Iragarkia

106. ALDIZKARIA - 2026ko ekainaren 2a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

93C/2026 EBAZPENA, maiatzaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Nuestra Señora de la Caridad ospitalea enpresaren hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

Aztertu da Nuestra Señora de la Caridad ospitalea enpresak aurkeztutako hitzarmen kolektiboaren testua (kodea: 31003782011999), 2025eko azaroaren 10ean sartu zena erregistro honetan eta 2025eko urriaren 20an sinatu zutena enpresaren ordezkariek eta sindikatuen ordezkariek.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuan xedatutakoa kontuan hartuta,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Nuestra Señora de la Caridad ospitalea enpresak aurkeztutako hitzarmen kolektiboa (kode-zenbakia: 31003782011999).

Bigarrena.–Nafarroako Aldizkari Ofizialean argitara dadila agintzea, orok jakin dezan.

Iruñean, 2026ko maiatzaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

NUESTRA SEÑORA DE LA CARIDAD OSPITALEA ENPRESAREN HITZARMEN KOLEKTIBOA 2023-2025

Tafallan, 2024ko maiatzaren 27an.

1. artikulua. Negoziazio alderdiak. Pertsona eremua eta eremu funtzionala.

Lan-hitzarmen kolektibo hau Nuestra Señora de la Caridad ospitalea enpresako ordezkariaren eta enpresari atxikitako langileen legezko ordezkaritzaren arteko negoziazioaren eta akordioaren emaitza da. Batzordea honako hauek osatzen dute: Alizia Cabezón (ELA), Gabriela Muñoz (ELA) Izaskun Irigoyen (CCOO), Amaia Condón (LAB) eta Ezkioga Santamaria (LAB).

Hitzarmen kolektibo honek Tafallako Nuestra Señora de la Caridad ospitalean zerbitzu ematen duten langileen lan baldintzak arautzen ditu, langile finkoenak zein behin-behinekoenak, dependentzia egoeran dauden pertsonak artatzeko eta autonomia funtzionala sustatzeko zerbitzuen sektorearen baitan (egoitzak).

2. artikulua. Lurralde eremua.

Hitzarmen honek Tafallako Nuestra Señora de la Caridad ospitalea fundazioan izanen du indarra.

3. artikulua. Denbora-eremua.

Enpresako hitzarmen kolektibo honek Nafarroako Aldizkari Ofizialean argitaratu eta biharamunean hartuko du indarra, harik eta itundu den indarraldia bukatu arte; salbuespenak dira beste indarraldi baterako espres adostu diren arauak eta baldintzak.

Horrenbestez, hitzarmen kolektibo honek 2023ko urtarrilaren 1etik 2025eko abenduaren 31 arte indarraldia izatea adostu dute alderdiek.

Langileen Estatutuaren 86.2 artikuluan ezarritakoaren ondorioetarako, hitzarmen kolektibo honen indarraldia bukatzen den egunetik salatutzat joko da.

Indarraldia bukatuta, hitzarmen kolektibo honek aurreraeragina izanen du mugarik gabe, hura berritzen duen hitzarmenak ordezten duen arte. Hitzarmen kolektibo honen aurreraeraginak dirauen bitartean, luzatu eginen da hitzarmenean jasotako xedapen guztien aplikazioa, konbentzio edo arau izaera duten xedapenak barne.

Hitzarmen hau sinatu duten alderdiek xedatzen dute ezen, aplikatu beharreko sektoreko hitzarmen kolektibo berri batek enpresa hitzarmen honen baldintzak hobetzen baditu, nahiz eta Langileen Estatutuaren 84.2 artikuluan adierazitako gaiak izan, hitzarmen sektoriala aplikatuko dela hobetutako gaietan.

Enpresa hitzarmen honetan arautzen ez diren gai guztietarako, alderdiek sektoreko hitzarmen probintzialera joko dute ordezko gisa aplikatzeko; horrelakorik egon ezean, estatuko hitzarmenera joko dute, nahiz eta horrek hasierako indarraldia galduta izan.

4. artikulua. Ondorioak.

Alderdiek adostu dutenez, hitzarmen honetan itundutako baldintzek multzo zatiezina osatzen dute; beraz, ez dago arauetako bat edo batzuk bakarrik aplikatzerik, gainerakoak baztertuta.

Hitzarmen honetako ordainsariek eta gainerako baldintzek erabat deuseztatzen dituzte aurreko baldintza guztiak, beste hitzarmen kolektibo baten, arau, itun edo banaka aitortutako beste edozein baldintza baten ondorio direnak, kobratzen ahal diren lansarien eta lanez kanpoko sarien jatorria edozein izanik ere. Beraz, hitzarmen honetan ezarritako sariak geldituko dira soilik, eta ezin izanen dira beste batzuk ezarri, zeren haiek lehendik daudenak edo etorkizunean izan daitezkeenak konpentsatu eta irensten baitituzte. Nominak horien arabera eguneratuko dira.

5. artikulua. Lanaren antolaketa.

Lanaren antolaketa tekniko eta praktikoa ospitaleko zuzendaritzari dagokio, indarra duten legezko xedapenen arabera.

Zentroko zuzendaritzak langileen urteko lan egutegiak prestatu eta entregatu beharko ditu aurreko urteko abenduaren 1erako.

Lan egutegia urtarrilaren 1etik abenduaren 31ra aplikatuko da urtero.

Horretarako, lanerako metodo eta prozesuak baloratu, arrazionalizatu eta hobetzeko sistemak eta zerbitzu bikaina (nolakoari eta zenbatekoari dagokienez) emateko plantilla, lantalde eta langileen arteko harremanak ezartzen ahalko dira. Lanpostuak gehitu edo aldatzen ahalko dira, baita beharrezko aldaketak egin ere laneko denboraren okupazioa egokia izan dadin; halaber, langileen eginkizunetan eta mugikortasunean, eta beharrezkotzat jotzen diren lan metodo berriak egokitu, abiaburutzat hartuta jarduera guztiak zahar-egoitzaren eta bertan bizi direnen beharren arabera garatu behar direla.

Lan baldintzetan funtsezko edozein aldaketa egiteko, langilearekin eta ordezkaritza sindikalarekin adostu beharko da.

6. artikulua. Kategoria handiagoko edo txikiagoko lanak.

1.–Aparteko eta ezinbesteko beharrei erantzuteko eginen dira kategoria handiagoko lanak; beraz, ezinbesteko denbora baino ez du iraunen, eta ez da inoiz bost hilabete baino gehiagokoa izanen urtean, ezta zazpi baino gehiagokoa ere, bi urtean.

2.–Lanpostu berriak ordainsari handiagoa badu, langileak lanpostu berriari dagokion ordainsaria jasotzeko eskubidea izanen du. Kategoria handiagoko lan batean aritze hutsak ez du inoiz finkatuko goragoko soldata, ez eta kategoria ere.

3.–Premia larriak edo aurreikusi ezin direnak direla eta, ospitaleak langile bati ordainsari txikiagoko lanpostu bati dagozkion zereginak esleitu beharra izaten badu, zilegi izanen du hala egitea, gehienez ere urtebetez, eta mantendu eginen dira atxikita dituen taldeko eta lanpostuko ordainsaria eta gainerako eskubideak, eta horren berri emanen zaie langileen ordezkariei; hori guztia, Langileen Estatutuaren 41. artikuluan ezarritakoa galarazi gabe.

7. artikulua. Lanbide Heziketa.

1.–Hitzarmen honen esparruko langileei ikasketak egiteko erraztasunak emanen zaizkie, titulu akademikoa edo profesionala eskura dezaten, orobat, lanbide prestakuntzako ikastaroetara joateko, lanbide hobekuntzako ikastaroak egiteko, eta lanbide birmoldaketarako eta gaikuntzarako ikastaroak egiteko.

2.–Ikasketa akademikoak eta lanbide prestakuntza edo hobekuntza arlokoak egiten ari diren langileek lehentasuna izanen dute oporrak eta lan txandak aukeratzeko, baita lanaldi arrunta egokitzeko ere ikastaroetara joan ahal daitezen, laneko premiak eta antolaketak horretarako bide ematen duten neurrian.

3.–Zentroko lanak egokitze eta hobetze aldera antolatzen diren ikastaroetan langileek emandako denbora benetako lanalditzat joko da.

4.–Lanbide prestakuntza, birmoldatze eta gaikuntzako ikastaroen gastuak (matrikula, egonaldia eta kilometrajea) diruz lagunduko dira, ikastarook enpresaren irizpideen eta beharren arabera gauzatu baldin badira.

8. artikulua. Lanbide kategoriak eta probaldia.

Lanbide kategoria bakoitzean kategoria horren arabera dagozkion eginkizunak bete beharko dira. Edonola ere, egoitzako edozein langilek isilpean gorde beharko ditu erabiltzaileek jasaten dituzten prozesu patologikoak, bai eta haien intimitateari buruzko edozein gai ere, edo pertsona fisikoen datuak babesteari buruzko legerian jasota dagoena, DBLO betez.

–Probaldiak.

Zuzendaritza: 6 hilabete.

OLT/EUDak: 6 hilabete.

Beste unibertsitate-gradu batzuk: 3 hilabete.

Gerokultoreak eta antzeko kategoriak: 30 lanegun.

Garbitzaileak eta antzeko kategoriak: 15 lanegun.

1. taldea. Zuzendaritza.

2. taldea. Unibertsitateko titulazioa.

3. taldea. Goi mailako Lanbide Heziketa.

4. taldea. Erdi mailako Lanbide Heziketa. Gerokultoreak, zaintzaileak, erizaintzako laguntzaileak, laguntzaile soziosanitarioak. Sukaldariak, mantentze-lanetako langileak. 5. taldea. Kualifikaziorik edo titulazio homologaturik ez duten langileak. Garbitzaileak, ikuztegiko langileak, zerbitzu orokorretako langileak, sukaldeko laguntzaileak, mantentze-lanetako laguntzaileak.

–1. taldea. Zuzendaria, goi mailako tituludunak eta espezialistak.

Zuzendaria, kudeatzailea, administratzailea:

Enpresaren edo zentroaren jardunari dagozkion jarduerak planifikatu, antolatu, zuzendu eta koordinatzen ditu.

Zeregin tekniko konplexuak eta heterogeneoak betetzen ditu, helburu global zehaztuekin eta autonomia, ekimen eta erantzukizun maila handiarekin. Haren eginkizunek berekin dakarte unitate funtzional bereko lankide talde baten eginkizunak integratu, koordinatu eta gainbegiratzea.

Bere eginkizunak betetzeko eskatzen den titulazioa edo esperientzia izanen du, indarreko araudian araututakoaren arabera.

–2. taldea. Unibertsitateko tituludunak.

Psikologoa:

Dagokion titulua eta lanbidean aritzeko legezko gaitasuna dituen langilea da.

Jarraian zehazten diren eginkizunak beteko ditu, baita hari eskatu eta haiekin eta/edo bere titulazioarekin eta gaitasun profesionalarekin zerikusia dutenak ere:

• Banako zein taldeko tratamendu psikoterapeutikoak egitea erabiltzaile guztiei.
• Egiten den tratamenduaren aplikazioaren jarraipena eta ebaluazioa egitea.
• Diziplinarteko taldearekin parte hartzea erabiltzaileen balorazio psikologikoak egiten eta behar duten arreta ematen.
• Estimulazio kognitiboaren programa gauzatzea.
• Sustapen lana egitea, egoiliarrak egoitzako eta inguruneko bizitzan integratu daitezen eta parte har dezaten.
• Talde teknikoko kide den aldetik, parte-hartze aktiboa izanen du pertsona erdigunean jartzen duen arreta integraleko eredua ezartzen, lan-metodologia gidatuko du, zerbitzuan etengabeko prestakuntza-jardueretan parte hartuko du, zaintza humanizatzeko programak garatuko ditu, eta egoiliarrekin eta haien familiekin etengabeko harremana izanen du, besteak beste.
• Garapen komunitarioko programa orotan parte hartuko du, egoitzaren eremuaren barruan zein kanpoan.
• Zuzendariak agintzen dion beste edozein eginkizun sozioasistentzial.

Erizaina:

Dagokion titulua eta lanbidean aritzeko legezko gaitasuna dituen langilea da.

Jarraian zehazten diren eginkizunak beteko ditu, baita hari eskatu eta haiekin eta/edo bere titulazioarekin eta gaitasun profesionalarekin zerikusia dutenak ere:

• Zenbait egoeratan, eta enpresak eskatzen badu, profesional honek koordinatu eta gainbegiratzen ahalko ditu erabiltzaileen zainketa eta arreta planean aurreikusten diren zainketak, betiere bere eremu funtzionalaren barnean baldin badaude.
• Erabiltzaileak eta haien giza eta osasun behar orokorrak zaindu eta artatzea, batik bat haren zerbitzuen beharra dutenean.
• Botikak prestatu eta ematea sendagileen aginduen arabera (tratamenduak zehazki).
• Odol-presioa, pultsu-maiztasuna eta tenperatura neurtzea.
• Sendagileei laguntzea erabili beharreko materiala eta medikamentuak prestatzen.
• Historia klinikoak ordenatzea, jaso beharreko funtzioarekin lotutako datuak idaztea.
• Gaixotasunagatik oheratutako erabiltzaileari laguntzea, agindutako aldaketa posturalak eginez, gaixoentzako otorduen zerbitzua kontrolatuz eta hura pazienteei zuzenean emanez jateak instrumentalizazioa behar duenean (zunda nasogastrikoa, zunda gastrikoa, etab.).
• Kolostomizatutako erabiltzaileen itsasgarria eta estoma zaintzea eta garbitzea.
• Erabiltzaileen higiene pertsonala kontrolatzea, baita haiek geletan dituzten medikamentuak eta janariak ere.
• Zentroko langileen osasun beharrei kasu egitea, haiek bere eskumenekoak badira.
• Fisioterapeutei laguntzea jardueretan, haien kalifikazio maila bateragarria bada erizain titulazioarekin eta bere berariazko eginkizunek horretarako aukera ematen badute.
• Farmaziako, analitikako eta erradiologiako eskariak egitea espezialistarik ez duten zentroetan.
• Medikuak agindutako jarduera fisikoak zaindu eta begiratzea, eta horiek egitean gerta daitezkeen gorabeherak behatzea.
• Oinetako azazkalak moztea erabiltzaile diabetikoei eta antikoagulatzaileen bidezko tratamendua jasotzen dutenei, bai eta azazkal inkarnatuen eta erpurukoaren tratamendua dutenei ere.
• Talde teknikoko kide den aldetik, parte-hartze aktiboa izanen du pertsonarengan zentratutako arreta integraleko eredua ezartzen eta lan-metodologia hori aplikatzen, zerbitzuan etengabeko prestakuntza-jardueretan parte hartuko du, zaintza humanizatzeko programak garatuko ditu, eta egoiliarrekin eta haien familiekin etengabeko harremana izanen du, besteak beste.

Fisioterapeutak:

Dagokion titulazioa eta lanbidean jarduteko legezko gaitasuna edo lanbide gaitasuna dituen langilea da.

Jarraian zehazten diren eginkizunak beteko ditu, baita eskatzen zaizkionak ere, haiekin eta/edo bere titulazioarekin zerikusia dutenak:

• Agintzen diren tratamendu eta errehabilitazio teknikak egitea.
• Eskatzen zaionean, zentroko lanbide anitzeko taldean parte hartzea, bere lanbide espezializazioarekin zerikusia duten probak edo balorazioak egiteko.
• Egiten duen tratamenduaren aplikazioaren jarraipena eta ebaluazioa egitea.
• Bere espezialitateko tratamenduaren aplikazioa ezagutzea, ebaluatzea eta horren berri ematea eta, behar izanez gero, aldatzea, kanpoko baliabideak erabilita.
• Dagokion lurralde eremuan bere espezialitaterako dauden baliabideak ezagutzea.
• Zentroan egiten diren batzar eta lan bileretan parte hartzea.
• Erabiltzaileen familiei eta instituzioei argibideak eta prestakuntza emateko antolatzen diren programetan laguntzea, bere eskumeneko gaietan.
• Behar duten profesionalei aholkularitza ematea teknika fisioterapeutek eragina duten mobilizazio-jarraibideei eta tratamenduei buruz.
• Tratamenduak aztertu eta haien segimendua eta ebaluazioa egiteko zentroetan egiten diren bileretan parte hartzea.
• Talde teknikoko kide den aldetik, parte-hartze aktiboa izanen du pertsonarengan zentratutako arreta integraleko eredua ezartzen eta lan-metodologia hori aplikatzen, zerbitzuan etengabeko prestakuntza-jardueretan parte hartuko du, zaintza humanizatzeko programak garatuko ditu, eta egoiliarrekin eta haien familiekin etengabeko harremana izanen du, besteak beste.

Terapeuta okupazionala:

Dagokion titulua eta lanbidean aritzeko legezko gaitasuna dituen langilea da.

Jarraian zehazten diren eginkizunak beteko ditu, baita eskatzen zaizkionak ere, haiekin edo bere titulazioarekin edo gaitasun profesionalarekin zerikusia dutenak:

• Zentroko jardueren plan orokorrean parte hartzea.
• Terapia okupazionalari dagozkion esku-hartzeak egitea, hala nola oinarrizko eguneroko bizitzako jarduerak eta jarduera instrumentalak, lana, hezkuntza, aisia eta parte-hartze soziala entrenatzea, mantentzea eta garatzea. Era berean, erabiltzaileak errehabilitatzea/gaitzea, ingurunearekin erlazionatzeko edo jarduera okupazionalak egiteko gaitasunak berreskuratzea edo mantentzea, eta ortesiak, protesiak eta laguntza-produktuak egitea, egokitzea eta erabiltzen entrenatzea.
• Zentroko erabiltzaileentzako aisialdiaren arloan parte hartzea.
• Diziplina anitzeko gainerako taldearekin batera, parte hartzea zentroko erabiltzaileen suspertze- edo laguntza-prozesuaren ebaluazioan eta jarraipenean.
• Bere eskumeneko gaietan laguntzea (okupazio arloen errehabilitazioa, laguntza-produktuak agintzea, egokitzapenak, irisgarritasuna, ergonomia, ekonomia artikularra, mobilizazio funtzionala eta erakundeen erabiltzaileen familiei informazioa ematea), erakundeen erabiltzaileen familiei prestakuntza eta informazioa emateko egiten diren programetan.
• Talde teknikoko kide den aldetik, parte-hartze aktiboa izanen du pertsonarengan zentratutako arreta integraleko eredua ezartzen eta lan-metodologia hori aplikatzen, zerbitzuan etengabeko prestakuntza-jardueretan parte hartuko du, zaintza humanizatzeko programak garatuko ditu, eta egoiliarrekin eta haien familiekin etengabeko harremana izanen du, besteak beste.

Gizarte langilea:

Dagokion titulazioa eta lanbidean jarduteko legezko gaitasuna dituen langilea da.

Jarraian zehazten diren eginkizunak beteko ditu, baita eskatzen zaizkionak ere, haiekin edo bere titulazioarekin edo gaitasun profesionalarekin zerikusia dutenak:

• Zentroko gizarte lana planifikatu eta antolatzea, helburuen programazio egokia eta lanaren arrazionalizazioa direla bide.
• Egoitzan sartzeko prozesuan arreta ematea eta erabiltzailearen historia eta fitxa soziala egitea.
• Egoiliarrekin zerikusia duten alderdi sozialak ikertzen laguntzea eta horretarako azterketak egitea.
• Administrazio-jarduerak egitea eta erabiltzaileen txosten sozialak eta zentroko zuzendariak eskatzen dizkienak egitea. Informazioa ematea baliabide propioen eta besterenen gainean, eta baloratzea erabiltzailearen egoera pertsonal, familiar eta soziala.
• Zuzeneko arreta ematea, banaka, taldeka eta komunitatean.
• Sustapen lana egitea, erabiltzaileak zentroko eta inguruneko bizimoduan integra daitezen eta parte har dezaten.
• Parte hartzea erabiltzaileak zentrora egokitzeko programak prestatzen eta abiarazten.
• Gizarte eta kultur sustapeneko lantaldeak eta jarduerak koordinatzea.
• Batzorde teknikoan parte hartzea.
• Erabiltzaileen arazo sozialak konpontzeko behar diren kudeaketak egitea, batez ere entitate eta erakundeekikoak.
• Gizarte eta osasun zerbitzuen sistemako profesionalekiko eta baliabideekiko koordinazioa sustatzea, komunikazio-bideak ezartzeko.
• Talde multiprofesionalarekin edo departamentu medikoarekin batera, erabiltzaileek behar dituzten orientabideak edo arreta prestatzen parte hartzea.
• Logelak eta jantokiko mahaiak esleitzen eta aldatzen parte hartzea erizaintza departamentuarekin eta zuzendaritzarekin batera.
• Osasun zentroetako erabiltzaileen jarraipena egitea eta, hala badagokio, behar diren bisitak egitea.
• Egoitzan erabiltzaileari ematen zaion gizarte-laguntzaren prozesuan, familiari ematea informazioa, orientazioa, aholku eta laguntza.
• Talde teknikoko kide den aldetik, parte-hartze aktiboa izanen du pertsona erdigunean jartzen duen arreta integraleko eredua ezartzen, lan-metodologia gidatuko du, zerbitzuan etengabeko prestakuntza-jardueretan parte hartuko du, zaintza humanizatzeko programak garatuko ditu, eta egoiliarrekin eta haien familiekin etengabeko harremana izanen du, besteak beste.

–3. taldea. A motako langile kualifikatuak (Lanbide Heziketa, goi mailako zikloa).

Hitzarmena sinatzen den unean ez dago inor kategoria horretan. Etorkizunean halakorik balego, sortutako kategoria horretarako erreferentziazko hitzarmen sektorialean zehaztutako funtzioak eta zereginak erabiliko lirateke.

–4. taldea. B motako langile kualifikatuak (Lanbide Heziketa, erdi mailako zikloa).

Telefonista/Atezaina/Harreragilea:

Honako eginkizun hauek dituzten langileak dira: gutunak jaso eta bidaltzea, jendearentzako orientazioa, telefonoguneei arreta ematea, sarbideak zaintzea eta atezaintza-lanak.

Jarraian zehazten diren eginkizunak beteko ditu, baita hari eskatu eta haiekin eta/edo bere gaikuntzarekin edo gaitasun profesionalarekin zerikusia dutenak ere:

• Langileekin lankidetzan aritzea beste profesional batzuei laguntzeko zereginetan, profesional horiek hala eskatzen diotenean.
• Langileak lanorduetan zentroan sartu eta irteteari buruzko gorabeherak bete eta igortzea.
• Oinarrizko zeregin informatikoak egitea, erabiltzaile mailan.
• Erabiltzaileen irteera-eskaerak edo berandu iristekoak artxibatzea, zentroaren barne araudian ezarritakoarekin bat.
• Erabiltzaileei laguntzea ekipajea logeletara eta logeletatik eramaten, premia hori dutenean, eta zuhurtziaz kontrolatzea sarbidea duten pertsonek zentrora ekartzen dituzten paketeak, nahitaezkoa duten bezala.
• Erabiltzaileak eta bisitariak erakundearen bulegoetara sartzeko zuzendaritzak ezarritako araubidea betearaztea.
• Matxura-parteak jasotzea eta mantentze-zerbitzura eramatea.
• Erakundearen barnean bere kargura izatea lekualdatuko diren erabiltzaileak.
• Zentroko sarrerak eta irteerak erregistratzea eta gainbegiratzea, direla erabiltzaileenak eta haien senideenak, direla laguntzaileenak, hornitzaileenak eta lanalditik kanpoko langileenak.

Bere eginkizunak betetzeko eskatzen zaion gaikuntza eta/edo behar den esperientzia izanen du, indarrean dagoen araudiarekin bat.

Gerokultorea:

Zentroko zuzendariaren mendean edo zehaztuko den pertsonaren mendean, honako eginkizun nagusia duen langilea: eguneroko jardueretan erabiltzaileak zaindu eta laguntzea, haien kabuz egin ezin dituztenean, eta haiei laguntza pertsonala eta haien ingurunekoa emateko helburua duten lan profesional guztiak egitea.

Jarraian zehazten diren eginkizunak beteko ditu, baita hari eskatu eta haiekin eta/edo bere titulazioarekin, gaikuntzarekin edo gaitasun profesionalarekin zerikusia dutenak ere, ezarritako protokoloekin bat:

• Diziplinarteko taldeari sostengua ematea erabiltzaile berriei harrera egiteko, eta zaintza-plan indibidualizatua egokitzen laguntzea.
• Eguneroko jarduerak gauzatzeko, diziplinarteko lantaldeak programatutako esku-hartzeak egitea.
• Laguntzea prebentzio jarduerak, okupazionalak eta aisialdikoak planifikatzen, antolatzen eta gauzatzen.
• Erabiltzaileen higiene pertsonala mantentzea.
• Botika-kutxa eta haren edukia garbitzea, bai eta gainerako material sanitario edo asistentziala ere.
• Egoiliarrari elikagaiak banatu eta ematea, ahoratzeko erraztasunak emanez hala behar badute.
• Bere gain hartzea erabiltzailearen gelan elikagaiak jaso, banatu eta jasotzeko lana.
• Aldaketa posturalak egitea, eta bere prestakuntza teknikoaren arabera agintzen zaizkion zerbitzu osagarriak ere bai.
• Lankidetzan aritzea erizaintzako zerbitzuarekin oheratuta daudenen jarrera-aldaketak egiteko, bai eta horiek aztertu eta behatzeko behar diren jardueretan ere.
• Lankidetzan aritzea egoiliarrarekin lekualdaketarako prestatzeko, laguntza-, zaintza- eta sostengu-jarduerak eginez.
• Lankidetzan aritzea osasun langileekin medikazioa banatzeko.
• Lankidetzan aritzea, erizainek gainbegiratuta, kolostomizatutako eta zundekin dauden egoiliarrak zaintzeko eta xiringa bidez janaria emateko.
• Erizaina ez badago, glukosaren proba egiten ahalko du eta azal azpiko bidea erabiltzen ahalko du erabiltzaileei intsulina eta heparina emateko, betiere tratamenduaren dosia eta segimendua medikuek edo erizainek egiten badute.
• Erabiltzaileari lagun egitea hark lan egiten duenean gaitasun fisikoak eta motorrak mantentzea eta hobetzea errazteko, bai eta programatutako jarduerak egiten dituenean ere, dela mediku-hitzorduetara edo txangoetara joateko, dela gestioak eta abar egiteko, eta erabiltzaileak jarduera horietan parte har dezan erraztea.
• Lankidetzan aritzea istripuak prebenitzeko teknikak aplikatzeko, bat etorriz ezarritako protokoloekin eta goragoko arduradunaren jarraibideekin.
• Lankidetzan aritzea jarduera soziokulturaletako teknikariarekin erakundeko eguneroko bizitza animatzeko eta dinamizatzeko.
• Erabiltzaileari laguntzea mantentze-jarduerak eta -ariketak egiten, profesional eskudunen orientabideei jarraituz.
• Ohiko garbiketarako berariaz kontratatutako langileak inola ere ordeztu gabe, tresnen, arroparen eta gelen garbiketa eta higienea egiten ahalko du, zerbitzuko inguruabarrek hala eskatzen dutenean.
• Erabiltzaileen komunikazioa laguntzea eta estimulatzea, eguneroko jardunean moldatu eta harreman sozialak izatea sustatzeko.
• Lankidetzan aritzea diziplinarteko lantaldearekin, erabiltzaileen senideak zentroko bizitzan integratzeko.
• Erabateko isiltasuna gordetzea erabiltzaileen patologiari eta zaintza-plan indibidualizatuari buruz eta haien intimitateari dagokion edozein gairi buruz, eta beti jardutea zuzenean beren gainetik daudenen profesionalekin koordinatuta eta haien ardurapean.

Erabiltzaileen tresnak garbitzea eta mantentzea, laguntza ematea gelak ordenatuta edukitzeko, arropa jasotzeko, hura garbitegira eramateko, erabiltzaileen arropa pertsonalaz arduratzea eta oheak egitea erabiltzaile bakoitzaren beharren arabera, ezarritako kalitate-irizpideekin bat, halako eran non mihiseria garbi, zimurrik eta hezetasunik gabe eta posizio egokian geldituko baita, arreta berezia jarriz gorputz-tolesturei eta arrisku bereziko beste eremu batzuei eta erabiltzailearen intimitatea errespetatuz.

• Erabiltzaileen osasunen gorabeheren berri ematea. Hautemandako portaera-aldaketa eta/edo aldaketa fisiko oro behatzea eta gorabeheren liburuan erregistratzea.

Bere eginkizunak betetzeko eskatzen zaion titulazioa edo gaikuntza eta/edo behar den esperientzia izanen du, indarrean dagoen araudiarekin bat.

• Talde asistentzialeko kide den aldetik, parte-hartze aktiboa izanen du pertsona erdigunean jartzen duen arreta integraleko eredua ezartzen, lan-metodologia onartuko du, zerbitzuan etengabeko prestakuntza-jardueretan parte hartuko du, zaintza humanizatzeko programak garatuko ditu, eta egoiliarrekin eta haien familiekin etengabeko harremana izanen du, besteak beste, ematen zaizkion oharren arabera.

Sukaldaria:

Zerbitzuko arduraduna izanik eta nagusi hurrenarekin bat, sukaldeari atxikitako langile guztiak antolatu, banatu eta koordinatzeaz arduratuko da, baita otorduak prestatu eta gozatzeaz ere. Menua eta elikadura erregimenak zentroko zuzendaritzari proposatuko dizkio, onets ditzan, baita sail medikoari edo nutrizio sailari ere, gainbegira ditzan. Indarrean dagoen osasun araudia zorrotz beteko du.

Jarraian zehazten diren eginkizunak beteko ditu, baita eskatzen zaizkionak ere, haiekin eta/edo bere titulazioarekin, gaikuntzarekin edo gaitasun profesionalarekin zerikusia dutenak:

• Menuak ezarritakoaren arabera prestatzea, betiere gizarte eta osasun arlotik edo nutrizio arlotik idatziz ematen diren argibideetara egokituta. Dieten zaintza berezia egitea.
• Sukaldeko langileei otordu prestatuak ematea orgetan muntatzeko.
• Menuen kalitatea eta aurkezpena zaintzea.
• Kantitateak medikuek agindutakoari egokitzea.
• Elikagaiak jasotzea eta biltegiratzea, kantitatea eta kalitatea gainbegiratuta.
• Eskaerak zerbitzu orokorren koordinatzaileari edo gobernariari aurkeztea, eta haiek kudeatzea, hala aurreikusita dagoenean.
• Bere goragoko arduradun hurrenarekin batera, elikagaien kudeaketaren ondoriozko datu ekonomikoak gainbegiratzea, hala aurreikusita dagoenean.
• Egunero zaintzea elikagaiak noiz iraungiko diren eta hozkailuetan zuzen banatuta daudela, elikagai bakoitzaren ezaugarrien arabera eta osasun arloko agintaritzak ezarritako araudiaren arabera.
• Egunero prestatzen diren menuen laginak gordetzea, indarrean dagoen araudiarekin bat.
• Era berean, sukaldeko makinak eta tresnak garbi daudela gainbegiratzea.
• Gastronomiako instalazioen, ekipamenduen eta tresnen garbitasuna, mantentze-lanak eta ordena antolatzea, gainbegiratzea eta kontrolatzea. Beharrezkoa denean, garbiketa lanetan parte hartuko du.
• Begiratzea sukaldeko tresnak eta makinak behar bezala erabiltzen direla eta egoera onean daudela.
• Zaborra kontrolatzea eta gainbegiratzea, indarrean dauden arauei jarraituz.
• Hondakinak zentroan zehaztutako tokira eramatea, hortik kanpora eraman ahal izateko.
• Otorduetan menuak platereratzea.
• Bere eremu funtzionalean elkarlanean aritzea, talde teknikoak hala eskatuta, erabiltzaileen hezkuntza-premietan, bere lanbidearekin zerikusia dutenetan.
• Goragoko arduradunari jakinaraztea bere lanean ikusitako gorabeherak edo anomaliak.
• Begiratzea sukaldeko langile guztien uniformeak zuzen daudela eta higiene-neurri egokiak betetzen direla.
• Elikagaien higienea kontrolatzea eta erregistratzea, elikagaien kutsadura-arriskuak behatuz, ontziratzea eta manipulazioa kontuan izanik eta oinarri harturik arriskuen eta kontrol puntu kritikoen azterketako prebentzio-sistema eta egindako eragiketak.
• Zaintza berezia alergenoak dituzten elikagaietan, indarrean dagoen legeriaren arabera.
• Egindako azken dokumentua zabaltzekoa.

–V. taldea. Zerbitzuetako laguntzaileak.

Garbitzailea eta ikuztegiko/lisatzeko langilea:

Garbiketa-, ikuzketa- eta lisatze-lanak egiten dituen langilea da, erantzukizun mugatuarekin eta gobernariaren edo zuzendariaren mende.

Jarraian zehazten diren eginkizunak beteko ditu, baita eskatzen zaizkionak ere, haiekin eta/edo bere gaikuntzarekin edo gaitasun profesionalarekin zerikusia dutenak:

• Jantoki-officeko lanak egitea. Bere esku utzitako materialen erabileran arreta berezia jarriko du.
• Ikuztegiko lanak egin eta arropa zuria atondu, makinak erabili eta zaindu, erabiltzaileen jantziez eta zentroko arropaz arduratu eta materialak ahalik eta ongien erabili.
• Logelak eta gune komunak garbitzeko lanak egin (oheak, arropa aldaketak, bainugelak, leiho eta balkoiak, altzariak, etab.). Lan horietan, erabiltzaileei ahalik eragozpen gutxien sortzen saiatuko dira.
• Erabiltzaileen arropa beti garbi eta prest edukitzea, bai norberarena, bai oheko arropa, eskuoihalak eta abar, eta ondoren jaso, sailkatu eta banatzea.
• Arduradun hurrenari jakinaraztea bere lanean ikusitako gorabeherak edo anomaliak.

Bere eginkizunak betetzeko eskatzen zaion gaikuntza eta/edo behar den esperientzia izanen du, indarrean dagoen araudiarekin bat.

Sukaldeko laguntzailea:

Erantzukizun mugatua izanik eta sukaldariaren mende egonik, ondoren zehazten diren eginkizunak beteko ditu, baita eskatzen zaizkionak ere, baldin eta horiekin edo bere gaikuntzarekin edo gaitasun profesionalarekin zerikusia badute:

• Elikagaiak ontzeko prestatzea, labea piztea eta mantentzea, hura garbitzea eta sukaldeko eta jantokiko tresnak garbitzea.

Bere eginkizunak betetzeko eskatzen zaion gaikuntza eta/edo behar den esperientzia izanen du, indarrean dagoen araudiarekin bat.

9. artikulua. Kontratazioak.

Kontratazio berriak egin behar badira, enpresako Zuzendaritzak aldez aurretik aztertuko du ea posible den une horretan lanaldi partzialean ari diren langileen lanaldia luzatzea, haien baldintzak hobetze aldera.

1.–Aldizkako kontratu finkoak.

Aurreikusten da pixkanaka azkentzen joatea. Aldizkako kontratu finkoetatik kontratu mugagabeetara pasatzeko prozesuan, antzinatasunaren arabera eginen da lehentasun-ordena.

Antzinatasuna neurtuko da enpresarekin sinatzen den lehen kontratutik aurrera, baina galduko da baldin eta langilea bere borondatez enpresatik kanpo badago hiru hilabete baino gehiago. Epe horretatik kanpo geldituko dira nahitaezko eszedentziak, seme-alaba adingabea edo desgaitasuna duena edo dependentzia duen adinekoa zaintzekoak, ikasketak egitekoak edo aldi baterako ezintasun bajak.

Antzinatasunaren irizpide hori artikulu honetako barne igoerarako baino ez da erabiliko.

2.–Errelebo kontratuak:

Enplegua sustatzeko, langile batek betetzen baldin baditu Gizarte Segurantzak erretiro partzial aurreratua hartu ahal izateko eskatzen dituen legezko baldintzak, erretiro hori eskatzen ahalko du, eta zentroko zuzendaritzak erabakiko du onartzen duen ala ez. Hala ere, ahaleginak eginen dira akordio lortzeko, ezartzen joan dadin.

3.–Lanaldi partzialeko kontratua:

Langile Estatutuaren 12. artikuluan xedatuari jarraikiko zaio.

Artikulu horren 5.c puntuarekin lotuta, ezartzen da ordu osagarrien kopuru bat hitzartzen ahalko dela, baina kopuru hori ezin dela izan kontratatutako ordu arrunten %60 baino handiagoa.

Deusetan galarazi gabe ordu osagarriak hitzartzea, iraupen mugagabeko lanaldi partzialeko kontratuetan, urteko zenbaketan asteko 10 ordutik gorako lanaldia dutenetan, enpresak edozein unetan eskaintzen ahalko dio langileari ordu osagarriak egitea, eta hark berak nahi izanez gero bakarrik onartuko du. Ordu osagarri horien kopuruak ezin gainditzen ahalko du kontratuan ezarritako ordu arrunten ehuneko hamabosta –hitzarmen kolektiboan hala adostuz gero, ehuneko hogeita hamarrera arte handitzen ahalko da–. Langileak ez baditu ordu horiek egin nahi, ez da lan jokabide zigorgarritzat joko.

Langile batek enpresan jarduera bere borondatez eten nahi badu, 15 egun aurretik jakinarazi beharko dio. Jakinarazi ezean, enpresak eskubidea izanen du langilearen likidaziotik eguneko soldata deskontatzeko, jakinarazpena atzeratzen den egun bakoitzeko.

Enpresan 3 urte jarraitutan zerbitzu eman ondoren aldi baterako kontratuaren bidez, kontratua mugagabe bihurtuko da, eta, une horretan, enpresan lanean emandako denbora guztia aitortuko zaio langileari antzinatasun plusa kalkulatzean, Langileen Estatutuan aldi baterako kontratazioaren mugei buruz xedatutakoa deusetan ukatu gabe.

10. artikulua. Lanaldia, atsedenaldiak eta oporrak.

1.–Lanaldia.

a) 2024an eta 2025ean, urteko benetako lanaldia 1.610 ordukoa izanen da. (1. oharra).

Beraz, lanaldia 70 ordu murriztuko da.

Murriztutako 70 orduetatik, 2024an langileek 35 ordu hartzen ahalko dituzte norberaren aferetarako. Horietatik, 14 ordu hartzeko, aldez aurretik egin beharko zaio eskaera zuzendaritzari, oporrak eskatzeko epean (otsailaren 28a), eta beste 21 orduak, aldiz, oporren moduan hartzen ahalko dira, otsailean eskatu beharrik gabe. Murrizten diren beste 35 orduak txandakako matrizeetan aplikatuko dira, modu planifikatuan.

2025ean, banaketa 2024an bezalakoa izanen da. Bi alderdiak 2024. urtearen amaieran bilduko dira, baloratzeko nola jarri diren martxan oporrak antolatzeko eta lanaldia banatzeko neurri horiek.

1. oharra. Unibertsitateko teknikariek eta erizainek 1.680 ordu presentzial izanen dituzte urtean, baina 70 ordu kenduko zaizkie jaiegunetako konpentsazio orokor gisa. Hala, benetako 1.610 lanordu izanen dituzte urtean. Ordu presentzialetatik benetako orduetara dagoen diferentziala hartzeko (70 ordu), gainerako langileentzat ezarritakoari jarraituko zaio.

b) Ospitalearen jardueraren ezaugarriak direnak direlako eta zerbitzuak etenik gabe eman behar direnez, beharrezkoa den arloetan, goizeko, arratsaldeko eta gaueko txandetan emanen dira zerbitzuak, urtero prestatzen den egutegiaren arabera.

Alderdiek hitzartzen dute 10 ordukoa izatea, lana txandaka antolatzeko sisteman, eguneko lanaldi luzeena, haren beharra dagoenean; betiere, urteko benetako lanaldia ezin izanen da gainditu eta 12 orduko gutxieneko atsedenaldiak errespetatu beharko dira lanaldien artean.

Hitzarmen kolektibo honetan lanaldiari buruz jasotzen den erregulazioak ez du beharrezkotzat jotzen portzentajeak ezartzea modu irregularrean banatzeko; kontrako ituna da, Langileen Estatutuaren 34.2 artikuluak eskatzen duena.

2.–Oporrak.

a) Langileen urteko opor ordainduak kalkulatuko dira aurkeztutako egutegiko orduei urteko lanaldiko orduak kenduz. Lanorduen zenbaketarako, lan egutegian halakotzat hartuko dira lanik gabeko zenbait egun. Urteko oporrak ez dira inolaz ere 30 egun natural baino laburragoak izanen.

b) Langileek arauzko oporretan jasoko duten ordainsaria beren ohiko lanarengatik jasotzen duten bera izanen da.

c) Arauzko oporrak hartzeari dagokionez, batzorde paritarioak gai horri buruz ezarritakoari helduko zaio.

d) Langileek urteko behin-behineko egutegia dutenean eskatzen ahalko dituzte oporrak.

Langile bakoitzak gutxienez astebeteko aldietan eskatuko ditu oporrak, astelehenean hasita eta igandean amaituta, biak barne. Hala, gehienez ere lau aste, urtean zehar edozein alditan. Urteko benetako lanaldia osatu arteko gainerako egunak egun solteetan eskatzen ahalko dira.

Eskaeretan adieraziko da lau asteetako bi lehentasunezko aldiak izanen direla, eta beste biak, aldiz, lehentasunik gabekoak.

Zuzendaritzak lehentasunezko aldiak ziurtatu beharko ditu, eta lehentasunik gabekoak onartzen saiatuko da. Hala ere, azken horiek zuzendaritzak aldatzen ahalko ditu, baita banakako egunak ere, alderdiek hala adosten badute.

Finkatu direnak baino pertsona gehiago baldin badaude aldi berean lehentasunezko aldietan, egoitzan antzinatasun handiena dutenek izanen dute lehentasuna, eta zerrenda bat sortuko da, non lehentasunezko aldiak hartu ezin izan dituztenek lehentasuna izanen baitute hurrengo urtean.

e) Opor egutegia urte bakoitzeko lehen hiruhilekoa amaitu baino lehen eginen da, eta, behar zehatzak salbu, egun osotan hartuko dira, urtarrilaren 1etik hurrengo urteko urtarrilaren 20ra bitarte.

f) Lanpostuen arabera sortzen ahal diren soberako orduak, ahal dela, egun osotan hartuko dira, urteko seihilekoetan banatuta, eta bi alderdien artean adostuta betiere.

Informazio gisa, behin-behineko egutegia abenduaren 1ean emanen zaie langileei, eta langileek otsailaren 28a baino lehen eskatzen ahalko dituzte oporrak. Behin betiko egutegia martxoaren 31 baino lehen emanen da.

Langile bat iraupen luzeko baja batetik lanera itzultzen bada aurreko urteetako oporrak hartzeko dituela, alta hartu eta berehala hartuko ditu oporrak, alderdiek besterik adostu ezean.

11. artikulua. Baimenak.

Baimen ordainduak emanen dira ondotik zehazten diren arrazoi justifikatuengatik. Baimen horiek zatika eskatzen ahalko dira gertaera eragileak irauten duen bitartean, langileak eskatuta, betiere zuzendaritzaren oniritziarekin. Hala ere, seme-alaba adingabeak ospitaleratzen badira, edo desgaitasuna duten seme-alabak, edo dependentziaren balorazioa (larria edo handia) duten lehen mailako ahaideak, langileak eskubidea izanen du berak erabakitzeko baimena noiz hartu.

Kasu guztietan, lehenengo lanegunean hasiko dira.

Baimen edo lizentzia horiek irauten duten bitartean, dagozkien plusak kobratuko dira.

Honako hauek izanen dira arrazoiak:

1) Hamabost egun natural, ezkontzeagatik edo izatezko bikotea erregistratzeagatik.

2) Bost lanegun, ezkontideak, izatezko bikotekideak edo bigarren mailara arteko odol- edo ezkontza-ahaideek (izatezko bikotekidearen odol-ahaideak barne) edo langilearekin etxe berean bizi den eta haren zaintza behar duen beste edozein pertsonak istripu edo gaixotasun larria baldin badute, ospitaleratu behar badituzte edo ospitaleratzerik ez baina etxean atseden hartzea eskatzen duen ebakuntza kirurgikoa baldin badute. Arrazoi horregatik langilea Nafarroako Foru Komunitatetik kanpora bidaia egin beharrean bada, epea 6 egunekoa izanen da.

Atal honetan ezarritako baimen ordainduetako bat ez da ematen ahal harik eta hilabete bat, gutxienez, iragan arte subjektu eragile beragatik eta arrazoi beragatik lehenago emandako beste baimena bukatzen denetik.

3) Lau lanegun, ezkontidearen, izatezko edo bizikidetzako bikotekidearen eta lehen mailako odol-ahaideen heriotzagatik. Arrazoi horregatik langilea Nafarroako Foru Komunitatetik kanpora bidaia egin beharrean bada, epea 5 egunekoa izanen da.

Hiru lanegun, lehen mailako ezkontza-ahaideen eta anai-arreben heriotzagatik. Arrazoi horregatik langilea Foru Komunitatetik kanpora bidaia egin beharrean bada, epea 4 egunekoa izanen da.

Bi lanegun, bigarren mailara arteko odol- edo ezkontza-ahaideen heriotzagatik, aurreko ataletan jaso ez badira. Arrazoi horregatik langilea Nafarroako Foru Komunitatetik kanpora bidaia egin beharrean bada, epea beste 3 egunekoa izanen da.

4) Ohiko bizilekua aldatzeagatik: egun bat.

5) Behar-beharrezkoa den denbora, publikoa eta pertsonala den eginbehar saihetsezin bat betetzeko, boto ematekoa barne. Legez edo hitzarmen bidez ezarritako arau batean denbora jakin bat finkatua badago, arau horretan absentziaren iraupenari eta horren konpentsazio ekonomikoari buruz xedatuta dagoenari jarraituko zaio.

Goian aipatu den eginbehar hori betetzeagatik hiru hilabeteko tartean lanorduetatik %20 baino gehiagotan ezin izan bada lana bete, enpresak 46.1 artikuluan araututako eszedentzia egoerara pasa dezake langilea.

Langile batek kalte-ordaina kobratzen badu eginbeharren bat betetzeagatik edo karguren batean jardun beharragatik, diru kopuru hori bera deskontatuko zaio enpresak ordaintzen dion soldatatik.

6) Eginkizun sindikaletan edo langileen ordezkaritza lanetan aritzeko: lege edo hitzarmen bidez ezarritakoa.

7) Urtean zehar, langileek eskubidea izanen dute gehienez norberak libre hiru egun, hartzeko, aurreko artikuluetan ezarritakoez aparte. Egun horiek urteko opor egun baimenduei gehitzen ahalko zaizkie; horretarako, adostasuna beharko da zentroko zuzendaritzaren eta langilearen artean, eta zerbitzuaren beharrek baldintzako dute hura eman edo ez.

3 egun horiek hartu ahal izateko, derrigorrezkoa izanen da horiek hartu aurretik 4 hilabetez etenik gabe lan egin izana, norberak hartzeko egun bakoitzeko.

8) Langileek behar-beharrezkoa den denbora izanen dute lehen mailako senideei Tafallako Osasun Zentroko kontsultetara eta larrialdietara edo Gizarte Segurantzako mediku espezialistarengana joan eta laguntzeko; dagokion egiaztagiria aurkeztu beharko dute.

9) Behar-beharrezkoa den denbora, jaio aurreko azterketak egiteko eta erditzea prestatzeko tekniketan trebatzeko, bai eta, adopzioaren, adopziorako zaintzaren edo harreraren kasuetan, informazio eta prestakuntza saioetara joateko eta egokitasun deklarazioaren aurreko txosten psikologiko eta sozialak egiteko ere, betiere lanorduetan egin behar badira.

10) Lau egun, gehienez, ezinezkoa baldin bada lantokira iristea, edo ezinezkoa bada hara ailegatzeko behar diren zirkulazio-bideetatik pasatzea, agintaritza eskudunek joan-etorrietarako ezarritako gomendioengatik, mugengatik edo debekuengatik, edo arrisku larriko eta berehalako egoera bat gertatzen bada, barnean direla hondamendi edo fenomeno meteorologiko kaltegarri baten ondoriozkoak. Lau egunak igaro ondoren, baimena luzatuko da hura ekarri zuten inguruabarrak desagertu arte, ezertan galarazi gabe enpresak lan-kontratua eteteko edo lanaldia murrizteko aukera, ezinbesteko kasuetan, 47.6 artikuluan aurreikusitako baldintzetan.

Lanaren izaera bateragarria baldin bada urrutiko lanarekin, eta komunikazio-sareen egoerak horretarako bidea ematen badu, enpresak martxan jartzen ahalko du, eta begiratuko du betetzen direla uztailaren 9ko 10/2021 Legean jasotako gainerako betebehar formal eta materialak (Urrutiko Lanari buruzko Legea), eta, bereziki, honako hau: bitarteko, ekipamendu eta tresna egokien hornidura.

11) Organoak edo ehunak emateko prestaketa lanak egiteko behar-beharrezkoa den denbora, betiere lanaldiaren barnean egin behar badira.

12) Jaiotzaren, adopzioaren, adoptatzeko zaintzaren edo harreraren kasuan, 45.1.d) artikuluarekin bat, langileek eskubidea izanen dute ordu batez lanetik kanpo egoteko, bularreko haurra zaintzearren, horrek bederatzi hilabete bete arte. Ordu hori bi zatitan banatzen ahal da. Ume bat baino gehiago jaiotzen edo adoptatzen bada, edo ume bat baino gehiago adoptatzeko zaintza edo harrera kasuetan, baimenaren denbora modu proportzionalean handituko da.

Eskubide hori baliatzen duenak, nahi badu, horren ordez lanaldia ordu erdiz murrizten ahalko du, helburu berarekin, edo lanaldi osoetan metatzen ahalko du; azken kasu horretan, 15 eguneko iraupena izanen du.

Atal honetan jasotako lanaldi murrizketa langileen eskubide indibiduala da, eta eskubidea baliatzeko aukera ezin zaio beste guraso, adoptatzaile, zaintzaile edo harreragileari utzi. Hala ere, enpresa bereko bi langilek subjektu eragile beragatik baliatzen badute eskubide hori, aldi berean baliatzeko aukera mugatzen ahalko da enpresaren funtzionamenduari lotutako arrazoi funtsatu eta objektiboengatik, idatziz behar bezala adierazita. Kasu horretan, enpresak ordezko plan bat eskaini beharko du bi langileak eskubide horretaz baliatzen direla bermatzeko eta kontziliazio-eskubideak baliatzea ahalbidetzeko.

Bi gurasoek, adoptatzaileek, zaintzaileek edo harreragileek iraupen eta araubide berean baliatzen badute eskubide hori, denbora hori bularreko haurrak hamabi hilabete bete arte luzatzen ahal da, eta soldata proportzioan murriztuko da umeak bederatzi hilabete betetzen dituenetik aurrera.

13) Langileek eskubidea izanen dute ordu batez lanpostutik kanpo egoteko, baldin seme edo alaba bat behar baino lehen jaiotzen bada edo, arrazoia edozein dela ere, jaio ondoan ospitalean egon behar badu. Orobat, lanaldia gehienez 2 ordu murrizten ahalko dute, eta lansaria ere proportzioan murriztuko zaie. Baimen hau baliatzeko, artikulu honetako 7. atalean ezarritakoari jarraituko zaio.

14) Legezko zaintza dela-eta, langileren batek bere kargura baldin badu hamalau urtetik beherako haurren bat edo ordaindutako lanik egiten ez duen eta desgaitasuna duen pertsona bat, eskubidea izanen du eguneko lanaldia murrizteko, soldata ere hein berean murriztuta, haren iraupenaren zortziren bat gutxienez eta erdia gehienez ere.

Eskubide bera izanen du, adinagatik edo istripu edo gaixotasun baten ondorioz, bere kasa bizitzeko gauza ez den eta lan ordaindurik egiten ez duen ezkontidea, izatezko bikotekidea edo bigarren gradura arteko odol edo ezkontza bidezko ahaideren bat –izatezko bikotekidearen odol ahaideak barne– zaindu behar duen langileak.

Gurasoek, adoptatzeko zaintza dutenek edo harrera-egile iraunkorrek eskubidea izanen dute lanaldia gutxienez erdira murrizteko, soldata proportzio berean murriztuta, bere kargura dagoen adingabea zaintzeko ospitalean dagoen bitartean eta tratamendu jarraitua behar duenean minbizia (tumore gaiztoak, melanomak eta kartzinomak) edo beste edozein gaixotasun larri duelako, gaixotasun horrek ospitalizazio luzea eskatzen badu eta zaintza zuzena, jarraitua eta etengabea beharrezkoa bada. Hori egiaztatzeko, autonomia erkidegoko osasun zerbitzu publikoen edo osasun arloko administrazio organoaren txostena aurkeztu beharko da. Langileak horretarako baimena izanen du semeak edo alabak edo adoptatzeko zaintza edo harrera iraunkorreko pertsonak hogeita hiru urte bete arte.

Ondorioz, semeak edo alabak edo adoptatzeko zaintzan edo harrera iraunkorrean dagoen adingabeak hemezortzi urte betetze hutsak ez du berekin ekarriko lanaldi-murrizketa amaitzea, zaintza zuzena, jarraitua eta etengabea behar izaten jarraituz gero.

Hala ere, zaindu beharreko pertsonak 18 urte bete ondotik, lanaldia murrizteko eskubidea onartzen ahalko da, pertsona horrek 23 urte betetzen dituen arte, minbizia edo gaixotasun larria adin nagusira iritsi baino lehen diagnostikatu bazaio, betiere eskaera egiteko unean aurreko paragrafoetan ezarritako baldintzak egiaztatzen badira, adina izan ezik.

Era berean, murrizketa hori izateko eskubidea mantenduko da pertsonak 26 urte bete arte, baldin eta, 23 urte bete baino lehen, gainera, %65eko edo gehiagoko desgaitasuna frogatzen badu.

Ezkontzaren deuseztatze, banantze eta dibortzio kasuetan, izatezko bikotea azkentzen den kasuetan edo genero indarkeriaren biktima izatea egiaztatzen denean, lanaldia murrizteko eskubidea zaindu beharreko pertsonarekin bizi den gurasoaren, zaintzailearen edo harrera-egilearen alde aitortuko da, betiere eskatzen diren gainerako baldintzak betetzen baditu.

Atal honetako hirugarren eta laugarren paragrafoetan aurreikusitako kasuetan dagoen gaixoa ezkontzen bada edo izatezko bikote bat osatzen badu, lanaldia murrizteko eskubidea izanen du haren ezkontideak edo izatezko bikotekideak, betiere eskubide hori izateko baldintzak frogatzen baditu.

Atal honetan araututako lanaldiaren murrizketak langileen banako eskubidea dira, gizonezkoak zein emakumezkoak izan. Hala ere, enpresa bereko bi langilek subjektu eragile beragatik baliatzen badute eskubide hori, aldi berean baliatzeko aukera mugatzen ahalko da, enpresaren funtzionamenduari lotutako arrazoi funtsatu eta objektiboengatik, idatziz behar bezala arrazoituta. Kasu horretan, enpresak plan alternatibo bat eskaini beharko du bi langileek eskubide hori baliatzen dutela bermatzeko eta kontziliazio eskubideak baliatzea ahalbidetzeko.

Eskubide hori erabiltzean, kontuan hartuko da emakumeen eta gizonen arteko erantzukidetasuna sustatzea eta, halaber, genero rolak eta estereotipoak betikotzea saihestea.

Lizentzia ordaindugabeak.

–Ordaindu gabeko lizentzia hauek ematen ahalko dira:

Norberaren aferetarako lizentziak: urtean 3 hilabete, jarraian edo zatika (gutxienez hilabete bateko zatiak hartuz). 20 egun lehenago eskatu behar da, premia larriko kasuetan izan ezik. Enpresaren eta langilearen artean hitzartzen ahal da epe hori luzatzea, sei hilabetetik gorakoa izan gabe.

Lehenago abisatuta, justifikatuta eta enpresarekin bat, langileak 7 egun ordaindu gabe bitarte hartzen ahal du, norberaren aferetarako. Horiek ez dira jaso lizentzien atalean.

–Aurreko artikuluan jasotako lizentziak emateko, ondoko arauak bete beharko dira:

• Eskaerak arrazoitu behar dira.
• Lizentzia hau eskatzeko ez da beharrezkoa izanen oporrak aurretik ahiturik izatea.
• Lizentzia eman edo ukatzeko, zerbitzuaren beharrak hartuko dira aintzat, salbu eta eskatzaileak lizentzian hasi baino lehendik ordezkoa duenean.
• Organo eskudunak baimena ukatuz gero, horretarako arrazoiak azalduko ditu.
• Ordaindu gabeko lizentziaren aldiak ez du oporretarako eskubiderik sortuko eta ez da, beraz, kontzeptu hori kontuan hartuko egin beharreko ordainsarien deskontuan, salbu eta oporrak jada hartuak badira.

Interesdunak aldez aurretik eskatuta emanen dira artikulu honetan aipatzen diren lizentzia eta baimenak; betiere, zerbitzuaren beharrak beteko dira.

Artikulu honetan arautzen diren lizentzia eta baimenen ondorioetarako, ezkontidetzat joko dira bikote egonkorretako kideak, Bikote egonkorren berdintasun juridikorako uztailaren 3ko 6/2000 Foru Legean ezarri bezala.

D.–Lanaldia murriztea.

Hitzarmen honen aplikazioaren eremuko langileek lanaldia murrizteko eskubidea izanen dute adingaberen bat edo desgaitasunen bat duen norbaiten legezko zaintza egiteko, une oro langileei aplikatzen zaien gaur egungo lan arloko legeriak ezarrita duen modu berean.

Denbora hori adingabeak 14 urte betetzen duen urtera arte luzatuko da, eta baldintzak azaldu ondoren, zuzendaritzak izanen du baimena emateko edo ukatzeko ahalmena.

60 urte edo gehiago dituzten langileek %50era arteko lanaldi-murrizketa eskatzen ahalko dute. Ohiko lanaldian berreskuratzen ahalko dute, enpresari gutxienez hilabete lehenago jakinarazita. Prozedura bat ezarriko da erretiroa hartu arte murrizketa horri eustea erabakitzen duten langileentzat, hitzarmen berezi bat ezar dezaten Gizarte Segurantzarekin. Haren bidez, egoitzak bere gain hartuko du murrizketari lotutako ohiko lanaldiaren %100era arteko kotizazioa.

Eszedentziak.

1.–Langileek eskubidea dute hiru urteko eszedentzia hartzeko, gehienez, seme edo alaba bakoitza zaintzeko, norberak izandakoa edo adoptatua izan, edo harreran hartua, bai modu iraunkorrean bai adoptatu aurreko fasean. Hiru urte horiek haurra jaiotzen denetik edo, bestela, epaile edo administrazio ebazpena ematen den egunetik aurrera kontatuko dira.

Hiru urtera arteko eszedentziarako eskubidea izanen dute, halaber, adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat –odol edo ezkontza bidezko bigarren mailara artekoa– zaindu behar duten langileek.

Beste pertsona eragile batek beste eszedentzialdi bat izateko eskubidea sortzen duenean, hura hastearekin bukatuko da ordura artekoa, halakorik izanez gero.

Atal honetan aurreikusitako eszedentzia langileen eskubide indibiduala da. Hala ere, subjektu eragile bera zaintzeko eskubidea enpresa bateko bi langilek edo gehiagok izaten badute, zentroko zuzendaritzak aldi berean erabili nahi den eskubidea mugatzen ahalko du, enpresaren funtzionamenduarekin lotutako bidezko arrazoirik baldin bada.

Langileak artikulu honetan ezarritakoaren arabera eszedentzian ematen duen denbora antzinatasunerako kontuan hartuko da. Langileak eskubidea izanen du lanbide prestakuntzako ikastaroetara joateko, enpresako Zuzendaritzak horietara deitzen badu, batez ere lanera itzuli behar duenean.

2.–Lan kontratu mugagabea duten eta enpresan gutxienez urtebeteko antzinatasuna duten langileek eskubidea dute borondatezko eszedentzia hartzeko, lau hilabeterako gutxienez eta bost urterako gehienez.

Borondatezko eszedentzian dauden langileek eskubidea izanen dute automatikoki beren lanpostura 18 hilabeteko epean itzultzeko, eszedentzia eman zitzaien egunetik zenbatzen hasita.

Langile batek eskubide hori berriz baliatu ahal izateko, 4 urte igaro beharko dira aurreko borondatezko eszedentzia bukatu zenetik.

Eszedentzian dagoen pertsonak itundutako eszedentzia denbora aldatzen ahalko du eszedentzian dagoen bitartean, hilabete lehenago abisatuta, bai lanera itzultze aldera, bai eszedentzia luzatzeko.

3.–Lanpostua gordeta eszedentzia gozatzeko aukera 120 egunez gehienez (4 hilabete) elkarren jarraian edo bi alditan banatuta (aldi horiek ezin dute izan hilabete bat baino laburragoak), bi urteko aldiaren baitan.

4.–Eskaerak 20 egun lehenago egin beharko da, premiazko kasuetan izan ezik.

12. artikulua. Ordainsariak.

Enpresako langileek honako ordainsari hauek jasotzeko eskubidea izanen dute:

–2023. urtea.

Hitzartu da hitzarmen honetan ezarritako oinarrizko soldata %2 igotzea 2023. urterako.

–2024. urtea (2024ko urtarrilaren 1etik aurrerako atzeraeraginez).

Hitzartu da 2024. urterako, hitzarmen honetan ezarritako oinarrizko soldata igotzea 2024. urterako, Nafarroako KPIak 2023ko abenduaren 31n duen kopurua (%2,9) gehi %1. Hitzartu da 0 KPItik abiatuta, KPI negatiboa kontuan hartu gabe. Azken emaitza %3,9 izan da.

–2025. urtea.

Hitzartu da 2025. urterako, hitzarmen honetan ezarritako oinarrizko soldata igotzea 2025. urterako, Nafarroako KPIak 2024ko abenduaren 31n duen kopurua (%2,7) gehi %1,5. Hitzartu da 0 KPItik abiatuta, KPI negatiboa kontuan hartu gabe. Azken emaitza %4,2 izan da.

2026ko urtarrilaren 1ean, konpentsazio doikuntza bat aplikatuko da, beharrezkoa bada alde bat egoteagatik Nafarroako 2022ko (%6,4), 2023ko (%2,9) eta 2024ko (%2,7) KPIetatik (guztira, %12) 2023tik 2025era bitarteko aldietan egindako igoera errealera (%2 + %3,9 + %4,2, guztira %10,1). Beraz, 2026an aplikatu beharreko diferentziala %1,9koa da.

13. artikulua. Oinarrizko soldata.

a) I. eranskinen ageri dira lanbide kategoria bakoitzari dagozkion oinarrizko soldatak.

b) Lanaldi partzialeko langileak, finkoa edo aldi baterakoak.

Lanaldi partzialeko kontratua dutenek une oro egindako lanaldiaren araberako ordainsariak jasoko dituzte.

14. artikulua. Soldata-osagarriak.

1.–Ad personam plusa.

Bere horretan utziko da, hitzarmen hau indarrean jartzean langile bakoitza jasotzen ari zen zenbatekoan, eta ez da konpentsatzen edo irensten ahalko, bere horretan eutsiko zaio, eta ez zaizkio aplikatuko hitzartutako igoerak.

2.–Antzinatasuna.

Aurreko hitzarmenetan antzinatasun sistema zaharra 2013ko uztailaren 1ean desagerraraztea hitzartu ondoren, antzinatasun sistema berri bat ezarri zen: hirurteko berriak sortzen dira 2013ko urtarrilaren 1etik aitzina.

2017ko urtarrilaren 1etik aurrera, hirurtekoaren balioa hileko 30 eurokoa izanen da 2023an.

–2023: soldata igoerarik gabe.

–2024: 32 euro/hirurtekoa.

–2025: 33 euro/hirurtekoa.

3.–Gaueko lanaren plusa.

22:00etatik 08:00etara lan egiten duten langileek gaueko lanaren plusa jasoko dute denbora horretan.

Gaueko lana, lanegunean edo jaiegunean izan, ondoko diru zenbateko hauekin ordainduko da orduka, lanbide-kategoriaren arabera, eguneraketa honi jarraituz:

–2023: soldata eguneratu gabe.

–2024: KPIa+%1, %3,9.

–2025: KPIa+%1,5, %4,2.

Gaueko zerbitzuak, gaueko laneko txandak antolatzearen ondoriozkoak, urtero prestatzen diren lan egutegien arabera eginen dira, eta langileek konpromisoa hartzen dute egunean gehienez ere 10 ordu egiteko gaueko orduetan.

4.–Jaiegunetako ordainsaria.

a) Jaiegun ofizial errekuperaezinetan egindako zerbitzuen ordainsaria:

Ezarritako lan araubidea dela-eta urtero ofizialki ezarritako jaiegun errekuperaezinetako batean (11 egun urtean) zerbitzuan ari behar duten langileek diru konpentsazioa jasoko dute egun horietan lan egindako ordu bakoitzeko, ondoko taularen arabera:

–2023: lan egindako 7 orduko jaieguna ordainduko da: 31,18 euro jaiegun bakoitzeko.

–2024: 35 euro 7 orduko lanaldi osoagatik.

–2025: KPIa + 2024an hitzartutako zenbatekoaren gaineko %1,5.

Langile guztiei aitortzen zaie jaiegun bereziak ekonomikoki konpentsatzeko eskubidea (urtean 3 egun: abenduaren 25a, abenduaren 31 eta urtarrilaren 6a), honela:

–2024an eta 2025ean: 60 euro jaiegun berezian, goizeko edo arratsaldeko txandan, 7 orduko lanaldi osoan.

–2024an, gaueko txandan, 10 orduko, 100 euro, eta 120 euro, aldiz, 2025ean.

b) Igandeetan egindako zerbitzuen ordainsaria:

Ezarritako lan araubidea dela-eta zerbitzuak igandeetan eman behar dituzten langileek diru konpentsazioa jasoko dute egun horietan lan egindako ordu bakoitzeko, ondoko taularen arabera:

2023. urterako, soldata eguneratu gabe.

2024. urterako, KPIa+%1.

2025. urterako, KPIa+%1,5.

15. artikulua. Aparteko orduak.

1.–Lan egutegian ezarritako lanalditik kanpo edo horren gainetik ordutegi berezietan egindakoak dira aparteko orduak, lan egutegi hori bere adiera orokorrean ulertuta.

2.–Orobat, bi alderdiek konpromisoa hartzen dute guztiz beharrezkoak baino ez diren aparteko orduak egiteko. Aparteko ordu bakoitza honela ordainduko da:

a) Laneguneko aparteko ordua banakako ordu erreal baten balioaren %75 gehituta ordainduko da.

b) Jaieguneko aparteko ordua banakako ordu erreal baten balioaren %100 gehituta ordainduko da.

3.–Zerbitzuaren beharrak hala ahalbidetzen duenean, diru-konpentsazioaren ordez langileak zilegi izanen du atsedenalditan kobratzea, lanegunetan lan egindako aparteko ordu bakoitzeko ordubete eta berrogeita bost minutu hartuz, eta bi ordu, jaiegunetan lan egindako ordu bakoitzeko.

16. artikulua. Aparteko pagak.

a) Hitzarmen honen aplikazio eremuan sartzen diren langileek aparteko bi paga izanen dituzte urtean; horietako bakoitza oinarrizko soldataz eta antzinatasunaz osatutako hileko soldata oso baten parekoa izanen da.

Paga horiek uztaileko lehenengo astean eta abenduko lehenengo astean kobratuko dira. Lehena urtarrilaren 1etik ekainaren 30era bitarte sortuko da, eta bigarrena uztailaren 1etik abenduaren 31ra bitarte.

b) Seihilekoaren barrenean lanean hasi edo lana uzten duten langileen kasuan, denbora horretan lanean aritutako egunen araberako aparteko paga izanen dute.

17. artikulua. Aldi baterako ezintasuneko ordainsariak.

Kasu guztietan, kontingentzia arruntengatik edo lanetik kanpoko istripuagatik aldi baterako ezinduta dauden langileei osagarri hau bermatuko zaie:

–A) Langilearen urteko lehen baja.

Langileak Gizarte Segurantzarengandik jasotzen duen prestazio ekonomikoaren eta hitzarmenaren arabera dagokion soldata errealaren %100aren arteko aldea besteko osagarria emanen zaio lehenengo baja egunetik bertatik.

–B) Langilearen urteko bigarren bajatik aurrera.

Egoera horretan dagoen lehenengo egunetik zazpigarren egunera arte, langileak Gizarte Segurantzarengandik jasotzen duen prestazio ekonomikoaren eta hitzarmenaren arabera dagokion soldata errealaren %75aren arteko aldea besteko osagarria emanen zaio.

ABE egoeran dagoen zortzigarren egunetik aurrera, osagarria soldata errealaren %100era artekoa izanen da.

Laneko istripuagatik edo lanbideko gaixotasunagatik aldi baterako ezinduta dauden langileei jardunean hilean jasoko lituzketen ordainsarien %100 arteko osagarria bermatuko zaie, egoera hori egiaztatua dagoen bitartean bajako parte eta hura berresteko parte ofizialen bidez.

Ordainsari hori Gizarte Segurantzako prestazioen borondatezko hobekuntza da.

Hitzartu da lanpostuko laguntza-plan bat garatzea, langileen lan-kalitatea hobetzeko.

Lehenengo neurriarekin 60 urtetik gorako pertsonei lanaldia murriztu gogo da, hitzarmen honen 11. artikuluaren D atalean ezarri bezala.

Bigarren neurria da egoitzako fisioterapia zerbitzuak aldian-aldian laguntza ematea, langileei begirako prebentzio-ekintzen programa baten bidez.

Era berean, programa bat egin gogo da laguntza eta sostengua emateko langileei kudeaketa emozionalean, estresaren kudeaketan eta dolu-egoeretan.

Hirugarren neurria bideratuko da atseden-uneak hobetzera, gune erosoagoak, atseginagoak eta, azken batean, erosoagoak lortu nahian txandan lan egiten duten langileentzat.

Prebentzio-neurri horiek aplikatuz gero, banakako absentismoa %6tik beherako indizeetara murriztea lortzen badugu, bajaren lehen 7 egunak %100era arte osatuko ditugu hurrengo urtean. Aplikazio horrek urte bakar baterako (2025) balioko du, eta urtero berrikusiko da banakako absentismo-indizearen arabera, betiere indize hori %6tik beherakoa bada.

9 hilabetetik gorako bajak dituztenei atzeraeraginez aplikatuko zaie neurria.

18. artikulua. Istripuetarako asegurua.

Izenpetua dagoen istripu aseguruaren bidez, langile finkoen zein aldi baterako langileen heriotzako eta baliaezintasun iraunkorreko arriskuak babestuta daude.

Aseguruari dagozkion kopuruak.

Hona hemen zenbatekoak:

–18.000 euro heriotzagatik eta baliaezintasun iraunkorragatik.

19. artikulua. Bizi kalitatea, osasuna eta segurtasuna.

1.–Osasunarentzat kaltegarri duelako, zentro ofizial bateko txosten medikoaren bidez lanpostuz aldatu beharra frogatzen duen langileak bere egoera fisikoari edo psikikoari egokitutako lanpostu bat lortzeko eskubidea izanen du, enpresan egon daitezkeen aukeren artean. Haien osasunari kalte egiten diolako beste lanpostu batera aldatzen diren langileek ez dute galera ekonomikorik izanen, ez dute lanbide kategoria galduko, eta ez dute horren ondorioz inolako kalterik izanen.

2.–Osasun azterketak.

Laneko Arriskuei Aurrea Hartzeko 31/95 Legean ezarritakoaren arabera, langile guztiek dute eskubidea urtean osasun azterketa bat, osoa, egin diezaieten. Azterketa hori ospitaleko prebentzio zerbitzuak eginen du.

20. artikulua. Absentismoa.

Sinatzaileen nahia da lan absentismoa murriztea, bai eta aldi baterako ezintasuna kontrolatzeko gaur egungo mekanismoak berrikustea ere, Langileen Estatutuan xedatutakoa galarazi gabe.

Diziplina araubidea.

21. artikulua. Faltak eta zehapenak.

Enpresak zehapenak jartzen ahal dizkie langileei lana ez betetzeagatik, ondoko falten eta zehapenen mailaketari jarraikiz:

A) Falta arinak:

Atzerapena eta zabarkeria eginkizunak betetzean, bai eta enpresaren lokalak, baliabideak, materialak edo dokumentuak behar ez bezala erabiltzea, ez bada ageriko astuntasuna dela-eta falta astuntzat har daitekeela.

Justifikatutako arrazoiengatik lanera joan behar ez denean aurretik behar den denboraz ez jakinaraztea, jakinarazi ezina frogatu ezean.

Hilabete batean 3, 4 edo 5 aldiz atzeratzea lanera sartzean edo lanpostutik edo zerbitzutik alde egitea bidezko arrazoirik gabe, 15 minutuz gehienez.

Norberaren garbitasun edo txukuntasun eza.

Helbidea, bizilekua, telefonoa edo familiaren egoera aldatzen bada enpresari ez jakinaraztea, aldaketa horiek zerga arloko edo Gizarte Segurantzarekiko betebeharretan ondorioak izaten ahal badituzte.

Baimenik gabe aldatzea lan-parteetan ageri diren etxez etxeko laguntza zerbitzuen ordutegiak.

Lanaldiaren barrenean, sakelako telefonoa norberaren aferetarako erabiltzea, larrialdietan izan ezik.

Identifikazio txartela ikusgarri ez izatea edo arauzko uniforme osoa ez eramatea lanorduetan.

Zuzendaritzak ezarritako funtzionamendu-arauak ez betetzea.

Egoiliarrei edo familiei tratu desegokia ematea, bidegabeko agintearen bidez, komunikazioan errespetu faltaren bidez edo bidezkoa edo koherentea ez den edozein tratamendu motarengatik, hala ezarrita baldin badago pertsonarengan zentratutako arreta integraleko ereduan, zeina jasota baitago barne funtzionamenduko arauetan eta Nafarroako Gobernuarekin Open House ituntze-sisteman zehaztutako baldintza teknikoen agirian.

B) Falta astunak:

Eginkizunak berandu edo zabarkeriaz betetzea, hala nola enpresaren lokalak, baliabideak materialak edo dokumentuak behar ez bezala erabiltzea, ageriko astuntasuna dagoenean.

30 eguneko epean, 1-3 egunetan lanera ez joatea, justifikatutako arrazoirik gabe, eta absentziaren berri ez ematea, hori egitea ezinezkoa izan dela frogatu ezean.

30 eguneko epean behin eta berriz (5 egunez gutxienez eta 10 egunez gehienez) atzeratzea lanera sartzean justifikatutako arrazoirik gabe, 15 minutuko atzerapenarekin gehienez.

Lantokitik ateratzea, justifikatutako arrazoirik izan gabe.

Lanean segurtasun eta osasunerako ezarritako arau eta neurriak ez betetzea edo bertan behera uztea, horren ondorioz osasunerako eta osotasun fisikorako arriskuak sortzen ahal direnean izan ezik, halakoetan falta oso astuntzat joko baita.

Enpresaren denbora, uniformeak, materialak edo baliabideak beste gauza batzuetarako edo norberaren mesederako erabiltzea.

Lanean ari dela erretzea edo edari alkoholdunak edatea.

Errespeturik ez agertzea erabiltzaileei, edozein kategoriatako lankideei, senideei, laguntzaileei edo enpresarekin harremanetan dagoen beste edozeini, eta agintekeria.

Enpresak emandako sakelako telefonoa edo pertsona-bilagailua ez hartzea lanorduetan bidezko arrazoirik gabe; guardia lokalizatuetan gertatzen bada, falta oso astuna izanen da.

Zuzendaritzak ezarritako funtzionamendu-arauak ez betetzea behin baino gehiagotan.

Egoiliarrei edo familiei behin eta berriz tratu desegokia ematea, bidegabeko agintearen bidez, komunikazioan errespetu faltaren bidez edo bidezkoa edo koherentea ez den edozein tratamendu motarengatik, hala ezarrita baldin badago pertsonarengan zentratutako arreta integraleko ereduan, zeina jasota baitago barne funtzionamenduko arauetan eta Nafarroako Gobernuarekin Open House ituntze-sisteman zehaztutako baldintza teknikoen agirian.

Falta arina errepikatzea, desberdina bada ere, 90 eguneko epean, baldin eta arrazoi horregatik ohartarazpena egin edo zehapena jarri bazaio.

C) Falta oso astunak:

Egoiliar edo erabiltzaile baten prozesu patologikoaren, haren barru-barruko kontu baten edo indarreko legeek babesten duten beste edozein datu pertsonalen berri ematea.

Kontratuko onustea haustea, eta iruzurra, desleialtasuna edo konfiantza-abusua agindu zaizkion kudeaketetan.

Lanera ez joatea hiru egun baino gehiagotan 30 eguneko epe batean, justifikatu gabe.

Behin eta berriz (10 egun baino gehiagotan 30 eguneko epe batean, edo 30 egun baino gehiagotan 90 eguneko epe batean) atzeratzea lanera sartzean justifikatu gabe.

Hitzezko eta egitezko tratu txarrak ematea, psikikoak edo moralak, egoiliarrei, erabiltzaileei, edozein kategoriatako lankideei edo haien senideei eta laguntzaileei, baita enpresarekin harremanetan dagoen beste edozein pertsonari ere.

Zentroaren edo zerbitzuaren erabiltzaileengandik onura ekonomikoak edo gauzazkoak galdatzea, eskatzea, onartzea edo eskuratzea.

Zentroaren, zerbitzuaren, erabiltzaileen edo langileen objektuez, agiriez, materialez, eta abarrez jabetzea.

Sexu-jazarpena, sexuan, sexu-orientazioan eta sexu-identitatean, lanean eta moralean oinarritutako jazarpena.

Beste pertsona bat zerbitzuan aritzeko jartzea enpresaren baimenik gabe.

Zabarkeria botikak ematerakoan edo prestatzerakoan, edo egoitzako edo zerbitzuko erabiltzaileen osasunean edo osotasunean ondorioak ekartzen dituen beste edozein zabarkeria.

Bidegabeko lehia, familiakoei egoitza edo zerbitzua aldaketa egin dezaten edo egoiliarrak edo erabiltzaileak langileen edo partikularren etxeetara eraman ditzaten sustatuz edo iradokiz. Halaber, egoiliarren edo haien senideen datu pertsonalak edo telefonoak egoitzakoak edo zerbitzukoak ez diren pertsonei ematea.

Langileak, aldi baterako ezintasun egoeran dagoen bitartean, norbere zein besteren kontura lan egitea, bai eta ezintasun egoera hori luzatze aldera manipulazio edo iruzurrak egitea ere.

Enpresako edozein pertsonarenganako jarduera eta jokabide sexual iraingarriak izatea, hitzezkoak nahiz fisikoak, larrietan larrienak izanik aginte edo hierarkia egoeratik eragindakoak, kontratu mugagabea ez dutenen aurka egindakoak, edo salaketa egin dutenen aurkako mendeku hartzekoak.

Lantokian diziplinarik ez izatea.

Enpresak emandako mugikorraren edo pertsona-bilagailuaren deiari ez erantzutea guardia lokalizatuetan, justifikatutako arrazoirik gabe.

Laneko osasunaren eta segurtasunaren arloan ezarrita dauden arau eta neurriak ez betetzea edo baztertzea, ez betetzearen ondorioz osasunarentzat eta osotasun fisikoarentzat arriskuak sor badaitezke.

Lanean agintekeriaz jokatzea.

Falta astuna errepikatzea 180 eguneko epean, bestelako izaera izanda ere, aurretik idatzizko ohartarazpena jaso bada.

Langileen Estatutuaren 54.2 artikuluan hala tipifikatutako beste edozein jokabide.

D) Enpresaren arau-hausteak:

Enpresaren lan arloko arau-hausteak izanen dira lan arloko lege xedapenen, hitzarmen kolektiboaren eta gainerako arau aplikagarrien aurkako ekintzak edo ez-betetzeak. Askatasun publikoak eta oinarrizko eskubideak erabiltzeari trabak jarriz gero, zehapena ezarriko da. Horretaz gain, laneko segurtasunaren eta osasunaren arloan ezarritako arauak edo neurriak ez betetzea edo baztertzea.

Indarreko araudiari jarraikiz tramitatuko dira.

22. artikulua. Zehapenak.

Falten kalifikazioaren arabera enpresak ezartzen ahal dituen zehapenak hauek dira:

a) Falta arinak.

–Idatzizko kargu-hartzea.

–Enplegu eta soldatarik gabe uztea hiru egunez gehienez.

b) Falta astunak.

–Enplegu eta soldatarik gabe uztea lau eta hogeita bederatzi egun bitartean.

c) Falta oso astunak.

–Enplegua eta soldata etetea hogeita hamar egunetik laurogeita hamar egunera bitarte.

–Kaleratzea.

Zehapenak modu arrazoituan eta idatziz jakinaraziko zaizkio interesdunari, jakin ditzan eta behar diren ondorioak izan ditzaten. Langileen ordezkaritza bateratuari ere falta astun edo oso astunen ondoriozko zehapenen berri emanen zaio.

Falta astun eta oso astunengatiko zehapenak ezartzeko, ukitutako langileek eskubidea izanen dute idatzizko alegazioak aurkezteko, 5 egun naturaleko epean. Epe horretan, langileak lanpostutik alde eginen du, ordaindutako baimen gisa.

Enpresa batzordeko kideen edo langileen delegatuen kasuan, bai kargu sindikaletan jardunean daudenak bai garantien arauzko epean daudenak, zehapenak jartzeko ezinbestekoa da kontraesanezko espedientea tramitatzea, zehapenaren astuntasuna edozein delarik ere.

23. artikulua. Falten preskripzioa.

1.–Falta arinek hamar egunen buruan preskribatuko dute; astunek, hogei egunen buruan, eta oso astunek, hirurogeiren buruan, faltaren berri izaten den egunetik aitzina, eta, nolanahi ere, falta egin eta sei hilabeteren buruan.

2.–Preskripzioa eten eginen da prozedurari hasiera ematea erabakitzen den unetik, eta horretarako hartzen den erabakiak behar bezala erregistratua behar du izan. Espedientearen tramitazioa hilabete baino gehiago eteten bada langileari egotzi ezin zaion kausa bategatik, preskripzio epea ez dela eten ulertuko da.

Eskubide sindikalak.

24. artikulua. Langileen ordezkariak.

1.–Hitzarmen honen aplikazio eremuan sartuta dauden langileek eskubidea dute beren lan baldintzak ezartzeko prozesuan parte hartzeko, legeak ezarritako moduan, artikulu honetan araututako organoen bitartez.

2.–Langileen ordezkaritza Enpresa Batzordeko kideei edo langileen delegatuei dagokie, eta sindikatuen atalei, berriz, beren afiliatuen ordezkaritza.

3.–Langileen ordezkariek (langileen delegatuak edo enpresa batzordeko kideak) eta atal sindikaletako ordezkariek eskubide, betebehar eta berme arautuak izanen dituzte, Langileen Estatutuaren 64. artikuluan eta hurrengoetan eta Askatasun Sindikalari buruzko Lege Organikoaren IV. tituluan ezarritakoaren bidez, hurrenez hurren.

4.–Batzordeko kideek edo ordezkariek ordu sindikalak metatzen ahalko dituzte, legez ezarritakoak gainditu gabe.

5.–Lanpostu finkoak edo aldi baterakoak betetzeko deialdiaren epaimahaian bereziki egonen dira langileen ordezkariak.

25. artikulua. Biltzeko eskubidea.

Langileek batzarrak egiten ahalko dituzte, gisa honetara:

a) Batzarrak lanaldiaren hasieran edo bukaeran egin beharko dira. Salbuespenez, batzarrak lanaldiaren beste tarte batean egiten ahalko dira, horrela kalte gutxiago egiten bazaio zerbitzuen ohiko funtzionamenduari.

b) Baimena emanen da aipatu diren baldintzak betetzen badira. Salbuespenezko kasuetan izan ezik, batzarra egiteko baimena gutxienez ere berrogeita zortzi ordu lehenago eskatu beharko da. Kontrako ebazpen berariazkorik ematen ez bada, baimena emantzat joko da; batzarra egin baino hogeita lau ordu lehenago gutxienez jakinarazi beharko da ebazpen hura.

c) Batzarra ospitaleko lokal batean egin gogo bada, aurreko atalean ezarri bezala egin beharko da eskaera.

26. artikulua. Jarraipen batzordea.

1.–Langileek hautatutako ordezkariek osatuko dute Jarraipen Batzordea.

2.–Batzorde Paritario bat sortuko da, hitzarmen kolektibo honetan araututakoa aplikatu, bete eta interpretatu dadin, hura negoziatzen duten parte-hartzaileen artean; langileen legezko ordezkariak eta bere konfiantzako pertsona batek, eta enpresako ordezkari batek osatuko dute; azken horrek ere bere konfiantza osoko pertsona bat izaten ahalko du lagun.

Bi alderdietako batek hala eskatuta elkartuko da batzordea, hamabost eguneko epean, eta hitzorduan eguneko gaiak aipatu beharko dira.

Batzordearen erabakiak baliodunak izateko hura osatzen duten bi kideen adostasuna beharko da.

Batzorde paritarioak eginkizun hauek izanen ditu:

1.–Hitzarmenaren klausula guztien aplikazioa interpretatzea.

2.–Itundutakoa betetzen den zaintzea.

3.–Hitzarmenaren eraginkortasun praktikoa hobetzen duten beste jarduera guztiak.

Batzordeak ebazpena emanen du landutako gaien inguruan, adostasuna egon edo ez, hamar egun naturalean, bileraren egunetik zenbatzen hasita.

27. artikulua. Konpentsazioa eta irenspena.

a) Hitzarmen honetan itundutako baldintza guztiek multzo organiko bat osatzen dute, eta indarra hartu aurretik zeuden guztiak ordeztu, konpentsatu eta irentsiko dituzte urteko eta guztirako kopuruei dagokienez, edozein dela ere haien izaera, jatorria edo izena.

b) Zehazki, ordainketen edozein kontzeptu dela bide, legezko xedapenen bitartez ezartzen diren igoerak hitzarmen honetan ezarritakoarekin konpentsatzen ahalko dira urteko kopuruari dagokionez.

c) Era berean, hitzarmen honetan ezarritako urte osoko ordainsariek, indarra hartutakoan, dauden sariak irentsi eta konpentsatzen dituzte, zein den ere haien izaera, jatorria edo izena.

AZKEN XEDAPENA

Hitzarmen kolektibo honetan aurreikusten ez denari dagokionez, aplikatu beharko dira mendetasun egoeran dauden pertsonak artatzeko eta autonomia pertsonala sustatzeko zerbitzuen estatuko esparru-hitzarmenean jasotako xedapenak edo, hala badagokio, hura garatzen duten legezko xedapen osagarriak, edo Nafarroako hitzarmen kolektibo sektoriala, sinatzen bada.

XEDAPEN INDARGABETZAILEA

Indarra hartzen duenetik aurrera, hitzarmen honek ordeztuko ditu bertan jasotzen diren gaiak beste era batera arautu dituzten xedapen guztiak.

28. artikulua. Hitzarmen honetan hitzartutako lan baldintzak ez aplikatzea.

Hitzarmen honek indarra duen bitartean, honako baldintza hauek bete beharko dira enpresak hitzarmenean hitzartutako lan baldintzak ez aplikatzeko:

1.–Enpresak kontsultaldia irekiko du, 15 egunekoa, gai hauek aztertzeko: enpresak hartutako erabakia dakarten arrazoiak eta haren ondorioak saihesteko edo murrizteko aukera, bai eta ukitutako langileek jasan behar dituzten ondorioak leuntzeko neurriak ere. Epe berean emanen zaio aditzera hitzarmenaren Batzorde Paritarioari, eta langileen legezko ordezkaritzari egindako idazkiaren kopia erantsiko zaio.

Kontsultaldian, alderdiek fede onez negoziatu beharko dute, akordio bat lortzeko helburuarekin. Akordio horrek sindikatuen ordezkaritzaren adostasuna beharko du. Enpresaren eta langileen ordezkaritzaren artean ezarritako kontsulta aldian garatzen diren negoziazioetan akordiorik izanez gero, horren berri eman beharko zaio Batzorde Paritarioari.

2.–Adostasunik ez bada, kontsulta aldia bukatutakoan, edozein alderdik bost eguneko epean jar dezake desadostasuna hitzarmenaren Batzorde Paritarioaren menpe, eta horrek, gehienez ere, zazpi eguneko epea izanen du erabakitzeko, desadostasuna planteatzen zaionetik.

3.–Batzorde Paritarioak adostasunik ez badu, edozein alderdik jotzen ahalko du bost eguneko epean Lan Gatazkak Konpontzeko Nafarroako Auzitegiko Borondatezko Prozedurei buruzko Konfederazio arteko Akordiora.

Aplikazio ezari buruzko desadostasunak Aholku Batzorde Nazionalaren edo Nafarroako Foru Komunitatean horretarako sortzen den haren pareko organoaren mende jartzen ahalko dira; bi alderdien gehiengoen akordioa beharko da horretarako.

1. ERANSKINA.–SOLDATA TAULAK

Iragarkiaren kodea: F2607212