2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
AUÑAMENDI GIZARTE ZERBITZUEN MANKOMUNITATEA
Hitzarmena, kontziliazio zerbitzuaren kudeaketa-esleipena egiteko
Iragarki honen bidez, aditzera ematen da Auñamendi Gizarte Zerbitzuen Mankomunitateko Batzorde Iraunkorrak eta Aezkoako Batzarre Nagusiko Osoko Bilkurak hartutako erabakia, urriaren 1eko 40/2015 Legearen aurreikuspenei egokiturik (Sektore Publikoaren Araubide Juridikoari buruzko Legea).
Auritzen, 2026ko maiatzaren 19an.–Mankomunitateko burua, Nekane Nuño Iturri.
HITZARMENA, AUÑAMENDI GIZARTE ZERBITZUEN MANKOMUNITATEAK KUDEAKETA-ESLEIPENA EGITEKO AEZKOAKO BATZARRE NAGUSIARI, KONTZILIAZIO ZERBITZUA KUDEA DEZAN ESKOLARIK GABEKO ALDIETAN, PIRINIOAN - 2026
Bildurik:
Alde batetik, Carlos Bueno Reca, Aezkoako Batzarre Nagusiko burua den aldetik (IFKa: P3175000C), bat etorriz Aezkoako Batzarre Nagusiak 2026ko maiatzaren 8an hartutako erabakiarekin.
Bestetik Miren Nekane Nuño Iturri, Auñamendi Gizarte Zerbitzuen Mankomunitateko Batzorde Iraunkorreko burua den aldetik (IFKa: P3127510J), sinatzeko ahalmena duela 2026ko maiatzaren 19an hartutako erabaki baten bidez.
Bi alderdiek elkarri aitortzen diote kudeaketa-esleipen hau sinatzeko behar adinako gaitasun juridikoa, zeinek bere ordezkari eginkizunetan jardunez eta urriaren 1eko 40/2015 Legearen 11. artikuluaren babesean (Sektore Publikoaren Araubide Juridikoari buruzko Legea),
Honako hau azaltzen dute:
1.–Nafarroako Gobernuaren 2026rako aurrekontuetan 60.000 euroko aurrekontu-partida izendun bat dago Aezkoako Batzarre Nagusiarentzat, Pirinioko kontziliazio zerbitzua kudeatzeko (210002-21400-4609-922108 partida).
2.–Zerbitzuak hiru ibar edo eremu bereizitan egiten dira, eta horietako bakoitza administrazio baten eskumenekoa da; hala, zerbitzu guztiak kudeatzeko, kudeaketa-esleipena egin behar zaio Aezkoako Batzarre Nagusiari, aurretiazko urrats gisa, Lurralde Kohesiorako Departamentuari dirulaguntza eskatzeko eta harekin behar den hitzarmena sinatzeko, bai eta, gero, 2026rako zerbitzua kontratatzeko eta abian jartzeko ere.
Oinarri juridikoak:
1.–Beste administrazio bateko organoei edo eskubide publikoko erakundeei kudeaketa-esleipenak egiteko aukera ezartzen du urriaren 1eko 40/2015 Legearen 11. artikuluak (Sektore Publikoaren Araubide Juridikoari buruzko Legea). Horretarako baldintza da jarduerak haien eskumenen artean egotea eta efikazia arrazoiak egotea, edo ez edukitzea behar diren baliabide tekniko egokiak jarduera horiek egiteko. Ez dira kudeaketa-esleipenen xede izaten ahalko sektore publikoko kontratuei buruzko legedian arauturik dauden kontratuen berezko prestazioak. Halakoetan, legedi horren araberakoa izanen dira haien izaera eta araubide juridikoa.
2.–Kudeaketa-esleipenak formalizatzean, honako arau hauek beteko dira: ... "Kudeaketa-esleipena administrazio desberdinetako organo eta zuzenbide publikoko entitateen artean egiten denean, dagokion hitzarmena izenpetuz formalizatuko da; (...). Aipatutako hitzarmena (...) autonomia-erkidegoko aldizkari ofizialean (...) argitaratuko da, esleipena egiten duen organoa zein administraziotakoa den kontuan hartuta".
3.–Aezkoako Batzarre Nagusiaren ordenantzek honako hau ezartzen dute 10.2.a) artikuluan:
–Ibarreko Batzarre Nagusia Komunitatearen interes publikoaren zerbitzura dago, eta, horretarako, honako eskudantzia hauek ditu: 2. Toki-erakundea den aldetik: berez edo beste erakunde edo partikular batzuekin lankidetzan, sustatzea edo sortzea ibarraren garapen sozioekonomikorako ekintzak, edo haietan parte hartzea, ordezkatzen duen komunitatearen interes komunaren mesedetan.
Azaldutako aurrekariekin bat eta legezko erregulazioari jarraikiz, bi administrazioek hitzartzen dute honako kudeaketa-esleipen hau egitea, eta horretarako,
Hitzartzen dute:
Lehenbizikoa.–Xedea.
Auñamendi Gizarte Zerbitzuen Mankomunitateak (P3127510J) Aezkoako Batzarre Nagusiari esleitzen dio, zeinak esleipena onartzen baitu, kontziliazio zerbitzuak ematea eskolarik gabeko aldietan bere eskumeneko eremuan, 2026. urtean.
Bigarrena.–Zerbitzua emateko modua.
Zerbitzua emanen da zerbitzua kontratatuz, Kontratu Publikoei buruzko Foru Legean horretarako arauturik dagoen prozeduraren bidez.
Hirugarrena.–Zerbitzuaren zenbatekoa eta ordaintzeko modua.
Aezkoako Batzarre Nagusiak osorik hartuko du bere gain zerbitzuak emateak dakarren kostua, eta finantzatuko da Nafarroako aurrekontuetan 2026rako ezarritako dirulaguntza izendunaren bidez (1. azalpen zatian aipatutakoa).
Aezkoako Batzarre Nagusiak eginen ditu behar diren izapide guztiak dirulaguntza lortzeko eta Nafarroako Gobernuko Lurralde Kohesiorako Departamentuarekin behar den hitzarmena sinatzeko, bai eta horri egotzitako gastu guztiak justifikatzeko izapideak ere.
Laugarrena.–Kontziliazio Zerbitzuaren diseinua.
Bi alderdiek hitzartzen dute Aezkoako Batzarre Nagusiak diseinatuko duela zerbitzua eta ezarriko dituela hura emateko egunak eta orduak. Horretarako, aholkularitza bilatuko du orain arte Pirinioan kontziliazio zerbitzuak kontratatu dituzten erakundeengandik.
Bosgarrena.–Eman beharreko zerbitzuak.
Aezkoako Batzarre Nagusiak eskolarik gabeko aldietarako kontziliazio zerbitzua kontratatuko du 2026ko udan eta, kasua bada, abenduko oporraldian.
Seigarrena.–Jarraipena, zaintza eta kontrola.
Lan batzorde bat eratuko da, egin ditzan hitzarmen hau sinatzen duten alderdiek harturiko konpromisoen eta hitzarmenaren betearazpenaren jarraipena, zaintza eta kontrola. Batzorde horrek jarraipen eta kontroleko administrazio eginkizunak izanen ditu, eta ez du izanen erabakitzeko, aholkatzeko, proposatzeko edo erabakitzeko eginkizunik.
Lau kidek osatuko dute lan batzorde hori.
–Batzordeburua: Aezkoako Batzarre Nagusiko burua. Ordezkoa: Aezkoako Batzarre Nagusiko buruordea.
–1. batzordekidea: Auñamendi Gizarte Zerbitzuen Mankomunitatearen ordezkari bat.
–2. batzordekidea: Zaraitzuko eta Nabaskozeko Gizarte Zerbitzuen Mankomunitatearen ordezkari bat.
–3. batzordekidea: Erronkariko Ibaxaren Batzordearen ordezkari bat.
Idazkaria aukeratuko da batzordekideen artean.
Lan batzordearen bilerak egiteko, lehenbiziko deialdian, batzordekideen gehiengo osoak parte hartu beharko du, eta, bigarren deialdian, eratzen ahalko da baldin eta gutxienez batzordekideen %50 bertan badaude edo ordezkaturik badaude, lehenbiziko deialdia izan eta ordu erdi geroago.
Lan batzordea gutxienez urtean behin bilduko da, batzordeburuak deiturik.
Bilera egin baino gutxienez zazpi egun lehenago eginen da batzordea biltzeko deia. Horretarako, batzordekideei jakinarazpena igorriko zaie, adierazirik gai-zerrenda eta bilera eginen den lekua, eguna eta ordua.
Bileretan, batzordeburua izanen da buru, eta eztabaidak zuzendu eta antolatuko ditu. Idazkariak bilera bakoitzaren akta idatziko du, eta berak eta batzordeburuak sinatu beharko dute, bilera egin eta hurrengo hamabost egunen barnean. Akta horretan, eztabaiden laburpena eta bertaratutakoen zerrenda jasoko dira, eta posta elektronikoz igorriko zaie lan batzordeko kideei.
Zazpigarrena.–Iraunaldia eta luzapena.
Hitzarmen honen iraunaldia 2026. urteari dagokio, eta ez da luzapenik aurreikusten hurrengo urteetarako.
Zortzigarrena.–Azkentzea.
Honako hauek izanen dira hitzarmen hau azkentzeko arrazoiak:
–Alderdiek ados jarrita hala erabakitzea.
–Sinatzaileetako edozeinek ez-betetze larria egitea hitzarmen honetan bere gain hartutako betebehar zehatzetan.
–Ez lortzea Pirinioko kontziliazio zerbitzuari lotutako dirulaguntza, arrazoi objektiboak daudelako edo legezko ezintasuna dagoelako, administrazio sinatzaileei ezin egotz dakizkienak.
Bederatzigarrena.–Higiezinen erabileraren lagapena.
Kudeaketa-esleipen honen eginkizunak betetzeko, esleipena egiten duen erakundeak konpromisoa hartzen du behar diren higiezinak lagatzeko, haietan kontziliazio zerbitzua eman dadin, bere jarduketa eremuaren barnean. Horretarako, behar den denborarekin jakinaraziko du aurretiaz zer lokal uzten den edo diren zerbitzuaren eskura, ezartzen den aldirako. Lagapena doakoa izanen da betiere, bai eta zerbitzuaren eskura jarritako lokalak erabiltzeak dakartzan gastuak ere.
Hamargarrena.–Datuen tratamendua.
Aezkoako Batzarre Nagusia izanen da tratamenduaren arduraduna, kudeaketa-esleipena gauzatu bitartean erabiltzen dituen datu pertsonalak tratatzean, eta aplikatuko zaio datu pertsonalak babesteko araudian ezarritakoa.
Hamaikagarrena.–Izaera.
Hitzarmen honek izaera administratiboa du, eta berau interpretatzeko eta betetzeko garaian sortzen diren auziak, azken batean, administrazioarekiko auzietarako auzitegi eskudunek aztertu eta ebatziko dituzte.
Eta jasota gera dadin, hitzarmen honen bi ale sinatzen dituzte, goian zehaztutako toki eta egunean.
Auritzen, 2026ko maiatzaren 19an.–Sinatzaileak, Karlos Bueno Reca, Aezkoako Batzarre Nagusiko burua eta Miren Nekane Nuño Iturri, Auñamendi Gizarte Zerbitzuen Mankomunitateko burua.
Iragarkiaren kodea: L2607686
