikoki eta aipatutako fitxaren bitartez aurkezten ez direnak ere. Horrenbestez, ez-aurkeztutzat jotzen direnez, eskaera horiek ezin izanen dira zuzendu.

6. oinarria. Entitate eskatzaileek aurkeztu beharreko agiriak.

Tramiteen katalogoko fitxan, eskaera aurkezteko laguntzari jarraitu, eta deialdiko atal guztiei dagozkien dokumentazioa eta inprimakiak erantsi behar dira, pdf (sinadura digitalarekin), excel eta/edo word formatuan, NKJFIk (Nafarroako Kirolaren eta Jarduera Fisikoaren Institutuak) ezarritako ereduekin bat: III. eranskina (eskaera-inprimaki orokorra) eta IV. eranskina (eskaera-inprimakiak, atalka). Hau da dokumentazioa:

1. Eskaera-inprimaki orokorra.

2. Entitatearen ordezkariak emandako erantzukizunpeko adierazpen bat, Dirulaguntzei buruzko azaroaren 9ko 11/2005 Foru Legea betetzearekin loturiko zenbait baldintza aipatzen dituena.

3. Nafarroako Gobernuko Ekonomia eta Ogasun Departamentuak emandako ziurtagiria, frogatzen duena egunean dituela Foru Ogasunarekiko zerga betebeharrak. Ziurtagiri horrek hilabeteko antzinatasuna izanen du gehienez. Ez da dokumentazio hori aurkeztu beharko baldin eta baimena ematen bada NKJFIk egiaztapen hori zuzenean egin dezan Ekonomia eta Ogasun Departamentuan.

4. Gizarte Segurantzako Diruzaintza Orokorrak egindako ziurtagiria, gehienez hiru hilabeteko antzinatasuna izanen duena, entitate eskatzaileak Gizarte Segurantzarekiko betebehar guztiak egunean dituela egiaztatzen duena. Ez da dokumentazio hori aurkeztu beharko baldin eta baimena ematen bada NKJFIk egiaztapen hori zuzenean egin dezan Gizarte Segurantzaren Diruzaintza Orokorrean.

5. Kirol federazioek antolatutako jardueren ondoriozko erantzukizun zibila estaltzen duen aseguruaren polizaren kopia eta aseguru horren azkeneko ordainketaren egiaztagiriarena. Aseguruak entitatearen beraren nahiz haren izenean ari diren pertsonen (zuzendaritza taldekoen eta langileen) erantzukizun zibila estali behar du.

6. Eskaeraren xedeko kontzeptu bakoitzerako (eranskin honen 2. oinarriaren 1. ataletik 9.era) eskaera-inprimakiak, NKJFIk egindako ereduei jarraikiz (IV. eranskinean daude).

7. Ekipamenduari buruzko atala: eskatutako materialaren aurrekontua aurkeztu beharko da, materiala hornituko duten enpresek egina.

8. Indarrean dagoen kudeaketa aurreratuko eredurako egindako prestakuntzaren aitortza egiaztatzen duen dokumentazioa, prestakuntza hori behar bezala egin duten federazioentzat. Ildo horretan, II. eranskinaren 1. oinarrian ezarritakoa betetzen dela egiaztatzeko, federazioak ziurtagiri pertsonal bat aurkeztu beharko du, erakundeari dagokion ziurtagiriaz gain, frogatzeko ezen, gutxienez, federazioaren egungo zuzendaritza batzordeko edo kudeatzailetzako kide batek behar bezala amaitu duela ikastaroa.

7. oinarria. Eskaerako akatsak zuzentzea.

Aurkezten den dokumentazioa aski ez bada edo deialdian eskatzen diren betebeharrak betetzen ez baditu, entitate eskatzaileari errekerimendua eginen zaio, gaitutako helbide elektroniko bakarraren bidez, 10 egun balioduneko epean dokumentazioa osa dezan edo akatsak zuzen ditzan, eta ohartaraziko zaio ezen, hala egin ezean, bere eskabidea ezetsi eginen dela, bat etorriz Dirulaguntzei buruzko azaroaren 9ko 11/2005 Foru Legearen 19.3 artikuluan ezarritakoarekin.

8. oinarria. Antolamendua eta instrukzioa.

1. Nafarroako Kirolaren eta Jarduera Fisikoaren Institutuko Entitateei Arreta Egiteko eta Kirol Errendimendurako Zuzendariordetza izanen da deialdi hauek emateko prozedura antolatzeko eta instruitzeko unitate organiko eskuduna.

2. Instrukzio organoak administrazio publikoko arlo juridikoko teknikari baten laguntza izanen du.

3. Instrukzio organoak eskaerak ebazteko beharrezkotzat jotzen duen dokumentazioa edo informazio osagarria eskatzen ahalko du edonoiz, baita oinarri arautzaile hauetan eskatzen diren baldintzak zorrotz betetzen direla frogatzeko ere.

4. Federazio eskatzailearen gaitutako helbide elektroniko bakarraren bidez eginen da dokumentazioa osatu edo zuzentzeko errekerimendua, aurreko paragrafoetan ezarri dena.

9. oinarria. Dirulaguntzak emateko prozedura, balorazioa eta zenbatekoa.

1. Dirulaguntzei buruzko azaroaren 9ko 11/2005 Foru Legean ezarritakoaren arabera, laguntza hauek norgehiagokako araubideari jarraikiz emanen dira, Dirulaguntzei buruzko Foru Legearen 17.1 artikuluan xedatutakoarekin bat.

2. Aurkeztutako eskaeren balorazioan, eta eman beharreko dirulaguntzen zenbatekoa zehazteko, foru agindu honen II. eranskinean (baremoa) ezarritako irizpideak hartuko dira kontuan.

3. Balorazio ekonomikotik ateratzen den zenbateko osoa aurrekontuetan erabilgarri dagoen diru kopurua baino handiagoa bada, baremoa aplikatuta ateratzen diren kopuruak modu proportzionalean banatu edo hainbanatuko dira, II. eranskinean ezarritako xehetasunen arabera.

10. oinarria. Alegazioetarako tramitea.

Eskaeren hasierako balorazioa eginda, Entitateei Arreta Egiteko eta Kirol Errendimendurako Zuzendariordetzak kirol federazio guztiei jakinaraziko die laguntzak emateko prestatu duen proposamena, eta hamar egun balioduneko epea emanen die alegazioak aurkezteko, araudi honetan xedatutako irizpideak egoki aplika dakizkien aurkeztutako eskaerei.

11. oinarria. Eskaera berregitea.

1. Alegazioen tramitea bukaturik, Entitateei Arreta Egiteko eta Kirol Errendimendurako Zuzendariordetzak kirol federazio guztiei jakinaraziko die laguntzak emateko prestatu duen proposamena, eta hamar egun balioduneko epea emanen die eskaera berregiteko, hurrengo atalean xedatutakoari jarraikiz.

2. Proposatutako dirulaguntzarekin batera 9. oinarriko 3. atalean adierazitako hainbanaketa ere jakinarazten bada, kirol federazioek zilegi izanen dute eskaera berregitea hasierako eskaeran adierazitako jarduera berberetarako, gastu-konpromisoak eta baldintzak diruz laguntzen ahal den kontzeptu bakoitzerako eman daitekeen zenbatekora doitzeko. Nolanahi ere, eskaera berregitean dirulaguntzaren xedea, baldintzak eta helburuak errespetatu beharko dira, bai eta eskaeraren atal bakoitzerako ezarritako balorazio irizpideak ere. Irizpide hauei jarraikiz eginen da doikuntza hori:

a) Kirol federazioaren beraren baliabideekin (diruz lagungarria den jarduerak zuzenean sortzen ez dituenekin) eta jardueraren berariazko baliabideekin (kuotekin, babesletzekin eta abarrekin) finantzatzen den kopurua, hasierako eskaeran adierazitakoa, mantendu beharko da.

b) Eskaera berreginda, horren ondorioz azkenean ateratzen diren dirulaguntzek errespetatu egin beharko dituzte II. eranskinean ezartzen diren dirulaguntzaren gehieneko ehunekoak.

c) 9.3 oinarrian zehaztutako hainbanatze-ehunekoa %5 baino txikiagoa bada deialdiaren atalen batean, atal hori ez da berreginen.

3. Jantzien eta ekipamenduaren atalak berregitean, hasierako eskaeran jarri zen erosi beharreko kopuruari eutsiko zaio.

4. Instrukzio organoak eskaera berregina onetsi ondoren, dokumentazio guztia organo eskudunari igorriko zaio, laguntzen gaineko behin betiko ebazpena eman dezan. Organo eskudunak, dokumentazioa berrikusi ondoren, beharrezkotzat jotzen badu emandako zenbatekoren bat doitzea, eta zenbateko hori hainbanaketa eta aldaketa jaso duen atal batean badago, eskaera berriz egiten ahalko da berrikuspen horretara egokitzeko.

12. oinarria. Laguntzak emateko ebazpena.

1. Nafarroako Kirolaren eta Jarduera Fisikoaren Institutuko zuzendari kudeatzaileari dagokio aurkeztutako dirulaguntza eskaerak ebaztea. Dirulaguntzak emateko, xede horretarako behar adinako kreditua izan beharko da 2027rako Nafarroako Aurrekontu Orokorretan.

2. Dirulaguntzak emateko ebazpena gehienez ere 6 hilabeteko epean eman eta jakinaraziko zaie federazio interesdunei, eskaerak aurkezteko epea bukatzen denetik hasita. Dirulaguntza emateko ebazpenean dirulaguntzaren xedeak, zenbatekoa eta ordaintzeko modua agertuko dira. Halaber, hala behar bada, eskaeraren baten ezespenaren gainean ebatziko da.

3. Aditzera emateko ez beste deusetarako, laguntzak emateko ebazpena eta deialdi honen gaineko gainerako ebazpenak jakinarazteko, Nafarroako Kirolaren eta Jarduera Fisikoaren Institutuko bulego nagusietako iragarki-taulan argitaratuko dira, eta nafarroa.eus Interneteko atarian argitalpen horren berri emanen da.

4. Epe hori ebazpen berariazkorik eman eta jakinarazi gabe iraganik, eskaera ezetsi egin dela ulertuko da. Hala ere, Administrazioa beharturik egonen da ebazpena ematera.

5. Ekitaldi ekonomiko jakin baten kargura dirulaguntzak emateak ez du eskubiderik sortzen hurrengo urteetan ere dirulaguntzak emateko.

13. oinarria. Jarduera berrietarako eskaera.

1. Kirol federazioek, eskabide baten bidez, jarduera berri baterako dirulaguntza eska dezakete, betiere jarduera 2. oinarriko ataletako batean sartuta badago, edo hasiera batean aurreikusietako bat ordeztuko duen jarduera baterako. Horri dagokionez, kirol federazioak dirulaguntzen eskaera aurkeztu ondoren egiten direnak baizik ez dira hartuko jarduera berritzat.

2. Eskaera horiek eskatutako jarduera berria egiten hasi baino lehenago aurkeztu beharko dira.

3. Instrukzio organoak (Nafarroako Kirolaren eta Jarduera Fisikoaren Institutuko Entitateei Arreta Egiteko eta Kirol Errendimendurako Zuzendariordetza), behar den ofizioaren bitartez, eskaera onartu edo ez onartu erabakiko du, eta onartzeko edo atzera botatzeko arrazoiak emanen ditu.

4. Nafarroako Kirolaren eta Jarduera Fisikoaren Institutuak eskaera hori onartzen badu, dirulaguntzaren zenbatekoa ez da handituko; izan ere, emandako dirulaguntza konpentsatu eginen da jarduera berria ere kontuan izanda. Konpentsazio hori azken justifikazioan egin beharko da. Horrela, jardueraren bat egiten ez bada, edo gastua txikiagoa bada, aukera izanen da jarduera berri horiei dagokien dirulaguntzarekin konpentsatzeko, betiere bakoitzari dagokion baremoaren irizpideekin bat.

14. oinarria. Bateragarritasuna.

Deialdi honetan aurreikusitako dirulaguntzak bateragarriak izanen dira helburu bererako emandako beste edozein dirulaguntza edo laguntzarekin, NKJFIk berak emandako beste dirulaguntza batzuekin izan ezik. Hala ere, dirulaguntzen zenbatekoa ezin da inola ere izan entitate onuradunak egin beharreko jardueraren kostua baino handiagoa, bakarrik edo beste dirulaguntza, laguntza, diru-sarrera edo diruz lagundutako jardueraren berezko baliabide batzuekin batuta.

15. oinarria. Dirulaguntzaren ordainketa.

1. Dirulaguntzaren ordainketa bi modutara egiten ahalko da: ordainketen bidez eta konturako ordainketen bidez.

2. Nolanahi ere, lehendabiziko ordainketa egin baino lehen, gardentasun betebeharrak justifikatzeko dokumentazioa aurkeztu beharko da, 21. oinarrian araututakoari jarraikiz.

3. Konturako ordainketak egiteko prozesua:

a) Konturako ordainketak egiteko, dirulaguntzak emateko ebazpena eman ondoren, gehienez 4 konturako ordainketa egiten ahalko dira 2. oinarriaren 1., 2., 3., 4., 5., 6. eta 7. ataletako kontzeptuetarako, aldi hauei dagozkienak: 2026ko irailaren 1etik abenduaren 31ra, 2027ko urtarrilaren 1etik otsailaren 28ra, 2027ko martxoaren 1etik maiatzaren 31ra, eta 2027ko ekainaren 1etik abuztuaren 31ra. 2026ko irailetik abendura bitarteko aldiari dagokion ordainketa 2027. urtean eginen da, 2027ko Nafarroako Aurrekontuen gastu xedapena erabilgarri dagoenean, urte anitzeko deialdia baita, 2027ko aurrekontuen kargura. Gero, espedientea ixteko ebazpena emanen da; espedientea ixteko ebazpen horretan, azken justifikazioa baino lehen egindako konturako ordainketak doituko dira.

b) Konturako ordainketak egiteko aurkeztu beharreko agiriak:

Eginiko kirol jardueren memoria bat. Jarduera motaren arabera, datu hauek edukiko ditu: Nafarroako txapelketetan, egindako lehiaketan aktak; txapelketa nazionaletan parte hartzean, txapelketa horien aktak, diruz laguntzen den federazioaren kirolari nafarren parte-hartzea azpimarratuz, txapelketa non izan den, zer egunetan, parte-hartzaile kopurua eta lortutako emaitzak jakiteko moduan; beste jarduera batzuetan, datak, tokiak, parte-hartzaile kopurua, jardueraren balorazioa, irudi grafikoa eta abar, diruz lagundu den jarduera motaren arabera.

II.–Dokumentazio ekonomikoa: Dirulaguntzei buruzko azaroaren 9ko 11/2005 Foru Legearen 33.4 artikuluan ezarritakoaren arabera, federazioek adierazi beharko dute, dirulaguntzaren xede den jarduera bakoitzerako, zenbateko gastua egin duten aurreikusitako konturako ordainketa bakoitza egiteko egunean, VIII. eranskin gisa doan inprimaki-ereduaren arabera. Konturako ordainketa bakoitzean ordaindu beharreko zenbatekoa zehazteko, kontuan hartuko da zer erlazio duten jarduera bakoitzerako onartutako aurrekontuak (hasierakoak edo berreginak), jarduera horretarako emandako dirulaguntzak, eta ordainketa partzial horietako bakoitzean egindako gastuak, betiere muga izanik jarduera bakoitzerako dirulaguntza gisa emandako zenbatekoa. Moduluen bidez kalkulatzen diren jardueretan (txapelketa nazionaletan parte hartzearen atala), benetan egindako jardueraren justifikazioaren arabera eginen da kalkulu hori, eta modulua aplikatuko da kontuan hartuta parte-hartzaileen kopurua, lehiaketa-egunak eta benetako distantziak, gehieneko muga izanik atal horretako jarduera bakoitzerako dirulaguntza gisa emandako zenbatekoa; horretarako, atal horretako justifikazio-inprimakia aurkeztu beharko da.

4. Kirol federazioek noiznahi eskatzen ahalko dute ordainketen prozeduraren bidez ordaintzea, konturako ordainketen prozeduraren osagarri gisa. Prozedura horretan, diruz lagungarriak diren ataletakoren baten gaineko tarteko justifikazio-kontua aurkeztu beharko da (kontu osoa edo partziala); gainera, dagozkion gastuen eta ordainketen frogagiriak aurkeztu beharko dira.

5. 2. oinarriko 8. eta 9. ataletako kontzeptuei (kirol jantziak eta material inbentariagarriaren ekipamendua) dagokien dirulaguntza ordain dadin, aldez aurretik, federazioek aurkeztu behar dituzte diruz lagundutako kontzeptuak eskuratu direla justifikatzeko agiriak (jatorrizko fakturak) eta ordainketen egiaztagiriak. Dokumentazio hori diruz lagundutako material guzti-guztia eskuratutakoan aurkeztu beharko da, ez baitu balioko material horren parte baten justifikazio partzialak aurkeztea. Justifikazio hori aurkezteko azken eguna 2027ko urriaren 11 izanen da.

16. oinarria. Jardueren arteko doikuntzak.

1. Deialdiaren 1. ataletik 7.era bitartekoetan, dirulaguntzaren helburuak oso-osorik betetzen baldin badira, zilegi izanen da aurrekontuan aldaketak egitea deialdi honen arabera diruz lagungarriak diren atalen artean. Horrenbestez, jardueraren batean justifikatutako gastuak aurreikusitakoak baino txikiagoak izan badira, ataletako batzuetan erabili gabe geratzen den kreditu hori beste atal batean erabiltzen ahalko da, baldin eta aurreikusitakoak baino gastu handiagoak justifikatu baditu, bai eta diruz lagundutako jardueren izaera bereko edo antzeko izaerako beste jarduera berri batzuetan ere (13. oinarrian ezarritako prozeduraren arabera eskatu eta baimendu baldin badira). Banaketa proportzionalki eginen da, eta mugatzat hartuko dira, betiere, atal bakoitzaren gehieneko eta hainbanatutako ehunekoak, eta dirulaguntza emateko ebazpenean federazio bakoitzari esleitutako zenbatekoa.

2. Aurreko puntuan aipatu diren aurrekontuaren exekuzio-aldaketak jarduera bakoitzerako aurkeztutako jatorrizko aurrekontu osoaren gainean egiten ahalko dira.

3. Dirulaguntzak ematen dituen organoak, espedientea ixten denean, behar dena ebatziko du, aurkezten den azken justifikazioaren arabera.

17. oinarria. Justifikazioak.

1. Justifikazio-kontuen bidez eginen dira justifikazioak, salbu eta txapelketa nazionaletan parte hartzeko laguntzen atalekoak, horietarako moduluen prozedura erabiliko baita. Justifikazio-kontuan sartuko dira, orobat, txapelketa nazionaletan parte hartzeagatiko inskripzio gastuak eta hegazkinez egindako joan-etorrien gastuak. Kirol jantzien eta material inbentariagarriaren ekipamenduaren ataletan, justifikazioa honela eginen da: eskatutako eta onartutako kontzeptuak eskuratu direla justifikatzeko agiriak (fakturak) eta ordainketen egiaztagiriak aurkeztuz. Agiri horiek gastuen azken justifikazio gisa hartuko dira, eta horiek ere justifikazio-kontuan sartu beharko dira.

2. Justifikazio-kontu horretan dirulaguntza eskaeran adierazitako jardueren eta kontzeptuen egiaztagiriak sartuko dira, bakar-bakarrik.

3. Justifikatu beharko da %100ean exekutatu dela aurrekontua, hasierakoa edo berregina (kasua zein den), hots, deialdi honetako atal bakoitzerako dirulaguntza emateko oinarria izan dena. Justifikatutako gastua aurrekontua baino gutxiago baldin bada, zenbatekoa proportzioan egokituko da ixteko ebazpenean.

4. Dirulaguntza hauen onuradun diren kirol federazio guztiek azken justifikazio hori telematikoki aurkeztu beharko dute, tramiteen katalogoko laguntzen fitxen bidez, kirol federazioko lehendakariak sinatuta, eta 2027ko urriaren 11 izanen da agiriak aurkezteko azken eguna. Dokumentazio hori izenpe digitalarekin aurkeztu beharko da pdf formatuan, baita Excel formatuan ere, formatu horretako inprimakien kasuan:

a) Egindako jardueraren memoria bat, kirol arlokoa, eta, horrekin batera, kirol federazioak egindako eta aurreko epeetan justifikatu gabe gelditu diren kirol jarduera guztiei dagozkien frogagiriak.

b) Jarduera mota bakoitzerako eskaera-inprimakiak (ohiko funtzionamendua, Nafarroako txapelketak antolatzea, Espainiako txapelketetan parte hartzea, Espainiako txapelketak antolatzea, sustapena, prestakuntza eta trukeak), benetako exekuzioari dagokion zatia beteta (inprimakien ereduetan jasotako atal teknikoetan bakarrik).

c) Justifikazio-kontua, eta ordainketa eta diru-sarreren faktura eta egiaztagiriak. Dirulaguntzaren xede izan eta bete diren jardueren justifikazio-kontua V. eranskinean agertzen den ereduaren arabera prestatuko da, eta bertan jarduera bakoitzaren gastu eta diru-sarreren zerrenda sailkatu bat agertuko da, honako hauek adierazita: agiri zenbakia, jarduera, jaulkipen data, kontzeptua, zenbatekoa eta ordainketaren data. Inprimaki-eredu hori aldatu eta beste aurkezpen formal bat egin daiteke, goian adierazitako informazio guztia baldin badu. Azkeneko justifikazio-kontu hori bakarra izanen da dirulaguntzaren xedeko jarduera guztietarako, eta kirol federazioek urtean zehar aurkeztutako tarteko justifikazio-kontu guztiak hartuko ditu bere baitan. Justifikazio-kontu horretan sartuko da federazioko lehendakariak izenpetutako erantzukizunpeko adierazpen bat, zeinean adieraziko baita justifikazio-kontuan sartu direla diruz lagundutako jarduerak finantzatu dituzten diru-sarrera edo/eta dirulaguntza guztiak, zenbatekoak zein diren eta nondik etorri diren ere esanez. Justifikazio-kontuan sartzen diren jardueren izenek bat etorri behar dute eskaera-inprimakietan sartutako jardueren izenekin. Ordainketa eta diru-sarreren faktura eta egiaztagiriak NKJFIri aurkezteko prozedura honako hau izanen da: faktura horiek diruz lagundutako federazioen bulegoetan egonen dira, eta bertan berrikusiko ditu berrikuspen-txostenak egiteaz arduratzen den auditoreak, 17.5 oinarrian jasotzen den bezala.

d) Hornitzaileen hautaketari buruzko inprimakia: inprimaki hau aurkeztu beharko da, eta bertan adieraziko da hornitu diren ekipamendu-ondasunak edo aholkularitza edo laguntza-enpresek emandako zerbitzuak 12.000 eurotik gorakoak izan diren, Dirulaguntzei buruzko azaroaren 9ko 11/2005 Foru Legearen 28.3 artikuluaren arabera; gainera, hornitzaile horiek egon badira, adierazi beharko dira diruz lagun daitekeen gastuaren deskribapena, eskatutako eskaintzen zerrenda eta hautatutako eskaintza aukeratzeko arrazoia, hori guztia hornitzaileen hautaketa justifikatzeko inprimaki-ereduaren arabera (VI. eranskina).

e) Diruz lagundutako jardueren azpikontratazioari buruzko inprimakia: inprimaki hori aurkeztu beharko da egiaztatzeko zein egoeratan dagoen diruz lagundutako federazioa, jardueren azpikontratazioari dagokionez. Horretarako, VII. eranskineko inprimaki-eredua erabili beharko da. Diruz lagundutako jardueren exekuzioa, osorik edo partez, hirugarrenekin azpikontratatu den adierazi beharko da; azpikontratazio hori egin bada, azpikontratatutako jarduerak zeintzuk diren adierazi beharko da inprimaki honetan, azpikontratistak eta fakturatutako zenbatekoak adierazita, baita egindako gastuak ere, xehakatuak. Inprimaki horretan, halaber, federazioko lehendakariaren erantzukizunpeko adierazpen bat sartuko da, adieraziko duena bete dela azaroaren 9ko 11/2005 Dirulaguntzei buruzko Foru Legearen 26. artikuluaren 4. eta 7. apartatuek ezartzen dutena.

5. NKJFIk justifikazio-kontu horien gaineko berrikuspen txostenak eginen ditu, Kontu-auditoreen Erregistro Ofizialean inskribatuak dauden jarduneko kontu-auditoreen bidez. Txosten horiek honako baldintza hauek betez eginen dira:

I.–Txosten horien kontratazioa NKJFIk eginen du.

II.–Txostena maiatzaren 17ko EHA/1413/2007 Aginduan ezarritakoarekin bat eginen da. Agindu horren bidez, kontu-auditoreek dirulaguntzen justifikazio-kontuak berrikusteko lanetan bete beharreko jarduketa-araua onetsi zen.

6. Alternatiba moduan, Nafarroako Gobernuko langileek egiten ahalko dute justifikazio-kontu horien berrikuspena.

18. oinarria. Espedientea ixteko ebazpena.

Eranskin honen 16. eta 17. oinarrietan ezarritako dokumentazioa berrikusi ondoren, NKJFIk espedientea ixteko ebazpena prestatuko du, eta, horretan, ordaindu edo itzuli beharreko diru kopurua zehaztuko da, egindako justifikazioaren arabera. Ebazpena 2027ko abenduaren 31 baino lehen prestatuko da, honako baldintza hauek kontuan harturik:

1. Ixteko ebazpen horretan kirol federazio guztien berrikuspenak sartuko dira.

2. Dirulaguntzaren kalkulua aurkeztutako aurrekontuaren gaineko ehuneko batzuen arabera egiten den ataletan (ohiko funtzionamendua, Nafarroako txapelketak, txapelketa nazionalak antolatzea, sustapena, prestakuntza eta trukeak), haietako bakoitzean ezarritako ehunekoa aplikatuko zaie benetan egin eta justifikatu diren gastuei, kasuan kasuko gastu eta/edo jarduerarako ezarritako zehaztapenarekin. Betiere, laguntza emateko ebazpenean ezarritako diru-muga kontuan hartu beharko da, baita atal batzuetan aplikatzen ahal den hainbanaketaren portzentajea ere.

3. Zenbatekoa moduluen prozeduraren bidez finkatzen den atalean (txapelketa nazionaletan parte hartzea), dagokion balorazioa kalkulatzeko, parte-hartzearen datu errealak hartuko dira kontuan (zenbat parte-hartzaile izan diren, txapelketa zer herritan egin den eta zenbat egun iraun duen).

4. Jantzien eta ekipamenduaren atalak haietako bakoitzaren justifikazioaren arabera analizatuko dira, bakar-bakarrik, gainerako atalekin doikuntzak egin gabe. Horretarako, haietako bakoitzean ezarritako irizpideak benetan egin eta justifikatzen den gastuari aplikatuko zaizkio.

19. oinarria. Bitarteko elektronikoen bidezko harremanak.

1. Aurkeztu beharreko dokumentazio guztia eta laguntzen eskaera modu telematikoan aurkeztuko dira, Nafarroako Gobernuaren Interneteko Atariko (www.nafarroa.eus) tramiteen katalogoko laguntzen fitxaren bidez.

2. Deialdi honen prozeduraren barruan egiten diren komunikazioak eta errekerimenduak telematikoki eginen dira, entitate eskatzaileen gaitutako helbide elektronikoaren (GHEb) bidez.

20. oinarria. Kirol federazio onuradunen betebeharrak.

1. Kirol federazioak hartutako laguntzaren xedeko jarduerak egitea eskaeran adierazi bezala, eta dirulaguntza emateko ezarritako baldintzak betetzea.

2. Eranskin honen 15. eta 17. oinarrietan ezarritako frogagiriak telematikoki aurkeztea, hala tarteko konturako ordainketetarako, nola azken justifikaziorako.

3. Hala badagokio, hornitzaileak efizientzia eta ekonomia irizpideen arabera eta merkatuko prezioetan kontratatu direla frogatzea, bat etorriz Dirulaguntzei buruzko azaroaren 9ko 11/2005 Foru Legearen 28.3 artikuluarekin.

4. Nafarroako Gobernuaren laguntza jaso dela adieraztea jardueren gaineko publizitate guztietan, Nafarroako Kirolaren eta Jarduera Fisikoaren Institutuak adierazten duen irudi korporatiboa jarriz.

5. Laguntza ematen duen organoak eta indarra duen ordenamenduaren arabera eskudun diren bestelako organoek egin beharreko egiaztapen lanak onartzea.

6. Diruz lagundutako jardueraren frogagiriak gordetzea, dokumentu elektronikoak barne, egiaztatze eta kontrol lanen xede izan daitezkeen bitartean.

7. Laguntzak erabiltzea onartu diren berariazko helburuetarako, eta haien aplikazioa justifikatzea, kontuan harturik, orobat, jardueren artean egiten diren doikuntzak, behar diren ataletan ezarrita dagoen bezala.

8. Diruz lagundutako jarduera finantzatzeko lortutako beste laguntzen, diru-sarreren edo baliabideen berri ematea laguntza ematen duen organoari. Jakin bezain laster emanen da horren berri, eta betiere jasotako funtsak zertan erabili diren justifikatu baino lehen.

9. Erraztasunak ematea NKJFIk kontratatutako kontu-auditoreek berrikuspen-txostenak egin ditzaten.

10. Dirulaguntzei buruzko azaroaren 9ko 11/2005 Foru Legearen 35. artikuluan ezarritako kasuetan, hartutako dirulaguntzak itzultzea.

11. Dirulaguntzei buruzko Foru Legeak onuradunei ezartzen dizkien gainerako betebeharrak.

12. Indarrean dagoen araudiari jarraituz (18/1986 Foru Legea, abenduaren 15ekoa, Euskarari buruzkoa, eta 103/2017 Foru Dekretua, azaroaren 15ekoa, euskararen erabilera arautzen duena Nafarroako administrazio publikoetan, beren erakunde publikoetan eta menpeko dituzten zuzenbide publikoko entitateetan), pertsona guztien hizkuntza-eskubideak bermatzeko, kirol federazioek euskararen presentzia bermatuko dute komunikazio guztietan: paperetan, inskripzio-orrietan, karteletan, hedabideetan, megafonian eta publizitate-logoetan.

13. Begiratzea Nafarroako Hondakinen 2017-2027 Plana betetzen dela, baita Hondakinei eta haien Fiskalitateari buruzko ekainaren 18ko 14/2018 Foru Legea ere. Era berean, hondakinak prebenitzeko, bereizteko eta kudeatzeko neurriak bete beharko dira, bai eta Ekitaldi Publikoei eta Jasangarritasunari buruzko apirilaren 17ko 36/2024 Foru Dekretuan ezarritako komunikazio eta sentsibilizazio neurriak ere. Adibide gisa, ingurumen jasangarritasuneko neurri horietako batzuk adierazten ditugu:

–Ez da baimenduko edariak (ura barne) doan banatzeko erabilera bakarreko ontzirik. Edariak salduz gero, erabilera bakarreko ontzietarako alternatibak ezarriko dira.

–Beti eskainiko da txorrotako ura duen ontzi bat, bai eta edalontzi berrerabilgarriak ere, edo botila berrerabilgarriak ura kontsumitzeko, doan.

–Ezin izanen da erabilera bakarreko edalontzirik saldu eta banatu. Ontzi berrerabilgarriek UNE-EN 13429:2005 arauaren baldintzak bete beharko dituzte, eta, gainera, behar diren bitartekoak jarri beharko dira berreskuratu eta ondoren garbitu eginen direla bermatzeko.

–Ezin izanen dira erabilera bakarreko plastikozko ontziak erabili elikagaietarako, salbu eta UNE-EN 13432:2001 arauaren baldintzak betetzen dituen material biodegradagarriz edo konpostagarriz eginak daudenak.

–Erabiltzen den baxera berrerabilgarria izan beharko da, edo, hori ezinezkoa bada, UNE-EN 13432:2001 arauaren baldintzak betetzen dituen material biodegradagarriz edo konpostagarriz egina, edalontziak izan ezik, horiek berrerabilgarriak izan beharko baitira.

–Hondakinak uzteko eremuak jarri beharko dira edukiontzi egokiekin, kasuan kasuko toki entitateekin bat etorriz. Gutxienez honako hondakin-frakzio hauek bereizteko aukera eman beharko da: materia organikoa, ontzi arinak (edo ontzi eta materialak, erreferentzia-sistema hori duten entitateetan), papera eta kartoia, beira, eta gainerako hondakinen frakzioa.

Ekitaldia egin aurretik, erakunde antolatzaileak edo sustatzaileak ezarri diren jasangarritasun neurriak jakinaraziko ditu eskuragarri dauden bitarteko guztien bidez (web-orriak, sare sozialak, prentsa, inskripzio-orriak eta abar). Komunikazio guztietan hizkera inklusiboa eta ez-sexista erabiliko da, eta genero-rolekin lotuta ez dagoen berdintasunezko irudia transmititzen dela zainduko da, bai eta emakumeen zein gizonen askotariko irudia eskaintzen dela ere.

Era berean, ekitaldia egiten den bitartean, argi eta garbi jakinaraziko dira hondakinak prebenitzeko eta kudeatzeko ezarritako neurriak.

14. Adingabeekin kirol jarduerak egin ohi dituzten kirol federazioek ezinbestean bete beharko dituzte ekainaren 4ko 8/2021 Lege Organikoak, Haur eta nerabeei indarkeriaren aurrean babes integrala emateari buruzkoak, 48. artikuluan ezartzen dituen obligazioak.

21. oinarria. Gardentasun betebeharrak.

Entitate onuradunak behartuak daude gardentasun betebeharra betetzera, hain zuzen ere, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 12.4 artikuluan ezarrita dagoena, baldin eta 20.000 eurotik gorako laguntzak edo dirulaguntzak jasotzen badituzte urtebetean Nafarroako Aurrekontu Orokorren kargura, edo jasotako laguntzak edo dirulaguntzak haien urteko diru-sarrera guztien %20 edo gehiago badira, baldin eta 5.000 eurora iristen badira.

Horretarako, inguruabar horiek betetzen dituzten entitate eta pertsona juridiko onuradunek aipatutako foru legearen 12.4 artikuluan aipatzen den informazioa, entitatearen legezko ordezkariak sinatua, aurkeztu beharko dute telematikoki, Nafarroako Gobernuaren Interneteko Atariko (www.nafarroa.eus) tramiteen katalogoko dagokion fitxaren bidez, dirulaguntza emateko ebazpena jakinarazi eta hilabeteko epean.

22. oinarria. Azpikontratazioa.

Kirol federazio onuradunek aukera izanen dute diruz lagundutako jarduerak azpikontratatzeko, osorik edo partez, jardueren kostuaren %100era arte. Nolanahi ere, kontzeptu honetatik kanpo geldituko da diruz laguntzen den jarduera onuradunak berak egiteko beharrezkoak diren gastuen kontratazioa.

Dirulaguntzei buruzko 11/2005 Foru Legearen 26. artikuluan ezarritako gainerako aurreikuspenak ere bete beharko dira. Zehazki, hirugarrenekin hitzarturiko jarduerak dirulaguntzaren zenbatekoaren %20 gainditzen duenean eta zenbateko hori 60.000 eurotik gorakoa denean, azpikontratazioa egiteko kontratua idatziz sinatu beharko da.

VII. eranskinean dagoen justifikazio-inprimakia aurkeztu beharko da, frogatzeko zein den federazioaren egoera kontu horri dagokionez.

23. oinarria. Hornitzaileak kontratatzea.

Dirulaguntzei buruzko Foru Legearen 28.3 artikuluan xedaturikoarekin bat, ekipamendu ondasunak eskuratzen direnean edo aholkularitza edo laguntza enpresek zerbitzuak ematen dituztenean, gastu diruz lagungarriaren zenbatekoa 12.000 eurokoa baino handiagoa bada, kirol federazio onuradunak frogatu beharko du, organo emailearen aurrean, hornitzailea eragimen eta ekonomia irizpideei jarraituz hautatu dela.

Kasu horietan, kirol federazio onuradunak helburua lortzeko gai diren hiru enpresarekin edo gehiagorekin kontsultatu eta negoziatu beharko ditu kontratuaren baldintzak, eta eskaintzarik hoberena egiten duenarekin sinatuko du. Entitate onuradunak gorde egin beharko ditu kontsulta-tramitearen gaineko dokumentazioa eta eskaintzak. Kontu horiek agiri bidez frogatu beharko ditu dirulaguntza ematen duen organoaren aurrean, kontratua sinatu bezain laster. Eskaintza egiten duten enpresek digitalki sinatu beharko dituzte agiri horiek, 3 eskaintzak noiz aurkeztu diren eta lana egin aurretik aurkeztu direla egiaztatzeko. Agiri horiekin batera, egindako hautapena arrazoitzeko txosten labur bat aurkeztuko da.

Ez da beharrezkoa izanen enpresa bati baino gehiagori kontsulta egitea baldin eta, gastu diruz lagungarrien ezaugarri bereziengatik, behar adina ez badira merkatuan beharrezko hornidura edo zerbitzu hori egiten duten enpresak.

Inguruabar horiek guztiak hornitzaileen hautaketa justifikatzeko inprimakia (VI. eranskina) aurkeztuz frogatu beharko dira.

24. oinarria. Dirua itzultzea.

Hartutako zenbatekoa itzuli beharko da, osorik edo partez, programa gauzatzen ez bada, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo deialdi honetan berariaz aipatzen diren betebeharrak betetzen ez badira. Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

Diruaren itzulpena eskatzeko prozedura Dirulaguntzei buruzko Foru Legearen aipatu 35. artikuluan xedaturikoari jarraituz arautuko da, eta irekitzen denetik 12 hilabeteko epean ebatzi beharko da.

Halaber, onuradunak betebeharrak ia osorik bete dituenean eta zalantzarik gabe bere konpromisoak burutzeko jarrera frogatzen duenean, itzuli beharreko dirua proportzionaltasun irizpideari jarraituz zehaztuko da, hau da, hasierako aurrekontuaren arabera onartutako zenbatekoaren eta benetan gauzatutakoaren arteko aldea kontuan hartuta.

25. oinarria. Arau-hausteak eta zehapenak.

Deialdi honetan aurreikusitako dirulaguntzen onuradun diren kirol federazioak Dirulaguntzei buruzko Foru Legearen 42. artikuluan eta hurrengoetan, dirulaguntzen arloko arau-hauste administratiboei buruz, ezarritako zehapen araubidearen mende egonen dira, eta han ezarritako erantzukizunak izanen dituzte.

Dirulaguntzen arloko zehapenak jartzeko, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean finkatutako prozedura erabiliko da.

26. oinarria. Administrazio errekurtsoak.

1. Deialdi honen eta oinarrien kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

2. Era berean, Nafarroako Kirolaren eta Jarduera Fisikoaren Institutuko zuzendari kudeatzailearen ebazpenen kontra, gora jotzeko errekurtsoa jar daiteke, Kultura, Kirol eta Turismoko kontseilariari zuzendua, jakinarazi eta biharamunetik hasita hilabeteko epean.

27. oinarria. Aplikatzekoa den legeria.

Foru dekretu honetan aurreikusirik ez dagoen guztian, Dirulaguntzei buruzko azaroaren 9ko 11/2005 Foru Legean eta Nafarroako Kirolari buruzko uztailaren 5eko 15/2001 Foru Legean xedatutakoari jarraituko zaio.

II. ERANSKINA.–IRIZPIDEAK ETA BAREMOA, NAFARROAKO KIROL FEDERAZIOEI DIRULAGUNTZAK EMATEKO DEIALDIRAKO, 2026KO IRAILAREN 1ETIK 2027KO ABUZTUAREN 31RA BITARTEKO ALDIRAKO

Sarrera.–Irizpide orokorrak:

1. 2027ko Nafarroako Aurrekontu Orokorretan "Federazioentzako dirulaguntzak" kontzeptuari lotuta gaitzen den partida ekonomikoa deialdiaren atal guztien artean banatuko da. Dokumentazioa azterturik, baremoko atal bakoitzaren arabera esleituko dira dirulaguntzak, lehentasunen ordena honi jarraikiz eta ondoren agertzen diren diru kopuruak banatu arte:

a) Ohiko funtzionamendurako gastuak: 1.315.000,00 euro.

b) Nafarroako txapelketa ofizialak: 535.000,00 euro.

c) Txapelketa nazional ofizialetan parte hartzea: 650.000,00 euro.

d) Txapelketa nazional ofizialak antolatzea: 75.000,00 euro.

e) Sustapen jarduerak: 395.000,00 euro.

f) Prestakuntza jarduerak: 30.000,00 euro.

g) Kirol arloko trukeak: 20.000,00 euro.

2. Baldin eta aurreko ataletako edozeinetan partida osoa esleitzen ez bada aurkeztutako eskaerei aplikatutako baremoen arabera, soberakina hainbanaketak egin diren atalei esleituko zaie, ordena honetan: txapelketa ofizial nazionaletan parte hartzea, sustapena, Nafarroako txapelketa ofizialak, prestakuntza, ohiko funtzionamendurako gastuak, txapelketa nazional ofizialak antolatzea, eta trukeak.

3. Lehenagoko atalean ezarritakoaren arabera geratu diren diru kopuruak hainbanaketak izan dituzten atalei esleitu eta gero, oraindik ez bada esleitu partida osoa, funtzionamendu-gastu arrunten atalaren dirulaguntzaren ehunekoa emendatuko da, aurrekontu partida osoa esleitzeko beharrezkoa den ehunekoan.

4. Benetan gauzatu diren jardueren azken dokumentazioa aztertzen denean, zilegi izanen da aurrekontuan aldaketak egitea deialdi honetako atal batetik bestera, I. eranskineko 16. oinarrian agertzen den bezala. Horrenbestez, justifikatutako gastuak txikiagoak izateagatik ataletako batean erabili gabe geratzen den kreditu hori beste atal batean erabiltzen ahalko da, horretan justifikatutako gastuak handiagoak izan badira. Banaketa proportzionalki eginen da, eta mugatzat hartuko dira, betiere, atal bakoitzaren gehieneko eta hainbanatutako ehunekoak, eta dirulaguntza emateko ebazpenean federazio bakoitzari esleitutako zenbatekoa.

5. Ez da dirulaguntzarik izanen honako kategoria hauetako txapelketa eta/edo torneoak antolatzeko eta/edo haietan parte hartzeko:

a) Bakar-bakarrik 2020. urtean eta hortik aurrera jaio diren kirolarientzat diren txapelketa eta torneoak.

b) Masterrak, beteranoak eta antzeko kategorietakoak.

6. Kirol jantziei eta ekipamenduari buruzko ataletarako (I. eranskineko 2. oinarriaren 8. eta 9. puntuetakoak) bideratuko den diru kopurua foru agindu honetan kasuan kasuko partida ekonomikoen kargura baimendutakoa izanen da. Dagokion dirulaguntza kalkulatzeko, eranskin honetako oinarrietan adierazitako irizpideak baizik ez dira aplikatuko, betiere aurkeztutako dokumentazioa aztertuz.

7. Deialdi honetan ezin dute dirulaguntzarik jaso berariazkoagoak diren NKJFIren beste deialdi batzuen xede diren edo horietan sartzen diren jarduerek.

8. Eskatutako jardueraren baten dokumentazioa osorik ez badago, I. eranskinaren 7. oinarrian eskaera zuzentzeko ezarritako prozedurari jarraituko zaio. Eskatutako jardueraren edukia zehaztu beharko da, kasu bakoitzari dagokion memoriaren bidez, bai eta aurreikusitako aurrekontuak ere. Ildo horretatik, ez dira onartuko "askotarikoak", "bestelakoak" edo antzeko kontzeptu batean sailkatutako gastuak eta sarrerak, kontzeptuak zehaztu egin behar baitira. Halaber, agiriak aztertzean ikusten bada kirol federazio batek eskatutako jarduera baten sailkapena okerra dela jarduera motari dagokionez, NKJFIk ofizioz sailkatzen ahalko du dagokion atalean jarduera hori, eta behar den dokumentazio osagarria eskatzen ahalko du.

9. Edozein jardueraren berariazko diru-sarreren kasuan (inskripzioak, sarrerak, babesleak...), zehaztapen hauek hartuko dira kontuan:

a) Diruz lagundu ezin den kontzeptu bati lotutako diru-sarrerak ez dira kontuan hartuko (adibidez, eskudiruzko sariak emateko babesleak, baleude).

b) Diru-sarrera orokorren kasuan, hau da, kontzeptu jakin bati loturik ez daudenetan, diru-sarrera horien ehuneko bat bakarrik egotziko da, gastu diruz lagungarriek gastu guztien aldean duten proportzio berean, diruz lagungarriak ez diren kontzeptuei lotutako gasturik baldin bada.

c) Edonola delarik ere, diru-sarreren eta diruz lagungarriak diren gastuen arteko erlazioa aintzat hartuko da, superabita daukan jarduerarik egon ez dadin.

10. Modalitate olinpikotzat jotzea. Deialdiaren ataletan, kirol federaziotzat eta/edo modalitate olinpikotzat hartuko dira sartuta daudenak 2028ko Los Angelesko Udako Olinpiar Jokoetako eta 2030eko Frantziako Alpeetako Neguko Olinpiar Jokoetako programetan.

11. Diruz lagungarritzat eta ez-lagungarritzat jotzen diren kirol modalitate, espezialitate eta probak:

a) Nafarroako txapelketen, txapelketa nazionaletan parte hartzearen eta txapelketa nazionalak antolatzearen ataletan, modalitate diruz lagungarritzat joko dira, bakar-bakarrik, Kirol Kontseilu Gorenaren 2026ko martxoaren 23ko Ebazpenean (edo hura ordezten duen geroagoko araudian) diruz lagungarritzat jotzen diren modalitateetako probak (ebazpen horren bidez Kirol Kontseilu Gorenaren dirulaguntzen deialdietan finantzatzen ahal diren kirol modalitate, espezialitate eta proben katalogoa onetsi zen).

b) Aurrekoez gain, diruz lagungarriak izanen dira kirol autoktonoko (herri kirolak eta euskal pilota) modalitateetako proba guztiak eta, halaber, kirol egokitukoak.

12. Nafarroako txapelketen, txapelketa nazionalak antolatzearen, sustapenaren eta prestakuntzaren ataletan, ez da onartuko protokoloko gasturik eta antzekorik.

1. oinarria. Ohiko funtzionamendurako gastuak.

Atal honetan, kontzeptu eta irizpide hauek sartzen dira:

1. Langileak eta aholkularitzak: federazioen administrazioko, kirol-teknikaritzako eta komunikazioko eginkizunak. Zerbitzu horiek emateko behar den kontratazioa egiteko, lan-kontratudunak erabil daitezke edo zerbitzuak kontratatu daitezke, aholkularitzen bitartez (zerbitzu-enpresen edo norberaren konturako langileen bidez). Aholkularitzen kasuan, administrazioko, kirol-teknikaritzako eta komunikazioko eginkizunei dagozkienak baino ez dira diruz lagunduko; administrazioko eginkizuntzat hartzen dira kontabilitate eta lan arloko aholkularitzak, datuen babesari buruzkoak eta oinarrizko mantentze-lan informatikoei buruzkoak (programa edo aplikazio espezifikoetarako harpidetzak sartu gabe), eta legez nahitaez bete beharrekoak izan daitezkeen beste batzuk, legez bete beharrekoak ez diren beste batzuk alde batera utzita. Aplikatu beharreko irizpideak:

a) Dirulaguntza zehazteko, hurrengo taulan adierazten diren ehunekoak aplikatuko zaizkio federazio bakoitzak aurkeztutako aurrekontuari, aurrekontuan sartutako gastuaren azpitarte bakoitzari dagokionez eta federazio bakoitzak 2025ean zituen lizentzien kopurua aintzat hartuta:

b) Ehuneko horiek %2,5 handituko dira, baldin eta federazioek egindako prestakuntzaren aitorpen bat badute indarreko kudeaketa aurreratuko eredurako, eta oraingo zuzendaritza batzordeko pertsona batek, gutxienez, ikastaroa amaitu badu edo federazioaren egungo kudeatzailetzak ikastaroa amaitu badu. Eta beste %2,5 gehigarri bat, baldin eta federazio baten lizentzia guztien %30 baino gehiago emakumeenak izan badira 2025ean, edo emakumeen lizentziak %5 baino gehiago igo badira 2025ean, 2024ko datuekin alderatuta (gutxienez 10 lizentzia gehiago beharko dira horretarako).

c) Dirulaguntzen ehuneko horien kalkulua zenbateko honen gainean eginen da: 1.1 oinarri honetarako aurreikusitako guztizko gastuak ken, halakorik bada, federazio eskatzaile bakoitzak federazioaren kudeaketarako edo antzeko kontzeptuetarako beste erakunde batzuetatik jasotzen dituen diru-sarrerak.

d) Federazio bakoitzak, gehienez, 95.000 euroko dirulaguntza jaso dezake administrazioko, kirol-teknikaritzako eta komunikazioko eginkizunen kontzeptuagatik. Dirulaguntza, inongo kasutan, ezin izanen da aurkeztutako aurrekontua baino handiagoa izan.

e) Kirol-teknikaritzako eginkizunak betetzen dituzten langileentzat, deialdi honetan onar daitekeen bateragarritasun bakarra da kirol federazioen errendimendu programetarako NKJFIren dirulaguntzen deialdian sartzen diren eginkizun mota berak egitea.

2. Kirol federazioen funtzionamendurako gastu orokorrak (gastu orokorrak). Gastu horietan, urteko faktura bakarra ordaintzen den kasuetan, eta aldi laburragoko ordainketarik egiten ez bada (hilekoa, hiruhilekoa, eta abar), urteko fakturak balioko du, ordainketa egunaren arabera, 2026. urteko gastu kontzeptu bati badagokio, eta ordainketa eguna diruz lagungarria den epearen barruan bada. Aplikatu beharreko irizpideak:

a) Honako gastu hauek jaso dezakete dirulaguntza:

I.–Bulegoko materiala eta material informatiko suntsikorra. 15.000 euroko muga ezartzen da atal honetako gastuetarako.

II.–Aseguru orokorrak (erantzukizun zibilekoa, hirugarrenak babestekoa, etab.), lizentziei lotutako aseguruak izan ezik.

III.–Komunikazioak, telefonoa eta Internet. Atal honetan telefono eta Internet zerbitzuak emateko konpainiekin sinatutako kontratuak jasotzen dira, kuota finkoaren eta kontsumoen kontzeptuetarako (edo konpainia bakoitzak ezartzen dituen antzeko kontzeptuetarako).

IV.–Posta eta mezulariak.

V.–Banku gastuak: banketxeen komisioak (transferentzietakoak, mantentze-lanetakoak, erreziboak kobratzekoak, etab.) eta finantzaketa-interesekoak (maileguak, kreditu kontuak, etab.). Gastu horiek diruz lagungarriak izanen dira baldin eta diruz lagundutako jarduerarekin zuzeneko lotura badute eta hura ongi prestatu edo egiteko ezinbestekoak badira. Ez dira sartzen banku kontuetako interes zordunak (kontu korronteetako zorpekoak).

VI.–Federazioaren egoitza sozial gisa erabiltzen den lokalaren gastuak, Iruñetik kanpo badago: diruz lagungarriak dira alokairuaren gastuak, eta ur, argi eta zabor gastuak. Gastu horiek ez dira aintzat hartuko, baldin eta lokala entitate publiko batena bada, egiten den kudeaketa-mota edozein delarik ere.

b) Honako hauek dira atal honetarako dirulaguntzaren ehunekoak:

I.–Bulegoko eta informatikako materiala, aseguru orokorrak, komunikazioak, posta eta mezulariak, banku gastuak: %35. Ehuneko hori %2,5 handituko da, baldin eta federazioek egindako prestakuntzaren aitorpen bat badute indarreko kudeaketa aurreratuko eredurako eta oraingo zuzendaritza batzordeko pertsona batek, gutxienez, ikastaroa amaitu badu edo federazioaren egungo kudeatzailetzak ikastaroa amaitu badu. Eta beste %2,5 gehigarri bat, baldin eta federazio baten lizentzia guztien %30 baino gehiago emakumeenak izan badira 2025ean, edo emakumeen lizentziak %5 baino gehiago igo badira 2025ean, 2024ko datuekin alderatuta (gutxienez 10 lizentzia gehiago beharko dira horretarako).

II.–Federazioaren egoitza sozial bezala erabiltzen den lokalaren gastuak: %100.

3. Euskarazko komunikaziorako aholkularitza. Atal honetan, federazioaren komunikazioa euskaraz zabaltzeko berariaz hartutako aholkularitza kontratatzeak ekarritako gastuak lagunduko dira diruz. Atal honetako dirulaguntza kalkulatzeko, 1. oinarri honetan langileen eta aholkularitzen atalerako ezarritako ehunekoen taula berak aplikatuko dira. Nolanahi ere, federazio bakoitzak gehienez 550 euroko dirulaguntza jasotzen ahalko du kontzeptu horretarako.

2. oinarria. Nafarroako txapelketa ofizialak antolatzea.

1. Atal honetan Nafarroako txapelketa ofizialak (torneo, liga, jardunaldi eta antzekoen bidez) antolatzeko dirulaguntzak sartzen dira.

2. Diruz lagungarriak diren txapelketak: oro har, atal honen barnean diruz lagungarriak dira lehiaketako adin-kategoria, modalitate eta/edo espezialitate desberdinetako txapelketak, hain zuzen kasuan kasuko kiroleko adin-kategoria, modalitate eta/edo espezialitatean Nafarroako txapeldun titulua eskuratzera bideratuta daudenak (betiere kontuan hartuta "Sarrera" izeneko oinarrian benjaminen azpiko adinekoen eta master kategoriakoen txapelketetarako ezarritako salbuespenak), eta Kirol Kontseilu Gorenaren dirulaguntzen deialdietan finantzatzen ahal diren kirol modalitate, espezialitate eta proben katalogoa onesten duen Kirol Kontseilu Gorenaren Ebazpenaren arabera diruz lagungarriak diren jardueretara bideratuta daudenak.

3. Gastu diruz lagungarriak:

a) Sariak: kirol federazio bakoitzak antolaturik, Nafarroako txapeldun titulua eskuratzera bideratutako kirol maila goreneko txapelketetarako garaikurrak, dominak, txapelak eta maillotak (kirol modalitate bakoitzaren araberakoak), adinaren araberako kategoria, espezialitate eta modalitate guztietakoak. Onartuko da garaikur edo domina bat ematea eta, gehigarri gisa, bestelako sari bat ere ematea (txapelak eta maillotak) hori ohikoa den modalitateetan. Lehenengo hiru sailkatuentzako sariak baizik ez dira izanen diruz lagungarriak (edo lehenengo laurentzakoak, 3. eta 4. sailkatuak zehazteko norgehiagokarik ez dagoen zuzeneko lehiako modalitateetan, eta azken fasea kontzentrazio prozeduraren bidez egiten duten modalitateetan). Atal honetan diruz lagun daitekeen gastua 12.000 eurokoa izanen da gehienez.

b) Arbitrajeak: atal honetan sartzen dira zehatz-mehatz arbitraje-lanak direnak, eta, orobat, kirol federazioaren kontura lehiaketaren kontrolerako eta jarraipenerako antzeko lanak egiten dituzten pertsonak (mahaikideak, ohar-hartzaileak eta antzekoak). Kirol federazio bakoitzak onetsitako arbitraje tarifak aplikatuko dira; aldez aurretik aurkeztu behar zaizkio NKJFIri. Kirol modalitatea zein den, irizpide hauek aplikatuko dira:

I.–Kirol kolektiboetako probetan, arbitraje gastuak azken faseetan, igotzekoetan edo antzekoetan baizik ez dira onartuko, kirol federazioak batera antolatzen baldin baditu balizko parte-hartzaile guztientzat. Horren ondorioetarako, kirol kolektiboen modalitate gisa hartuko dira ezaugarri hauek dituzten espezialitate edo probak: bi talderen arteko lehia, denbora eta toki berean egiten dena, tresna mugikor baten jabetza txandakatuz, erasoko eta defentsako ekintza tekniko-taktikoen bitartez.

II.–Kirol indibidualetako probetan, kirol federazioak antolatutako Nafarroako txapelketetako arbitraje guztiak sartzen dira. Atal honetan, aurreko atalean jaso ez diren gainerako modalitate guztiak sartzen dira.

c) Jokorako materiala: kirol indibidualen txapelketetan, horrelako materialerako gastua onartuko da baldin eta inbentariagarria ez bada eta kirol federazioak berak zuzenean jartzen badu parte-hartzaileen eskura arrazoi teknikoengatik (materialaren homologazioa, eta abar): teniserako, golferako, euskal pilotarako eta antzekoetarako pilotak, badmintonerako luma-bolak, herri kiroletarako egurra, etab. Kirol kolektiboetako azken faseetako lehiaketetan erabiltzen den material mota hori ere onartuko da. 15.000 euroko muga izanen da modalitate autoktonoen kirol federazioentzat (herri kirolak eta pilota), eta 5.000 eurokoa gainerako kirol federazioentzat.

d) Osasun arreta: kirol modalitate bakoitzaren arriskuen arabera (kasuan kasuko Nafarroako federazioaren edo kasuan kasuko Espainiako kirol federazioaren kirol araudiaren bidez onesten direnak), anbulantzien eta/edo osasun arretaren gastuak izanen dira diruz lagungarriak.

e) Instalazioak eta azpiegitura muntatzea: lehiaketa egiten deneko instalazioa egokitzeko behar-beharrezkoak diren gastuak. Atal honetan sartzen dira egokitzapen horretarako behar diren langileak eta materiala (hesiak, koltxonetak eta, modalitate bakoitzaren ezaugarri berezien arabera, lehiaketarako beharrezkoa den edonolako materiala garraiatu eta instalatzea).

f) Instalazioen alokairua: lehiaketarako beharrezkoak diren instalazioen alokairuaren berariazko gastuaren %30 izanen da diruz lagungarria.

g) Nafarroako txapelketak streaming-ean transmititzeko gastuak: kontzeptu honengatik egiten den gastuaren %50 diruz lagungarritzat jotzen da, federazio bakoitzeko 1.000 euroko dirulaguntza-mugarekin.

h) Oro har, aipatutako txapelketak antolatzeko Nafarroako Kirolaren eta Jarduera Fisikoaren Institutuaren ustez beharrezkoak eta ezinbestekoak diren gastu guztiak. Atal honetan, lehiaketa antolatzeko behar-beharrezkoa eta ezinbestekoa den material suntsigarria sartzen da, baina horren beharra berariaz justifikatu beharko da. Oro har, diruz lagungarriak izanen dira txapelketaren antolakuntza orokorrarekin zerikusia duten kontzeptuak, txapelketarako behar-beharrezkoak baldin badira. Ez dira diruz lagungarriak izanen, ordea, parte hartzen duten kirolariei eta/edo taldeei zuzenean egozten ahal zaizkien gastuekin lotutako kontzeptuak.

i) Ez dira inola ere diruz lagunduko mantenu gastuak, ostatu gastuak eta antzekoak, ezta protokolo gastuak ere.

j) Material inbentariagarri gisa har daitekeena erostea ez da inola ere diruz lagunduko.

k) Ez da inola ere sartuko eskudiruzko saririk.

4. Kirol federazio bakoitzak eskaera orokor bat aurkeztu beharko du, non dirulaguntza jaso dezaketen modalitate eta/edo kategoria guztietako Nafarroako txapelketen aurrekontu guztiak bilduko baitira (diru-sarrerak eta gastuak). Horrez gainera, txapelketa eta kontzeptu bakoitzaren datu guztiak zehaztu beharko dira, horretarako inprimaki ofizialak erabiliz (aurrekontuak, egunak eta parte-hartzaile kopurua adierazita).

5. Nafarroako txapelketetarako dirulaguntza nola kalkulatu: Nafarroako txapelketen atal osorako emanen da, modu orokorrean, eta txapelketak antolatzeagatik gertatzen den defizitaren %100i egokituko zaio, kontuan harturik aurreko puntuetan aipatutako zehaztapenak eta inguruabarrak.

6. Atal honetako dirulaguntzen kontura kirol federazio bakoitzak jaso dezakeen kopurua mugatua da, hots:

a) Federazio olinpikoak eta kirol modalitate autoktonoetakoak (herri kirolak eta pilota): 60.000 euro.

b) Olinpikoak ez diren federazioak: 40.000 euro.

c) Federazio batek modalitate olinpikoak eta ez-olinpikoak biltzen baditu, dirulaguntza proportzionalki banatuko da bi modalitateen artean. Hala, 40.000 euroko muga aplikatuko zaie modalitate ez-olinpikoei, eta 60.000 eurokoa, berriz, federazio horren jarduera guztiei.

3. oinarria. Txapelketa nazional ofizialetan parte hartzea.

1. Atal honetan, jarduera hauetarako dirulaguntzak sartzen dira:

a) Autonomia erkidegoetako kirol federazioek Espainiako txapelketen sailkapen faseetan eta/edo azken faseetan parte hartzea, hau da, kasuan kasuko kirol modalitate eta/edo espezialitatean Espainiako txapeldun titulua lortzeko txapelketetan parte hartzea.

b) "Espainiako kopa" izeneko txapelketetan parte hartzea, autonomia erkidegoetako kirol federazioek parte har dezaten Espainiako kirol federazioak deialdi hori egiten duen kasuetan.

c) Kirol modalitate autoktonoen autonomia erkidegoen arteko txapelketetan parte hartzea (herri kirolak eta euskal pilota). Kasu batzuetan, Frantziako Pirinio Atlantikoetako eskualdearekin batera egiten diren lehiaketetan parte hartzea barne hartzen dute.

d) Autonomia erkidegoen arteko txapelketetan parte hartzea, kasuan kasuko Espainiako kirol federazioak Espainiako txapelketa edo kopetarako deialdirik egiten ez duen kasuetan.

2. Deialdi honen bidez, txapelketetan parte hartzea diruz laguntzen ahal da, soilik, baldin eta kasuan kasuko Nafarroako federazioak parte-hartzaileak hautatzen baditu, bat etorriz txapelketaren deialdia egin duen Espainiako federazioak parte-hartzaileen kopuruari buruz ezarritako irizpideekin eta muga izanik araudi honetan federazio autonomiko bakoitzarentzat ezarritako gehieneko parte-hartzaile kopurua. Hautaketa-irizpide hori ez duten txapelketen kasuan, edo parte-hartzaile bakoitzak izena modu irekian eman badezake, edo Nafarroako federazioak berak ezartzen badu gehieneko kopuru hori, deialdi honen bidez diruz lagun daiteke, gehienez ere, Nafarroako 4 kirolarik parte hartzea proba bakoitzean. Baldin eta Nafarroako federazioa arduratzen bada inskripzioak Espainiako federazioaren aurrean tramitatzeaz, baina hautaketa hori ez bada egin gehieneko parte-hartzaile kopuruaren irizpide horren arabera, parte-hartzaile kopuruari ezarritako gehieneko irizpidearen araberako partaidetzak baino ez dira hartuko diruz lagungarritzat.

3. Atal honi dagokion dirulaguntza emateko, erreferentziako modulu batzuk ezarriko dira eskatutako jarduera bakoitzerako, hurrengo atalean adierazten diren irizpideei jarraikiz, eta, modulu horiek oinarri hartuta, dirulaguntzaren ehunekoak aplikatuko dira, kirol federazioaren eta jardueraren arabera. Azkenik, espedientea ixteko ebazpenean, emandako zenbatekoa egokituko da benetan gauzatu den jardueraren arabera (distantziak, parte-hartzaileen kopurua eta zenbat egun iraun duen), eta I. eranskinaren 16. oinarrian aurreikusita dauden jardueren arteko doikuntzetako bat izanen da.

4. Erreferentziako moduluak parte-hartzaile kopuruaren arabera zehaztuko dira, baita abiapuntutik txapelketaren herrira joateko distantziaren arabera eta haren iraupenaren arabera ere. Distantziak, parte-hartzaileen kopurua, ostatu eta mantenu gastuak eta kilometrajea kalkulatzeko, irizpide hauek aplikatuko dira:

a) Joan-etorrien distantzia: hiru distantzia mota bereizten dira, laburrak, ertainak eta luzeak, zein probintziatara joan beharra dagoen, ondoko atal hauen arabera (abiapuntutik txapelketa egiten den herrirainoko kilometro kopurua hartuko da aintzat):

I.–Laburrak: Nafarroa, Araba, Burgos, Gipuzkoa, Huesca, Errioxa, Soria, Bizkaia, Zaragoza. Halaber, talde honetan sartzen dira modalitate autoktonoetarako (herri kirolak eta euskal pilota) Frantziako Pirinio Atlantikoetako eskualdera egiten diren joan-etorriak.

II.–Ertainak: Albacete, Asturias, Ávila, Bartzelona, Castelló, Ciudad Real, Cuenca, Girona, Guadalajara, Lleida, León, Madril, Palentzia, Salamanca, Santander, Segovia, Tarragona, Teruel, Toledo, Valentzia, Valladolid, Zamora.

III.–Luzeak: Alacant, Almería, Badajoz, Balearrak, Cáceres, Cádiz, Ceuta, Kordoba, Granada, Huelva, Jaén, Coruña, Las Palmas, Lugo, Málaga, Melilla, Murtzia, Ourense, Pontevedra, Santa Cruz Tenerifekoa, Sevilla.

IV.–Eskaera egiten den egunean zehaztu gabe baldin badago non eginen den txapelketaren bat, kalkulua aurreko urtean egin zen herrian balitz bezala eginen da, eta gero zenbatekoa egokituko da, benetan egiten den lekuaren arabera. Doikuntza hau I. eranskinaren 16. oinarrian aurreikusita dauden jardueren arteko doikuntzetako bat izanen da.

b) Parte-hartzaileen kopurua: txapelketako akta ofizialetan benetan inskribaturik dauden parte-hartzaileen kopurua, entrenatzaileak eta ofizialki onartutako delegatuak eta/edo laguntzaileak barne, kirol modalitatea zein den.

c) Ostatua: 35 euroko balioa aplikatuko da gau bakoitzeko. Irizpide hauek erabiliko dira ostatu gauen gastua kalkulatzeko, distantzien arabera:

I.–Laburrak: lehiaketa egunen kopurua ken bat.

II.–Ertainak: lehiaketa egunen kopurua.

III.–Luzeak: lehiaketa egunen kopurua gehi bat.

d) Otorduak: 12 euroko balioa aplikatuko da otordu bakoitzeko (bazkaria eta afaria). Parte-hartzaile kopuruaren eta distantzien arabera kalkulatuko da, ondoko irizpide hauei jarraikiz:

I.–Laburrak: lehiaketa egunen kopurua bider bi, ken bat.

II.–Ertainak: lehiaketa egunen kopurua bider bi, gehi bat.

III.–Luzeak: lehiaketa egunen kopurua bider bi, gehi hiru.

e) Kilometro-ordaina: parte-hartzaileen kopuruaren arabera kalkulatuko da, honako irizpide hauei jarraikiz:

I.–Txapelketan gehienez 20 parte-hartzaile badaude (kopuru hori barne): 0,25 euroko balioa aplikatuko da kilometroko, 4 parte-hartzaileko (edo zatikiko). Kirol modalitateren batean lehiatzeko materialen premia dela-eta garraiorako ibilgailu osagarri bat erabili behar bada, ibilgailu hori ere hartuko da kontuan. Premia, dena dela, eskaeran justifikatu beharko da.

II.–Txapelketan 21 parte-hartzaile edo gehiago badaude: ulertuko da bidaia autobusez egiten dela, eta 1,50 euro aplikatuko da kilometroko, gehi kopuru finko bat, 250 euro eguneko.

III.–Iruñetik txapelketa eginen den herrirainoko distantziak hartuko dira aintzat (joatea eta etortzea).

IV.–Penintsulatik kanpo hegazkinez egiten diren bidaietarako, kontzeptu horrengatiko gastu espezifikoa hartuko da kontuan: 200 euroko muga pertsonako, Kanarietan egiten bada, eta 100 eurokoa pertsonako, gainerakoetan. Gainera, autobusez edo autoz egin beharreko joan-etorri hauek zenbatuko dira: Iruña-Madril-Iruña (Kanarietara, Ceutara eta Melillara bidaiatzeko) edo Iruña-Bartzelona-Iruña (Balearretara bidaiatzeko); autobusez egindako bidaien kasuan, 2 aldiz zenbatuko da Iruñetik Madrilerako edo Bartzelonarako bidaia. Aurrekoaz gain, autoz egiten diren joan-etorrietarako, kontuan hartuko dira erreferentziako aireportuaren eta txapelketa egiten den herriaren arteko kilometroak; autobusez egiten diren bidaietarako, kontuan hartuko da 250 euroko zenbateko finkoa eguneko.

5. Dirulaguntza, hasiera batean, jarduera bakoitzari dagokion moduluaren %55ekoa izanen da. Txapelketa bakoitzaren egoera zehatza ikusita, ehuneko hori handitzen ahalko da (gehienez, %100era iritsi arte), honako irizpide hauen arabera:

a) Errendimendu programa batean sartuta egotea: %25. Kasu honetan, NKJFIk 2025eko irailetik 2026ko abuztura bitarteko aldian diruz lagundutako errendimendu programak sartuko dira. Dirulaguntzak emateko ebazpenaren proposamena egin zen datan programa horientzako dirulaguntza emateko ebazpena eman bada 2026ko irailetik 2027ko abuztura bitarteko aldirako, ebazpen hori hartuko da kontuan, eta ez aurrekoa.

b) Modalitate olinpikoa, paralinpikoa edo kirol modalitate autoktonoa (herri kirolak eta euskal pilota) izatea: %20.

6. Goian azaldutako prozeduraren bidez lortzen den moduluari txapelketan izena emateko ordaindutako kopuruak gehituko zaizkio. Izena emateko gastuak justifikatzeko, egiaztagiriak aurkeztu beharko dira (fakturak eta ordainketa-agiriak), eta justifikazio-kontuan sartu beharko dira.

7. Hegazkinez egindako bidaiei dagokienez, gastuaren justifikazioa justifikazio-kontuan sartu beharko da, dagozkion egiaztagiriak (fakturak eta ordainagiriak) aurkeztuta, benetako gastua egiaztatzeko. Moduluak jaso beharreko gehieneko zenbatekoa adierazten du. Hala ere, justifikatutako zenbatekoa ezarritako mugak baino txikiagoa bada, justifikatutako gastua baino ez da ordainduko.

8. Atal honetan, kirol federazio bakoitzak 60.000 euro jaso ditzake gehienez federazio olinpikoen eta kirol modalitate autoktonoen (herri kirolak eta euskal pilota) kasuan, eta 40.000 euro gainerako kasuetan. Federazio batek modalitate olinpikoak eta ez-olinpikoak biltzen baditu, dirulaguntza proportzionalki banatuko da bi modalitateen artean. Hala, 40.000 euroko muga aplikatuko zaie modalitate ez-olinpikoei, eta 60.000 eurokoa, berriz, federazio horren jarduera guztiei.

9. Txapelketa horien azken antolatzaileak (Espainiako kirol federazioa, Kirolen Batzorde Gorena, beste autonomia erkidego bat, etab.) dirulaguntzaren bat eman baldin badu txapelketako atal horietakoren batentzat, zenbateko hori deskontatuko da modulu honi dagokion kopurutik, gastu zehatz batzuetarako diru-sarrerak jasotzen badituzte, eta sortutako defizita baizik ez da kontuan hartuko. Halaber, federazioak jarduera horietarako jasotzen ahal dituen beste diru-sarrera batzuk deskontatuko dira.

4. oinarria. Txapelketa nazionalak antolatzea.

1. Atal honetan, jarduera hauetarako dirulaguntzak sartzen dira:

a) Espainiako txapelketetako sektoreko faseak (edo antzekoak) eta/edo azken faseak antolatzea eta/edo Espainiako kopak antolatzea (aurreko oinarrian jasotzen den bezala).

b) Kirol modalitate autoktonoen (herri kirolak eta euskal pilota) autonomia erkidegoen arteko txapelketak.

c) Autonomia erkidegoen arteko txapelketak antolatzea, kasuan kasuko Espainiako kirol federazioak Espainiako txapelketa edo kopetarako deialdirik egiten ez duen kasuetan.

d) Espainiako txapelketa (sektoreko fasea edo azken fasea) edo kopa deitu ez arren, horien antzekoak diren lehiaketak antolatzea, baldin eta puntuagarriak badira dagozkien Espainiako txapelketetarako eta, betiere, NKJFIren oniritziarekin.

2. Oro har, gastu diruz lagungarriaren %50 emanen da, betiere aurreikusitako defizita gainditu gabe. Kasuan kasuko Espainiako kirol federazioari ordaintzen zaion kanonaren edo antzekoaren gastuan, gehienez ere 3.000 euro emanen dira txapelketa bakoitzeko. Emandako dirulaguntzaren likidazioa eginen da benetan izandako diru-sarrerak eta gastuak kontuan hartuta. Nolanahi ere, Nafarroako Kirolaren eta Jarduera Fisikoaren Institutuaren dirulaguntzak ez du aipatutako ehuneko hori gaindituko.

3. Atal honetan, kirol federazio bakoitzak 10.000 euro jaso ditzake gehienez.

4. Gastu diruz lagungarriak:

a) Garaikurren, arbitrajeen eta jokorako materialaren gastuak, osasun arretaren gastuak, instalazioak eta azpiegiturak muntatzekoak, eta instalazioak alokatzekoak, II. eranskin honen 2.3 oinarrian adierazitakoaren arabera.

b) Antolakuntzarako, komunikazioetarako, karteletarako eta antzekoetarako gastuak, behar-beharrezkotzat jotzen badira diruz lagunduko den kirol jarduera egiteko.

c) Kasuan kasuko Espainiako kirol federazioari ordaintzen zaion kanonaren edo antzekoaren gastua.

d) Material inbentariagarriaren erosketa ez da diruz lagungarria izanen, ez eta eskudirutan ematen diren sariak ere.

e) Oro har, aipatutako txapelketak antolatzeko Nafarroako Kirolaren eta Jarduera Fisikoaren Institutuaren ustez beharrezkoak eta ezinbestekoak diren gastu guztiak. Atal honetan, lehiaketa antolatzeko behar-beharrezkoa eta ezinbestekoa den material suntsikorra sartzen da, baina horren beharra berariaz justifikatu beharko da. Oro har, diruz lagungarriak izanen dira txapelketaren antolakuntza orokorrarekin zerikusia duten kontzeptuak, txapelketarako behar-beharrezkoak baldin badira. Ez dira diruz lagungarriak izanen, ordea, parte hartzen duten kirolariei eta/edo taldeei zuzenean egozten ahal zaizkien gastuekin lotutako kontzeptuak, ezta gastu osagarriak ere, ez direnak behar-beharrezkoak eginen den kirol jarduerarako.

5. oinarria. Sustapen jarduerak.

1. Nafarroa edo Espainia mailako jarduera ofizialak ez izateagatik, aurreko ataletan sartu ez diren jarduera guztiak sartzen dira atal honetan. Atal honetan ezin da inola ere sartu txapelketa nazionaletan parte hartzeari buruzko atalean sailkatzen diren lehiaketetan parte hartzea dakarren jarduerarik.

2. Gastu diruz lagungarrien kontzeptuak II. eranskin honen 2.3 oinarrian (Nafarroako txapelketak antolatzea) adierazitako berberak dira. Gastu horiez gainera, maila bakoitzean aurreikusitako jarduerak egiteko behar-beharrezkoak diren mantenu eta ostatu gastuak eta antzekoak sartzen dira.

3. Eskatzen diren jarduerak mailaka sailkatuko dira, maila bakoitzeko jarduerei dagokien dirulaguntzaren ehunekoa ezartzeko. Kasu guztietan, beharrezkoa izanen da proposatutako jarduerak azaldu, zehaztu eta justifikatzea, bakoitzarentzat aurreikusitako helburuak zehaztuta, maila bakoitzerako adierazitako definizioak kontuan harturik.

a) I. maila. Kontzeptu bat baino gehiago hartzen ditu: 1) lizentzia kopurua komunikatu den azken urtean 300 lizentzia edo gutxiago izan dituzten federazioek beren modalitatea sustatu eta garatzeko programak egiteko aurkeztutako eskaerak, zehazki, lizentzia kopurua mantentzeko edo handitzeko helburua dutenak; 2) berariaz, emakumeen kirola sustatzeko diren sustapen jarduerak; 3) behar bereziak dituzten kolektiboentzako jarduerak; 4) kirol modalitate autoktonoak (herri kirolak eta euskal pilota) sustatzeko jarduerak; 5) "Kirolaren balioak" kanpainan sartutako kirol federazioen jarduerak, aldez aurretik Kirola eta Jarduera Fisikoa Sustatzeko Zuzendariordetzaren oniritzia izanda aurreikusitako jarduera kanpainaren helburuekin bat etortzeari dagokionez. Aplikatu beharreko dirulaguntza: gastu diruz lagungarriaren %75, betiere aurreikusitako defizita gainditu gabe. Nolanahi ere, federazio bakoitzari gehienez 25.000 euroko dirulaguntza ematen ahal zaio I. mailarako.

b) II. maila. Kontzeptu bat baino gehiago hartzen ditu: 1) dena delako modalitatea sustatzeko eta garatzeko programak egitea helburu duten jarduerak, zehazki lizentzia kopurua handitzeko helburu dutenak, salbu eta I. mailan jasotakoak; 2) modalitatearen hobekuntza teknikoa helburu duten jarduerak; 3) kirol antolamendurako proiektuak; 4) Espainiako eta/edo nazioarteko federazioen egutegi ofizialetan dauden txapelketa eta lehiaketak antolatzea eta horietan parte hartzea, eranskin honetako 3. eta 4. oinarrietan agertzen ez badira. Dirulaguntza: %50. Nolanahi ere, federazio bakoitzari gehienez 20.000 euroko dirulaguntza ematen ahal zaio II. mailarako.

c) III. maila. Honako hauek hartzen ditu: 1) kirol denboraldiari bukaera emateko jardunaldiak, kontzentrazioak eta antzekoak (bazter utzita, berariaz, otorduen eta antzekoen gastuak); 2) ofizialak ez diren gainerako txapelketa eta lehiaketak antolatzea eta horietan parte hartzea; 3) udako campusak eta antzekoak; d) federazioek antolatutako kirol ikuskizunak, ez direnak txapelketa nazionalak antolatzeari buruzko atalean sartuta dauden txapelketak. Dirulaguntza: %35. Nolanahi ere, federazio bakoitzari gehienez 15.000 euroko dirulaguntza ematen ahal zaio III. mailarako.

4. Dirulaguntza esleitzeko prozedura:

a) Lehenbizi, I. mailari dagozkion eskaerak aztertu eta baloratuko dira, eta baremoaren arabera dagokien kopurua esleituko zaie, eranskin honetako "Sarrera-1" oinarrian ezartzen den bezala.

b) I. maila honetan, aipatutako esleipenaren ondoriozko zenbatekoa atal honetarako erabilgarri dagoen kreditua baino handiagoa bada, hainbanaketa eginen da ukitutako kirol federazioen artean.

c) Azkenik, II. eta III. mailetako eskaerak aztertu eta baloratuko dira. Kasu honetan, hainbanaketa egin behar izanez gero, bi maila horientzat eginen da, batera.

6. oinarria. Prestakuntza jarduerak.

1. Atal honen baitan, kirol federazioek antolatutako prestakuntzako jardueretarako emanen da dirulaguntza, baita teknikari, zuzendaritzako kide eta/edo kirolari nafarrek (kasuan kasuko Nafarroako kirol federazioaren bitartez inskribatu ondoren) parte hartzen dutenetarako ere:

2. Eskatutako jarduerak 2 mailatan sailkatuko dira, ondoren adierazten denaren arabera:

a) I. maila: zuzendaritzako kide eta teknikarien parte-hartzea Nafarroako kirol arloko kudeaketa aurreratuko ikastaro batean, federazioaren kudeaketa hobetzeko tresnak lortzeko. Ikastaro batean parte hartzea diruz lagungarria izateko atal honengatik, betekizun hauek bete behar dira, gutxienez:

I.–Nahitaezkoa da ikastaroan federazioko teknikari batek (kirol arlokoa edo kudeatzailetza arlokoa) eta zuzendaritzako kide batek parte hartzea.

II.–Ikastaroaren gutxieneko iraupena 40 ordukoa izanen da (presentzialak eta/edo on-line).

III.–Garatu beharreko edukiak: kudeaketa aurreratuko eredua, plan estrategikoa, AMIA tresna, kudeaketa ekonomiko-finantzarioa, laneko eta langileen kudeaketa, harremanak federatuekin eta federaziotik kanpoko pertsonekin eta entitateekin.

IV.–Egin nahi den ikastaroaren programa sartu behar da eskaeran.

b) II. maila: Beste prestakuntza jarduera batzuk:

I.–Arbitro, epaile eta kronometratzaileentzako ikastaroak.

II.–Etengabeko prestakuntza eta birziklatze ikastaroetarako jarduerak (mintegiak, jardunaldiak, clinic deiturikoak eta antzekoak).

3. Jarduera hauek kanpoan geldituko dira:

a) Urriaren 24ko 1363/2014 Errege Dekretuaren babesean garatzen diren ikasketa arautuen esparruan kirol teknikariak prestatzeko egiten diren ikastaroak, Hezkuntza Departamentuaren eskumenekoak direnak.

b) Prestakuntza ikastaroak, baldin haien ikasleek dirulaguntzak jaso baditzakete Kultura, Kirol eta Turismoko kontseilariaren apirilaren 7ko 63E/2025 Foru Aginduak, edo hura ordezten duen araudiak, arautzen duen laguntzen deialdiaren bidez. Salbuespen gisa, atal honetan dirulaguntza jaso dezakete federazioek antolatutako I. mailako eta II. mailako ikastaroek, baldin aurreikusitako ikasle kopurua 12 bada gehienez, betiere parte-hartzaile bakoitzeko kuota gutxienez 300 eurokoa bada I. mailako ikastaroetan, eta 700 eurokoa II. mailako ikastaroetan.

c) Federaziokoa bakarrik den titulua lortzeko ikastaroak, monitoreen edo entrenatzaileen prestakuntzakoak.

4. Aplikatu beharreko dirulaguntzaren ehunekoa, eta dirulaguntzaren zenbatekoa kalkulatzeko prozesua hau izanen da:

a) I. maila: gastu diruz lagungarriaren %75, Nafarroako kirol arloko kudeaketa aurreratuko ikastaro osoa egiteagatik.

b) II. maila: gastu diruz lagungarriaren %30. Gehienez ere, kirol federazio bakoitzari 4.000 euroko laguntza emanen zaio atal honetan.

c) Lehenik I. mailarako aurkeztu diren eskaerei dagokien dirulaguntza kalkulatuko da, eta aplikatu beharreko ehunekoaren arabera dagokien dirulaguntza esleituko zaie.

d) Ondoren, II. mailarako aurkeztu diren eskaerei dagokien dirulaguntza kalkulatuko da. II. maila honetan, aipatutako esleipenaren ondoriozko zenbatekoa atal honetarako erabilgarri dagoen kreditua baino handiagoa bada, hainbanaketa eginen da ukitutako kirol federazioen artean.

5. Hauexek izanen dira aintzat hartuko diren gastu kontzeptuak:

a) Nafarroako kirol federazioek antolatutako jardueretan, honako hauek hartuko dira aintzat: monitoreentzako eta irakasleentzako ordainketak, material didaktikoa, zabalkunde eta komunikazio gastuak eta instalazioak (baldin eta NKJFIk ezin baditu bere instalazioak edo itundutako beste batzuk erabili).

b) Beste entitate batzuek antolatutako ikastaroetan parte hartzeko, gastu hauek hartuko dira aintzat: izena ematekoak, joan-etorriak eta ostatu eta mantenu gastuak (kasua bada). Gastu horiek behar diren fakturen bidez justifikatuko dira, benetan egindako gastuaren arabera.

7. oinarria. Kirol arloko trukeak.

1. Atal honetan diruz lagunduko dira Nafarroako kirol federazioek Pirinio Atlantikoetako frantziar departamenduko kirol entitate batekin batera egiten dituzten kirol jarduerak. Gainera, aukeran izanen da jarduera horietan beste lurralde batzuetako kirol entitateek ere parte hartzea.

2. Kontzeptu diruz lagungarriak, eta dirulaguntzaren ehunekoak:

a) Joan-etorriak: autobus gastuen %100, 21 pertsonaren edo gehiagoren joan-etorrietarako. Ibilgailu partikularren gastuak: 0,25 euro/km ibilgailu bakoitzeko, 20 pertsonaren edo gutxiagoren joan-etorrietarako, ibilgailu bakoitzeko 4 pertsonako ratioarekin; bidesarien gastuak ere sartzen dira.

b) Mantenua: justifikatutako mantenu gastuen %100; gehienez ere 30 euro eguneko eta parte-hartzaile bakoitzeko.

c) Ostatu hartzea: justifikatutako ostatu gastuen %100; gehienez 30 euro eguneko.

d) Kirol teknikariak: justifikatutako gastuen %100; gehienez 60 euro eguneko eta teknikari laguntzaile bakoitzeko. Teknikari kopuruak muga hauek ditu: banakako kiroletan, teknikari bat 5 kirolariko; eta taldeko kiroletan, 2 teknikari talde bakoitzeko.

e) Teknikari hizlariak: justifikatutako gastuen %100; gehienez 100 euro eguneko eta teknikari bakoitzeko.

f) Arbitrajeak: justifikatutako gastuen %100; gehienez 60 euro eguneko eta arbitro bakoitzeko.

g) Pistaren alokairua: justifikatutako gastuen %100.

3. Jardueren mailak: aurreko irizpideak jarduera bakoitzaren gastuen arabera aplikatu ondoren, dirulaguntzarako ezarritako gehieneko muga aplikatuko da, jarduerak 3 maila hauetan sailkatuta:

a) 1. maila: 5 irizpide hauetatik 3 gutxienez betetzen dituzten jarduerak: kirol autoktonoko jarduerak, emakumezkoen kirolekoak, teknifikazioari eta/edo kirolari eta osasunari buruzkoak, jardunaldi bateko baino gehiagoko iraupenarekin, beste lurralde baten parte-hartzearekin (Nafarroaz eta Pirinio Atlantikoez gain). Diruz lagunduko den gehieneko kopurua: 2.500 euro jarduera bakoitzeko.

b) 2. maila: 1. mailan markatutako irizpideetatik 1 edo 2 soilik betetzen dituzten jarduerak. Diruz lagunduko den gehieneko kopurua: 2.000 euro jarduera bakoitzeko.

c) 3. maila: 1. mailan markatutako irizpideetatik bakarra ere betetzen ez duten jarduerak: 1.000 euro jarduera bakoitzeko.

4. Federazio bakoitzeko gehieneko dirulaguntza, eskatutako truke posible guztiak batuta: 5.000 euro.

8. oinarria. Kirol jantziak.

1. Atal honetan sartzen dira Espainiako txapelketetan parte hartzen duten Nafarroako selekzioen kirol jantzi ofizialak erosteko gastuak: kirol lehiaketa ofizialetan jokatzekoak, paseokoak eta beroketa egitekoak, baita haien osagarriak ere, betiere Nafarroako Kirolaren eta Jarduera Fisikoaren Institutuaren oniritziarekin erosi badira.

2. Jantzietan irudi korporatiboaren marka agertu behar da, Nafarroako Kirolaren eta Jarduera Fisikoaren Institutuak zehazten duena. Erosi aurretik, materialaren behin betiko diseinua aurkeztu beharko zaio NKJFIri.

3. Materialaren baldintza teknikoak:

a) Jantzi arruntak: txandala, poloa, parka, zira, izerditakoa, kamiseta eta jokatzeko galtzak.

b) Osagarri arruntak: bidaietarako poltsa eta/edo motxila.

c) Osagarri bereziak, kirol modalitatearen arabera: betiere Nafarroako Kirolaren eta Jarduera Fisikoaren Institutuaren oniritziarekin.

d) Gomendatutako koloreak: gorria (oinarrizko kolorea), urdina, eta zuria kontrasterako.

4. Aplikatuko den baremoa: ehuneko hauen arabera aplikatuko da dirulaguntza, eskatutako materialaren guztirako aurrekontua kontuan hartuta, 10.000 euroko mugarekin:

a) 1.000,00 euro bitarte, kopuru hori barne, %100.

b) 1.000,01 eurotik 2.000,00 eurora bitarte, %90.

c) 2.000,01 eurotik 3.000,00 eurora bitarte, %80.

d) 3.000,01 eurotik 4.000,00 eurora bitarte, %70.

e) 4.000,01 eurotik 5.000,00 eurora bitarte, %60.

f) 5.000,01 eurotik 10.000,00 eurora bitarte, %50.

5. 10.000 eurotik gorako eskaerak: erosi beharreko materialaren aurrekontua 10.000 eurotik gorakoa bada, hasierako 10.000 euroko kopurua izanen da diruz lagungarria aurreko baremoari jarraikiz (%50), eta aurrekontuaren gainerako zatia federazioak hartuko du bere gain.

6. Behin baremo hori aplikatutakoan, eranskin honen 3. oinarriaren 5.a) atalari jarraikiz errendimendu programetan sartuta ez dauden federazioei dagokien zenbatekoa murriztu eginen da, hasierako kalkuluaren %75era, gisa horretako programetan sartutako federazioei lehentasuna emate aldera.

7. Aurreko atalaren arabera kalkulatutako zenbatekoa handiagoa bada aurrekontuko partida erabilgarria baino, hainbanaketa eginen da federazio eskatzaile guztien artean.

9. oinarria. Material inbentariagarriaren ekipamendua.

1. Dirulaguntza eskatzen ahal da tresna informatikoak, kiroleko materiala, bulegoko materiala, komunikazio sistemak eta, oro har, kirol federazioei egokitutako Kontabilitate Plan Orokorraren kontabilitate-irizpideen arabera inbentariagarria den beste edozein material eskuratzeko.

2. Aplikatuko den baremoa: ehuneko hauen arabera aplikatuko da dirulaguntza, eskatutako materialaren guztirako aurrekontua kontuan hartuta, 10.000 euroko mugarekin:

a) 601 euro bitarte, kopuru hori barne, %90.

b) 601,01 eurotik 1.200,00 eurora bitarte, %85.

c) 1.200,01 eurotik 1.800,00 eurora bitarte, %80.

d) 1.800,01 eurotik 2.400,00 eurora bitarte, %75.

e) 2.400,01 eurotik 3.000,00 eurora bitarte, %70.

f) 3.000,01 eurotik 3.600,00 eurora bitarte, %65.

g) 3.600,01 eurotik 4.200,00 eurora bitarte, %60.

h) 4.200,01 eurotik 5.000,00 eurora bitarte, %55.

i) 5.000,01 eurotik 10.000,00 eurora bitarte, %50.

3. 10.000 eurotik gorako eskaerak: erosi beharreko materialaren aurrekontua 10.000 eurotik gorakoa bada, hasierako 10.000 euroko kopurua izanen da diruz lagungarria aurreko baremoari jarraikiz (%50), eta aurrekontuaren gainerako zatia federazioak hartuko du bere gain.

Iragarkiaren kodea: F2609128