Iragarkia

126. ALDIZKARIA - 2026ko ekainaren 30a

1. NAFARROAKO FORU KOMUNITATEA

1.7. BESTELAKOAK

70E/2026 FORU AGINDUA, ekainaren 8koa, Lurralde Kohesiorako kontseilariak emana, behin-behinean onesten duena "NA-4000 errepidean Lesakako saihesbidea egiteko trazadura proiektua".

Gaur egun, Lesakako hiribildua NA-4000 errepidearen bitartez lotzen da inguruko herriekin, eta Oiartzundik (Gipuzkoa) N-121-Ara doan errepide horrek Lesakako herrigune historikoa zeharkatzen du.

Errepide hori herrigunetik igarotzeak arriskuan jartzen du bide segurtasuna, ibilgailu astun jakin batzuen zirkulazioa zailtzen du eta udalerria garatzeko aukerak mugatzen ditu. Errealitate horretaz jabetuta, Lesakako Udala iraunkortasun, inklusio eta irisgarritasun printzipioei erantzunen dien mugikortasun eredu bat sustatzen ari da, hiribildua herritarrentzako toki seguruagoa, erosoagoa eta osasungarriago bihurtzeko helburuarekin. Helburu horiek lortzeko, ezinbestekoa da pasabideko trafikoa herrigunetik kanpora desbideratzea, eta, horretarako, bide konexio eta azpiegitura soluzio berriak jarri behar dira abian, herrigune historikoa ibilgailuen zirkulazioaren presiotik askatu ahal izateko.

Beharrizan horren ondorioz, aipatu proiektua idazteko agindu du Nafarroako Gobernuaren Herri-lanen eta Azpiegituren Zuzendaritza Nagusiko Proiektu eta Obren Zerbitzuak.

Saihesbide horretarako konponbidea, funtsean, NA-4001 errepideari jarraipena ematea da. Errepide hori herriaren sarreran dagoen biribilgunean hasten da, NA-4000 errepidean, Otsango industrialderantz luzatzen da, eta ArcelorMittal enpresaren sarreran bukatzen.

Jarraipena emateko, NA-4001 errepidea ArcelorMittal enpresaren iparraldetik luzatuko da, berriz ere NA-4000 errepidearekin bat egin arte, herrigunetik mendebaldera, eta horrela, gainera, herrian sartzeko bigarren puntu bat sortuko denez, mendebaldetik sartzeko, ibilgailuek Lesakako kale-sare bihurria zeharkatu behar izatea saihestuko da.

NA-4001 errepidearen egungo tarteak 50 km/h abiadura-muga du, eta 3,50 m zabaleko erreiek osatutako ereduzko ebakidura du. Bazterbideek zabalera aldakorra dute, 0 eta 0,5 m artekoa ezkerraldean eta 1 m-koa eskuinaldean.

Egungo tarte horren gainean oinezkoentzako espaloi bat eraikitzea proiektatu da, herrigunea errepidean zehar dauden baserriekin lotzeko eta oinezkoen segurtasuna hobetzeko, saihestuko baita oinezkoek bazterbidetik zirkulatu behar izatea, orain egiten duten bezala. Espaloi berria hasiko da Biurrana ibaiaren gainean egun dagoen egituraren iparraldean –obrek ez baitute egitura hori ukituko–, eta Komentu kaleraino luzatuko da, udal futbol-zelaitik gertu. Espaloia galtzadarekiko goratua jarriko da, oraingo bazterbidearen jarraian.

Halaber, espaloi zati berrian LED teknologia duten luminariak instalatzea aurreikusten da. Proiektatutako espaloiaren zabalera, guztira, 2,40 m izanen da. Horietatik, 1,80 m libre utziko dira oinezkoen mugikortasunerako, eta gainerako 0,60 m-ak argiteria eta bide seinaleak ezartzeko erabiliko dira.

Errepidearen eta industrialdeko lurzatien arteko kota-aldea dela-eta, hormak eraiki behar dira tarteren batean, ukipenak minimizatzeko.

Futbol-zelaia igaro ondoren, trazadura berri bat egin behar da ArcelorMittal enpresa inguratzeko. Horrek trazadura mendi hegalean sartzera behartzen du, eta lur erauzketa handi samarrak sortuko ditu. Buruan 38 m-ko altuera izatera iristen dira (23 m-ko kota gorria), nahiz eta gero txikiagotzen joanen diren, trazadurak, dagoen lurrera egokitzeko, altuera irabazi ahala.

Egungo trazaduraren azken 250 metroetan, NA-4001 errepidearen luzetarako malda handitzen da, %0,50etik %6,50era. Igoera horrek puntu garai bat sortzen du ArcelorMittal enpresaren sarreran. 0+725 KParen eta ArcelorMittal enpresaren sarreraren artean proposatu den trazadura aldaketak lehendik dagoen sestra errespetatzen du, eta tarte horretako jarduketak lehendik dagoen plataforma zabaltzera mugatzen dira. ArcelorMittal fabrikaren sarreratik aurrera, trazadura berria ahalik eta azkarren goratzen da, orografiara egokitzeko eta gas plantatik igaro ondoren lur mugimenduak murrizteko. Lehenbiziko tarte horretan, %8ko luzetarako malda proiektatu da. Proiektatutako luzetarako maldari esker, alde batetik, plataforma berria egungo galtzadaren kotan mantentzen ahalko da fabrikaren sarreran, eta, bestetik, gainazaleko jariatzea zeharkako drainatze obra baten bidez drainatu ahal izateko nahikoa den estaldurarekin gurutzatzen ahalko da 1+130 KPko ibarbidea.

Gas plantak eta ibarbidea gurutzatzeak ezartzen dituzten baldintzak gainditu ondoren, eta 1+645 KPraino, non bigarren ibarbide bat gurutzatzen baita, trazadura dagoen orografiara egokitzen saiatzen da, lur mugimenduak ahalik eta txikienak izan daitezen. Tarte horretan, trazaduraren eskuinaldean lur erauzketek 15 m inguruko garaiera dute buruan, batez beste; eta ezkerraldean, berriz, lur erauzketak txikiak dira, buruan 3 m-ko garaiera baitute, batez beste. Hala ere, aipagarria da 1+280 eta 1+500 KPen arteko tartea, tarte horretan trazaduraren eskuinaldeko lur erauzketak buruan 34 m-ko gehieneko garaiera izatera iristen dira-eta.

1+645 KPan bigarren ibarbidea gurutzatzen da, eta puntu horrexetatik aurrera trazadurak bira egiten du hego-mendebalderantz, NA-4000 errepidearekin lotzeko. Ibarbide hori gurutzatzeko, 35 m luzeko zubibide bat erabiliko da.

Garrantzitsua da azpimarratzea dauden baldintzatzaileengatik zaila dela ibarbide hori gurutzatzea. Batetik, trazaduraren hegoaldean dauden ArcelorMittal enpresaren nabeek bidearen enborrak oinplanoan duen posizioa baldintzatzen dute, eta, orobat, kota altuagoetatik igarotzera behartzen dute lur mugimenduak minimizatzeko. Bestetik, udal ur-biltegia dago, mendi hegalaren beste aldean, proiektutako trazaduraren iparraldean.

Proiektatutako trazadurak bi baldintzatzaileen arteko oreka bilatzen du, ur-biltegitik ahalik eta gehien urrunduz, baina, aldi berean, industria nabeek eta lantegiaren barneko bideak berak ezartzen dituzten baldintzak errespetatuz. Hori guztia, diseinuan 60 km/h errepide bati dagozkion parametroak kontuan hartuta egin da.

Hirugarren baldintzatzailea da NA-4000 errepidea Nabaz auzoarekin lotzen duen bidearekiko bidegurutzea. Bidegurutze hori sestra bereko elkargune baten bidez proiektatu da. Horrela, bideak iparralderantz jarraitzen ahalko du, baina ez hegoalderantz. Hegoalderanzko lotura bermatua geldituko da, nolanahi, saihesbide berriaren eta NA-4000 errepidearekiko lotunean, proiektuaren bukaeran, proiektatu den biribilgunearen bitartez.

Oraingo bidearekiko gurutzatze puntuaren kota nahitaez igaro beharreko puntua da saihesbidearen sestrarako. Baldintza horrek, oinplanoko gutxieneko geometria parametroekin eta 60 km/h abiadurarako sestrarekin batera, ekartzen du trazadura, ibarbidea gurutzatu ondoren, beste aldeko mendi hegalean sartu behar izatea, eta lubaki erako ebakidura sortzea, non gehieneko altuerak 30 m ingurura iritsiko baitira ur-biltegiaren aldean (17,5 m-ko kota gorria). Egoera horretan, lur erauzketaren buruaren eta ur-biltegiaren punturik hurbilenaren artean 4,50 m-ko distantzia izanen da. Lur erauzketa horren gainean lurraren tratamendu geoteknikoak proiektatu dira, lurrean sarturiko errailak eta buloiak erabiliz, mendi hegalaren eta biltegiaren egonkortasuna bermatzeko. Komeni da adieraztea, gainera, inguru horretako materiala aproposa dela, arroka delako.

Bestetik, garrantzitsua da esatea aipatutako bidea GR-11ren (Pirinioetako bidea) parte dela, eta, horregatik, oinezkoen ibilbideari jarraipena eman behar zaiola. Jarraipen hori lortzeko, oinezkoentzako pasabide bat eraikiko da: dagoen maldara egokituta, zubibidea azpitik gurutzatuko du, eta ondoren gora eginen du, oraingo bidearekin berriz lotu arte. Egungo bideak %15 inguruko luzetarako malda du tarte horretan. Hori dela-eta, oinezkoentzako pasabideak %19,50eko malda hartzen du; izan ere, baldintzatua dago proiektatutako zubibidea azpitik gurutzatu behar delako eta, orobat, aldapa handia behar delako oraingo trazadurarekin berriz lotzeko.

Lehen aipatu bezala, trazadurak goranzko sestra du proiektatutako tarte berriaren hasieratik 1+365 KPraino. Puntu horretatik aurrera, jaisten hasten da, hasieran %2ko maldarekin, 1+645 KPan dagoen ibarbidea igaro arte, eta gero %8ra igotzen da, NA-4000 errepidearekin lotzeko proiektatutako biribilgune berriaren ingururaino, non malda %6ra murrizten baita konexioa errazteko.

Saihesbidearen trazadura NA-4000 errepidearekiko loturan amaitzen da, non, azaldu den bezala, biribilgune bat proiektatu baita. Ildo horretan, nabarmendu behar da biribilgunearen plataformaren ertza NA-4000 errepidearen plataformaren ertzarekin lerrokatu dela, okupazioak eta Biurrana ibaiaren ertzaren gaineko ukipenak saihesteko.

Proiektuak beharrezko drainatzea dauka, eta ukitutako zerbitzu guztiak lehengoratuko dira.

Errepidea ingurumenean integratzeko, proiektuan aginduzko ingurumen inpaktuaren azterketa jaso da. Bertan, prebentzio neurriez eta eragina gutxitzen duten neurri orokorrez gainera, neurri zuzentzaileak eta ingurumen jarraipenekoak ere sartu dira.

Nafarroako Errepideei buruzko martxoaren 23ko 5/2007 Foru Legearen 20. artikuluko 2. eta 3. apartatuetan xedatutakoarekin bat, bidezkoa da eraikuntza proiektua behin-behinean onestea eta jendaurrean jartzea, hala proiektuaren eduki teknikoari dagokionez, nola lurrak okupatu beharrari dagokienez, desjabetu ahal izateko. Proiektua jendaurrean jartzeko idatzi den agiriak aipatutako legeak eskatutako dokumentazioa biltzen du.

Bestalde, Ingurumen Ebaluazioari buruzko abenduaren 9ko 21/2013 Foru Legearen 36 artikuluan xedatutakoarekin bat, bidezkoa da, halaber, ingurumen inpaktuaren azterketa jendaurrean jartzea, proiektuaren ingurumen inpaktuaren ebaluazioaren ondorioetarako.

Ondorioz, bat etorriz Proiektu eta Obren Zerbitzuak txostenean jaso eta proposatu duenarekin, eta Lurralde Kohesiorako Departamentuaren egitura organikoa ezartzen duen azaroaren 15eko 249/2023 Foru Dekretuarekin (azaroaren 5eko 127/2025 Foru Dekretuak aldatua),

AGINTZEN DUT:

1. Behin-behinean onestea "NA-4000 errepidean Lesakako saihesbidea egiteko trazadura proiektua".

2. Hasiera ematea proiektuak ukitutako ondasun eta eskubideen desjabetze espedienteari. Ondasun eta eskubide horien zerrenda eranskinean jaso da.

3. Proiektu hori jendaurrean jartzea, hilabetez, bai proiektuaren eduki teknikoari dagokionez, bai lurrak okupatu beharrari dagokionez, desjabetzearen ondorioetarako, eta, halaber, ingurumen inpaktuaren ebaluazioaren ondorioetarako. Epe horretan interesdunek egokitzat jotzen dituzten oharrak edo alegazioak aurkez ditzakete idatziz, eta ondasun eta eskubideen zerrendako okerrak zuzentzeko behar diren datuak eman. Eranskinean jaso da zerrenda hori. Interesdunek eskura izanen dute proiektua Lurralde Kohesiorako Departamentuko Herri-lanen eta Azpiegituren Zuzendaritza Nagusiaren web-orrian eta Lesakako udaletxean.

4. Foru agindu hau argitaratzea Nafarroako Aldizkari Ofizialean eta Lurralde Kohesiorako Departamentuaren web-orrian, eta dagokion iragarkia igortzea Foru Komunitatean hedapen handiena duten egunkarietako bitara.

5. Foru agindu hau Lesakako Udalari jakinaraztea, iragarki-taulan argitara dezaten premiatuz, eta Herri-lanen eta Azpiegituren Zuzendaritza Nagusira eta Proiektu eta Obren Zerbitzura igortzea.

Iruñean, 2026ko ekainaren 8an.–Lurralde Kohesiorako kontseilaria, Óscar Chivite Cornago.

"NA-4000 ERREPIDEAN LESAKAKO SAIHESBIDEA ERAIKITZEKO PROIEKTUA"

Ukitutako ondasun eta eskubideen banakako zerrenda zehatza

Hondakindegiek ukitutako lurzatiak

Instalazio osagarriek ukitutako lurzatiak

Linea elektrikoa desmuntatzeko lanek ukitutako lurzatiak

Saneamendua desmuntatzeko lanek ukitutako lurzatiak

Telefono lineak ukitutako zerbitzuak

Hornidurak ukitutako zerbitzuak

Linea elektrikoak ukitutako zerbitzuak

Iragarkiaren kodea: F2608455