Iragarkia

111. ALDIZKARIA - 2026ko ekainaren 9a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

95C/2026 EBAZPENA, maiatzaren 14koa, Ekonomia Sozialeko eta Laneko zuzendari nagusiak emana; honen bidez erabaki da Eulen SA eta OHL Servicios Ingesan SA enpresen Hitzarmen Kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Eulen SA eta OHL Servicios Ingesan SA enpresek aurkeztutako Hitzarmen Kolektiboa (kode zenbakia: 31102583012026), erregistro honetan sartu baitzen 2026ko otsailaren 23an, 2026ko urtarrilaren 23an sinatu ondoren, enpresen eta sindikatuen ordezkariek.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan ezarritakoarekin, eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta kontuan hartuta zer xedatzen den Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Eulen SA eta OHL Servicios Ingesan SA enpresek aurkeztutako Hitzarmen Kolektiboa (kode zenbakia: 31102583012026).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko maiatzaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

HIRI AZPIEGITURA BERDEA, ITURRIAK ETA URMAELAK KONTSERBATZEKO ETA MANTENTZEKO IRUÑEKO UDALARI EMANDAKO ZERBITZUAREN ENPRESA ESLEIPENDUNEN I. HITZARMEN KOLEKTIBOA

LEHENENGO KAPITULUA.–HITZARMENA ADOSTU DUTEN ALDERDIAK ZEHAZTEA

Hitzarmen Kolektibo hau sinatu dute, sindikatuen ordezkaritzaren aldetik, Langile Abertzaleen Batzordeak (LAB), Nafarroako UGTren Zerbitzuen, Mugikortasunaren eta Kontsumoaren Federazioak (Nafarroako FeSMC-UGT), Nafarroako Habitataren CCOOk, Eusko Langileen Alkartasunak (ELA) eta SOLIDARIk, eta enpresen ordezkaritzaren aldetik, Eulen SA eta OHL Servicios Ingesan SA enpresek, enpresa horietakoak baitira hitzarmenak ukitzen dituen langile gehienak.

Bi alderdi horiek badute, eta elkarri hala aitortzen diote, Langileen Estatutuaren Legearen testu bategineko III. tituluak eskatzen duen ordezkaritza gaitasuna eta, beraz, zilegitasun osoa dute estatutu izaera duen Hitzarmen Kolektibo hau sinatzeko.

Hitzarmen Kolektibo hau berez arautzailea da, eta eraginkortasun orokorra du ("erga omnes"), Langileen Estatutuaren Legearen Testu Bateginaren III. tituluan xedatutakoaren arabera.

I. KAPITULUA

1. artikulua. Eremu funtzionala.

Hitzarmen Kolektibo hau aplikatuko zaie hiriko azpiegitura berdea, iturriak eta urmaelak kontserbatzeko eta mantentzeko Iruñeko Udalari emandako zerbitzuen enpresa eta entitate esleipendun guztiei.

2. artikulua. Lurralde eremua eta langile eremua.

Hitzarmen Kolektibo hau Iruñeko udalerrian ematen diren zerbitzuetan aplikatuko da, Iruñeko Udalak 1. artikuluan aipatzen dituen esleipenak gauzatzean garatutako jarduerei dagokienez, eta ez beste inongo jardueratan.

Hitzarmen Kolektibo honen langile eremuan sartzen dira beren funtzioen eremuko enpresekin lan harremana izanik kontratu horien esparruan zerbitzuak modu eraginkorrean ematen dituzten langileak.

Hitzarmen Kolektibo honen aplikazio eremutik kanpo geratzen dira, espresuki, beren jarduera beste kontratu, zerbitzu, lantoki edo eginkizun batzuetan aurrera eramaten duten langileak, nahiz eta enpresa berekoak izan.

3. artikulua. Iraupena, salaketa eta aurreraeragina.

Hitzarmen Kolektibo hau 2026ko martxoaren 1ean jarriko da indarrean, espresuki beste data bat xedatzen den gaietan izan ezik, eta 2030eko abenduaren 31ra arte egonen da indarrean.

Aipatutako indarraldia agortzen denean, alderdiek automatikoki salatutzat joko dute Hitzarmen hau, idatzizko jakinarazpenik edo aldez aurreko jakinarazpenik egin beharrik gabe.

Itundutako indarraldia agortu eta azkena automatikoki iragartzen denean, Hitzarmenaren eduki osoak indarrean jarraituko du mugagabe, alderdien arteko negoziazioaren ondoriozko hitzarmen kolektibo berri batek ordezten duen arte, eta bi aldeek espresuki uko egiten diote aurreraeragineko edozein denbora muga ezartzeari.

4. artikulua. Arauen lehentasuna.

Hitzarmen honetan jaso diren arauek enpresen eta Hitzarmenaren 1. eta 2. artikuluetan adierazitako lurralde eremu, eremu funtzional eta langile eremuen barnean dauden langileen arteko harremanak arautuko dituzte.

Hitzarmen honen testuan espresuki aurreikusirik ez dagoen guztian, aplikagarriak izanen dira estatu osoan indarra duen Lorezaintzako Hitzarmen Kolektiboa, Langileen Estatutuaren Legearen Testu bategina eta lan arloko indarreko legedian jasotzen diren gainerako arau osagarriak.

Lorezaintzako Estatuko Hitzarmen Kolektiboa Hitzarmen honen bidez arautzen ez diren gaiei bakarrik aplikatuko zaie.

5. artikulua. Konpentsazioa eta irenspena.

Hitzarmen honetan jaso diren baldintzek orain arte indarrean egon diren guztiak ordezten dituzte, ulertzen baita, oraingo baldintza hauek oro har aztertuta, orain arte indarrean zeudenak baino onuragarriagoak direla, hitzarmenaren eraginpeko langileentzat.

Etorkizunean izan daitezkeen lan arauen aplikazioa osotasunean eta urteko zenbaketan baloratu beharko da, eta hitzarmen honetan itundutako baldintzek konpentsatu eta xurgatuko dituzte, baldin eta orain itundutako hauek, oro har aztertuta, baino hobeak ez balira etor litezkeen horiek.

6. artikulua. Berme pertsonala.

Errespetatuko dira, soilik modu pertsonalean eta banaka begiratuta, oro har eta urteko zenbaketan aztertuta, hitzarmen honetan kategoria bererako eta talde profesional bererako ezarritakoak baino hobeak diren baldintzak. Baldintza horiek ez dira konpentsatzen edo irensten ahalko, hitzarmen honetan edo etorkizunean ezartzen ahal diren igoerekin.

7. artikulua. Osotasunari lotzea.

Hitzarmen Kolektibo honetan jasotako baldintzek multzo organiko eta zatiezin bakarra osatzen dute. Alderdi sinatzaileek aitortzen dute testuaren oreka oinarritzen dela ekonomia eta antolaketa arloetan elkarri eskainitako kontzesioen interdependentzian, eta modu globalean eta elkarri lotuta hitzartu direla.

Administrazioko lan agintaritzak edo agintaritza judizialak, bere ahalmenez baliatuta, hitzarmen honetako artikulu edo itunen baten deuseztasuna deklaratzen badu, honela jokatuko da:

–Funtsezkoak ez diren manuen deuseztasuna: Deuseztasun horrek ukituko balitu prestazioen oreka funtsean aldatzen ez duten xedapenak, testuaren gainerako atalek indarrean eta eraginkor jarraituko dute. Kasu horretan, Negoziazio Batzordea gehienez 30 egun naturaleko epean elkartuko da, eragindako klausula bera bakarrik egokitzeko indarrean dagoen legeriara, jatorrizko akordioaren espirituari eutsiz.

–Funtsezko manuen deuseztasuna: Deklaratutako deuseztasunak funtsean ukituko balitu alderdi sinatzaileetako baten iritziz negoziazioaren oreka hausten duten gaiak (batez ere lanaldiari, egiturari eta soldataren zenbatekoari edo lanbide sailkapenari dagokienez), alderdiek, nahitaez, berriro negoziatu beharko dute Hitzarmen osoa. Horretarako, Negoziazio Batzordea eratu beharko da, epaia irmo bihurtu eta 15 egun balioduneko epean.

Goragoko eremu bateko arau bat automatikoki aplikatzeak sor lezakeen arau-hutsunea eta segurtasun juridikorik eza saihesteko, alderdiek adosten dute ezen, testua zuzentzeko edo berriz negoziatzeko negoziazioek irauten duten bitartean, deuseztasunak ukitzen ez dituen klausulak indarrean egonen direla, behin-behineko araudi gisa.

Bi ordezkaritza taldeek konpromisoa hartu dute birnegoziazioa fede onaren eta leialtasunaren printzipioen arabera bideratzeko, lehentasuna emanez lan egonkortasunari eta ekoizpen jardueraren normaltasunari, akordio berri bat lortu arte.

8. artikulua. Batzorde Paritarioa.

Bi alderdi negoziatzaileek erabaki dute batzorde misto bat eratzea, hitzarmenaren aplikazioan interpretazio, arbitraje, adiskidetze eta zaintzarako organoa izan dadin.

Osaera: Batzorde Paritarioa osatuko dute, modu paritarioan, bost (5) kidek enpresaburuen ordezkari gisa, eta beste bost kidek (5) langileriaren ordezkari gisa. Kide horiek guztiak Hitzarmen Kolektibo hau sinatu duten enpresen eta sindikatuen artean aukeratuko dira, edo haien ordezkoen artean.

Aholkulariak: Batzorde Paritarioak aholkularien zerbitzuak erabiltzen ahalko ditu, noizbehinka nahiz etengabe, bere eskumenekoak diren gai guztietan. Alderdi bakoitzak nahi dituen aholkulariak aukeratuko ditu.

Eginkizun espezifikoak:

1. Hitzarmen Kolektibo hau indarra duen legediaren arabera aplikatu eta interpretatzearen arloko gaiak ezagutu eta ebazteko baldintzak.

2. Aldeek harengana eramaten ahal dituzten arazo edo gatazken arbitrajea.

3. Hitzarmen Kolektibo honetan itundutakoa betetzen dela zaintzea.

4. Alde hitzartuen arteko harremanen bilakaera aztertzea.

5. Aztertzea, besteak beste, Hitzarmen Kolektiboaren efikaziarik handiena lortzeko asmoa duten kudeaketa guztiak.

Prozedura: Batzorde Paritarioaren esku utzitako gaiak arruntak edo apartekoak izanen dira.

Batzorde Paritarioak emanen du horien kalifikazioa, kide guztien adostasunez. Lehenengo kasuan, Batzordeak hirurogei (60) eguneko epean ebatzi beharko du, eta bigarrenean, gehienez hogeita hamar (30) eguneko epean, salbu eta, lege xedapen baten ondorioz edo lan agintaritzak edo agintaritza judizialak hala eskatuta, ebatzi behar bada epe laburragoan. Lehenago aipatutako ebazte epeak soilik salbuetsiko dira Hitzarmen Kolektibo honen 21. artikuluaren kasuan eta bertan aurreikusitako arrazoiengatik.

Erabakiak hartzea: Batzorde Paritarioa elkartzeko deia alderdi sinatzaileetako edozeinek eginen du, eta horretarako aski izanen da idatzizko ohar bat, eguneko gai zerrenda azalduko duena.

Batzordea eratutzat joko da ordezkaritza bakoitzaren gehiengo soila bertaratzen denean. Erabakiak Batzorde paritarioa osatzen duten alderdietako bakoitzaren gehiengoz hartu beharko dira.

Helbidea eta jakinarazpenak: Jakinarazpen eta deietarako, Batzorde Paritarioaren helbidea izanen da Nafarroako Lan Auzitegiaren egoitza (Kale Berria 30-32 behea, Iruña).

Aldeek adosten dute, desadostasunak egonez gero, Lan Gatazkak Modu Autonomoan Konpontzeari buruzko VI. Akordioan edo hura ordezten duen akordioan ezarritako adiskidetze prozeduraren mende jarriko direla, hitzarmen honetan ezarritako berezitasunekin eta, era berean, Estatuaz azpiko eremuetan ezarritako prozeduren mende, gatazka sortzen bada eremu jakin horretan.

II. KAPITULUA

9. artikulua. Sailkapen funtzionala.

Lanbide sailkapenari dagokionez, Lorezaintzako Estatuko Hitzarmen Kolektiboan ezarritakoa beteko da, honako salbuespen eta hobekuntza hauekin:

Azpitalde profesionalak mugatzea.

Hitzarmen honen indarraldi osoan honako azpitalde profesional hauek erabiltzeko debekua erabaki da espresuki:

–Ikastunak azpitaldea

–Lorezain peoi azpitaldea

Ondorioz, hitzarmen honi atxikitako edozein langilerentzako gutxieneko sarrera maila lorezain laguntzailearen maila izanen da.

Lanpostu hobetze automatikoa.

Hitzarmen hau indarrean jartzen denetik aurrera lorezain laguntzaile gisa kontratatzen diren langileak automatikoki Lorezainen azpitaldean sartuko dira, 180 egunez benetan lan egin orduko.

Ondorio horietarako, hitzarmena indarrean jartzen denetik benetan lorezain laguntzaile gisa emandako zerbitzu denbora zenbatuko da, dela kontratu bakar baten bidez, dela hainbat kontraturen bidez, eta 180 egunen zenbaketatik kanpo geratuko dira lan kontratua, edozein arrazoirengatik dela ere, etenda dagoen aldiak.

Aipatutako zerbitzu aldiak kalkulatzeko, langileak kontratarekin duen lotura hartuko da kontuan, enpresaren titulartasunean gerta daitezkeen aldaketak gorabehera.

Hitzarmena indarrean jartzen den egunean lorezain laguntzaile gisa kontratatuta dauden eta kategoria horretan 180 egun baino gehiagoz lanean aritu diren edo muga horretara 2026ko irailaren 1a baino lehen iristen diren langileak Lorazainen azpitaldera igaroko dira, 2026ko irailaren 1etik aurrera.

III. KAPITULUA

10. artikulua. Lanaldia.

2026ko lanaldia 1.700 ordukoa izanen da gehienez.

2027ko urtarrilaren 1etik aurrera, gehieneko lanaldia 1.640 ordukoa izanen da urtean, Hitzarmen Kolektiboaren gainerako indarraldirako.

2027ko urtarrilaren 1etik aurrera aplikatu beharreko lanaldi murrizketa hori eginen da eguneko lanaldia murriztuz urtarrilean, otsailean, azaroan eta abenduan, bai eta uztailean eta abuztuan ere, argi naturala aprobetxatzeko eta beroarekiko esposizio handieneko aldietan benetako lan denbora murrizteko irizpideak kontuan hartuta.

Aurrekoa kontuan hartuta, langileen ordutegia aldatzea erabaki da, 2027ko urtarrilaren 1etik aurrerako ondorioekin, data horretatik aurrera aplikatu beharreko urteko gehieneko lanaldira egokitzeko, neguko hilabeteetan hasteko ordua atzeratuz eta udako hilabeteetan eguneko lanaldia burutzeko ordua aurreratuz. Ordutegiaren aldaketa hori ezin hartuko da, inola ere, aldaketak ukituko dituen langileen lan baldintzen funtsezko aldaketatzat.

Abenduaren 24a eta 31 ez dira laneguntzat joko.

Alderdiek adostu dute langileek hogeita hamar minutuko atsedenaldia izanen dutela lanaldiaren barruan, eguneko lanaldi jarraituaren iraupena sei ordutik gorakoa denean. Atsedenaldiko denbora hori benetako lan denboratzat hartuko da.

IV. KAPITULUA

11. artikulua. Diziplina araubidea.

Enpresako edo erakundeko zuzendaritzak langileak zehatzen ahalko ditu, Lorezaintzako Estatuko Hitzarmen Kolektiboan diziplina araubidea arautzen duten kapitulu eta artikuluetan xedatutakoaren arabera, lan betebeharrak ez betetzeagatik.

V. KAPITULUA

12. artikulua. Ordainsarietako kontzeptuak.

Lanaldi osoko langileen urteko guztizko soldata gordina Hitzarmen Kolektibo honi erantsitako soldata tauletan jasotzen dena da, Hitzarmenaren indarraldiko urte bakoitzerako.

13. artikulua. Garraio plusa.

Garraioaren eta joan-etorrietako denboraren kontzeptuengatik, eranskineko soldata tauletan jasotako zenbatekoa ordainduko da. Izaera konpentsatzaile eta soldataz kanpokoa duen osagarri hori hilero jasoko da, oporretan izan ezik.

14. artikulua. Aldagela zaindu eta mantentzeko plusa.

Aldagelak zaindu eta mantentzeko plusaren kontzeptuarengatik, eranskineko soldata tauletan jasotako zenbatekoa ordainduko da. Zenbateko hori hilero jasoko da.

15. artikulua. Gaueko lanaren plusa.

Gaueko hamarretatik goizeko seiak arte lan egindako orduek berariazko ordainketa izanen dute, gaueko lanaren plusa izena duena, eta oinarrizko soldataren gaineko % 25eko gehikuntza ekarriko du, lana berez gauekoa dela kontuan hartuta ezarri ez bada soldata.

16. artikulua. Antzinatasun plusa.

Hileko plusa sortuko da, bi, sei, hamar, hamalau, hemezortzi, hogei, hogeita bi, hogeita lau, hogeita sei eta hogeita zortzi urtetik aurrera lanean emandako denboraren arabera. Horren zenbatekoa I. eranskineko soldata tauletan jaso da.

Plus hori sortzen hasiko da langileak bere antzinatasuna betetzen duen egunetik hasita, eta hurrengo hileko nominan kobratuko da.

17. artikulua. Lan toxiko, nekagarri edo arriskutsuen plusa.

Plus horiek sortzeari eta ordaintzeari dagokienez, Lorezaintzako Estatuko Hitzarmen Kolektiboan xedatutakoa beteko da.

Aurrekoa ukatu gabe, kontzeptu hori ordaintzeko moduan zenbateko handiagoak edo hobekuntzak ezarri dituzten enpresa akordioak, itunak edo baldintza indibidualak errespetatu eta mantenduko dira.

18. artikulua. Aparteko pagak.

Aparteko bi paga ezartzen dira, urte bakoitzeko ekaineko eta abenduko lehenengo 20 egunean ordainduko direnak. Zenbatekoa hileko oinarrizko soldata izanen da, gehi antzinatasuna, seihileko bakoitzean sortua.

Era berean, «paga berdea» izeneko ordainsari berezi bat ezartzen da, hileko oinarrizko soldataren gehi antzinatasunaren zenbatekoekin. Urte natural bakoitzean sortuko da, eta aldez aurretik ordainduko da, sortu den urteko urriko nominan.

Horrez gain, laugarren ordainsari berezi bat ezartzen da, «fideltasun paga» izenekoa. Horren sortzapen aldia urte natural bakoitzeko izanen da, eta sortzapena gertatu eta hurrengo urteko martxoko nominarekin batera ordainduko da.

Fideltasun paga horren zenbatekoa, 2026, 2027 eta 2028rako, 450 eurokoa izanen da (2025., 2026. eta 2027. urteetan sortua, hurrenez hurren). Fideltasun paga horren zenbatekoa, 2029tik aurrera, 900 eurokoa izanen da (aurreko urtean sortua beti).

Urtean barna enpresan sartu edo enpresa uzten duten langileei eskersariak ordainduko zaizkie, haien zenbatekoa proportzionalki hainbanatuta, lanean emandako denboraren arabera, asteak edo hilabeteak osorik kontatuta.

Arau hori bera aplikatuko zaie behin-behineko langileei, bitartekoei edo aldi jakin baterako kontratatutakoei.

Langileekin adostuta, enpresek aparteko ordainsarien zenbatekoa hilero hainbanatzen eta ordaintzen ahalko dute.

19. artikulua. Joan-etorriak eta dietak.

Estatuko Lorezaintzako Hitzarmen Kolektiboan ezarritakoa beteko da.

VI. KAPITULUA

20. artikulua. Langileen subrogazioa.

Estatuko Lorezaintzako Hitzarmen Kolektiboan ezarritakoa beteko da.

VII. KAPITULUA

21. artikulua. Hitzarmenean ezarritakoa ez aplikatzeko klausula.

Langileen Estatutuaren 82.3 artikuluari dagokionez, eta Hitzarmena aplikatzeak enpresaren egonkortasun ekonomikoari kalte egin diezaiokeenean, egoerak ukitutako enpresek ez-aplikatzeko klausula baliatzen ahalko dute, Hitzarmen honetako soldata erregimena eta legearen arabera aplikatzetik salbuetsita egon litezkeen gainerako gaien kasuan, soilik, jarraian zehazten diren baldintzetan.

Langileen legezko ordezkaritza dagoen kasuetan, ez-aplikatzea adostuko da langileen ordezkaritzaren eta enpresaren artean. Akordioa badago, zehatz azaldu beharko ditu enpresa horretan aplikatzekoak diren lan baldintza berriak eta haien iraupena, ezin luzatu izanen dena, enpresan hitzarmen berri bat aplikatzekoa den unetik aurrera.

Kontsulta aldia agortuta adostasunik ez bada, edozein aldek jar dezake desadostasuna Hitzarmenaren Batzorde Paritarioaren menpe, eta horrek, gehienez ere, zazpi eguneko epea izanen du erabakitzeko, desadostasuna Batzordeari planteatzen zaionetik, aldez aurretik ordainduta Batzorde Paritarioak ezarritako gastuak.

Batzorde Paritarioaren esku-hartzea eskatu ez denean, hura nahitaezkoa ez zelako, edo Batzorde Paritarioak akordiorik lortu ez duenean, alderdiek aintzat hartuko dituzte autonomia erkidegoko lanbide arteko akordioetan lan gatazkak auzibidetik kanpo konpontzeko aurreikusitako prozedurak, zehazki Nafarroako Foru Komunitateko lan gatazkak auzibidetik kanpo konpontzeko prozedurei buruzko lanbide arteko akordia.

Kontsulta aldian langileen ordezkariekin adostasunik lortu ezean, eta lanbide arteko akordioetako gatazkak ebazteko prozeduretara jo arren, desadostasuna konpontzen ez bada (arbitrajea egiten ahal da, soilik, bi aldeen baimenarekin, espresuki eta bien borondatez adierazita), bi aldeen arteko akordioa beharko da (enpresen ordezkaritzaren eta langileen ordezkaritzaren gehiengoen artean), hitzartutakoa ez-aplikatzearen gaineko desadostasuna eramateko Hitzarmen Kolektiboen Espainiako Aholku Batzordera edo Nafarroako Foru Komunitatean sortzen ahal den hiru aldeko organora.

Arbitrajea aukeratzen bada eta bi alderdiek onartzen badute, arbitrajearen laudoak kontsulta aldiko akordioen eraginkortasun bera izanen du.

Ez-aplikatzearen gaineko akordio horren berri eman beharko zaio Hitzarmenaren Batzorde Paritarioari.

Eskaera egitearen ondorioz, soldaten aplikazioa aldi baterako etenik geratuko da, baina horrek ez du esan nahi izanen, eskaera ezetsiz gero, dagozkion atzerapenak ordaindu behar ez dituenik.

2026. URTEKO SOLDATEN TAULA

Martxoaren 1etik abuztuaren 31ra arteko aldia

2026. URTEKO SOLDATEN TAULA

Irailaren 1etik abenduaren 31ko aldia

2026. URTEKO SOLDATEN TAULA

2028. URTEKO SOLDATEN TAULA

2029. URTEKO SOLDATEN TAULA

2030. URTEKO SOLDATEN TAULA

ANTZINATASUN PLUSA (*15)

Iragarkiaren kodea: F2607221