1. NAFARROAKO FORU KOMUNITATEA
1.7. BESTELAKOAK
265E/2026 EBAZPENA, ekainaren 16koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez ofizioz berrikusten baita Lekunberriko udal mugartean zukuak prestatzen dituen instalazio baten ingurumen baimen integratua, ebazpen honen eranskinean zehaztutako aldaketen arabera. Instalazioaren titularra Agrozumos SA da.
Espediente mota | Ingurumen baimen integratuaren baldintzen ofiziozko berrikuspena |
Espedientearen kodea | 0001-0053-2026-000006 | Hasiera eguna | 2026/04/30 |
Kudeaketa unitatea | Ekonomia Zirkularraren eta Berrikuntzaren Zerbitzua |
Telefonoa | 848426254-848427587 | Helbide elektronikoa | autprema@navarra.es |
Sailkapena | Legeria | Jarduera |
17/2020 Foru Legea, abenduaren 16koa | Sartu gabeko zentroa |
1/2016 Legegintzako Errege Dekretua, abenduaren 16koa | I. eranskina / 9.1.b)ii) |
2010/75/EB Zuzentaraua, azaroaren 24koa | I. eranskina / 6.4.b)ii) |
21/2013 Legea, abenduaren 9koa | Sartu gabeko zentroa |
Instalazioa | Zukuak prestatzea |
Titularra | Agrozumos SA |
Ingurumen identifikaziorako zenbakia | 3180802686 |
Tokia | Lekunberriko industrialdea 17, 12. pol., 178., 225., 684., 944., 1018. eta 1034. lurzatiak |
Koordenatuak | UTM-ETRS89, 30N eremua, X: 589.070,896 eta Y: 4.761.811,650 |
Udalerria | Lekunberri |
Proiektua | Nafarroako Gobernuaren 2026ko apirilaren 29ko Erabakiaren ondorioz egin beharreko zuzenketa. Izan ere, erabaki horren bidez, Ebroko Konfederazio Hidrografikoak 47E/2026 Ebazpenaren aurka jarritako aurretiazko errekerimendua baietsi zen. |
Instalazio horrek ingurumen baimen integratua du, Ingurumenaren eta Uraren zuzendari nagusiaren 205/2008 Ebazpenaren bidez emana, gero, maiatzaren 9ko 195E/2014 Ebazpenaren bidez eguneratu zena, eta Ekonomia Zirkularraren eta Berrikuntzaren Zerbitzuko zuzendariaren otsailaren 4ko 47E/2026 Ebazpenaren bidez berrikusia.
2026ko martxoaren 24an, Ebroko Konfederazio Hidrografikoak zuzentzeko aurretiazko errekerimendua egin zuen, zeinean eskatzen baitzuen egokitu zitezela ingurumen baimen integratuan hondakin urak isurtzeko ezarritako baldintzak, bat etor zitezen ingurumen baimen integratua emateko prozeduran erakunde horrek hondakin uren isurketaren onargarritasunari buruz egina zuen txosten loteslearen edukiarekin.
Nafarroako Gobernuak 2026ko apirilaren 29an hartutako Erabakiaren bidez, baietsi zen Ebroko Konfederazio Hidrografikoak eginiko aurretiazko errekerimendua, Ekonomia Zirkularraren eta Berrikuntzaren Zerbitzuko zuzendariaren 47E/2026 Ebazpenaren aurkakoa, eta aldatu egin ziren urak jabari publiko hidraulikora zuzenean isurtzeari dagozkion alderdi batzuk.
Administrazio Publikoen Administrazio Prozedura Erkideari buruzko urriaren 1eko 39/2015 Legearen 109.2 artikuluaren arabera, administrazio publikoek, ofizioz edo interesdunek eskatuta, edozein unetan zuzentzen ahal dituzte beren egintzetako akats materialak, egitatezkoak edo aritmetikoak.
Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehenengoa.–Ofizioz berrikustea Lekunberriko udal mugartean zukuak prestatzen dituen instalazio baten ingurumen baimen integratua, ebazpen honen eranskinean zehaztutako aldaketen arabera. Instalazioaren titularra Agrozumos SA da.
Bigarrena.–Ebazpen hau Nafarroako Aldizkari Ofizialean argitaratzea.
Hirugarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jar dezakete, Landa Garapeneko eta Ingurumeneko Departamentuko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Laugarrena.–Ebazpen hau igortzea, behar diren ondorioak izan ditzan, Agrozumos SAri, Lekunberriko Udalari eta Ebroko Konfederazio Hidrografikoari.
Iruñean, 2026ko ekainaren 16an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.
Oharra: ebazpen honetan aipatzen diren eranskinak interesdunen eskura egonen dira, Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2608768
