Iragarkia

146. ALDIZKARIA - 2026ko uztailaren 28a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

IRUÑA

Ehun urtetik gorako saltokietan eta saltoki berezietan obra-lizentziak emateari uztea

Iruñeko Udalak, 2026ko uztailaren 2an egin osoko bilkuran, honako erabaki hau hartu zuen:

PLE 02-JUL-26 (8/CU).

Lurraldearen Antolamenduko Batzordeak, 2007ko apirilaren 12an, erabaki zuen behin betiko onestea proposamen bat, zeinaren bidez Iruñeko Udal Plana homologatu baitzen, eta 2002ko abenduaren 20ko 35/2002 Foru Legera (Lurralde Antolamenduari eta Hirigintzari buruzkoa) egokitu. Horren testu bategina 2008ko urtarrilaren 18ko osoko bilkuran onetsi zen (2008ko 22. Nafarroako Aldizkari Ofizialean argitaratu zen, otsailaren 18an).

Udal Planeko Katalogoan, Eraikitako Ondarearen apartatuan, jasotzen dira, besteak beste, Iruñeko ondare historiko-artistikoa osatzen duten eraikinak. Halaber, hiru babes-maila esleitzen zaizkie horien katalogazio-mailaren arabera (1. gradua, 2. gradua eta 3. gradua). 3. graduko eraikinen kategorian eraikinen zerrenda bat jasotzen da, hain zuzen, beheko solairuetan babestu beharreko merkataritza-lokalak dituzten eraikinena. Halaber, katalogo horretako 30. artikuluan (3. graduko eraikin babestuak) "katalogatutako merkataritza-lokalei" lotutako hiru puntu daude.

Alde Zaharreko BEBPBan jasotzen da Iruñeko Udal Planeko eraikinen zerrenda hori bera. Gainera, hirigintzako araudian, eraikin guztien eta horien beheko solairuen estetikari buruzko araudia jasotzen da.

Iruñeko Ehun Urtetik Gorako Saltokien eta Saltoki Berezien Inbentarioa egin da, Udal Katalogoan jasotzeko modukoak diren eta Alde Zaharrean dauden 36 saltokien zerrenda batekin. 36 saltoki horietatik, 22 dagoeneko indarreko katalogoan daude; beste 2 katalogoan daude, baina eraikinaren zatia soilik hartuta –aintzat hartu gabe beheko solairuko lokala–; eta beste 12 katalogoan sartzeko proposatu diren ondasun higiezin berriak dira.

Udal Planeko Katalogoan eta BEBPBko Katalogoan dagoeneko hautatutako saltokietako 22 jasota dauden arren, agiri horiek berrikusi behar dira, proposatutako eta aldatutako elementu berriak gehitzeko, eta araudiaren atala behar bezala egokitzeko.

Udal Planeko Katalogoaren eta BEBPBko Katalogoaren aldaketak hasiera batez onesten diren bitartean, eta katalogatu edo aldatu beharreko ondasun higiezinak babeste aldera, proposatzen da obra-lizentziak emateari uztea, bai eta horiei loturiko erantzukizunpeko adierazpenak eta aurretiazko komunikazioak onartzeari ere, honako saltoki hauei dagokionez: I. eranskinean (inbentarioa) jasotzen diren Iruñeko ehun urtetik gorako saltokiak eta saltoki bereziak eta III. eranskineko (fitxak) elementu babestuei eragiten dietenak.

Beharrezkotzat jotzen da lizentziak emateari uztea; horrela, babes-araubidearen aldaketa aztertzen den eta hasiera batez izapidetzen den bitartean, saihestuko da eraikinen egoerari kalte egiten ahal dioten jarduketak egitea, bai eta izapidetzen ari den hirigintza-aldaketa bera edukirik gabe uztea.

Horiek horrela, eta bat etorriz uztailaren 26ko 1/2017 Legegintzako Foru Dekretuaren 70.1 artikuluan xedatutakoarekin (legegintzako foru dekretu horren bidez onetsi zen Lurraldearen Antolamenduari eta Hirigintzari buruzko Foru Legearen testu bategina),

ERABAKITZEN DA:

1. Udal Planeko Katalogoa eta Iruñeko Alde Zaharreko Barne Eraberritze eta Babeserako Plan Bereziaren Katalogoa aldatzeko berrikuste- eta formulazio-lanak egiten jarraitzea, proposatutako eta aldatutako elementu berriak sartzeko eta araudia egokitzeko.

2. Udal Planeko Katalogoko eta Iruñeko Alde Zaharreko Barne Eraberritze eta Babeserako Plan Bereziaren Katalogoko aldaketak hasiera batez onesten ez diren arte, obra-lizentziak emateari uztea erabakitzea, eta, hala badagokio, erantzukizunpeko adierazpenak eta aurretiazko komunikazioak onartzeari uztea ere, baldin eta eragiten badiete honako hauei: Iruñeko Ehun Urtetik Gorako Saltokien eta Saltoki Berezien Inbentarioan (I. eranskina) agertzen diren lokaletako banako fitxetan identifikatutako intereseko elementuei, erabaki honetan ezartzen den esparruan.

3. Etenaren aplikazio-eremuak barne hartuko ditu III. eranskinean jasotzen diren intereseko elementuak eta babeserako determinazio partikularrak dituzten lokalak, baldin eta Alde Zaharreko U.I.–VIII unitatean badaude eta Iruñeko Ehun Urtetik Gorako Saltokien eta Saltoki Berezien Inbentarioan (erabaki honi gehitu zaio) agertzen badira.

Indarreko katalogoko fitxen eta III. eranskineko fitxen artean desadostasunik balego, lehentasuna izanen dute eranskin horretan ezarritako determinazioek, eten honen esparruan.

4. Eten horrek eraginen die banako fitxetan identifikatutako interes elementuetan eta babes-determinazio partikularretan ondorioak dituzten obra-lizentziei, erantzukizunpeko adierazpenei eta aurretiazko komunikazioei, zehazki, honako jarduketa hauek egitea xede badute: errotuluak, fatxadak, arotzeria, erakusleihoak, zoladurak, barne-dekorazioa, jatorrizko altzariak, elementu apaingarriak, eraikuntza-elementuak edo bestelako elementuak aldatzea, ezabatzea, desmuntatzea, ordeztea, eraldatzea, ezkutatzea, lekualdatzea edo desitxuratzea, baldin eta elementu horiek, banakako fitxen arabera, ondare-, arkitektura-, historia-, kultura-, ingurumen-, tradizio-, tipologia- edo identitate-balioa edo balio sinbolikoa badute.

Arrazoizko zalantzarik bada pentsatzeko jarduketa batek inbentarioan jasotako elementu bati eragiten ahal diola, udaleko zerbitzu teknikoek aldez aurreko txostena egin beharko dute izapidetze arrunta, izapidetze laburtua edo erantzukizunpeko adierazpen bidezko izapidetzea onartu aurretik.

5. Etenak ez du eraginik izanen inbentarioan jasotako lokalen eta saltokien elementuak kontserbatzeko, zaharberritzeko, konpontzeko eta mantentzeko obra edo jarduketetan, baldin eta horien xedea bada elementu horien ezaugarriak mantentzea, konpontzea edo haien balioa nabarmentzea. Horrez gain, baimenduta egonen da obrak eta jarduketak egitea segurtasuna, osasungarritasuna eta irisgarritasuna xede badute, edo kontserbazio-arauak betetzea, betiere lanak egiten badira identifikatutako balioekin bat.

6. Lizentziak emateko prozedurak bertan behera gelditzeko agintzea, dagokion lurralde-eremuan eta esparru objektibo edo materialean, eta banaka jakinaraztea erabaki hau hartu aurretik lizentzia-eskaera aurkeztu zutenei, uztailaren 26ko 1/2017 Legegintzako Foru Dekretuaren 70.5 artikuluan ezarritako baldintzetan (legegintzako foru dekretu horren bidez onetsi zen Lurraldearen Antolamenduari eta Hirigintzari buruzko Foru Legearen testu bategina).

7. Etenak gehienez ere urtebeteko iraupena izanen du, erabakia hartzen denetik zenbatzen hasita, eta honako hauek aintzat hartuta:

–Epe horretan hasierako onespena ematen bazaio, etena mantendu eginen da plangintzako determinazio berrien ondorioz hirigintza-antolamendua aldatzen duten eremuetan, eta eten horren ondorioak behin betiko iraungiko dira bi urte pasatutakoan plangintza edo haren erreforma aztertzeko hartutako etendura-erabakitik.

–Baldin hasierako onespena gertatzen bada urtebeteko epea pasatu ondoren, gehienez urtebete iraunen du hasierako onespen horretatik heldu den etenak.

8. Erabaki hau, I. eta III. eranskinekin batera, argitara ematea Nafarroako Aldizkari Ofizialean, eta, gutxienez, Nafarroan argitaratzen diren egunkarietan eta Iruñeko Udalaren web-orrian eta egoitza elektronikoan.

9. Erabaki honen berri ematea esparru hauetan eskumenak dituzten udal alorrei, erabakia modu koordinatuan aplika dezaten: hirigintza, lizentziak, merkataritza, jarduerak, etxebizitza, herritarren parte-hartzea eta hirigintza arloko diziplina.

10. Erabaki honek bukaera ematen dio administrazio bideari, eta honen aurka administrazioarekiko errekurtsoak eta administrazioarekiko auzi-errekurtsoa aurkez daitezke.

Ebazpen honen aurka, hautara, errekurtso hauetako bat aurkezten ahal da:

–Berraztertzeko errekurtsoa, egintza eman duen organoari zuzendua, hilabeteko epean, ebazpen hau jakinarazi eta biharamunetik hasita.

–Administrazioarekiko auzi-errekurtsoa, zeina zuzendu behar baitzaio Iruñeko Auzitegiko Administrazioarekiko Auzien Atalari, bi hilabeteko epean, ebazpen hau jakinarazi eta biharamunetik hasita; edo, bestela,

–Gora jotzeko errekurtsoa, Nafarroako Administrazio Auzitegiari zuzendua, hilabeteko epean, ebazpen hau jakinarazten denetik hasita.

Iruñean, 2026ko uztailaren 3an.–Alkatea, Joseba Asiron Saez.

I. ERANSKINA.–IRUÑEKO EHUN URTETIK GORAKO SALTOKIEN ETA SALTOKI BEREZIEN INBENTARIOA

III. ERANSKINA.–Ehun urtetik gorako saltokien eta saltoki berezien fitxak (PDFa).

Iragarkiaren kodea: L2609632