2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
GOÑERRI
Emakumeen eta gizonen berdintasunerako udal-ordenantza. Behin betiko onespena
Ordenantzaren hasierako onespenaren erabakia 2026ko 86. Nafarroako Aldizkari Ofizialean argitaratu zen, maiatzaren 5ean, eta jendaurreko epean inork ez du alegaziorik aurkeztu; hortaz, behin betiko onetsi eta testu osoa argitaratzen da, uztailaren 2ko 6/1990 Foru Legearen 325. artikuluan xedatuari jarraikiz (Nafarroako Toki Administrazioari buruzko Foru Legea).
Goñerrin, 2026ko uztailaren 14an.–Alkatea, Eduardo Urmeneta Armendariz.
EMAKUMEEN ETA GIZONEN BERDINTASUNERAKO UDAL-ORDENANTZA
Goñerriko Udala
I. TITULUA.–XEDAPEN OROKORRAK
1. artikulua. Xedea eta helburua. Ordenantza honen xedea da udaleko arau-esparrua ezartzea honako hauetan:
a) Emakumeen eta gizonen arteko tratu- eta aukera-berdintasunaren printzipioa integratzea Udalaren jarduketa guztietan;
b) Benetako berdintasun eraginkorra lortzeko politikak, neurriak eta jarduerak sustatzea;
c) Emakumeen kontrako indarkeriari aurrea hartzea eta aurre egitea, eta horren kontra jardutea. Halaber, bermatzea indarkeria pairatzen duten emakumeei babesa eta arreta ematen zaiela, baliabide eskudunekin koordinatuta;
d) Herritarrak berdintasunaren arloan sentsibilizatzea eta prestatzea, eta berdintasunaren balioen hedapena sustatzea.
2. artikulua. Aplikazio-eremua. Ordenantza hau arlo hauetan aplikatuko da:
a) Goñerriko Udalak antolatutako, kudeatutako, sustatutako edo diruz lagundutako jarduketa, zerbitzu eta jarduera guztietan;
b) Udal langileen jardunean, beren eginkizunetan dihardutela;
c) Udalaren eta Udalaren izenean eta haren ordez jarduten duten entitate edo pertsonen arteko harremanetan eta lankidetzan.
3. artikulua. Printzipio gidariak. Printzipio hauen arabera jardunen da, berdintasunaren esparruan, udal jarduketetan:
a) Emakumeen eta gizonen arteko tratu- eta aukera-berdintasuna;
b) Sexuan edo generoan oinarritutako diskriminaziorik eza;
c) Genero ikuspegia udal jarduketak planifikatzen eta egiten direnean;
d) Inolako tolerantziarik eza emakumeen kontrako indarkeriaren aurrean;
e) Konfidentzialtasuna eta errespetua, eta pertsonen duintasunaren babesa;
f) Koordinazioa gizarte zerbitzuekin, baliabide espezializatuekin eta administrazio eskudunekin.
II. TITULUA.–OINARRIZKO DEFINIZIOAK
4. artikulua. Definizioak. Ordenantza honen ondorioetarako, hona hemen zer diren honako hauek:
a) Genero-berdintasuna: emakumeen eta gizonen arteko tratu- eta aukera-berdintasuna, sexuan edo generoan oinarritutako diskriminaziorik gabe.
b) Emakumeen kontrako indarkeria / genero-indarkeria: emakume izate hutsagatik emakumeen kontra bideratzen den indarkeriazko ekintza fisiko, psikologiko, sexual, ekonomiko edo digital oro.
c) Genero ikuspegia: politika publikoak diseinatzeko, gauzatzeko eta ebaluatzeko prozesu guztietan, emakumeen eta gizonen egiturazko ezberdintasunak aintzat hartzen dituen ikuspegia.
d) Landa eremuko emakumea: udalerriko landa eremuan bizi den edo lan egiten duen emakumea, zeinaren ekarpena ezinbestekoa baita ibarra demografikoki, ekonomikoki eta sozialki mantentzeko.
e) Erantzukidetasuna: familiako, etxeko eta komunitateko ardurak emakumeen eta gizonen artean modu orekatuan banatzea.
III. TITULUA.–BERDINTASUNERAKO UDAL NEURRIAK
5. artikulua. Berdintasunaren integrazioa
1. Udalak genero-ikuspegia aintzat hartuko du udal politikak, zerbitzuak eta jarduketak planifikatzen, gauzatzen, kontrolatzen eta ebaluatzen dituenean.
2. Udaleko barne-araudiak eta agiri ofizialak hizkera ez-sexista eta inklusiboan idatziko dira.
6. artikulua. Berdintasuna eta jasangarritasun demografikoa landa eremuan.
1. Udalak genero-ikuspegia txertatuko du hauei lotutako politiketan: biztanleak errotzea, garapen jasangarria eta ibarreko oinarrizko zerbitzuen mantentzea.
2. Zehazki, honako hauetan jarriko da arreta:
a) Emakume gazteak eta familiak udalerrian gelditzea edo udalerrira itzultzea laguntzen duten baldintzak hobetzea.
b) Emakumeak buru dituzten ekonomia ekimenak eta ekintzailetzakoak bultzatzea.
c) Bakartze soziala eta nahi ez den bakardadea prebenitzea, batez ere adineko emakumeetan.
d) Kontziliazioa eta erantzukidetasuna ahalbidetzen duten neurriak sustatzea.
7. artikulua. Sentsibilizazioa eta hedapena.
1. Udalak emakumeen eta gizonen berdintasunari eta genero-indarkeria prebenitzeari buruzko sentsibilizazio eta hedapen jarduerak sustatuko ditu.
2. Data garrantzitsuetan informazio ekintzak eta kanpainak egitea sustatuko da, hala nola martxoaren 8an eta azaroaren 25ean.
8. artikulua. Sare komunitarioak eta zaintzaren ikuspegia.
1. Udalak ekimenak sustatuko ditu auzokideen babes sareak eta belaunaldien arteko lankidetza indartzeko.
2. Familia eta komunitate arloan zaintzaren gizarte-balioa aitortzen eta ikusgai egiten duten jarduerak sustatuko dira, eta emakumeen eta gizonen erantzukidetasuna bultzatuko da.
3. Bakartze geografikoaren edo herrien sakabanatzearen ondoriozko zaurgarritasun egoerei arreta berezia jarriko zaie.
IV. TITULUA.–EMAKUMEEN KONTRAKO INDARKERIA PREBENITZEKO ETA HARI AURRE EGITEKO NEURRIAK
9. artikulua. Udalaren jarduketa esparrua.
1. Emakumeen kontrako indarkeria egoeren aurrean jarduteko udal protokoloa betez, Udalak bermatuko du arreta ematen dela, gizarte-zerbitzu eskudunekin eta baliabide espezializatuekin koordinatuta, eta kasuak horiengana bideratzen direla.
2. Udal protokoloa tresna operatibo bat da, prozedurak arautzen dituena emakumeen kontrako indarkeria egoerak detektatzeko, horiei arreta emateko eta beste zerbitzu batzuekin koordinatzeko, betiere genero ikuspegia txertatuta.
10. artikulua. Larrialdiko edo arrisku larriko egoeretan jardutea.
1. Emakume baten osotasun fisiko edo psikikoa arrisku larrian edo berehalakoan badago, udal langileak berehala jarriko dira harremanetan larrialdi zerbitzuekin (112) eta Estatuko segurtasun-indar eta kidegoekin edo Foruzaingoarekin.
2. Egoera horietan, lehentasuna izanen da biktimaren babesa eta segurtasuna bermatzea, eta saihestuko da horiek birbiktimizatzea.
11. artikulua. Konfidentzialtasuna eta informazioa tratatzea.
1. Genero-indarkeriako kasuei lotutako informazioa konfidentzialtasunez tratatuko da, datu pertsonalen babeserako arloan indarrean dagoen araudiarekin bat.
2. Udalak bermatuko du kasuen arreta teknikorako beharrezkoak diren pertsonek baino ez dutela informazio pertsonalerako sarbiderik.
V. TITULUA.–UDAL LANGILEEN PRESTAKUNTZA ETA TREBAKUNTZA
12. artikulua. Berdintasunari eta emakumeen kontrako indarkeriari buruzko prestakuntza ematea.
1. Udalak emakumeen eta gizonen berdintasunari eta emakumeen kontrako indarkeriari buruzko prestakuntza eta sentsibilizazioa sustatuko du udal langileen artean.
2. Hauxe izanen da prestakuntzaren helburua:
a) Udal kudeaketan genero ikuspegia txertatzea.
b) Emakumeen kontrako indarkeriako balizko egoerak goiz antzemateko prozedurak hobetzea.
c) Errespetuzkoa eta egokia den arreta bermatzea, inor birbiktimizatu gabe.
d) Langileek Udaleko Jarduketa Protokoloa ezagutzen dutela bermatzea.
3. Prestakuntza honelakoa izanen da:
a) Barneko informazio-jardunaldiak.
b) Administrazio publiko eskudunek antolatutako ikastaroak.
c) Entitate espezializatuek edo gizarte zerbitzuen mankomunitateek emandako prestakuntza ekintzak.
4. Prestakuntzaren programazioa udalerriko antolakuntza eta aurrekontu aukeretara egokituko da.
VI. TITULUA.–UDAL DIRULAGUNTZAK ETA LANKIDETZAK
13. artikulua. Berdintasunaren printzipioa dirulaguntzetan txertatzea.
Udalak emakumeen eta gizonen berdintasunaren printzipioa txertatuko du onesten dituen oinarri arautzaileetan eta dirulaguntzen deialdietan.
Ahal den neurrian, positiboki baloratuko da:
a) Diruz lagundutako jarduerek genero-berdintasuna sustatzea.
b) Emakumeen eta gizonen parte-hartze orekatua sustatzea.
c) Hizkera inklusiboa eta ez-sexista erabiltzea hedapenean.
d) Diskriminazio jokabideak edo indarkeriazkoak prebenitzeko neurriak sartzea.
Landa eremuan, bereziki baloratuko dira arlo hauetan laguntzen duten ekintzak:
a) Emakumeak landa eremuan errotzea.
b) Komunitatearen dinamizazioa, emakumeen eta gizonen parte-hartze orekatuarekin.
c) Eten digitala edo oinarrizko zerbitzuak eskuratzeko oztopoak murriztea.
14. artikulua. Debekua.
Ez dira udal dirulaguntzen onuradun izanen sexua dela-eta diskriminatzen duten jarduerak, ez eta sexua dela-eta diskriminatzeagatik zehapen administratiboren bat izan duten pertsona fisiko eta juridikoak ere, kasuan kasuko zehapenak ezarritako epean.
15. artikulua. Baldintzak.
Entitate onuradunek berdintasun printzipioa eta diskriminaziorik eza bermatuko dute diruz lagundutako jarduerak egiten dituztenean.
VII. TITULUA.–PARTE-HARTZEA ETA GOBERNANTZA
16. artikulua. Herritarren parte-hartzea berdintasunaren arloan.
1. Udalak auzokideen elkarrizketa-espazioak sustatuko ditu, berdintasunaren arloko beharrak eta proposamenak identifikatzeko, betiere ibarreko landa-errealitatera egokituta.
2. Emakumeen eta gizonen parte-hartze orekatua sustatuko da bizitza publiko eta komunitarioan.
3. Udalak berdintasunaren arloko zinegotzi bat edo udaleko erreferentziazko kide bat izendatzen ahalko du, eskualdeko gizarte zerbitzuekin eta espezializatutako entitateekin koordinatu dadin.
VIII. TITULUA.–JARRAIPENA ETA EBALUAZIOA
17. artikulua. Ordenantzaren jarraipena eta ebaluazioa.
1. Alkateari dagokio ordenantza honen aplikazio-maila ebaluatzea, zehazten diren eskualdeko zein kanpoko gizarte zerbitzuen laguntzarekin.
2. Jarraipen txosten bat eginen da urtero, datu agregatuekin eta inor identifikatu gabe. Bertan jasoko dira egindako jarduketak, intzidentziak eta emaitzen ebaluazioa. Urteko txostenean, ahal dela, hauek jasoko dira:
a) Udal jardueretan izandako parte-hartze datuak, sexuaren arabera bereizita.
b) Sentsibilizazioaren eta berdintasunaren arloan egindako jarduketak.
c) Zaintzari, zahartzeari eta despopulazioari lotuta detektatutako beharrak.
d) Eskualdeko baliabideekin edo baliabide espezializatuekin egindako koordinazio-lanak.
3. Txostena Osoko Bilkuran aurkeztuko da, eta horren inguruan eztabaidatuko da, dagokion balorazioa egiteko.
IX. TITULUA.–AZKEN XEDAPENAK
18. artikulua. Jarraibide osagarriak Alkateak eskumena izanen du Ordenantza hau garatzeko eta aplikatzeko beharrezkoak diren barne jarraibide osagarriak emateko, betiere horren irismena eta xedea aldatu gabe.
19. artikulua. Indarra hartzea eta argitaratzea. Ordenantza honek indarra hartuko du Nafarroako Aldizkari Ofizialean argitara eman eta biharamunean, eta indarra izanen du beste udal arau batek indargabetzen edo aldatzen duen arte.
Iragarkiaren kodea: L2609851
