Iragarkia

118. ALDIZKARIA - 2026ko ekainaren 18a

1. NAFARROAKO FORU KOMUNITATEA

1.7. BESTELAKOAK

211E/2026 EBAZPENA, maiatzaren 27koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez ofizioz berrikusten baita Cortesko udal mugartean barazkiak eta lekaleak jasotzen, galdarraztatzen, izozten eta kontserbatzen dituen instalazio baten ingurumen baimen integratua, ebazpen honen eranskinean zehazturiko aldaketen arabera. Instalazioaren titularra Ultracongelados Virto SAU da.

Instalazioak ingurumen baimen integratua du, Ingurumeneko zuzendari nagusiaren 416E/2025 Ebazpenaren bidez emana.

Landa Garapeneko eta Ingurumeneko kontseilariaren martxoaren 3ko 55E/2026 Foru Aginduaren bidez, baietsi egin da Ultracongelados de Cortes SLk (orain, Ultracongelados Virto SAU) Ingurumeneko zuzendari nagusiaren maiatzaren 20ko 416E/2025 Ebazpenaren aurka jarritako gora jotzeko errekurtsoa (ebazpen horren bidez ingurumen baimen integratua eman zitzaion instalazioari).

Landa Garapeneko eta Ingurumeneko kontseilariaren martxoaren 3ko 55E/2026 Foru Agindu horrek agindu du honako aldaketa hauek egitea Ingurumeneko zuzendari nagusiaren maiatzaren 20ko 416E/2025 Ebazpenaren bidez ezarritako funtzionamendu baldintzetan (ebazpen horren bidez, ingurumen baimen integratua eman zitzaion instalazioari):

1. IBIaren II. eranskineko (funtzionamendurako ingurumen baldintzak) 2.4 puntua kentzea, "Hondakin arriskutsuak minimizatzeko azterlana" izenekoa.

2. IBIaren irismenetik kanpo uztea Cortesko udal mugarteko 5. poligonoko 951. katastro-lurzatian dagoen izozte-ganbera.

Kasu honetan, ondorioztatu da gertatzen direla Kutsaduraren Prebentzio eta Kontrol Integratuaren Legearen testu bateginaren 26.4 artikuluan adierazitako inguruabarrak (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, horrenbestez, bidezkoa da ofizioz berrikustea ingurumen baimen integratuan ezarritako baldintzak, bat etorriz Kutsaduraren Prebentzio eta Kontrol Integratuaren Legea garatu eta Industriako Isurien Erregelamendua onesten duen urriaren 18ko 815/2013 Errege Dekretuaren 16.5 artikuluan ezarritako administrazio prozedurarekin.

Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.

Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,

EBAZTEN DUT:

Lehena.–Ofizioz berrikustea Cortesko udal mugartean barazkiak eta lekaleak jasotzen, galdarraztatzen, izozten eta kontserbatzen dituen instalazio baten ingurumen baimen integratua, ebazpen honen eranskinean zehazturiko aldaketen arabera. Instalazioaren titularra Ultracongelados Virto SAU da.

Bigarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina neurriak hartzea, hain zuzen ere, Kutsaduraren Prebentzio eta Kontrol Integratuari buruzko Legearen testu bateginaren IV. tituluan jasotakoak (testu bategin hori abenduaren 16ko 1/2016 Legegintzako Errege Dekretuaren bidez onetsi zen), ezertan galarazi gabe sektoreko legerian ezarritakoa, aplikatzekoa izaten segituko baitu, eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoa.

Hirugarrena.–Ebazpen hau Nafarroako Aldizkari Ofizialean argitaratzea.

Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

Bosgarrena.–Ebazpen hau igortzea, behar diren ondorioak izan ditzan, Ultracongelados Virto SAUra eta Cortesko Udalera.

Iruñean, 2026ko maiatzaren 27an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.

Oharra: ebazpen honetan aipatzen diren eranskinak interesdunen eskura egonen dira, Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.

Iragarkiaren kodea: F2607873