1. NAFARROAKO FORU KOMUNITATEA
1.7. BESTELAKOAK
ERABAKIA, Nafarroako Gobernuak 2026ko uztailaren 1ean hartua, baimena ematen duena "Gazteria eta alfabetatze mediatiko eta informazionala" izeneko eragiketa estatistikoa 2026ko Urteko Estatistika Programan sartzeko.
Nafarroako Estatistikari buruzko ekainaren 27ko 11/1997 Foru Legeak 28. artikuluan jasotzen du ezen Nafarroako Gobernuak, egokitasuna edo presa dela eta, erabaki baten bidez baimena eman dezakeela Estatistika Planean edo Urteko Programan jasota ez dauden estatistika eragiketak egiteko, eta eragiketa horiek ofizialtzat joko direla.
Horretarako, Nastat-Nafarroako Estatistika Institutua atxikia duen departamentuko kontseilariak proposatuta hartuko du erabaki hori Gobernuak, Nastatek aldeko txostena egin ondoren, zeinak jasoko baitu Estatistika Planean eta Programan ezarritako helburu eta betebeharrekin bat datorrela, eta Estatistika Kontseiluko kideei jakinarazi ondoren.
Nastat-Nafarroako Estatistika Institutuak estatistika eragiketa hori sartzearen aldeko txostena egin du, egokitasun irizpidea betetzen delakoan; izan ere, Nafarroako Gazteria Institutuak azaldu du gazteriaren alfabetatze mediatiko eta informazioanalaren inguruko zenbait alderdi ezagutzeko premia duela.
Nafarroako Estatistika Kontseiluko kideei ere horren berri eman zaie, ekainaren 27ko 11/1997 Foru Legeak zehazten duen bezala.
Adierazitakoarekin bat, Nafarroako Gobernuak, Lehendakaritza eta Berdintasuneko kontseilariak proposatuta,
ERABAKITZEN DU:
1. Baimena ematea "Gazteria eta alfabetatze mediatiko eta informazionala" izeneko eragiketa estatistikoa 2026ko Urteko Estatistika Programan sartzeko, 2200537 zenbakiarekin, bai eta erabakiari erantsitako fitxa ere.
2. Erabaki hau Nafarroako Aldizkari Ofizialean argitaratzea.
3. Erabaki hau igortzea Lehendakaritza eta Berdintasun Departamentuko Idazkaritza Tekniko Nagusira eta Nastat-Nafarroako Estatistika Institutura, behar diren ondorioak izan ditzan.
Iruñean, 2026ko uztailaren 1ean.–Nafarroako Gobernuko kontseilari-idazkaria, Javier Remírez Apesteguía.
ERANSKINA.–FITXA
Estatistika eragiketa | 2200537 Gazteria eta Alfabetatze Mediatiko eta Informazionala |
Zuzendaritza nagusia edo unitate parekatua | Nafarroako Gazteriaren Institutua |
Deskribapena | Inkesta pentsatu da tresna bat izan dadin Nafarroako gazteen gaitasun mediatiko eta informazionalak ezagutu eta aztertzeko, ondoren politika publikoak, hezkuntza estrategiak eta sentsibilizazio ekintzak orientatzeko, Nafarroako Gazteriaren Institutuak eta hezkuntza arloko beste eragile batzuek erabakiak hartzeko lagungarri izanen delakoan. |
Helburuak | –Gazteen gaitasun informazionalak eta mediatikoak ebaluatzea, besteak beste edukiak eskuratu, bilatu eta sortzekoak eta haien ebaluazio kritikoa egitekoa. –Informazioa kontsumitu, sortu eta zabaltzeko ohiturak aztertzea, zenbait kanal eta plataforma kontuan hartuta. –Identifikatzea desinformazioarekiko esposizio mailak, gezurrezko edukiak atzemateko gaitasuna eta horrekin lortutako portaerak (kontrastatzea, egiaztatzea eta zabaltzea). –Aztertzea informazio iturriekiko konfiantza mailak eta haien sinesgarritasuna ebaluatzeko erabilitako irizpideak. –Arakatzea hedabideen erabilerarekin lotutako pertzepzioak, jarrerak, gaitasunen autobalorazioa eta alderdi etikoak, sozialak eta emozionalak. –Atzematea parekotasun ezak, lurraldekoak, hezkuntzakoak eta soziokulturalak, hedabideetara iristean eta haiek erabiltzean, bai eta gaitasunetan ere. –Biltzea gazteen proposamenak, beharrak eta espektatibak, alfabetatze mediatiko eta informazionalaren arloko prestakuntzarekin lotuta. |
Zer beharri erantzuten dien | Nafarroan, gazteen alfabetatze mediatiko eta informazionalari buruzko azterketa espezifiko bat egiteko premia honako hauetan oinarritzen da: bertako aniztasuna, lurraldekoa eta hezkuntzakoa; gaiari buruzko datu eguneratuen falta, gazteei dagokienez; dauden azterketa batzuk osatzeko aukera, adibidez Nastatek Nafarroako gaitasun digitalei buruzko 2024ko inkesta (estatistika eragiketa), eta gai honek duen garrantzia gazteria, berdintasun, partaidetza, osasun mental eta indarkerien prebentzio politiketan. Estatistika eragiketa hau abian jarriko da Etxebizitzako, Gazteriako eta Migrazio Politiketako Departamentuaren barne beharrengatik. |
Zabalkundean, lurraldearen araberako bereizketa | Nafarroa 2000 Zonifikazioko 4 gunetan agregatuko da |
Argitalpenaren maiztasuna | Aldizkakotasun finkorik gabekoa |
Faseren batean parte hartzen duten unitateak, arduradunaz besterenak |
Beharrak identifikatzea | |
Diseinua eta garapena | |
Informazio-bilketa | |
Tratamendua | |
Zabalkundea | |
IKERKETA UNITATEA | ITURRIA | ZER ERAKUNDEK EMATEN DITUEN DATUAK | ZER ERAKUNDEK JASOTZEN DITUEN DATUAK | LORTUTAKO INFORMAZIOA | HELBURUA |
Nafarroan, familia-etxebizitzetan bizi diren 16 eta 30 urte bitarteko biztanleak | Inkestaren titularrak | Etxebizitzako, Gazteriako eta Migrazio Politiketako Departamentua | Etxebizitzako, Gazteriako eta Migrazio Politiketako Departamentua | Informazioaren kontsumoaren maiztasuna, kanalak, hizkuntzak, konfiantza, sinesgarritasun irizpideak... | Iturri nagusia |
Iragarkiaren kodea: F2609490
