1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.1. Kargu-uzteak, izendapenak eta bestelako egoerak
118E/2025 FORU AGINDUA, apirilaren 25ekoa, Osasuneko kontseilariak emana, zeinaren bidez Osasunbidea-Nafarroako Osasun Zerbitzuko zuzendari kudeatzaileari eskuordetzen baitzaio honako eskumen hauen erabilera Nafarroako Osasun Zerbitzua-Osasunbideari atxikitako langileen berariazko erregimena arautzen duen urriaren 20ko 11/1992 Foru Legearen estamentu eta espezialitateen eranskineko osasun arloko izendapenen deialdiei dagokienez: batetik, lanpostu horietan sartzeko deialdiak onesteko eskumena, eta bestetik, lanpostu horiek betetzeko deialdiak onetsi eta ebaztekoa, baldin eta deialdian Osasunbidea-Nafarroako Osasun Zerbitzuari atxikitako lanpostuak eta Nafarroako Osasun Publikoaren eta Lan Osasunaren Institutuari atxikitako lanpostuak badaude.
Otsailaren 21eko 30/2005 Foru Dekretuaren bidez, Nafarroako Foru Komunitateko Administrazioko eta haren erakunde autonomoetako organoek langileen arloan dituzten eskudantziak mugatu ziren.
Sartzeko eta lanpostuak betetzeko deialdiei dagokienez, Osasun Departamentuaren kasuan, eskumen horiek Osasun Departamentuari eta hari atxikitako erakunde autonomoei (Osasunbidea-Nafarroako Osasun Zerbitzua eta Nafarroako Osasun Publikoaren eta Lanaren Institutua) esleitu zaizkie, kasuan kasuko deialdiak eragiten dien langileen arabera.
Nafarroako Osasun Publikoaren eta Lan Osasunaren Institutuari dagokionez, 13. artikuluaren b) eta c) letren arabera, institutuari eskudantzia hauen erabilera dagokio Nafarroako Osasun Zerbitzua-Osasunbideari atxikitako langileen berariazko erregimena arautzen duen urriaren 20ko 11/1992 Foru Legearen estamentu eta espezialitateen eranskineko osasun arloko izendapenen deialdiez den bezainbatean: batetik, sartzeko deialdiak onesteko eta izapidetzeko eskudantzia, eta bestetik, lanpostuak betetzeko deialdiak onetsi, izapidetu eta ebaztekoa, betiere deialdian sartutako lanpostu guztiak Nafarroako Osasun Publikoaren eta Lan Osasunaren Institutuari atxikita badaude.
9. artikuluaren arabera, antzeko eskudantziak dagozkio Osasunbidea-Nafarroako Osasun Zerbitzuari, betiere deialdian sartutako lanpostu guztiak erakunde autonomo horri atxikita badaude. Gainera, urriaren 20ko 11/1992 Foru Legearen estamentu eta espezialitateen eranskineko osasun arloko izendapenak dituzten lanpostuetan sartzeko eta betetzeko deialdiak tramitatzeko eskumena esleitzen dio, baldin eta deialdian Osasunbidea-Nafarroako Osasun Zerbitzuari atxikitako lanpostuak eta Nafarroako Osasun Publikoaren eta Lan Osasunaren Institutuari atxikitako lanpostuak badaude.
Hala ere, azken kasu horretarako, 12. artikuluak Osasun Departamentuari esleitzen dizkio, haren egitura organikoaren erregulazioarekin bat etorriz, departamentuaren mendeko erakunde autonomoei atxikitako langileei buruzko eskudantzia hauek:
a) Osasunbidea-Nafarroako Osasun Zerbitzuari atxikitako langileen berariazko erregimenari buruzko urriaren 20ko 11/1992 Foru Legearen estamentu eta espezialitateen eranskineko osasun arloko izendapenak dituzten lanpostuetan sartzeko deialdiak onestea, baldin eta deialdian Osasunbidea-Nafarroako Osasun Zerbitzuari atxikitako lanpostuak eta Nafarroako Osasun Publikoaren eta Lan Osasunaren Institutuari atxikitako lanpostuak badaude.
b) Osasunbidea-Nafarroako Osasun Zerbitzuari atxikitako langileen berariazko erregimenari buruzko urriaren 20ko 11/1992 Foru Legearen estamentu eta espezialitateen eranskineko osasun arloko izendapenak dituzten lanpostuak betetzeko deialdiak onestea eta ebaztea, baldin eta deialdian Osasunbidea-Nafarroako Osasun Zerbitzuari atxikitako lanpostuak eta Nafarroako Osasun Publikoaren eta Lan Osasunaren Institutuari atxikitako lanpostuak badaude.
Egungo egoeran, beharrezkoa da osasun arloko langileak sartzeko eta lanpostuak betetzeko hautapen prozesuak arintzea, zeinak, kasu batzuetan, Osasunbidea-Nafarroako Osasun Zerbitzuari eta Nafarroako Osasun Publikoaren eta Lan Osasunaren Institutuari atxikitako lanpostuei eragiten baitiete.
Deialdiak onetsi, izapidetu eta ebazteko eginkizunen erabilera Osasun Departamentuko organoen eta haren erakunde autonomoen artean banatua egoteak hautapen prozesu horien kudeaketan atzerapenak eragin ditzakeela jakinda, ikusi da egoki eta komenigarria dela eskumenak eskuordetzea, prozesu horien kudeaketa sinplifikatzearren.
Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.2 artikuluak xedatzen du kontseilariek beren eskudantzien erabilera beste bati eskuordetzen ahalko diotela, bertan zehazten direnak izan ezik.
Ildo berean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 12. artikuluak ezartzen du ezen Nafarroako Foru Komunitateko Administrazio Publikoaren goi organoek zilegi izanen dutela dagozkien eskumenen erabilera eskuordetzea beren erakunde publikoei eta mendean edo loturik dituzten entitateei, baldin eta hori komeni baldin bada esleiturik dituzten helburuak lortzeko eta beren kudeaketaren eraginkortasuna hobetzeko. Ezartzen du, orobat, eskuordetza eraginkorra izan dadin, eskumenak bere gain hartu behar dituen erakundeak edo entitateak aldez aurretik onartu beharko duela.
Osasunbidea-Nafarroako Osasun Zerbitzuaren zuzendari kudeatzailea eta Nafarroako Osasun Publikoaren eta Lan Osasunaren Institutuaren zuzendari kudeatzailea ados daude eskumen horiek eskuordetzan ematearekin.
Aipatu araudiak eman dizkidan ahalmenak erabiliz,
AGINTZEN DUT:
1. Osasunbidea-Nafarroako Osasun Zerbitzuko zuzendari kudeatzaileari honako eskumen hauen erabilera eskuordetzea, Nafarroako Osasun Zerbitzua-Osasunbideari atxikitako langileen berariazko erregimena arautzen duen urriaren 20ko 11/1992 Foru Legearen estamentu eta espezialitateen eranskineko osasun arloko izendapenei dagokienez: batetik, lanpostu horietan sartzeko deialdiak onesteko eskumena, eta bestetik, lanpostu horiek betetzeko deialdiak onetsi eta ebaztekoa, baldin eta deialdian Osasunbidea-Nafarroako Osasun Zerbitzuari atxikitako lanpostuak eta Nafarroako Osasun Publikoaren eta Lan Osasunaren Institutuari atxikitako lanpostuak badaude.
2. Eskuordetze horren bidez ematen diren ebazpenetan inguruabar hori azaldu beharko da berariaz, eta, ondorio guztietarako, Osasuneko kontseilariak emanak balira bezala hartuko dira.
3. Foru agindu hau igortzea Osasunbidea-Nafarroako Osasun Zerbitzuko zuzendari kudeatzaileari, Araubide Juridikoaren Zerbitzuari, Profesionalen Zuzendaritzari eta Hautapen Prozesuak, Lanpostuak Betetzea eta Deiak Kudeatzeko Zerbitzuari, Nafarroako Osasun Publikoaren eta Lan Osasunaren Institutuko zuzendari kudeatzaileari eta Kudeaketa Ekonomikoaren eta Profesionalen Zerbitzuari eta Osasun Departamentuko Idazkaritza Tekniko Nagusiari, behar diren ondorioak izan ditzan.
4. Foru agindu honek Nafarroako Aldizkari Ofizialean argitaratzen den egunetik beretik sortuko ditu ondorioak.
Iruñean, 2025eko apirilaren 25ean.–Osasuneko kontseilaria, Fernando Domínguez Cunchillos.
Iragarkiaren kodea: F2506247
