1. NAFARROAKO FORU KOMUNITATEA
1.7. BESTELAKOAK
109E/2026 FORU AGINDUA, maiatzaren 28koa, Etxebizitzako, Gazteriako eta Migrazio Politiketako kontseilariak emana, zeinaren bidez aldatzen baita abenduaren 31ko 164/2021 Foru Agindua, Nafarroako Gazteriaren Institutua erakunde autonomoaren egitura organikoa bulegoen mailan garatzen duena.
Lehendakaritzako, Berdintasuneko, Funtzio Publikoko eta Barneko kontseilariak abenduaren 31n emandako 164/2021 Foru Aginduaren bidez, Nafarroako Gazteriaren Institutua erakunde autonomoaren egitura organikoa ezarri zen bulegoen mailan.
Etxebizitzako, Gazteriako eta Migrazio Politiketako Departamentuaren oinarrizko egitura ezartzen duen abuztuaren 30eko 66/2023 Foru Dekretuaren artikulu bakarraren 4. zenbakiak ezartzen du Nafarroako Gazteriaren Institutua erakunde autonomoa departamentu horri atxikitzen zaiola.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legeak 34.4 artikuluan ezartzen du ezen, bulegoak eta ataletatik beherako unitateak sortu, aldatu eta kentzeko, unitate horiek zein departamentutan sartuko diren, hango titularraren foru-agindua beharko dela.
Horrekin bat etorriz, Nafarroako Gazteriaren Institutuaren Estatutuen 21. artikuluak xedatzen duenez (azaroaren 15eko 242/2023 Foru Dekretuaren bidez onetsitako estatutuak), bulegoak eta bulegoekin parekatutako beste unitate administratibo edo teknikoak gazteriaren arloan eskumena duen kontseilariaren foru aginduaren bidez sortu, aldatu edo kenduko dira, Nafarroako Gazteriaren Institutuko zuzendariak edo zuzendari kudeatzaileak proposaturik, aurretik txostena emanda funtzio publikoaren, antolamendu administratiboaren eta ekonomiaren arloetan eskumena duten departamentuek.
Azken urteotan, Nafarroako Gazteriaren Institutua gazteen errealitate berrietara egokituz joan da, eta, horretarako, aurrekontua nabarmen handitu du, plantilla teknifikatu du eta eguneroko ohiko jarduera areagotu duten proiektu eta programa berriak garatu ditu. Horrela, bete egin dira Nafarroako Gazteriaren Institutua 2019an berriz ezarri zenean erakunde horrentzat finkatu ziren helburuak.
Aldaketa horrek denboran irauteko, beharrezkoa da, besteak beste, Nafarroako Gazteriaren Institutuaren egitura egokitzea. Hori dela eta, beharrezkotzat jotzen da Administrazio Laguntzako Bulego berri bat sortzea, Nafarroako Gazteriaren Institutuko Kudeaketako Zuzendaritzari atxikia, Nafarroako Gazteriaren Institutuaren ekintzen koordinazioa, jardueren zabalkunde-tresnen kudeaketa eta Nafarroako Gazteriaren Institutuaren ordezkaritza instituzionala errazteko, eta ekitaldien agenda eta koordinazioa antolatzen laguntzeko.
Hori horrela, Nafarroako Foru Komunitateko Administrazioari buruzko martxoaren 11ko 11/2019 Foru Legeak ematen dizkidan ahalmenak erabiliz,
AGINTZEN DUT:
Bat.–Aldatu egiten da Nafarroako Gazteriaren Institutua erakunde autonomoaren egitura organikoa bulegoen mailan garatzen duen abenduaren 31ko 164/2021 Foru Aginduaren 2. artikulua, zeina honela idatzita gelditzen baita:
"2. artikulua. Nafarroako Gazteriaren Institutuaren egitura.
Nafarroako Gazteriaren Institutuak bulego hauek ditu bere egituran:
a) Kudeaketako Zuzendaritzaren mende:
–Administrazio Laguntzako Bulegoa.
b) Administrazio eta Kudeaketa Atalaren menpe:
–Gazteriaren Etxeen Bulegoa.
c) Zeharkako Ekintzen eta Gazteriaren Behatokiaren Atalaren menpe:
–Argibide eta Prestakuntza Bulegoa.
–Parte-hartzearen eta Sormenaren Bulegoa.
d) Gazteentzako Programen eta Entitateekiko Harremanen Atalaren menpe:
–Aisialdi Hezigarriaren Bulegoa.
–Gazte Entitateen Bulegoa".
Bi.–2 bis artikulu berria sortzen da, eduki honekin:
"2 bis artikulua. Administrazio Laguntzako Bulegoa.
Administrazio Laguntzako Bulegoa Kudeaketako Zuzendaritzari atxikita dago, eta eginkizun hauek izanen ditu:
a) Nafarroako Gazteriaren Institutuaren baliabideak, programak, jarduerak eta agenda sustatzeko ekintzak koordinatzea.
b) Nafarroako Gazteriaren Institutuaren jardueren eta/edo gazte-politiken zabalkunderako eta ordezkaritza instituzionalerako tresnak kudeatzea, Kudeaketako Zuzendaritzari laguntzeko.
c) Nafarroako Gazteriaren Institutuaren agenda antolatzea eta ekitaldiak koordinatzea.
d) Aipatutakoen antzekoa edo osagarria den eta Kudeaketako Zuzendaritzak agintzen dion beste edozein eginkizun".
Lehenengo xedapen gehigarria.–Berretsi egiten dira, gertatu ziren baldintza berberetan, abenduaren 31ko 164/2021 Foru Aginduaren bidez onetsitako egituran beren izena mantentzen duten bulegoburuen izendapenak.
Xedapen indargabetzaile bakarra.–Arauak indargabetzea.
Indarrik gabe gelditzen dira foru agindu honetan xedatutakoari aurka egiten dioten maila bereko edo apalagoko xedapen guztiak.
Azken xedapen bakarra.–Indarra hartzea.
Foru agindu honek Nafarroako Aldizkari Ofizialean argitaratzen den egunean hartuko du indarra.
Iruñean, 2026ko maiatzaren 28an.–Etxebizitzako, Gazteriako eta Migrazio Politiketako kontseilaria, Begoña Alfaro García.
Iragarkiaren kodea: F2607980
