1. NAFARROAKO FORU KOMUNITATEA
1.7. BESTELAKOAK
1748/2026 EBAZPENA, 2026ko uztailaren 22koa, Nafarroako Unibertsitate Publikoko errektoreak emana, Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen opor, baimen, lizentzia, lanaldi eta eszedentzien arautegia aldatzen duena.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agindua ematen dut Gobernu Kontseiluak 2026ko uztailaren 22an hartutako erabaki hau argitaratzeko: "Erabakia, Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen opor, baimen, lizentzia, lanaldi eta eszedentzien arautegia aldatzen duena".
"GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO TEKNIKARIEN ETA KUDEAKETAKO ETA ADMINISTRAZIOKO ETA ZERBITZUETAKO LANGILEEN OPOR, BAIMEN, LIZENTZIA, LANALDI ETA ESZEDENTZIEN ARAUTEGIA ALDATZEN DUENA.
Gobernu Kontseiluak 2017ko uztailaren 4an hartutako erabaki baten bidez, Nafarroako Unibertsitate Publikoko administrazioko eta zerbitzuetako langileen opor, baimen, lizentzia, lanaldi eta eszedentzien arautegia onetsi zen. Erabaki hori 2017ko 141. Nafarroako Aldizkari Ofizialean argitaratu zen, uztailaren 21ean.
Gobernu Kontseiluak 2023ko ekainaren 27an hartutako erabaki baten bidez, aldatu egin zen Nafarroako Unibertsitate Publikoko administrazioko eta zerbitzuetako langileen opor, baimen, lizentzia, lanaldi eta eszedentzien arautegia, eta "Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen opor, baimen, lizentzia, lanaldi eta eszedentzien arautegia" izena hartu zuen. Erabaki hori 2023ko 144. Nafarroako Aldizkari Ofizialean argitaratu zen, uztailaren 11n.
Unibertsitateko Langileen Batzordean ordezkaritza duten erakunde sindikalek eskatuta, eta negoziazio prozesu baten ondorioz, arautegi horretan zenbait aldaketa egitea erabaki da.
Beraz, erabaki bat onetsi behar da aldaketa horiek sartzeko.
Azaldutakoari jarraikiz, kudeatzaileak proposatuta, hau da Gobernu Kontseiluak, bere kideek aldez aurretik eztabaida egin eta gero, 2026ko uztailaren 22an egindako bileran hartu duen:
ERABAKIA
Lehenbizikoa.–Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen opor, baimen, lizentzia, lanaldi eta eszedentzien arautegiaren aldaketa.
Aldatu egin da Nafarroako Unibertsitate Publikoko teknikarien eta kudeaketako eta administrazioko eta zerbitzuetako langileen opor, baimen, lizentzia, lanaldi eta eszedentzien arautegia –Gobernu Kontseiluaren 2017ko uztailaren 4ko erabaki baten bidez onetsia eta Gobernu Kontseiluaren 2023ko ekainaren 27ko erabaki baten bidez aldatua–, honela:
1) 8. artikulua aldatu da, eta honela idatzita geldituko da:
"8. artikulua. Baimena senitarteko baten gaixotasunagatik.
1.–Bost egun baino gehiagoko ospitaleratze kasuetan, ospitalean nahiz etxean, edo medikuaren irizpenaren arabera gaixotasun larria edo oso larria denean, ospitaleratu edo ez, ordaindutako baimen hauek emango dira:
a) Ezkontidea edo bikotekide egonkorra bada, edo lehen graduko odolkidetasuna duen senitartekoa: lau egun Nafarroako Foru Komunitatean gertatzen denean, edo bost egun handik kanpora gertatzen denean.
b) Anai-arrebak edo lehen graduko afinitatea duten senitartekoak badira: hiru egun Nafarroako Foru Komunitatean gertatzen denean, edo lau egun handik kanpora gertatzen denean.
c) Bigarren gradurainoko odolkidetasuna edo afinitatea duten senitartekoak badira, eta ez badira aurreko horien artean aipatu: bi egun Nafarroako Foru Komunitatean gertatzen denean, edo hiru egun handik kanpora gertatzen denean.
2.–Bost eguneko edo gutxiagoko ospitaleratze kasuetan, edo medikuaren irizpenaren arabera gaixotasuna hain larria ez denean edo pronostiko erreserbatua duenean, ospitaleratu edo ez, ordaindutako baimen hauek emango dira:
a) Ezkontidea edo bikotekide egonkorra bada, edo lehen graduko odolkidetasuna duen senitartekoa: bi egun Nafarroako Foru Komunitatean gertatzen denean, edo hiru egun handik kanpora gertatzen denean.
b) Bigarren gradurainoko odolkidetasuna edo afinitatea duten senitartekoak badira, eta ez badira aurreko horien artean aipatu: egun bat Nafarroako Foru Komunitatean gertatzen denean, edo bi egun handik kanpora gertatzen denean.
3.–Artikulu honetan aipatzen diren baimen egunak lanegunak izango dira, eta eskubidea ematen duen egoerak iraun artean hartu ahal izango dira, betiere baimena zerbitzuaren beharrekin bateragarria baldin bada. Ospitaleratze kasuetan, langileak aukera edukiko du baimen egunak alta jaso eta hamabost eguneko epean hartzeko.
4.–Zilegi da baimen hau beste ospitaleratze edo gaixoaldi bat dagoen bakoitzean ematea. Halaber, ospitaleratze kasuetan, ospitaleratu zutenetik hilabete igaro ondoren senitartekoak ospitaleratuta jarraitzen badu, zilegi da beste baimen bat ematea, 1. apartatuan ezarritako iraupenarekin.
Baimen hori emateko, langileak aurreko baimeneko egun guztiak hartuak izan behar ditu.
5.–Larrialdietako behaketan egotea ospitaleratzetzat joko da.
6.–Giza Baliabideen Zerbitzura igorri beharko da gertaera eragilea egiaztatzen duen medikuaren frogagiria".
2) 21. artikulua aldatu da, eta honela idatzita geldituko da:
"21. artikulua. Norberaren kontuak.
1.–Teknikariek eta kudeaketako eta administrazioko eta zerbitzuetako langileek zilegi dute gehienez ere hiru eguneko baimen ordaindua hartzea norberaren kontuengatik, urte natural edo kontratuko urte bakoitzeko, edo proportzioan dagokion denbora lan egindako aldia urtebetetik beherakoa bada. Aukera izango da egun horiek hartzeko aldia hurrengo urteko urtarrilaren 31ra arte luzatzeko, ez gehiago.
Zerbitzuaren beharrekin bateragarria baldin bada, zilegi da baimena zenbait alditan erabiltzea, eta aldi horiek ez dira izango 30 minututik beherakoak edota 3 ordu baino luzeagoak.
2.–Era berean, norberaren kontuetarako bi baimen egun gehigarri hartzeko eskubidea izango dute 18 urteko antzinatasuna lortzen duten langileek. Beste egun bat gehituko da langileek 24 urteko antzinatasuna lortzen dutenean, eta beste egun bat une horretatik aurrera betetako hiru urteko aldi bakoitzeko.
3.–Aurreko paragrafoa aplikatzearen ondoriozko norberaren kontuetarako baimen egun gehigarriak zerbitzu aktiboko urte oso bakoitzean sortutakoei gehituko zaizkie. Zerbitzualdia laburragoa bada, antzinatasunagatiko norberaren kontuetarako baimen egun gehigarrien parte proportzionala sortuko da.
4.–Baimena erabiltzeko, 5 egun aurretik jakinarazi behar da, gutxienez ere. Hala ere, orduka erabiltzen bada, baimena eskatzeko epea laburragoa izan daiteke, eta lehenbailehen eta betiere aurretiaz eskatu beharko da".
3) 44. artikulua aldatu da, eta honela idatzita geldituko da:
"44. artikulua. Ezkontideari, izatezko bikotekideari edo lehen graduko senitartekoari kontsulta medikoetara laguntzea.
1.–Baimena emango da behar den osasun sistemako kontsulta medikora laguntzeko ezkontideari edo izatezko bikotekideari eta lehen graduko odolkidetasuna edo afinitatea duten senitartekoei, bai eta bigarren graduko odolkidetasuna dutenei ere baldin eta legez aitortutako desgaitasunen bat badute.
2.–Baimena emango da, halaber, ezkontideari edo izatezko bikotekideari eta lehen graduko odolkidetasuna edo afinitatea duten senitartekoei, bai eta bigarren graduko odolkidetasuna dutenei ere baldin eta legez aitortutako desgaitasunen bat badute, kontsulta hauetara laguntzeko:
–Programatutako kirurgia-prozesu anbulatorioak edo 24 orduko edo denboraldi laburragoko ospitaleratzea ekartzen dutenak.
–Proba diagnostiko osagarriak.
–Kimioterapia- edo/eta erradioterapia-saioak.
3.–Baimena emango da pertsona horiei edozein kontsulta mediko partikularretara lanorduetan laguntzeko, betiere lanetik kanpo emandako denbora berreskuratzen bada.
4.–Kontsulta mediko horietara laguntzeko asmoa arduradunari jakinarazi behar zaio 24 ordu lehenago gutxienez, eta kontsultara joan izanaren frogagiria Giza Baliabideen Zerbitzuan aurkeztu beharko da".
Bigarrena.–Argitalpena.
Erabaki hau Nafarroako Unibertsitate Publikoaren iragarki ohol elektroniko ofizialean eta Nafarroako Aldizkari Ofizialean argitaratuko da.
Hirugarrena.–Indarra hartzea.
Erabaki honek Nafarroako Unibertsitate Publikoaren iragarki ohol elektroniko ofizialean argitaratu eta biharamunean hartuko du indarra.
Laugarrena.–Hedapena.
Erabaki hau Kudeatzailetzari eta Giza Baliabideen Zerbitzuari helaraziko zaie.
Bosgarrena.–Errekurtsoak.
Erabaki honen aurka, zilegi da administrazioarekiko auzi-errekurtsoa jartzea, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat."
Iruñean, 2026ko uztailaren 22an.–Ramón Gonzalo García, errektorea.
Iragarkiaren kodea: F2610252
