Iragarkia

80. ALDIZKARIA - 2025eko apirilaren 24a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

64C/2025 EBAZPENA, apirilaren 9koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Nafarroako industria siderometalurgikoaren sektoreko hitzarmen kolektiboko soldatak 2025ean berrikusteari buruzko akordioa erregistratzea, gordailutzea eta Nafarroako Aldizkari Ofizialean argitaratzea.

Aztertu da Nafarroako industria siderometalurgikoaren sektoreko hitzarmen kolektiboko soldatak 2025. urterako berrikusteari buruzko akordioa (hitzarmenaren kode-zenbakia: 31006805011981), erregistro honetan 2025eko martxoaren 18an sartua, enpresaren eta sindikatuen ordezkariek 2024ko martxoaren 13an sinatu ondotik.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta hitzarmen kolektiboak, lan-akordio kolektiboak eta berdintasun-planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasune Planen Erregistroan inskriba dadila agintzea.

Bigarrena.–Nafarroako Aldizkari Ofizialean argitara dadila xedatzea, orok jakin dezan.

Iruñean, 2025eko apirilaren 9an.–Ekonomia Sozialeko eta Laneko zuzendari nagusia, Iñaki Mendióroz Casallo.

NAFARROAKO FORU KOMUNITATEKO INDUSTRIA SIDEROMETALURGIKOAREN SEKTOREKO 2022-2026KO LAN-HITZARMEN KOLEKTIBO AUTONOMIKOAREN BATZORDE PARITARIOAREN AKTA, 2025EKO SOLDATA-IGOERARI BURUZKOA

Iruñean, 2025eko martxoaren 13an.

Iruñean, 2025eko martxoaren 13ko 9:00etan, Batzorde Paritarioaren egoitzan bildu dira, Nafarroako Lan Auzitegiaren lokaletan (Kale Berria 30-32, behea, Iruña), Nafarroako Foru Komunitateko industria siderometalurgikoaren sektoreko lan-hitzarmen kolektibo autonomikoaren batzorde paritarioko kide hauek:

José Manuel Ayesa Villar jauna, Asociación Navarra de Empresarios del Metal (ANEM) elkartearen aldetik.

Alfonso Huici Mariscal jauna, Asociación de la Pequeña y Mediana Empresa del metal de Navarra (APMEN) elkartearen aldetik.

Lorenzo Ríos González jauna, UGT sindikatuko Industriaren, Eraikuntzaren eta Nekazaritzaren Federazioaren (FICA-UGT) aldetik.

José Manuel Romeo Álvarez jauna, CCOO sindikatuko Industria Federazioaren (FI-CCOO) aldetik.

Guztiek,

ADIERAZTEN DUTE:

A) SOLDATA BERMATUAREN SOLDATA-TAULAN APLIKATU BEHARREKO IGOEREI ETA SOLDATA ERREALEI APLIKATU BEHARREKO IGOERARI DAGOKIENEZ.

1. Nafarroako Foru Komunitateko industria siderometalurgikoaren sektoreko 2022tik 2026rako lan-hitzarmen kolektibo autonomikoa sinatu zen 2022ko azaroaren 4an.

Legezkotasun kontrola gaindituta, lan-hitzarmen kolektiboen erregistroan gordailutu zen, lan-arloko agintaritza eskudunak erregistratu ondotik.

2. Nafarroako Foru Komunitateko Industria Siderometalurgikoaren Sektoreko Erkidegoko Hitzarmen Kolektibo 41.A-D.1) artikuluak honako hau ezartzen du, hitzez hitz, 2025eko soldata igoeraz:

D.1. Soldata bermatuaren taula eguneratzea.

2025eko urtarrilean, Soldata Bermatuaren taula eguneratuko da. Hori horrela, 2021eko urtarrilaren 1etik 2023ko abenduaren 31ra bitarteko aldian Estatuko kontsumoko prezioen indizearen igoera %14,12tik gorakoa bada (2022, 2023 eta 2024an aplikatutako hazkundeei dagokiena), indarrean dagoen Soldata Bermatuaren taulari aplikatuko zaio dagokion diferentziala, 2025eko urtarrilaren 1etik aurrerako efektu-datarekin eta, beraz, atzerapenik ordaindu gabe. Taula berri hori abiapuntu izanen da 2025eko igoera soldata bermatuaren taulari aplikatzeko.

Eguneratzearen emaitza negatiboa bada, taulari ez zaio aplikatuko berrikuspenik, eta 2025erako soldata igoera aplikatzeko oinarri gisa finkatuko da.

Artikulu hori aplikatzearen ondorioz, eguneratzea %1,94koa da, 2021, 2022 eta 2023 urteetan metatutako KPIen baturari (%16,06) %14,12 kentzearen emaitza gisa. Modu horretan, soldata-taula hauen arabera egin behar da 2025eko soldata-igoera:

Horrekin guztiarekin, ez da bidezkoa izanen eguneratze horren ondorioz atzerapenak ordaintzea, eguneratzearen xede bakarra 2025eko hitzarmenean xedatutako igoera aplikatzeko oinarria finkatzea baita.

3. Bestalde, Hitzarmenaren 41.A.D. 2.2 artikuluak, soldata bermatuaren gaineko 2025erako igoerei buruzkoak, hau xedatzen du:

Soldata bermatuaren gaineko igoerak.

2025. urtean lanbide-talde bakoitzerako soldata bermatuaren zenbateko gordinari dagokionez, %2 aplikatuko da, 2024. urtean kontzeptu horrek izan zituen zenbatekoak oinarri hartuta, edo, kasuaren arabera, soldata bermatuaren taulari berrikuspena aplikatzetik eratorria (aurreko D.1 apartatuan ezarritako baldintzetan). Lanbide-talde bakoitzerako soldata bermatuaren zenbatekoa, 2025. urterako, eranskineko taulan agertzen da, zeina aurreko irizpidearekin bat kalkulatzen baita.

Hau da 41.A.D.1 artikuluan zehazten den %2ko ehunekoa taulari aplikatzearen emaitza:

4. Bestalde, Hitzarmenaren 41.A.D. 2.1 artikuluak, soldata errealen gaineko 2025erako igoerei buruzkoak, hau xedatzen du:

1.–Soldata errealen igoerak.

Hitzartu da 2025rako igoera %2koa izanen dela 2024an esleitutako banakako batez besteko soldata-kontzeptu gordin guztietan, homogeneotasunez eta enpresek duten soldata-egiturari eutsiz.

Horren ondorioz, adierazitako ehunekoko igoera aplikatuko zaie soldata errealei, eta enpresek aukera izanen dute beharrezko diren barne-banaketak egiteko nominako kontzeptuetan, azken soldata-igoera oro har adostutako %2koa izanik, nominaren egitura hitzarmenaren araberakoa izan dadin.

Horretarako, taulan jasotzen diren erakunde sinatzaile guztien ahobatezko adostasuna beharko da.

B) ANTZINATASUNARI, PLUSEI ETA DIETEI APLIKATU BEHARREKO IGOEREI DAGOKIENEZ.

Puntu horren harira, desadostasuna dago enpresaburuen elkarteen eta sindikatuen artean.

Enpresaburuen elkarteen ustez, kontzeptu horiek 2025erako ezarritako %2ko ehunekoan goititu behar dira, bai soldata bermatuetan, bai soldata errealetan. Iritzi hori gertaera honetan oinarritzen dute: negoziazio-prozesuan, adostu zen 2024ko abenduaren 31n indarrean ziren KPIaren balioen gaineko diferentzialen arabera aplikatzea eguneratzea, baina soldata bermatuaren taularen gainean bakarrik, ez bestelako kontzeptu batzuetan.

Sindikatuen ustez, goititze-igoera hori egokia den arren, aplikatu aurretik, KPIaren diferentzialak berrikustearen %1,94ko goititze-ehunekoa aplikatu behar zaie. Beren jarrera artikulu hauen eduki literalean oinarritzen dute: 42. artikulua (pizgarri-gabeziaren plusari dagokionez), 45. artikulua (aparteko orduei buruzkoa), 46. artikulua (antzinatasunari buruzkoa) 47. artikulua (toxikotasun-, nekagarritasun- eta arrisku-plusei buruzkoa), 48. artikulua (gaueko lanaren plusari buruzkoa) eta 49. artikulua (dietei buruzkoa). 2025erako goititzeari aplikatu beharreko goititzeez ari direla, 41-A.D artikulua aipatu dute, hango 1. eta 2. apartatuak bereizi gabe; horrenbestez, bi apartatuak aplikatu beharko lirateke.

Bi alderdiek adierazi dute hitzartutakoa betetzeko asmo sendoa dutela. Espedienteko dokumentazioa berrikusi da, alderdiek benetan zer borondate zuten ondorioztatzeko. Horretarako, 12. eta 13. bileretako aktak aztertu dira, aurrekari historiko gisa, alderdiek negoziazio-mahaiaren saioetan egindako proposamenak, aurreakordioa eta testu artikulatua jasotzen baitituzte.

Aktak aztertuta, ondorio hauek atera dira:

–Goititzeak, bai soldata bermatuarenak, bai soldata errealenak, hauek dira, hitzarmenaren indarraldirako:

• 2022., 2023. eta 2024. urteak, %4,5 hiru urteetako bakoitzean.
• 2025. eta 2026. urteak, %2, bi urteetako bakoitzean.

–2025erako eta 2027rako ezarritako berrikusteak ezin dira soldata-igoeratzat jo. Izan ere, soldata bermaturako adostu zen berrikuste bat da, sektoreko soldata baxuenek (hau da, hitzarmenera bakarrik lotuta daudenak, inolako hobekuntzarik gabe) ez zezaten erosahalmenik galdu.

–12. bileran, 2022ko urriaren 25ean, enpresaburuek eta sindikatuek (UGT eta CCOO) egindako proposamen guztietan, KPIaren araberako eguneratzearen erreferentziak 2025eko eta 2027ko soldata bermatuaren taulei bakarrik dagozkie, eta hala jasotzen da bileraren aktan. Bilera horretan, ez zen inolako aipamenik egin hitzarmeneko gainerako soldata-kontzeptuen inguruan.

–Horrenbestez, aurrekari historikoek zehazten dutenez, antzinatasunari, pizgarri-gabeziaren plusari, aparteko orduei, toxikotasun-, nekagarritasun- eta arrisku-plusei eta gaueko lanaren plusari dagokien goititzerako, irizpide egokia da goititze-ehunekoa urte horretarako soldata bermatuentzat eta errealentzat aurreikusitako %2ko ehunekoa, alderdi sinatzaileetako batek ere ez baitzuen ez proposatu ez onartu adierazitako kontzeptuak eguneratzea, aktetan jasotzen denez.

–Ez aurreakordioan, ez testu artikulatuan, ez da zehazten Hitzarmenaren 41 A artikuluko D.1 apartatua ez zaienik aplikatzen adierazitako kontzeptu horiei, baina hori aurreko hitzarmena arrastatzean egindako akats bat da. Izan ere, aurreko hitzarmenaren testua mantendu da, eta 2025erako eta 2027rako aurreikusitako KPIaren eguneratzea hitzarmen honetako berritasun bat da.

Horretan oinarriturik, alderdiek, hitzarmenean ezarritakoarekin bat,

HONAKO HAU ERABAKI DUTE:

Lehena.–2025erako soldata bermatuaren igoeraren ehunekoa, ondorioetarako data 2025eko urtarrilaren 1a dela, %2koa izanen da, eta dokumentu honetako azalpenetako 2. puntuan jasotako taula eguneratuari aplikatuko zaio.

Bigarrena.–2025erako soldata errealei dagokienez, 2025erako igoera %2koa izanen da 2024an esleitutako banakako batez besteko soldata-kontzeptu gordin guztietan, homogeneotasunez eta enpresek duten soldata-egiturari eutsiz; ez da zenbatekorik eguneratzen ahalko eragiketa horren aurretik.

Ehuneko berean goitituko dira antzinatasuna, pizgarri-gabeziaren plusa, aparteko orduak, toxikotasun-, nekagarritasun- eta arrisku-plusa eta gaueko lanaren plusa.

Hirugarrena.–Hitzarmenaren 41-D artikuluan ezarritakoaren bidetik, ulertzen da aipatu berri denak ez dituela deusetan ukatzen enpresetan negoziazio kolektiborako prozesuetan soldatei buruz lortutako akordioak, barne direla lan-hitzarmen kolektiboak, enpresa-itunak, lan-baldintzak funtsean aldatzeko espedienteak edo lan-kontratuak eten/bertan behera uzteko enplegu-erregulazioko espedienteak, hitzarmen hau argitaratzen den eguna baino lehenagokoak, horiek guztiak beti errespetatuko baitira.

Laugarrena.–Atzerakinak ordaintzeari dagokionez, erabaki da kasuko atzerakinak akta hau Nafarroako Aldizkari Ofizialean argitaratzen den hileko nominan ordainduko direla, argitalpen hori hilaren 1etik 15era bitarte egiten bada. Hilaren 16tik azken egunera bitarte argitaratzen bada, berriz, atzerakinak hurrengo hileko nominan ordaindu beharko dira.

Eta ados daudela erakusteko, erakunde sinatzaileek akta hau formalizatu dute goian aipatutako tokian eta egunean.

ANEM APMEN

UGT CCOO

SOLDATA-IGOERA ETA ZENBAIT HITZARMENI APLIKATZEKOAK DIREN ZENBATEKOAK, NAFARROAKO FORU KOMUNITATEKO INDUSTRIA SIDEROMETALURGIKOAREN SEKTOREKO 2025EKO LAN-HITZARMEN KOLEKTIBOAN

1.–Soldata bermatuaren igoera:

%2, dokumentu honetako azalpenetako 3. puntuan jasotako taula eguneratuaren gainean.

2.–Soldata errealen igoera:

%2koa izanen da 2024an esleitutako banakako batez besteko soldata-kontzeptu gordin guztietan, homogeneotasunez eta enpresek duten soldata-egiturari eutsiz; ez da zenbatekorik eguneratzen ahalko eragiketa horren aurretik.

Puntu honetan, jasotzen da ezen, akta honen 1-A-2 apartatuan zehazten den KPIaren eguneratzea soldata errealari aplikatzea bidezkoa ez den neurrian, nomina-egituretako soldata bermatuaren zenbatekoa taulan zehaztutako zenbatekoaren azpitik gelditzen ahal dela.

Ondorio hori saihesteko, enpresek aukera izanen dute hitzarmenaren 42. artikuluan kasu horietarako berariaz aurreikusitako nominako kontzeptuen barne-banaketak egiteko. Argi utzi behar da horrek ez dakarrela berekin konpentsaziorik eta irensterik, goititze aplikagarria (%2) soldata osoari aplikatzen baitzaio.

3.–Antzinatasuna: %2 igo da 2024ko balioen aldean, eta ez da bidezkoa eragiketa horren aurretik inolako zenbatekorik eguneratzea. Hona hemen zenbatekoak:

4.–Plusak: toxikotasuna, arriskugarritasuna eta nekagarritasuna, osasun-zentroak, gaueko lana: %2 igoko dira 2024ko abenduaren 31n indarrean diren balioen aldean, eta ez da bidezkoa eragiketa horren aurretik inolako zenbatekorik eguneratzea. Hona hemen zenbatekoak:

5.–Bidaiak eta dietak:

Langileek enpresaren aginduz egin behar dituzten joan-etorrietan, garraio gastuez gainera 48,25 euro kobratuko dituzte eguneko dieta osoagatik, non eta joan-etorria hiru egunetik beherakoa ez den, horrelakoetan dieta 58,79 eurokoa izanen baita eguneko.

Dieta-erdia 27,95 eurokoa izanen da eguneko.

6.–Lanbide-taldeen 2025erako soldata bermatuak:

7.–Aparteko orduak:

Aparteko ordu bakoitzaren urteko batez besteko prezioa goitituko da 2024an 2025erako ezarritako %2ko zenbatekoan, eta ez da bidezkoa izanen inolako zenbatekorik eguneratzea eragiketa horren aurretik.

ANEM APMEN

UGT CCOO

Iragarkiaren kodea: F2505451