2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
LIZARRA
Deialdia, oinarriko kirola duten kirol-klub ez-profesionalei laguntzak emateko 2025-2026 denboraldian. Laburpena
DDBN kodea: 911443.
Argitara ematen da deialdiaren laburpena, bat etorriz Dirulaguntzei buruzko azaroaren 17ko 38/2003 Lege Orokorraren 17.3.b eta 20.8.a artikuluetan xedatuarekin. Haren testu osoa Dirulaguntzen Datu Base Nazionalean kontsulta daiteke (https://www.infosubvenciones.es/bdnstrans/GE/eu/convocatoria/911443).
–Xedea:
Deialdi honen xedea da arauak ezartzea oinarriko kirola duten kirol-klub ez-profesionalei dirulaguntzak emateko, norgehiagokako araubidean, 2025-2026 denboraldirako (2025eko irailaren 1etik 2026ko abuztuaren 31ra).
Dirulaguntzen helburu nagusia da hirian kirola egitea sustatzea eta klubek parte hartzen duten lehiaketetan modu aktiboan aritu daitezen bultzatzea, parte-hartze horrek dakartzan gastuen zati bat ordainduko baita, hala nola inskripzioak, joan-etorriak eta kirol-materiala, eta, hortaz, klubei dakarkien karga ekonomikoa arinduko baita. Horrela, komunitatean kirola egitea sustatu nahi da, kirolariak garatu eta tokiko klubak indartu daitezen.
–Gehieneko aurrekontua:
2026an, indarrean dagoen aurrekontuko hirurogeita hamabost mila euro (75.000 euro) bideratuko dira deialdi honen xedea betetzeko.
Klub bakoitzari emanen zaion dirulaguntzaren zenbatekoa, berez edo bertze dirulaguntza, laguntza, diru-sarrera eta baliabide batzuk gehituta, inoiz ez da izanen diruz lagundutako jardueraren kostua baino handiagoa.
–Onuradunak:
Legez eratuta dauden klubak izaten ahalko dira onuradunak, baldin eta inskribaturik badaude Nafarroako Kirolaren eta Jarduera Fisikoaren Institutuko kirol-kluben erregistro ofizialean, edo kasuan kasuko organo eskudunaren erregistroan, eta deialdiaren baldintzak betetzen badituzte, betiere ez badute inolako debekurik eta betetzen badituzte Dirulaguntzei buruzko azaroaren 17ko 38/2003 Lege Orokorraren 13. artikuluan ezarritako baldintzak. Laguntza hauen izaera dela eta, kirol-sozietate anonimoak deialdi honetatik kanpo geratzen dira, berariaz eta modalitate guztietan.
–Eskabideak aurkezteko epea:
Eskabideak aurkezten ahalko dira iragarki hau Nafarroako Aldizkari Ofizialean argitaratzen denetik aurrera, 2026ko irailaren 30era arte, oro har.
–Aurkeztu beharreko agiriak:
Deialdiaren oinarrietan zehazten direnak.
Lizarran, 2026ko ekainaren 9an.–Alkatea, Marta Ruiz de Alda Parla.
Iragarkiaren kodea: L2608309
