Iragarkia

116. ALDIZKARIA - 2026ko ekainaren 16a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

113C/2026 EBAZPENA, ekainaren 1ekoa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Neumáticos Iruña SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Neumáticos Iruña SL enpresak aurkeztutako hitzarmen kolektiboaren testua (kode zenbakia: 31008722012007), erregistro honetan sartu baitzen 2026ko maiatzaren 19an, enpresaren eta sindikatuen gehiengoak 2026ko maiatzaren 5ean sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan xedatutakoa kontuan hartuta,

EBAZTEN DUT:

Lehena.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Neumáticos Iruña SL enpresak aurkeztutako hitzarmen kolektiboa (kode-zenbakia: 31008722012007).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2026ko ekainaren 1ean.–Ekonomia Sozialeko eta Laneko zuzendari nagusia, Iñaki Mendióroz Casallo.

NAFARROAKO NEUMÁTICOS IRUÑA SL ENPRESARAKO LAN HITZARMEN KOLEKTIBOAREN TESTUA

1. artikulua. Aplikazio-eremua.

Lurralde eremuari eta alderdi funtzional eta pertsonalei dagokienez, Neumáticos Iruña SL enpresak Nafarroan dituen langile guztiak egonen dira lan hitzarmen honen eraginpean.

2. artikulua. Nahitaez bete beharra.

Enpresako hitzarmen honen arauak, Langileen Estatutuan xedatutakoari jarraikiz itundu direnak, nahitaez bete beharko dira aurreko artikuluan aipatutako lan harremanetan.

3. artikulua. Indarraldia.

Neumáticos Iruña SLren hitzarmen kolektibo honen artikuluek, ezarritako legezko tramite guztiak eginik, indarra izanen dute 2026ko urtarrilaren 1etik 2029ko abenduaren 31ra bitarte, biak barne.

4. artikulua. Arau osagarriak.

Arau osagarriak izanen dira indarra duten lege orokorrak, Merkataritzarako Lan Ordenantza eta hitzarmen kolektibo honetan adostutakoaren osagarri diren lege xedapen guztiak.

5. artikulua. Bermea.

Beste hitzarmen bat sinatzen ez den bitartean oraingo honek izanen du indarra.

Enpresa ez da hitzarmenetik kanpo geldituko, eta hitzarmena aplikatzeari ere ez dio uko eginen, langileen ordezkariekin akordioa lortu gabe.

Enpresak ezin izanen ditu hitzarmen hau sinatzean enpresako langileek egiten dituzten jarduerak kanpora atera.

Nominako kontzeptuak eta zenbatekoak ezin izanen dira aldatu enpresa batzordearen eta enpresaren adostasunik gabe.

Batzorde paritario bat eratzen da, hitzarmenaren sinatzaileek osatua; bertan, gehienez ere bi kide izanen dira langileen aldetik, eta beste bi kide enpresaren aldetik.

Batzordearen bi aldeetako edozeinek hura biltzeko eskaturik, hamabost eguneko epean bilduko da, beranduenez.

Batzordeak eskumen hauek izanen ditu:

A) Hitzarmen honetako arauak interpretatzea.

B) Hitzarmen honetako konpromisoak garatzea.

Lehendabiziko bilera egiten denetik 15 egun igaro aurretik hartu beharko da erabakia.

Bi alderdiek berariaz adosten dute, halakorik bada, desadostasunak konpontzeko abiarazten diren prozeduretan beharrezkoa izanen dela bi alderdien arteko akordioa (enpresaren ordezkaritza eta langileen ordezkaritzaren gehiengoa), Hitzarmen Kolektiboetarako Aholku Batzorde Nazionalaren edo autonomia erkidegoan sortzen ahal den hirutariko organoaren menpe jartzeko hitzarmena ez aplikatzearen gaineko desadostasuna.

Batzorde paritarioa bilduko da edozein ordezkaritzaren heren batek, emandako eskumenak erabiliz, biltzeko eskatzen duen bakoitzean.

Batzorde paritarioan dagoen sindikatuen ordezkaritza bakoitzak eta, orobat, enpresaren ordezkaritzak aholkularien laguntza izaten ahal dute. Aholkulari horiek hitza izanen dute, baina botorik ez.

Edozein batzordekidek ordezko bat izaten ahalko du, baldin batzordeari aurretik abisatzen badio. Batzorde paritarioaren akordioek balioa izateko, ordezkaritza bakoitzaren botoen %51ren babesa izan beharko dute.

Batzorde paritarioko kide titularrek eskubidea izanen dute bilkuretarako baimen ordaindua izateko hura biltzen den egunetan, eta eginkizun hauek betetzen sortzen diren gastuak enpresak ordainduko ditu.

6. artikulua. Lanaldia.

Berriobeitiko lantokian, lanaldia 40 ordukoa izanen da astean, eta 1.712 ordukoa urtean.

Muntaketako lantokian:

1. Mercedes Benzek eta batzordeak eta zuzendaritzak adosten duten ordu kopurua:

1.–Neumáticos Iruña SLn Mercedes Benz enpresan lan egiten den egun guztietan lan eginen da. Banakako lanegunen kopurua gaindituz gero, aparteko orduei buruzko atalean ezarritakoa aplikatuko da (11. artikulua).

2.–Nafarroako jaiegunen ordez Arabakoak izatea.

3.–Negoziatuko da zer den "ezinbesteko egoera" aurrez ezarri gabeko larunbat batean lanera joateko, baina aurrena boluntarioak eskatuko dira.

2. Mercedes Benzek ordu poltsaren bat sortuz gero, enpresa batzordea eta zuzendaritza ados jarriko dira Mercedes Benzi arreta emateko. Egutegia neurri hauekin antolatuko da: aldi baterako EEE bat badago, enpresak soldataren %90erainoko hobekuntza eginen du, aparteko pagei eta antzinatasunari kalterik egin gabe. Ordu poltsaren bat badago, enpresak poltsan sartzekoak diren orduen %40 emanen ditu.

3. Eskubideko atsedenaldien ordez, lanaldi jarraitukoek 30 minutuko atsedenaldia hartzen ahal dute ogitartekoa jateko, goizean nahiz arratsaldean.

4. Langileen Estatutuaren 34.2 artikuluan ezarritakoaren ondorioetarako, erabaki da lanaldiaren %100 modu erregularrean banatuko dela. Hortaz, ez da posible modu irregularrean banatzea, hitzarmen honetan berariaz xedatutakotik aparte.

5. Hurrengo urteetako egutegia zuzendaritzak Mercedes Benzeko egutegia eskuratzen duen bezain laster negoziatuko da.

7. artikulua. Ordainsariak.

2026. urtean:

%4,1eko igoera ezartzen da soldatetan, eranskineko soldata-tauletan ageri den moduan.

2027., 2028. eta 2029. urteetako ordainsariak:

Igoera hau ezartzen da: Nafarroako aurreko urteko KPIaren ehunekoa gehi %0,2, oinarrizko soldatetan eta antzinatasunean aplikatuta.

Bai 2027ko urtarrilean, bai 2028ko urtarrilean eta 2029ko urtarrilean, Nafarroako aurreko urteko behin betiko KPIa argitaratu eta gero, batzorde paritarioak bilera eginen du soldata-tauletan igoera aplikatzeko.

8. artikulua. Parekatutako kategoriak.

C1 motako gidabaimena beharrezkoa duten ibilgailuen gidariek lehen mailako ofizioko profesionalen kategoria izanen dute lan arloko eta Gizarte Segurantzako ondorio guztietarako.

B motako gidabaimena beharrezkoa duten ibilgailuen gidariek bigarren mailako ofizioko profesionalen kategoria izanen dute lan arloko eta Gizarte Segurantzako ondorio guztietarako.

Lanorduetan izandako istripu edo hutsegite bat dela-eta gidabaimena kendu dieten gidarien kasuan, enpresek konpromisoa hartu dute gidabaimena berreskuratzeko egin beharreko ikastaroaren ordu guztiak beste langile batzuekin betetzeko eta gidari horiek beste lanpostu batean jartzeko, lehen zeukaten ordainsari berarekin, langilea mozkortuta zegoela frogatu denetan izan ezik, eta baldin eta baldin eta, lantoki eta aldi berean, gehienez ere bi badira halako egoeran dauden langileak.

Biltegiko manupekoa, enpresan urtebetez aritu ondoren, besterik gabe manupeko espezializatuaren kategoriara pasatuko da.

Enpresan 4 urte baino gehiagoko antzinatasuna duten ofizioko laguntzaile kategoriakoak bigarren mailako ofizioko profesionalen kategoriara pasatuko dira.

25 urtetik gorako bigarren mailako ofizialak, manupeko espezializatuak eta administrari laguntzaileak, beren kategorian 3 urte betetzen dituztenean enpresa berean zerbitzu ematen, lehen mailako ofizialaren, bigarren mailako ofizialaren eta administrari-ofizialaren kategoriara pasatuko dira hurrenez hurren. Antzinatasuneko 3 urte horiek enpresa barnean eta nork bere kategorian eginak direla ulertuko da. Hitzarmen honen indarraldian hitzarmenaren soldaten gainetik enpresek beren langileei ordaintzen dizkieten plusen kontura xurgatzen ahalko da aldaketa horrek berarekin dakarren gehikuntza.

Lehen mailako ofizialek eta goragoko kategoria dutenek sekuentzia egin beharko dute. Sekuentziako jasomakina menderatzen duten eta sekuentzia egiten duten langile guztiak sekuentziatzaile kategoriara iraganen dira.

Lehen mailako ofizialek eta goragoko kategoria dutenek, C/D gidabaimena badute, kamioi-mugimenduak egin beharko dituzte Neumáticos Iruña enpresaren instalazioetan. Mercedes Benzera bidaiak egiten dituzten langileak garraiolari kategoriara iraganen dira.

9. artikulua. Antzinatasuna.

Langileek gehienez bost laurteko sor ditzakete, eta ikastun sartu berriei edo gaur egun ikastun edo izangaiaren kategoria dutenei ikaskuntza aldia ere kontuan hartuko zaie.

Aldi baterako kontratu bat mugagabeko kontratu bihurtzen denean, aldi baterako kontratu horren iraupena ere kontuan hartuko da antzinatasuna kalkulatzeko.

Laurteko bakoitzeko zenbatekoa urteko oinarrizko soldataren %5 izanen da lehenbiziko lau laurtekoetan, eta urteko oinarrizko soldataren %2,5 bosgarrenean. Lege xedapen indardunetan ezarritakoari jarraituko zaio une oro.

Aldi baterako edo ABLE bidez kontratatutako langile guztiei kontuan hartuko zaizkie Neumáticos Iruña enpresan egindako lanorduak, gerora langileari kontratu mugagabe bat egiteko orduan antzinatasun gisa hartuta.

10. artikulua. Aparteko haborokinak.

Martxoko, uztaileko eta eguberrietako aparteko haborokinak jasotzeko eskubidea duten langile guztiei ordainduko dizkie enpresak, ordainsari guztien hileko bat adina izanen dira.

Langile batek lan egiteari utziz gero, finikitoan agertuko da jaso beharreko haborokinen zati proportzionalari dagokion ordainketa.

11. artikulua. Aparteko orduak.

Aparteko orduak ordaindu edo jaiegunen bidez konpentsatuko dira, langile bakoitzak nahi duen moduan; aparteko ordu bakoitzagatik ordu eta erdiko ordainsaria edo erabilera libreko denbora emanen da.

Muntaketako lantokian, lan egin beharreko larunbatak langileak nahi duen moduan ordainduko dira, bi hauetatik bat aukeratuz:

1. 75 euro lanaldi bakoitzeko gehi opor egun bat.

2. Bi opor egun.

Opor egun horiek eskatzen diren hurrenkeran hartuko dira; langile bakoitzaren lanpostua beste batek bete beharko du, txanda bakoitzean zernahitarako langile bat izan beharko da beti eta lan egindako urte berean hartuko dira opor egu horiek. Atal hau irailera arte izanen da kontuan, hura barne.

Aparteko orduak noizbehinkakoak badira, orduko 22 euro ordainduko da.

–Gaueko lanaren plusa:

Gaueko 10:00etatik goizeko 06:00etara lan egindako ordu guztiei gaueko lanaren plusa gehituko zaie, %25, urteko oinarrizko soldataren gainean.

Jaiegunetan gauez lan egindako orduak eguneko lanordua halako 2,25 ordainduko dira, indarrean den legeriaren arabera.

12. artikulua. Gaixotasunak eta istripuak.

Edozein kontigentziaren ondoriozko aldi baterako ezintasun egoeran, haurdunaldiko arriskua barne dela, enpresek soldataren %100 osatu arte osatuko dute Gizarte Segurantzatik jasotako kopurua.

Behin-behinean lanpostu egokiago bat emanen zaie –halakorik badago– haurdun dauden emakumezko langileei, lanpostuz aldatzea beharrezkoa badute, medikuak justifikatu ondoren eta enpresako aukera teknikoak eta antolaketakoak kontuan hartuta.

13. artikulua. Heriotzagatiko laguntza.

Langilea hiltzen bada, haren eskubidedunei enpresak hiru hilabeteko soldata ordainduko die, horietako bakoitza langileak kobratu duen azken soldata adinakoa.

14. artikulua. Laneko jantziak.

Enpresa behartuta dago langileei laneko bi jantzi edo gehiago ematera, bakoitzak dituen eginkizunetarako egokiak.

Jantzi horiek enpresaren eta langilearen arteko lan harremanaren hasieran banatuko dira eta urte bakoitzeko lehen hiruhilekoan berrituko dira, edo beharrezkoa denean.

15. artikulua. Oporrak.

Langile guztiek urtero opor ordainduak izanen dituzte, baldintza hauek kontuan hartuta:

1. Hogeita hamar egun naturaleko oporrak izanen dira, langileen kategoria edozein dela ere.

2. Langilea eta enpresa ados jarriko dira oporrak noiz hartu erabakitzeko. Dena dela, langile bakoitzak 18 egun natural jarraian hartzen ahalko ditu uztailetik irailera, eta gainerako 12 egunak gainerako hilabeteetan, horiek ere jarraian, betiere enpresak eta langileak adostutako egunetan. Oporrak hartzeko garaiari buruz adostasunik ez izatera, Lan Arloko Epaitegira jo daiteke eta hark erabakiko du oporrak noiz hartu.

3. Arau orokor gisa, oporrak ez dira bi alditan baino gehiagotan hartuko, non ez den kontrakorik ituntzen. Urtean zehar enpresa uzten duen langileak eskubidea izanen du lan egindako denboraren proportzioko oporrak hartzeko. Oporraldian aldi baterako ezintasuna gertatuz gero, eta horren ondorioz langileak urte naturalean dagozkion oporrak hartzerik ez badu, ezintasuna bukatu ondoren hartzen ahalko ditu, ezintasuna sortu duen kontingentzia eta igarotako denbora edozein direla ere.

4. Larunbatetan lan egiteagatik eta sinatutako egutegia dela-eta Irurtzungo festetan, sanferminetan eta oporraldian hartzen diren opor egunetan adostu baino langile gehiago elkartuz gero, txandaka banatuko dira, aurreko urteetan nola suertatu den. Edonola ere, Langileen Estatutuan xedatutakoari jarraituko zaio. Egun horiek hartu baino lau egun lehenago eskatu beharko dira.

16. artikulua. Lizentzia ordainduak.

Langile orok, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborarako:

a) Langilearen ezkontzagatik: 20 egun natural. Oporraldiarekin meta daitezke, betiere enpresarekin adostuta eta haren funtzionamendu normala eragozten ez bada.

b) Seme-alaben, gurasoen eta neba-arreben ezkontzagatik: egun natural bat.

c) Seme-alaben jaiotzagatik: hiru lanegun (larunbata jaieguntzat hartzen da). Bederatzi hilabetetik beherako haurraren edoskitzeagatik, langileek eskubidea izanen dute lanetik ordubetez lekutzeko. Denbora hori bi zatitan bana dezakete. Erditze anizkoitzen kasuan, dagokion proportzioan gehituko da baimen denbora. Langileak eskubide hori ohiko lanaldiaren ordubeteko murrizketarekin ordezka dezake, hala nahi badu, helburu berbererako. Bi gurasoek baliatzen ahal dute baimena, batak zein besteak, biek lan egiten badute. Ordu murrizketa hori eskatzen duten langileen kasuan, edoskitzeko denbora egunetan meta dezakete, amatasun edo aitatasun baja bukatutakoan hartzeko. Elkarren segidako 12 lanegun izanen direla adostu da. Lizentziak gertaera eragileak iraun bitarte hartuko dira. Seme-alaben jaiotza, adopzio edo harreraren kasuetan, langileak eskubidea izanen du Langileen Estatutuaren 45.1 artikuluan eta Langileen Estatutuaren 48.4 eta 48 bis artikuluetan ezarritakoaren arabera. Erditze, adopzio edo familia-harrera anizkoitzen kasuan, bi egun gehiago emanen dira seme edo alaba bakoitzeko, bigarrenetik hasita.

d) Bigarren mailara arteko ezkontza edo odol bidezko ahaideen eritasun larriagatik: bost lanegun.

e) Bigarren mailara arteko ezkontza edo odol bidezko ahaideen ebakuntza kirurgiko larriagatik, ospitalizaziorik gabe: bost lanegun.

f) Bigarren mailara arteko ezkontza edo odol bidezko ahaideen eritasun larriagatik, klinikan ingresatuta: bost lanegun.

g) Bigarren mailara arteko ezkontza edo odol bidezko ahaideen heriotzagatik: bi lanegun.

h) Gurasoen heriotza: hiru egun natural.

i) Seme-alaben heriotzagatik: bost egun natural.

j) Ezkontidearen heriotzagatik: bost egun natural.

k) Ohiko bizilekua aldatzeagatik: lanegun bat.

l) Nahitaezko eginbehar publiko bat betetzeko: behar-beharrezkoa den denbora.

m) Hitzarmen honen eraginpeko langileek erabilera libreko 10 ordu izanen dituzte, hartu baino 4 egun lehenago jakinarazita, betiere.

n) 18 urtetik beherako seme-alabekin edo lehen mailara arteko odol bidezko ahaideekin medikuarengana (pribatua nahiz publikoa izan) joateko: behar-beharrezkoa den denbora. Langileak aurkeztu beharko du bisitako medikuak emandako bertaratze frogagiria.

o) Haurdun dauden langileei eta haien bikotekideei erditu aurreko azterketa medikoak egiteko eta erditzea prestatzeko tekniketan trebatzeko, lanorduetan egin behar badira: behar-beharrezkoa den denbora. Txanda aldatzea baimenduko zaie hala eskatzen duten langileei, bikotekideari kasuan kasuko jaio aurreko azterketetara laguntzeko. Baimen hau justifikatuko da aldez aurretik aurkeztuz hitzordua eta ondotik joan izanaren frogagiria.

p) Aurreko txandako langileak ospitaleko larrialdietara joan behar badu, ordaindutako baimena hartzen ahalko du azken horretan, bai eta larrialdietako arreta lan egiten duen txandaren aurrekoa denean ere.

Lizentzia hauen ondorioetarako, ulertzen da ospitalizazioa gertatzen bada dagoela gaixotasun larria.

Gertaera eragilea sortzen den unetik beretik kontatuko da lizentzia ordainduen hasiera. Lizentzien iraupena nola banatu adostu eginen da edo ospitalizazioak dirauen bitartekoa izanen da.

Heriotza, gaixotasuna edo seme-alaben jaiotza gertatzen den kasu guztietan, joan-etorria egin behar bada, dagokion lizentziak bi egun gehiago izanen ditu.

Langile batek, egoeraren larritasunak beharturik, jada hasia duen laneguna eten behar badu, lanegun hori lanaldi osotzat hartuko da.

Izatezko bikoteek baimen berberak izanen dituzte; horretarako, bizikidetza egiaztagiria aurkeztu beharko dute, elkarrekin erroldatuta gutxienez 12 hilabete daramatela frogatzeko. Ezkontide edo izatezko bikotekideei aitortzen zaien ahaidetasun maila berbera aitortuko zaie langilearekin ezkon harreman edo bizikidetza harreman berbera duen pertsonari.

17. artikulua. Pizgarriak.

Berriobeitiko lantokirako 100 euroko pizgarriak bermatuko dira, non eta ez duten zenbateko hori gainditzen aurrez lortutako pizgarriek.

Berriobeitiko lantokian, guardiako txandakoei hilean 120 euro ordainduko zaie.

18. artikulua. Bidaiak eta dietak.

Langileak ohikoa ez den beste lantoki batera joan behar izanez gero, eta haraino 20 kilometrotik gorako distantzia baldin badago, enpresak lantoki berrirainoko garraio gastuak hartuko ditu bere gain edo bi lantokien artean dagoen distantziari dagokion kilometro-ordaina ordainduko dio. Kilometro bakoitzeko 0,31 euro ordainduko dira.

19. artikulua. Kulturarako laguntza.

Langileen kultur eta lanbide maila igotzeko asmoz, enpresak lantokiaren herri berean dagoen hizkuntza eskolan edo antzeko ikastetxe batean euskara edo beste hizkuntzaren bat ikasteko matrikula gastuak ordainduko dizkie langile guztiei, hala eskatzen dutenean, betiere ikasketa horiek lanorduetatik kanpo egiten badituzte eta ikasketen aprobetxamendua normala baldin bada. Horixe bera eginen da ikastunekin, ohartaraziz ezen justifikatu gabeko hutsegite batek eskubidea galtzea ekarriko duela. Enpresek erraztasunak emanen dituzte ikastunak arratsaldeko zazpietan atera daitezen lanetik, artikulu honetan ezarritakoa erabili ahal dezaten.

20. artikulua. Xedapen orokorrak aplikatzea.

Hitzarmen honetan aurreikusi edo arautu ez den orotan, indarreko legedian ezarritako arauak aplikatuko dira.

Produkzioko eta azkeneko bezeroarentzako arretako merkataritzako langileak behartuta daude lanaldiaren bukaeran egiten ari diren eginbeharrak bukatzera, lanaldi arruntean jarri beharreko ardura berarekin.

Langileren bat delitu bategatik (arrunta edo ez arrunta izan) atxilotuz gero, auziperatua ez bada, edo auziperatua izanda ere, hori dela-eta izaten dituen lan absentziak ez dira justifikatu gabeko hutsegitetzat hartuko eta, horrenbestez, ez dute kaleratzerik ekarriko. Kondenatzen badute, kondena hori bete ondoren lanpostua gordeko zaio.

–Kontratazioa:

Lanaldi partzialeko kontratuak hamabi ordutik gorakoak izanen dira beti. Kontratuetan benetako lanaldia, lantokia, egunak eta ordutegiak finkatuko dira. Enpresak, beharrezkoa dela behar bezala egiaztatuta, baldintza horiek alda ditzake.

Kontratazioa, edozein modalitatetan, legeria indardunean xedatutakoari lotuko zaio.

Produkzio gorabeherengatik egiten den aldi baterako kontratazioan egoera hori gertatzen ari dela ulertuko da enpresak ohiko produkzioa baino gehiago egin behar duenean.

Indarra duen legeriaren babesean egindako lan kontratuak dituzten ikastunen soldata bigarren taldeko eta ofizioko profesionalen ikastunentzako soldata-taulen eranskinetan ageri da. Praktiketako kontratua duten langileek hitzarmen honetan ezarritako soldataren %85 kobratuko dute. 10etik 50 langilera bitarte dituzten enpresetan, behin-behineko kontratuak eta aldi baterakoak plantillaren %35 izanen dira gehienez ere.

50 langile baino gehiagoko enpresetan, aldi baterako kontratuak ez dira plantillaren %25 baino gehiago izanen.

–Probaldia:

Probaldia 15 egunekoa izanen da kategoria guztietan, buru eta arduradunentzat izan ezik, horientzat, gehienez ere, bi hilabetekoa izanen baita.

–Erretiro aurreratua. Errelebo kontratua:

Errelebo kontratuari dagokionez, enpresak banan-banan aztertuko ditu kasuak, indarrean dagoen araudiaren arabera eta langileen alde egiten saiatuz; urtebete lehenago eskatu beharko litzateke.

Erretiro aurreratua hartzeko aukera langileen eta indarreko legediaren esku egonen da.

Enpresarena da, ordea, erretiro sistema horretan sartzen diren langileen lanaldia antolatzeko ahalmena.

21. artikulua. Eskubide sindikalak.

Enpresa batzordeko kideek eta langileen delegatuek legean ezarritako eskubide guztiak izanen dituzte, hauek bereziki:

a) Gai garrantzitsuen gaineko txostenak egitea, hala nola enplegu erregulazioari, lanaldi murrizketari eta instalazioak beste toki batera eramateari buruzkoak.

b) Enpresak langileei ezarritako zehapen oso astunen gaineko informazioa jasotzea. Ahal den neurrian, informazioa jasotzea absentismoaren eta horren zergatien gainean (laneko istripuak, lanbide gaixotasunak eta horien ondorioak).

c) Lankideei informazioa ematea lan harremanetan eragina duten edo izan dezaketen gaiei buruz, legeak ezarritako moduan.

Enpresa batzordeko kideek eta langileen delegatuek hilean benetako 20 lanordu izanen dituzte beren eginkizunetarako.

Hitzarmenaren negoziazioan emandako orduak, bileraren aurreko bi orduak eta ondorengo beste biak barne, ez dira ordu sindikaltzat joko.

Laneko arriskuen prebentzioko delegatuen prestakuntza orduak enpresaren kontura izanen dira eta ez dira ordu sindikaltzat joko.

22. artikulua. Aseguru-poliza.

Hitzarmen kolektibo honi lotutako enpresek beren langileentzako asegurua kontratatuko dute, istripuaren ondoriozko heriotza eta lanerako ezintasun iraunkor eta absolutua gertatuz gero, honako zenbateko hauek bermatuko dituena:

• 36.060,73 euro, heriotza kasuetan.
• 36.060,73 euro, laneko edo lanetik kanpoko istripuaren ondoriozko edo laneko gaixotasun baten ondoriozko ezintasun iraunkorra eta absolutua gertatuz gero.

23. artikulua. Hitzarmenaren salaketa.

Langileen Estatutuaren 86. artikuluan ezarritakoaren ondorioetarako, hitzarmen honen amaiera sinatzen den egunetik beretik salatzen da.

24. artikulua. Lan osasuna.

Enpresak behartuta daude langile guztiei urtean osasun azterketa bat egitera. Azterketa hori lan istripuetarako ugazaben mutualitateetan eginen da; zeinetan dagoen enpresa inskribatua, hartantxe. Langileek aipatu osasun azterketen emaitzen berri izateko eskubidea dute. Azterketak lanorduetan eginen dira.

Enpresak behartuak daude langileei beren lanposturako behar dituzten jantziak edo babesgarriak ematera.

Horretarako, enpresek eta langileen ordezkariek hitzematen dute prebentziorako ekintza planak ezarriko dituztela, ahal duten neurrian eta aurreikusitako epeetan, laneko arriskuak desagerrarazteko edo pixkanaka gutxitzeko eta sektoreko lan arriskuei eraginkorki aurrea hartzeko.

Prebentziozko neurri gisa, eta ongizate fisiko eta emozionala zaintze aldera, langileek fisioterapia saioak izaten ahalko dituzte, ordaindutakoak; astean bi langilek izaten ahalko dituzte gehienez ere. Egoerak hala eskatzen badu, eta zuzendaritzak horretarako baimenik emanez gero, gehieneko kopuru hori handitzen ahalko da.

Prebentzioko delegatuei dagokienez, legean ezarritako bermeak izanen dituzte, eta enpresek hitzematen dute erraztasunak emanen dizkietela dagozkien eginkizunak betetzeko, behar dituzten ordu kredituen bidez.

25. artikulua. Emakumezko langilea.

Sexuan oinarritutako diskriminaziorik eza: hitzarmen hau sinatzen duten alderdiak bat datoz adieraztean honako helburu hauek garrantzitsuak direla aukera berdintasuna lortzeko:

a) Berdintasuna izatea lanean, zuzeneko eta zeharkako diskriminazioa baztertuz.

b) Soldatetan sexu-diskriminaziorik ez izatea.

c) Enplegurako aukera-berdintasuna izatea.

d) Lanbide prestakuntzako eta birziklatze prozesuetan parte hartzea.

e) Amatasun eszedentzia, Langileen Estatutuan aurreikusitako moduan.

f) Eskubide hori legezko adopzioetara hedatzea, kasu horretan ere Langileen Estatutuan ezarritakoari jarraikiz.

g) Haurdunaldian lanpostu aldaketak egitea, osasunarentzat kaltegarria baldin bada eta enpresak lanpostu aldaketa egiteko aukera baldin badu.

h) Aldi baterako lanak ez du kalterik eraginen emakumezko langileen eskubide ekonomiko edo profesionaletan.

i) Genero indarkeriaren biktimei ez zaie absentismo gisa kontatuko lanera ez etortzea, eta indarreko legeetan xedatutakoa aplikatuko da.

26. artikulua. Jarduteko neurriak sexu-jazarpenaren, sexuan oinarritutako jazarpenaren, sexu orientazioaren, genero-identitatearen edo -adierazpenaren kontrako jazarpenaren kasuetan.

1. Enpresak konpromiso irmoa hartzen du lan-ingurune segurua, errespetuzkoa eta inklusiboa sortzeko eta mantentzeko, sexu-jazarpenik, sexuan oinarritutako jazarpenik, sexu-orientazioaren, genero-identitatearen edo adierazpenaren kontrako jazarpenik gabea. Jokabide horiek falta oso astunak izanen dira.

2. Klausula hau plantilla osoari aplikatuko zaio, kontratu-modalitatea edozein dela ere, bai eta kanpoko langileei, hornitzaileei eta enpresarekin harreman profesionala duen edozein pertsonari ere.

3. Jazarpentzat hartuko dira pertsonaren duintasunaren aurka egitea helburu edo ondorio duten hitzezko jokabideak, hitzik gabekoak edo fisikoak, bereziki ingurune larderiatsua, apalesgarria edo iraingarria sortzen dutenean. Berariaz sartzen dira horien artean LGTBI pertsonekiko jokabide diskriminatzaileak edo iraingarriak.

Hitzarmenaren indarraldian jazarpen kasuetarako protokolo bat eginen dutela hitzematen dute alderdiek.

27. artikulua. Tratu txarren biktimei laguntza emateko neurriak.

Hitzarmen honen lurralde eremutik kanpoko herrietan, probintzietan edo erkidegoetan lantokiak ireki dituzten enpresek lanpostu hutsak baldin badituzte euren lantokietan, lanpostu huts horiek tratu txarren biktimei eskainiko dizkiete.

Enpresako zuzendaritzak erabakiko du, nolanahi ere, ea tratu txarren biktima lanpostu hutsa betetzeko gai den eta behar den gaitasuna eta ahalmena dituen. Era berean, tratu txarren biktima bat baino gehiago izanez gero, enpresak erabakiko du horien artean zeinek izanen duen lanpostu hutsa betetzeko lehentasuna, betiere haien gaitasuna eta ahalmena kontuan hartuta.

Dena dela, lanpostu bat hutsik dagoela ulertuko da lanpostua bete gabe dagoenean eta horren eginkizunak tratu txarren biktimak duen lanbide kategoriari dagozkionak direnean.

Lanpostu hutsik ez dagoela ulertuko da, lanpostu bat bete gabe egon arren, enpresak hura amortizatzea erabakitzen badu.

Erasotzailea eta erasoa jasan duena lantoki berean ari badira, enpresak behar diren neurriak hartuko ditu, txandak aldatzea barne, beharrezkoa bada, erasotzailea eta biktima batera ez egoteko.

28. artikulua. Aldi baterako laneko enpresetako langileak.

Hitzarmen honen eraginpeko enpresek, ukitutako langileen eta enpresen artean diskriminazio eta desberdintasun egoerarik izan ez dadin eta hitzarmen hau ez aplikatzea saihestearren, beharrezkoa dutenean bakarrik kontratatuko dituzte langileak aldi baterako laneko enpresen bidez, eta betiere enpresa erabiltzaileen baldintza berberak bermatzen dituzten enpresetara zuzenduz; beraz, Neumáticos Iruña enpresaren hitzarmen probintziala aplikatuko diete horrelako langileei, eta behartuta egonen dira baldintza horiek bermatzen ez dituzten enpresen zerbitzuak ez erabiltzera.

Hitzarmen honetan aurreikusi ez den orotan, indarra duen legerian xedatutakoari jarraituko zaio.

–Lanbide prestakuntza:

Hitzarmen honen eraginpeko enpresek beren langileen lanbide prestakuntza sustatuko dute; horretarako, ordezkari sindikalen eta enpresaren artean aztertuko dituzte prestakuntza jarraituaren arloko beharrak, eta enpresa planak prestatzen ahalko dituzte, bai eta sektoreka egin daitezkeen plan bateratuetan parte hartu ere.

Enpresak hartzen badu langileak prestakuntza ikastaroetara joateko erabakia, langileek horrelakoetan ematen dituzten orduak benetako lanalditzat joko dira, eta ahaleginak eginen dira ikastaroak lanorduetan egin daitezen.

29. artikulua. Eszedentziak eta lanaldi murrizketak.

1. Borondatezko eszedentzia.

1.–Enpresan gutxienez urtebeteko antzinatasuna duten langileek eskubidea izanen dute borondatezko eszedentzia hartzeko, lau hilabeterako gutxienez eta bost urterako gehienez, betiere justifikatutako arrazoiengatik eta beste langile bat kontratatzen ahal bada eszedentziak iraun bitartean. Eszedentzia aldiaren lehenengo urtean, langileak lanpostua gordetzeko eskubidea izanen du, baina borondatezko eszedentzia aldia ez da antzinatasuna kontatzearen ondorioetarako aintzat hartuko.

2.–Eszedentzia aldia luzatzea langilearen esku egonen da, enpresari gutxienez hamabost egun lehenago idatziz jakinarazita, salbu eta langileak eszedentziaren gehieneko aldia hartzea erabakitzen baldin badu.

3.–Eszedentzia hartuz gero, bukatzen denetik bi urte igaro behar dira langile berak eskubide horretaz berriro baliatu ahal izateko.

2. Nahitaezko eszedentzia.

Nahitaezko eszedentziak lanpostua gorde eta antzinatasuna kontatzeko eskubidea emanen du, eta lanera joatea galarazten duen kargu publiko edo sindikal baterako izendatu edo hautatua izateagatik ematen da. Lanera itzultzea kargu publiko edo sindikala utzi eta hurrengo hilabetearen barrenean eskatu beharko da.

3. Lanaldia borondatez murriztea.

1.–Langileak borondatezko lanaldi murrizketa hartzen ahalko du hiru hilabeterako gutxienez eta bost urterako gehienez. Egoera horrek iraun bitartean, lanpostua gordetzeko eskubidea izanen du. Lantoki bakoitzean ari diren langileen %10ari onartuko zaio gehienez, betiere enpresak langile horiek murriztutako denboran ordezkatzeko langilerik aurkitzen baldin badu. Enpresari hamabost egun lehenagotik abisatuta, langilea murrizketa onartu aurretik zuen lan egoerara itzultzen ahalko da.

2.–Lanaldi murrizketa hartzen ahalko dute, halaber, 12 urtetik beherako haurrak zaintzeko eskatzen duten langileek, bai eta jarduera ordaindurik egiten ez duten minusbaliatu fisiko, psikiko nahiz sentsorialak, edo bere mende dauden pertsona adinduak, edo gaixotasun larriren bat duten pertsonak zaintzeko eskatzen dutenek ere.

3.–Lanaldiaren murrizketa ordubetekoa izanten ahalko da gutxienez, eta lanaldi erdikoa gehienez; betiere, soldata proportzio berean ordainduko da.

4.–Ordutegia enpresa eta langilea ados jarrita zehaztuko da. Zehaztapen hori indarrean dagoen bitartean aldatzen ahalko da, baldin eta bi alderdiak aldez aurretik ados jartzen badira eta gutxienez hilabete lehenago jakinarazten bada; betiere, enpresaren antolamenduari kalterik eragiten ez zaiola bermatuko da.

5.–Gaixotasun larriaren ondorioz aldi baterako ezintasun egoera asko luzatzen bada, lanaldi murrizketa hartzeko aukera emanen da lehen hiru hilabeteetan.

30. artikulua. Mugigarritasun geografikoa.

Bizilekua aldatzea dakarren lekuz aldatzeko erabakia hartzen bada, indarrean jarri baino bi hilabete lehenago, gutxienez ere, jakinarazi beharko dio enpresaburuak langileari erabaki hori, bai eta legezko ordezkariei ere.

Mugigarritasun funtzional geografikoaren kasu guztiak borondatezkoak izanen dira langileentzat, eta hala izan ezean ezin izanen dira gauzatu.

31. artikulua. Prestakuntza. Ikasten duten langileen eskubideak.

Enpresan duen lanbide jarduerarekin zerikusi zuzena duen titulu akademiko edo profesional bat lortzeko ikasten ari diren langileek eskubide hauek dauzkate:

1. Azterketa ofizialetara joateko behar diren baimen ordainduak hartzea, aldez aurretik eskatuta eta ondoren bertaratzea justifikatuta.

2. Lanbide prestakuntzarako edo hobekuntzarako eszedentzia hartzea, lanpostua gordeta, honako baldintza hauekin:

1. Eszedentziak gutxienez urtebete iraunen du, eta gehienez bi urte. Hala ere, ordezkoaren kontratu-modalitateagatik lanpostua gordetzeko arrazoiari lotzea posible ez denean (produkzioaren inguruabarrengatiko kontratua edo antzekoa), eszedentzia gehienez urtebetera mugatuko da, aldi baterako kontratazioaren bideragarritasuna bermatzeko.

2. Lanpostua gordeko dela bermatzen da, baldin eta indarrean dagoen araudiak aukera ematen badu ordezkapen-kontratu bat formalizatzeko, eszedentzian dagoen langilea lanera itzultzeari lotua. Ordezkapen hori lanpostua gordeta formalizatu ezin bada legez, langileak lehentasunezko eskubidea izanen du kategoria bereko edo antzeko kategoriako lanpostu huts batean berriz sartzeko.

3. Eskubide horretaz baliatzeko, ezinbestekoa izanen da matrikula ofizialaren frogagiria aurkeztea. Era berean, eskubidea finkatzeko, aurreikusitako ordu-dedikazioa justifikatzen duten aprobetxamendu akademikoaren ziurtagiriak aurkeztu beharko dira.

32. artikulua. Araudia.

Hitzarmen honetan aipatzen ez den guztia kimikaren sektoreko hitzarmenak arautuko du.

Sinadura: Mikel Oses, Mikel Osinaga, Miriam Marcalain, José Antonio Leceaga, Oscar Perez, Maribi Kanpandegi.

ERANSKINAK

Lehenbizikoa.–Muntaketako lantokirako pizgarri aldagarriak, gehienez, 120 eurokoak izanen dira hilabetean, lanaren kalitatearen arabera.

Bigarrena.–Batzordearekin adostuta, ezinbestekoak ez diren txanda aldaketak eginez gero, 1,60 euro ordainduko dira aldatutako egun bakoitzeko.

Hirugarrena.–Nafarroako Neumáticos Iruña enpresaren hitzarmen kolektiboaren soldata-taulak 2026. urterako:

Laugarrena.–José Antonio Leceaga izendatzen da hitzarmen hau Nafarroako Gobernuan erregistratzeko.

Sinadura: Mikel Oses, Mikel Osinaga, Miriam Marcalain, José Antonio Leceaga, Oscar Perez, Maribi Kanpandegi.

Grados de consanguinidad y afinidad. Odol eta ezkontza ahaidetasun mailak

Trabajador/a. Langilea.

Iragarkiaren kodea: F2607999