Iragarkia

11. ALDIZKARIA - 2026ko urtarrilaren 16a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1001E/2025 EBAZPENA, abenduaren 24koa, Enpresen Sustapenerako eta Azpiegituretako zuzendari nagusiak emana, industriako enpresa txiki eta ertainen (ETE) inbertsioetarako laguntzen 2026ko deialdia onesten duena. Dirulaguntzen Datu Base Nazionalaren kodea: 877701.

Industria funtsezko elementua da ekonomia mugiarazteko eta enplegua sortzeko. Industria sektoreak Nafarroako produktibitate egitura ekonomikoan duen pisua handitzeko, eta ETEen hazkunde jasangarria eta lehiakortasuna sendotzeko eta haietan enplegua sortzeko, neurri hau onesten da: dirulaguntzak ematea produkzio-inbertsioko proiektuak egiten dituzten Nafarroako industriako ETEei.

Horretarako, Nafarroako Gobernuak 2025eko abuztuaren 27an hartutako Erabakiaren bidez, 11.000.000 euroko urte anitzeko gastua egiteko konpromisoa hartu zuen 2028. urterako.

Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,

EBAZTEN DUT:

1. Industriako ETEen inbertsioetarako laguntzen 2026ko deialdia onestea.

2. Onestea laguntzak emateko oinarri arautzaileak. Ebazpen honen eranskinean jaso dira.

3. 11.000.000 euroko gastua baimentzea deialdi honetako konpromisoei aurre egiteko, 2025eko gastuen aurrekontuko "Industrian inbertsioak egiteko laguntzak" izeneko 810007-81200-7701-422205 partidaren baliokidea izanik 2028. urteko aurrekontuan izanen den partidaren kargura, baldin eta kreditu egokia eta nahikoa badago.

4. Ebazpen hau eta eranskina Nafarroako Aldizkari Ofizialean argitaratzea.

Ebazpen honek ez du administrazio bidea amaitzen, eta zilegi da haren aurka gora jotzeko errekurtsoa jartzea, Industriako eta Enpresen Trantsizio Ekologiko eta Digitalerako Departamentuko kontseilariari zuzendua, argitaratu eta hurrengo egunetik hilabeteko epean.

Iruñean, 2025eko abenduaren 24an.–Enpresen Sustapenerako eta Azpiegituretako zuzendari nagusia, Iñigo Arruti Torre.

ERANSKINA.–OINARRI ARAUTZAILEAK

1. oinarria.–Laguntzen xedea.

Laguntza hauen xedea da Nafarroako industriako ETEetan inbertsioak egin daitezen sustatzea, enpresa horien hazkunde jasangarria eta lehiakortasuna sendotzeko eta haietan enplegua sortzeko.

2. oinarria.–Onuradunen betebeharrak.

1. Betebehar hauek betetzen dituzten enpresek jasotzen ahalko dituzte laguntzak:

a) ETEa izatea, Batzordearen 2014ko ekainaren 17ko 651/2014 (EB) Erregelamenduaren I. eranskineko definizioaren arabera. Erregelamendu horren bidez, zenbait laguntza-kategoria barne merkatuarekin bateragarritzat jo ziren, Europar Batasunaren Funtzionamenduari buruzko Tratatuaren 107. eta 108. artikuluak aplikatuz (aurrerantzean, kategorien arabera salbuesteko erregelamendu orokorra –KSEO–).

b) Nafarroan establezimendu bat izatea edo gero batean izatea.

c) Nafarroako Industria Erregistroan inskribaturik egotea edo inskripzioa eskaturik izatea, bat etorriz Ekonomia, Ogasun, Industria eta Enpleguko kontseilariaren apirilaren 30eko 152/2013 Foru Aginduaren 3. artikuluak ezartzen duenarekin, foru agindu horren bidez sortu baitzen Nafarroako Industria Erregistroa (2013ko 94. Nafarroako Aldizkari Ofiziala, maiatzaren 20koa).

d) Dirulaguntzei buruzko azaroaren 9ko 11/2005 Foru Legearen 13.2 artikuluan onuradun izateko ezarritako ezein debekurik ez urratzea.

Laguntza eskatzearekin batera baimena emanen zaio organo emaileari zuzenean eskura ditzan eskatzaileak zerga betebeharrak eta Gizarte Segurantzarekikoak egunean dituela frogatzen duten egiaztagiriak; laguntza emateko ebazpen proposamena ematen den unean izan beharko dituzte egunean aipatutako betebeharrak. Interesdunak horri uko egiten badio berariaz eskaeran, berak aurkeztu beharko ditu betebehar horietan egunean dagoela frogatzen duten ziurtagiriak.

2. Oinarri honetako betekizunak betetzen direla frogatuko da laguntzen fitxan dagoen erantzukizunpeko adierazpenaren bidez. Era berean, enpresaren tamainari buruzko erantzukizunpeko adierazpen espezifiko bat aurkeztuko da, edo 9.3. d) oinarrian aipatzen den ziurtagiria.

3. Ezin dira onuradun izan:

a) Sektore Publikoaren Araubide Juridikoari buruzko urriaren 1eko 40/2015 Legearen 2.1 artikuluan jasota dauden sektore publikoko entitateak.

b) Krisian dauden enpresak, Kategorien araberako Salbuespenari buruzko Erregelamendu Orokorraren 2. artikuluko 18. ataleko definizioaren arabera. Salbuespena dira 2019ko abenduaren 31n krisian ez zeudenak baina 2020ko urtarrilaren 1etik 2021eko abenduaren 31ra bitarteko aldian krisian dauden enpresak izatera pasatu direnak (Kategorien araberako Salbuespenari buruzko Erregelamendu Orokorraren 1.4.c artikulua).

Halaber, deialditik kanpo geldituko dira aipaturiko erregelamenduaren 1. artikuluan ezarritako sektore eta baldintzetan diharduten entitateak.

c) Betetzeko zain dagoen berreskuratze agindu baten mende dauden enpresak, Europako Batzordeak laguntza legez kanpokotzat eta barne merkatuarekin bateraezintzat jo ondoren.

d) Administrazio zehapen irmoa edo kondena epai irmoa betetzen ari diren enpresak, sexu edo genero diskriminaziotzat hartutako lan praktikak egiteagatik edo onartzeagatik, ez eta arrazoi horiek direla-eta ezarritako epai edo zehapen bat betetzeko zain daudenak ere.

4. 30.000 eurotik gorako dirulaguntzen kasuan, ezin izanen dira onuradun izan zuzenbide publikoko entitateez bestelako pertsona fisiko eta juridikoak, baldin eta irabazi-asmorik badute eta betetzen ez badituzte Merkataritzako eragiketetako berankortasunaren aurka borrokatzeko neurriak ezartzen dituen abenduaren 29ko 3/2004 Legean ezarritako ordainketa-epeak.

Honako agiri hauen bidez frogatuko da bete direla ordainketa-epeak:

a) Kontabilitate-araudiaren arabera galera-irabazien kontu laburtua aurkezten ahal duten pertsona fisiko eta juridikoen kasuan: ordezkaritza-ahal nahikoa duen pertsona fisikoak sinatutako ziurtagiria, edo, pertsona juridikoen kasuan, administrazio organoak edo behar adinako ordezkaritza-ahala duen organo baliokideak sinatutako ziurtagiria, non adieraziko baita bete direla abenduaren 29ko 3/2004 Legean ezarritako ordainketa-epeak. Egoera hori egiaztatzeko, b) letran adierazitako frogabideren bat ere erabil dezakete.

b) Kontabilitate-araudiaren arabera galera-irabazien kontu laburtua aurkeztu ezin duten pertsona juridikoek honako hauen bidez frogatzen ahal dute:

1. Kontuen Auditoreen Erregistro Ofizialean (KAEO) inskribatutako auditore batek emandako ziurtagiria, jasoko duena auditatutako azken urteko kontuen memorian deskribatutako ordainketen arloko informazioaren transkripzio banakatua, kontu horietatik ondorioztatzen denean lortu dela abenduaren 29ko 3/2004 Legean ezarritako ordainketa-epeak betetzeko maila, apartatu honetan zehaztutakoa, oinarri hartuta uztailaren 5eko 15/2010 Legearen hirugarren xedapen gehigarrian eskatutako informazioa.

Ziurtagiri hori baliozkoa izanen da hurrengo ekitaldiko urteko kontuak ikuskatu arte.

2. Aurreko ziurtagiria ezin bada egin, KAEOn inskribatutako auditore batek egindako "Adostutako prozeduren gaineko txostena", non adierazten baita ezen aztertu dela sozietatearen hornitzaileei erreferentziazko data batean ordaintzeke dauden fakturen lagin adierazgarri bat (epeak bete direla ziurtatzeko kontuan hartutako data deialdiaren argitalpen-data baino geroagokoa izan beharko da) eta ez dela salbuespenik detektatu abenduaren 29ko 3/2004 Legean jasotako ordainketa-epeak betetzeko orduan, edo, halakorik detektatu bada, ez dutela eragozten hurrengo paragrafoan eskatzen den betetze-maila lortzea.

Ondorio horietarako, baldintza hori betetzat joko da baldin eta 3/2004 Legean aurreikusitako ordainketa-epeak betetzeko maila baldin bada 18/2022 Legearen azken xedapenetako seigarrenaren d) letraren bigarren apartatuan aurreikusitako ehunekoa adinakoa edo handiagoa.

Nahi izanez gero, 4. ataleko dokumentazio hori laguntza-eskabidearekin batera aurkezten ahalko da, eta, une horretan aurkeztu ezean, hilabeteko epea emanen da laguntza emateko ebazpenean. Hala ere, b) letrako dokumentazioa ezin bada lortu epe hori baino lehen, hilabete horren barrenean eskatu izanaren egiaztagiria aurkeztuko da, eta, lortu ondoren, hiru hilabeteko epean aurkeztuko da, dirulaguntza emateko ebazpena jakinarazten denetik aurrera.

Epe hori eskatutako dokumentazioa aurkeztu gabe iraganik, organo eskudunak ebazpena emanen du, laguntza kobratzeko eskubidea galdu dela deklaratzeko.

5. Nortasun juridikorik ez duten eskatzaileek ordezkari bat edo ahaldun bakar bat izendatu beharko dute, onuradun gisa dagozkion betebeharrak betetzeko ahal aski duena.

Kasu horietan, dirulaguntza eskaeran berariaz adieraziko da elkarteko kide bakoitzak zer gauzatze konpromiso hartzen dituen bere gain. Halaber, laguntza ematen duen ebazpenean adieraziko da kide bakoitzari aplikatu beharreko dirulaguntzaren zenbatekoa. Kide horiek ere onuraduntzat joko dira.

6. Laguntza jasotzen duen enpresan egiturazko aldaketarik gertatzen bada (eraldatzea, bat-egitea, zatiketa edo aktibo eta pasiboen lagapen globala), ondorengoak oinarriotan ezarritako baldintzak bete beharko ditu onuradun izaerari eusteko, eta hori behar bezala frogatu beharko du.

Laguntzak kudeatzen dituen organoak baimenduko du, beharrezkoa bada, onuradunaren subrogazioa, eta laguntzaren intentsitatea berriro kalkulatuko du, 8. oinarriarekin bat, eta ezin izanen da inoiz izan hasiera batekoa baino handiagoa, ondorengoaren tamainaren arabera.

7. Enpresaren kapital soziala (osaera eta/edo zenbatekoa) aldatzen bada edo egiturazko aldaketa bat egiten bada laguntza emateko ebazpena eman aurretik, tamainari buruzko beste erantzukizunpeko adierazpen bat aurkeztu beharko da, formalizatzen denetik 10 egun balioduneko epean.

3. oinarria.–Inbertsio proiektuen betebeharrak.

Aktibo material eta immaterialetan inbertitzeko proiektuak izanen dira diruz lagungarriak, baldintza hauek betetzen badituzte:

a) Proiektu horiek enpresak honako jarduera hauetakoren bat gauzatzeko bideratuta egotea:

–Manufaktura industria: Ekonomia Jardueren Sailkapen Nazionalaren –aurrerantzean 2025eko EJSN– C saileko 10.2 taldea eta 13.etik 32.era bitarteko dibisioak (biak barne).

Ez dira lagunduko EBFTaren I. eranskinean zerrendatutako produktuen fabrikazio jarduerak (arrantzako eta akuikulturako produkturen eraldatze-sektorea izan ezik), ez eta nekazaritzako produktuak eraldatzeko, merkaturatzeko edo garatzeko jarduerak ere.

–Hondakinen balorizazioa (2025eko EJSNaren E ataleko 382. jarduera).

–Gordailua eta biltegiratzea, zerbitzu logistikoen jarduerak eta garraioaren beste jarduera osagarri batzuk (2025eko EJSNaren H ataleko 521 eta 5225-5226 jarduerak).

–Informazioa eta komunikazioak (2025eko EJSNaren atala).

b) Helburu hauek izatea:

1. Establezimendu berri bat sortzea.

2. Lehendik dagoen establezimendu bat handitzea.

3. Establezimendu baten ekoizpena dibertsifikatzea, produktu berriak gehituz.

4. Establezimendu bateko ekoizpen prozesu orokorrean funtsezko aldaketa bat egitea.

5. Establezimendu baten aktiboak erostea, ondoko baldintza hauek betetzen direnean:

i. Establezimendua itxita egotea, edo erosi ezean itxiko bazen.

ii. Aktiboak eroslearekin harremanik ez duen hirugarren bati erosiak izatea.

iii. Eragiketa merkatu-baldintzetan gertatzea.

Hasierako jabearen familiako kide batek edo enplegatu batek hartzen duenean enpresa txiki bat, ez da aplikatuko aktiboak eroslearekin harremanik ez duen hirugarren bati erosteko beharra. Enpresa batek akzioak eroste hutsa ez da inbertsioa izanen.

c) Gutxieneko aurrekontu diruz lagungarri bat izatea, enpresak duen tamainari dagokiona:

d) Nafarroan kokatuta egotea. Ulertuko da proiektuen kokalekua dela inbertsioak fisikoki egiten diren tokia. Ez bada posible proiektuen kokaleku fisikoa zehaztea, ulertuko da eskatzailearen egoitzan dagoela, hots, jarduera garatzen duen zentroan. Eskatzaileak egoitza bat baino gehiago baditu edo jarduera zentro batean baino gehiagotan garatzen badu, enpresaren jabetzapekoak izan edo ez, proiektua zer jardueratara bideratzen den, jarduera horretan aritzen den zentroa izanen da proiektuaren kokalekua.

e) Kalte nabarmenik ez eragitea Europako Parlamentuaren eta Kontseiluaren 2020ko ekainaren 18ko 2020/852 (EB) Erregelamenduaren 17. artikuluan ezarritako ingurumen-helburuetan. Erregelamendu hori inbertsio jasangarriak errazteko esparrua ezartzeari buruzkoa da eta 2019/2088 (EB) Erregelamendua (Taxonomiari buruzko Erregelamendua) aldatzen du. Baldintza hori egiaztatu da 2.2 oinarrian aipatutako erantzukizunpeko adierazpenaren bitartez.

f) 6. oinarrian ezarritako epean gauzatzea.

4. oinarria.–Kostu diruz lagungarriak.

1. Aktibo material eta immaterialetan egiten diren inbertsioen kostuak izanen dira diruz lagungarriak, baldintza hauek betetzen badituzte:

1.1. Inbertsioak proiektuari badagozkio zalantzarik gabe eta honako hauetan badautza:

a) Industrian erabiltzeko lurrak eskuratzea, zenbatekoa ez bada proiektuaren kostu diruz lagungarri osoaren %10 baino handiagoa.

b) Ondasun higiezinak eta instalazio orokorrak eskuratzea, eraikitzea edo hobetzea.

c) Makineria, ekipo-ondasunak eta ondoko instalazioak eskuratzea.

Finantza-errentamenduaren bidez eskuratzen badira, 7. oinarrian xedatutakoari jarraituko zaio.

d) Aktibo immaterialak eskuratzea: patenteak, lizentziak, ezagutza teknikoak edo jabetza intelektualeko beste eskubide batzuk.

e) b), c) eta d) letrekin lotutako beste kostu batzuk, proiektuaren guztizko kostu diruz lagungarriaren %20ko muga gainditu gabe:

–Obra-, jarduera- eta irekiera-lizentziak lortzeko kostuak, edo arkitektura-, ingeniaritza- edo aholkularitza-enpresen ordainsariak.

–Proiektuarekin lotutako inbertsio txikiak, hala nola altzariak, ekipo informatikoak eta kudeaketako aktibo immaterialak.

1.1 apartatu honetako letra bakoitzari dagozkion inbertsio moten informazioa laguntzen fitxan argitaratuko da.

1.2. Lursailak eta ondasun higiezinak eskuratuz gero, zenbateko diruz lagungarria ez da horien merkatu balioa baino handiagoa izaten ahalko, eta hori egiaztatzeko, behar bezala akreditatuta dagoen eta dagokion erregistro ofizialean izena emana duen pertsonak egindako tasazio independentea beharko da, edo behar bezala baimendutako erakunde publiko batek emandakoa. Tasazio hori ez da beharrezkoa izanen nahitaez desjabetutako eskuratzeen kasuan, edo konkurtso-prozesu batean eskuratzen badira, prezioa ezartzeko araudi espezifikoko prozedura betetzen bada.

Eskuratutako lursailak edo ondasun higiezinak eskatzailearenak edo beste enpresa batenak badira edo izan badira, edo KSEOren I. eranskinaren arabera hari zuzenean nahiz zeharka loturiko edo elkarturiko beste enpresa batenak badira, eskuratze horiek ez dira diruz lagungarriak izanen.

1.3. Bigarren eskuko ekipamendu ondasunak eskuratzeko kostuak diruz lagun daitezke, baldin eta baldintza hauek betetzen badituzte:

a) Saltzailearen adierazpen bat izatea, ondasunen jatorria zehaztu eta Espainiako edo Europar Batasuneko dirulaguntzarik jaso ez dutela adierazteko.

b) Prezioa ez izatea erreferentziako merkatu balioa eta antzeko ondasun berrien kostua baino handiagoa; dagokion elkargo profesionaleko kide batek egindako edo elkargo horrek onetsitako tasazio independente baten bidez egiaztatuko da hori.

Diruz lagungarriak izanen dira ondasun horiek desmuntatzeko, lekualdatzeko, muntatzeko eta egokitzeko gastuak, baldin inbertsioaren kostu handiagoaren gisa kontabilizatzen badira.

1.4. Aktibo immaterialek honako baldintza hauek bete beharko dituzte:

a) Laguntza jasotzen duen establezimenduan bakarrik erabiliko dira.

Ulertuko da hodeian kudeatzeko software programek edo urrutitik gailu mugikorren edo fabrikaren eremutik kanpo dauden terminalen bidez erabiltzeko diseinatu direnek baldintza hau betetzen dutela, baldin eta establezimendu onuradunarekin harreman zuzena badute.

b) Aktibo amortizagarritzat hartuko dira.

c) Eroslearekin loturarik ez duten hirugarrenei erosiko zaizkie, merkatuko baldintzetan.

2. Diruz lagungarriak izan daitezen, inbertsioak enpresaren ibilgetuaren kontu espezifikoetan aktibatu behar dira.

3. Kontzeptu hauek ez dira diruz lagungarriak:

a) Luxuzko gastuak.

b) Laguntzak kudeatzen dituen organoaren iritziz neurriz kanpokoak direnak, proiektuaren helburua edo xedea kontuan hartuta.

c) Enpresako edo hari lotutako eta lotutako enpresetako langileek ibilgeturako egindako lanak.

d) Enpresa lotuei eta elkartuei erositako inbertsioen mozkin-marjina.

e) Eratzeko eta lehenbiziko aldiz ezartzeko gastuak.

f) Aktiboak birjartzeko, mantentzeko eta ordezteko inbertsioak, salbu eta teknologiarengatik, errendimenduarengatik edo prestazioengatik ekoizpen gaitasuna handitzen badute. Bereziki, birjarpentzat hartuko da enpresan jada lantzen diren produktuak ekoizteko trokel-moldeak eta matrizeak eskuratzea.

g) Ibilgailuak, barnean erabiltzekoak salbu, esaterako, orga jasotzaileak eta pala kargatzaileak; horiek diruz lagungarriak izanen dira.

h) Zorren interesak eta bestelako finantza-gastuak.

i) Balio erantsiaren gaineko zerga (BEZa).

j) 6. oinarrian adierazitakoa betetzen ez duten kostuak. Zehazki, laguntza eskatu aurretik egindako fakturei, ordainketa aurreratuei, erresei, erosketa-aukerei, entrega-albaranei edo lan-parteei dagozkien inbertsioak.

k) 2.000 eurotik beherakoak diren inbertsio-elementuak, edo mikroenpresen kasuan, 500 eurotik beherakoak.

l) Inbertsio-elementu batean 2.000 eurotik behera kontabilizatu edo fakturatzen den zatia, edo mikroenpresen kasuan, 500 eurotik beherakoa.

5. oinarria.–Hornitzailearen hautaketaren justifikazioa.

1. Kostu diruz lagungarriren baten zenbatekoa, BEZa kenduta, 12.000 eurotik gorakoa bada (ekipamendu ondasunen hornidura kasuetan eta arkitektura, ingeniaritza edo aholkularitza enpresek zerbitzu prestazioak egiten dituzten kasuetan), edo 30.000 eurotik gorakoa (obra gauzatzeko kostuaren kasuan), onuradunak frogatu beharko du hornitzailea efizientzia eta ekonomia irizpideei jarraituz aukeratu dela. Horretarako, gutxienez hiru eskaintza aurkeztuko ditu, eta aukeratutako eskaintza zergatik hautatu duen justifikatu beharko du laguntzen fitxan dagoen inprimakian.

Onuradunek ez dituzte hiru eskaintza horiek aurkeztu beharko "Hornitzailea aukeratzeko jarraibideak" agirian adierazitako kasuetan (laguntzen fitxan eskuragarri); hala ere, arrazoia justifikatu beharko dute aipatu inprimakian.

2. Inprimakia eta, kasua bada, hiru eskaintzak, inbertsioen justifikazioarekin batera aurkeztuko dira, 13. oinarrian adierazitako moduan eta epean.

3. Laguntzak kudeatzen dituen organoaren ustez onuradunak hornitzailearen hautaketari buruz aurkeztu duen egiaztagiria ez bada nahikoa, kostu diruz lagungarri horri dagokion dirulaguntza ez da ordainduko.

6. oinarria.–Inbertsioak gauzatzeko epea.

1. Inbertsioak gauzatu beharko dira laguntzak eskatzen diren egunetik (2. apartatuak aipatzen duen ondorio pizgarriaren ondorioz) 2028ko maiatzaren 31ra bitarte, egun hori barne.

Ondorio horietarako, inbertsioa aldi horretan gauzatutzat joko da honako baldintza hauek betetzen direnean:

a) Inbertsioa fisikoki burututa egotea; 14.2 oinarrian adierazitako moduan egiaztatuko da hori.

b) Inbertsio guztia fakturatuta egotea.

c) Onuradunak inbertsio oso-osoa ordaindu izana. Inbertsio-elementu baten fakturaren bat epetik kanpo ordaintzen bada, faktura hori baino ez da laguntzatik kanpo geratuko, betiere elementuaren kostuaren %10 gainditzen ez badu.

Confirmingak, ordaindukoak, kanbio-letrak edo bestelako kanbio-efektuak erabiltzen direnean ordainketa egiteko, onuradunak gauzatze aldiaren barnean egin beharko du ordainketa.

2. Laguntzek duten izaera pizgarria bermatzearren, zeina araututa baitago KSEOren 6. artikuluan, ez dira diruz lagunduko laguntzen eskaera eguna baino lehen hasitako inbertsio-elementuak. Hori egiaztatzeko, laguntzak kudeatzen dituen organoak bisitak egiten ahalko ditu enpresaren establezimendura.

3. Zilegi izanen da proiektuak gauzatzeko epea luza dadila eskatzea, Administrazio Publikoen Administrazio Prozedura Erkideari buruzko urriaren 1eko 39/2015 Legearen 32. artikuluan xedatutakoarekin bat. Laguntza ematen duen organoak baimentzen duen luzapena ezin izanen da 2028ko abuztuaren 31tik haragoa izan.

Epea handitzeko eskaera 2028ko apirilaren 15ean aurkeztuko da beranduenez, laguntzen fitxan eskuragarri dagoen inprimakiaren bidez.

7. oinarria.–Inbertsioak finantza-errentamendu bidez eskuratzea.

1. Finantza-errentamenduaren bidez eskuratutako instalazioak edo makinak diruz lagunduko dira, baldin eta baldintza hauek betetzen badituzte:

a) Onuradunak konpromisoa hartu beharko du ondasuna erosteko aukera gauzatzeko, eta horrek eragiketaren BEZa aldez aurretik ordaintzea ekarriko du.

b) Inbertsioaren fakturaren data, finantza-errentamenduaren kontratuarena eta eragiketaren BEZa ordaindu izanarena 6. oinarrian ezarritako gauzatze aldiaren barrukoak izanen dira.

2. Finantza-errentamendu bidez eskuratutako inbertsioari dagokion laguntza izanen da, gehienez ere, laguntzak ordaintzeko proposamena egiten den egunean finantza-erakundeari benetan ordaindutako eragiketaren amortizazioaren zenbateko bera.

3. Ez dira diruz lagungarriak izanen errentatzailearen marjinak, interesak, gastu orokorrak eta finantza-errentamenduari lotutako aseguruen gastuak.

8. oinarria.–Dirulaguntzaren zenbatekoa.

Dirulaguntzaren zenbatekoa kalkulatzeko, honako ehuneko hauek aplikatuko zaizkie inbertsio proiektuaren guztizko kostu diruz lagungarriei, 2.1.a) oinarriarekin bat enpresak duen tamainaren arabera:

Nolanahi ere, enpresa bakoitzeko laguntzaren zenbatekoa ez da 400.000 eurotik gorakoa izanen.

9. oinarria.–Laguntzen eskaera eta aurkeztu beharreko dokumentazioa.

1. Eskaerak aurkezteko epea bi hilabetekoa izanen da. Deialdi hau Nafarroako Aldizkari Ofizialean argitaratu eta biharamunean hasiko da, eta muga-egunaren hilabetean argitalpen egunaren zenbaki bera duen egunean bukatuko da.

2. Eskaerak telematika bidez aurkeztu beharko dira, Nafarroako Gobernuak Interneten duen Atariko tramiteen katalogoko fitxa erabiliz (http://www.navarra.es /eu/hasiera).

3. Eskaera telematikoari honako agiri hauek erantsiko zaizkio, behar denean, laguntzen fitxan eskuragarri dauden ereduen arabera:

a) Enpresaren eta proiektuaren datuak biltzen dituen inprimakia.

b) Memoria tekniko eta ekonomikoa, enpresa eta inbertsio proiektua deskribatzen dituena. Uste bada inbertsio proiektua S4ko lehentasun edo lan-ildoetako batean edo gehiagotan sartzen dela, hori frogatzen duen memoria aurkeztu beharko da.

c) Erantzukizunpeko adierazpena, non adieraziko baita betetzen direla onuradun izateko betekizunak (2.2 oinarria) eta inbertsio proiektuak ez diola kalte nabarmenik eragiten ingurumenari (3.e oinarrian eskatzen denarekin bat).

d) Enpresaren tamainari buruzko erantzukizunpeko adierazpen espezifikoa.

e) Enpresa ertainek, enpresaren bat loturik edo elkarturik badute (KSEOren I. eranskineko definizioaren arabera), tamainari buruzko ziurtagiri bat aurkeztu beharko dute. Ziurtagiri hori merkataritza ganbera batek eman beharko du, edo "eginkizun publiko administratiboak" (horien barruan halako ziurtagiria ematea) legez esleiturik dituen zuzenbide publikoko beste erakunde batek. Horretarako, ziurtapena egiteko behar den dokumentazioa izan beharko du erakunde ziurtatzaileak. Dokumentazio horretan, jaso beharko dira enpresaren 2022, 2023 eta 2024ko ekitaldietako urteko kontu itxiak, sinatuak eta merkataritzako erregistroan gordailutuak (eta auditatuak, nahitaezkoa bada).

Gainerako enpresek zer aurkeztu aukeratzen ahalko dute: aipatu ziurtagiria edo, haren ordez, enpresaren 2022., 2023. eta 2024. ekitaldietako urteko kontuak, itxiak, sinatuak eta merkataritzako erregistroan gordailutuak (eta auditatuak, nahitaezkoa bada).

Eskatzaileak enpresa lotuak edo elkartuak baditu, aurkeztu beharko ditu, gainera, taldeko kontu kontsolidatuak edo eskatzaileari lotutako eta elkartutako enpresen urteko kontuak, aipatutako ekitaldietakoak, baldintza berberekin.

Hala ere, egoki iritziz gero, laguntzak kudeatzen dituen organoak eskatzen ahalko dio eskatzaileari aurkez dezala enpresa ertainei eskatzen zaien ziurtagiria.

f) Behar denean, 16. oinarrian ezarritakoaren ondorioetarako, jasotako beste laguntza batzuen egiaztagiriak.

4. Eskaerak 10. oinarriko balorazio irizpideren arabera baloratzeko, dokumentazio hau aurkeztu beharko da:

5. Eskabideak ez baditu betetzen Administrazio Publikoen Administrazio Prozedura Erkideari buruzko Legearen 66. artikuluko betebeharrak, laguntzak kudeatzen dituen organoak interesdunari eskatuko dio hamar egun balioduneko epean zuzentzeko, eta ohartaraziko dio, hala egin ezean, ondorioztatuko dela eskaera bertan behera uzten duela eta espedientea artxibatzeko ebazpena emanen dela.

4. atalean adierazitako dokumentazioa falta bada, ezin izanen da zuzendu; beraz, aurkezten ez bada, eskaera ezin izanen da baloratu 10. oinarriko irizpideen arabera.

10. oinarria.–Laguntza eskaerak baloratzeko irizpideak.

Eskaerak baloratzeko irizpideak honako hauek izanen dira; gehienez ere 100 puntu lortzen ahalko dira:

1. Proiektua eginen duen enpresa baloratzeko irizpideak:

1.1. Eskatzaileek jarduera Nafarroan hasi badute 2025eko urtarrilaren 1a baino lehenago, honako puntuazio hau eskuratuko dute irizpide hauen arabera:

1.1.1. Enpresaren tamaina eta mota:

(*) Ekonomia Sozialari buruzko martxoaren 29ko 5/2011 Legearen 5. artikuluko baldintzak betetzen dituzten enpresak.

1.1.2. Enpresaren hazkundea:

(*) Negozio-zifraren zenbateko garbia enpresa eskatzailearen 2023ko eta 2024ko ekitaldien galeren eta irabazien kontuetan agertzen dena izanen da. 2023ko negozio-zifra 0 bada, jarduera 2024an hasi duelako, gehieneko puntuazioa esleituko zaio.

1.1.3. Enpresak Nafarroan duen enplegu mugagabearen ehunekoa, 2025eko abenduaren 31n:

1.1.4. Langileen prestakuntza:

Baloratuko da enpresak azken 3 urteetan (2023-2025) prestakuntza sustatu eta egin izana FUNDAE (Enpleguan Prestatzeko Estatuko Fundazioa) bidezko hobari-programaren bidez. Prestakuntza hori tramitatu den urte bakoitzeko bi puntu emanen dira, eta 4 puntu gehienez.

Baloratuko da "Prestakuntza ekintzetarako erabilgarri" atala (lehen txostena bada) edo "Kreditu erabilgarria" atala (bigarren txostena bada) positiboa izatea.

1.1.5. Lanbide Heziketa duala (2 puntu):

Baloratuko da enpresak azken 3 ikasturteetan (2022-2023, 2023-2024, 2024-2025) gutxienez gutxieneko ikasle kopuru bat hartu izana C graduetako (ziurtagiri profesionalak) prestakuntza-praktiketan (praktika ez-laboralak) eta/edo D graduetako, Lantokiko Prestakuntzako edo heziketa dualeko prestakuntza-praktiketan, oinarrizko mailako, erdi mailako edo goi mailako heziketa zikloetakoak:

Laguntzen fitxan adieraziko da non egon behar duten matrikulatuak C eta D mailetako ikasleek ondorio horietarako.

1.1.6. Genero berdintasuna sustatzeko neurri hauetakoren bat hartzea (2 puntu):

a) Aitortzaren edo bereizgarriren bat lortu izana bere langileekin tratu eta aukera berdintasunaren politikak aplikatu dituelako (esate baterako, Berdintasuneko Ministerioaren "Berdintasuna enpresan" deituriko bereizgarria edo NEEZE-Nafarroako Emakume Enpresari eta Zuzendarien Elkartearen "Reconcilia" zigilua, eta abar).

b) Zuzendaritza-postuetan %30, gutxienez, emakumeak izatea. Neurri hori justifikatzeko, enpresak emandako ziurtagiri bat aurkeztu beharko da, non adieraziko baita zuzendaritza-postuetan ari diren emakumeen ehunekoa, onetsitako edo ikuskatutako urteko azken kontuetan jasotako zuzendaritza-postu guztietatik. Modu horretan ezin bada justifikatu, merkataritza erregistroak zuzendaritza-karguei buruz emandako ziurtagiriaren bidez edo, azken buruan, enpresako Zuzendaritza Batzordeak, ahaldundutako pertsonak edo administratzaileak emandako ziurtagiriaren bidez egiaztatuko da.

c) 50 langile baino gutxiago dituen enpresa bada, legez berdintasun plana izatera behartua ez dagoenez, honako hauek baloratuko dira:

–Emakumeen eta gizonen arteko berdintasun plan bat izatea, urriaren 13ko 901/2020 Errege Dekretuaren arabera erregistratua.

–Familia, lana eta bizitza pertsonala bateragarri egiteko neurriak edo berdintasuna sustatzeko beste batzuk aplikatu izana; hori, enpresaren eta langileen ordezkarien artean sinatutako dokumentu baten bidez frogatuko da.

–Laneko sexu-jazarpenari eta sexuan oinarritutako jazarpenari aurrea hartzeko eta aurre egiteko protokolo bat edo neurri espezifikoak onartu edo zabaldu izana; hori aurreko neurrian bezala egiaztatuko da.

1.1.7. Aurreko deialdietan lortutako dirulaguntzak (4 puntu):

Lehentasuna ematen zaie 2021eko, 2022ko eta 2023ko deialdietan emandako laguntza osoa kobratzeko eskubidea galdu ez duten enpresei, bai eta 2023ko, 2024ko eta 2025eko deialdietan laguntzarik jaso ez zuten enpresei ere.

1.2. Ekoizpen ezarpen berria Nafarroan (30 puntu): Honako baldintza hauetakoren bat bete beharko da:

a) 2025eko urtarrilaren 1etik aurrera hastea enpresaren ekoizpen jarduera Nafarroan (baldin eta inbertsio proiektua ez bada ekoizpen ezarpen berritzat hartu aurreko deialdietan).

b) Proiektuaren xedea izatea uholde, sute edo beste natura-hondamendien ondorioz edo enpresaren nahiarekin zerikusirik ez duen istripu batengatik hondatutako nabeak, makinak eta instalazioak berreraikitzea. Kasu horietan, berreraikitako aktiboen aseguru polizek ekarritako ordainketek gehi emandako laguntzak ez dituzte kostuak gaindituko.

Ekoizpen ezarpen berrien kasuak eta egiaztagiriak laguntzen fitxan zehaztuko dira.

2. Inbertsio proiektua baloratzeko irizpideak:

2.1. Proiektua despopulatze-arriskua duten udalerrietan kokatzea: Lurralde Kohesiorako kontseilariaren otsailaren 15eko 8/2023 Foru Aginduaren arabera despopulatze-arriskuan dauden udalerrietan egin beharreko proiektuak baloratuko dira (2023ko 49. Nafarroako Aldizkari Ofiziala, martxoaren 9koa):

Bi udalerri biltzen dituen proiektu bakarra aurkezten bada, bi udalerrien arteko batezbesteko haztatua izanen da puntuazioa, udalerri bakoitzean eskatutako inbertsioak kontuan hartuta.

2.2. 4.1.1 oinarriko c) eta d) letretan sartutako inbertsioen ehunekoa, inbertsio diruz lagungarri osoari dagokionez:

2.3. Trantsizio digitala: Nafarroako Espezializazio Adimentsuaren Estrategiaren (aurrerantzean, S4) trantsizio digitalarekin lerrokatutako inbertsioen ehunekoa, inbertsio diruz lagungarrien guztizko zenbatekoarekin alderatuta:

S4ko trantsizio digitalaren lan-ildoak:

–Sentsibilizazio digitala eta prestakuntza. Trebetasunak gaitzea eta garatzea lanbide eremu bakoitzean.

–Enpresaren estrategia digitala garatzeko eta ezartzeko eta negozio-eredu digitalak sortzeko plangintza egitea eta horretan lagun egitea.

–Hornidura-katearen eta hornitzaileen sarearen/ekosistemaren digitalizazioa: lan aginduen eta biltegien kudeaketa, online salmenta, produktuen trazabilitatea, etab.

–Bezeroarekiko harreman digitala (salmenta, euskarria, etab.) eta serbitizaziorako orientazioa.

–Datuaren ekonomia aprobetxatzea (adimen artifiziala, business intelligence, kontsumo-joerak, etab.), negozio arlo guztietan aplikatuta.

–Telepresentzia sustatzea (telelana, telekudeaketa, telemonitorizazioa, etab.).

–Ekoizpen-lerro autonomoagoak, malguagoak eta informazio sistemekin integratuagoak, fabrikazio teknologia berriak ezarriz.

–Produktuetan/zerbitzuetan funtzionalitate berriak eta datuetan oinarritutako serbitizazio ereduak sartzea. Zibersegurtasuna, biometria eta identitate digitala. Enpresako komunikazioak optimizatzea eta informazioa babestea.

–Simulazio digitala eta prototipogintza azkarra aplikatzea (biki digitalak, errealitate birtuala, errealitate areagotua...) produktuaren diseinu-prozesuetan, ekoizpen lerroetan, mantentze-lanetan, segurtasunean, prestakuntzan eta abarretan, etab.

–Eraikuntza industrializatuaren garapena: teknologia digitalen aplikazioa, robotizazioa, 3D simulazioa, produktu prefabrikatua garatzeko eta eraikuntza-prozesua industrializatzeko.

2.4. Trantsizio ekologikoa: S4ko trantsizio ekologikoarekin bat datozen inbertsioen ehunekoa, guztirako inbertsio diruz lagungarriekin alderatuta:

S4ko trantsizio ekologikoaren lan-ildoak:

–Industria-sinbiosia; balio-katea berregituratzea, sektore bakoitzaren barruko eta sektore desberdinen arteko konexioen bidez, produktuak, azpiproduktuak eta hondakinak aprobetxatzeko.

–Monitorizazio sistemei lotutako serbitizazioan oinarritutako negozio eredu berriak, erabilgarritasun/erabilera/emaitzengatiko ordainketa-ereduak, lankidetza-ekonomia, teknologia digitala txertatzea, IoT, etab.

–Produktuaren bizi-zikloa kontuan hartuko duten eta osasunean eta ingurumenean duten eragina arinduko duten produktuak, osagaiak, ekipoak, ontziak eta banaketa-sistemak diseinatzea.

–Deskarbonizazioa eta ingurumen inpaktua minimizatzea (lehengaiak, ura, energia eta abar murriztea) industria-prozesuetan, ekoizpen teknologia garbiak erabiliz eta ekoizpen jardunbide egokiak aplikatuz.

–Birmanufaktura, hornidura zirkularren erabilera (berriztagarriak, berrerabilgarriak, birziklagarriak, birziklatuak eta biodegradagarriak) eta lehengai kritikoak ordeztea.

–Eraikuntza jasangarria sustatzea: zurezko eraikuntza, birgaitze energetikoa, kontsumo ia nuluko eraikinak, eraikuntza positiboa, etab.

–Hondakinak balorizatzea eta ekoizpen- eta banaketa-prozesuko azpiproduktuak erabiltzea.

2.5. Proiektua zuzenean lerrokatzea S4ren lehentasun tematikoetako batekin:

Puntuazio hori lortzeko, proiektuaren guztirako inbertsioaren %50ek, gutxienez, S4ren lehentasun tematikoetako batekin zuzenean lerrokatuta egon beharko du.

2.6. Inbertsio ahalegina: ratio bat da, inbertsio proiektuaren guztizko kostu diruz lagungarriaren eta 2024ko ekitaldiko urteko kontuetan ageri den negozio-zifraren artekoa.

Puntuazioa (osoko zenbakia) lortutako balioaren %50 izanen da (inbertsio diruz lagungarria / negozio-zifra %), gehienez 20 puntu.

Inbertsio ahalegina = Osoko zk. [(Inbertsio diruz lagungarria/negozio-zifra) % / 2]

1.2 irizpidearen arabera ezarpena berria dela jotzen bada, enpresek 20 puntu lortuko dituzte irizpide honetan.

3. Lortutako puntuazioan berdinketarik bada, honako inguruabar hauek ondoz ondo hartuko dira kontuan hura hausteko:

a) Puntuazio handiagoa lortu izana honako irizpide hauetan:

1. Proiektua S4ra bideratzea (2.3, 2.4 eta 2.5 irizpideen batura).

2. Inbertsio proiektua baloratzeko irizpideak (2. apartatuko irizpideen guztizko puntuazioa).

3. Inbertsio ahalegina (2.6 irizpidea).

b) Eskaera aurkeztu den eguna.

11. oinarria.–Laguntzak ematea.

1. Laguntza hauek norgehiagokako prozeduraren bidez emanen dira. Hartara, aurkeztutako eskaerak konparatuko dira, haien artean lehentasun-hurrenkera bat ezartzeko, aurreko oinarrian ezarritako balorazio irizpideekin bat.

Laguntzen zenbatekoa kalkulatzeko, balorazio handiena eskuratzen duten eskaerei aplikatuko zaie 8. oinarrian ezarritako laguntza-intentsitatea, deialdi honetan aurrekontu ekitaldi bakoitzerako erabilgarri dagoen kreditua agortu arte. Aurrekontua aski ez izateagatik ezin bete diren eskaerak ezetsi eginen dira.

2. Industria Sustatzeko Zerbitzuak, laguntzak kudeatzen dituen organoa den aldetik, laguntzak emateko proposamena eginen du, eta bertan adieraziko du onuradunek laguntzak hartzeko behar diren baldintza guztiak betetzen dituztela.

Eskaerak ebaluatu bitartean, organo kudeatzaileak zilegi izanen du beharrezko jotzen dituen egiaztapen jarduketak egitea, eta beharrezko jotzen duen nahi beste informazio osagarri edo argigarri eskatzen ahalko die eskatzaileei, eta ohartaraziko die ezen, ez badiote egindako errekerimenduari 10 egun balioduneko epean erantzuten, aurkeztutako dokumentazioaren arabera ebatziko dela laguntza ematearen gainean.

3. Enpresen Sustapenerako eta Azpiegituretako zuzendari nagusiak ebatziko du laguntzen deialdia. Laguntzak emateko eta ukatzeko ebazpena sei hilabeteko epean eman eta jakinaraziko zaie eskatzaileei, eskaerak aurkezteko epea (9. oinarrian) amaitzen denetik zenbatzen hasita.

Ezarritako epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago dirulaguntzak onartu edo ukatzeko berariazko ebazpena ematera eta jakinaraztera, oinarri hauetan xedatutakoari jarraikiz.

4. Emakida osagarriak:

Baldin eta laguntza esleitu ondoren deklaratzen bada hura kobratzeko eskubidea galdu dela edo onuradunen batek laguntzari uko egiten badio eta, horren ondorioz, nahikoa kreditu askatzen bada, diru hori erabiltzen ahalko da behar adina aurrekontu ez egoteagatik hasiera batean osorik edo partez ezetsi ziren eskaerei erantzuteko, 1. atalean ezarritako lehentasun hurrenkerari jarraikiz.

Horretarako, 2. oinarrian ezarritako onuradun izateko baldintzak betetzen direla egiaztatzeko behar den informazioa eskatuko zaio enpresari.

Laguntzak emateko ebazpen osagarrian epe berri bat ezartzen ahalko da inbertsioak gauzatu eta justifikatzeko. Era berean, epe bat ezarriko da enpresa onuradunak 12.4 oinarrian aipatzen diren ez-gauzatzeen berri eman ahal izan dezan.

12. oinarria.–Diruz lagundutako inbertsio proiektua aldatzea eta ez-gauzatzeak jakinaraztea.

1. Inbertsio proiektuaren aldaketa hauek baimentzen ahalko dira, baina ez dute inola ere handituko emandako laguntza:

a) Inbertsio proiektuaren kokalekua Nafarroako beste udalerri batera aldatzea.

b) 4. oinarrian eskatutako baldintzak betetzen dituzten inbertsio berriak sartzea kostu diruz lagungarrietan. Horiek baimentzeko, inbertsio horien memoria aurkeztu beharko da, laguntzen fitxan eskuragarri dagoen ereduaren arabera.

c) Inbertsio baten unitate kopurua aldatzea, gorantz edo beherantz.

d) Inbertsioak aurreikusitakoa baino kostu txikiagoan edo handiagoan eskuratzea.

e) Inbertsioak ez gauzatzea (laguntza emateko ebazpenean onartutako inbertsioak ez egitea).

Aldaketa horiek egiteko baimena 13. oinarrian aurreikusitako inbertsioen justifikazioa aurkezteko unean eskatu beharko da, e) letraren aldaketa izan ezik, hori 2. atalean ezarritakoari lotuko baitzaio.

Dirulaguntzen organo kudeatzaileak edo, hala badagokio, dirulaguntza ematen duen organoak baimendu beharko du aldaketa, dirulaguntza ordaintzeko unean.

2. Proiektuaren ez-gauzatzeen jakinarazpena (e letraren aldaketa).

Onuradunak 2027ko abenduaren 31 baino lehen jakinarazi beharko ditu gauzatuko ez dituen edo kostu txikiagoarekin eginen dituen inbertsioak, inbertsio berriekin ordeztuko ez direnak. Jakinarazpen hori laguntzen fitxan eskuragarri dagoen formularioaren bidez eginen da.

Jakinarazpen horrek saihestuko du enpresari 15.2 oinarrian aurreikusitako zigorra aplikatzea, hots, proiektua ez gauzatzeagatik ezarri beharrekoa.

Ez da ez-gauzatzetzat jotzen eskaeran sartutako inbertsioak ezabatzea laguntzak emateko ebazpena baino lehen, baina, nolanahi ere, laguntzen fitxaren bidez jakinarazi behar da.

3. Honako kasu hauetan, aldaketek laguntza kobratzeko eskubidea galtzea ekarriko dute:

a) Proiektuari 10. oinarriari jarraikiz emandako puntuazioa birkalkulatu ondotik, egiaztatzen bada ez dela iristen 11.1 oinarriko lehentasun-hurrenkeran onuradun izateko behar den gutxienekora.

b) Aldatu eta justifikatu ondoren inbertsio-proiektu diruz lagungarriaren zenbatekoa iristen ez bada 3.c) oinarrian eskatutako gutxienekora.

c) 2. atalean adierazitako moduan jakinarazten bada inbertsioak ez direla gauzatu edo kostu txikiagoarekin gauzatu direla. Kasu horretan, inbertsio horiei dagokien laguntza kobratzeko eskubidea galdu dela deklaratuko da.

13. oinarria.–Egindako inbertsioen justifikazioa.

1. Onuradunek laguntzen fitxaren bitartez aurkeztu beharko dute gauzatutako inbertsioen justifikazioa. Horretarako epea hasiko da laguntza emateko ebazpena jakinarazten den egunean, eta 2028ko ekainaren 30ean bukatuko da (egun hori barne), salbu eta 14.4 oinarrian adierazitako prozedura espezifikoaren kasuan.

2. Agiri hauek aurkeztu beharko dira:

a) Laguntza ordaindu aurreko erantzukizunpeko adierazpena, laguntzen fitxan eskuragarri dagoen ereduaren arabera.

b) Diruz lagundutako inbertsioen zerrenda, Excelen: onartutako inbertsioen Excel fitxategia laguntzak kudeatzen dituen organoak bidaliko du, onuradunek behar bezala bete dezaten.

c) Inbertsioen fakturak eta ordainagiriak, proiektua gauzatzeko aldikoak.

d) Laguntza emateko ebazpenean onetsitako proiektuari dagokionez izan diren desbideratzeen memoria xehea eta arrazoitua.

e) Ibilgetuaren liburu handiak (2. taldea), zeinetan inbertsioak kontabilizatu baitira.

f) 2. taldeko batura eta saldoen balantze osoa (amortizazio kontuak barne), ahalik eta xehakatuen, 2026 eta 2027ko ekitaldien abenduaren 31n eta 2027ko abenduaren 31ren ostean eskuragarri dagoen azken egunean.

g) Itxitako azken bi zerga-ekitaldietako urteko kontu erregistratuak (auditatuak, beharturik egonez gero).

h) Hornitzailearen hautaketari buruzko egiaztagiriak, 5. oinarrian ezarritakoarekin bat.

i) Laguntzaren zenbatekoa 60.000 eurotik beherakoa bada: Egindako inbertsioen eta, hala badagokio, haien identifikazio-plaken argazkiak, hargatik eragotzi gabe organo kudeatzaileak erabakitzea 14.2 oinarrian ezarritako egiaztapen bisita egin behar dela.

j) Lursailak eta ondasun higiezinak erosi badira: salerosketaren eskritura eta behar bezala akreditatutako eta dagokion erregistro ofizialean inskribatutako tasazio independentea, edo behar bezala baimendutako erakunde publikoarena. Tasazio hori ez da beharrezkoa izanen nahitaez desjabetutako eskuratzeen kasuan, edo konkurtso-prozesu batean eskuratzen badira, prezioa ezartzeko araudi espezifikoko prozedura betetzen bada. Halaber, ondasun higiezinak eskuratuz gero, ondare-eskualdaketen eta egintza juridiko dokumentatuen gaineko zergari dagokien likidazioa aurkeztu beharko da, non adierazi beharko baita eskuratzearen zenbatekoarekiko adostasuna.

k) Obra zibileko proiektuen kasuan: obra amaierako ziurtagiria, udaleko sarrera-erregistroarekin, eta obra-lizentzia.

l) Bigarren eskuko ekipamendu-ondasunak eskuratuz gero: ondasunen jatorriari buruzko alderdi saltzailearen adierazpena, non aditzera emanen baitu ondasun horiek ez direla izan Espainiako edo Europako ezein dirulaguntzaren xede, eta tasazio-ziurtagiri independentea.

m) Inbertsioak finantza-errentamenduaren bidez finantzatzen badira: finantza-errentamenduaren kontratua, inbertsioaren hornitzailearen faktura, erosteko aukera erabiltzeko konpromiso irmoa, eragiketaren BEZa aldez aurretik ordaindu izanaren ordainagiria eta sorrarazitako lehen eta azken kuoten ordainagiriak.

3. Justifikazioa egiten bada oinarri honetan ezarritako epea bukatu ondoren, baina, betiere, hurrengo 10 egun balioduneko epearen barnean, kobratu beharreko dirulaguntza %5 murriztuko da. Denbora gehiago igaro bada, deklaratuko da galdu dela laguntza kobratzeko eskubidea. 11.4 oinarriaren arabera diruz laguntzen diren proiektuen kasuan, haientzako beste gauzatze- eta justifikazio-epe bat ezartzen bada, laguntza emateko ebazpenean xedatutakoari jarraituko zaio.

Dirulaguntza justifikatzeko betebeharra ez bada betetzen edo justifikazioa nahikoa ez bada, laguntza kobratzeko eskubidea galduko da edo laguntzaren zenbatekoa doituko da, zein den kasua.

14. oinarria.–Dirulaguntza ordaintzea.

1. Dirulaguntzak kudeatzen dituen organoak onuradunek aurkeztutako justifikazioa aztertu eta ordaindu beharreko laguntzaren zenbatekoa zehaztuko du. Horretarako, onuradunei eskatzen ahalko die beharrezko jotzen duen informazio osagarri eta argigarri guztia, eta adieraziko die ezen, ez badiote errekerimendu hori erantzuten 10 egun balioduneko epean, aurkeztutako dokumentazioarekin ebatziko duela laguntzaren ordainketa.

2. Dirulaguntzak 60.000 eurotik gorakoak baldin badira, laguntzen organo kudeatzaileak inbertsioaren egiaztapen materiala egin beharko du ordainketa egin aurretik. Horretarako, bisita bat eginen da inbertsioak egin diren enpresaren establezimendura, eta bisita hori egiaztapen txosten batean jasoko da.

Une horretan enpresaren establezimenduan ez dauden inbertsio elementuei dagokien dirulaguntza ez da ordainduko.

3. Laguntzak kudeatzen dituen organoak Enpresen Sustapenerako eta Azpiegituretako zuzendari nagusiari igorriko dio ordainketa proposamena, non adieraziko baitu onuradunak bete dituela bai dirulaguntzaren xede ziren helburuak, bai dirulaguntza kobratzeko eskubidea ematen dioten baldintzak.

Ordaintzeko ebazpena inbertsioen justifikazioa aurkeztu ondoko sei hilabetean emanen da.

4. 6.3 oinarriaren arabera gauzatzeko epea luzatzea baimentzen zaien proiektuen kasuan edo, hala badagokio, 11.4 oinarriaren arabera diruz laguntzen diren proiektuen kasuan, laguntzak ordaintzeko prozedura honako hau izanen da:

a) 13.2 oinarriko justifikazio-dokumentazioa proiektua gauzatzeko epealdia luzatzen duen ebazpenean edo dirulaguntza ematen duen ebazpenean adierazten den epealdian aurkeztu beharko da, kasuan kasukoa. Dokumentazioa aurkeztu ondoren, 2028ko abenduaren 31 baino lehen emanen den ebazpenaren bidez, laguntzaren konturako ordainketa egiteko agindua emanen da, justifikatutako inbertsioei dagokiena, eta deklaratuko da justifikatu ez diren inbertsioei dagokien laguntza kobratzeko eskubidea galdu dela.

b) 2029ko ekainaren 30a baino lehen, aipatutako justifikazioa aztertu eta bidezko egiaztapenak egin ondoren, konturako ordainketa likidatzeko ebazpena emanen da.

Ebazpen horretan adieraziko da onuradunek bete dituztela dirulaguntza kobratzeko eskubidea ematen duten betebeharrak, eta laguntzaren azken zenbatekoa zehaztuko da. Egindako konturako ordainketa baino txikiagoa bada, aldea eta dagozkion berandutze-interesak itzuli beharko dira.

15. oinarria.–Onuradunen betebeharrak.

1. Onuradunek betebehar hauek bete beharko dituzte:

a) Dirulaguntza ematen dela jakinarazi eta hilabeteko epean, dirulaguntzen onuradunek gardentasun betebeharrari buruzko adierazpena aurkeztu beharko dute telematikoki, laguntzen fitxaren bidez. Adierazpen hori beti aurkeztu behar da, gardentasun betebeharra izan (Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluko baldintzak betetzeagatik) edo ez izan (kasu horretan, inguruabar hori jasoko da adierazpenean).

Aipatutako epea amaituta, laguntzak kudeatzen dituen organoak egiaztatuko du gardentasun betebeharra duten enpresetatik zeinek ez duen aurkeztu adierazpena. Enpresa horiei 10 egun balioduneko epea emanen zaie aipatutako foru legearen 12.4 artikuluan eskatzen den dokumentazioa aurkezteko, eta emandako dirulaguntzaren %5eko penalizazioa ezarriko zaie. Dokumentazio hori epean aurkezten ez bada, deklaratuko da emandako dirulaguntza kobratzeko eskubidea galdu dela.

b) Inbertsio-proiektua gauzatzea oinarri arauemaileotan ezarritako epean.

c) Gauzatutako inbertsioak justifikatzea 13. oinarrian aurreikusitako moduan.

d) Inbertsioak enpresaren ibilgetuan kontabilizatzea.

e) Diruz lagundutako inbertsioak enpresaren jarduera ekonomikoari atxikita mantentzea, zazpi urtez bederen erregistro publiko batean inskribatzen ahal diren ondasunen kasuan, eta hiru urtez gainerako ondasunen kasuan, inbertsioak amaitzen direnetik aurrera.

Dirulaguntzei buruzko Foru Legearen 28.5 artikuluan aipatutako kasuetan ez da betegabetzat joko xedearen betebeharra.

f) Industria Sustatzeko Zerbitzuari baimena eskatzea aurreko letran adierazitako epean dirulaguntzaren xedeko ondasunen destinoa edo karga aldatzen bada edo ondasunak besterentzen badira.

g) Konpromisoa hartzea enpresa ez deslokalizatzeko, Enpresen sustraitzearen aldeko eta enpresen deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezartzen denarekin bat, eta deslokalizatzen bada, jasotako laguntza itzultzeko konpromisoa, arau horretan ezarritako moduan.

h) Behar bezalako publizitatea egitea inbertsio proiektuaren finantzaketari buruz, enpresaren webgunean, ikusteko moduko toki batean, honako esaldi hau jarriz: "‘xxx’ inbertsio proiektuak Nafarroako Gobernuaren dirulaguntza jaso du, industriako ETEen inbertsioetarako laguntzen 2026ko dirulaguntza deialdiaren bitartez". Betebehar hau nahitaez bete behar da dirulaguntzaren ordainketa egin dadin.

i) Proiektuari lotutako egiaztagiri guztiak lau urtez gordetzea, laguntza ordaintzen den urteko abenduaren 31tik aitzina.

j) 30.000 eurotik gorako laguntzen onuradunek, dirulaguntza eman zaiela jakinarazten zaienetik hilabeteko epean, abenduaren 29ko 3/2004 Legean ezarritako ordainketa-epeak betetzen dituztela egiaztatzen duten agiriak aurkeztu beharko dituzte, zeinak 2.4 oinarrian adierazten baitira, betiere laguntzak eskatzeko unean aurkezten ez badituzte.

k) Diruz lagundutako inbertsioak finantzatzeko lortutako beste dirulaguntza, laguntza, diru-sarrera edo baliabideen berri ematea organo emaileari. Jakin bezain laster eman beharko da horren berri eta, betiere, proiektua gauzatu dela justifikatu baino lehen.

l) Energia aurrezpenaren ziurtagirien sistema bidez diru-sarrerarik lortu bada diruz lagundutako inbertsio-elementuren baterako, horren berri ematea laguntzak ematen dituen organoari, egiazta dezan diru-sarrera horiek eta laguntza (onartutakoa edo ordaindutakoa), osotara, ez dutela gainditzen diruz lagundutako zenbatekoaren %100, 16. oinarrian adierazi bezala. Jakinarazpen hori jakin bezain laster egin beharko da, dela proiektua gauzatu aurretik, dela ondoren.

m) Dirulaguntzei buruzko Foru Legearen 9. artikuluan ezarritako betebehar orokorrak.

2. Oinarri arautzaile hauetan edo Dirulaguntzei buruzko Foru Legean ezarritako betebeharren bat bete ezean, onartutako dirulaguntza jasotzeko eskubidea galduko da, edo, hala badagokio, diru hori itzuli beharko da, foru lege horren 35. artikuluan xedatutakoarekin bat. Hala ere, enpresa-deslokalizazioa gertatuz gero, 18/2020 Foru Legearen 7. artikuluan ezarritako baldintzen arabera itzuliko da dirulaguntza.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa doitzen ahalko da proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.

Zehazki, honako penalizazio hauek ezartzen dira proiektuak %75etik beherako gauzatze-maila badu (hori da dagokion dirulaguntzaren zenbatekoa kobratu ahal izateko baimenduta dagoena):

a) Gauzatze-maila %50 edo handiagoa eta %75 baino txikiagoa bada, %25eko penalizazioa aplikatuko zaio ordaindu beharreko laguntzaren zenbatekoari.

b) Gauzatze-maila %50etik beherakoa bada, deklaratuko da galdu dela emandako dirulaguntza osoa kobratzeko eskubidea.

Proiektuaren gauzatze-maila kalkulatzeko, gauzatutako inbertsioen zenbatekoa (emakidaren ebazpenean onetsitakoak gehi baimendutako aldaketak) zatituko da laguntzak emateko ebazpenean onetsitako aurrekontuarekin. 12.2 oinarriaren arabera ez-gauzatzeak jakinarazi badira, laguntza emateko ebazpenean onetsitako aurrekontua murriztu eginen da, proiektuaren gauzatze-maila kalkulatzeko.

16. oinarria.–Dirulaguntzaren bateragarritasuna eta metaketa arauak.

1. Deialdi honetako dirulaguntzak bateragarriak dira gastu beretarako emandako beste dirulaguntza batzuekin, emaileak izanik Nafarroako Foru Komunitateko Administrazioa, beste administrazio publiko batzuk, beste erakunde publiko nahiz pribatu batzuk edo partikularrak, nazionalak nahiz atzerrikoak.

Kasu horretan, Batzordearen 2014ko ekainaren 17ko 651/2014 (EB) Erregelamenduaren 8. artikuluan ezarritako metaketa arauak izanen dira aplikatzekoak: Laguntza hauek metagarriak dira diruz laguntzen ahal diren bestelako kostu identifikagarriei erantzuten dietenekin, edo kostu diruz lagungarri berberei osorik edo partez erantzuten dietenekin baldin eta metaketak ez badu gainditzen laguntzaren intentsitatea edo aipatu erregelamenduak kategoria bakoitzerako xedatutakoaren arabera aplikatu daitekeen laguntza zenbatekorik handiena.

2. Betiere, jarduera bererako emandako dirulaguntzen zenbatekoak, bakarrik edo denak baturik, ezin izanen du gainditu onuradunak egin beharreko jardueraren kostua.

3. Bereziki, enpresak, proiektua gauzatu ondorengo hiru urteetan, diru-sarrerak jaso baditu edo jasotzen baditu energia aurrezpenaren ziurtagirien sistema bidez deialdi honek diruz lagundutako inbertsioren baterako, diru-sarrera horien eta emandako laguntzaren baturak ezin izanen du gainditu diruz lagundutako ondasunen kostua. Gaindituz gero, itzuli beharko da inbertsio horien kostuaren %100 gainditzen duen dirulaguntzaren zenbatekoa (gehienez ere deialdi honetan emandako edo ordaindutako dirulaguntzaren zenbateko osoa).

17. oinarria.–Jakinarazteko betebeharretik salbuetsitako laguntza araubidea.

1. Laguntzen araubide hau salbuetsita dago jakinarazteko betebeharretik (Europar Batasunaren Funtzionamenduari buruzko Tratatuaren 108. artikuluaren 3. apartatuan ezarria), betetzen baititu Batzordearen 2014ko ekainaren 17ko 651/2014 (EB) Erregelamenduaren I. kapituluan eta III. kapituluaren 17. artikuluan (ETEen aldeko inbertsiorako laguntzak) ezarritako baldintzak, zeinak barne-merkatuarekin bateragarriak diren laguntzen kategoria batzuk ezartzen baititu, Tratatuaren 107. eta 108 artikuluak aplikatuz (2014ko L187. Europar Batasunaren Aldizkari Ofiziala, ekainaren 26koa). Erregelamendu horren aplikazio aldia 2026ko abenduaren 31ra arte luzatu da Batzordearen 2023ko ekainaren 23ko 2023/1315 (EB) Erregelamenduaren bidez (2023ko L 167/1 Europar Batasunaren Aldizkari Ofiziala, ekainaren 30ekoa).

2. Halaber, laguntzen araubide hau salbuetsita dago jakinarazteko betebeharretik, Batzordearen 2022/2473 (EB) Erregelamenduaren I. kapituluan eta 46. artikuluan (Arrantzaren eta akuikulturaren produktuak eraldatzeko laguntzak) ezarritako baldintzak betetzen dituelako. Erregelamendu horrek (2022ko L327. Europar Batasunaren Aldizkari Ofizialean, abenduaren 21ekoan argitaratua) barne merkatuarekin bateragarriak diren laguntza kategoria batzuk ezartzen ditu, arrantzaren eta akuikulturaren produktuak ekoizten, eraldatzen eta merkaturatzen dituzten enpresentzat, Tratatuaren 107. eta 108. artikuluak aplikatuta.

Aipatu erregelamenduaren 4.2 artikuluan ezartzen denarekin bat, emate aldian laguntzen onuradunek bete beharko dituzte arrantza politika komunaren arauak, eta aipatu aldian ikusten bada ez direla arau horiek betetzen, dirulaguntzak itzuli beharko dira, ez-betetzearen larritasunaren proportzioan.

18. oinarria.–Bitarteko elektronikoen bidezko harremanak.

Laguntzen eskaera eta erantsi beharreko dokumentazio guztia telematika bidez aurkeztuko dira Nafarroako Foru Komunitateko Administrazioaren Erregistro Orokor Elektronikoan, laguntzen fitxaren bidez, Nafarroako Gobernuak Interneten duen Atariko Tramiteen Katalogoaren barnean (www.nafarroa.eus).

Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak enpresa eskatzaileen gaitutako helbide elektroniko bakarraren (GHEb) bidez eginen dira. Jakinarazpen edo komunikazio horren bidalketaren berri emanen da eskatzaileak jarritako helbide elektronikoaren bitartez.

19. oinarria.–Emandako dirulaguntzen publizitatea.

Industria Sustatzeko Zerbitzuak jendaurrean jarriko ditu emandako dirulaguntzak Ogasuneko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein programari eta aurrekontu kredituri egotzi zaion, onuradunak, emandako diru kopurua eta dirulaguntzen helburua.

20. oinarria.–Datu pertsonalen babesa.

Datuak babesteko indarrean dagoen araudiaren arabera, Industriako eta Enpresen Trantsizio Ekologiko eta Digitalerako Departamentuak tratatuko ditu datu pertsonalak, deialdi honetako laguntza-ematea, kudeaketa, jarraipena eta kontrola egiteko.

Datu pertsonalak babesteko eskubideak departamentu horretan baliatzen ahal dira, laguntzen fitxan adierazitako moduan.

21. oinarria.–Oinarri arautzaileen aurkako errekurtsoa.

Interesdunek gora jotzeko errekurtsoa jartzen ahal dute oinarri arautzaileen aurka, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik.

Iragarkiaren kodea: F2517138